الخميس، ١٨ جمادى الآخرة ١٤٣٠ هـ

!! باراك أوباما .. المصري

ركبت ميكروباظ صقر قريش من قدام محطة مترو المعادي عشان أروّح بيتنا .. وقبل الميكروباظ ما يتحرك راح شاب زنجر من اخواننا بتوع افريقيا راكب معانا وقعد جمبي .. واتحرك الميكروباظ ووصل ناحية مؤمن اللي في شارع اللاسلكي .. وهنا لقيت الواد الافريقي بيقوللي بلهجة متكسرة
هاسانين دسوكي .. فايدا كامل !!!؟؟؟؟ :
فهمت انه يقصد (حسنين دسوقي - فايده كامل) .. و دي منطقة تتوسط المعادي القديمة و دار السلام .. يعني باختصار مش ناحية المعادي الجديدة ولا شارع اللاسلكي ولا صقر قريش .. ولما قعدت اخبط معاه في الجريجي - راجع خبراتي في فك طلاسم اللغة الجريجي هنا و هنا - فهمت انه ركب ميكروباظ غلط .. والمفروض كان يركب ميكروباظ من الناحية التانيه للمترو مش من الناحية اللي انا ركبت منها .. وبالتالي بقيت مُجبر اني انزل معاه عند نقطة صقر قريش عشان ياخد ميكروباظ من الميكروباظات اللي طالعة فايده كامل .. وبعد مانزلنا قلت اتكلم معاه كنوع من أنواع كسر الملل لغاية ماتيجي عربيه تاخدو .. سألتو انت منين .. قاللي من كينيا .. رحت قايللو وانا مبتسم .. يعني انت بلديات أوباما .. قام ابتسم ابتسامة الواثق من نفسه يمشي ملكا .. وأسنانه نوّرت المنطقة اللي مافيهاش ولا فانوس شغال .. وأكّد على كلامي
!! هوب جه ميكروباظ فايده فايده فايده .. وقلتله يركبو ويغور من قدامي الساعه دي

وانا ماشي في الشارع بقى ومروّح بيتنا .. سرحت كده وتخيلت لو ابو باراك أوباما بدل ما كان ينزل على هونولولو - هاواي .. كان نزل على حسنين دسوقي - فايدة كامل .. أو عاصمة أفريقيا في المعادي .. ساعتها جه في دماغي كزا سيناريون لـ باراك اوباما جونيور

أول سيناريون .. لو أبوه كان اتجوز واحده من اخواتنا الافارقه اللي مالين المنطقة .. ساعتها الواد أوباما جونيور كان ممكن ينضم لقافلة نصابين أفريقيا والدولار الاسود .. اللي بيروحو للتجار ويقولولهم ان في شحنة دولارات والورق بتاعها مدهون اسود ومش باين ملامحه .. هتنزل مصر متهرّبه .. والمية ألف دولار هيتباعو بخمسين ألف جنيه مصري .. وعشان يصدقوهم التجار الطماعين .. يقومو العالم الزناجرة يجيبو دولارين تلاته مدهونين حبر أسود .. ويغطّسوهم في مادة مُذيبة تمسح اللون الأسود والدولار يبان .. يقوم ساعتها التاجر الطمّاع يقول آمين
وكنوع من الجدعنة الأفريقي .. يروح النصابين الأفارقة جايبين مع شنطة الدولارات السوده .. جركن فيه سائل مذيب للون الأسود - والله فيهم الخير - وياخدو الفلوس المصري وفي الخليعه .. ولما يحب الزبون يعمل نفس اللي عملوه اخواننا النصابين .. يتفاجأ بإن الورق اسود ولا هو دولارات ولا بطيخ
طبعا بعض التجار بيخافو يبلغو احسن يلبسو قضية إتجار في عملة .. والبعض التاني بيبلغ لكن ولا الهوا
.. أخرها بس انهم يحطو صورة أوباما ومكتوب تحتها
!!! ساعدنا في القبض على هذا الحَلَنجي
----
تاني سيناريون .. لو الواد أوباما جونيور وهو شباب لعب كورة في أي دورة رمضانية على صندوق بيبس وخرطوشة سجاير ماللبورو احمر .. وكان من وسط الجمهور سمسار لاعيّبه او مدرب فريق درجة تالته .. واكتشفو وشاف فيه امكانيات لاعب يصلح للدرجة الأولى زي الاهلي مثلا .. والامكانيات اللي باتكلم عنها انه - باعتباره أفريقي الأصل -هيستحمل شلاليت لاعبي الترسانه .. أو مش هيفهم شتيمة جمهور ولاعبي الزمالك .. أو على الاقل هيحوش الطوب اللي بيتحدف على اخواته لما يلعبو في استاد الاسماعيليه
ومش بعيد يشهر اسلامه ويبقى اسمه أحمد أوباما زي أحمد فيليكس بتاع الأهلي سابقا .. ويصاب بقطع في الرباط الصليبي مثلا ومايلاقيش نادي يشتريه غير الزمالك اللي يِتوِكِس بيه .. ويدور بعد كده على أندية الدرجة التانيه والتالته عايز يبيعه .. وبعدين يختفي في ظروف غامضه

