الثلاثاء، ٢٣ رمضان ١٤٢٩ هـ

مصر أكيد .. مبسوطه

أشرف توفيق صاحب مدونة أخف دم .. من أكتر الشخصيات اللي عرفتها تواضعا .. وباحب اروحلو مدونته اقراله مواضيعه واقعد اضحك مع نفسي .. واللي يعرف اشرف معرفة شخصيه هيحس وهو قاعد بيتكلم معاه .. انه قاعد مع ابن بلد بجد .. فلاح مصري أصيل .. وفي نفس الوقت هيلاقيه حاضر الذهن وابن نكتة .. باختصار .. أشرف توفيق .. مصري بجد

المقدمة دي انا مش بقولها مسح جوخ ولا محلسه لشؤرف .. دي مشاعري ناحيته .. وعشان انا باحبه وباتمناله الخير من كل قلبي .. كان لازم اروحلو بمجرد ما اتصل بي وعزمني بنفسه على حفلة توقيع كتابة مبسوطه يامصر .. واباركلو على أول كتاب ساخر يحمل اسمه



اول ما مسكت الكتاب وشفت الغلاف اللي مصممة عمرو عبد العزيز .. لقيتني ابتسمت ابتسامه هاديه كده وقلت في عقل بالي .. يابن الايه يا شؤرف .. الغلاف مصري .. من تصميم مصمم مصري .. لكتاب مصري .. بيتكلم عن مصر


الكتاب نازل من دار مزيد للنشر .. والطباعة بسيطه ومافيهاش أي اختراعات .. وعدد صفحاته ميه وعششين صفحه بالصلاتو عالنبي .. بمافيهم المقدمة - واللي لوحدها عايزه مواضيع عشان نتكلم عنها - والفهرس

أجمل مافي الكتاب .. اني اكتشفت ان شؤرف خطه حلو قوي .. وبيكتب حلو قوي عالكومبوتر يعني

الكتاب في المجمل حلو قوي قوي .. عباره عن مجموعة مواضيع لشؤرف كان نزّلها في مدونته .. اضافة الى مواضيع تانيه بتنشر لأول مره .. وكنسبة وتناسب .. تقريبا سبعين في الميه من اللي في الكتاب .. مواضيع جديده

الكتاب متقسم لأربعة فصول ..أول فصل اسمه امتحاناتك يا مصر .. وفيه مجموعة امتحانات أولهم امتحان العربي اللي نشره أشرف في مدونته .. وكمان الاجابة النموذجية للامتحان .. واعتقد انه عمل كده لانه حس ان اللي سرقو الامتحان وسرّبوه .. استعجلو .. وكان لازم يستنو ويعرفو ايه الاجابة النموذجية .. لأنها بجد .. غير متوقعة وساخره جدا جدا جدا

تاني فصل اسمه مرارتي يامصر .. وبيتكلم فيه عن شوية حاجات شافها وقراها وسمع عنها .. فعلا تفقع المراره بجد .. ومن هنا أنا بأطالب السادة المسئولين عن هذا الكتاب .. انهم يوزعو مرارة مع كل نسخه .. عشان فعلا بعد ما الواحد بيقرا ويضحك من قلبه .. بيحس بمراره في مرارته

تالت فصل بقى اسمه .. افلامك يامصر .. والفصل ده بقى مراجيح .. اشرف بوظ الدنيا يا جرعان .. ومن رأيي .. لازم الفصل ده كنت تلعب فيه أكتر من كده وتخليه كتاب لوحده .. لأنه فعلا مراجيح مراجيح

في الفصل الرابع والأخير .. كان لازم شؤرف يتكلم عن نفسه شويه .. ماهو مش معقول يعمل كتاب طويل عريض ومايقولش حاجه عن نفسه .. وعشان كده اسم الفصل ده .. شوية حاجات عني بقى يامصر .. وبيتكلم فيه عن بعض المواقف اللي كانت حصلت معاه من أيام الطفوله مرورا بأولى ثانوي وبعدين أيام الجامعه ولغاية دلوقتي .. ويمكن لأني باحب نوعية الكتابه دي .. فشايف ان فعلا ختامه مسك .. وفعلا كنت لازم تختم الكتاب بالفصل ده
----
في كل فصل من الفصول دي .. كان اشرف بيرسم ابتسامه .. وساعات ضحك بقهقهة وصوت عالي على وشي وعلى وشوش اللي قرو الكتاب .. ابتسامه من الواقع اللي بنعيشه وبنشوفه .. وده في حد ذاته - من وجهة نظري - قمة الابداع

الكتاب لو قيّمناه على مستوى محترفين الهواة .. حلو قوي قوي قوي قوي .. اربعة قوي
ولو قيّمناه على مستوى الكتابة الساخرة الاحترافية .. حلو قوي قوي .. اتنين قوي بس

