الثلاثاء، ٨ صفر ١٤٣٠ هـ

!! الهيئ و الميئ

أجبرتني الظروف اني انزل الصبح بدري عشان ابقى موجود في الغرفة التجارية اللي في باب اللوق .. وده عشان أقدم شوية ورق ومستندات واعمل سجل تجاري للمكتب بتاعي اللي مش ناوي يتفتح في سنته ده
دخلت الغرفة التجاريه لقيت طابووووور طووووويل .. وكل الناس دي زي حالاتي .. ولما لقيت الحوار مش هيخلص في يوم ولا يومين تلاته سبعه .. قمت واخد روحي وقلت يا واد يا سوووو انت بقالك فترة كده ما دلعتش نفسك ولا عملت رحلات مكوكية سينمائية من اللي بتعملها
وفعلا .. رحت طالع عالسينما وقطعت تذكرة .. وانا واقف كده وعمال اتفرج عالبوسترات بتاعة الافلام .. لقيت بنت كده قد تلتاشر اربعتاشر سنه بتقرب ناحيتي .. وبتقولي معلش بعد اذنك ممكن لو معاك موبيل اعمل مكالمة .. الحقيقة لقيتني انحرجت قوي .. خصوصا واني كنت لابس البيرية اللي كل ما يشوفني حد بيه يفتكرني رائد فضاء .. قلتلها ومالو .. اتفضلي .. خدت الموبيل وادتني ضهرها وراحت متصله بحد .. وبالرغم من اني ماكنتش رامي ودني ولا بتاع .. بس كنت واخد بالي احسن تطلع تجري بالموبيل .. وانا طلع عيني فيه ومش هعرف اجيب عدة تانية
لقيتها زي ماتكون بتتكلم مع واحد .. وتقريبا كده الواحد ده كان نايم .. وهي اول ماحست انه نايم راحت مزعقه معاه وقفلت السكه .. وادتني الموبيل وهي بتشكرني وباين عليها الغيظ على الخنقه .. ومشيت من قدام السينما

ماشيلتش في نافوخي وقلت انا مالي ياعم .. شوية كده ولقيت نمرة غريبة بتتصل بي .. قلت يمكن صنايعي جايبلي شغلانه .. اصل انا على عكس مهندسين الديكور .. الصنايعية هم اللي بيجيبولي شغل .. مش انا اللي باجيبهم لما يكون معايا شغل
ام هند .. رديت على الموبيل .. لقيت واحد صوته زي مايكون كان نايم وقام من النوم
الصوت : الو
سوووو : ايوه مين معايا ؟؟
الصوت : معلش بس اصل في واحده كانت لسه مكلماني من الرقم ده
سوووو : اه .. فعلا في واحده استلفت مني الموبيل عشان تعمل مكالمة
الصوت : ايه ده .. انت مش كُشك !؟؟
سوووو : لأ والله كان نفسي بس مانفعش
الصوت : اه اه .. طب هي مشيت ولا لسه معاك؟؟
سوووو : معايا ايه بس .. دي واحده شافتني واستلفت الموبيل .. اتصلت بيك وبعدين مشيت
الصوت : تمام تمام .. طب هي حلوة؟
!!! سوووو : نعم
الصوت : بقولك هي حلوة !!؟
!! سوووو : مش فاهم
الصوت : طب معلش يعني .. انت عندك كام سنه !!؟؟
سوووو : هو في ايه .. انت عايز ايه ياعم عالصبح ؟؟؟
الصوت : ياباشا روّق شويه .. اصل بصراحه كده البت دي انا ماعرفهاش ولا شفتها قبل كده .. واتعرفت عليها عالانترنت
!!!!!! سوووو : انترنت
الصوت : آه .. في محادثة .. وبعدين خدت الايميل بتاعها واتكلمنا مع بعض مره ولا مرتين .. وهوبا الهيئ و الميئ .. ظبطت خروجه معاها نروح السينما أول ما تخلص الامتحانات .. ولو طلعت حلوه هاجي اقابلها .. طلعت مش قد كده انفض واكمل نوم
- سوووو : - صمت على اذبهلال على تناحه على حالة مرار
الصوت : عشان كده باسألك هي حلوة !!؟
سوووو : ظبطت ايه ونت ايه وهيئ و ميئ ايه - ورحت منفجر فيه - النت معمول عشان تعمل حاجه مفيده .. تنزل برنامج مهم ولا حتى فيلم ليه لازمة .. مش معمول عشان الهيئ و الميئ .. وبعدين ازاي يعني بنت متعرفكش ولا انت تعرفها .. تخرج معاك تروحو سينما لوحديكم !!؟؟؟
الصوت : هممم .. يعني مش حلوة !!؟
طبعا قفلت السكه على مراخيره مش في وشه وبس .. قال الهيئ والميئ قال

