الثلاثاء، ٨ جمادى الأولى ١٤٢٩ هـ

(16)مذكرات طفل .. طخين

!! المحطة الستاشر .. سندبيس
---------------------
جلس الجميع .. ابويا وامي وسونيا وسامبا والحارس عالارض يتناولون الاكل اللي جابوه من عبده كفته .. وكانت امي هي المتحكمة في توزيع الأكل على القاعدين .. عشان ماحدش ياخد مناب اكتر من مناب التاني
امي : - وهي تعطي سونيا حتة كباب - كُلي يابنتي .. كُلي عشان تتخني شويه بدل مانتي مسلوعه
سونيا : ياخبر يا حاجه .. اتخن اكتر من كده اروح فين
ابويا : - وهو بيكلم سامبا - كل يا سامبا كل .. ده زي بيتكم برضه
سامبا : - وهو بيكلم أبويا - مانا باكل اهو يا حاج .. انا هتكسف يعني
امي : - وهي تكلم سونيا - اكتر حاجه تعجب الراجل .. هي الست العفيه
ابويا : - محدثا الحارس - اكتر حاجه تبقى حلوة في الشوي .. هي الريش
سونيا : - وهي تكلم امي - راجل مين بقى .. ماخلاص يا حاجه كبرنا عالكلام ده
سامبا : - وهو يكلم الحارس - ميزة الكفته الضاني انها بتبقى اخف في البلع عن الكندوز
امي : - لسونيا - فشر .. طب ده انتي زي القمر
ابويا : - للحارس - وانت بقى اسمك ايه ؟؟
سونيا : - لامي - والله يا حاجه انا نفسي جزعت عن صنف الرجاله خلاص
الحارس : - لأبويا - خدامك عيد يا حاج .. عيد سعيد
ابويا : - للحارس - وانت من أهل الخير
كانت القعده يسودها جو من المحبه والألفة بين الجميع .. وكأن كيوبيد قد القى بسهام الحب في قلوب الجميع وجمعهم على حب الكباب والكفته .. ولكن سهام كيوبيد لم تكن كافيه .. فاتصل البيج بوص بسونيا .. وما ان سمعت شعبولا وهو يصدح برائعته أنا باكره اسرائيل .. حتى قامت بمسح يدها من الكباب والكفته في ملابسها واعتدلت في جلستها وأخرجت الموبيل من جيبها وقالت
سونيا : - وهي تبلع الاكل وتلعب بلسانها مابين اسنانها - ايوه يابوص
الصوت : يادي النيله .. يابنتي مش قلتلك بلاش كلمة بوص دي خالص
سونيا : - وهي ترفع حاجبها وتشرب بؤ ميه عشان تبلع حته كفته واقفه في زورها - أُمال اقول ايه يعني يابوص ؟؟؟
الصوت : ماتقوليش .. ماتقولييييييييييش .. انتي بتاكلي ولا ايه ؟
سونيا : آه يا بوص .. بناكل كباب من عبده كفته .. تاكل معانا؟؟
الصوت : - مندهشا - عبده كفته مره واحده .. الله يرحم لما كنتي بتضربي سجق من زيزو نتانه .. وبتعملي فرح لما تحلّي برغيف سَكلانس
سونيا : خبر ايه يابوص .. مره من نفسنا ناكل لقمة حلوة
الصوت : ومالو ياستي .. بس بتاكلي انتي ومين ؟؟
سونيا : اصل ابو سوووو وامه طلبت معاهم أكل نضيف .. قمنا جايبينلهم الاكل وسامبا حاسب من فلوس الجمعية اللي داخلها هو وخطيبته عشان يجيبو بيها الغساله الفول أتوماتيك
الصوت : - صمت تام .. تقريبا جالو شلل رعاش
سونيا : - وهي مستغربه - يابوص
الصوت : - مقاطعا ومتنرفزا وطالع تربنتينه - بوص ايه ونيلة ايه .. انتو فاكرين نفسكم طالعين رحلة .. دي مهمة يابقر .. مهمة يابقر .. عارفه يعني ايه مهمة ؟؟
سونيا : - وهي في قمة الارتباك - لأ .. عارفين يعني ايه بقر
الصوت : - وهو يبكي - فوضت أمري اليك يارب .. حسبي الله ونعم الوكيل فيكي يا سونيا وفي اللي بتعمليه فيّ
-------
مصطفى شعبان : - مندهشا - مستحيل ننسحب دلوقتي
توفيق عبد الحميد : لازم ننسحب من العملية .. الامور خرجت عن سيطرتنا خلاص
منى زكي : طب واحنا مالنا بحوار المحافظات الجديده اللي اتعملت ده يافندم
توفيق عبد الحميد : معنى ان المعادي تبقى مع حلوان في محافظه واحده .. وسوووو اصلا من المعادي .. يبقى الحوار خرج عن نطاق الجهاز بتاعنا ودخلو في نطاق دايره تانيه
مصطفى شعبان : بس احنا خلاص قطعنا مرحلة كبيره مع سوووو
منى زكي : وماتنساش كمان حضرتك ان اهله لسه مخطوفين واننا لازم ننقذهم
توفيق عبد الحميد : دي لوايح وقوانين ماينفعش اننا نبوظها ونتخطاها
مصطفى شعبان : خلاص يافندم .. انا لقيت الحل
منى زكي : ايه يا مصطفى ؟
مصطفى شعبان : نطلب نقلنا انا ومنى لمحافظة حلوان لغاية ماتخلص العمليه
توفيق عبد الحميد : ياخي اتنيل .. مش لما يعملو مبنى محافظه ومديرية أمن للمحافظه الاول
------
كانت خطة الامين خالد صالح ان اتحط في شوال من شِولَة الدقيق المدعم اللي هتروح لأحد المخابز اللي بتبيع الدقيق في السوق السوده .. ومن خلال موبيل إداهوني هقولو احنا ماشين ازاي ورايحين فين عن طريق اني اقطع حتة من الشوال واشوف السكه
وفعلا .. اتحطيت في شوال وطلعت في العربيه عالفرن .. وانا هناك سمعت
صوت واحد : - بلهجة الآمر - نزلو قد اربع خمس شِولَة بس
صوت اتنين : طب والباقي ياريس
صوت واحد : الباقي هيفضل في العربيه عشان هنوديه للمخزن
صوت تلاته : طب مش احنا كل مره بننزلهم كلهم وبعدين نحملهم في العربية التانيه
صوت واحد : لأ ماهو احنا عرفنا نظبط السواق بتاع الوزارة .. وبقى معانا خلاص
صوت اتنين : الله عليك ياريس .. بتعرف تقنع أي حد وتاخده تحت باطك
صوت واحد : أكل العيش بقى صعب .. والناس كلها بقى عندها استعداد تبيع ضميرها .. المهم تعرف سعر كل واحد
كاد أحدهم ان يشيلني بالشوال اللي انا فيه .. لكن تقريبا لقى وزني تقيل فسأل الريس
صوت تلاته : ياريس .. في شوال هنا شكلو اتقل من باقي الشولة .. ننزلو يتعمل عيش ولا نخليه عالعربيه
أحدهم الأولاني : لأ .. خليه عالعربيه .. عيش ايه اللي يتعمل .. كل مايكون وزن الشوال اكتر كل مايجيب فلوس أكتر
وفعلا .. فضلت في العربيه .. واتضح ان الامين خالد صالح عنده حق لما اختارني اعمل المهمة .. من شكلي حس اني انفع شوال محترم
بمجرد ما العربيه اتحركت رحت متصل بالامين خالد صالح زي ما اتفقنا
سوووو : - بصوت واطي - ايوه يابو خللود
خالد صالح : ايوه يا سوووو .. علي صوتك شويه
سوووو : لا مش هينفع اعلي صوتي اكتر من كده .. احسن السواق يسمعني
خالد صالح : خلاص ماشي .. انت دلوقتي فين بالظبط
سوووو : مش عارف .. انا خرمت خرم في الشوال وبابص حوالي مش باين غير طريق زراعي والترعه على جنبي
خالد صالح : طب مافيش أي علامة مميزه ولا يافطه ولا أي حاجه
سوووو : في يافطه مكتوب عليها اهلا بكم في سندبيس .. ايه سندبيس دي؟؟
خالد صالح : دي قرية في القليوبيه .. قريبه من القناطر الخيريه
سوووو : استنى استنى .. احنا داخلين في وسط زرع على طريق متسفلت
خالد صالح : حلو قوي .. شايف ايه بقى ؟؟
سوووو : احنا داخلين على مخزن تقريبا .. انا شايف يافطه مكتوب عليها حاجه بس مش قادر اقراها كويس
خالد صالح : لأ ابوس ايدك .. ركز واقراها كويس
سوووو : ايوه ايوه قريتها خلاص
خالد صالح : طب مكتوب ايه ؟؟؟؟؟
سوووو : مكتوب عليها .. الأمانة العامه للحزب الوطني
-------
يتبع