!!! ويتضح انه في مركز شباب في الأقاليم بيدوّر على أي موهبة .. عشان يسترزق
----
تالت سيناريون .. لو ابو أوباما اتجوز واحده من اللي بيبيعو جرجير على فرشة في الشارع .. واتجوزها طمعا في الجرجير مش محبة يابو صلاح .. والوليّه اتجوزته من منطق ضِل راجل ولا ضل كشك سجاير .. وده مش أي راجل ولا أي ضِل .. ده الليل وآخره ياعم الحاج
طبعا الواد أوباما جونيور باديء ذي بدء مش هيبقى اسمه أوباما .. هيبقى سيد .. وابوه هيبقى بركه .. وهنلاقي سيد بركه ده بيقف قدام الجوامع يبيع مسك وعنبر وسيديهات دينية متسجلة في بير السلم .. وشوية بشوية يتحول سيد بركه البائع السريّح لشيخ معروف - من كتر الخطب اللي سمعها وهو واقف على فرشته برّه الجوامع - ويعمل سيديهات دينية في نفس بير السلم اللي متسجل فيه السيديهات بتاعة المشايخ السابق بيعهم .. قصدي ذكرهم .. والناس تتهافت عليه من كل صوب لما تسمع انه هيخطب في زاوية من الزوايا
.. ويدخل الشيخ سيد بركه ويقف على المنبر ويقول .. أسلامو آليكوم
!!!!!!! والناس بدون أي وعي ولا إدراك .. هتقطّع إيديها من كتر التسقيف

ملحوظه

.. في كل السيناريوهات دي .. ما جاش في دماغي ان اوباما ممكن - مثلا مثلا مثلا - يكون في يوم
رئيس جمهورية مصر العربية
-
سوووو

هناك ٢٩ تعليقًا:

Bravo_fox يقول...

انا برأيي اسكن في الدور الارضي في العمارة بتاعتكم.

adel يقول...

ههههههههههه
كالعادة مسخرة ياسووووووو

هو ينفع في اخر اقتارح بتاع الشيخ
هههههههههه

هيبقي تحفة و احتمال يبقي امير جماعة و يسافر افغانستان و امريكا تروح تدور عليه هناك

ايه دنيييييييييييا

هههههههههههههه

ايمان مجدى يقول...

عجبانى فكره انه هيبقى الشيخ اوباما ...ده لو مكنش بقى خلاص واكيد هنقطع ايدينا لما يقول السلام عليكم ....رغم انى طول عمرى بقولها عمر ما حد سقفلى ....حظوووظ
لذيذ اوى البوست والمدونة
تحياتى

قررت ألا اختار اسما يقول...

هههههههههههههههههههههههههههههههههههههههههههههههههههههههههههههههههههه
ربنا يستر و محدش يقراله التدوينة دي
بجد تحفه

فاروق عادل يقول...

هههههه انت بلدياتنا ياعم من المعادى
-------بوست تحفة كالعادة

همس الاحباب يقول...

هههههههههه
السلامو عليكو
ما تصقف ياض يا سووووو
ولا ليكم ناس وناس
اااه يا بشر
تسلم الايادى
مبدع دايما يا سوووو
تحياتى

كيكى عوووووو يقول...

عاجبنى السيناريو ال3 اوى

Me7'o يقول...