ملحوظة

لو حد عايز يعرف انا شفت فيلم ايه وايه رأيي فيه .. يدوس هنا

.. قبل ماحد يقول اني ظبطت البنت بعد اللي حصل ولا خدتها معايا السينما واهي تونسني شوية وبتاع
احب اقول انا مش بتاع الهيئ و الميئ .. انا بتاع الشيربيئ
!!! وبعدين هي ماكانتش حلوة قوي يعني

سوووو

هناك ٥١ تعليقًا:

حلوة الدنيا يقول...

ازيك يا سووووو
انت ايه الي مسهرك لحد دلوقتي

انا قلت اخذ اول تعليق ارخم عليك وعلي بقيت الناس بس مش اكثر حاكم الأيام دي طالبه معايا برخامة مش عارف ليه معندكش علاج للحالة دي

حلوة الدنيا يقول...

انا قريت الموضوع بقي يا راجل تروح الغرفة التجارية من غير ما تقولي طيب قول انت مش عارف ان الغرفة دي لعبتي ده حبايبي كلهم في الغرفة وبعدين هو الناس كلهم سايبين الشقة وقاعدين في غرفة واحدة علشان كده هي زحمه كنت اطلع انت ازكي منهم وقعد في الريسبشن

adel يقول...

ههههههه

سووووووووووو

معاك اميل البنت دي :):)

-----------
بقولك انا روحت لطارق عميرة و قلت هاشوفك ياعم انت اخيرا :):)

و د.احمد خالد توفيق جه و كانت ماليطة :):)

هههههههههه

عاشقه وغلبانه يقول...

ههههههههههههههههههههههه
هههههههههههههه
بقي هيئ وميئ
هههههههههههه
وماكنتش حلوه
يانهار ابيض علي عيالالايام دي
التقيل ورا الصبر

صبرني يارب يقول...

شوف يا سو

للاسف الشديد والمرار ان حاليا الثقافه العامه للشعب المصري بناءا على ايدى خفيه ان النت ده عشان الهيء والميء والبتاع التانيه الى انت قولتها دي

وبجد بجد عدت لما اقول لحد ان ليا نشاطات على النت متنوعه تحس فيه بنظرة الريبه وعلى طرف لسانه يقولي اه يا قليلة الادب هههههههههههههههههههههههه
بس عادي انا بانفضلهم

صبرني يارب يقول...

اه ونسيت اقولك لوكنت فى المنصوره يا ضنايا كنت خدمت احلى خدمه فى الغرفه التجاريه

بيضربولي تعظيم سلام هناك يا باشا تبعنا كلها

اقولك عزل وتعالى المنصوره
ههههههههههههههههههههههههه

Soul.o0o.Whisper يقول...

ههههههههههههههههههههههههههههه

بجد مش قادرة امسك نفسى من الضحك
هو ايه الهيئ و الميئ دا
والله مش عارفة؟؟؟

و بعدين لقيت الطابور الطويل
تقوم رايح سينما؟؟؟
ههههههههههههههههه
هو بغض النظر ان السينما مش العلاج
بس كنت منتظر انك لما ترجع تلاقى الطابور خلص؟؟
و لا ماكنش عاجبك كنت عاوز توصل للفضاء بيه فقلت لما يطول لحد الفضا أقف فيه؟؟
هههههههههههههه


و بعدين قدم المشيئة ..

اه مش بتقول المكتب اللى مش عاوز يتفتح فى سنته؟؟
قول ان شاء الله
ههههههههههههههه






دمت بود

77Math. يقول...

ايه دا !

فكرتني بحكاية حصلت لصديقة .. هاتف المنزل كان متشابه مع هاتف عيادة دكتور، ولما عرفوا الفرق. . مرة واحدة اتصلت ، قالت لها صديقتي النمرة غلط وصلحت لها الرقم ..

بعد شوية ..

اتصلت الست تقول: طيب ما تعرفيش مواعيد العيادة إيه ؟


13 سنة

يادوب بجد .. احنا على أيامنا كنا بنستأذن الأول قبل ما ندي بنت في المدرسة نمرة البيت ..

الله يرحم ..

simply me يقول...

