الأحد، ٢٦ رجب ١٤٣٠ هـ

!! زمبئني زمبأ

جاتلي من فتره ماشيز عالفيس بؤ فيها مشكلة أحد أعضاء جروب كلنا فوزي .. وبالرغم من اني شايف المشكله عاديه الى حد ما .. لكن استوقفتني جملة قالها صاحب المشكله لما قلتله يبعت المشكله بنفسه ويشوف رد فعل الناس .. قاللي ساعتها
ماهو انا خايف لو قلت المشكله دي بتاعتي .. الناس تتريأ عليّ وتقول المتزمبأ اهو :
!!!!!!!!!!!!
جملته دي على قد ماهي عبثية المنطق .. لكن للأسف فيها شيئ من الحقيقه
خاصة لما تيجي واحده من بنات ليلى وتقول مشكلتها .. الكل بيتعاطف معاها .. سواءا كانو ولاد او بنات .. ويمكن ده هو السبب في ان المرأه شايفه نفسها لسه ما اخدتش كافة حقوقها .. مع ان لا المرأه ولا الرجل واخد كافة حقوقه اساسا
.. وبعدين فيها ايه لما واحد يكون متزمبأ .. عادي جدًا
.. كللو ماشي في الشارع متزمبأ اصلا
!! ده لو الواحد فات عليه اسبوع من غير زمبئه .. بيقول في حاجه غلط
ومش بعيد من كتر ما ادمننا الزمبئه .. نبقى ماشيي في الشارع كل واحد ماسك ايده زي المدمنين ويقول لكل واحده تقابله .. ابوس ايدك زمبئيني زمبوء صغير
!!!!
لكن إن يجي راجل ويقول انه اتزمبأ ويعترف بالزمبئه .. أبدا
!!! عشان كنا رجاله ووقفنا وقفة رجاله
إن يجي راجل ويقول جهارا نهارا انه كان ضحيه لواحده .. ابدا
!!! عشان كنا رجاله ووقفنا وقفة رجاله
إن يجي واحد كان عايش قصة حب ومبهدل نفسه دباديب ويقول يا خسارة الدبابيب .. أبدا
!!! عشان كنا رجاله ووقفنا وقفة رجاله
.. مع ان الراجل بجد .. عادي جدا انه يتزمبأ
الراجل بجد .. هو الشجاع اللي يقول للناس كلها انه انسان
الراجل بجد .. هو اللي مايحبسش دموعه وقت ماتبقى عايزه تطلع
الراجل بجد .. هو اللي ممكن في لحظة ضعفه .. يقول انه محتاج طبطبه
ده الراجل اللي اعرفه
وعلى فكره
اللي شايف - أو شايفه - ان الراجل بقدرته على كتم مشاعره .. يبقى مالوش لازمه انه يعيش .. أو تعيش
.. لأن أساس الدنيا .. اننا نتسنّد على بعض وقت ضعفنا
مش نشمت من بعض .. أو نسخر من مشاعر بعض

ملحوظه

مش عايز حد من ولود فوزي يبعتلي مشكلته ويقوللي زيع يا استاذ ابراهيم خلّي الناس تضحك
.. وأساسا ماينفعش أحارب بنات ليلى لوحدي ولامؤاخذه
راعو اني شاب وخايف على منظري قدامهم على الاقل
!!!! مش ممكن يقولو عليّ إني مش راجل

سوووو

هناك ٢٢ تعليقًا:

adel يقول...

بجد كلامك صح علي حكاية ان الراجل عادي يعيط و ان يحتاج طبطبة

الرجولة مش انك تبقي جامد
كده دي اسمها تنبلة و برود

بس ظهرت علي حقيقتك ياسوووووووو
بتخاف من الليالي (جمع ليلي)
ههههههههه

جحا المصرى يقول...

الله عليك ياسو
الرجولة أدب يامان
بس أوعى تخاف

ابن حـجـر الـعـسـقـلانـى يقول...