يا راجل حرام عليك
بقى معقولة رئيس جمهورية مصر بجلالة قدرها العربية تكون سنانه مخلعة كده

ده حتى يبقى فال وحش
لما حسحس آهوه ابن آمون رع وستى لأبوها لسه شعره أسود زى ما هوه ولو كشفت عليه تلاقيه لسه بيلبس بامبرز ولا لافف ورق جرايد
ههههههههههههههه

تحياتى

كراكيب يقول...

سووو يا سووو
ايه سينا وبيبا دول
ايه العااااااسااااال دااااااااه
موتوني م الضحك
تحفة يا سووووو البوستين اللي انت حاططهم في النص دول

وبعدين استكمالا للغتك الهايلة
مايبقاش اسمه ميكروباظ بقى
اسمة موكروباظ.. انطقوا عدل بقى
تؤ...

miro el niro kwaniro

Diyaa' يقول...

سؤال بس
هو الصورة دي بعد ما استلم الحكم ب 3 ثواني ؟ يعني مكانش لسه سرق ولا مليم عشان يركب سنانه اللي هتفضل تبرق لحد ما ربنا يريحنا منه ويبتلينا بابنه الاسوأ منه ..جومال ولد الحاج موباراك أوباما؟

Memo يقول...

كله مقدر ومكتوب.

Ahmed Al-Sabbagh يقول...

:)))
دماغك عالية اوى اوى

مرجانة يقول...

كل سناريو احسن واكثر واقعية من الاخر
مش عارفة اوصف ازاي انا بستمتع بمدونتك
تحياتي

VÖltaa يقول...

فى سيناريو تانى
انه ممكن يبقى ممثل
وساعتها كان احتمال يودى مصر للأوسكار
نياهاهاهااا

جامدة ياسوو

غير معرف يقول...

انا طوووووووووووووول القراءة عامل كده:D

و ياااااااااااا سلام يااااااا سلام لو نزل بئه الوكاله و بئه اكبر تاجر زى الحاج ميتو كده و يتكتب عنه افلام و حكيايات و برضه ف الاخر

و ياخد جائزة نوبل و اوسكار و شهاديتن من مستشفى الصدر و شهاده معتمده من المعهد البريطانى-مش بريطانى اوى - و الناس تحبه و و يبئه مشهور ويرشح نفسه للرئاسه و كل استطلاعات الرأي ترجح فوزه و الجزيرة يوم الفرز تعلن فوزه و هييييييييييييييييييييييييييييييييييييييييييييييييييييييييه


جمال بئه برضه الريس :))

صباح الصباح يقول...

نحفة بجد يا سووو
هوة انت ساكن فى صقر قريش

انا الشركة اللى باشتغل فيها لزق فى مؤمن .. يبقى باذة اللة هاشوفك

يونيك اوى .... يقول...

تحفة يا سوووو
بس فى سيناريون رابع انه يكون اى حاجة وبعدين يدخل ( انحلال اكاديمى ) والناس تصوتله - يالهوووى- ويخرجلنا منها مطرب فاشل يقرفنا بصوته وينضم لنص الشعب المصرى اللى بينشز...

خمسة فضفضة يقول...

السلام عليكم ورحمة الله وبركاته

ههههههههههههههههه

يسلمك خيالك يا سووووووو موتني من الضوحك


ههههههههههههههه

غير معرف يقول...

ههههههههههههه
هههههههههههه
والله ووحشتنى بوستاتك يا سوووووووو

محمود خاطر يقول...

طب ليه لما عرفت انه كيني ماكنتش طايقه، انت ليه مش خفت أحسن في الانتخابات الرئاسيةالقادمة يكون الواد اللي انت وصلته للميكروباص ده هو المرشح الجديد لخلافة أوباما.

راسبوتين يقول...

أصدق سيناريوهات حلوة ومحبوكة
سيبك بقى من أوباما
دا انا شخصيا ممكن أطبق واحد من السيناريوهات ده وخصوصا بتاع سيد بركة .
ومش بعيد يا معلم تشوفنى على قناة الناس عن قريب

UncŁē Sam يقول...

