الاثنين، ٣ ذو الحجة ١٤٢٩ هـ

!! بروفر .. بـِربـِر

داخل البيت بعد كام مشوار طلع عيني فيهم مابين ضرايب على سجل تجاري عشان باعمل إجراءات مكتب ديكور ومقاولات .. والاقي (ياسمينا) و(حبيبة) بنات اخويا عندنا في البيت .. او زي مانا باحب ادلعهم .. سينا وبيبا
- لمعرفة المزيد عنهم .. يرجى قراءة موضوع بوب كورن ياعمو -
اول ما بيبا شافتني لقيتها مستغربه قوي كده وبتقولي
بيبا : ايه ده يا عمو .. حضرتك لابس بلوفر بـِربـِل ؟؟؟
سوووو : - مش مجمّع ولا فاهم أي حاجه - بروفر بربر .. بربر ايه يابت انتي !!!!؟؟؟
بيبا : البلوفر اللي حضرتك لابسه ده .. لونه بـِربـِل
!! سوووو : لونه بـِربـِل ازاي يا بت .. ماهو بنفسجي قدامك اهو
.. تدخلت سينا لفض الحوار .. حتى لا تتفاقم المشكله وتتضخم .. وقالت
سينا : ماهو البنفسجي بالانجلش يا عمو .. يعني بـِربـِل
سوووو : البنفسجي يعني بـِربـِل .. هم بيعلموكو غلط في المدرسه .. البنفسجي بالجريجي معروف ان اسمه موف
.. ثم استدرت موجها كلامي لـ بيبا أفندي
سوووو : وانتي اساسا مالك أبـِربـِر ولا ما ابربرش .. مانتي واخواتك بتلبسو بربر وفوشيا .. جيت قلتلكم لابسين كده ليه ؟؟
!!! بيبا : - مستعجبة وعاقدة حواجبها من الدهشة - فوشيا
!! سوووو : ايوه ياختي فوشيا .. قولي بقى انهم في المدرسه ما قالولكمش ايه الفوشيا
.. تدخلت سينا مرة أخرى لفض الحوار برضك .. وقالت لـ بيبا
سينا : الفوشيا اللي هو البينك يا حبيبه
بيبا : آها .. احنا يا عمو بنلبس بربل وبينك عشان احنا ليتل جيرلز .. انما حضرتك بيج بوي
.. تدخلت سينا مرة تالته .. وتقريبا كانت رامية ودنها معانا من أول الفيلم .. وقالت
سينا : لأ يا حبيبة .. عمو مش بيج بوي
!!!!! سوووو : نعم ياختي .. امال انا ايه بالصلاه عالنبي
سينا : يو آر مان .. يعني سوووو أولد ذان أ بيج بوي
سوووو : انا سوووو أولد يابت انتي وهي .. يلا اطلعو من هنا .. قومو روحو بيتكم .. اساسا جايين عندنا البيت ليه !!!؟؟؟
بيبا : احنا قاعدين في بيت جدو .. مش بيتك
سوووو : بقى كده .. مااااشي .. ماااشي .. وديني مانا جايبلكم شيبسي
سينا : احنا مش بناكل شيبسي .. بناكل روتيتو
سوووو : انتي بالذات يا سينا ماتفتحيش بؤك .. بقى انا سوووو أولد .. طب ده الدهن في العتاقي
!!!!!!!!! بيبا وسينا : - تو جاذر .. يعني سويا - عتاقي
سوووو : ايوه عتاقي .. قولو بقى انكم مش عارفين معناها ايه ولا قالوهالكم في المدرسة كمان
!!! سينا : لا طبعا مش عارفين
بيبا : يعني ايه عتاقي !!؟؟
!! سوووو : عتاقي يعني .. يعني .. يعني سوووو أولد
------
ملحوظة في السريع

.. اللي عايز يشتم يشتم .. اهي شوية ذنوب تتمسح من علينا ان شاء الله
أو شوية حسنات في أيام مفترجة زي الايام دي .. وربنا يتقبل
سوووو

هناك ٦٢ تعليقًا:

غير معرف يقول...

ياه .. اخيرا أول رد

بوست لذيذ اوى .. سووو كيوت

-_- يقول...

اول زيارة و لن تكون الاخيرة ابدا

مهندس مصري بيحب مصر يقول...

يخرب بيت الإنجلش اللي حيلحس دماغ العيال و حينسيهم هويتهم العربية
أمال حيفهموا قرأن إزاي لو مفهموش عربي
حيعرفوا دينهم و هويتهم و تاريخهم إزاي ؟

انا حره يقول...

