الأحد، ١٥ شوال ١٤٣٠ هـ

!!! نوكيا .. مِيت فُل وعشره

ساتت يوم العيد الصغيّر .. لقيت نفسي صاحي عالصبح فايق ورايق وزهقان , دخلت عالنت أشات شويه مع أي حد .. وإذ بي الاقي الواد مصطفى زوجاجا - اسمه كده عشان عندهم مصنع لشغل الزجاج - وبعد السلامات والاحضانات والقبلات الفرنسية الإيحاء - عن طريق إثير النت فقط والله - قلتله وانا بانكشه
سوووو : امال فين ياد العيديه .. اللي ماشوفتني حتى بموبيل نوكيا مِيت فُل وعشرة !!؟؟
- زوجاجا : - صمت
!!! سوووو : أيوه ياخويا اعمل انك اصنجيت دلوقتي
زوجاجا : طب خد شوف الموبيل
ده

واداني لينك حاجه عالنت .. دخلت لقيت زي مايكون في حاجه فلاش بلايير بتعمل لودينج عشان تعرض فيديو .. خفت الاول احسن يكون فايرس .. وساعتها كنت هاروح للواد زوجاجا في المصنع اكل القزاز بتاعهم كللو , لكن هو خاف .. خصوصا انه عارف اننا خارجين من رمضان وممكن اعملها , قام حلفلي يمين طلاق - مع انه مش متجوز - ان الحوار في العادي ومافيش ولا فايرس ولا بطيخ

بعد ما التحميل خلص .. لقيت البتاع ده بيتكلم عن موبيل شكله غريب قوي .. آدي صورته اهي

الموبيل ده بقى فيه شوية أوبشنز انما ايه .. حاجه في الخيال العلمي بجد , يعني كل الموبيلات عادي انها تكون جي بي إس .. عادي انها تكون ثري جي .. عادي انها تشغل اغاني .. عادي انك تدخل بيها عالنت .. وساعات بنتصل بيها بالناس .. و- سبحان الله - بيردّو علينا نفس الناس اللي كنا بنتصل بيهم
!!! ساعات يعني مش على طول عشان ما ابقاش كداب

: الموبيل ده حاجه فوق الفظيع بقى .. ولتعديد مميزاته .. هنقولها كالتاتي

أولا .. بيشتغل بروجيكتور .. تدوس على زرار كده وتشغل الفيلم ولا الحاجه اللي عايز تعرضها .. وتروح سانده بستاند مخصوص عشانه قدام أي حائط .. ويعرض الحوار على الحيطه

ثانيا .. بيشتغل مترجم فوري ناطق .. تحدد اللغه اللي عايزه يترجمها .. يعني لو بتتكلم عربي وعايزه يترجمها لجريجي تختار كده من الأوبشن .. وتتكلم في الشاشه عند السنسور بتاع المايك بتاع الموبيل .. يروح مطلّع كلامك من السمّاعه الخلفيه بتاعة الموبيل باللغه اللي اخترتها

ثالثا .. لو في حالة انك زهقان .. وعايز تعمل حاجه جديده بدل الفرجه على الكليبات والجيمز والهسس ده كللو .. تروح دايس على اوبشن يعمللك شوية فتحات صغيره على جنب الموبيل .. والفتحات دي تقدر تنفخ فيها وكأنك بتعزف هارمونيكا , أي نعم احنا مالناش في الهارمونيكا دي وبنستعيض عنها بالشيشه واهو كللو ألعاب هوا .. لكن أهي حاجه جديده برضك

رابعا .. ساعات الواحد بيبقى نازل مشوار على غفله .. وبيبقى محتاج يظبط دقنه عالسريع .. ومابيلاقيش الحلاقين فاتحين .. ولو لقى حلاق فاتح يلاقي في بتاع خمسه سته هايحلقو قبليه .. وقتها الواحد بيتمنى لو كان الموبيل بتاعه ده ماكينة حلاقه
.. ايوان .. هذا الموبيل يا حضرات بيتحول لماكينة حلاقة .. وماكينه تشتغل على كل لون
!!!! يعني رجالي وحريمي .. لو واحده عايزه تظبط السوالف يعني