إزيك يا سوووو

بصراحة .. الكلمتين دول خيشوا فى دماغى

الله ينور عليك يا سوووو

ماعرفش ليه و انا باقرا كلامك عن الزمبأة تخيلت قائد جيوش المسيحيين اللى فى فيلم "وا إسلاماه" و هو شايف التتار بيهجم على المسلمين و هم بيصلوا .. و تخيلته بيقول: هايزمبأوهم و هم بيصلوا

المهم .. فيه كميات ضخمة من الأفلام فى السوق .. و مش شايفين أى حاجة على سينيماتيك .. لعل يكون المانع خير

يونيك اوى .... يقول...

اول مرة اسمع لفظ "زمبئة" دة بس سيبك انت بجد بجد الكلمتين اللى فى الاخر دول بهريز الحياة ... ما فيهاش اى حاجة ان الراجل يعيط ويزعل ويعتذر ويحب ويفرح .. اية يا عمونا هو مش بنى ادم لحم ودم !!!!!

كيكى عوووووو يقول...

زمبئة!!! الا معناها اية الجمله دى ياسوووو يا خويا!!!
عموما الراجل مش بس بكلمته الراجل لرعايته لبيته واسرته!!!!

مي يقول...

هههههههههه اول مرة اعرف معنى الزمبئة عثللللللللللللللل ياسووووووووووو
على فكرة الراجل ده انسان يعنى يحب ويزعل ويبكى ليه دايما فكرتنا ان الراجل مايبكيش عييب ياسلام !ليه ؟
الراجل مش ألة الراجل
بيبقى الاب الحنين والاخ الجدع والزوج الحنين اللى بيحب
تحياتى ليك ياسووو ومتتأخرش علينا

-::: بحرية :::- يقول...

ازيك يا سوووووووووو
متميز كالعاده
انا بحترم الراجل اللي يعبر عن مشاعرة ايا كانت بس برضو مش يبقى اوفر
يعي لو هيبكي يبقى مع افرب الناس ليه
زي مراته مامته اخته او حتى حبيبته
مش يسح عمال على بطال
ومفيهاش حاجة كمان اذا اعتذر واعترف بغلطته.. بالعكس ده معزته وحبه بيزيد. المشكلة ان اللي بيعتبروه ضعف ده بيحتاج شجاعة عشان يتنفذ

الا صحيح.....
هو انت بطلت تدخل سينيما ولا ايه
من ساعة فيلم الوعد مفيش ولا بوست!!

يوميات شاب منوفى يقول...

ياعم سوسو الكل فى الزنبوء سواسية وياما رجالة خدوا زنابيئ لما شبعوا بس مجتمعنا بيعتبر بكاء الراجل او تعبيرة عن حزنة وضعف عيب كبير تقبل مرورى

MǿиY El-Shreef يقول...

طب قولي يعني ايه زمببببأ :D

Rannon يقول...

حلوة زمبأة دي :))

أنا معاك جدااا
أن الراجل بجد .. هو الشجاع اللي يقول للناس كلها انه انسان
الراجل بجد .. هو اللي مايحبسش دموعه وقت ماتبقى عايزه تطلع
الراجل بجد .. هو اللي ممكن في لحظة ضعفه .. يقول انه محتاج طبطبه
ده الراجل اللي اعرفه

بس مش معاك في الحرب على بنات ليلى حرام عليك دول مساكين برضو

:))

انا حره يقول...

كلام جميل

كلام معقول

بس يعنى ايه يتزمبأ اصلا

كيكى عوووووو يقول...

مبرووووووك ياعمونا انا شوفتك ع الثقافيه انت وسحر واحمد الصباغ شوفت يو تيوب ياجرع!!
يامنورنا يامشرفنا وكلامك عاجبنى جداا عن كتابه الساخر
ياسوووووووووو يامصيت يابتاع اليوتيوب

مشمش يقول...

المشكلة الي اكبر من مشكلتو
مشكلتي انا اني معرفش يعني اية زمبو
وحاولت استشفها بذكائي الفطري ملقتش حاجة في ذكائي خالص فقولت اسالك اسهل
احسن مادماغي توديني في حتت غريبة

غير معرف يقول...