تااااااانى

دايما مشرد لنفسك كدا عالمدونات

مش قلنا اتعلمو عنجليزى بقى وبلاش فضايح قدام العيال

TAFATEFO يقول...

زي العسل

بس مش عارف ليه بتحسسني انك فني سنسيون ؟؟!!

بس بربر دي جامده أوي

yas يقول...

الموقف ده فكرنى بحاجة مشابه
ابن اخويا عنده 4 سنين وهو فى الانتر فيو بتاع المدرسة جابوا شويه اقلام وقالوله طله القلم البربل طبعا الواد معرفش بس دلوقتى بقي بيعرف كل حاجة المدرسة عامله عمايلاها بردو بعد ماالامتحان خلص او الانترفيو اخويا بيقول لمراته ايه البربل ده هههههههههههههه
البربل ده الواحد معرفهوش غير فى الكلية فى العملى مع لون اخر غريب اسمه violet
احنا تقريبا راحت علينا نروح نرمى نفسنا فى البحر بقي

AHMED SAMIR يقول...

ما انت لازم يا سوووو تعرف اللغة الجديدة
والوان العهد الجديد
الاخضر والاحمر والاصفر دول كان زمااااااااان
دلوقتي في
سيمون وفوشيا وتركواز وبربل

Soooo يقول...

riri

ياستي اهلا وسهلا .. وبجد والله مش مهم اول تعليق من تاني تعليق من آخر تعليق حتى
كفاية انك تعبتي وكلفتي خاطرك وعلقتي

وكل سنه وانتي طيبه




سلامووووووووووووز

Soooo يقول...

Sharm

اهلا بيك يافندم والحمدلله ان مدونتي عجبتك

وكل سنه وانت طيب




سلامووووووووووووز

Soooo يقول...

مهندس مصري

طب تصدق يا هندزا ان بنات اخويا بسم الله ما شاء الله عليهم .. احسن ناس في المسجد في حفظ القرآن

المشكله مش في انهم بيبعدو عن اللغة العربيه ولا بيفهمو كلام ربنا
المشكله في ان فعليا في فجوة بيني وبينهم

شكل المشكله عندي انا يا هندزا

كل سنه وانت طيب




سلاموووووووووووز

Soooo يقول...

انا حره

لا بقى
انا زي الفرن في الانجليجي
بس الانجليجي بتاعهم غير اللي اتعلمناه خالص يا حره يابنتي

ده احنا اتارينا كنا بنتعلم انجليجي بالعربي


كل سنه وانتي طيبه





سلاموووووووووووز

Soooo يقول...

TAFATEFO

الله يكرمك يا طفاطيفو

بس على فكره .. ما اسمهاش فني سنسيون
لا
اسمها كهربائي سالاسيووووون
سالاسيووووون

ابقى تعالى عندي في الورشة وانا اشرحلك يعني ايه سالاسيووووون
ده حوار كبير قوي يا جرع

كل سنه وانت طيب





سلامووووووووووز

Soooo يقول...

yasmine

طب اقسملك بالله العظيم اني ما اعرف ايه البريل ده
مش ده البتاع اللي بيتشرب؟؟
اللي هو شعير خالي من الكحول؟؟
ولا انتي قصدك على بربيكان .. هذي حياتي؟؟؟؟؟؟

وكل سنه وانتي طيبه





سلامووووووووووز

Soooo يقول...

A.SAMIR

ايه ده؟؟
هو البريل ده لون ؟؟
طب اقرى تعليقي اللي قبل التعليق ده .. هتلاقيني بجد والله ماعرف ايه البريل .. وكنت فاكره البتاع اللي بيتشرب

ملحوظه
انت نسيت الأكاجو
ده لون مهم جدا جدا
!!! نفسي اعرفه


كل سنه وانت طيب يابو حميد





سلامووووووووووووووز

adel يقول...

ههههههههههه

زاااا بوست سووو نايس يا معلم

ما تسلفني العسل دول اقعد معاهم شوية و اهو بالمرة يعلموني انجليزي :):):)

عادل
http://elbald-dy.blogspot.com/

mohra يقول...

طب و انت زعلان ليه؟
مش انت بتقول انك عجوز
يلا كل سنه و انت طيب و سسسسسسسو اولد

حنين القلب يقول...

