الاثنين، 12 جمادى الأولى، 1431 هـ

!! بيللو - باشا - ماسابا

لقيت خبر في الاهرام بتاع يوم الاتنين الموافق سته وعشرين أبريل .. وبالتحديد .. في صفحة
.. يوم جديد .. عنوان الخبر بيقول

يحتفل بعيد ميلاده الـ 86 مع زوجاته الـ 86
والخبر بيقول ان شيخ العاشقين .. النيجيري بيللو ماسابا احتفل بعيد ميلاده الـ 86 بصحبة زوجاته الـ ‏86‏ وأبنائه الذين يصل عددهم إلى ‏138
ولقد واجه ماسابا في العام الماضي مشكلة حقيقية بسبب تعدد زوجاته , كادت تصل به الي حبل المشنقة لولا ان محكمة نيجيريا العليا أوقفت قرار مجلس الشريعة بإعدامه بعد أن أقامت كل من زوجاته دعوي قضائية مستقلة تطالب بعدم تطليقها وقبولها البقاء علي ذمته مع الـ ‏85‏ زوجة الأخرى ,‏ بينما أكد ماسابا انه يفضل الموت شنقا علي أن يطلق أيا من زوجاته‏
الطريف ان بيللو ماسابا يعمل حاليا كداعية ديني في شمال نيجيريا الذي طبقت ‏19‏ولاية من ولاياته الشريعة الاسلامية في مجال الاحوال الشخصية منذ سنوات طويلة‏
-------
!! بعد ما قريت الحوار ده .. قلت المفروض الخبر ده يبقى في باب صدق أو لا تصدق

وبعدين يعني ايه عنده سته وتمانين سنه ومتجوز سته وتمانين واحده .. يعني كل سنه بيتجوز واحده ولا ايه !!!؟؟
طب على كده بقى .. وباعتبار اني - ان شاء الله - هاتِّم التلاته وتلاتين في واحد اغطسطس
!!! الجاي .. يبقى المفروض اتجوز تلاته وتلاتين واحده .. لوكشه على بعض

بس هايقعدوا فين .. أي نعم شقتي حلوه وفيها تلات أوض و صاله و أوضة سفره واتنين حمّام ومطبخ .. بس هيقعدوا فين التلاته وتلاتين دول !!؟؟

يعني لو فرضنا اني حبيت اوزعهم على الشقه .. هيبقى ازاي مثلا ؟؟
يعني هل هاحط اتنين على السرير .. بس اساسا اساسا انا بالعب أكروبات وباتشقلب في السرير وانا نايم , لدرجة ان امي - الله يرحمها - كانت بتقول اني على عكس كل الاطفال اللي بيناموا في هدوء كأنهم بياكلوا رز مع الملايكه .. كنت انا باتشقلب وباتكحرت وكأني باتخانق مع الملايكه على كمية الرز القليله اللي جايبنهالي آكلها !!!!؟

!!! يلا مش مشكله .. هاختار اتنين حجمهم صغنن يناموا ويستحملوا التلطيش اللي هاياخدوه
و الاتنين كوميدينو اللي جنب السرير .. ممكن يتحطوا جنب بعض وتنام عليهم واحده , وبما
!!!! ان الدولاب كبير شويه .. يشيل اتنين .. بس هييناموا بالطول زي الحصان

اوضة المكتب بتاعة الكومبيوتر .. ممكن واحده تنام على ترابيزة الكومبيوتر .. و واحده تنام تحت الترابيزه , ولو في واحده ترانزستور ممكن تدعبس لروحها على مكان في الكيسه بتاعة
!! الكومبيوتر
وممكن واحده تنام على كرسي الكومبيوتر .. أي نعم ممكن يجيلها الغضروف زي ما جالي .. بس مش مشكله .. لو باظت ولا حاجه تتعالج بروقان على دكة الاحتياطي .. واخواتها فيهم
!!! البركه ان شاء الله

المكتبه بقى .. هاشيل منها الكتب .. ماهو اكيد مش هابقى فاضي لقراية كتب ولا نيله .. وهابقى راجل متجوز وعندي التزامات زوجيه , وممكن اعمل حركة صايعه في رصة الحريم على
.. الارفف .. يعني ممكن اعمل رف حريم روايات ونكد .. و رف حريم سياسة ومظاهرات
!!! وأحلى رف بقى .. رف الحريم الساخرة وشغل يوم الخميس

اوضة المعيشة او الليفنج .. فيها أماكن كتير , يعني واحده تنام عالكنبه .. و الاربع كراسي يتحطو اتنين في وش بعض .. وعلى كل كرسيين ينام واحده .. والترابيزه بتاعة طقم الليفنج
.. عليها قرصه رخام .. ممكن واحده تمدد عليها والروماتيزم ياكل جتتها .. بس مش مشكله
!!! عندي غيرها كتير في المخازن