خامسا .. وخامسا دي هي اللي لسعتني وقلت الموبيل ده لازم اجيبه مهما كان تمنه .. انشالله حتى ابيع كلوه من الاربع كلاوي اللي عندي , الموبيل الظريف الشيك ابن الحلال ده .. بيعمل قهوة .. ومش أي قهوة .. ده بيبقى نازل مع الموبيل مجموعة قواشيط صغيّره قد الجنيه المعدن كده أو اكبر سيكا .. بتكون عباره عن بُنّ مضغوط .. تحط القشاط في مكان معين في الموبيل .. وتروح جايب الماج وفيه الميّه .. وتحط على الماج الاستاند المخصوص بتاع القهوة .. وتحط الموبيل فوقيه .. تقوم نازله من الموبيل مصاصه كده تسحب الميّه من الماج .. وتروح مسخناها وخالطاها بالقشاط بتاع القهوة .. وفي خلال تلاتين ثانيه .. تروح القهوة نازله على المج .. واشرب يا معلم قهوتك
.. الجميل في الموضوع بقى .. ان القواشيط دي بنكهات مختلفه
!! يعني في قواشيط كولومبيان .. قهوة كولومبي بنكهة المخدرات الكولومبي لاخواننا الضرّيّبه
!!!!! قواشيط قهوة فرنسية الإيحاء .. يعني تشرب وتبوس وش
!!!! قواشيط قهوة بطعم البندق .. ومش بعيد يعملوها للـ ميدل إيست بطعم الجوز واللوز وعين الجمل
.. قواشيط بنوع غريب كده اسمه سومارتان بليند بس شكله حلو السومارتان ده
!!! خاصة لو كان البليند بتاعه خفيف

وأكيد طبعا شركة نيسكافيه لما تلاقي البتاع ده انتشر .. تقوم هي كمان عامله قواشيط نيسكافيه بلاك .. وقواشيط نيسكافيه تلاته في واحد .. وقواشيط نيسكافيه اتنين في واحد
!!! بعد ما سعر السكر ارتفع عقب أحداث كحك عيد

بعد ماشفت كل حاجه في الموبيل ده - خصوصا اخر حاجتين اللي هي بتاعة ماكينة الحلاقه والقهوة - قمت بدون وعي ولا إدراك أو إعمال للعقل البشري .. رايح على اللينك اللي بيقول امتى الموبيل ده هينزل في السوق .. ودايس عليه
!!! وهنا كانت الفاجعه
.. لقيت صوت المذيع بتاع الموبيل بيقوللي .. فيما معناه يعني
!!!!! أن تجد كل هذه المميزات في موبيل واحد .. قمة الهسس يا شقيق
.. ولكن هناك مكان واحد .. تستطيع أن تجد فيه كل ما تحب
انه ..
نوفا سكوتشيا
!!!!!!!!!
#########
@@@@@@@
؟؟؟؟؟؟؟؟؟؟؟؟؟؟؟؟؟؟؟؟؟؟؟؟
!!!!!!!!!!!!!!!!!!!!!!!!!!!!!!!!
!!!!! يا ولاد الصايعه .. كل ده إعلان عن مقاطعة نوفا سكوتشيا في كندا
بتشتغلوني يا ولود اللذين وتعشموني بالموبيل ابو قهوة .. واقول بس ده انا ساعتها بدل ما الناس تحط ورقة المكالمه بنص جنيه .. هاحط ورقة اكتب فيها ..
الماج بنص جنيه
!!!!!!!!!!
بتشتغلوني بموبيل بيحلق الدقن وتخلّوني احلم اني انافس سميح الحلاق بتاعي .. واقول ده انا هاقف على ناصية الشارع اقول حلاقه عالسريع ..
واحتمال اعمل تسعيره للحلاقه الدولي بما انه موبيل بقى
!!!!!!!!!!!!!!
.. ملعوبه يا ولاد المجنونه
.. ملعوبه وفي الجون كمان
... يخرب بيت ابو اللي يقوللكم تلت التلاته كام
!!!!! إعلان يا ولاد الجاحده
!!!!!!!!! إعلان
.. وإعلان عن ايه .. عن مقاطعه في كندا اسمها
نوفا سكوتشيا
!!!!! يعني إعلان من الحكومه .. وهيّ اللي دافعه حقه
!!!!!!! يالهوي
.. واحنا هنا يوم ما الدوله بتعمل اعلان .. تروح قايله مصلحتك أولا
!!!!!! من غير ما نشوف أي إنجاز ولا أي حاجه في رغيف حتى

