الاثنين، ٣ صفر ١٤٣١ هـ

!! صباحو قلق

واحد صاحبي بيشتغل في أحد المجلات الشهرية الشبابية .. عرض عليّ اكتب معاهم في المجلة
في باب عبارة عن قناة تلفزيونيه .. ونظام سخرية على البرامج والحاجات اللي بتتعرض

.. طلبت من صاحبي كام عدد من المجله لأني مش باشتريها الصراحه
!! اصلها بسبعة جنيه والواحد بيكح تراب بأمانة

.. وبعدين قلّبت في دفاتري القديمة .. ولقيت الحوار ده
!! صباحو قلق
---------------
- صباحو قلق .. برنامج صباحي يهتم بكل ماهو جديد وفريد في عالم - إسم باب المجلة
صباحو قلق .. إعداد و تقديم .. قلقان الأرناؤوطي .. و مقلق سيكا
!! صباحو قلق .. ابدأ يومك .. بحبّة قلق
-
فيسكافيه .. الراعي الرسمي لـ صباحو قلق
-
.. قلقان : أهلا بكم أعزائي المشاهدين
.. مقلق : ويجعل صباحكو قلق بعون الله
.. قلقان : في حلقة اليوم من صباحو قلق .. سنتحدث عن
.. مقلق : آخر علاوين جرانين النهارده
.. قلقان : ثم سنتحدث مع ضيف من نوع خاص
!! مقلق : هناخد فاصل .. سيكا .. وجايين
-
فيسكافيه .. الراعي الرسمي لـ صباحو قلق
-
هِس هِس بِس .. إمتى بيّ تحِس
انت عمّال تتخن .. وانا عمّال اخس


هِس هِس .. ألبون جديد للفنان .. محمود التيسي
-
المجرم : أنا .. اللي .. قتلت .. أبوك
البطل : انت .. اللي .. قتلت .. أبويا !؟
المجرم : - مندهشا - انت عبيط ياض !!!!؟

!! حاليا بجميع دور العرض .. فيلم ..
أرجوك أعطني هذا الزغروف
-
.. قلقان : ورجعنالكم مره تانيه أعزائنا المشاهدين
مقلق : ومعانا خبر من "الواشنجطن بوسط" الأمريكاوية .. بيقول
.. قلقان : بناءا على مقترحات مجلس الأمن .. سيتم نقل الفلسطينين لجزيرة مالطه
!! مقلق : عشان يدَّنوا في "مالطه" براحتهم
.. قلقان : وخبر من جريدة "الصياح" الفلسطينية عنوانه
!! مقلق : فلسطينيين "مالطه" يطالبون بنقل القدس .. عشان مافيش هناك "جوامع" يدَّنوا فيها
.. قلقان : أما جريدة "يديعون حرناكوش" فقالت
!!! مقلق : نطالب بالذهاب لـ "مالطه" .. عشان القدس وعشان الفلسطينيين .. برضك
.. قلقان : أمّا على الصعيد المحلّي وفي جريدة "الهرم" المصرية
.. مقلق : استيراد مائة وعشرون ألف شمبانزي .. بمناسبة اقتراب موسم الانتخابات
.. قلقان : ويقول المصدر .. أن وظيفة الشمبانزي ستكون في التهييص والتهجيص لبعض المرشحين
.. مقلق : جرنان "الخبر" قال ايه بقى
.. قلقان : عرض مائة وعشرون ألف شمبانزي للبيع
!! مقلق : وده لأن نتيجة الانتخابات معروفة .. زي ما قال جرنان "دستوركم يا اسيادنا" المُعارض
.. قلقان : كانت هذه هي عنواين جرائد اليوم
!! مقلق : هناخد فاصل ونرجعلكم .. وهيكون معانا ضيف غير متوقع .. سيكا وجايين
-
فيسكافيه .. الراعي الرسمي لـ صباحو قلق
-
البطل : انا عرفت مين اللي قتل ابويا
البطلة : عرفت مين اللي قتل ابوك !؟؟
المجرم : - مندهشا - هو الفيلم ده كل اللي شغالين فيه عُبط !!!؟؟