والله العيال عندهم حق
تلبس موف ليييييييييييه
ده اللون ده بكرهه جداً
وانا من هنا بضم صوتى لصوت بيبا وسينا وبنطالب بحرق البروفر ده

هههههههههههههههه
والله وبوست عسل يا سوووو
سوووو كل سنه وانت طيب ويا رب السنه الجايه تكون محقق ما بتتمنى

سلاموز

Unknown يقول...

عتاقى؟؟؟ ياااااااااااااى وات ذا مينينج اوف عتاقى؟؟؟
عثل عثل عثل يا سوووووو

Unknown يقول...

عتاقى؟؟؟ ياااااااااااااى وات ذا مينينج اوف عتاقى؟؟؟
عثل عثل عثل يا سوووووو

همس الاحباب يقول...

بربر
وعتاقى
ايه اللى بيحصل ده
بتوقع نفسك فى مواقف صعبة وبايخة
هههههههه
الدهن فى العتاقى لبيبا وسينا
اشرب يا عم يا سووووو
ربنا يخليكوا لبعض
وكل سنة وانت طيب يا راجل يا طيب
تحياتى

حروف يقول...

بوست جميل جدا ومدونتك حلوة اوي وربنا يخليهمللك ويخليكوا لبعض اطفال دمهم خفيف

البت المشمشية حلوة بس شقية يقول...

بقه كدة ياسوووو فضحتنى قدام العيال الصغيرة كدة هتخلى سيرتك على كل مدون انصحك متدخلش معاهم فى مناقشة تانى وبعدين همل بيتعلمو حاجات غريبه اوى ياراجل

البت المشمشية حلوة بس شقية يقول...

اخر حاجة اعرفها فى الالوان _red_يععنى احمر وبلاك ويلو واروانج ايه بقه الافتكاسات الجديدة دى

البت المشمشية حلوة بس شقية يقول...

وبعدين العيال عندهم حق انتا ايه اللى لبسك موف اساسا انتا اتجننت البس ايه حاجة معروفه يا عم وبعدين بيقولك بربل تقولهم عتاقى انتا منين ياااد وكستنى

Rehab Mostafa يقول...

ايه يا سوووو ده مش عارف الــبر بــل ولا البينك و ايه موف الي بتقولها دي اسمها ليلاه (ده بجد مش هزار) وفي اسم للون الأحمر النبيتي المايل للبني بس مش فاكراه بصراحه ولسه بقى في بيستاج وحاجات كتييييير أومال بس مهندس ديكور ازاي يا سوووو لا لا لا ماينفعش كده على فكره
انت كده ماعندكش خلفيه خالص ... بخمسين قرش ماتزؤيني ياماما و افتح صفحة مليون و 300 ألف تحت عنوان الألوان وانت هتلاقي كل ده ... ثقف نفسك شكلك أدام ولاد أخوك يبقى ايه دلوقتي دول لسه ليتل جيرلز

خمسة فضفضة يقول...

السلام عليكم ورحمة الله وبركاته

ههههههههههه

ضحكتني يا سووو واناماليش نفس

بس الامورتين دول دمهم زي العسل ربنا يخليهملكم يارب

------

هو انت كمان اتشتمت ؟؟


سلام

شـــــهد يقول...

حوار عسللللللللل ياسوووو.. متخيله المنظر وانت بتتناقش مع سينا وبيبا.. هلكتني من الضحك

وانت يعني مش لاقي غير البربر .. ما تلبس اورنج يا ابني؟؟

أحمد (زوج مخنوق ). يقول...

هو ايه موضوع الشتيمة ده؟؟؟

بوست ماشي كوميدي و زي الفل
و في الاخر
اللي عايز يشتم
في ايه؟؟
ايه اللى حصل لعالم التدوين؟؟

ojg يقول...

والله يا أحمد الفرق بين تعليمنا وتعليمهم إن هما اتعلموا يستخدموا اللي بيتعلموه
إنما زمان على أيامنا
كان الإنجليزي بس بيستخدم في حصة الإنجليزي على السبورة وفي الكشكول وعلى خفيف برضو
وعلى فكرة اللي بشوفه دلوقت ان تفعيل التعليم مش بقى في الانجليزي وبس
ده بقى في كل حاجه الجيل ده بيدرسها
-طبعا مش في سيئات الذكر المدارس الحكومية أوالخاصة النص كم-
عشان كده بقى فيه فجوة يا سوووو بينا وبينهم
وده اللي احنا لازم نلحق ناخد بالنا منه
لحسن عيالنا يبقوا أجمد مننا يا جدعان
:)
وبالنسبة لسياق الموضوع وأسلوبك
طبعاااااا رائع كالعادة
ورغم ان
بوب كورن يا عمو
كان تحفة بجد
بس الموضوع ده عاجبني أكتر
الحوار حلو قوي
:))
تسلم الأيادي

ojg يقول...

