الأحد، ١١ ربيع الأول ١٤٣٠ هـ

!! ظابط أمريكاوي

من قيمة شهرين تلاته اربعه .. جالنا واحد خواجه ومراته عايزين يأجرو شقة مفروشه عندنا .. والصراحه الراجل كان خواجه مُز مُز يعني .. حاجه كده طول بعرض وابيضاني وشعر اصفر وعين تِكني كلر ونضيف ومستحمّي حُمى رباني .. بس مراته ماكانتش على نفس درجة المزازه بتاعته .. وتقريبا من اثيوبيا او الصومال او حاجه افريقيه .. مش خواجاية المولد والاصل زي جوزها يعني
الراجل ده انجليزي .. وتحديدا من ايرلندا .. وجاي من بلده عشان منضم حديثا لقوات حفظ السلام هنا في مصر .. بعد ماكان في دارفور في السودان .. وكنت انا حلقة الوصل في التعامل مابينه وبين ابويا واشتغلتلهم مترجم .. بس المشكله ان الانجليزي بتاع الخواجه مش انجليزي امريكاني ولا حتى انجليزي انجليزي .. لأ .. ده انجليزي ايرلندي .. وتحس انه شوية حروف متعجنه في بعض
أي نعم في ناس معتقده اني مابفهمش في الجريجي .. بس هيهات .. ده انا الجريجي ذات نفسه .. مشكلتي اني باتكلم الجريجي القديم .. بتاع شكسبير وهاملت والناس الحلوة دي .. وهنا بتحصل الفجوة الحضارية مابين جريجي شكسبير .. وجريجي بنات اخويا

ام هند .. الراجل الخواجه ده كان في الأول شغال هنا في القاهرة في شوية حاجات إدارية .. وكنت باتواصل معاه ذهنيا وفكريا .. لأنه قرف من اللي بيحصل هنا في مصر .. وكنت باوضحلو ان مصر مش أي حاجه .. دي مصر كل حاجه .. دي مصر ام الدنيا اصلا
وقعدت فتره باتردد على الخواجه ده في بيته كل مايحب نتكلم شويه .. واقعد العب مع القطة اللي جايبينها من بلاد بره بباسبور .. وحاطين فيه صورة القطه وشعرها الابيض المنكوش .. ولابسه طوق شيك كده عليه رقم .. حتى القطط بتاعتهم مزز خواجاتي