!! حاليا بجميع دور العرض .. فيلم .. أرجوك أعطني هذا الزغروف
-
.. قلقان : رجعنالكوا مشاهدينا ومعانا ضيف غير عادي , ظهر في فترة زمنية .. ثم اختفى
مقلق : ولأن ضيفنا مش بيتكلم اللغة بتاعتنا .. قررنا نستعين بخبراء قسم الترجمة في القناة .. يعني
.. عشان يركّبوا سماعات في ودانه و يفهمنا
.. قلقان : كما أنهم أضافوا مايك في فمه .. لكي يستطيع الحديث معنا
مقلق : ضيفنا النهارده هو .. حيوان السلعوة .. اهلا بيك يا حيوان
!! السلعوة : اهلا بيكم .. بس بلاش حيوان دي .. قولّي يا سلسع
مقلق : ايه "سلسع" دي عدم اللامؤاخذه ؟؟؟
.. سلسع : ده اسم دلع كانت امي - الله يرحمها - بتناديني بيه , اصل احنا تلات اخوات .. انا سلسع
!! واخويا سللع .. و اختي الكبيره اللي متجوزه وعايشه في ليبيا .. سلسوعه
قلقان : أخ "سلسع" ممكن تعرّف نفسك للمشاهدين
سلسع : والله يعني .. انا حيوان عادي .. اعيش واتعايش
قلقان : "سلسع" يقال ان السلعوة حيوان ظهر مؤخرا نتيجة تزاوج الكلاب والثعالب .. فما هو تعليقك على هذا ؟
سلسع : السلعوة موجوده من زمان .. تقريبا كده من ايام الفراعنه , وفي بعض البرديات بتقول ان
!! السلعوة كان حيوان الفراعنه المفضل , لكن للأسف .. تم تدمير هذه البرديات لمصلحة القطط
مقلق : ايه ده يابو السلاسيع .. ده انتو من زمان بقى !!؟
! سلسع : امال ايه ياعم الحاج
قلقان : أخ "سلسع" لقد ظهرتم منذ فترة .. ثم اختفيتم .. ما معنى هذا ؟؟
سلسع : احنا كنا عايشين في الصحرا عادي .. لكن لمّا انتو يابني أدمين عملتوا حوار سته اكتوبر وعشره فبراير والمُدُن الجديدة دي .. ابتديتوا تشوفونا
مقلق : يعني احنا اللي جينا وضايقناكم ؟
.. سلسع : احنا الاول ما كناش متضايقين .. لكن لما لقيناكم بتشوفونا وتخافوا وتطلعوا تجروا مننا
قلنا ايه العالم الهِبل دي !!؟؟
قلقان : هل معنى كلامك انكم حيوانات أليفه ؟؟
!! سلسع : يابا بقولك كنا مأنتمين مع الفراعنه .. والحياه كانت بيس
قلقان : إذًا مالذي جعلكم تتحولون لحيوانات مفترسه ؟؟
سلسع : - ابتدى يتنرفز - ليه العَوَق ده .. هالبت انا قاعد معاك وباتكلم راس بـ راس .. ولا شايفني باعُضّ فيكم ؟؟
قلقان : إطلاقا
سلسع : - قام من عالكرسي وخلاص هايتحوّل !!- طب ليه الغلط وتقول حيوانات مفترسه !!؟؟
مقلق : - في محاولة للتهدئة - مايقصدش يا جرع .. استهدى بالله انت بس
سلسع : لا اله الا الله - قعد عالكرسي تاني - ماهي حاجه تجن يا مقلق ياخويا .. ماتخلّوش السلعوة
!!! مننا يتغاظ .. ويطلع برّه فَروته يا جرعان
قلقان : سؤال آخر .. لماذا اختفيتم بعد أن ظهرتم ؟
سلسع : ياخي ده انتوا ناس غريبه .. كل واحد فيكم بياكل في اخوه ويسرق في أبوه , دانا شفت منكم بلاوي .. خُد عندك يا سيدي .. هاو هاو هااااو
!! مقلق : ابو السلاسيع .. اتكلم بني ادميني وحياة ابوك
سلسع : هاو هاو هااااووووو
.. قلقان : نعتذر مشاهدينا .. حيث يبدو ان هنالك مشكله في الصوت
.. مقلق : وبيتهيألي ضيفنا ماعندوش جديد يقوله
.. قلقان : خاصة وأننا نعيش ونتعايش مع بعضنا البعض في سلام
.. مقلق : وما حدّش فينا بياكل اخوه ولا بيسرق ابوه
قلقان : وهذا لأننا بشر .. نستطيع التفاهم بيننا وبين بعض
!!!!! سلسع : هأو أو أاااااووو
-
فيسكافيه .. الراعي الرسمي لـ صباحو قلق
-
واحد قاعد على قعدة تواليت في حمّام ومعاه موبيل صيني .. وبيتفرج على ماتش لمصر
!! صوت : اللي بيعملوا "إإح" بيشجعوا مصر .. واحنا معاهم