I adore your mood! You have a fantastic humour!
& Soooo cute on the youtube !

http://www.youtube.com/watch?v=XQwuP0UwoJI&NR=1

http://www.youtube.com/watch?v=0b8CabW0xLY

It wasn’t easy to find the videos!
Thx a lot كيكى عوووووو




Awdhal__

عاشقه الرومانسيه يقول...

اول زياره
بس عايزه افهم
يعني ايه زمبأ

nor يقول...

كل مدونتك بتعجبني جدا
اول ما ابقي عايزة اموت من الضحك اجيلك علي طول
بس المره دي لاقيتك بتقول كلام خطير و جميل
الراجل انسان له مشاعر و عواطف يضحك و يبكي و يتزمبأ ..كلو علي بعضه انسان تركبته في الاول و الاخر انسان
ربنا يوفقك و تلاقي ليلي و تبكي و تضحك معها
تحياتي لكل كتاياتك

Memo يقول...

.......

صبرني يارب يقول...

عليك مصطلحات عجيبه يا عم انت

عارف الزمبئه الى كترت دي ليه ؟؟

من كتر العك

تلاقي الواحد جرب يحب يجى خماشر واحده قبل الى اتجوزها

فلما يجى يتجوزي يلاقي نفسه ماعت من الحب ويبطل حب بقى الى الابد

والبنات برضه نفس الحال

واكم من بنات وشباب اتزمبؤا عااااااااادي بتحصل مع احسن العكاكين فى هذا البلد الجميل

رايي الحل الوحيد للموضوع انهم يتهببوا يتعلموا يأجلوا الحب لحد لما يبقوا قادرين يتجوزوا ويحبوا يوتجوزوا كده دفعه واحده مش على دفعات

وبالنسبه لموضوع اظهار المشاعر انا معاك تماما فى ده وطبعا الناس الى بتتريق او بتستهون بمشاعر الناس حتى لو كانت مشاعر زمبئيه ناس غلسه وما عندهاش دم واول ناس بيتزمبؤا

الرسول عليه الصلاة والسلام كان بيبكي
وابو بكر

وعمر بن الخطاب بحاله وقوته كان بيبكى

بس مش من الزمبئه طبعا دي خليها لكم انتم
ههههههههههههههههه

كراكيب يقول...

نياااهاااهاااااااا
سووو يا سوووو
ايوة ايوة انت عندك حق في كل اللي قولته.. الولاد عندهم قلب زينا زيهم ومشاعر ودموع واحاسيس كل ده زينا زيهم
وفي ولاد ممكن تبقى نسبة الرومانسية عندها كمان اعلى من نسبتها عند حبة بنات
بس كل واحد وتركيبة شخصيته
ممكن تبقى انت عندك مجموعة مشاعير كتيرة حزينة ومؤلمة بس لما تحكي تقول نصها وتكتم دمعتك مش علشان ما يقولوش عليك ولا علشان منظرك لا ده علشان هي كدة طبيعة شخصيتك وتركيبتها
والبنات برده في بنت ممكن تفضل تحكي وتعيط على مأساتها مع حبيبها اللي طلع واطي وتفضل تعيط وتنفنف وتشهق وواحدة تحكي وتحاول تبقى ماسكة نفسها برده علشان هي دي تركيبتها وطبيعة شخصيتها

حححححححح خير خير خير
المهم بقى احسن حاجة في البوست ده كله
هي ممكن تزمبأني زمبوءة؟؟ :)))))))

miro el niro kwaniroooo

Kiara يقول...

يعني ايه المتزمبأ ؟؟

غير معرف يقول...

عندك حق يا حراااام :((


على فكره أنا دالياdalia

كاميليا بهاء الدين يقول...

من إحدى الولايات أحييك

الولايات المتحدة يا سوووو
مش الولايات المُزات ههههههههههه



أنا بس جيت أقولك
رمضان كريم ..

كل سنة وأنت إلى الله أقرب
بقلب صافى كما أنت وروح أطهر.


لك منى تحية واحترام
ومن كتكوتتى تحية وبس
ههههههههههه


ربى يحفظك أخى