وده - في اعتقادي - يرجع لأني بعد ماقريت فصلين في الكتاب .. حسيت المسائل ساحت على بعض .. يعني التقسيمه نفسها ما كانتش كفاية في الربط بين المواضيع داخل كل فصل من الفصول الاربعه .. وبيتهيألي لو كانو اتقسّمو فصلين بس او تلاته بالكتير .. كانت التقسيمه هتبقى اوسع وأشمل .. وهيبقو مربوطين ببعض أكتر .. خصوصا ان الفصل التاني واللي اسمه مرارتي يامصر .. فيه مواضيع ممكن تتحط على الفصل اللي اسمه شوية حاجات عني بقى يامصر .. أو يندمجو هم الاتنين مع بعض باعتبار ان فصل مرارتي يامصر بيتكلم عن حاجات شافها وقراها وعاشها الكاتب - اللي هو أشرف صاحبي يعني - وبيعبر عنها باسلوبه .. أما فصل الامتحانات كان ممكن يتحط مع الافلام في فصل واحد .. وكان ممكن يبقى اسمه مثلا .. فانتازيا منك يامصر أو هيّسنا منك يامصر
ولو اني كنت حابب ان الافلام دي كانت تنزل في كتاب لوحدها .. ويتحط عليهم أفلام تانيه زي شيء من الخوف والأرض وبين القصرين .. وياسلام عليك يابو شؤرف لو جبت شوية أفلام معاصره زي مافيا وسهر الليالي

طبعا دي مجرد وجهات نظر مش أكتر .. واللي قلته لا يعيب الكتاب ولا يقلل منه .. ولازم احترم وجهة نظر شؤرف في التقسيم واختياره للمواضيع ككل

وفي الاخر لازم اقول .. اني سعيد جدا ان في كتّاب ساخرين عندهم الوعي السياسي والاجتماعي اللي عند أشرف توفيق .. واللي بجد كل يوم بيؤكدلي انه فعلا .. أخف دم

وعلى فكره يا شؤرف .. طول مافي زيك في البلد .. مصر أكيد .. مبسوطه

سوووو

هناك ٧٩ تعليقًا:

2ensan wnsan يقول...

شكله كتاب جامد جدا ان شاء الله يكون نزل المحله او المنصوره واعرف اجيبه

انا قريت عالبلوج عنده وقريت على المنتديات الحاجات اللي اتسرقت منه كمان

جامد جدا بصراحه بس اكيد فيه حاجات تانيه جامده برضه

Soooo يقول...

2ensan wnsan

خبر ايه ياجرع
انت نايم على باب المدونه؟؟

ده انا لسه منزل الموضوع مافيش دقيقه

وبخصوص انك ناوي تشتري الكتاب .. ياريت شؤرف يشوف كلامك ويقول لدار النشر تعمل حسابها وتروح المحله والمنصورة .. لأن اساسا اساسا اشرف من المنصورة

وعد الجمايل يابو شؤرف .. اديني باعمللك اعلان اهو
شوفني بشاندوشت شاورما دجاج




سلامووووووووووز

2ensan wnsan يقول...

معلش عامل لك اشغالات على باب المدونه يا سوو باشا

وبخصوص ان اشرف اساسا اساسا من المنصوره دا لان المنصوره كلها مبدعين

Unique Gurl يقول...

ربنا يوفقه
شكله كتاب حلو اوي
حبقي اجيبه ان شاء الله.
عجبني اوي تحليلك للكتاب و الاقترحات اللي قولتها.

قوس قزح يقول...

مبروك لاشرف الكتاب
و هو فعلا دمه شربات

و ياريت لو عرفت تجيب لى نسخة و اخدها منك يوم الجمعة يبقى ميرسى لك

سلام

TAFATEFO يقول...

أنا كمان عجبني جداً الكتاب .. ويمكن زاد بالنسبه لي حاجه (قد تكون غير مقصوده من أشرف) ان في كل قصه في معنى سياسي ممكن توصله بسهوله .. في انتقاد حاد مبطن بأسلوب ساخر

من أول تعامل الشرطة مع المواطنين واحتكار الحديد .. لحد تذاكر مسرح عادل امام .. في جمل كتير جداً في الكتاب بتنقل معنى ان في مصر صنفين من الناس .. صنف من حقه يعيش .. وصنف كل حاجه من أول الشرطه اللي المفروض في خدمته لحد لقمة العيش الحاف تآمرت عليه ودهسته

=-=-=-=-=-=-=-=

أنا كمان كنت موجود يوم حفل التوقيع .. لسوء حظي اني متعرفتش بيك

رمضان كريم يا فندم وعساك من عواده

سمر الشافعى يقول...

انا من موقعى هذا بضم صوتى لصوت انسان ونسان وبطالب ان حد يعبرنا فى المنفى اللى احنا فيه دا وينزلنا الكتاب فالمحله

اشمعنى انتو يعنى تقرو وتضحكو وتنبسطو احنا كمان عاوزين نقرا لشؤرف

القراءه للجميييييييع

Zianour يقول...

شكله كتاب حلو
وعموما اي انتاج لازمن نقول برافو للمجهود
عقبال عندك بقى
بس لازمن تكتب اهداء لكل زائري المدونة الجميلة دي على الغلاف

ربنا يوفقك ويوفق الجميع
والله مصر اكيد اكيد مبسوطة بيكوا
:))

أبو خالد يقول...

أبني الحبيب أحمد سوووو
فعلا أشرف إنسان موهوب و متواضع و رجوله و كنت معاه في لقاء لجماعة إضافة الثقافية الناس دي بجد ياسوووو
مبدعين و جميعهم من الدقهلية و ارجو أن تحضر هذه اللقاءات كان لقاء يعوزك جموعة من شعراء الدقهلية و زجاليها منهم يحيي قدري و أمجد القهوجي و محمد منصور و محمد فكري و الجميع عباقرة
سوووو سنفطر سويا في ساقية الصاوي الجمعة بمشيئة الله ..دمت أحب الناس

Ahmed Al-Sabbagh يقول...