لا حول ولا قوه الا بالله

يعنى البنت العبيطه دى مش مكفيه انها نزلت تقابله لا كمان مستخسر ينزل لو طلعت مش حلوه

ربنا يرحمنا جميعا
عيال عايزه قطم رقبتها

Lyssandra يقول...

مشكله بجد

لا البنت عندها وعي ولا الأهل شايفين دورهم صح .. ولا الولد عنده ضمير

بنستغرب ليه من الكوارث بعدها ؟؟

.....

تحياتي سووو

:)

Unique Gurl يقول...

ربنا يستر علي ولايااااااانا
قال هيئ و ميئ قال
ههههههه
وبالنسبة للفيلم بجد ملوش اي لازمة في الحيااااااه
اصل انا اتدبست ودخلته
بس عايزة اعرف رأيك في ميكانو عشان حاساه حلو اوي

Crystal Lobna يقول...

بصراحة مش لاقية حاجة أقولها غير ربنا يهدى الجميع، أنا أشتغلت سنة و نص فى مدرسة و شفت بلاوى من ديه كتير.

Z_Diva يقول...

e5s 3almahzel

geel bayz, gel elhe2 welme2 da ya5oya

ate3a t2ta3 el3yal we tfahthm :D

3mmatan sebak mn el3yal eltfha de, we rbna ykrmak we t5allas war2 elmktab we tftate7o kabl nhayt hza el3am isa :D

tsha3'lny m3ak decorator allah ykrmk -aywan 7ba nifak 3shan 3yzak tsha3'lny :P-

good luck man :)

سلوى يقول...

زي ما قلت بالضبط
النت مش للهئ والمئ :)

بس المشكله إننا بناخد الجانب السئ في الأمور

بنت تخرج مع واحد مش تعرفه وفي سنها ده
يعني مفيش تربيه ولامؤاخذه :)

مفيش دين

المهم
الحمد لله إنك لك في الشريبئ

بس هو إيه الشريبئ ده :))

ربنا يحفظك سووووو

Ahmed Al-Sabbagh يقول...

هههههههههخخخخخخخخخخخ
سوووو : لأ والله كان نفسي بس مانفعش
ههههههههنيهاهاها
انا فطسان ومفرفر
طب ممكن مقارنة صغنونة بين الهىئ والمئ من ناحية والشربئ من ناحية اخرى
جااااااااااامدة

البت المشمشية حلوة بس شقية يقول...

اخس عليك ياسوووو
وانا اللى كنت فكراك00000000000000
اخس عليك اخس
هههههههههههههههههههههههههههه

همس الاحباب يقول...

هههههههه
ههههه
هىء ومىء وعرفنا اما التانية دى تتطلع ايه
وبعدين سايب الغرفة التجارية ورايح سينما يا جبروتك يا جرع
هههههه

مهندس مصري بيحب مصر يقول...

ههههههههههههههههههههههههههههههههههههههه
الله يجازيك يا سووووو

حلاوتك يا بتاع الشيربيئ

البت منحرفة إنحراف مبكر و الواد صايع و ابن --- و لا بلاش
العيال فاكرة إن المراهقة معناها الصياعة و الإنحراف

الله يحرقهم هما الإتنين بجاز وسخ

أنا حأروح مدونتك التانية أشوف نظام الفيلم ايه ؟

رحــــيـل يقول...

ههههههههههه

قول بقى انك هزاته رفقا بيه عشان يكمل نوم لان البنت مكنتش حلوه
يانهار على وكمان 13 او 14 سنه اومال لما تكبر حبه هتعمل ايه
يالهوىىىىىىى


ربنا يستر بجد

تحياتى لك وتقديرى

mo5tar يقول...

ههههههههههه

ربنا يستر بجد

هيئ وميئ وهما شكلهم لسه اطفال

لا بجد ربنا يستر علينا

ويهدى الشباب والبنات

شكراً على البوست الجامد ده يا سووووو

تحياتى

حروف يقول...

احقاقا للحق انت بجد بتطلعني من حاله الاكتئاب وبترسم البسمة علي وشي عشان كدة بقولك شكرا
والبوست مش حعلق علية لانه اكيد عجبني
دمت بالف خير

حروف يقول...

بلمناسبة انا كاتبة بوست قديم علي هيء وميء حتلاقية في الارشيف لو عايز عن حب النت تقريبا علي ما اتذكر حدوتة مصرية يابارت وان او تو

Unknown يقول...