بس ايه موضوع الشتيمة ده؟

بنت الغربة يقول...

يوست ظريف قوى ولاد اختك فكرونى باولادى لما خالهم طلب من بنتى تطلب له كنتاكى وبيمليها الرقم قالتله اولا ملينى الارقام بالانجليش لانى مابعرفهمش بالعربى وتانيا كنتاكى ماسموش كنتاكى اسمه K F C طبعا اخويا ورم قوى وودانه احمرت ولعن كنتاكى والى خلفوه - انت ظريف قوى

Unknown يقول...

سوو نايس ... كل سنة وانت طيب ياسوو

Mony يقول...

هههههههههههههههههه

حلوة اوي سو سووووو اولد

ربنا يباركلكم فيهم



حاول بأه تاخد كام كرس كده علشان ماتتكسفش قدام البناتيت الحلوين دول


و لا تغرمش ثمن مترجمين
(;

Z_Diva يقول...

mesh 3eb 3lik yragel t7rgna m3 el5wagat, ady a5rt elly ylbes berber :D

la 3gbouny awy we hma by2ololak, "e7na little girls, lakn inta big boy, la2 u r old man" -hma 3rfo mnin ink 3gouz it begibhm m3ak wenta gay elblog walla eh ?-

kol sna wenta tyb el3eed nxt week b2a ya big boy :D

moustapha achraf يقول...

جامد انتة و اللة يا مان

عاشقه وغلبانه يقول...

الانجلزي اكل دماغ العيال
يخربيت مدارس اللغات

maha zein يقول...

بقولك ايه يا عم البربل
طول ما انت سايب نفسك لولاد اخوك يعملوا فيك كده يبقه متجيش تشتكي بقه
قال مرة بربل مرة بوب كورن
ايه خلاص
مفيش اي مراعاه لمشاعر العتاقي

المهم كل سنة وانت طيب وبخير
ويعيد عليك الايام بخير
واشوفك السنة الجاية كده علي طرطوفة جبل عرفات

جنّي يقول...

السلام عليكم ورحمة الله وبركاته

انت يا ابني وقعت وسط الجيل الصاعد مش ها تخلص .. ابقى هاتلك قاموس بعد كدا ..

كل عام وانتم بخير بحلول عيد الأضحى المبارك
كل عام وانتم على صعيد عرفات
كل عام وانتم من الحجيج
كل عام وانتم من الملبين
كل عام وانتم من المكبرين
كل عام وانتم من المهللين
كل عام وانتم مغفور لكم
كل عام وأنتي حرة يا أمتي

أخوكم سعيد

قلب ينبض بالحب يقول...

البوست ده ادخل على نفسي السرور ربنا يخلهوملك انا بحب قوي الاطفال اللمضة اصلهم لو مش لمضين هيبقى دمهم تقيل ربنا يخليهم يارب ويحفظهم من كل سوء وكل سنة وانت طيب اورفوار

رندا يقول...

أسعد الله أوقاتكـ اينما كنتــ
إنه العيد الذي يملأ الأيام والليالي بأقدس اللحظات
والقلوبـ بالبركة والصفاء والإيمان
الله يديم الاعياد، والافراح
وكل عام وانتم بخير

عيد سعيد عليكـ وعلى اسرتك الكريمة

maiosha يقول...

ههههههههه
العيال دول عفاريت يا سووو
بس سيبك إنت الحل عندى
أنا مستعدة أديك كورس إنجليزى ميخرش عصير القصب .. بس الساعة 180جنيه

والله شكلى أنا وإنت اللى هناخد فى الاخر كورس عند بيبا

كل سنة وإنت طيب

والعيد فرحة... ماااااااااااء

Ahmed Al-Sabbagh يقول...

كل سنة وانت طيب يا احلى سوووز

t3ban يقول...

i'm speak london very best
ضحكو علينا و قالو برسيل
وكله بيطلع في الغسيل
حبيييييييييبي

حلوة الدنيا يقول...

كل عام وأنت والأسرة والأمة الأسلامية بخير

زى الهوا يقول...

ههههههههههههههههههه , فكرتنى بواحدة مامة بنت عندى كانت شكلها جاية تتخانق معايا علشان بنتها بتقولها

go out

جاية تقولى شايفة بتعلموا العيال قلة الادب

ههههههههههههههههه


كل سنة وحضرتك طيب

وعيد سعيد

وانا كدة حسيت فعلا اننا بنأثر فى العيال

http://kasperb4.blogspot.com/ يقول...