ايوة يا باشا

انا لما كملت قراية الكتاب رأيى اختلف عن المرة اللى كنا بندردش فيها انا وانت عن الكتاب وقولت لك ان فى اجزاء ضعيفة
لأ بصراحة الكتاب ككل بداية جامدة جدا لأشرف
وكمان انت ملاحظاتك عجبانى اوى وتقريبا متفق معاك فيها

عايزين نعكشة ف مرة فى وكر قبيلة قريش ونتكلم

احمد

Sweet Violet يقول...

مبروك لاشرف و ربنا يوفقه

و من الواضح من تحليلك ان الواحد لازم يجيب الكتاب

بس انا شايفه من التعليقات انه مش موجود فى كل الاماكن

ايه النظام ؟؟؟ هانلاقيه ولا لأ

مـجـنـووون يقول...

الف مبروك للأشرف علي الكتاب الجديد

وشكله كتاب متميز بقلم متميز

بس يا ريت لو تكتب لينا حاجه منه عجبتك

تقبل مروري
مجنووون

Mafrousa يقول...

انا كنت بدخل عنده زمان
و كنت بحب اقراله
بس بقالى كتير مش بدخل عند حد و الله
و مدام انت حاطط كلمة اوي فى البوست على اكتر من حاجه
يبقى اوي اوي
حدور على الكتاب و قراه
بس حموت و اعرف مصر مبسوطة من إيه ولا ايه
اصل الحاجات اللى تبسط كتيييييييييييييره:(

http://kasperb4.blogspot.com/ يقول...

لا فعلا الراجل ده كتاباته تستحق القراءة ودماغه عالية بجد
وان شاء الله لازم نقرا الكتاب ده أكيد فعلا تحفة زي منتا بتقول

شكرا يا سوو باشا
وكل سنة وانت طيب

أسيرة الأقدار يقول...

نقول سلامو عليكو الاول
معلش بئا يا سوووو انت عارف انى لسة جديدة (دخيلة عليكو) وبصراحة معرفش عن اشرف غير انه صاحبك ونزل كتاب جامد اوى اوى اوى اوى (اربعة اوى) .. لو عايزة اشوف الكتاب ده بئا اعمل ايه ولا اروح فين علشان متوهش بس .. يعنى اسرع طريق للوصول للكتاب ايه ؟

Unknown يقول...

لسة مقريتش الكتاب بس باذن الله باذن الله هقراه(يا لهوى كدة الكتب اللى فى الخطة كترت ربنا يسترها بقى)المهم انك انسان محترم وجرع عشان الكلام الحلو اللى من القلب دة......سلام

ميرا ( وومن ) يقول...

سوووو

الكتاب شكلة بجد تحفة ممكن لو فيها غلاسة تجيبلي انا كمان نسخة ( وش بيشكرك مقدما )

^ H@fSS@^ يقول...

ارجوك تسامحني

بجد مش عارفة ازاي مدونتك كانت غايبة عني
انا تقريبا قريت اغلبها
او اخر عشرطاشر بوست
و تسلم ايدك لاني ضحكت من قلبي و مكنتش ضحكت كده من فترة طويلة اوي
للاسف صوتي طرقع في الشغل و فيه احتمال اخد لفت نظر
بس مش فارقة معايا بصراحة
المهم اني وصلت لمدونتك
:)

Hany Rizk يقول...

عزيزي سو
رمضان كريم
بمناسبة مصر اكيد مبسوطة والكتاب الجميل اللى شوقتنى انى ادور عليها واقراه وربنا يسهل والاقيه اساسا

يحضرنى فى هذا الموقف كوبليه محمد صبحى وهانى رمزى فى مسرحية تخاريف

- البلد عمرها ما كانت مبسوطة
- عمر البلد ما كانت مبسوطة
- مبسوطة البلد عمرها ما كانت

بس يا ترى مين اللى مبسوط فى البلد دى اساسا ... انا وللا انت وللا كل الناس اللى معانا هنا ؟؟؟

وللا الناس اللى اساسا ما تعرفش حاجة عن المبلوجين او اللى بيبصوا للمبلوجين كانهم على راى المثل (الكلاب تعوى والقافلة تسير) قافلة السرقة والنهب والفلوس اللى بتطير والمشاريع الفاشلة وسوزان تميمي وطلعت مصطفى ونعم للتوريث ولا للتوريث والبنزين غلى والمواد الاساسية كمان (عشان البنزين غلى طبعا)

يا ترى مين اللى مبسوط فى مصر ... هل يا ترى اشرف كان مبسوط وهو بيتساءل عن انبساط مصر ؟؟ وللا انت كنت مبسوط وانت بتقرا عن الكتاب او الكتاب نفسه ؟؟؟ وللا كل الناس كانت مبسوطة دلوقتى ....؟؟

طب سؤال تانى ....
-هل احنا راضيين عن نفسنا ....؟
-طيب فى ايدينا ايه نعمله ...؟
-طيب لو قررنا اننا نعمل حاجة كويسة فى بلدنا ... هل حانسلم من الاذى اللى ممكن يطولنا ...؟
+++ يعنى من الاخر برضه هل حانكتفى اننا نزور المستشفيات ونزور اخواننا اليتامى والمرضى ونلم فلوس علشان نعملهم حاجة كويسة او نجمع اهل الخير فى حاجة خير نزكى بيها عن نفسنا وعافيتنا ...؟؟؟
+++ هل كدة حانبقى مبسوطين ...؟؟
+++ حانبقى راضيين عن نفسنا ...؟؟
***** بصراحة انا مش مبسوط و كمان مش عارف اعمل ايه ؟؟؟****

لو عرفت او انبسطت او ارتحت ابقى قوللى ... بس قبل العيد الكبير علشان انا حاتجوز عقبال ولادك كدة وانت عارف الواحد لما بيتجوز بينفض لحاجات كتير منها الانتماء للبلد .... للاسف !!