هعهعهعهعهع
يعنى طلعت مش حلوة طب اروح انا اكمل نوم...........يالهوييييييييي عالضحك ابه دة يا عم انت....اشمعنى انت اللى بيحصلك الكوارث دى دونا عن عيالى كلهم؟؟؟؟

الحرامي يقول...

سووووو
انا بقي عارف الواد اللي حلق للبت ده
دا الواد عبده ابن خالتك انسجام بتاعة الكنافه اللي علي اول الشارع اللي علي ناصيته فرنة العيش اللي بتطلع العيش ابو ربع جنيه اللي بيتباع جنب كشك عم محمد بتاع الجرايد اللي جنب القهوه اللي انا مش بقعد عليها

Desert cat يقول...

بص بقى هو انا متابعه بس البوست ده استفزنى لدرجة ان صوت ضحكى كان جايب من اخر الشارع عمركشى شوفت استفزاز اكتر من كدا
حرااااااااااااام عليك

Unknown يقول...

بقي كده يا راجل فين اخلاق ابن القريه مش تقوله هي حلوه ولا لاء

هو كل ده و عدها 14 سنه يعني انا كده عجزت علي الانحراف

و هو ناااايم يعني كمان بتهيء و تميء مع واحد جبله و بارد

maiosha يقول...

انا فى حالة ذهووووووووول
أنا كنت فاكرة الكلام ده بيحصل فى الافلام ومسلسلات الساعة 7إلا ربع بس
ممكن فعلا ناس تتعرف على النت وتروح تتقابل

ربنا ينجينا منها على خير

بس سيبك يا عم سوووووووو إنت مشكلتك بس إن البنت مكنتش حلوة اوى يعنى
ههههههههههههه

يالا ربنا يهدى

هههههههههههههههههههه
بس حلوة اوى حكاية الهيئ والميئ دى.. اول مرة اسمع المصطلح الغريب ده

الواحد حاسس إنه مخلوق فضائى من زحل صحى تانى يوم لقى نفسه فى بنى سويف

ربنا يخيلك لينا يا سوو يا مثقفنا

صدى الصمت - عاشقة الورد - يقول...

أول زيارة لمدونتك والحقيقة مدونة رائعة ومختلفة ومواضيعها جميلة
تقبل مرورى
عاشقة الورد

MaNoOoSh يقول...

طالما فيها شيريبىء يبقى اخدتها السينما تسليك
هههههههههههه
(وش بيطلع لسانة)

صيدلانيه طالعه نازله يقول...

دلوقتى انا عايزه اعرف هل المشكله انها مش حلوه قوى يعنى و لا انك مش بتاع الهيىء و الميىء انا رايى انك تحمد ربنا انها مطلعتش تجرى بالموبايل زى بعضهم و تطلع عينك على عده تانيه
بالنسبه للغرفه التجاريه انا فاكره ساعه ما فتخت الصيدليه كانت ليا مغامرات هناك و الطوابييييييير الطويله تديك احساس ان كل المشاريع دى حتكسب ملايين مش حتقفل بكره؟؟؟؟؟!!!!
المهم خلصت الورق و لا لسه فى الهيىء و الميىء

الفراغ يقول...

انا لو منك اديها قلمين سخنين
والله ماهتنساهم طول عمرها
ياخى بلا هيء بلا ميء
قلنا ياناس الاخلاق والتربيه
مش هاينصلح حال بلدنا الا بيهم
السلام عليكم ولو سمحت مافيش شربيء كمان
صحيح شر البلية مايضحك

غير معرف يقول...

ههههههههههههه
و الله حاجة تضحك
للآسف فى ناس كل علاقتهم بالنت الشاتنج و تحميل الأفلام و الأغانى تيجى تسأله على حاجة تانية فى النت يفتحلك بقه زى الأهبل
معلش سيبك أنت و روح الغرفة التجارية تانى يمكن ربنا يفرجها

romansy يقول...

يعنى علشان مش حلوه قول كده بقى
ماشيه معاك ياهندسه

مكتب وسينما وشغل جامد

وكمان رمضان

على فكره انا معاك فى اللى انت قولته عن الفيلم وكمان انا مش عاجبنى ان مدرس شخصيته قويه

يلم النقطه فى الاخر بقى دا كلام
يا سو

MeDoOoOoOo يقول...

ya sooo walahy ely y3esh yama yshof ana 3an nafsy est7ala a5od m3ad mn bent belzat w maro7rsh 7ata lo we7sha dh tb2a elt adab 3'er eny nefsy 7elwa so2al b2a mohm heya el bent msbtsh raqmha ??? yala kolo naseb


medooo

كيكى عوووووو يقول...