المطبخ بقى .. ممكن واحده تنام في التلاجه و واحده عالبوتاجاز و واحده في الفرن , و الارفف بتاعة المطبخ دي ينام فيها قول تلاته أربعه , ومش مهم بقى اطباق ولا معالق ولا سكاكين .. هو انا هاعرف اجيب أكل للجرمأ الحريمي ده اصلا لما اجيب لهم معالق وسكاكين !!!؟

انا تعبت من التوزيع .. الباقي يناموا في المكان اللي يعجبهم , بس المهم مالاقيش واحده نايمه على الكبانيه في الحمّام .. حاكم انا باقوم من النوم اروح الحمام وانا عيني مقفوله .. وساعتها
!!! ممكن تحصل بلاوي

, الخازوق بقى مش في الحريم اللي هايبقوا على ذمتي .. الخازوق في العيال اللي هاجبهم منهم
!!! ده لو ربنا إداني الصحه .. صحة ايه .. لو ربنا اداني وزارة الصحه على بعضها
اعتقد ان الحل ساعتها .. اني اقفل التلات بلكونات اللي في الشقه .. واعمل فيهم بطاريات أرانب
!!! مانا ساعتها فعلا .. هابقى مربي ارانب ..

.. وبعدين انا شاغل نافوخي ليه .. ما ابعت جواب لعم بيللو اطلب منه النصح والارشاد
وأكيد الراجل مش هايبخل عليّ بالمعلومة

!!! آه .. ابعت له جواب واقول .. عمي العزيز بيللو .. باشا .. وعهد الله باشا
!! عمي العزيز بيللو .. انت راجل ولا كل الرجاله والمصحف
عمي العزيز بيللو .. اشرحلي ازاي عرفت تسيطر على زغابة النسوان اللي عندك !!؟
!!! ده الحاج متولي بجلالة قدره يا عم بيللو .. كان هايموت على آخر المسلسل

عمي العزيز بيللو .. الحقيقه في حاجه تانيه عايز اعرفها منك .. حاجه غير "مَغلَق" النسوان اللي عندك وغير المدرسة اللي انت خلفتها , ومعلش لو ضايقتك يا عم بيللو .. اعتبرني طالب علم واستحملني شويه

انهي دين ده اللي انت بتدعوا إليه ياعم بيللو !!؟؟؟
انهي دين ده اللي بيسمح انك تعامل المرأه على انها مجرد رقم في بيتك !!؟؟؟
أنهي دين ده اللي بيقول تجيب ميه وسفعطاشر عيّل ومش مُهم اهتمام ولا تربيه !!؟؟؟
أنهي دين ده اللي ولادك هايكبروا عليه وهُمّ شايفين ان المرأه مجرد رقم في البيت !!؟؟
وطبعا بناتك هايعتقدوا - خطأً - انهم لازم يبقوا مجرد أرقام في بيوت أزواجهم !!!؟؟؟

أرجوك ياعم بيللو .. اياك تقول ان ده الاسلام .. اوعى تقول كده احسن وديني ممكن اتجنن
!!! وتلاقيني جاي نيجيريا اعضك
!!! أي نعم بعد ما هاعضك حريمك هايغتصبوني .. وعيالك هيمصمصوني .. بس لأ برضك

الاسلام اللي اعرفه .. دين رحمه واحتواء , وماعتقدش ياعم بيللو انك تقدر تحتوي الليله اللي انت فيها دي .. إلا لو كنت مؤسسة واحنا مش عارفين !!!!؟

!!! ونصيحه أخيره ياعم بيللو .. بلاش تـ بيللو كتير , انا مش عشاني .. انا عشان نيجيريا
سوووو

هناك 28 تعليقًا:

MR.PRESIDENT يقول...

هق هق هق هق .
الصلاة علي النبي ، السؤال المحرج ، هوااا فيه صحة ، ونسوانه عايزين يبقي علي زمته ليه .
ويا لما يحب يعزم حد فيهم علي العشا بيعزم فرد فرد ولا لكشه ,,,,,,,,
المفروض الراجل دا يرجم لانه يعتبر .... في حالة كونه مسلم أو غير مسلم لأن شريعة المسلمين تطبق علي غير المسلمين إلا في الأحوال الشخصية ... كالزواج والطلاق مثلا

sony2000 يقول...

هههههههههههههههه
بجد بجد
بوست فالجون
والله عندك حق
كل الناس فهمه الاسلام غلط وثليل اوي اللي فاهمينه صح وبالذات فموضوع تعدد الزوجات
وبعدين الاسلام قال مثني وثلات ورباع دا لو هنتكلم علي العدد
موش86
طب هو اساشا بيعدل مابنهمم اذاااااااي؟؟؟؟؟؟؟؟؟؟

هبة الحياة يقول...