.. اعلان واحنا بنتكلم عن المدن الجديده وبيعرضو صور شغل جرافيكس لناس قمة في الشياكه
.. وتروح هناك تلاقي الناس الوحيدين اللي موجودين هم الصنايعيه والعالم العرباويه
!!!! اللي بياخدو فرده وإتاوة من كل واحد جاي يبني حاجه أو ياخد حاجه

إعلان مدفوع الاجر من الحكومه .. واحنا يوم ماعملو اعلان عن حديد عز جابو واحد في آخر الاعلان
!!!!! بيقول انا نفسي ابني يشتغل هنا .. في دعوة لتوثيق مفهوم التوريث


إعلان من حكومة كندا ومقاطعة نوفا سكوتشيا عشان يبقى شكلها حلو .. واحنا هنا يوم ما وزارة النقل حبت تعمل إعلان عن سكك حديد مصر وعن القطارات .. قعدو يقولو ماحدش يتشعبط ولا يسطّح عالقطر من فوق
!!!!! وكأنهم بيقولو اركب القطر وموت محروق جوّاه .. أشيك وأكرم للبلد مالشعبطة

!!!!! اعلان يا ولود الصايعه
.. بجد بجد بجد .. احنا عالم تالت .. وهنفضل طول عمرنا عالم تالت
انما هم .. عالم صايعه .. بتعرف تلعب .. وبتنجح في اللي بتلعبه

ملحوظه

وانا بادعبس على أي حاجه عن نوفا سكوتشيا دي .. لقيت اللينك
ده
.. وساعتها اتأكدت اننا بجد بجد بجد .. عمرنا ما هنبقى حاجه زي نوفا سكوتشيا
!!!! احنا آخرنا نبقى عربيه نوفا .. ومرشوشه دواخل كمان

سوووو

هناك ٢٩ تعليقًا:

Oss يقول...

أنا كنت هاموت على أول أوبشنين
والأوبشن التالت قولت شغال
وعلى رأيك إحنا مالناش إلا فى الشيشة

لكن الأوبشن الرابع والخامس حسيت وأنا باقراهم بخيانة

بس قولت عييييب
مش سووووو اللى يعملها

وفى الآخر عملتها
:D


وبعدين أومال طارق نور واجع دماغنا ليل نهار بأنه ملك الإعلانات
ومش فالح إلا فى مصلحتك أولاً والراجل الفير

عامة هى فكرة صايعه وجامدة

بس ماتنكرش إن إحنا عندنا إعلانات جامدة فى مصر

يعنى إعلانات كوكاكولا بتاعة أمم أوروبا 2008 وأفريقيا 2008
إعلانات موبينيل جامدة بردو
إعلان جمهورية تشمبونجو لو فاكره
وإعلانات رمضان أستاذ سيبنى فى حالى الدنيا صيام

وإعلانه الأخير بتاع المصرى بيعبر عن نفسه


وده مايمنعش إن أغلب الإعلانات نيلة
وعلى سبيل المثال
وهو مثال كافى
إدينى فوكس
:D

adel يقول...

فعلا يابني

اخرنا عربية نوفا و مفيهاش الا البادي بتاع العربية

ابقي هاتلي موبايل ازرق من ده ياعمونا

aura يقول...

يانهار جامد
على فكرة الى الاستاذOSS
اتفرج على اعلانات سينيرجى وانت تعرف اننا متقدمين برضة فى الاعلانات
وفعلا اعلانات موبينيل هى اجمد اعلانات

عاشقه وغلبانه يقول...