كـــيــــــــارا يقول...

الف مبروك لاشرف

وواضح انه كتااااب جامد وبالفعل لازم نقراه

بس نوصله ازاي ؟؟

Miss. Sosa يقول...

هو واضح جدا يا سوووو انك صديق صدوق لاشرف بس ده برضو ماخرجكش عن قول الحقيقة .. هو فعلا اخف دم .. وكاتب ساخر مميز .. وفكره مبدع ومتجدد - ذهنه حاضر ديه مااعرفهاش علشان ماشوفتوش فيس تو فيس بس في المجمل هو يستاهل كل خير

الكتاب للاسف ماشفتوش لسه او اشتريته لاني بقالة فترة طويلة مش بخرج بس من العنواين اللي قولتها حسيت فعلا ان اسامي الفصول مش متظبطة

ماهو امتحاناتك وافلامك يا مصر يمشوا تحت مرارتي يا مصر لان كل حاجة في مصر تجيب المرارة ولذا تعهد ولي العهد بانشاء مصنع المرارة البلاستيك وبصرف مرارة لكل مواطن مع بطاقات التموين

بس لو اسم الفصول تاعبكم انا اعرف دكتور ابن حلال غيرلي عنوان الشابتر التالت فى الرسالة 6 مرات بس ويوم المناقشة لجنة التحكيم قالولي انتي مسميها كدا ليه واقترحوا يتغير اسمه للاسم اللي انا كنت مسمياه في الاول خالص
وكان نفسي اقطع الشابتر ده من الرسالة الصراحة علشان يرتاحوا ويريحوني

بس نعمل ايه هي دي مصر وطبعا مبسوطة مصر

Soooo يقول...

2ensan wnsan

يا سيدي وهو انا اكره ان المنصورة كلها تبقى مبدعين
طب ياريت مصر كلها والشعب المصري كللو يكون مبدع

وماتقعدش على باب المدونه ياجرع انت .. فرضنا ان حد من اهل البيت خالع راسه ولا حاجه





سلاموووووووووووز

Soooo يقول...

Unique Gurl

ربنا يوفقه ويوفق الجميع يارب
وهو فعلا كتاب حلو ويستاهل انك تجيبيه

وياستي ده ولا تحليل ولا حاجه .. ده رأي شخصي وانا قلته .. والحمدلله انه عجبك




سلامووووووووووز

Soooo يقول...

قوس قزح

وياستي لو عايزه نسخه من الكتاب انا تحت امرك
هجبهالك وابقى احاسب اشرف واقوللو اني عمال اشتري نسخ وباوزعها وباعمللو شغل




سلاموووووووووووز

Soooo يقول...

TAFATEFO

يا رااااجل
غير مقصوده برضك
ده هو اشرف بيكتب الغير مقصود
اقرى مابين السطور
هو ده المهم


ومعلش .. نبقى نتقابل في تجمعات تانيه ان شاء الله




سلاموووووووووووز

Soooo يقول...

سمر الشافعى

وانا برضه من نفس المزنق باقول لشؤرف شوف في خلل في التوزيع ليه
الناس عايزه تقرا كتابك ياعمنا

وانتي عامله ايه .. فين العيديه صحيح؟؟؟؟




سلامووووووووووز

Soooo يقول...

Zianour

اوعدك ياستي ان لو ربنا أراد وشفت كتابي قبل ما اموت .. هبقى اعمل اهداء مخصوص عشانك .. وهبقى ابعتلك نسختك دي اتش ال
بس قولي يارب





سلامووووووووووووز

Soooo يقول...

أبو خالد

بابا العزيز
مدونتي نورت والله بتشريفك

وانا عارف طبعا اشرف وقعدت معاه كزا مره وهو فعلا متواضع جدا وفنان جدا ودي اكتر حاجه باحبها فيه
وبخصوص جماعة اضافة فأنا فعلا متابعهم باستمرار وبافرح جدا بان في ناس بالتفكير والموهبة دي .. بس حظي مش بيسعفني اكون معاهم

وان شاء الله هنفطر انا وانت يا بابا على ترابيزه واحده في يوم الساقيه .. اللي هو بكره ان شاء الله

وهتوحشني والله لغاية بكره





سلامووووووووووز

Soooo يقول...

Ahmed Al-Sabbagh

صبرك بالله يابو الصبابيغ
مسيرنا هنخطفه ونمسكه ونخليه يعزمنا على بيبس وكحك وفراخ مشويه .. ونقعد نتكلم بقى بروقان
بس بلاش قبيلة قريش .. عشان قريش دلوقتي المجاري ضربت عندهم
تقريبا قريش كل اكله جامده ولا حاجه





سلاموووووووووووز

Soooo يقول...

ضد التيار

والله انا مش عارف الكتاب موجود فين بالظبط
بس انتي لو من القاهرة او بتيجي القاهرة .. ممكن تجيبيه من مكتبة البلد اللي قدام الجامعه الامريكيه في التحرير

غير كده بقى .. علمي علمك




سلاموووووووووووز

Soooo يقول...

مـجـنـووون

جزئية اني اكتب حاجه من الكتاب .. دي انا ماقدرش اعملها
صاحب الشأن بيقرا الموضوع وبيشوف التعليقات بنفسه
ولو عايز ينشر حاجه من حاجات الكتاب هو الوحيد اللي ليه حرية التصرف

بس نصيحه .. هات الكتاب وانت متطمن





سلاموووووووووووز

Soooo يقول...