-

ملحوظة

.. فكرة البرنامج ده والاسم والشخصيات .. قلقان و مقلق
متسجلين فعليا في الشهر العقاري وحقوق الملكية الفكرية
!! يعني لو حد سرقهم هاخرب بيته تعويضات وشغل لبط

.. الموضوع ده و موضوع تاني - هنشره فالمدونة بعدين - تم رفض نشرهم في المجلة والحمدلله
.. وكانوا عايزين ينشروا عندهم موضوع بروفر بربر .. بس بصراحه مارضيتش
!!! اصل الموضه دلوقتي .. مش اللون البربر

سوووو

هناك ٢٧ تعليقًا:

غير معرف يقول...

صديقك من صدقك لا من صدّقك.
كنت تكتب احسن من كده من كام شهر.

Soooo يقول...

دي حقيقة

بس لما تلاقي نفسك بتتسرق من كل الناس
يبقى تحتفظ بالحاجات المهمة .. لحوار أهم

اضافة الى ان الحوار ده .. مش حوار تدويني
دي حالة فانتازيا
وعادة الفانتازيا مش بلاقي قبول في مجتمعنا لأننا للاسف
اتعودنا عالواقعيه السهلة

صباحو نجف

Unknown يقول...

الموضوع اللى قرأناه ده هيتنشر فى المدونة بعدين و لا أنا مفهمتش صح ؟ :)

تسلم الأيادى ،،، أعتقد من أصعب الحاجات ان حد يلتزم بكتابة منتظمة بمواصفات معينة و لو كان كاتب ساخر أعتقد الموضوع أصعب ،،، ولا ايه مش عارف ؟

الفكرة اللى فى الموضوع ده ممكن تبقى ناجحة جداً و هتكون فقرة دسمة أوى لو عملتها بانتظام ،،،

Soooo يقول...

عبد العدل

والله ما فاهم حاجه من كلامك

adel يقول...

ههههههههههههه
تعرف اني كنت هاصور اعلانات كده :)
منهم اللي بيعملو ااح دي :):)
ههههههههههههههههه

Unknown يقول...

شرح التعليق :)))

بسم الله الرحمن الرحيم

- أول سطر من تعليقى أنا كمان مفهمتوش بصراحة ،،، عديها ياسوو فهمت كلمتين غلط فى البوست :)

- صعب الالتزام بمواصفات معينة للكتابة من حيث عدد الكتابات فى الأسبوع مثلاً و عدد الأحرف و ساياسات المجلة أو الجريدة ،،،

- الكتابة الساخرة لأنها الأصعب و تنم عن موهبة حقيقية فلا يمكن استدعاءها بجدول معين حسب طلب مكان العمل و مواصفاته أيضاً


- آخر فقرة فى التعليق قصدت بيها ان فكرة صباحو قلق تنفع باب ثابت خاصة انه موضوع واحد و مع ذلك أكتر من فقر قصيرة داخل الموضوع يعنى هتكون قراءته سهلة و شيقة،،، مع تغيير عناويين الأخبار و ضيف الحلقة كل مرة و استخدام الفواصل الإعلانية أيضاً فى طرح فكرة الحلقة

لو لسا مش واضح بقى ممكن تعزمنى على نص فرخة و اتنين نسكافيه علشان نكمل كلام ،،، عموما متقلقش التعليق ده مش هييجى فى الامتحان :))

تقديرى

غير معرف يقول...