انا صدقت اول وتاني اوبشن لانهم معقولين الي حد ما اما من بعدهم حسيت بتهيس عالي اووووووووووي وماينفعش حتي وقولت اكيد فيها حاجه

طوبه فضه وطوبه دهب يقول...

ممكن اعرف البلدى اروحها منين هروح ازور الموبيل بس فى رحله سياحيه اتفرج عليه وهرجع على طول اعلانات ايه وقطارات ايه احنا بينا وبين الناس دى الالاف السنين كنا فيهم نايمين محروقين يمكن بس اما فوقنا لاقيناهم ركبوا اله الزمن ونسيوا ياخدونا معاهم بدل ما نتكلم على الموبيل نتكلم على الاسلحه اللى سبقونا بيها سنين وسنين ربنا يستر علينا وعلى ولادنا من بعدينا لو كان فى ولاد اصلا

مهندس مصري بيحب مصر يقول...

دا إعلان جبار
رحت شفته
ايه الوهم ده يا عم
لا و لا الخبر بتاع اللي طلعوه من السجن بالغلط فراح سلم نفسه تاني
ايه ده ؟
فعلاً إحنا عالم خامس مش تالت

الـسـيـدة نـون يقول...

هههههههههههههههههههههههه
اما حتة دين بعتة

ده انا الخيالات الخيخية لعبت بدماغى كورة
واعتقدت ان الموبايل ده هيغني الستات
عن غسالة الهدوم والتلاجة والرجالة والخلفة وغسالة الاطباق

وتلاقى البت من دول ماسكة معاها موبيلها
وتدوس على زرار وتقول انا عايزة ولد
وتدوس على زرار تانى وتقول ترجمهولى لبنت
وتدوس على زرار تالت وتقول انا عايزة اتجوز
وعلى زرار رابع انا عايزة اتطلق
وزرار خامس انا عايزة حلة محشى


اه صحيح انا جعانة
انا رايحة اشوف حاجة اكلها


سلام
اختك خيخة

Bravo_fox يقول...
أزال المؤلف هذا التعليق.
Bravo_fox يقول...

اكيد فيه كمان موبايل دوش ، فتش بعد يمكن تلاقي. نفسي اغير الدوش تلفون بتاعنا.

آه وكفى يقول...

بص في الاول كنت ابتديت اصدق حكاية الترجمة والبروجيكتور و كده لكن الصراحة جيت عند الحلاقة والنسكافية وقولت ايه الحوار الفكسااااااااااااان ده
هههههههههههه
تخيل لو في كده
على فكرة هى حكاية القهوة ام نكهات دي حقيقة بس في مكينات لكده بجد
و في فشار نكهات برضو مش شكولاتة والهطل ده لأ جبنة شيدر بئى و حاجات كده

لول

همس الاحباب يقول...

يا ريت توصل لعربية نوفا
ده اخرنا كارو بحمار اعرج
وكفاية العته اللى فى اعلاناتنا
تحياتى

مرايتى يقول...

أول زياره وجت صدفه
بس بجد عجبنى الأوبشنز
ما تزعلش حلم وراح زى أحلام كتير
تحياتى

مرايتى يقول...

أول زياره وجت صدفه
بس بجد عجبنى الأوبشنز
ما تزعلش حلم وراح زى أحلام كتير
تحياتى

صوت فيروز يقول...

هههههههههههههههههههههههههه و الله انت اللي نوفا و كل كلامك نوفا :)

مي يقول...

هههههههههههههه انا عايزة قهوة
بس سؤالى الغببى هو فيه نغمات بلوفونيك هههههههههههههههههههه
تحياتى يا قمر

mostafa rayan يقول...

مش عارف بس هي ملعوبه قوي
احنا مش وحشين يا سو لكن المنظومه اللي عايشين فيها فاشله بكل المقاييس

حسبى ربى يقول...