وفي احدى قعداتي معاه .. قاللي انه مسافر سينا عشان ينضم للجبهة .. وماعرفش جبهة ايه .. بس هو قال كده وانا مش هكدّب واحد خواجه يعني .. وقال انه خايف من التعاملات مع الشعب المصري اللي هناك في سينا .. وانا قلتله ده المصريين مافيش زيهم .. ده المصريين حاجه كده زي البلسم .. ده المصريين احباب الله ياجرع
وقلتله برضه احتياطي كام كلمة بالبلدي كده عشان يقولهم لو احتاجلهم وقت الشده .. لكن هو كان خايف ان المصريين يكونو شايلين من الانجليز من ايام الحرب العالمية وايام الباب العالي والسلطان العثمانلي ومصطفى كامل واحمد عرابي وعاشور الناجي .. ولو اني ماعرفش أي علاقة عاشور الناجي بالحكم العثمانلي .. ومين عاشور الناجي ده اصلا .. وبعدين هو في حاجه اسمها سلطان عثمانلي أساسا !!!؟؟؟
قمت انا قلتله عالحل المفيد .. قلتله لو حد مصري من عامة الشعب كان هيخبط معاك في الكلام .. قوللو انا ظابط امريكاني .. في الاول الخواجه استغرب .. لكن وضحتلو ان دولة امريكيا ليها صيت هنا عن دولة انجليزيا .. وهو اقتنع بالحوار .. ووصاني اني اخد بالي لو مراته احتاجت حاجه واديتلها رقم موبيلي لو حصل أي طارئ .. واتجه الخواجه عالجبهة
والحقيقة مراته كنت بتتصل بي في اضيق الحدود وانا كنت بتعامل معاها على اعلى مستوى من الاحترام .. لدرجة اني كنت كل ما اجي اكلمها ابقى باصص على الارض .. مش عشان انا جنتل ولا بتاع .. بس عشان شكلها مش حلو اساسا .. وكنت على طول كل ما تجبرني الظروف اني انزل لها في شقتها سواءا ساعة تركيب فلتر الميه او تركيب وصلة الانترنت .. اقعد العب مع القطة بتاعتهم ام باسبور دي
وطالت غيبة اخونا الخواجه .. اسبوع .. عشر تيام .. اسبوعين .. ولا الهسس .. ومراته تتصل بارقام الناس اللي اداهملها وبرقم الجبهة شخصيا .. ولا عارفين حاجه من ساعة ماخد اجازته من اكتر من اسبوع .. خصوصا انه المفروض يقضي اسبوع في الجبهة .. واسبوع اجازة في القاهرة .. ولاجل الحق .. انا قلت تلاقي الخواجه شاف واحده خواجايه من بتوع أي دوله نضيفه عالجبهة .. وقال بلا مراتي بلا نيله .. بس ماقدرتش اقولها عالهاجس ده عشان مايحصلش حاجه .. ولا ماترضاش تخليني العب مع القطة ام باسبور
فين وفين .. جه الخواجه .. وانا نزلت عشان اخد منه الايجار وكمان اتطمن عليه .. ولقيته في حالة كده مش مظبوطه .. يعني كلامه معايا قليل .. وطول الفترة كنت باتكلم مع مراته وبالاعب القطه بتاعتهم - ام باسبور دي - وهو شارد البال وسرحان .. وبعد ما خدت الايجار واديتلهم ايصال بالمبلغ وجاي امشي .. لقيته بيقولي انه عايزني في كلمة على استنفصال كده .. قلتله ماشي .. طلع معايا على باب الشقه وهو على نفس حالة الشرود اللي عنده وقاللي
الخواجة : ليه ؟؟ - هو قالها بالجريجي يعني
سوووو : ليه ايه ياعمنا !!؟؟ - بنفس الجريجي برضك
الخواجه : ليه عملت كده؟؟؟؟
طبعا مع حالة التسهيم والشرود اللي هو فيها .. دماغي راحت وجات والشيطان لعب بيها كورة شراب .. وقعدت اقول في عقل بالي ايه اللي قلته غلط وضايقه .. ولا يكونش اسماعين البواب شتمه وقاللو اني انا اللي شاتمه .. بس اسماعين اساسا مابيعرفش يتكلم عربي عشان يكلمو بالجريجي .. المصيبه بقى يكون افتكرني انتهزت فرصة انه مسافر وكنت بالعب بديلي مع مراته ولا حاجه والعياذ بالله .. بس ازاي .. ده انا مُز عنها .. ومُز بمراحل كمان .. وبعدين الراجل ده من ايرلندا .. والايرلنديين زي الصعايده دماغهم مقفله ومابيفهموش وبيضربو بالنار وبعدين يسألو ايه الحوار بقى ؟؟؟ .. وفوق كل ده هو ظابط اصلا .. يعني على الاقل معاه طبنجة خواجاتي مش فرد حلوان اللي بيبقى مع ظباط مصر .. يانهار اسود .. طب مين اللي اشتغلو وقاللو الكلام ده .. وايه مصلحته .. وانا لو حبيت انكر هقول ايه .. وهستعين بشهادة مين .. أي نعم القطة ام باسبور كانت بتبقى معانا في قعداتي مع مراته .. بس القطه لو اتكلمت هتتكلم لغة قططي خواجاتي .. وانا آخري افهم قطط شوارع مصر
سوووو : - وانا في قمة حيرتي - تقصد ايه يا خواجه ؟؟؟؟؟؟
الخواجه : - وعينيه مغرورقه بالدموع - ليه قلتلي اقول اني ظابط امريكاني .. ليه !!؟؟؟