سوووو

هناك ١٠١ من التعليقات:

فاتيما يقول...

ولا يا سوووو
إنت كدا داخل فى الغميق
امانة إيه و بتاع دول بيختلسوا دقيق الشعب ؟؟
تقولى أمانة ؟؟
مصدقشى طبعا ًً
و إيه نظام حلوان دا هيسيبوا الواد سووو كدا و يبيعوه على أول ناصية ؟؟
و كنت هصحى الحاجة من النوم دلوقتى لولا مسكت روحى و كتمت الضحكة ...
إيه الروح العائلية الجميلة دى ما بين أسرة الفيلم و الله احلى ناس إحنا مفيناش الا القلب الحنين دا
و أبقى طمنا بقى على البوص بتاع سونيا لحسن صعب عليا قوى يا يعنى
على فكرة بوصل السلام علطول و بينوبك دعوة كدا كل ما اجيب سيرتك
و على فكرة برضو الحلقة المرة سبع نجوم
تحياتى يا صديقى الغالى

فاتيما يقول...

سوووو
و انا بكتب البوست الجديد عندى إفتكرتك لأنى نفسى أشوفك زى الراجل دا ...
بس من غير بهدلة
ربنا يكتبلك الخير يا رب
و أشوفك كاتب ساخر عظيم زيه
تحياتى

Mafrousa يقول...

انت ممكن تبقى سيناريست درجه اولى

انا مش حعلّق اكتر من كده لحسن اتعلق هههههههه
و امانه........عليك ماتجيب سيرتى فى التحقيق انى كنت بادخل عندك أقرى البوست و اعلق هههههههههه

اهو ده عيبه يقول...

حلو موت جو الاسرة ده ولا كانهم فى رحلة للقناطر
ناقص ياكلوا بعض بايديهم

لا بس ملعوبة حكاية المحافظات، ده تلاقى محافظ حلوان قاعد فى كشك لغاية ما يعملوا مبنى

بس انت بدات تخبط فى الحلل يا سووو
امانه ايه وخيانه ايه يجعل كلامنا خفيف عليهم

بلاش والنبى لعب مع الاسد
وابقى تعال مسى على ياخويا بقالك كتير مبتجيش

الـسـيـدة نـون يقول...

اوبااااااااا
انت دخلت فى الامانة العامة
يبقى قول على نفسك يارحمن يارحيم
يابنى ما انت كنت ماشى كويس
ايه اللى خلاك تحود على الحزب

اهه انا كدة اقدر اصدق المذكرات بتاعتك
واقول بقلب جامد
سوووو اتخطف يارجالة

او ممكن اقول
سوووو هيتخطف يارجالة

قلبى عندك
اختك خيخة

كاميليا بهاء الدين يقول...

ابويا : - وهو بيكلم سامبا - كل يا سامبا كل .. ده زي بيتكم برضه
سامبا : - وهو بيكلم أبويا - مانا باكل اهو يا حاج .. انا هتكسف يعني
امي : - وهي تكلم سونيا - اكتر حاجه تعجب الراجل .. هي الست العفيه
ابويا : - محدثا الحارس - اكتر حاجه تبقى حلوة في الشوي .. هي الريش
سونيا : - وهي تكلم امي - راجل مين بقى .. ماخلاص يا حاجه كبرنا عالكلام ده
سامبا : - وهو يكلم الحارس - ميزة الكفته الضاني انها بتبقى اخف في البلع عن الكندوز
امي : - لسونيا - فشر .. طب ده انتي زي القمر
..................
Soooo

أنا أحييك على الذكاء اللى فى الحوار ده .. اذا اعتبرنا ان طرفى الحوار اثنين فقط وكل اجابة ردا على ماقبله

انا هاروح اقرأ تانى بقى
اصل دايما اقرأ مرتين
حضرتك بتستعمل كلمات جديدة عليا خالص

تحياتى

Unknown يقول...

صباح العندليب

طب انا عايزة اعرف هو خالد صالح قدر يشيلك ازاى و كمان جو الشوال

الله يكون فى عون الراجل

---------

انا قريت ردك علي تعليقى فى الحلقة الى فاتت .. أصل صعب عليا يا سووو بصراحة لما لمحت لحتة الناس الى من الغم و النكد نسيت ازاى تضحك و كنت حتخلينى بجد ابطل أفضفض همومى ع المدونة تانى

ع العموم حصل خير

سلامووووووووووووز

رئيس جمهوريه نفسى يقول...

ويستمر التشريح
اولا حقتبس نقطتين
مش لما يعملو مبنى للمحافظه ومديريه امن الاول
فعلا يا غالى والله قرارات مش مدروسه ولا معروف المقصود بيها ايه بس هو نقرر وبعدين نشوف التنفيذ حيكون ازاى
الثانيه
صوت واحد : لأ ماهو احنا عرفنا نظبط السواق بتاع الوزارة .. وبقى معانا خلاص
صوت اتنين : الله عليك ياريس .. بتعرف تقنع أي حد وتاخده تحت باطك
صوت واحد : أكل العيش بقى صعب .. والناس كلها بقى عندها استعداد تبيع ضميرها .. المهم تعرف سعر كل واحد
الناس دلوقتى بقى ليها سعر فعليا والناس معزوره شايفه الكبير بيبع ويشترى حتبقى هى على الاخلاق ليه ولو بقيت حتموت من الجوع
موضوع الامانه العامه للحزب الوطنى فعلا حاميها حراميها
شرح يا بنى شرح وتعالى على الوجع
---------------------------
الصوت : - مقاطعا ومتنرفزا وطالع تربنتينه - بوص ايه ونيلة ايه .. انتو فاكرين نفسكم طالعين رحلة .. دي مهمة يابقر .. مهمة يابقر .. عارفه يعني ايه مهمة ؟؟
سونيا : - وهي في قمة الارتباك - لأ .. عارفين يعني ايه بقر
عجبنى قوى الافيه ده

Doba يقول...