واحدة مفروسة

ياريت يامفروسه ياختي تجيبي الكتاب لأنه ساخر جدا
وانا بجد شايف انه بداية حلوة لاشرف

وبخصوص ازاي ان مصر تبقى مبسوطه وفيها البلاوي دي كلها .. هاتي الكتاب وانتي تفهمي المقصد
ايه المقصد اللي انا قلتها دي؟؟؟؟؟




سلاموووووووووووووز

Soooo يقول...

آلام وآمال

هو فعلا شؤرف دماغه حلوه
ولازم تجيب الكتاب عشان تقراه

وكل سنه وانت طيب
فين العيديه ؟؟؟؟





سلامووووووووووووز

Soooo يقول...

أسيرة الأقدار

مبدأيا .. اشرف قبل مايكون صاحبي هو شاعر وصحفي وكاتب ساخر حلو قوي

ولو عايزه الكتاب .. لو انتي من القاهرة يبقى هتلاقيه في مكتبة البلد اللي قدام الجامعة الامريكية في التحرير
لو انتي مش من القاهره .. ماعرفش بقى التوزيع ايه نظامه




سلاموووووووووووز

Soooo يقول...

enjy

بعيدا عن اي حاجه
اشرف انسان كويس ويستاهل كل خير بجد

وصدقيني .. الكتاب ده ممكن يكون اهم من كتب تانيه في خريطة الكتب اللي عايزه تجيبيها
ومش هتندمي




سلامووووووووووووز

Soooo يقول...

وومن

عد الجمايل ياعم شؤرف .. ادي نسخه تانيه هاجيبها وطبعا عشان اللي طالبه مني الكتاب بنوته .. فمش هقدر اطالبها بحق الكتاب
هاخده منك انت يا شؤرف

حاضر يا ميرا .. ان شاء الله هاجبلك نسخه





سلاموووووووووووووز

Soooo يقول...

^ H@fSS@^

ياخبر يافندم
ده انتي اللي تسامحيني اني مش كويس في النشاط التدويني وماعملتش انتشار للمدونه

وصدقيني انا اقل من كل الكلام الحلو اللي قلتيه
ربنا يارب يسعدك ويبسطك ويكرمك ويوفقك ويرضيكي دنيا وآخره يارب




سلاموووووووووووز

Soooo يقول...

brokenheart

خبر ايه ياعم هاني
انت جاي تخلينا نعيط ولا ايه ياجرع

وبعدين انت مالك كده شايل هموم الدنيا والاخره
اسعى ياعبد
ومادمت طلبت فرج ربنا .. خليك واثق ان ربنا هايكرمك

وياسيدي اللي اقصده بان مصر مبسوطه .. هقولو في موضوع مخصوص

وربنا يتمملك على خير يارب





سلاموووووووووووووز

Soooo يقول...

كيارا

الله يبارك فيكي يافندم

وياستي لو عايزه توصلي للكتاب وانتي من سكان القاهرة .. ممكن تروحي مكتبة البلد اللي قدام الجامعة الامريكيه في التحرير وتجيبيه من هناك
اما لو انتي مش من القاهرة .. مش عارف الحقيقه التوزيع ايه نظامه

بس هسأل شؤرف واعمل تحديث احط فيه الكتاب بيتباع فين بالظبط





سلاموووووووووووووز

Soooo يقول...

Miss. Sosa

لو انتي تعرفي اشرف شخصيا .. هتعرفي انا اتكلمت وقلت رأي في الكتاب بصراحه ليه
اشرف فنان بجد .. والفنان بيستوعب كل الاراء اللي بتوجه ليه مادامت آراء منطقيه وفي صميم العمل الفني

وبخصوص الفصول اللي هي افلامك يامصر وامتحاناتك يامصر .. يستحسن قبل ماتحطي انطباع عنهم تقريهم عشان تقدري تحكمي عليهم كويس

وبعدين انتي عايزه تجيبيلنا الدكتور بتاعك يغير اسماء الفصول ليه .. طب انتي ده قدرك ونصيبك .. نقوم احنا كمان نتدبس
لا .. مش لاعبين

المهم انتي عملتي ايه في الرساله .. وفين الشربات .. وفين العيديه بتاعتي ؟؟؟؟





سلاموووووووووووووز

صبرني يارب يقول...

طب انا عايزه اقرا الكتاب ده

وكمان من المنصوره اشرف طب عيب ياعم احنا بلديات

ابعتلي واحد او اثنين مش مشكله ههههههههههههه

اول مره اجي هنا يا سو وشكلها مش اخر مره ان شاء الله

وحلو اوي اقتراح المراره مخمخني اصل اختك شايله المراره من خمس سنين وفى البلد دي الواحد لازم يكون عنده 3 او 4 مرارات

كل سنه وانت طيب وتحياتي لاشرف لحد ما ازوره

Eman Eltaher يقول...

والله بجد انت زين ما اخترت يا ولدى
:)

فعلا شاااااطر و برافو عليك
جبت مجموع
:)

لما اتكلمت عن كتاب أشرف توفيق
انا مكنتش عارفة اكتر من انه نزل كتاب ليه بإسم مبسوطة يا مصر

لكن إيه فصوله و عنواين كده معرفش حاجة

بليدة يعنى !!!!