ده انت عسل والله العظيم فطستنى على روحى من الضحك ربنا يوفقك ومن حسن لاحسن لحسين وحسنين والعائله كلها
roka

الجواز و سنينه يقول...

عجبتنى اوى الاعلانات
تحفففففففففففففففففه
اعلان الفيلم و اعلان البيبى هايل
تسلم ايدك
و ماتخافش ماحدش هايسرقك
انت خوفتنا جدااااااااااا
ههههههههههههههههههه

ميرام يقول...

هههههههههههه
الاعلانات حلوة
عندي امتحان بكرة
وانا مهيسة
(:
وكتر الضحك مضر قووي في الفتره دي
تحيـــتي

غير معرف يقول...

سلام عليكم
يا اخي النت دا كائن غريب اووي
تبقى داخل تدور على حاجة وفجأة تلاقي نفسك بتروح من موقع لموقع ومن صفحة لصفحة وفجأة يشدك اسم مدونة فتدخلها وتبدأ تقرا فيها


انا قلت ارمي السلام بدل ما اعدي سكيتي كدا

صباحك ياسمين


البوست خفيف ولذيذ

غير معرف يقول...

ياعم سووو نرفزتنى لدرجه انى اعملك تعليق تخيل !! ..
انا اللى صابرة بقالى 4 شهور زهقت من كتر ما قريت فى المدونه بتاعتك .. ولو بصيت فى الزوار بتوعك هتلاقينى كل يوم بشرب عندك شاى ..
بس بجد بقا انا مش هقدر اسكت اكتر من كدا
يعنى الناس تقول علينا ايه وهما شايفينك عمال تقول بربر وانت مبسوط اوى كدا
ياعم اللون بالانجليزى اسمه بربل purple
بس كان نفسى من زمان اقولك كلمه واحده ....... انت محصلتش

غير معرف يقول...

اه على فكرة ..
ياعم ماتوهش منى انا اللى لسه مكلماك فوق دى ..
انا بفكر اعمل مدونة اطلع فيها زهقى وقرفى والكبت والعقد الليمفاويه المتوطنه فى اللاوعى المكمون عندى..
إلا هو انت رأيك ايه..
عموما لو عملتها هبقى اقولك ها واهو على الاقل تردلى ربع اللى انا قريتهولك .. دا اقل واجب يعنى ..

رغاية صح ؟؟
طيب خلاص انا همشى بقا سلام

Soooo يقول...

دولا

طب والله كاتب شوية اعلانت تانيه لـ خيريل ومعنى الرجوله

شوفلنا انت بس كاميرا حلوة وسبوتين إضاءه
وسبني امثل واخد فرصتي

صباحك ورد
-
عبد العدل

هممممم
بص .. هو اللي كنت بافكر فيه ان الموضوع يبقى فعلا باب ثابت
خصوصا اني كنت كاتبه كبرنامج في سكة توك شو وكده .. بس مانفعش يتنفذ نظرا لظروف انتاجيه

وقلت اهو اساعد بأي حاجه جديده وخلاص
لأكن ربنا ما أرادش

صباحك ورد
-
روكا

ربنا يكرمك ويسعدك يارب

ونصيحه اعملي بروفيل عالبلوجر عشان تعرفي تعلقي بعد كده باسمك

صباحك ورد
-
الجواز وسنينه

ده في شوية اعلانات تانيه في البرنامج التاني اللي هاعمللو موضوع كمان كام يوم
وربنا يسهل ويعجبو الناس

صباحك ورد
-
ميرام

ايوه اقعدي اقري واتفرجي عالاعلانات وسيبك مالمذاكرة
قومي يابنتي زاكري
مش هيمتحنوكي في المدونات اللي قريتيها اكيد
!!