يا نهارك مش متفوتر يا سووووووووو
امانة الحزن الوطتتى على رأى آبى مرة واحدة

لالالالالالالالالالالالا
كده بقى فيها إنه وإنه كبيييييييييرة كمان

بس عسل الماما بتاعت سووووو ومدلعة سونيا وحركات بس ازاى سونيا وبتمسح فى هدومها ومتكحرته بالشكل ده

بس ماشاء الله عليك بجد بتكتب حلو قوى
ربنا يوفقك وتقدر تستفيد من موهبتك

تحياتى
هبة

اميره الصعيد يقول...

لا حول ولا قوه الا بالله
طب يعني يوم ما يخطفوك مين اللي هيكمل المذكرات
يا سيدي العجوز ما احنا كلنا عارفين الدقيق بيروح فين بس عاملين ان احنا مش واخدين بالنا

المـــفـــــــقــــــــوعـــــة مــرارتـهــا يقول...

حلو البوست ده ملعوبة ياسوووو
اهو ده الحزب الوطني وعمايله
ماهو اللي بيحصل ده مش طبيعي في البلد يعني خلاص الحرامية لابسينطقية أخفي
أتاري الحرامية مسنودين
حاميها حراميها

خمسة فضفضة يقول...

السلام عليكم ورحمة الله وبركاته


سووو انت بتحب الحلاوه ساده ولا بالبندق ؟؟

والعيش دا لو لاقيناه يعني تحبه فينو ولا عادي ؟؟
ههههههههههه

هي حصلت الامانه العامه للحزب الوطني ،هو انت عاوز عمو جمال يزعل منك ولا ايه

:-)

همس الاحباب يقول...

سووووو يا سووووووووو
ايه ده كله يا باشا
انت جامد قوى يا باشا
وعليك كلام يودى مارينا يا راجل
أكل العيش بقى صعب .. والناس كلها بقى عندها استعداد تبيع ضميرها .. المهم تعرف سعر كل واحد
يخرب بيت شيطانك
والامانة العامة للحزب الوطنى
كده يا سووووووو
بس بجد تسلم دماغك
تحياتى
خالد

رندا يقول...

كانت خطة الامين خالد صالح ان اتحط في شوال من شِولَة الدقيق المدعم اللي هتروح لأحد المخابز اللي بتبيع الدقيق في السوق السوده .. ومن خلال موبيل إداهوني هقولو احنا ماشين ازاي ورايحين فين عن طريق اني اقطع حتة من الشوال واشوف السكه
وفعلا .. اتحطيت في شوال وطلعت في العربيه عالفرن .. وانا هناك سمعت
صوت واحد : - بلهجة الآمر - نزلو قد اربع خمس شِولَة بس

..............

عارف ياسوو انا اول لما افكر بس انى افتح المدونة بقعد اضحك
وبعدين شوال دقيق ازاى وبتتكلم فى الموبايل
انا عمالة اتخيل الدقيق وشكل سوو وهو طالع منة
تعبيرات جديدة وافكار جديدة فى القصة
حلووووة جدا فعلا

دمت بكل ود

رندا

مشمش يقول...

خلي بالك من نفسك ياسوو انت مستهدف لو حسيت بهوا في افاك وانت قاعد علي الكمبيوتر متتخضش الحكومة عارفة كل حاجة
بس بجد تحفة اوي البوص دة صعبان عليا مووت

مروة الزارع يقول...

وحشتنى يا سو جداااااا

مقدرتش أرحمك منى وهرجع أقرفكم تانتى

يالا بقى

أنتظروا عودة المنتقمة

هههههههههههههههههه

Dr. Ibrahim يقول...

أهلا وبدأ سووووو والمتاعب

قشطة يا حج سوووووو

الوداع
ابقى اديلى رنة قبلما يخدوك
أوبليزكال مى عشان اصورالحث


د/هيما

حمامة يقول...

الأمانة العامه للحزب الوطني

:D
:D
:D

الساحرة يقول...

انت اللي قلت بنفسك

الامانه العامه يعني بيخلوة امانه عندهم

احسن يتسرق

وبالنسبه لمحافظه حلوان فالحال من بعضه

Rosa يقول...

الأمانة العامه للحزب الوطني????????????????????????
آآآآآآه المدونه دي شكلها هتوديما في مشكله كبيره
لا مش داخله تاني يا عم
:D
-----------
الحوار بتاع سونيا و ام سووووو جاااااااااااااااااااامد
و ليا استفسار كده ايه شندوشت الاكسلانس ده؟؟؟؟
افيدنا افادكم الله
:D

دكتور كسلان يقول...

ازيك يا سووو
معلش انا ما زرتكش من زمان
بس انا اكيد اللى خسرن
انا عايز اقولك كلمة واحدة بس
والله انت زى العسل

ان شاء الله مش هتاخر فى زيارتك تانى

سلااااااااااااااااااااااااااااااااااااااااااااااااااااااااااااااااااااااااااااااااااااام

فرنسا هانم يقول...

احمد ربنا انهم سابوك على العربيه ياسووو
احسن الناس دول بينزلوا الاشوله بالهوك وانت عارف الهوك ممكن يعورك ويعملك واوا
عموما
طالما وصلت لمخزن الامانه بتاع الحزب الوطنى لو سمحت فى عربيه مسروقه من جارنا شوفها كده هناك

أبو خالد يقول...

أبنى الحبيب الغالى/سوووو
و الله ما لك حل ..أضحكتنى من أعماق
قلبى رغم أنى كنت فى غاية الحزن..
أصبت كبد الحقيقة..

يوميات فنانه مفروسه جداا يقول...

اولا الاكل يا سوووووووو حرام عليك بجد
انا بجوع كل مبدخل عندك
ثانيا مالها حلوان بقي ان شاء الله يا بني انتو لكو الشرف ان المعادي تبقي تبع حلوان
ثالثا حزب ايه وديمقراطي مين يابني خاف علي نفسك ربي العيلين الله يرضي عليك دول ناس زي الفل ربنا يعمر بيوتهم قادر يا كريم
وربنا انا بقيت استني الحلقات من كتر جمالها.
ربنا يديم عليك نعمة خفة دمك
تحياتي

رحــــيـل يقول...

ايه ده

هما هيبعوا سوووو من اولها كده يعينى عليه وهو كان مأمن ومش مخون
وبعدين هو مين بيسرق مين
هو مين بيعمل ايه
ايه ده
هو احنا فين اساسا

مستنين باقى الحلقات

احلى سلام

غير معرف يقول...