والحمد لله بوستك نجدنى من الجهل اللى انا فيه
:)

ياللا عقبال ما نكتب عنك قادر يا كريم
هههههه

لا لا مش ف صفحة الحوادث
:)
لا قدر الله أكيد

آآآآآنى بهزر

و عموما رمضان كريم
والعيد قرب .. فين بقى العيدية ؟؟؟؟
:)

غير معرف يقول...

الكتاب شكله حيكون حلو أوى
إن شاء الله أجيبه

جنّي يقول...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

3ala asm masr يقول...

شجعتنا نقرا الكتاب هحاول ادور عليه واقراه

بنت مصريه يقول...

والله يا سوو انت بالبوست دا اثبتلى انك خير صديق بصراحه
وبتحب صحابك قوى

انا باركت لاشرف ف مدونته وعبال ما اباركلك يا سووو ياللى مش بتعبر وماعدتش بتزورنى عالمدونه

بس ان شاء الله لما تعمل كتاب هتلاقينى اول واحده تشتريه وتعملك بوست عنه
يلا ابسط يا سيدى اى خدمه هههههههههههه

انا سعيده قوى يا سوووو انى اتشرفت بمعرفتك انت وبقييت اصحابى المدونين
وسعيده اكتر انى عرفت اصل كلمه سوووو

تقبل مرورى

غير معرف يقول...

ان شاء الله اجيبه

شوقتنى اقراه

maiosha يقول...

أولا مبروك لاشرف على الكتاب .. وربنا يوفقه كمان وكمان

بس بجد باين عليه كتاب حلو أوى .. بس إيه يا سوو الدعاية الجامده دى .. ماشية معاك يا أشرف

إن شاء الله أجيب الكتاب ده على طول

كل سنة وانت طيب

Unknown يقول...

والله شكل الكتاب جامد
خاصة ان كل الناس كمان تمدح فى الكاتب
وبتقول عنه انه انسان طيب ومفكر جميل
بوست جميل يا سو وبيبين اد اية انت بتحب اشرف وكمان مدى حبك ووفائك لاصحابك
يعنى انت صاحب صحبك
ربنا يوفقه ويوفقك يارب
عيد سعيد ان شاء الله

Jack Sparrow يقول...

ينتابني شوقٌ جارفٌ لقراءة مثل هذا الكتاب
دعك من المغريات التي نثرتها يمينا و يسارا و التى يصير معها شراء الكتاب و قراءته ثلاثة او اربع مرات هو " اقل واجب " ... 0
و لكن يكفي يا اخي ان تمتدحه بنفسك حتى نسعى حثيثا لشراءه
ثقتي في ذوقك جعلت كلمة واحدة فقط كافية لاقتناعي بانه درة ثمينة
كلمة مثل " اشتريه " مثلا
:D
سأحاول جاهدا اقتناء الكتاب
رغم اني اعرف ان مصر تدعي الانبساط
:D

غير معرف يقول...

قرات تلك التدوينة منذ ان نزلت
ولم ارد
الامر اصبح متعلقا
الوجود= التعليق

رددت لك فى تدوينتك الماضية

سو

عيد سعيد
_العيدية الاقيها فى مدونتى_
3 كتب لتوفيق الحكيم
لن اتنازل
وجه مبتسم

FreeKiller يقول...

نلاقيه بس الكتاب ده فين و احنا غلابة الاقالييييييييييييييييم

هيء هيء هيء

يللا لنا يوم ان شاء الله


كل سنة و حضرتك طيب

لو مش فيها مدايقة يعني
حضرتك ليك تاج عندي
اتفضل استلمه من هناك

و شكرا

Unknown يقول...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

قوس قزح يقول...

رضي الله عنك وأرضاك
وهداك وأغناك
وعافاك وشفاك
ووفقك لخير الدعاء
وأجاب لك الرجاء
وأحبك بلا ابتلاء
وجعلك ساعياً للخير
مؤثراً في الغير
وكل عام وانت بخير

د/اجدع بنوته يقول...

تصدق بالله

قول لا اله الا الله

انك واحد دماغك جامده جداااااااااا

ليه بقى .. باشا ياباشا

لانك عملت حاجه نفسى فيها م زمان

قولى ايه هيا .. ااقولك

مش كفايه ننزل اعلان عن كتاب او عن نشاط

من المحفز سواء للى قاموا بيه او للاخرين

انهم يلاقو كومينت م الناس اللى عملته

عن افضل الحجات .. والحجات اللى كانت

الطف لو متعملتش .. والحجات اللى

متعملتش وكانت هتبقى جيده لو اتعملت

فانا ارفعلك القبعه ع البوست ده

ومعاك 90% ف رايك عن مبسوطه يامصر

و 100% اشرف كاتب ماهر جداااااااااا

وعنده مفردات الليله صح ...

ربنا يوفقه

وكل سنه وانت طيب

وعيدك سعيد

ها اشتريت كحك وبسكويت ..

ولا ملكش تقل ع السكريات .. لووول

مطلق يقول...

كل سنه وانت طيب يا سوووووووووو

الكتاب فعلا حكايه

سلوى يقول...

كل سنه وانت طيب أنت وكل من حولك

تقبل الله منا ومنكم

عيد سعيد إن شاء الله

rainbow يقول...

كل سنة وانت طيب عحمد

ويا رب عيد سعيد عليك وعلى جميع اهل بيتك

والعيد اللى جى تكون محقق اغلب احلامك الفنية والانسانية جمعااااااء

تحياتى

هدى

FreeKiller يقول...

