الاثنين، ٢٠ رجب ١٤٣٠ هـ

!! أخبار سوووويه .. بارت تو

أخبار محلية

بعد الدور المبارك العظيم لمصر في قمة الدول الثمانية .. وافق الكونجرس الأمريكاني على أن تكون المعونة الأمريكية لدولة مصر بمقدار مليار وثلاثة من عشرة من المليار دولار أمريكي , وصرّح مصدر مسئول بالحكومة المباركة بأنه قد صُرف فعليا أكثر من الثلاثة من عشرة على زيارة أوباما لمّا
.. نزل مصر , وعندما سأله المحرر عن ماذا سيُفعل بالمليار المتبقي .. أردف المصدر المسئول قائلا
!!! هنخلي أوباما يزرونا مرتين تلاته .. وبكده يبقى مالهمش حاجه عندنا
----
عقب الأحداث المتعلقة بمقتل المواطنة المصرية مروة الشربيني على يد مختل ألماني .. صرّح نفس المصدر المسئول بتاع الخبر اللي فوق وقال : اهو .. جبنا حاجه من عندنا .. ألمانيا بجلالة قدرها عندها مختلين .. عشان لما نقول اننا عندنا مختل عمل كذا ولا كذا .. يبقى تعرفو اننا بقينا دولة متقدمه , وبعدين علمك علمك علمك .. الحكومة المصرية مهتمه بحقوق المصريين في الخارج
!!! طب والمواطنين في الداخل .. مش كنت تبُص جوّه قبل ما تبُص بره يا حسب الله
----
هذا ولم يصرّح أي مسئول في أي حزب معارض - لا سيما الرئيس السابق لأحد أحزاب المعارضة - بأنه بصدد أن ينظم وقفة تضامنية على روح الشهيدة .. مثل الوقفة التضامنية التي نُطمت بمقر الحزب المعارض بميدان طلعت حرب .. وكانت حدادًا على روح الإيرانية ندا سلطان .. والتي تمت على أنغام الدي جي .. وهو يعزف أوبريت الحلم العربي
وماحدّش يستغرب ولا يقول إيه العلاقة بين إيران وبين الوطن العربي !!؟؟

أخبار رياضية

بعد صعود نادي الجونة من دوري المظاليم للدوري الممتاز .. أعرب مصدر في اتحاد الكرة عن قلقه من عدم قدرة نادي الجونة على اللعب في ملعبه الخاص .. وذلك لعدم الانتهاء من الأعمال التوسعيه .. ولكن إدارة النادي أعلنت أنه لو ماكانش الاستاد خلص .. يبقى اللاعيبه ساعتها ياخدو جولة سياحية
.. في الداون تاون أو تمر حنه .. ولو حبّو يروحو مارينا أبو تيج .. يبقى بيس يا مان

!!! ونتيجة الماتش ممكن تخلص في لعبة دارتس عالبار .. وخليك فريش احنا في رحلة
----
بعد أن ترددت اشاعات انتقال اللاعب محمد ابو تريكة لاعب النادي الأهلي المصري لنادي أهلي دبي .. واهو كللو أهلي , صرّح عمرو زكي لاعب الزمالك بأنه هو الآخر سوف ينتقل لأحد أندية الزمالك
.. المنتشرة في كل دول العالم , وعندما سأله المحرر هل للزمالك فروع أخرى .. أجاب بعصبية وقال
طبعا مش محتاج اقول ان الزمالك عندنا احنا وبس .. لأ .. أبسلوتلي .. الزمالك موجود في جميع دول
!!! العالم .. في العتبة .. ميدان عادين .. الديزة


أخبار فنية

صرّح أكثر من ممثل بأنه لن يحدث تداخل في الأحداث الدرامية في مسلسلات رمضان لهذا العام .. بعكس اللخبطه التي كان يشعر بها المشاهد في الأعوام السابقة , هذا وسيعرض في رمضان لهذا العام
.. مجموعة أعمال دراميه متميزه .. مثل
أدهم الشرقاوي , الأدهم , الأشرار , قاتل بلا أجر , أفراح إبليس , جنة إبليس , جنة ونار
العمدة هانم , هانم بنت الباشا
!!!
إذا كانت الأسماء لوحدها داخله ومتلخبطه في بعضها .. مش عايزيننا نتلخبط ازاي !!؟؟
----
أعلن الفنان الشعبي عباسط حموده بأنه سوف يقاضي عمرو دياب على وضع تاتو بإسم عبد الله على
.. كتفه في البوستر الخاص بآخر ألبوماته .. وعزز عباسط موقفه وقال لمحرر الخبر
الحكايه ومافيها ان أبويا كان بيتلخبط بيني وبين اخويا عبمجيد .. قام داققلي تاتوم عباسط .. وداققلو تاتوم عبمجيد ..عشان يعرف يفرّق بيننا لما يشوفنا يعني
.. وعندما سأله محرر الخبر هل لـ عبمجيد أي علاقة بالفن باعتباره اخوه التوأم .. قال مندهشا
!!! عبمجيد مش اخويا التوم .. ده أكبر مني باتناشر سنه بحالهم