هههههههههههههههههه

يخرب عقلك يا سووووووو

الحلقه دى جااااااامده اخر حاجه بجد
وقعتنى من الضحك على سونيا

لا والدقيق طالع على فيييييييييين

جامده جامده وعايزة اعرف بقى هيحصل ايه


سلاخووووووووووخ
:))

Z_Diva يقول...

loooooooooooooooooooooooooool
la gamda gamda elyafta de ya soooo
ahy de elm5azn walla ballash :D
we belnsba le7kyt dam elma3ady lwelayt 7lwan... hal hazihy 7akika 3lmya, am a7d 5taref smowak ???
la7sn de tb2a 7ga serialya awy
ya m7afzatik ya holanda :D

الـجـدة فـصـيـحـة يقول...

السلام عليكم ورحمة الله وبركاته


الجح والحجة دول طيبين جدا
مهنش عليهم ياكلوا لوحدهم
عزموا على خاطفيهم كمان


-------------------------

استخدمت موضوع المحافظات الجدد
بشكل جمييل جدا

-------------------------

لا تعليق !!


المذكرات حلوة جدا
وكل مرة بتطور عن اللي قبلها


تحياتي

سمية يقول...

عليه العوض و منه العوض فى مستقبلك انت و البت فتكات ...

يابنى امشى جنب الحيط .. ولو قدرت تمشى جوه الحيط يبقى ءأمن...

والنبى لو ناوى تروح ورا الشمس ابقى عدى البت فتكات عليا .. خليها عندى عقبال ما ترجع اذا كنت اصلا ناوى ترجع ..

وللا اقولك ... متعديهاش عليا .. خدها معاك .. انا بنتى متربية على ان بيتها فى الحتة اللى جوزها عايش فيها ..

نقرى الفتحة بقى ...


ملحوظة
انا بهزر .. بعد الشر عليك

البوست فى الجون اوى .. بس والنبى بلاش الحاجات الوش دى .. بلاش عشان خاطرك .. عشان خاطر اصحابك الغلابة ..

تحياتى لك..

Soooo يقول...

فاتيما

انا ولا داخل في عميق ولا بتاع
واصلا اصلا الحكايه دي خرافه
مافيش حاجه اسمها محافظات جديده ولا امانة حزب ولا سوووو ده ليه وجود
ده كائن خرااااافي


الله يكرمك ويبسطك دنيا وآخره يا فاتيما ياختي بجد
وبجد متشكر جدا على كلامك الحلو ده .. بس انا فين والاستاذ محمود السعدني عميد الادب الساخر فين
ربنا يقومه بالسلامه ويعفو عنه يارب


سلامي لوالدتي العزيزة وبوسيلي ايدها وقوليلها تدعيلي قوي .. محتاج دعوتها جدا




سلامووووووووووووز

Soooo يقول...

واحدة مفروسة

ربنا يكرمك يارب على كلامك الجميل ده
وبعدين لا تقلقي
هم مش بيعلقو اللي بيعلقو
هم بيعلقو اللي بيكتبو

مدونتي أمانة .. في رقبتكم لو حصل لي حاجه




سلامووووووووووز

Soooo يقول...

اهو ده عيبه

اهو ده عيبه بقى
لما انتي تقوليلي انا باخبط في الحلل يبقى كده بتفتكري اني باتريق على الحكومه
انا؟؟
طب ده انا معايا كارنيه مركز شباب الحبانيه
يعني ابن من ابناء الوطن
وابن بار كمان
على طول باقعد في اي بار يقابلني
امال ايه


ربنا يسعدك ويبسطك ويكرمك دنيا وآخره يارب



سلامووووووووووز

Soooo يقول...

بت خيخة وأى كلام

اهلا
وهو انا لما هتخطف ولا هتعبريني؟؟
ده انتي اتاريكي خيخه بجد
وعماله تقولي اكتب ولا تخشى شيئا
كده تغرغري بي وتسلميني عند اول كمين ياخيخه
مااااشي
وانا فعلا هقول انك انتي العقل المدبر للعمليه دي كلها
وهقول انك انتي اصلا سونيا
ايوان
انا مش هقع لوحدي
مش هقع لوحدي
مش هقع لوحدي

ملحوظه
تعاطفكم بس مش كفايه .. اتبرع ولو بشجبايه .. اللي تصغير شجب




سلاموووووووووووز

Soooo يقول...

كاميليا

خبر ايه ياكاميللو؟؟
خبر ايه بجد
ايه حضرتك اللي قلتيها في آخر كلامك دي؟؟
لااا
مش انا اللي يتقالو حضرتك
قال حضرتك قال
----
ربنا يكرمك يارب ويسعدك ويهيئلك خير الدنيا والآخره يارب يا كاميللو .. ياحضرتك



سلامووووووووووز

Soooo يقول...

عاليا حليم

طب انا عايزة اعرف هو خالد صالح قدر يشيلك ازاى و كمان جو الشوال
الله يكون فى عون الراجل

أه والله .. الله يكون في عون الشوال
-----
وياستي بافضفض معاكي شويه
ايه
هتمسكيلي مطوه وتقفي تستنيني على باب المدونه وتغزيني بيها
لأ
خلي بالك
انا شهيد قديم وصعب اني اموت بحتة مطوه
انا ما انضربش باقل من اربجيه سبعه راكب
انا بقولك اهو


عموما حصل خير ياستي
وربنا يديم المعروف
وربنا يكرمك ويسعدك ويهنيكي ويبسطك دنيا وآخره يارب



سلامووووووووووووز

Soooo يقول...

رئيس جمهوريه نفسى

طب والله وحشتني ياد ومفتقد كلامك معايا
وياسيدي ولا تشريح ولا حاجه
هي شوية شخابيط وخلاص

والف شكر على كلامك الجميل وربنا يارب سعدك ويكرمك ويبسطك دنيا وآخره يارب


ملحوظه
ماقولتليش .. ايه اخبار مصطفى كامل وآخر البوناته الغنائيه ؟؟؟


سلامووووووووووز

Soooo يقول...

Doba

ام يوسف افندي
ازيك الاول وازي يوسف افندي .. سلامي ليه الله يكرمك

وبعدين هو انا قلت حاجه اصلا
انا قريت يافطه مكتوبه
فيها ايه دي؟؟
هم مش بيحطو يفط برضه على الاماكن وكده؟؟

انا ياستي ولا خبطت ولا قلت حاجه خالص
----
سونيا دي الحياه بهدلتها يا دوبا ياختي
يااااه
فين لما كان عندها يخت واربع جزر ودبابتين .. وميداليه ليزر بتنور في الضلمه

سبحام المعز المذل

سلامي ليوسف افندي




سلاموووووووووووووز

Soooo يقول...

اميره الصعيد

ياقهلا ياقهلا ياقهلا

لا تقلقي .. لو عايزين يخطفو حد يبقو يخطفو الطفل سوووو الطخين
ثم اصلا الطفل سوووو ده كائن اسطوري
يعني مالوش وجود
حد يعرف عنه حاجه؟؟؟؟

ملحوظه
فين انبولات الشعر اللي وصيتك عليها؟؟؟





سلامووووووووووز

Soooo يقول...

