الاثنين، 19 جمادى الأولى، 1431 هـ

!! مُجرد فيران .. عبيطه

استضافني أحد الأصدقاء في مزرعتهم في أحد المناطق الخاضعة للاصلاح الزراعي , والحقيقة كنت في قمة السعادة .. عشان آخيرا هاعرف كيفية زراعة المكرونة السباجيتي - بالصلصة - والسجاير الكولوباطرا البوكس , لكن اكتشفت - للأسف - ان المكرونه السباجيتي لا تصلح للزراعة هنا
!! عشان البيئة مش مناسبة .. فقررت ازرع بدلا منها .. برطمانات نيسكافيه

بادئ ذي بدئ .. بمجرد ما وصلنا أصابني خنقة و كَرشة نَفس .. وذلك نتيجة اعتياد الناس هناك - استغفر الله العظيم - على استنشاق الأُكسجين , لكن مع مرور الوقت تأقلمت رئتي كإنسان مع الظروف .. وعرفت استنشق هذا الغاز الغريب , واكتشفت - الحمدلله - إن الإنسان أحسن من البَني آدم

في آخر اليوم دخلنا ننام في الاستراحه , وهي عبارة عن غرفتين جنب مخزن السباخ والكيماوي .. وطبعا النوم مستحيل نتيجة لرائحة السباخ , واعتقد ان صاحبي خدها حِجه وكان بيسبخ مع نفسه
!! هو راخر

حاولت انام بشتى الطرق ماعرفتش .. ناموس من ناحية .. و رائحة سباخ من ناحية تانيه .. وأصوات شخير وتسبيخ - اتضح ان السباخ ليه صوت ! - صاحبي من ناحية تالته , قلت اطلع بره الاستراحه اشرب سيجارة وانتظر إلى أن يكبس عليّ النوم .. وادخل انام , وما أن خرجت وأشعلت السيجارة .. حتى وجدت أمامي كائن غريب اشبة بالقطط في ضخامتها .. ولكنه ليس قط ؛ فقلت مع نفسي لاحول ولا قوة الا بالله .. حتى قطط هنا بقى شكلها غريب من استنشاق الأُكسجين !!؟

وعندما أمعنت النظر جيدا .. اكتشفت انه فأر وليس قط .. و أوكد فأر وليس عِرس - دكر العِرسه ! - وكان هذا الفأر يرمقني بنظرات جاحظة مستغربة .. وكأنه يقول لي .. انت جاي مع مين يا كابتن !؟

استغربت من تصرف هذا الفأر .. وتذكرت أول مواجهة صريحة ومباشرة حدثت بيني وبين أحد
... الفئران قديما .. وبالتحديد .. عندما كنت في تالته ثانوي

كان الوقت فجرا .. وكنت عائدا من صلاة الفجر في المسجد .. حاكم احنا مابنعرفش ربنا غير في أيام الزنقات .. ولا توجد زنقة أكبر من زنقة تالته ثانوي .. فترى المساجد مكتظه دائما بطلاب الثانوية العامه .. وتجد أنهم مواظبون على الصلوات الخمس والتراويح والتهجد - في رمضان وغير رمضان والله ! - وبمجرد ماتخلص امتحاناتهم وخلاص اللي حصل حصل .. ربك غفور رحيم ياعم

كنت في هذه الفترة مطلقا لحيتي - عشان ربنا يكرمنا - وكان شعري - رحمة الله عليه - طويلا , أي أنني وباختصار .. كنت شبيها بالأَشكيف , و الأشكيف هو حاجه زي "العاو" اللي بيخوّفوا بيه الاطفال .. بس الصراحة انا عدّيت مرحلة الأشكيف اللي بيخوّفوا بيه العيال .. وبقيت الأشكيف اللي بيخوّفوا بيه "العاو" ذات نفسه