أزيك ياعم الشباب والرياضة..أزيك يلى بتشوفنا ومتعرفناش!!!!
أتحطيت خلاص فى الموف لاست مش البلاك لا
نحن نختلف عن الاخرون
ام هند****
ياعنى انت اخدت بومبة فى الموضوع دة كلوا ولا صنايعى جبلك شغلة ولا البت طلعت حلوة ولا الفيلم طلع كويس!!
**غير كدة كمان خسرت رصيد انا رائ تبعت للواد
**سلفنى شكراااااااا**
عوووووووووووو

mostafa rayan يقول...

معلش يا صاحبي خسرت شويةمن الرصيد
بس ياعم كنت قولها ماعييش رصيد
هو في حد يامن لحد خصوصا لو كان مايعرفوش دلوقتي يا سو
بس سيبك انت انا مبسوط قوي من البوست اللي فات بتاع مدونة اوباما
بتتطلع بحاجات جامدة قوي يا سو
بجد بقي المفروض تركزي في التاليف مش الديكور
ربنا يكرمك يا صاحبي وتحقق كل امانيك

رئـــــيسـة حزب الأحلام يقول...

ممكن تعرفنا ماهو الشربئ نرجو الافادة
اعمل بقى البوست الجاى عن الشربئ دة عشان الناس تفهم وربنا يكفينا شر الهئ والمئ وكمان الشربئ اللى مانعرفوش دة راخر يلا حسن الختام
تحياتى الطيبه

Unknown يقول...

ولما أنت خايف على الموبايل كده
بتدوهولها ليه ياسيدى من الاول؟
اياكش هى لو ناوية تاخده
وتجرى كنت انت متعشم
تحصلها اياك؟
ياخى دها دها:)

Unknown يقول...

لكن ما قلش لنا
كملت مشوار الغرفة
بعد كده ولا سنكرت
على الموضوع؟؟

yoyo يقول...

هههههههههههههههههه
و الله مش قادرة من كتر الضحك
أنت مش لك حل بجد

و بعيد ايه الهيىء و الميىء دى ههههههههههههههههههههههه الترجمه لو سمحت

وكمان بتقول:
احب اقول انا مش بتاع الهيئ و الميئ .. انا بتاع الشيربيئ

هو انا كنت عرفت التنين الاولين لما تقولى الشبرييىء
ههههههههههههه و الله سكر بجد

بس اوعى تكون عجبك الموضوع ورحت تواسى البونية بقى اه انا عارفة قلبك الطيب وكدا

اول مرور ليا على مودنتك و بصراحة مدونتك جميلة اوى و انشاء الله مش هتكون زيارتى الاخيرة

تحياتى
يويو

يوسفيات..محمد يوسف يقول...

لا لو الشيريبيء يبقى ماشي... عداك العيب ياكبير

Soooo يقول...

جعلوني مريض نفسيا

خبر ايه ي اتش؟؟
يعني أول تعليق قلنا ماشي .. انما تاني تعليق كمان
ده كتير يا جرع

وهبقى اخدك معايا على السجل التجاري بدل الغرفة التجاريه
واهو يمكن تسجل شريط

---
adel

لا والله يا عدولا مش معايا الايميل بتاعها
تاخد نمرة الواد اللي نفضلها وتشوف ايه النظام

وكان نفسي فعلا اجي الحوار بتاع طارق بس مانفعش
خيرها في غيرها ان شاء الله

---
عاشقه وغلبانه

ده احنا ما كناش عيال
ولا خرجنا سينما مع حد ولا محتد
ولا لينا لا في هيئ ولا ميئ

تقريبا احنا عالم خولد فاشون

---
صبرني يارب

احنا مشكلتنا اننا شعب مستهلك
ولما جينا نستهلك التكنولوجيا استهلكناها غلط
يا اما هيئ وميئ
يا اما شتيمة في خلق الله

وحاضر ياستي
اوعدك هلغي النشاط واجي اعمل المكتب عندكم في المنصورة
بس هو في شغل عندكم ولا اجيب معايا باربعة جنيه لب لزوم تضييع وقت الفراغ ؟؟؟

---

Soul.o0o.Whisper

اه طبعا لقيت الطابور قمت ماشي .. هقف في الطابور ليه وانا اساسا اساسا ما كنتش واخد كل الورق المطلوب؟؟؟