أخبار صخصية

صرّح صاحب المدوّنه دي بخوفه أن يتم سرقته في الموضوع ده كما حصل معه هنا و هنا و هنا .. خاصة بعد أن نما الى علمه أنه هناك منتديات مقفوله لايمكن أن يعرف ماتحتوي عليه من مجرد
!! البحث عبر الجوجل .. وقرر أن يعمل كتاب يحمل اسم .. سرقوني وقفلو المنتديات
وفي حوار له مع المحرر .. اللي هو سوووو برضك يعني - الواد اتجنن وبيكلم روحه يا ولداه - قال
.. وهو يهرش في صلعته ويدخن لفافة الكولوباطرا
ساعات الاقي مواضيعي مسروقه
واشكي للناس ألاقيها محروقه ومبقوقه
.. من اللي سرقو عمرنا وأحلامنا
مع ان السرقه مننا فينا .. سارحه ومطلوقه

ملحوظة

لمعرفة أخبار سوووويه بارت وان .. كليك هنا يا برنز

سوووو

هناك ١٤ تعليقًا:

صيدلانيه طالعه نازله يقول...

ههههههههههههههههه
حلوه حكايه فروع الزمالك اللى ماليه البلد نسيت انت زمالك المحطه و زمالك البلد و زمالك ميدان الحصرى
بالنسبه لعباسط حموده قضيته كسبانه ميه الميهو لو مكسبهاش فى الاول و خد اعدام بكره يكسبها فى النقض و يطلع فارد ريشه و رافع البنطلون على صدره اكتر و اكتر
انا رايى انه عشان بوستاتك متتسرقش تانى ياتربطها فى باب المدونه ياما تحط جنبها كلب من الكبار دول و يفضل يهوهو طول النهار و يخوف الحراميه

MǿиY El-Shreef يقول...

ههههههههههههههههههه

والله انت عسل وشربات ياسووووو

انا ماليش نفس من الصبح ارد ع حد بس رديت هنا بقى خليتني افك والله

:D

موتني ع الزمالك وعمرو زكي وكمان عباسط ده ههههههههههههههههههه

ومعلش بقى بالنسبه للسرقه كله بيتسرق :(

ولو هتعمل الكتاب بجد انا عايزه نسخه مجانيه :P

adel يقول...

ههههههههههههههه

ياجامد ياسووووووووو

بس السرقة دي للناس الجامدة و انت اساسا استاذ كبير وانت عارف راي

بجد مسخرة و فعلا هو تقريبا احنا بنصدر مختليين لالمانيا

و مسلسلات ايه بس ياعمونا احنا فاضين من السينما
هههههههههههه

Rannon يقول...

يا أخباراتك يا سووووووو
:))

غير معرف يقول...

من اول اليوم وانا مخنوقه بس مش عارفه ازاي ضحكت اوي كده ..

انت فظيع .. :)

واحدة مجنونة يقول...

لا بجد بوست يجنن
تحياتي

إبـراهيم ... يقول...

عزيزي سوووو

بعد التحية والسلاااااموووز ...
وصلتني أخبار شقية إنك دلخت احكي يا ست هانم، وإنك بتشكَّر فيه، أما وإني ارتكبت نفس الجريمة وخارج مكششششر فييييه ومنه

ومـبـ ـ ـ ـووون الحقيقة من التعامل الفج مع قضايا المرأة، وإلباس 3 أفلام ملابس فيلم واحد وصنع ضجة من اللاشيء، فإني أنتظر تحليلك العميق

وخلينا نشووووفــــك

أنا، و .. عنيــــا

يونيك اوى .... يقول...

انت مالكش حل ... ربنا يحفظلك دماغك

كراكيب يقول...

طيب هو عباسط هيقاضي عمرو ليه طيب
علشان بيقلد ابوه يعني واللا ايه؟؟
واللا ابو عباسط هو اللي داققله الوشم وعمرو خلع قبل ما يدفع
واللا علشان عمرو ماعندهوش سبب منطقي لدق الوشم زي السبب الوجيه جدا اللي عشانه ابو عباسط دق الوشم لعياله؟؟

وبعدين يعني عباسط يقاضي عمرو دياب وانت مش عارف تقاضي الناس اللي بيسرقولك
دي حتة توبقى عيبه في حقك برضك يا زميلي.. واللا ايه
شفلك كدة ايوها محامي بلوجاوي يرفعلك قضية واهو يكارمك في الاتعاب اكمنه زمل وبلوجر زيه زيك
واللا ايش؟؟

;)
miro el niro kwaniroooooo

Darsh Basha يقول...

هههههههههههههههههه
لا جامد جدا دى

كيكى عوووووو يقول...

عاجبنى جدااا موضوع عب باسط دةعبمجيد!!!!
واذا كان ع السرقه فكلنا اتعلم علينا!!

مرجانة يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ياريت دي تبقى نشرة الاخبار فعلا
بتفكرني بنشرة اخبار الخامسة والعشرون
جامد يا سوووو

يوميات شاب منوفى يقول...

ياعم سوسو الكل فى الزنبوء سواسية وياما رجالة خدوا زنابيئ لما شبعوا بس مجتمعنا بيعتبر بكاء الراجل او تعبيرة عن حزنة وضعفع عيب كبير تقبل مرورى

مشمش يقول...

اولا وحشتني موت ياصحبي ثانيا
الموضوع جميل جدا