أن أن آآآآآآآآآآآآآآآآآآآآآآآآآن .. فسسسسسسس

وحكالي على اللي حصل .. انه وهو نازل مصر بعد ماخلص الاسبوع بتاعه عالجبهة .. شاف اتنين لابسين جلاليب وشكلهم بدو .. وقالوله شوية كلام مافهمهوش .. قام قاللهم وهو منفوخ - زي مانا وصيته - انا ظابط امريكاني
وعينكم ماتشوف الا النور .. الاتنين البدو بقدرة قادر بقو اتنين وعشرين .. سته واربعين .. سُبعمية وسفحطاشر .. زغابة ناس هجمو عليه .. وهوب راحو مغطيين دماغه بالحطه الفلسطيني وخطفوه .. وطلعو بيه عالصحرا .. وطلبت معاهم ياخدوه رهينة ويطلبو فديه .. وقعد الخواجه يزعق فيهم ويقولهم يا جماعة انا ولا امريكاني ولا بتاع .. لكن هم خلاص .. خواجه وقال امريكاني يبقى امريكاني .. هم الخواجات الامريكان هيكدبو يعني !!؟؟؟
فين وفين جه للعالم البدو واحد قريبهم متعلم في القاهرة .. وبيفهم انجليزي من اللي هو الايرلندي ده .. وبعد ما سمعه وشاف تحقيق الشخصية بتاعه .. اقنع الناس اللي خاطفينه انه مش امريكاني وانه ايرلندي .. قامو هم طبعا لأنهم مايعرفوش ان ايرلندا دي جزء من انجليزيا .. واعتقد انهم حتى لو كانو عارفين ماكانتش هتفرق معاهم في حاجه .. قامو اطلقو سراحه
الجميل بقى ان الخواجه لما بيسأل المترجم اللي حل الموضوع وحب يستفسر منه هم كانو عايزين ياخدو فدية كام .. قاللو مبلغ كبير قوي .. طماعين البدو دول .. طلبو مبلغ يالهوووووي
قالو عايزين مية الف جنيه
!!!!!!!!!!!!
نعم .. مين .. ايه !!؟؟؟
مية الف جنيه !!!!!!؟؟؟؟؟؟؟؟
انتو خاطفين سواق توك توك !!؟؟؟؟
!!! ايه شغل العصابات السكّه ده .. ماتطلبو مبلغ ليه لازمه
!! يعني انا لو مكانهم مثلا مثلا .. مش هطلب اقل من مية الف دولار .. ودولار استرليني كمان
اه .. مانا لازم انتهز الحاجات
----
طبعا الراجل الخواجه من بعدها بقى بيشوفني في مدخل العماره يعمل نفسه خواجه خواجه
ولا كأني موجود .. وحتى الايجار شكلو هيبعتو مع اسماعين البواب

!!! بس انا كان نفسي اعرف حاجه معينة قبل مايقطع معايا
القطة بتاعتهم .. مكتوب في الباسبور بتاعها جمب خانة المهنة إيه !!!؟؟؟؟؟؟؟

.. ملحوظة بتحديث

.. اللي جه في دماغي لما قلت للخواجه يقول لأي حد يقابلو انا ظابط امريكاوي
.. ان اسم امريكا اقوى من ايرلندا هنا .. والناس هتتعامل معاه بحذر وخوف
اذا كان كبير البلد كلها خاف من أمريكا وافرج عن ايمن نور لما أوباما قال انا مش مستعد يحصل أي تعاون مابيني وبين أي ديكتاتور
يبقى بالقياس .. الشعب المحكوم من الديكتاتور هو كمان هيخاف
.. بس تقريبا مافيش حد خايف من أمريكا
!! أو مش بنخاف غير من اللي حاكمنا .. بس بكرباج

سوووو

هناك ٤١ تعليقًا:

صبرني يارب يقول...

يا لهوي عليك

صدقنى اول ما انت قلت قلتله قول انا امريكاني

قلت يا لهوي ايه ده سو وداه فى داهيه

حد يعمل كده يا ابنى بقى الانجليز عندنا دلوقتي مكروهين اكتر من الامريكان ده كلام يا راااااااجل


طبيعي يعنى ده يحصله كويس انه لسه عايش

لا ده انت فى التراوه يا سو حد يعمل كده
هههههههههههههههههه

الراجل له حق ما يكلمكش تاني


عمال فيها فله بقى وهاتنصح وتقطع الراجل نصايح
ههههههههههههههههههههه

وحياة ابوك يا سو تعزم الراجل الغلبان ده على فطير وقشطه وعسل وتصالحه عشان تقولي القطه بتشتغل ايه حداهم هنا فى ايرلندا

صبرني يارب يقول...

ايه ده انا اول تعليق

طب بما انى على البلوج لوحدي ممكن اقعد اشرب شاي ؟
بقى وناخد التعليق التاني كمان

صبرني يارب يقول...

طيب مافيش اي سبيشيال اوفر لاول 3 تعليقات ؟؟؟


طيب خلي الشاي كومبليت هنا تالت تعليق

خمسة فضفضة يقول...