بس حرام عليك ما تظلمش اعلاناتنا ... دأنا شوفت حبة اعلانات فى رمضان مش ممكن بجد مش ممكن ...
*مثلا اعلان _ حطى تنتوفة ولا سنتوفة _
*ولا اعلان كروكيه بتاع البت ام ركب دى خلاص لابسة بوت ومش لاقية غير ركبها العجيبة دى تبينها
*ولما وزارة البترول حبت تعمل اعلان سرقت عينى عينك مزيكة بريزون بريك
*نلهيك عن كل اعلانات مصلحة الضرايب _ محفظتك اولا _ ناقص يكلعوا منها واحد بشبشب يقول للنااس ادفعوا يا ولووود .......
انا بطلت تليفزيون خلااااااص

غير معرف يقول...

هههههههههههههه ملعوبه ياعم بس كده كده شكله

Unknown يقول...

السلام عليكم
البوست جميل
ومدونة حضرتك جميلة جدا
أنا يدوب عرفتها امبارح
بجد حلوة أوى

فكرة من الزمن ده يقول...

ده على فكرة اودة نوم وبتستهبل وعاملة نفسها موبايل
ههههههههه
كلامك حلو

كراكيب يقول...

هيع هيع هيع هييييييع
ده انا كنت داخله اقولك بقى ده بجد ده يا سووووووو؟؟؟
يا ابني انت بتهرج اكيد ده هبل في الجبل
واللا ايش عرفنا.. ياما العلم بيتقدم يا ولاااااااااد واللـــه

طلعت اشتغاااالااااات
هع هع هع هع
يا حكومتي يا حبيبتي يا اللي بتشتغلينا على قد عقولنا

سووووو يا سووووو بقى
حاسة كدة اني عايزة اقولك
ازيك؟؟
:] :] :]
;)

miro el niro kwanirooooo

كراكيب يقول...

استنى بقى علشان انا رديت من غير ما اشوف اللينك
اصلا اصلا الاعلان تحفة.. وطريقة العرض فظيعه شنيعة مريعة
تخليك تبلم وتتنح وللأسف يعني تصدق:)
خلونا هبل عبط يعني مفيش كلام
اصلا اصلا الفكرة ملهاش حل انهم يعملوا تليفون كدة

ححححححححححح ماعلينا بقى يا عم سوووو بقى
ما قولتليش بقى.. ها
ازيك؟؟

miro el niro kwanirooooo

فتوح أبو المفاتيح يقول...

تحفة
الموبايل دا شوفته من يجي 3 شهور فاتوا
واشتغلت بيه ناس كتييييرة رز

الحلو اسلوبك وطرقة تعليقك عن الموضوع
ومقارنتك الفارقة في اشايء جميلة

الفكرة انك مش بتتكلم في صناعتنا للإعلانات
انت بتقارن بين اعلانات الدولة هنا وهناك

خير خير خير
محدش عارف الخير

غير معرف يقول...

ايه الموضوع التافه ده؟؟؟؟؟؟

Soooo يقول...

الف شكر لكل الناس اللي علقت
واعذروني لو مش باقدر اتواصل معاكم في مدوناتكم او ارد على كل تعليق لوحده

بس بجد شوية ظروف متلخبطه في الحياه وفي الشغل .. وربنا يسهل كل امر عسير

وبالنسبة للتعليق الغير معرف اللي شايف ان الموضوع تافه
الف شكر .. وهحاول في المواضيع الجايه اني اكتب حاجه تكون كويسه
ويارب تعجبك

الف شكر ليكم كلكم



سلامووووووووووز

غير معرف يقول...

بردوو تـــــــــــــــــافـــــــــه

jehan يقول...

بصراحه يا سوووو التدوينه جااامده

والموبيل اجمد

سواحة يقول...

اول حاجة جات فى بالى قبل موضوع نوفا مش عارفة ايه ده
انت من كوكب ايه صحيح الموبيل ده و اربع كلاوى يعنى انت مش من الارض اصلا
و بصراحة لسه شاكة فيك :-) من كثر افلام الخيال العلمى

Unknown يقول...

ياراجل دانا عيشت فى أروبا وانا باسمع المزايا
يانهار ازرق