---

77Math

هههههههههههههههههههه
حلو قوي الموقف ده
فكرني بالنكته بتاعة اللي بيتصل يعاكس وكل مايسأل الناس الحاج حسين موجود يقولوله النمره غلط .. وآخر ما زهقو قالو اه الحاج حسين موجود بس نايم
قاللهم وسايبيني باتصل بنمره غلط من الصبح

الجيل الجاي ده جيل منيل بنيله .. ربنا يسترها علينا وعلى ولايانا

---

Bondoka

واللي يغيظ بقى أكتر من انها نزلت تقابل واحد ماعرفهوش وتروح معاه السينما كمان
مش معاها رصيد وبتتصل من موبيلات الناس
حاجه مرار يعني

---

lyssandra

طب البنت ماعندهاش وعي وقلنا ماشي .. الاهل وماعندهمش اهتمام بولادهم ممكن .. الواد ماعندوش ضمير ولا ذوق قلنا شغال
ذنبي ايه انا بعد ماهي تعمل المكالمه يبقى ماعنديش رصيد ؟؟؟

---

Unique Gurl

اه والله عندك حق .. ربنا يسترها علينا وعلى ولايانا
والفيلم بتاع رمضان كان محتاج شوية حاجات صغيره وهيبقى حلو .. بس ماتفهميش ايه اللي حصل
وبالنسبه لفيلم ميكانو .. ان شاء الله هتكلم عنه قريب

---

Crystal Lobna

ربنا يهدينا جميعا يارب
وبعدين هي مدارس اليومين دول مدارس ياشيخه
فين ايام زمان لما كنا بنتعذب في المعتقل .. قصدي المدرسه

---
Z_Diva

مش كده برضه يا ام زعبولا
طب بذمتك احنا كنا كده مثلا
ابدا
ده حاجه مش عارف انا

وطبعا من غير ماتقولي انتي شغاله معايا في المكتب
ده انتي شغاله بقالك شهرين كمان
ومرتبك بيتحول عالسي بي سي بانك
وابقي قابليني لو في بنك بالاسم ده




سلاموووووووووووووز

ست البيت يقول...

سوووو
اخبارك ايه يا بني مش ناوي تغلط وزور المدونة ؟

نفسي تطمني على حمزة
اشوف فيك يوم يا سوووو
ريقي نشف اسألك ع الولد
يارب يشفيه ويخليه
وحلوة الرد المقتضب اللي بعتهولي اعمل بيه ايه انا
طمني ع حمزة احسن افضل ادعي عليك
كل يوم واحدة تطلب تعمل مكالمة من موبايلك لحد ما رصيدك يخلص

تحياتي يا سوووو
وسمعنا رأيك في أول قصة قصير ليا
بس بلاش بهدلة الله لا يسيئك
اسمها صاحبة الصوت الحنون

(green eyes) يقول...

:):):):):)

تعرف اني كنت هسألك فعلا اذا كانت البنت حلوة ولا لا

:):)

غير معرف يقول...

ههههههههههههههههه

لا لالالا ضحكتنى وانا ماليش نفس

طبعا يابنى النت معمول للهيىء والميىء
امال انت فاكر انه معمول لايه
تؤ تؤ تؤ
كنت فاكراك اوعى من كده يا سووووووو
:)))

وكمان رايحالو السينما وهيا متعرفوش
حسبنا الله ونعم الوكيل
جتها خلف الى عايزة نيله

3ala asm masr يقول...

ههههههههه
عارف لو كانت حلوه؟ كانت فرقت اكيد
الاول ربنا يوفقك وتفتح المكتب بتاعك ويبقا احسن مكتب ان شاء الله
ثانيا كتير اوى من الولاد بيدخلوا النت عشان الهيبىء والميىء
السؤال اللى بيطرح نفسه هى البنات لسه هبله وبتصدق الهيىء والميىء؟

تامر علي يقول...

يا راجل مش عارف هيء وميء وطبله ورق :)
والله تجربه ثرية بالأحداث ولو إنك كان ممكن تخلي الأحداث أكثر سخونه بإنك تدور على البنت وتضربها قلمين وتجرجرها من شعرها لبيت أهلها ...يعني شوية أكشن :)
لاء بجد أسلوب رائع في السرد
تحياتي

Soooo يقول...