السلام عليكم ورحمة الله وبركاته

علي طول كده يا سوووو مقصر رقابينا كده تودي الراجل في سكة اللي يروح ما يرجعش

شكلك كده كنت راسم علي القطه ام باسبور

ههههههههههه
---------------

عارف انا اموت واعرف حكاياتك دي حقيقية ولا من وحي الخيال خصوا الحكايه ودي والحكاية بتاع توليد النعجه

سلام

عاشقه وغلبانه يقول...

كاتبين في خانه المهنه ... لاتعمل
ربه منزل
اي حاجه ياسو
مشيها وماتقفش ع الواحده
مش كفايه كنت هاتودي الراجل في داهيه
هههههههههههههههههههه

حروف يقول...

ههههههههههههههه انت تاني مش قلتللك بلاش القطط عايز تقرر ازمة ماما سو تاني
امريكاني ايه بس
لو كنت بتحبه قول انه جاسوس ههههههههههههههههههه

مهندس مصري بيحب مصر يقول...

ههههههههههههههههههههههههه
وديت الراجل في مصيبة
معاه حق
ليه تعمل فيه كده
بقى أنت مش عارف إن الضباط الأمريكان مكروهين بسبب العراق و افغانستان

ثم أيرلندا مستقلة عن بريطانيا يا بني

إنت ضعيف في الجغرافيا و التاريخ و لا ايه ؟

أيرلندا مستقلة و عاصمتها دبلن

أما أيرلندا الشمالية فلم تستقل بعد و ما زالت جزء من بريطانيا و عاصمتها بلفاست

ebn roshd 777 يقول...

انا بس نفسي اعرف ايه اللي كان في نيتك لما اديته نصيحتك الغاليه دي؟؟

موجة يقول...

انت بجد سوووو ياسووووووووو
بس كلة كووووووووووم
والقطة ام باسبور دى كووووووووم
وبعدين صحيح كاتبين فى الباسبور بتاعها الاسم ايه
والمهنة ايه؟
ورقم البطاقة
يعنى الاشتغالات دى مالينها ازاى
مش انت كنت بتلاعبها ياسووووووو
مش كنت تستفسر منها
ولا تشوف باسبورها
انت غلطان ياسووووو
انت ولا طلعت سوووو ولا حاجة بقى
زعلتنى بجد
مخاصماك هه بس

أبو العريف يقول...

سووووووووووووووو
ينفع يا معلم تودي الراجل ف داهيه
طيب قوله انه يقول انه هندي
مش فيه هنود برضه جايين يشتغلوا في مصر
وبعدين لو حد كلمه كان طلعلهم القطه
ام باسبور
وقالهم دي فيل
واللي مش مصدقه يقرا الباسبور

adel يقول...

ههههههههههههههه

ادي اخرة اللي يمشي ورا كلامك ياسوووووووو

و شكلك لعبت بديلك و بصبصت للقطة ام باسبور

امريكني كويس انه متقتلش ياعم

ههههههههههههههه

د.خالدأمين يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه



ايه ياعم ده


هي المدونه دي كانت فين



مش ممكنة مبلطش هنا بعد كده



انا نادرا اما اقري بوست مره واحده

قوم ايه


قريت البوست مرتين


ياخبر ابيض


ظابط وامريكاوي



ياراجل دي كلمه ظابط دي لوحدها مصيبه
وكفيله بانه ياخد علقه ماخدهاش حمار في مطلق



سلاوووووز

تامر علي يقول...

تصدق فعلاً كتير أشوف ستات أجانب متلونين بكارت شاشة 256 ميجا والاقيهم مشيين مع واحد "هلف" من الزنوج اللي هما يعني :) الظاهر ان الأجانب زهقوا من بعض وبيدورو على ناس تانين .. بس دورنا هاييجي امتى؟؟:)

بصراحة أنا مبحبش الأيرلنديين (خاصة بعد كاس العالم اللي اتعادلنا معاهم فيه) بحس انهم ألواح كده حتى كلامهم تقيل بس الجماعة بتوع "شين فين" أنا متضامن معاهم :)

بوست جامد كالعادة والى مزيد من الجمودية:)

maiosha يقول...