ههههههههههههههههههههههههههههههههههههههههههههههههههههه
وبيتريقوا عليا انا و بيتخضوا لما لقوا ان ابويا اتزوج 7 مرات وجاب 11 عايل
يا سبحان الله يجوا بقي يشوفوا الراجل الكباره دا
يا سلام والله انا لو بنته هافتخر بيه زاي ما انا بفتخر با ابويا كده

فاتيما يقول...

يا لهوتينى يا سوووو

يخربيت دماغاااااااااك يا جرع

انا فطست على روحى فى الحتة بتاعة ربنا يدينى وزارة الصحة كلها دى

أضحك الله سنك يا شيخ

و عمك بيللو دا ماشى على نهج اخوانه مبتدعى الحرملك بتاع العصور الوسطى
و العبيد بتوع العصور القديمة

فكرة استعباد البنى ىدم لأخيه البنى آدم
بس زمان كان سخرة و بيع و شرا
و ملك اليمين
دلوقتى اسمه جواز

و شرعى كمان


الوكسة الفحقلى انه راجل دين ؟؟


شر البلية .. لأ
شر البيللو ..ما يضوحك يا فندم

Kontiki يقول...

nice post makes me imagine ur home with women every where :D
وبمناسبة الدين اللى بيلزقوا فية كل مصيبة و التانية فعلية العوض من زمان فى المجتمعات

رنونة حكومة ميخو يقول...

هههههههههههههههههههههههه بسم الله ما شاء الله لا وواضح انه بيحبهم كلهم لدرجة انه اتمنى لموت على انه يطلق واحدة يا صلاة الزين ييجي يشوف هنا الرجالة تتمنى الموت على انها تعيش مع واحدة

يا عيني ع الصبر

غير معرف يقول...

يا مجنووووون
ده راجل مفتري إنت هتعمل زيو!!

Awdhal

غير معرف يقول...

حمداله عالسلامه ياعم والله انا افتكرتك اتقفشت في مظاهرات 6 ابريل لما ماظهرتش من ساعتهاوكل سنه والقدوه بتاعتنا عم بياللو طيب

كيكى عوووووو يقول...

طب حته لو اتنشرت فى صدق او لاتصدق
طبعااااا مش هصدق
ازاى بجد وازاى اصلا همه على ذمتوا!! طب ياترى عارف اسمايهم ولا بالارقام على رايك طب لو واحدة فيصت هيعمل ايه فى النقص العددى دة!!!
همه بهايم ولا ايه هناك!!تصدق انى مابفهمش
من حلاوته امه هيتهبلو عليه شكلوا احمد عز نيجريا!!!!!
وانت ياعم سوووو شاغل دماغك اوى ليه بالاماكن بتاعتهم يامعلم هى زريبة واقلب
واخر كلامى اقولك
انت جالك الغضروف
ياويلكم يا ويلكم
اهلااااااااااااابيك فى عالم النط
اختك الى سابقتك

مجرد بنت يقول...

بغض النظر عن الخبر نفسه كارثة
بغض النظر عن الراجل ده اكييييييييييد اكيييييييييد اكييييييد مختل عقليا
بغض النظر عن الراجل ده اكيد مخترع ديانة لنفسه
بغض النظر عن حاجات كتيييييييييييير
انت دمممممممممك شرباااااااااااااات وطريقة مناقشات للبوست توصل الفكرة بسرعة وكمان الكام سؤال الى فى الاخر دول
والف سلامة عليك من الغضروف

Wanda يقول...

حرام عليك دا انا الى حتجنن من الضحك :-))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))

هو الراجل ده ليه مرحش امريكا بحريمة كانوا عمله عليه فيلم انه مسيح جديد و بيدعوا لديانة جديدة و يستانوه لما ينتحر مع الجماعععععععععععععععة جماعيا

اهو نيجيريا مخدش الا ختة خبر فى كام جرنال :-))) ياعينى

سمع هوص (Abo 3li) يقول...

طب لو الحكاية كده.... ابتدي ادور علي الاربعة وعشرين زوجة الاول...

انا بقول المفرووض يدخلو نظام الاحتراف... علشان كده الستات هتخلص... وممكن كمان نظام الاعارة...
دي كلها انظمة اثبتت كفاءة في بلاد بره..

كــركــبــة دمـــاغ يقول...

هههههههههههههههههههههههههههههههههههههههههههه

انت خفة دمك مالهاش وصف خلاص لا شربات ولا سكر ولا اي حاجه من دول ، قاموس الكلمات ما بقاش فيه وصف فعلاً

انما ده رجال تعبان في دماغه اساسي ، ده عبيط ولا بيستعبط ولا ازاي يعني !!