حماتــــــــــــي ملاااااااااااك

ايوه ياختي
اقعدي سخني في وقولي كويس يا سوووو واول ما اتشد ولا حد يعرفني
عارفين احنا الحركات دي .. ياما عملناها في ناس

لكن ابدا .. سوووو ناصح طول عمره وفاهم الحدوته

وتقريبا الناس فهمت غلط وافتكرتني باتهم الحزب بحاجه
في حين اني باقصد انهم بيحافظو على حقوقنا
وربنا عالم باللي في ضميري




سلامووووووووووز

Soooo يقول...

خمسة فضفضة

والله يافضفضه ياختي كل اللي يجي منكم حلو ان شاء الله
وبعدين هو انا هبقى في ايه ولا ايه
ده انا هبقى باكل حلاوة حلاوة يعني

وصيتكم المدونه يا جرعااااااان



سلامووووووووووز

Soooo يقول...

همس الاحباب

خالد باشا
بلدياتي
منورني والله يابو همس
وربنا يباركلك في همس ويباركلها فيك يارب

ياخوفي يا ابو خللود تقول ايه اللي خلاني اجي اعلق هنا


سلامي لهمس بنت اخويا



سلامووووووووز

Soooo يقول...

رندا

ربنا يارب يارب يارب يكرمك ويسعدك ويبسطك دنيا وآخره يارب على كلامك الجميل ده

والله بجد اكتر حاجه بتسعدني لما احس ان ربنا وفقني في رسم ابتسامه على وشوش الناس




سلاموووووووووووز

Soooo يقول...

مشمش

انت فين يامشمش يا صاحبي
مختفي ليه كده
والله قلقتيني عليكي يابنتي

ولا تقلقي .. باسند ضهري عالحيطه وانا باكتب المذكرات
تفتكري ممكن تكون الحيطه متواطئة معاهم؟؟؟؟

ربنا يسعدك ويكرمك ويوفقك دنيا وآخره يا مشمش




سلاموووووووووووز

Soooo يقول...

مروة الزارع

مييييييييييييييييين
مروه الزارع
طب والله العظيم انا كنت عارف انك ومتأكد انك هترجعي للتدوين تاني

يابنتي التدوين بالنسبه لينا بقى ادمااااااااااان

والف الف الف مبروك ياستي وربنا يباركلك في عريسك ويباركلو فيكي ويجمع بينكم في الخير ويبعد عنكم شياطين الانس والجن ياااااارب




سلاموووووووووووز

Soooo يقول...

Dr-hema

اوبااا
حتى انت ياهيما
ماكانش العشم يادكتره
طب علمك علمك علمك
انا لو حصللي حاجه ومع اول قفا هعترف واقول ان انت اللي كتبت الخطاريف دي

انا ياعم بريء براءة الذئب من دم يعقوب ذات نفسه


ملحوظه
لو حصللي حاجه هبعتلك رسالة .. الحقني شكرا





سلاموووووووووووز

Soooo يقول...

حمامة

مش فاهم انتو بتجيبو الكلام ده منين؟؟
انتو بتقولوني كلام؟؟
استغفر الله العظيم




سلامووووووووووز

Soooo يقول...

الساحرة

الله ينور عليكي
انتي اللي فاهماني والله يا ساحره ياشريره
فعلا .. بيخلوه أمانه عندهم
بس أمانه لمين .. مش عارفين بقى


ملحوظه
انتي من نفس المحافظه ان شاء الله؟؟
لو كده .. يبقى نتقابل في البندر .. اصل عقبال املتك بكره فرح حمدان ابن العمده




سلاموووووووووووز

Soooo يقول...

Rosa

النداله ظهرت وش
شكران
تبيع جوز بنتك يابو نسمه .. ده انا ابيع نسمه نفسها


والسكلانس ده ياستي الداكتوره اختراع عباره عن شندوشت حلاوة طحينيه بالقشطه والعسل .. ولكن لايظهر تأثيره المطلوب الا عقب ان يؤكل بعد السجق المشطشط .. حيث ان الحلاوة تعمل هيبره .. تخلي الواحد في السكلانس

هذا والله أعلى وأعلم




سلامووووووووووز

Soooo يقول...

دكتور كسلان

حليب قلبي
انت فعلا طلعت اسم على مسمى بجد
كسلان بطريقه يالهوووووي

نورتني يادكتره وماتختفيش كده تاني ياعمنا

وربنا يكرمك ويسعدك ويوفقك دنيا وآخره يارب




سلامووووووووووووز

Soooo يقول...

فرنسا هانم

لا هوك مين
مش انا اللي هاخاف من حتة هوك يعمللي واوا
وبعدين لو عمللي واوا .. هيفاء وهبي موجوده معايا وهتبوس الواوا وش
حد يعورني بسرعه يا جرعااااان
----
في تسع عربيات هنا .. لون العربيه اللي اتسرقت ايه؟؟؟؟




سلامووووووووووووز

Soooo يقول...

أبو خالد

ربنا يبعد عنك الغم والحزن والهم والنكد يااااااااارب

والحمدلله ان ربنا قدرني وضحكتك ويارب تفضل ضحكتك منورة وشك على طول

ربنا يسعدك ويكرمك ويبسطك دنيا وآخره يا استاذي العزيز




سلاموووووووووووز

Soooo يقول...

يوميات فنانه مفروسه جداا

انتي هتركبيني الغلط ليه؟؟
انا قلت حاجه عن حلوان ؟
طب ده الادب حلوان
ده الاخلاق حلوان
انا جبت الا حلوان

وبعدين علمك علمك علمك
انا قضيت طفولتي كلها في الكبرتاج .. اضافة الى اني خريج جامعة حلوان

الله يكرمك ماتعمليش قضية فتنة طائفيه .. ده احنا ولاد محافظه واحده

----
أوعدك بمجرد ما اتجوز واخلف هاتنحى تمامت عن التدوين
والى هذا اليوم
هفضل اقول .. وانشالله ماحد حوش ياستي
نموت نموت فداءا لحلوان


ملحوظه
بافرح قوي بجد لما الاقي حد بينكشني وبيهزر معايا .. ولا انتي مش بتهزري؟؟؟



سلاموووووووووووز

Soooo يقول...

ra7eel

تصدقي يارحيل اني عايز اعمللك تمثال اكتر واحده متابعه المذكرات

بجد سعيد جدا بزيارتك وتعليقك وتفاعلك معايا ومع الموضوع

ربنا يسعدك ويكرمك ويبسطك ويوفقك دنيا وآخره يااااااارب




سلاموووووووووووز

Soooo يقول...

shayma

شيمو .. انا عقلي خربان خلقه والله يابنتي

والحمدلله ان الحلقه عجبتك وانك ضحكتي وربنا يارب يسعدك ويكرمك ويبسطك دنيا وآخره ياااااارب




سلاموووووووووووز

Soooo يقول...

Z_Diva

ميييين .. ام زعبولا بنفسها جايبه زعبولا وبتعلق عندي
يا اهلا يا اهلا .. حاجه ساقعه ياللي جوا

وبالنوسبه للمحافظات .. فحضرتك فعلا تم تقسيم محافظة القاهرة لمحافظة القاهرة ومحافظة حلوان .. وتضم محافظة حلوان كل من .. حلوان .. المعادي .. القاهرة الجديده .. الشروق .. الرحاب .. مدينتي .. الهايكستب

هذا ويقال انه سوف ينضم لمحافظتنا الجديده بعض الاماكن مثل كفر البنزهير ومركز تفاهنا العسل وقرية سأسوء الرشاح

والله ولي التوفيق



سلامووووووووووز

Soooo يقول...