هههههههههههههههههههه
والله الراجل عنده حق

بس ايه البدو اللى اى كلام ده

مية الف جنيه؟؟

ده انا لو خطف البت اختى هطلب من بابا فدية اكبر من كده

بس فيه حاجة يا سووو
واضح انك عندك عقدة معينة من القطط اللى بباسبور.. مع ان دى بقت حاجة عادية يعنى

الطبيعى ان احنا اللى مش يبقى معانا باسبور .. انما القطط عادى يعنى

ههههههههههههههه

الله يكون فى عون الراجل ده

حواء يقول...

بهدلت الراجل ياسو
والله ليه حق ميكلمكش
بس انت ليه مفهمتوش انك مش قصدك تأذيه وصلحته
صدقني مش هيخليك تلعب تاني مع القطه ام باسبور
ههههههههههههههههههههههههههههه

*البت المشمشية *حلوة بس شقية * يقول...

ههههههههههههههه
ايه ياعم الكلام الجامد اللى فى الاخر
هتروح فى داهية
كرباج ايه يا عم
دى البلد
زى الفل

وبعدين ازاى كنت بتدخل الشقه عندو
وانتا وماراتو والقطة ثالثتكم
بس

Z_Diva يقول...

wallahy 7ram 3lik, elragl sa3ban 3lya gedan ya moftary, ba2a fe 7ad felzamn ela3'bar da y3ml keda, we 5astan in elgara3 ray7 sina mesh nazl west elbalad y3ny, elnas elly hnak ma3thzersh yaba :S

ya gbar, bahdelt elgarra3 we shaweht som3t masr fe 3neno :D

walahy d7ktny, bas f3lan elragl s3eb 3lya

رحــــيـل يقول...

هههههههه

ازيك الاول اخبارك ايه؟

وديت الراجل فى داهيه كويس ان حد لحقه كان فات الموضوع قلب جد وبقى اختطاف سياح والسيياحه تتضرب
تخيل كل ده انت كنت هتبقى السبب فيه
هههههههههههه

Hisham يقول...

Enta ely al 3aleik soooo makdebsh ya gada3

غير معرف يقول...

ههههههههههههه
يا خبر ابيض ضيعت الراجل فى شربه ميه
بزمتك دى نصيحه دى يا شيخ
دانت بتعزه اوى
ههههههههههههه

بس احلى حاجه بقى القطه ام باسبور دى
متعرفش تعلقها يا سوو
ههههههههه

سلاخوووووووخ
:))

maha zein يقول...

امريكاوي

ربنا يسهلك بقه

انت بتكون موجود هناك كتير
طيب عشان اعمل حسابي مجيش بس

يوه جتج ايه يا سووو
دمك شربات والله

النظرية اني مبفوتش بوست ليك

بس مبرضاش اعلق من الغل
قال يعني مقموصة
بس هه
قلت اقولك كل سنة وانت طيب

واقولك انا مسمحاك علي اي شىء
ويا ريت تسامحني انت كمان

سمكه واحده يقول...

ههههههههههه
بقي انتي مردتش تبص ليها مش عشان حاجه عشان مش حلوه والله عال منتوا كده يا شوباب مصر ديمازي القرع تمدوا لبر يا ساتر عليكوا
الرجل الامريكاني ده انا لو منه كنت عملت فيك عمايل انت بتخدمه بس ايه خدمته خدمه حلوه
ربنا معاك
اول مره اجي هنا اهو
بقلك ايه متجيب اي حاجه حلوه كده عندكوا ايه؟

صيدلانيه طالعه نازله يقول...

انت فكرتنى باللى قال للراجل اول ما تتزنق قول يا جزر
انت بقى قولتله قول ضابط امريكىو كنت حتضيع الراجل
هههههههههههههههههههه
بس الراجل شكله متسامح و نفسه حلوه و حينسالك الاساءه بدليل انه لسه قاعد عندكم و معزلش من العماره
و بعدين القطه اكيد مكتوب جنب المهنه هيئه دبلوماسيه مش اقل من كده
على العموم احمد ربنا ان العرق الصعيدى الايرلندى اللى عنده مطفحش عليه و طير راسك بسيف انجليزى
و يكون بكده رجع امجاد الامبراطوريه العظمى و عاشور الناجى

ست البيت يقول...

يا رب كانت بقت قط مش قطه
اخوكو مزنوق
عاوزة قط رومي ابيض

ايه ديه
هو الرادل الكبير بتاعنا طلع الرادل دوكها من السدن لجل خاطر الراجل الاسمراني دي اللي اسمه
اوماما؟
يا وقعه بيضه
دا احنا كده سيرتنا بجت ع كل لسان

DantY ElMasrY يقول...