تلاقي نيجيريا معندهاش نسبه عنوسه لا ،، عندها نسبه قحط في الجنس الناعم واكيد هيفكرو يستوردو شويه من برا وطبعا مصر فيها الخير كتير ، ده حتى اصحاب البشرة السمراء و اصحاب البشرة بتوعنا لو عملتهم في الخلاط يعملو حليب بالشوكولاته :D:D

الاهم ،،الجمليتن اللي في الاخر دول في الجووون بجد وجايبه من الاخر يعني

تسلم دماغك بجد

و
تحيـاتي جداً

مي يقول...

هههههههههههههههههههههه
عثل وثكر بجد

الراجل ده مش هيكمل على فكرة
هنديلة عين
هع هع هع

حسبى ربى يقول...

يااااااااااااااه حمد لله على السلامة ..والله قلقت عليك من الغيبة الطويلة دى .
ما علينا من الراجل الخلل دة .. لا دة مش هو لوحدة اللى خلل دة 68 واحدة بردو خلل ...!!!
وبعدين دين ايه بقى ؟؟ دى ديانة التى تى اللى بتروح وتيجى ..
بس بجد انت خليت الخبر تحفة .. وبجد تسلم ايدك على الكلمتين اللى فى الاخر دول ... هو دة التدين الصح مش اللى ماشى دلوقتى

ندى الياسمين يقول...

يا لهوي علييييييك

هاموت من الضحك

رغمى انى باذاكر ساينس وانجلش وطالع ملاديعى يا اخويا

بس والله كنت هاموت من الضحك

تسلم اديك يا سو

Dr.Mohammed Gohary يقول...

كالعادة يا سووو
مبدع

Rania يقول...

طيب مفيش غيره بيحسوا بيها
الستات على ايامى كانت بتحس غيرة اما جوزها يتجوز عليها واحدة؟
اتنين
تلاته و هتبقى بطلة و هيتحط اسمها فى موسوعة جينسسسسسس

الراجل دة كل حاجة عندة غريبة, و مراتاته اغرب
و عياله اغرب و اغرب

عجبتنى تقسيمك للزوجات
و خصوصا بتاع البوتجاز
اهو لو ارفان من واحدة تفتح عليها عين البوتجاز و هى نايمة
و مشى بالدور بقى

ربنا يرحمنا من اللى بنشوفة

إيهاب رضوان يقول...

بوست رائع وأسلوب متميز وبسيط فى الكتابة .. أسعدتنى زيارتى الأولى لمدونتك .

Asmaa Gamal Abdelnasser يقول...

الله الله على الكلام الحلو انا مش عارفه اشكرك ازاى انا كنت محتاجه احس بان فى لسه ناس بتحترم كيان الانثى على انها انسان تصينفه امرأه اشكرررك يا اجمد سووو فى الدنيااا

خواطر شابة يقول...

ههههههه طب وده مسلم بأمارة ايه هو فيه شرع يقر 86 زوجة واللي بأستغربه انا أكثر 86 اللي رضيو يتزوجوه على بعض يعني العروسة 86 لما خطبها قالها انا متزوج 85 واحدة وحتعيشي معاهم وبرضه رضيت سبحان الله العظيم صحيح لله في خلقه شؤون

موجة يقول...

الراجل ده عظمة على عظمة
ده يتعمله تمثاااااااااااااال
والرجالة يوم الدخلة تروح تزورة وتاخد منه خبرة
اما بالنسبة للشقة اللى انت وصفتها حتة حتة كانى شايفاها قدامى
فمش منطقى ابدا ان فى وحدة هتقبل تعيش مع درتها اما دى كل وحدة هيكون ليها 32 درة
ياربىىىىىىىىى

مصطفى عبدربــه يقول...

ههههههههههههههههههههههههه


جامدة
وتحديدا آخر سطرين

PaLooo يقول...

هههههههه

بوست فى الجون يا سو
بس عارف اكتر حاجه عجبتنى ايه

فى ناس من المعلقين
سابوا البوست كله بالمعانى اللى فيه

و مسكوا فى اخر سطرين
هههههههههههه

غير معرف يقول...

هههههههههههههه حتى العجايز ماخلو يعني لازم يسوون عيد ميلاد خلاص رجل في الارض ورجل في القبر احنا باقي اعمارنا 19 _20 ماسوينا عيد ميلادهعهعهعهعهعهع اصلا عيد الميلاد حرام على كلا يسلمو

غير معرف يقول...

لالالالالالالالالالالالالالالالالالالالا

Lagerung يقول...

Allah is with you ... :)

entrümpelung wien يقول...

شكرا على الموضوع
entrümpelung
entrümpelung
entrümpelung wien