الجدة فصيحة

سعيد جدا جدا جدا بزيارتك ياجدتي الفصيحه وبجد انا متابع مواضيعك ونفسي ابعتلك على مشكلة باعيشها دلوقتي لكن خايف .. وماتسألينيش خايف من ايه ياجدتي

ويارب تعتبري مدونتي زي مدونتك تمام وتشرفيني بتعليقاتك وزياراتك وربنا يديم المعروف يارب

وربنا يسعدك ويكرمك ويبسطك دنيا وآخره يارب



سلاموووووووووووز

Soooo يقول...

سمية

بقى كده يا حماتي
عايزه تاخدي بنتك فتكات وتقضي على اعظم قصة حب عاشها بني ادم وبني سويف كمان
ما كانش العشم يا حماتي
وبنتك هتفضل معايا بناءا على رغبتها .. اصلها عايزه تشوف البورش شكله ايه
!!!!!!

ربنا يسعدك ويكرمك ويباركلك في فتكات ويباركلها فيكي يارب




سلاموووووووووووووز

سمية يقول...

و انا و انا و انا

فين الرد على الكومنت بتاعى

Soooo يقول...

سمية يقول...
و انا و انا و انا

فين الرد على الكومنت بتاعى

----
يالهوي
ده انتي لو صبرتي ثانيه واحده كنتي قريتي التعليق يا حماتي

ملحوظه
وانتي بتقولي وانا وانا وانا .. افتكرتك عايزه تشربي نيسكافيه معايا قمت عامل كبايه زياده .. اعمل بيها ايه انا دلوقتي؟؟؟؟؟




سلاموووووووووووووز

كاميليا بهاء الدين يقول...

مش انا اللي يتقالو حضرتك
قال حضرتك قال
.........

هههههههههههه

طيب ،، طيب ،، خلاص مش تزعل سعادتك
أصل جنابك بتكتب حاجات محتاجة ترجمة
= =

الصوت : - مقاطعا ومتنرفزا وطالع تربنتينه
وبتعملي فرح لما تحلّي برغيف سَكلانس


تربنتينة - سكلانس

اشرح معنى الكلمتين ووضح محلهما من الإعراب؟؟

هههههههههههه

ايوه ، وش كده.

تحياتى واحترامى وتقديرى لحضرتك

Soooo يقول...

كاميليا

اه
هممم
احم احم
بما انك يا كاميليا يابنتي بتطلبي العلم وانا سيد المعلمين .. واعوذ بالله من كلمة سيد
فانا مش هبخل عليكي بعلمي

التربنتين في المعجم الوجيز المنجز في الانجاز .. تعني احشاء الشيء
ويقال .. تربنتين التلاجه عايز يتملي .. اي ان الفريون في التلاجه هبط او تبخر .. وتحتاج الى اعادة شحن فريون وتربنه

اما السكلانس .. فهو شندوشت حلاوة طحينية بالقشطة وعسل النحل .. ويكون في قمة مفعوله عندما يؤكل بعد شندوشت سجق مشطشط .. فتقوم حالة هسس وهرتله للشخص ويصبح في السكلانس

وفعلا
خذو الحكمة من أفواه السووووهيين




سلاموووووووووووز

كاميليا بهاء الدين يقول...

اما السكلانس .. فهو شندوشت حلاوة طحينية بالقشطة وعسل النحل .. ويكون في قمة مفعوله عندما يؤكل بعد شندوشت سجق مشطشط .. فتقوم حالة هسس وهرتله للشخص ويصبح في السكلانس

وفعلا
خذو الحكمة من أفواه السووووهيين

...........

هههههههههههههههههههههههه

هسس؟ هرتلة؟

افادكم الله

شكرا على التوضيح وعلى الامثلة التى لا تخلو من الثلاجة

تحياتى لاجمل سوووو

Soooo يقول...

كاميليا

خبر ايه يا كاميللو
انتي ازاي مش فاهمه المصطلحات دي؟؟؟
دي لغة ونبض الشارع المصري حاليا
خلاص بقينا بنعمل لغات .. مش بنتكلم لغات
لأ
بنعمل لغات
احنا جامدين قوي بالصلاتو عالنبي




سلامووووووووووووز

الـجـدة فـصـيـحـة يقول...

عزيزي سووووو

بريدي ومدونتي مفتوحة لك ولكل الناس المدونين دائما
وانا لا ادعي أن لدي حلول للمشاكل
ولكن أكيد عقل خارج المشكلة سيكون لديه رؤية أكثر وضوحا

في انتظار ولا تقلق فما يقال عند فصيحة لا يعلم به أحد أو عن شخصية المرسل ابدا


تحياتي

سمية يقول...

ههههههههههههههههههه

طب و النبى ابعتهالى لحسن ده انا كنت لسة عاملة واحدة عشان استمخ بيها و انا بنزل البوست الجديد

والبت فتكات دلئتهالى قبل ما اشرب منها حتى بق واحد ..


بعد اذنك بس اقول لكاميليا حاجة

كاميليا

حلفتك بالغالى لو قريتيلى اى موضوع متحوليش تكتبى عنى لحسن انا فضلى شعرة و انتحر

كاميليا بهاء الدين يقول...

سوووو

اشكرك على السماح لى بالرد على سمية


سميـــــة

بعد اذنك بس اقول لكاميليا حاجة
كاميليا

حلفتك بالغالى لو قريتيلى اى موضوع متحوليش تكتبى عنى لحسن انا فضلى شعرة و انتحر

............

ألف بعد الشر عنك
ربنا يحفظك يارب ويحميكى

خلاص ياحياتى
حلفتينى بالغالى ،، والغالى ،، غالى قوى

مش هاكتب عنك
على الاقل دلوقت
ههههه

انا خلاص ياسمية، هاعتزل الكتابة عن الاخرين
فاضل بوست واحد بس، لأبو خالد
بوست الاعتزال

تحياتى وحبى

Z_Diva يقول...

om za3bolla eah ya soooo
maho inta law knt btygy 3ndy elblog bta3y knt 3rft en za3bolla intakal ella elrafiek ela3la mn kam youm :'(
lakn ana hasibko tndholy be om za3bolla e7ya2an lezkra haza elsa7louf elmeskien elly m5dsh fe edy 3'alwa :S
we shakrien mohalilen lelma3lomyat elfazi3a elmore3a elmowade7a elmo3refa belta2siem el3omrany elgo3'rafy le mo7afazt 7elwan elmagida
bas ana b2a hafef 3alya so2lal mo2arikny sara7a...
alla hwa el3eed elkawmy lm7afzt 7lwan hyb2a yom eah, we bny 3la asas eaaaaah ???!!!!
wa shokram :D

رئيس جمهوريه نفسى يقول...