انتهيت من الصلاة في المسجد وراجع على بيتنا عادي خالص .. ولقيت فار بيمرح في مدخل العمارة , وما أن شاهدني هذا الفار حتى وقف متسمرًا لثواني قليلة .. ثم انقلب على ضهره كما الصرصار
!! البلدي
استغربت من تصرف هذا الفأر .. مش المفروض يجري يعني ولا ايه !؟ , ولا يكونش اتقلب على ضهره عشان عايزني ازغزغه في بطنه مثلا !؟ , بس القطط بس هي اللي بتحب الزغزغة في البطن .. يكونش الفار ده نتاج تزاوج فار مع قطه .. و ده فأر الخطيئة !!؟

, اقتربت منه بحذر .. وغمزته بطرف رجلي على أمل أن يقوم ويطلع يجري بقى .. لكن أبدا
.. كررت غمزتي بقوة أكثر .. وهو في البلاله خالص ؛ فاكتشفت ان الفار لما شافني وانا أشكيف
!! اتخض ومات يا عين امه
ووجدت نفسي أتساؤل مندهشا .. الحل ايه دلوقتي .. هل المفروض اعمل له تنفس اصطناعي وافتح بؤه بصوابعي وامنحه قُبلة الحياة مثلا !؟ , بس اساسا ماعرفش بيعملوها ازاي .. لو كانت قُبلة فرنسية الإيحاء كان ماشي .. انما قُبلة حياة .. ولفار .. لأ طبعا ! , لو كانت فأره نتايه كان ممكن .. انما ابوس دكر في بؤه .. لا ممكن !! , وأكيد ده فار دكر .. مش عنده شنب على بؤه .. يبقى دكر !!؟

عُدت الى المشهد الحالي .. وانا اشرب سيجارة الكولوباطره خارج الاستراحة في مزرعة صديقي .. وانظر للفأر الذي ينظر إليّ باستغراب , فقررت أن أتحداه بنظرتي وكأنني اقول له .. خد بالك
!! انا اللي قتلت - بنظرة واحدة - ابن عمك اللي في القاهرة
وفعلا .. وجدت هذا الفأر قد اتخض وطلع يجري ؛ فابتسمت ابتسامة الثقة والنصر .. وانتهيت من شُرب سيجارتي ودخلت على الاستراحة كي أنام , وقبيل انغماسي في النوم .. ظهرت لي حقيقة واحدة وصريحة .. حقيقة أنه لو اجتمعت مجموعة فئران لقتلي - والتمثيل بجثتي - يكفي أنهم بمفردهم
!! مُجرد فيران عبيطه .. والعبدلله .. أفضل منهم
-
سوووو

هناك 25 تعليقًا:

غير معرف يقول...

واخيرا رجع سووووووو. الحمد الله على السلامة!!!!!!!

мαησηα يقول...

كالعادة استمتعت بالقرأة وكالعادة

بوست رائع من عمايل ايد سوووووو

تسلم يارب وتسلم اياديك

ELMOSTAFZ يقول...

رااااااااااااااااااائع...بجد هلكت م الضحك و ناوي أقرا كل اللي فات بإذن الله...
تحياتي الكبيييييييرة...

Muhammad Saber Abdou يقول...

بوست جميل

صباح الفل

sony2000 يقول...

وكالعاااااااااااااده
سو وبسوتاته الجامده جدااااااااا
بجد رائع
وكلاتهم كدا اساشا
فران لااكتر

star in the sky يقول...

هههههههههههههه
البوست تحفة بجد

تقريبا دى من المرات الاولى اللى اجى هنا

خلى بالك هتلاقينى بنط كل شوية هنا :D

Asmaa Gamal Abdelnasser يقول...

اكتر من رائعه يا سووو زى العادة كنايه مميزه بجد ومضمون عميق ايه الكلام الكبير ده المهم يعنى انها جامده اخر حاجه :) بس قلى هوه اى فار ينفع نواجه بنفس النظره ولا لازم اربي دقني قصدى يعنى لازم شكل معين عشان نوقف الفئران عند حدها ؟؟؟

صيدلانيه طالعه نازله يقول...