سووو حبيب قلبى
بص يا باشا انت متعرفش بجد انا متابعك من امتى وبحترمك قد اية ده انا يا جدع بحبك من ما اشوفك
حب ربانى
ومن فترة كده كنت بشوف المدنة بتاعتك عجبيتنى ونقلت منها حاجات كتير من غير ما استئذن منك ده انا حتى غيرت اسم المدونة وخليته عجوز وعندى 19 سنة
بس والله اللى انا عملته عارف ان دى تعتبر سرقة بس بجد انا عملت كده علشان بحس ان انت بتكتب اللى بيدور فى دماغى وبجد بيعجبنى كلامك اوى
ده لينك مدونتى www.moozz8.c.la
وده موضوع كـان عاملة الباشا احمد الصباغ عنى المدونة بتاعتى
http://ahmedelsabbagh.blogspot.com/2009/06/19.html
وقال فيها هو ولماضة ان انا حرامى وبرغوت وتافه وغبى :D
حرام والله كده
بص يا حبيبى انت لو عايزنى امسح الحاجات اللى نقلتها من عندك همسحها
وانا اسف كمان مرة ان انا نقلت منك حاجات من غير اذن بس والله ده حب فيك مش اكتر
وعد منى انا هرجع زى الاول كل اللى هيتكتب فى المدونة عندى هكون انا اللى كاتبة ووعد كمان لو ممسحتش الحاجة بتاعتك هكتب عليها كلها منقولة من سووو30 قشطة يا باشا
هستنى ردك وانا اكيد زى اخوك الصغير وهستامحنى وده شرف ليا ان انا بكتبلك اساسا يا كبير

غير معرف يقول...

انت ليه مش مخلي الناس تعلق الا لو سجلوه يلا مش مهم
ام هند
على فكرة يا باشا انا هاخد منك كام موضوع كده احطهم ومتقلقش مش هاجيب سيرتك خالص هههههههههه
اوعى تاخد كلامي هزار
سلام با عمونا

كرانيش يقول...

لذيذ الموضوع
بس انا حاسه ان الراجل ده هيخالف كل توقعاتنا

ناس تشكك
وناس تصدق

ومحناش عارفين الجاى يستاهل كده كله ولا لا؟؟


تحياتى للمدونه
وبسجل اعجابى بيها اكيد

Unknown يقول...

هههههههه
اكتر حاجه ضحكتني رئيس جمهورية مصر العربيه دي
معرفش ضحكت قوي ليه كده
يمكن لان المشرحه مش ناقصه قتله

mostafa rayan يقول...

باشا
ويمكن كمان البلية تلعب معاه ويطلع في قناة الناس والرحمة وهوب
يبقي من مفتيين الامراء و الاثرياء العرب
وهوب يبقي صاحب قناة فضائية كل اللي بيشتغلو فيها سود
فكرة مطرقعة قوى يا سووووووو
كل التحية ليك يا جميل

بـِصَمتـِـ أميرة ــــى يقول...

ههههههههههههههه
حلو اوى البوست ده
بس انتى محمى ؟ ووراك ضهر يسندك واللا ايه النظام؟
ههههههههههههههههه
والصور المتركبة
هنروح فى داهيه كدة
والاى بى بتاع جهازك هيتعرف
ههههههههههههههههههههههههههههه
بجد سكر
اوباما الهمنا بافكار كتير
كتر خيرة الراجل ده
هيقطع نفسه اكتر من كدة ؟
تقبل مرورى
:)

(ملكة بحجابى )

فشكووول يقول...

خلينى يا سيدى الـ 29 واقول لك السيناريو الاخير لو فكر يبقى رئيس جمهوريه .... حيلاقى الطريق قدامه مسدود مسدود يا ولدى ومش كدا وبس دا حيعملوا فيه اللى ما اتعملش فى ايمن نور والسجون والقضايا المتلفقه وعينك ما تشوف الا النور ... اصل احنا ما ينفعش عندنا يبقى فيه رئيس سابق ولا لاحق هو بس الرئيس الحالى وخلاص واى حاجه غير كدا امال احنا عاملين السجون لمين بقى عشان الاشكال اللى زى دى واللى تفكر انها تبقى رئيس جمهوريه وعشان كدا انا عملت مدونى رئيسا لجمهورية فشكولستان الديمقراطيه والشعبيه والعنقوديه والبلوجريه واى حاجه فيها كلمة اييييه
تحياتى

واحدة مجنونة يقول...

بوست لذيذ
بس احلى سيناريو اخر واحد خالص
السطر الاخير كده
بس يا رب ميحصلش حاجة من الحاجات دي
حلو جدا
تحياتي