سلوى

ياخبر يا سلوى
بقى مش عارفه الشيربيئ ؟؟؟
ازاي
لا لا لا
انا هعمل موضوع مخصوص اشرف فيه نظرية الشيربيئ .. بين الخيال والواقع
وربنا يسترها علينا بعدها


---
Ahmed Al-Sabbagh

اصلو مستفز قوي ياصباغ
متصل وصوته باين انه نايم ولاطع البنت ومتغطي باللحاف
حاجه مش فاهم بجد

وفعلا هعمل موضوع لتوضيح الفارق الجوهري بين الهيئ والميئ .. والشيربيئ
دي قضيه تستحق الاهتمام


---
البت المشمشية حلوة بس شقية

كنتي فاكراني ايه؟؟
بتاع هيئ وميئ؟؟؟
لا لا لا
لست انا هذا الصخص


---
همس الاحباب

يا حمايا العزيز دي حاجه عشان تعرف قد ايه عريس بنتك مالوش في الشغل ده
ها
هتدفع كام مهر بالصلاتو عالنبي

وبعدين مين قالك اني مشيت من الغرفة التجاريه عشان الطابور
اطلاقا
انا مشيت من الغرفه عشان عرفت اني مش معايا كل الورق المطلوب
هو انا عبيط ولا ايه


---
مهندس مصري

حليب هارتي
المشكله مش في انهم منحرفين في سن مبكره
المشكله ان الواد بيستعبط بجد .. يعني اتنيلت على عينك واديتها معاد من غير ماتبقى عارف شكلها
ماتروح تقابلها ياجرع
دي حاجه يالهوووووي


---
رحــــيـل

والله يا رحيل ياختي لو اللي زي دول كبرو على نفس الحاله اللي هم فيها دي
تبقى خلاص بقى جابت اخرتها


---
mo5tar

يارب ياخويا يارب
والف شكر على زيارتك وتعليقك


---
حروف (دلو مرة ثانية وجرح ثاني سابقا)

الف شكر على كلامك الجميل ده
وانا قريت موضوعك فعلا .. بس المشكله اننا عمالين نتكلم عن ناس .. هم اصلا مش بيقرو
ربنا يسترها بجد


---
enjy

تقولي ايه بقى .. المشاكل تسيب الناس كلها وتيجيلي انا
تقوليش هوايه مثلا


---
الحرامي

لا يا راجل
طب حيث انك عارفه .. قوللو البنت زي القمر
حاجه كده فيها من نانسي عجرم على اليسيا على هيفاء وهبل
يعني هو الخسران انه ماجالهاش


---
Desert cat

هههههههههههه
ماشي ياستي
اضحكي ولا يهمك
وماتختفيش كده يابنتي





سلامووووووووووز

Soooo يقول...

EmY

لأ بقى يا ميمي يا جزرة
لو عالاخلاق المفروض كنت اروح اخدها في حناني اخدها
وعالسينما واعزمها

ولو انتي عجزتي على الانحراف .. يبقى اللي زيي يروح يشوفلو تربه اسكان متوسط .. ويدفن روحو فيها


---
maiosha

تصدقي بقى ان مسلسلات سبعة الاربع دي بتقول حاجات جامده
بس هو بيذيعو الساعه كام؟؟؟

وأي خدمه .. مش بابخل عليكم بأي معلومه توصل لي
هيئ ومي وشيريبيئ .. ولسه
ده احنا هنسمع بلاوي

---
صدى الصمت

اهلا بيكي يافندم ويارب ماتبقاش اول وآخر زياره
وياريت تعتبري مدونتي زي مدونتك تمام وتشرفيني بزياراتك وبتعليقاتك

---
MaNoOoSh

للأسف .. كانت مشيت والحفله بتاعة السينما بدأت
عااااااااااا

---
صيدلانيه طالعه نازله

المشكله مش في ان البنت مش حلوة ولا حتى في انها ماسرقتش الموبيل ولا حتى في ان الواد اللي مديها معاد فرقعها
المشكله انها جات لما كان خلاص معظم التذاكر خلصت .. يعني مش هعرف اعزمها عالسينما خلاص

وطبعا ماخلصتش ورق المكتب .. ده الغرفه دي طلعت هيئ وميئ وطبله ورق وحاجه مرار


---
الفراغ

ماهي لو كانت فضلت ما مشيتش .. ولو كانت حلوة .. كنت عزمتها علسينما
وجوا السينما كنت هاهريها ضرب
دي حاجه قلة ادب ياشيخه


---
انا ودماغي

طب ياريتهم بينزلو اغاني حلوة ولا افلام ليها لازمة
ده مقضينها داونلوود العاب وافلام بورنو واغاني ما تتسمعش