صباحك ورد .. وربنا يوفقك
-
محمد

مش كده برضه
طب دانا مره كنت داخل باعمل سيرش على جوجل على اغنية لعدوية
لقيتني من لينك لـ لينك لـ لينك .. وهوب لقيتني في مدونتي وموضوع كركشنجي دبح كبشه
انه حقا .. عالم واحد

صباحك ورد
-
غير معرف

ماهو المشكله اننا ماخدناش اللون ده في المدرسه ولا الكليه حتى
كنت المفروض اخد دروس خصوصية عشان اعرف اتعامل مع بنات اخويا فيما يتعلق بأسماء الالوان بالجريجي

واهلا بيكي ياستي والمدونة بتاعتك .. تشرفي في اي وقت وتعلقي وقت ماتحبي

ونصيحه .. اعملي مدونه
على الاقل هتلاقي منفذ تتكلمي من خلاله وتقولي كل اللي جواكي

صباحك ورد

أحمد عبد الحميد يقول...

سووو يا سوووو موضوعو سرقوووو

مبدع يا باشا كالعادة و خصوصا موضوع قطع الصوت ده

ياريت تشرفنى بزيارتك
تحياتى

حسبى ربى يقول...

عجبنى اوى اوى اوى .... اعلان اللى بيعملوا اح بيشجعوا مصر واحنا معاهم
بيحسسك اد ايه الشعب دة مزنوووق هههههه
على العموم البوست راااائع كالعادة دايما بتبهرنى ....... ادعيلى بقى عشان عندى امتحانااااااااااات......

Tears يقول...

مجلة فريدة من نوعها...دى اسمها ايه؟

mostafa rayan يقول...

باشا
انا كنت متوقع انها هتترفض بردو انت
داخل شمال قوى خصوصا فى حوار الشمبانزي والأنتخابات وكده
بس بجد الموضوع ضحكنى قوي
لك كل تحياتى ومحبتى يا اخى

Cute Kitty **sookra يقول...

حلو اوى الكلام دا
هههههههههههههههههههه
ضحكتنى جدا وخصوصا اعلان الفيلم اللى كل اللى فيه عبط دا
ههههههههههههههههه
ربنا يسعدك ياسووو

غير معرف يقول...

ايه ده ........ ايه الهنا اللى انا فيه ده سووو بجلاله قدره يرد عليه لا ده كتير كتير اوى والله انا هعيط من الفرحه ربنا يارب يجبر بخاطرك 000 اما بالنوسبه لموضوع انى اعمل بروفيل والله مخبيش عليك انا حاولت بس معرفتش بس سيبك انت انا مش مصدقه نفسى والله
roka

أيامنا الحلوة يقول...

صباحو قلق وتوتر ياسوووووو
بقولك ايه واسطة بقى عند صاحبك بتاع المجلة ده يمكن تطلع سبوبة حلوة أكل منها عيش واجيب الغسالة الاتوماتيك

تحياتي ياسووووووووو

Soooo يقول...

ابو حميد

ياباشا انا اللي اتشرف واروح مدونتك

وربنا يسعدك دنيا وآخره يارب
-
حسبي ربي

ربنا يكرمك والحمدلله ان اعلان "الإإح" عجبك
وده فعلا اللي قصدته .. اننا شعب مزنوق زنقة مايعلم بيها الا ربنا

وربنا يوفقك ويوفق كل الناس في امتحاناتهم يارب
-
تيرز

هي مجلة معروفه على فكرة

وفعلا فكرة القناة بتاعتهم حلوة وظريفه
بس لازم يبقى في تقارب أكتر في المواضيع اللي بيكتبها الناس .. بينهم وبين الواقع اللي عايشين فيه

ومعلش مش هاقدر اقول اسمها عشان مايبقاش اسمي باعمللهم اعلان ببلاش
هايدفعوا .. هاعمل عنهم اعلانات بالعبيط
!!
-
درش