الفران مبتجتمعش لقتل حد و التمثيل بجثته الا لو كان ضعيف
او موراهوش حد يدافع عنه

زى حالات ناس كتير ضاعت و ناس تانيه فى الطريق

ربنا يرحمنا برحمته

و يقوينا و يخلينا كلنا قطط عشان نخوف الفران

فتافيت يقول...

انت ضحكت عليا يا سووو
انا ضحكت كتيييييييير اوي في البوست ده بجد.. فظييييييييع.. وفي الاخر تقوم ضاربني في الحيط ومعكنن على اللي جابوني كلهم :(

هم مثلوا بيه عشان هو من غير ضهر يا سووو.. لا له ضهر في بلده ولا براها

سووووووووو.. انت جامد اخر 30 حاجة

Doba يقول...

أضحكك الله كما تبعث إلينا الضحكة بسهولة

متألق كالعادة

تحياتى
هبة

محمد فؤاد (صاحب عمود النور) يقول...

هما فعلا فيران من يمثلوا بالجثث

Tarkieb يقول...

وحياتك هما ح يجتمعو بعدها بس مش عشانك عشان ياكلو جثة المرحوم... وربنا ده ممكن يدعولك...ههههههه ...حكاية حلوة وربنا يوعدك بفارة نتاية المرة جاية ياعم وتهريها بوووووس ههههههه

خواطر شابة يقول...

ماحدث صوره الاعلام انه من لبنانين ضد مصري والحقيقة ليست كذلك
ماحدث كلنا نؤمن انه لايقره شرع ولادين لكن يجب ان نعترف انه سيكون نفس التصرف تجاه القاتل ايا كانت جنسيته لو توافرت نفس الظروف المسؤولية الكبرى فيما حدث يتحملها الامن على سوء تقديره للامور.

سمع هوص (Abo 3li) يقول...

يامفتري بقي تخلص علي الفار بنظرة... انا هبلغ عنك جمعية الرفق بالفئران..

ندى الياسمين يقول...

هههههههههههههههههههههههههههههه

يخرب عقلك وربنا ما كان جايلى نفس اضحك يا اخويا

بس بالنسبه للقافله بتاعة البوست

انا فاكره مره ان كان فى فيلم اجنبي الفيران توحشت يا اخويا وكانت بتاكل بنى ادمين عن طريق تلوث بيلوجي من معمل

خد بالك بقى تقابل واحد منهم يا معلم
هع هع هع

همس الاحباب يقول...

يا جامد يا سوووو
بنظرة واحدة الفار مات يا قاسى يا راجون
تسلم الايادى يا عمنا رائعة كالعادة
تحياتى

سومه...مجنونه فى بلد عاقل يقول...

تسلم ايدك يا سووو
بس تفتكر ان الفئران غلطانه ولا احنا اللى اهنا نفسنا ففتحنا الباب للناس تهينا

Bee يقول...

عجبني قوي جملة الفار : انت جاي مع مين يا كابتن؟ كانه مستني منك كلمة السر علشان يخليك تعدي مثلا او يشوف اذا اللي انت جاي معاه عدو وللا صديق!!! ما هو بقى واضع يده على المنطقة وانتو المتعديين عليه. حلوه دي.

Montana Master Of Love يقول...

انا حبيت بس اعبر واقولك اني مش ناسيك
و بتمني اشوفك قريب جدا جدا جدا
يعني يوم جديد .. كريسماس مختلف بزيارة الايتام الكبار
و .. هشوف بقي الفيران العبيطه دي

Umzugsunternehmen Wien يقول...

جددوا موضوعتكم .. رجاءاً :)

Bauschuttentsorgung Wien يقول...

hahahahahaah

Müllentsorgung يقول...

شكراً لكم ع الموضوعات المتنوعة ... موفقين :)

Umzug nach Luxemburg يقول...

الله يعينكم على المجهوووووووووووووود :)

Lagerung يقول...

Allah is with you ... :)

entrümpelung wien يقول...

شكرا على الموضوع
entrümpelung
entrümpelung
entrümpelung wien