---
romansy

والله ياحمد ياخويا انا مش ضد ان مدرس شخصيته قويه يلم النقطه
بس يديني مبرر درامي قوي

وبعدين ايه نظام القر ده ياجرع
ماهو المكتب مش راضي يتفتح اهو ياخويا
يا ساتر عليك يابن فهمي


---
MeDoOoOoOo

انت هتقولي على ادبك وكرم اخلاقك يا ميدو
ده انت قمة في الادب والجنتله

تحب تاخد نمرة الواد وتتصل بيه تعرف منه رقمها ؟؟؟؟

---
كيكى

مين حضرتك يافندم؟؟
حضرتك تعرفيني؟؟؟

مانا في الموف ليست بقى .. اقول اي حاجه بمزاجي

وبعدين سلفني شكرا ايه اللي ابعتها للواد .. انا لو كان علي كنت عايز اروح اخنقه في سريره .. وشكرا


---
mostafa rayan

والله يادرش انا قلت يمكن في مشكله ولا حاجه .. وإغاثة الملهوف صدقه
انما لو اعرف الحوار ده كنت اقولها في كشك عنده موبيل في اخر الشارع

وربنا يسهل .. اهو الواحد بيحاول يقوم شويه شويه لغاية مانشوف ايه نظام الكتابه اللي مش جايه علينا بأي مكسب مادي لغاية دلوقتي



سلامووووووووووز

Soooo يقول...

رئـــــيسـة حزب الأحلام

حاضر ياستي
هبقى اشرح نظرية الشيربيئ باستفاضه في حلقات قادمة
وربنا يستر .. لأني مش عارف هو ايه اصلا
!!!

---
norahaty

!!! اياكش
جبتيها منين دي

وبعدين اه لو كانت طلعت تجري كنت هتصرف طبعا مش هقف في مكاني
اكيد كنت هصوت والم عليها الناس
هو انا عبيط ولا ايه

وحصل ورحت تاني اليوم الغرفه .. لقيت نفس الطابور ونفس الناس .. تقريبا كلهم لما لقو طابور اليوم اللي فات .. راحو السينما وعطلو مشاغلهم
عالم فاضيه والله


---
yoyo

اهلا بيكي يافندم وياريت تعتبري مدونتي زي مدونتك وتشرفيني بزياراتك وتعليقاتك

وفعلا كنت ناوي اخد بخاطر البنت بعد ما ياعيني اتفرقعت من الواد .. بس خساره .. السينما كانت بتدخل وماكانش في تذاكر تانيه عشان اعزمها

---
يوسفيات..محمد يوسف

يوسف حليب هارتي
والله ليك وحشه يا دكتره

وشفت بقى اني بافهم في الاصول

كلمة في سرك .. هو ايه الشيريبيئ اللي انا قلته ده عشان الناس بتسألني؟؟؟

---
ست البيت

اهلا اهلا
حصل ياستي ورحت مدونتك وكتبتلك تعليق انما ايه
حاجه كده من على وش القفص زي بتوع الخضار

---
(green eyes)

هههههههههههههههههه
الجميل في الموضوع ان ناس كتير ما كانتش هتسأل
بس انا قلت اوضح وجهة نظري برضك

ليكي شوقه والله

---
shayma

آه والله .. جاتها خلف اللي عايزه نيله

!!!!
ده مثل جديد ماشي في البلد ؟؟؟


---
3ala asm masr

ربنا يكرمك يا هند على كلامك الحلو ده
ولو على البنات ونظرية الهيئ والميئ
للأسف لسه في بنات مؤمنين بالنظرية دي

ربنا يسترها

---
تامر علي

والله يا تامر يا اخويا انا فعلا كنت عايز اجري عليها واضربها قلمين واشدها من شعرها والشغل الاكشن ده
بس كنت عايز اعمل ده في السينما .. لكن للأسف .. مالهاش في السينما نصيب






سلامووووووووووووز

ساعه الغروب يقول...

يا نهار ابيض واسود والوان على اللى بيحصل لنا




بجد اللى بيحصل"دا كتييييييير دا اووووووووووفر"على راى وفاء "على ما اذكر يعنى"


الهيئ والميئ كتر اوى عندنا
وللاسف كل الوسائل المتاحه بتزيده وبتعززه لانها مش بتستخدم صح

ربنا يهدى الجميع

وما يعرضك تانى لاى موقف هيئ او ميئ

؛)