كل حاجة فى مصر بقت تعبانة
حتى العصابات !!!!!!!!!!!!!!!!
أى كلام
عصابات زمان كانوا حريفة وبيعملوا شغلهم على أكمل وجه
خطف صح وطلب فدية صح
إقرا البوست داhttp://bikya.blogspot.com/2009_01_01_archive.htmlا عند روبابيكيا

حنين القلب يقول...

والله العظيم انت تحفه

بقى كل اللى شاغل دماغك القطه
حرام عليك دمرت الراجل

ههههههههههههههههه
وانت مز عن مراته يبقى اكيد مراته شبه عائشه الكيلانى

وبعدين يا عم احنا مش بنخاف الا من اللى خلقنا
(حد يغطى قفايا)
سوووووووووووووووو
وربنا وحشتنا
يا رب تكون بالف خير

عندما تكون ميمى وحاجات كتير مع بعضها كده يقول...

انا اول مره ادخل هنا بس ضحكتنى اوى اوى بجد يعنى على الراجل والى جراله كل ده علشان قولتله قول انا امريكانى يعنى ههههههههههههههههههههههههههههههههههههههههههههههههههههههههههههه
وانت كنت هتخلى القط يشهد معك انت مش عارف ان القطط فيها طبع النداله تاكل وتنكر ده احتمال لما تشوف الراجل غضبان لله اعلم بقى كانت هتعمل ايه اصل انت مش واخد بالك القط ده معاه باسور امريكانى ههههههههههههههههههههههههههههههه

kochia يقول...

كدة وقعت الراجل في شر اعماله
يقول علينا ايه دلوقتي

كذابين ؟؟

يلا بقي اهو نصيبه واخده
حظه كدة

Asmaa mahaba يقول...

هههههههههههههههههه
ههههههههههههههههههههههههههههه
يا خبرك ابيض يا سوو وديت الراجل فى سكه اللى يروح ميرجعش
ليه الشر دا يا ابنى
بس انا عارفه انت كنت عاوز تزحلق الراجل ليه..!!
حبقى اقولك بينى وبينك بعدين بقى بلاش اسيحلك ع المدونه..فى اغراب..
:)
انتوا اغنيه بقى ما شاء الله وعندكم عماره وبتاجروا امممم لا دا انت عاوزلك عين ميه ميه
سلام اما اروح اجيب واحده حساده

حياة تستحق الانقاذ يقول...

ههههههههههه بجد بجد بوست رووووعة وقصة مليانة افكار
ويا ريت متديش لحد اي نصايح بعد اليوم :)
كل التحية لك

أم المييس

عندما تكون ميمى وحاجات كتير مع بعضها كده يقول...

الله يسامحك ياسوو منمتش من امبارح علشان اقرا المدونه بتاعت حضرتك من الاول للخر عجبك كده لدرجه انى صحيت ماما الساعه 4 من الضحك وصحيت بقى يسم الله الرحمن لرحيم الله اكبر الله اكبر ولا الى شافت عفريت ههههههههههههههههههههههههههههههههههههههههههههههههههههههههههههههههههههه

بجد جبتها من شرقها لغربها اثارت فيه اوى مهمتك فى لصعيد وحبييت حمزه ابن اخوك وان شاء الله ربنا يشفيه قوله انا مستعده يخطبنى وهبقى بنت جدعه اوى وقف جنبه مش هرهقه بطلباتى وتعالى هنا انت فوزى واضح جدا الله يكون فى عونها وحبيبت سينا وبيبا اوى انا اخرى البوب كورن بتاع كنتاكى هههههههههههه واتعلموا انجليزى بقى
متخلوش منظرنا وحش قدام الاجيال هفضل انصح فيكوا لغايه امتى
بجد بجد مدونه تحفه
بس بعد ماخلصتها قولت ازاى اصلا انا يبقى عندى مدونه حسييت قد ايه ان فيه فرق كبيرررر اوى واكيد مدونتى بلنسبه للى بتقوله ولا حاجه عجبك كده
مسهرنى وكمان تنكد عاليا

ka2en Makboot يقول...