والله يا غالى انت كمان وحشانى
لسه مستنى البونه الجديده على احر من الجمر
:$ وش مكسوف

NIDAAL .R يقول...

مش هقولك غير انى فعلاً شووووت كوباية جنبى من كتر الضحك
انت ايه يا عم حراام عليك الى بتعملوا فينا ده ....
و ضحكتنى اوى 2 حتة
لما بيقولهم انتوا عارفين يعنى ايه فى مهمة يا بقر راحت ردت عليه و قالتله لا مش عارفين يعنى ايه مهمة و لكن عارفين يعنى ايه بقر .. ذكية اوى سونيا المسلوعة دى
و الحتة التانية لما اسمه ايه ده حس انك تنفع شوال محترم .....
مش هقولك غير انت جااااااااااااااامد اوى يا سوووووو

Unknown يقول...

طيب مافيش بربع جنيه كباب لاختك ميمي دي اخلاق بلوجرز دي

البلوج بجد زي العسل يا سوووو و عايش حياتك في الشوال ولا همك

بس شكلك هاتتقفش قريب الدقيق بيروح الحزب يعمل ايه اكيد علشان يتعمل عيش و يتوزع مجانآ علي الشعب

تحياتي يا عجوووز

Nostor Azzuro يقول...

البلدى بلد ديقراطى
عشان كده لازم الشعب يطاطى
زى ما قال عمنا فؤاد نجم
ـــــــــــــــــــــــــــ
NEO

غير معرف يقول...

Soooo
بص بأه انا لسه ما قريتش
انما من النظرة السريعة الأولى الشاملة واضح اني هنبسط موت
أصلي مجربة قراية حاجتك يا Soooo
أوعدك اقرا واقولك، بس حسيت اني لازم ادخل اعلق
نتقابل تانيييييييي

MKSARAT - SAYED SAAD يقول...

انت عارف يا سو
انت مشكله بس بجد كلنا محتاجين روحك ديه في الكتابه بتخرجنا من حالات كتير روتينيه جميل كعادتك
سيد سعد

رئـــــيسـة حزب الأحلام يقول...

رحتة مرة واحدة امانة الحزب الوطنى لا خلى بالك والله الكباب والكفتة انتم ناس اهل كرم والستت الوالدة ست طيبة اوى ربنا يخلهاللك
وتحياتى

ابن حـجـر الـعـسـقـلانـى يقول...

معلش يا سوووو .. هاتكلم فى موضوع خارج التدوينة

فرنسا منزلة بوست غريب ماحدش فاهم منه حاجة

لما تقراه و ماتفهمش منه حاجة .. ابقى اعمل أى حاجة لأننا مش عارفين نعمل أى حاجة

أنا قلت نحط صورتها فى السايد بار تضامنا معاها

أنا عملت كدة فى مدونة الاستراحة

كيكى عوووووو يقول...

هايل هايل هايل .....دة انت الى هايل هايل هايل100على100 كمان.....

هشام علاء يقول...

باشا

انا اول مرة ازور مدونة سعاتك و شكلى كده هفضى نفسى يوم و اقعد اقرا المذكرات من اولها عشان اقدر اتابع التطورات الغريبة و المريبة و الرهيبة اللى بتحصل فى نفس الوقت و على جميع الاصعدة

بس حقيقى دمك زى العسل و المدونة بتاعتك دخلت دماغى و شكلى كده هبقى زبون

تحياتى ياعسل
هش

Soooo يقول...

الجدة فصيحة

الحقيقه مش عارف اوصفلك عميق شكري على اهتمامك بمساعدة الاخرين من غير ماتكوني تعرفيهم
لكن ده وإن دل على شيء .. فإنما يدل على نبل مشاعرك ورقة أحاسيسك
وربنا يارب يكرمك ويسعدك دنيا وآخره يارب


ملحوظه
حاولت اني ابعت لحضرتك ايميل لكن خوفي سبقني .. اعذريني مش قادر اتكلم .. دلوقتي على الاقل




سلاموووووووووز

Soooo يقول...

سمية & كاميليا

اجبلكم حاجه ساقعه ولا شاي؟؟؟
انتو جايين تتعرفو ببعض عندي؟؟
يلا كل واحده على مدونتها
القعده بالمشاريب عدم اللاموأخذه

ولا اقولكم
خليكو براحتكو
حتى كلامكم عامل ونس

انا باهزر ويعلم ربنا انا باعزكم قد ايه



سلاموووووووووز

Soooo يقول...

Z_Diva

طب تصدقي زعلتيني منك
مش عشان حاجه .. عشان فاكره اني مش متابعك ومش باقرى مواضيعك ويعلم ربنا انا باعزك وباقرى مواضيعك قد ايه
وانا عموما علقت عندك وشرحتلك وجهة نظري

وبعدين خدي هنا يا ام زعبولا .. هي ام اربعه واربعين لما ولادها الاربعه والاربعين ماتو في حرب اليمن .. غيرو اسمها من ام اربعه واربعين لسهير مثلا ؟؟
ماهي فضلت ام اربعه واربعين زي ماهي


روقي كده واضحكي
وربنا يسعدك ويبسطك دنيا وآخره يارب




سلامووووووووووز

Soooo يقول...

رئيس جمهوريه نفسى

ابو حنفي حليب قلبي
انت والله اللي واحشني يابو خالو
ومش هوصيك .. عايز الالبون بتاع مَصطفى كامل .. ولا اقولك .. هاتلي الفول ألبونز بتوعه


ملحوظه
انا ماكنتش جنب الجهاز لما انت صبحت علي النهارده عالماسنجر ياقط .. اعذريني يابن عمي



سلاموووووووووز

Soooo يقول...

NIDAAL PAL

وسع ياجرع انت وهو .. نضال باشا وصلللللللل

حبيب قلبي يابو النُضل والله

الحمدلله ان الحلقه عجبتك وانك ضحكت
بس ايه لزومها انها تشوت الكوبايه ياعمنا
كده عندك في البيت هيغرموني حق الكوبايه لو كانت اتكسرت ولا حاجه
واخوك مشحور ماديا بطريقه انت مش متخيلها

نورتني والله يانضال
وابقى خليك منورني كده دايما ياعمنا



سلامووووووووووز

Soooo يقول...

EmY

ميمي جزره بنفسها عندنا
طب والله انتي تستاهلي كيلو كباب من الاصلي كمان

منوراني والله يابنتي والحمدلله ان الحلقه عجبتك
وانتي فعلا صح .. الحزب واخد الدقيق عشان يتخبز ويتوزع عالشعب

نبيهه طول عمرك .. انا كنت حاسس بكده والله



سلامووووووووز

Soooo يقول...

Nostor Azzuro

يااااااااااااه
طب والله ليك وحشه يا نيو

انت رحت فين ياجدع واختفيت كده مره واحده

عموما عودا أحمد والحمدلله انك شرفتني بزيارتك وبتعليقك
وفعلا البلد طاطي عشان الشعب ديموقراطي

اه امال ايه



سلامووووووووووووز

Soooo يقول...

maha miho

ياااااااااااااااااااه
طب والله العظيم ليكي وحشه
انتي اختفيتي وبطلتي تطلي علي ليه زي زمان يابنتي
معلش انا مقصر في حقك ومش بازورك بس والله العظيم انا طروفي مقندله

بس والله سعيد انك ظهرتي عالساحه ونورتيني بزيارتك الحلوة دي

وربنا يوفقك ويهيئلك الخير من عنده يارب



سلاموووووووووووز

Soooo يقول...