اكشن نتاني مرة
بعد قرايه البوست
انا بتفق مع اجدع بنوتة ف كلامها لحضرتك

وكمان بحييك لان تناول الكتاب فهمنا محتواه بسرعه - لاننا من اهالي الاقاليم الكرام اللي ما قروهوش - و كمان نقدك كان سلس و بناء

تسلم

أسيرة الأقدار يقول...

كل سنة وانت طيب يا سوووووو

وعيد سعيد عليك

كنت جايبة لك معايا شوية بتيفور وكحك بس اكلتهم فى السكة وانا جاية

Soooo يقول...

صبرني يارب

كل سنة وانتي طيبه اولا
ثانيا .. ادي كلامك وصل لاشرف وانا متأكد انه هيعمل اللي يقدر عليه عشان الكتاب يتوزع عندكم بطريقه كويسه وتوصل لكل الناس ان شاء الله

والف شكر على زيارتك وارجوكي تعتبري مدونتي زي مدونتك تمام وتشرفيني بتعليقاتك وبزياراتك عندي




سلاموووووووووووز

Soooo يقول...

Eman Eltaher

ميييييين .. ايمي بنت منتقتي
طب والله ليكي وحشه يابنتي
ايه الاختفاء الرهيب ده كللو
لعل المانع خير يارب

والحمدلله ان الموضوع شرحلك اشرف كتب ايه .. ولو اني افضل انك تقريه بنفسك لانك هتستمتعي بيه جدا زي مانا استمتعت

وكل سنه وانتي طيبه
وحاضر ياستي .. ليكي نص جنيه صفيح .. عيديه عشان خاطرك انتي بس





سلامووووووووووووز

Soooo يقول...

انا ودماغي

الكتاب فعلا حلو
على الاقل من وجهة نظري

واتمنى انك تقريه بنفسك وتقولي ايه رأيك فيه

وكل سنه وانتي طيبه






سلامووووووووووووز

Soooo يقول...

جنّي

وعليكم السلام ورحمة الله وبركاته

وكل سنه وانت طيب

ويارب في زي الايام دي تكون محقق كل اللي بتحلم بيه
وربنا يسعدك ويبسطك ويكرمك ويرضيك دنيا وآخره يارب





سلاموووووووووووز

Soooo يقول...

3ala asm masr

ازيك ياهنوده
يارب تكوني بخير

وياستي هاتي الكتاب واقريه وان شاء الله هايعجبك
ولو ما عجبكيش .. قولي لشؤرف وهو هيشتريه منك

وكل سنه وانتي طيبه





سلاموووووووووووز

Soooo يقول...

بنت مصريه

كل سنة وانتي طيبه ياستي
وانا اللي بجد سعيد اني اتعرفت عليكي وعلى والدك

ومين قالك اني مش باقرالك او مش باجي مدونتك .. طب ده انا على طول هناك .. بس مش باقدر اعلق .. وده نتيجة زنقة شغل على زنقة رمضان وكده
انما ياستي هتلاقيني عندك طول فترة العيد ان شاء الله .. وهاغرق مدونتك تعليقات

اتجدعني انتي بس وجهزي البيتيفور والباكساويت


ملحوظه
موضوعي ده مالوش علاقه ان شؤرف صاحبي ولا مش صاحبي .. الحكايه اني قلت وجهة نظري في كتاب عجبني لشخص انا باحترمه
واوعدك اول ما ربنا يفرجها والكتاب اللي باعملو يشوف النور .. هبلغك بنفسي




سلاموووووووووووز

Soooo يقول...

MaGn0liA...

وان شاء الله هيعجبك

وكل سنه وانتي طيبه




سلامووووووووووز

Soooo يقول...

maiosha

بغض النظر عن ان اشرف صاحبي ولا مش صاحبي
الكتاب بجد يستحق القرايه

وهاتيه ياستي ولو ماعجبكيش .. اشرف هيبقى يشتريه منك

وكل سنة وانتي طيبه





سلاموووووووووووز

Soooo يقول...

نهر الحب

كل سنه وانتي طيبه يا انوش وان شاء الله في زي الايام دي تكوني محققه كل اللي بتحلمي بيه يارب

وبالنسبه اني صاحب صاحبي .. اشرف بغض النظر عن كونه صاحبي .. انسان محترم ويستاهل كل خير
وفعلا الكتاب حلو قوي .. وانا مش باجامله
ولو مش مصدقاني .. هاتيه واقريه بنفسك .. ولو ماعجبكيش .. قولي لاشرف وهو هيشتريه منك





سلامووووووووووز

Soooo يقول...

Jack Sparrow

والله يا ميدو انا بجد مش بابالغ
بس الكتاب فعلا حلو
وانا مش بقول كده نوع من انواع الدعايه المدفوعة الاجر او الغير مدفوعة حتى
اقولك
هاتو واقراه .. ولو ما انبسطتش .. قول لشؤرف وهو هيدفعلك حق الكتاب

وكل سنه وانت طيب يا ميدو




سلاموووووووووووز

Soooo يقول...