السلام عليكم
ازيك يا فندم شخبارك شحوالك شعلومك وشجغرافيتك وشي اي حاجة

انا قولت بس اسلم واقولك يا آسي يا راجون .. ليه تعمل كدا في الراجل ليه .. انت ماشوفتش اللي جرا لبوش .. ضربة الشوز ديه ادت جرأة للعالم العربي كله انه يرفع النعال علي اي امريكانلي .. واهو المواطن الامريكي مش اجدع من رئيسه كلهم اخرهم قبلة وداع بشوز مقاس 44

تحياتي يا فندم ودمت دوما مبدعا مبتسما ضاحكا :)

احمد سعيد يقول...

ياراجل حرااااااام عليك
دى عمله تعملها فى الراجل برضه؟؟؟؟

MeDoOoOoOo يقول...

ya 3m a3mlk eh tany mesh oltlk na5od course English mn bta3 el yomen dool bas enta ely masm3tsh el kalam 3agbk keda ana lesa mzbt mozza mn Ireland lma el ragel dh yro7 y2olha en 5aly malosh fe el English tsd2 3eeb w 3'er keda saw7t el ragel taswe7a zae el foll 7aram 3aleeeeeeeeeeeeek w 3ayzo ytklm m3ak kaman w sebk mn el kalam dh kolo 3andk wa7d msafr seina mesh t5leeh yzbtna fe ay 7aga wala enta mfesh ay noo3 mn el afkar el eqtsadya

Ehab يقول...

نهارك ابيض
ده كويس انه ممسكهوش واحد فدائي وخلص عليه قوام قوام
كنت ساعتها هيجوزوك مراته عقابا ليك يا فقري

بس ابقى شوفلنا موضوع الجريجي ده يا واد اهو يبقى ينفعنا

سلااااااااااااااااااااااااام
اخوك ايهاب

Desert cat يقول...

اللى شدنى اكتر من حكاية الظابط الامريكاوى هو القطة ام باسبور علشان تعرف بس ان القطط دى حاجه سبيشيال فى كل مكان .. لما رجع وقولت كان شارد وسالك انت عملت كدا ليه قولت اوبسسسسسسسسس القطة فتنت على سووو وشكله هيروح فى الكازوزة اتاري يا عينى الوصفة كانت تركيبتها غلط والراجل كان هيروح فى الرجلين علشان خاطر البدو اللى داميا فاضحينا دول قال 100 الف جنيه قال طب ده المفروض ان لعيل عند هم من تجارته فى كام كيلو بانجو يقوم يخطفوا واحد بالمواصفات اللى بتقولها دى علشان 100 الف جنيه ؟؟؟
صوتى يا صفيه
هى مين صفية دى هههههههههههه
وحياك بعد كدا ابقى وصيه يحلق زة شنب هتلر ويسافر لهم ده ان كانوا يعرفوا هتلر اصلا ...

تحياتى يا سووووو

همس الاحباب يقول...

ههههههههه
هههههههه
يا خسارة الفسكافيه اللى انت بتشربه يا سووووو
الراجل كان هيموت فطيس يا جدع
بس تصدق بالله الراجل جاتله عقدة نفساوية من الامريكان ومنك انت يا سوووو
يلا يعيش وياخد غيرها
تحياتى وليك وحشة والله

Ahmed Al-Sabbagh يقول...

انا علقت فيس تو فيس معاك
لكن بجد تدويناتك الأخيرة جعلت مدونتك من أروع المدونات على بلوجر فى رأيى الشخصى

عبدالرحمن فارس يقول...

طبعا انا هسيب الموضوع كله من اول الراجل المز مرورا بمراته الي هو امز منها انتهاء بقططه البسبورتيه

وهسألك سؤال مباشر جدا وفي نفس الوقت وجيه جدا

تقصد ايه يا سيد سووو بـ ( ذا كان كبير البلد كلها خاف من أمريكا وافرج عن ايمن نور )

وماذا تريد أن تقول بين السطور
ويعني ايه خاف من امريكا

أكتفي بهذا القدر :)

تحياتي
و
محبتي

3ala asm masr يقول...

هههههههههه
يلا يستاهل

فتــافيت (رحاب الخضري) يقول...

كويس انهوقع في ايدين بدو.. مشفي جماعة جامدة
كانت نفذت فيه الحد دوغوري

بوست جامد يا سي سوووووووو

والقطة ام باسبور دي.. اكيد في خاجة المهنة .. قطة
هاتبقى ايه يعني

سلااااااااموز