والله يادرش هي محاوله مني اقول اللي حاسس بيه
ولو ماعجبهمش كلامي خلاص هم أحرار
بس مش هاكتب حاجه هم عايزينها او حاجه غير اللي في دماغي
حتى لو كلامي مش هيقراه حد غيري

واحشني والله
-
سكره

ربنا يسعدك دنيا وآخره يارب

وإياكي تقفلي مدونتك او تبعدي عنها تاني
امال لما تيجي تفضفضي .. هتفضفضي فين؟؟؟

ربنا يسعدك دنيا وآخره يارب
-
روكا

هو حد قاللك يابنتي اني رئيس مجلس وزرا
الحكايه ومافيها اني باقرى التعليقات على طول
ووقت ما ابقى فاضي ارد على الناس
انما لما باكون مزنوق والدنيا عندي مكركبه .. باعتذر عن ده

وعلى فكرة
مش صعب خالص انك تعملي بروفيل على بلوجر
ولا صعب انك تعملي مدونه

بس هي عايزه دعبسه شويه
دعبسي بقى

صباحك ورد
-
أيامنا الحلوة

واسطة ايه بس
ماهو لو كانت الحوار واسطه وكوسه .. كان صاحبي نشر الموضوع
لكن لما لقاه متعارض مع سياسة المجله ومش كويس ولا يصلح للنشر .. قاللي انهم رفضوا

يعني الحوار فكس ولا في غساله ولا بوتاجاز ولا حتى باكو معسل

صباحك ورد

مهندس مصري بيحب مصر يقول...

ضحكتني و الله يا جدع و انا كنت قرفان و لسه قاري شوية مواضيع سياسية تخنق بلد
و فجأة لقيت موضوعك في الجوجل ريدر عندي و ضحكت جامد و لولا زميلي في الأوضة نايم كنت قهقهت
بقى اللي بيعملوا "إإح" بيشجعوا مصر
ههههههههههههههه
الله يحظك يا سوو يا بني

صبرني يارب يقول...

حلوه يا سو


احنا كنا كاتبين حلقات زي دي فى الضاحكون

وعندك حق تحافظ بجد على شغلك

اخلص بقى وخلص الكتاب ياعم

هاتفضل كده تجبلنا الى مش عاجبك ولا ايه
هههههههههههه

غير معرف يقول...

miss u my dear

wish u r always alright

غير معرف يقول...

أعمل فيك؟؟ هـه؟؟ رد عليا ياللا.. ما ترد.. مممممممم طبعا مش قادر.. براحتك خالص يا سوووو

^_^

يا جاااااااامد.. نياهااهاهاهاها

اصلا عجبني اللي انت كاتبه.. يا بني سيبك م المجلة دي.. اان عرفت انت بتتكلم عن انهي مجلة عشان شفت قبل كده موضوع الحورات والقنوات دي فيها

بقولك ايه.. احنا نعمل مجلة كده احنا نجيب من كل مدونة أغنية ونطبعها ف مطبعة ورا المقلة اللي ف حلون.. جنبيه فرن كده وكشك موبايلات.. أاااااااايوه اسم الله عليك اللي قدامهم قهوة

ونصورها ف مكنة تصوير في المكتبة اللي جنب ركن الطلبة اللي ف حلون برضه دي.. آااااااااايوه.. الغالية دي.. من ام الورقة مش عارفة بكام

ونعمل أحلى شغل.. آه وربنا

^_^
مها ميهوووو

هناء محمود يقول...

إيه القلق ده

انا قلقت فعلا

إنتوا كمان قلقانين

Asmaa mahaba يقول...

المشكله ان الانسان ساعات بيجيله كلام وساعات مبيجيلوش كلام فموضوع الكتابه بشكل منتظم دا صعب شويه على انا شخيا بس معرفش متهيالى عليك مش صعب لانك كنت بتكتب زمان القصص السووويه :))
وكانت جميله ومنتظمه
مين اللى رفض نشر موضوعك دى عالم قراطيس لب فكك منهم وشوف او تى فى اعمل برنامج فيها :))