MKSARAT SAYED SAAD

يالهوي على كلامك يابو السيد
ربنا يارب يكرمك ويسعدك ويوفقك ويبسطك دنيا وآخره يارب

بس ماتاخدنيش في دوكه .. فين الكاجو ياعم؟؟؟؟



سلاموووووووووز

Soooo يقول...

رئـــــيسـة حزب الأحلام

الف شكر ياسيادة الريسه على زيارتك وعلى تعليقك وربنا يكرمك دنيا وآخره يارب

وربنا يرحم والدتي ويرحم كل موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا ونبينا محمد عليه أفضل صلاة وأتم تسليم




سلاموووووووووز

Soooo يقول...

ابن حـجـر الـعـسـقـلانـى

والله ياعسقول انا مش فاهم اي حاجه برضه زيك
انا رحت علقت عندها مرتين ومش عارف هل الكلام اللي كتبته بتودعنا وهتبعد عن التدوين ولا في حاجه عندها وهي مش عايزه تقولنا
مش عارف اعمل ايه
ولو انت تعرف اي معلومات عنها او حتى بتشتغل فين قلي ونروح نزورها وربنا يجيب العواقب سليمه يارب



سلاموووووووووز

Soooo يقول...

كيكى

الله يكرمك ياستي ويبسطك ويسعدك ويوفقك دنيا وآخره يارب

وياريت تعتبري مدونتي زي مدونتك تمام وتشرفيني وتنوريني بزياراتك وتعليقاتك




سلاموووووووووز

Soooo يقول...

hesham

ياسيدي الف شكر وربنا يسعدك ويبسطك ويوفقك يارب
وبجد مش عارف اقولك حاجه غير ان المدونه وصاحب المدونه تحت امرك واقرى براحتك وعلق براحتك خالص
المدونة بتاعتك ياعم وانت صاحب مدونه مش زبون




سلاموووووووووووز

بنوته مصرية يقول...

هههههههههههههههههههههههههه

انا حوار سونيا مع البوص ده بيفطسني من الضحك

وفي الاخر تصدمني كدا بقي الأمانة العامه للحزب الوطني هي اللي بتسرقنا

لاء لاء قول كلام غير ده يا راجل هههههههههه

Ehab يقول...

يخرب عقلك يا سوووو


ده انا قربت احب ابنت سونيا واعطف عليها
ههههههههههههههه
وبعدين دي سونيا بتاعتك دي شكلها واخده دبلوم صنايع قسم زخارف
وانت بس اللي مش عارف
وبعدين اقولك ايه انت داخل على الوطني انفد يا معلم
انا في الخلاعون بقى
البنت فرنسا اختفت وانا حاسس ان في الموضوع حاجه مش مظبوطه

استرها يارب

سلاااااااااااااااااااااام

Asmaa mahaba يقول...

سو لازم تحقق فى اختفاء خالتو فرنسا
سومه_87

Rosa يقول...

اكيــــــــد النداله اساس الحياة
هههههههههههه
انا اقدر يا سوووو و بعدين نسمة تزعل مناو مش مشكله نزعل جوزها انما نسمه لأ
---
تأثير الشندوشت ده ظهرعلياااااااااا من و انا بقراه بس
يانهار
طب و ده اختراع من اخترعاتك و لا بقيت الخيال العلمي الي في المذكرات
و لا ده موجود بجد و لا ايه؟؟
انا عايزه اعرف بجد عشان سمعت الأسم ده قبل كده بسفكرت انه هذار
افيدنا افادكم الله
:D
و لا يوقعك في شندوشت سكالانسي من ده ابدا
يانهاااار ده ضمار شامل و كامل

Soooo يقول...

بنوته مصرية

ياستي اضحكي زي مانتي عايزه وانشالله ماحد حوش

وبعديم خدي هنا
انا قلت ان الدقيق اتسرق؟؟
ولا قلت ان اللي سرقوه في الحزب؟؟؟

ماتقولونيش كلام الله يكرمكم .. انا لسه شباب وعايز اتأهل



سلامووووووووز

Soooo يقول...

الشنكوتي الكبير

حليب قلبي
يابني سونيا اتكحور بيها الحال اصلا
تقريبا والله اعلم كانت بتضارب بفلوسها في البورصه .. قام البيج بورص ناصب عليها

وبعدين ياع انا ولا اتهمت حزب وطني ولا حاجه
انتو هتلبسوني نصيبه

وربنا عالم بظروف فرنسا
ربنا يريح قلبها ويسعدها ويكرمها يارب



سلامووووووووووز

Soooo يقول...

سومه...مجنونه فى بلد عاقل

والله ياسومه انا مش فاهم ولا قادر استوعب اللي حصل

مش عارف ايه السبب في اختفائها
وعلى أي حال
ربنا يسعدها ويوفقها ويبسطها دنيا وآخره يارب



سلامووووووووز

Soooo يقول...

Rosa

لا ياشيييييخه
تلاقيكي جايه تشوفيني اتاخدت مع اللي اتاخدو ولا قاعد مع اللي اتاخدو .. برضه
---
والاختراع ده موجود فعليا وممكن لو بتروحي زيزو اللي في بوابة النصر بتاع السندوتشات تسألي عنه وتجربيه
بس اي حاجه تحصللك انا ماليش دعوة




سلاموووووووووز

ojg يقول...

خساااااااااااااارة كان نفسي أبقى التعليق رقم 100
ايه يا عم سوووو
إنت دخلت دخلة أحذرك من التمادي فيها
انت كمان بتتكلم على الأمانة؟؟
والقرارات الدستورية؟؟
يالهوي يا لهوي يا لهوي
يابني انت مش عندك ولاد خالة تخاف عليهم؟
طيب انت وهتجري
والناس التانيين ذنبهم ايه يروحوا ورا النايل سات؟؟
عموما أنا من انهارده ياخويا انت في مدونتك وانا في مدونتي
ومش عايزة بلوجك يخاطب بلوجي يومين تلاته كده
آل أمانات وحزن وطني آل
شي لله يا سيدي جمال يا مبارك
مدددددددد

Soooo يقول...

ojg

على فكره .. انتي تعتبري خدتي التعليق تسعه وتسعين والتعليق الميه
ليه بقى
لأن التعليق الميه رد على التعليق التسعه والتسعين
شاخدالي بالك انتي

وبعدين انا ولا قلت حاجه ولا اتهمت حد
انتو هتقولوني كلام عالفاضي
بريء يابيييييييييييه




سلاموووووووووز

Unknown يقول...

أسعدنى أن أجد من يتحدث وزاد سعادتى أنه من سندبيس .....لكن أحزننى أنه لا يوجد أمامه للحزب فيها
أن كانت موجوده سأعتبر نفسى غريب .
عموما نستبشر خيرا مدام هناك من يتكلم ..فأكيد ستتكشف فضائح الفاسدين وتتوارى فى جحورهاالفئران