هههههههه
كل سنة وانت طيب يا سوو
خلاص الدنيا اتطورت والعيال الصغيرة انهاردة بقت تفهم ف كل حاجة واي حاجة
:))

غير معرف يقول...

ماهي دي مشكلة برضك ياابن عي
بربل ؟؟
بربل يا أحمد ؟؟
إيه اللي رماك على اللون ده بس ؟؟
كل سنة وإنت طيب
ويخليك ليهم يا رب
: ))

رئـــــيسـة حزب الأحلام يقول...

كل سنة وانت طيب
وربنا يحقق لك كل امانيك
تحياتى لك

بنت الغربة يقول...

مدونتك ظريفه قوى انا قعدت قريتها كلها -انت مش عجوز قوى -انا اعجز منك بسنتين - شرفنى بزيارتك

wanna b a physician يقول...

كل سنة وانت طيب يا سووو
عيد سعيد عليك وعلى كل من عندك

GiGi world يقول...

اميييييييييييييييييييييييييييييييييييييييييييييييييييييييين
ربنا يكرمك وكلعام وحضرتك بخير ويارب يستجيب دعاءك ودعاءنا ياررررررررب
ربنا يكرمك ويعزك ويحققلك كل امانيك يارب ويرزقك من حيث لاتحتسب يااااااااااارب

زُمُرده يقول...

كل سنه ووانت طيب وبخير وصحه وسلامه
ويارب ايامك كلها اعياد وكل حبايبك حواليك


آآآمييين
ربنا يتقبل دعائك

عيد سعيد

حنين القلب يقول...

اللهم امين
كل سنه وانت طيب يا سووو
ويا رب السنه الجايه تكون حققت كل اللى بتتمناه
ايه اخبار اللحمه؟؟
تلاقيك غرقان يا عم الله يساهله

بقولك
ليك عندى تاج تعالى خده
سلاموز

أبو العريف يقول...

بوست جامد يا باشا انا شخصيا عندي بنوتين اخويا روان ورقيه
روان قمة الشقاوة وبموت فيها وبكتب كمان اغاني علشانها اما رقيه فدي لسه مولودة وانا لسه ما شفتهاش لاني مسافر
لو عايز تفرا الاغاني بتاعة روان تعالي

كفايـة طيبـة يقول...

D:

nudy يقول...

معلش يا سووو انا كمان ابن اخويا لما سالته شفت ايه في البحر قاللي شفت السي جال وسابني ومشي ومش عارفةومع اني مدرسة انجليزي فانا لسه عارفة الكلمة دي من قريب وهي النورس
وانا مش عارفة ليه بنعمل كده في اولادنا وفي الاخر احنا اللي بنحرج نفسنا

قلم رصاص يقول...

ايه الجمال ده كله ياريس

مدونة جامدة جدا جدا

طبعا هلاقي ترحيب وضرب نار وملبس
انا عارف
ههههههههههههههه

سر على بركة الله

تقبل مروري الاول مع التحية

nigro يقول...

بص بقى يا أبو حميد
أنا لا داخل أعلق على الموضوع اللي هلكني من السخسخة لما قريته من ييجي أسبوع
ولا حتى داخل أقولك كل سنة و انت طيب
ولا حتى داخل أسلم عليك
ولا حتى .......
لأ كفاية كده لحسن شكلك كرهتني
المهم
أنا داخل أقولك إن آخر حلقة من "مذكرات طفل طخين" كانت من شهرين و 14 يوم
فاكر ولا ها؟




يلا سلام

غير معرف يقول...

هههههههههههههههه
والله وحشنى البلوج بتاعك اوى

بقى اغيب اغيب وارجع الاقيك بترطن بالفرنساوى
والله خير

هههههههههههههههه

حنين القلب يقول...

ايه يا عم الحج
فينك
وحشتنا بوستاتك

ربنا يطمنا عليك
سلاموز

مرجانة يقول...

حلوة اوي اوي
وبعدين هو التلاتين خلاص بأة سو أولد لللدرجة دي
على فكرة عتاقي يعني مجازا طبعا old cock
بس طبعا مش تقول دي لاي حد الا بتهريج لان معناها الحرفي ذكر الدجاج الكبير
المهم ياباشا احنا اتشرفنا بمدونتك
تحياتي

kareem azmy يقول...

بجد بوست رائع
و المدونة كلها جميلة
دي أول مرة ازورها

تحياتي ليك