شيماء سمير

كل سنه وانتي طيبه .. ده اولا
ثانيا .. اسمعيني واستوعبي قصدي كويس

بقى ياستي بداية مانا اتعرفت عليكي كان ساعة لما فاتيما ام يوسف اتكلمت وقالت انك حضرتي التجمع اللي كانو عاملينه
وساعتها جيتلك مدونتك وابتديت اتابعك .. لغاية ما جه موضوع ديوان الشعر بتاعك وحفل التوقيع وكان نفسي احضر بس مانفعش .. وفي خلال الفتره دي كنت باعلق عندك وبتعلقي عندي .. اي نعم انتي ماقريتيش المذكرات ودي حاجه ترجعلك وانتي حره ..بس مش مشكله
بعدها تشرفت واتعرفت عليكي لما حصل التجمع بتاع اسكندريه
من ساعتها بقى ولا عتبتيلي مدونه ولا علقتيلي على موضوع
بالرغم من انك كنتي طلبتي مني مساعدتك في انك عايزه تتعلمي كتابة السيناريو وعايزه الحوار بتاع الافلام اللي قلتي عليه
وبالتالي بقيت انا من ناحيه مطالب اني اساعدك زي مانتي طلبتي
لكن لما انتي اختفيتي ومابقيتيش تعلقي .. قلت يمكن لانك صرفتي نظر عن الموضوع ككل

كل ده .. كان ثانيا

ثالثا بقى .. حكمة التعليق بيساوي الوجود دي مش صح .. او انا مش باحبها عن نفسي
وبادخل في ايام مدونات كتير بلاقي فكرهم مش ماشي مع فكري وبافضل اني ما اعلقش واقول لو صادفني اني اتعرفت على الشخص ده هابقى اوصل معاه لوجهة نظر وسط .. وساعات باقرا مواضيع حلوه وابقى عايز اعلق لكن مش بلاقي وقت .. نتيجة لشغل او التزامات او ظروف خاصه .. وبرضه عارف ان في ناس ممكن تكون بتعمل معايا نفس اللي باعملو .. وباختلقلها العذر في ده
لكن انتي عملتي حاجه غير كده
يعني بناءا على كلامك انتي قريتي ماقبل موضوع كاكا في حارة اليهود وماعلقتيش عليه .. بالرغم من انها مواضيع عاديه ومافيهاش الحاجات اللي ضايقتك في موضوع كاكا في حارة اليهود .. وجيتي وعلقتي في الموضوع ده بالذات وقلتي انك معترضه على شوية حاجات والفاظ فيه

؟؟؟؟

طب منين انتي كنتي عايزه مساعدتي في حاجه واختفيتي من بعدها خالص ؟؟؟
ومنين انتي جيتي واعترضتي على كام لفظ في موضوع .. والمواضيع اللي قبله ماقلتيش عنهم اي حاجه ؟؟؟

مش عارف انتي فهمتي قصدي ولا لأ
بس اعتقد اني شرحت كل اللي جه في دماغي

وكل سنة وانتي طيبه

وحاضر ياستي .. عيديتك هتكون عندك قريب ان شاء الله
بس هي مسرحيات لتوفيق الحكيم لأني بافضل الحكيم في المسرح عن الحكيم في الروايه





سلاموووووووووووووز

Soooo يقول...

FreeKiller

ان شاء الله الكتاب هيوصللكم وتقروه كلكم
معلش بس انتي عارفه صعوبة التوزيع في الاقاليم .. بس ان شاء الله شؤرف هيشوفلكم حل في الموضوع ده

وبخصوص اني اتكلمت عن الكتاب كعمل فني وحاولت اقول وجهة نظري وما اكتفتش باني اقول ان في كتاب اسمه كزا كزا ومؤلفه فلان الفلاني .. فده لاني حبيت اعمل نقد موضوعي للكتاب او للعمل الفني اللي باتكلم عنه

وياستي انا يشرفني انك تدبسيني في تاجين مره واحده .. وان شاء الله اول ما افضى شويه من الحاجات اللي في دماغي .. هاجاوب على تاجك

وكل سنه وانتي طيبه





سلاموووووووووووز

Soooo يقول...

قوس قزح

كل سنه وانتي طيبه يا احلى دوللي في الدنيا كلها

وربنا يارب يسعدك ويكرمك ويوفقك ويرضيكي دنيا وآخره يارب





سلاموووووووووووز

Soooo يقول...

د/اجدع بنوته

ده فعلا اللي قصدته يا ياسمين
اني اتكلم عن العمل ككل .. مش مجرد حدث وخلاص
لأني لما انا وانتي وكل الناس نتكلم بشكل موضوعي في اي عمل قريناه او شوفناه .. منفذين العمل الفني اكيد هيستفيدو من الفيد باك اللي بنعمله

وفعلا كنت بافكر اتكلم عن كزا كتاب من اللي قريتهم في الفتره اللي فاتت .. ومنهم اول وتاني عدد لمدونات مصريه للجيب .. بس اتزنقت في كام حاجه .. بمجرد ما هخلص منهم هاتكلم عن الحاجات دي

وكل سنه وانتي طيبه ياستي
وفين البيتي فور والباكساويت بتوعي؟؟؟؟





سلامووووووووووووز

Soooo يقول...

kareem

كل سنه وانت طيب ياريس

والحمدلله ان الكتاب عجبك

فين العيديه ياجرع انت؟؟؟؟






سلامووووووووووز

Soooo يقول...

سلوى

كل سنه وانتي طيبه
وربنا يارب يسعدك ويبسطك ويكرمك ويرضيكي دنيا وآخره




سلاموووووووووووز

Soooo يقول...

rainbow

لأ انا مش مصدق
اخيرا نورتي مدونتي وجيتي
طب والله انا عيدي عيدين بزيارتك دي

وربنا يارب يكرمك ويوفقك ويرضيكي دنيا وآخره





سلاموووووووووووز

Soooo يقول...

أسيرة الأقدار

لا والله
انتي جايه تحنسيني وتغيظيني يعني !!؟
ماشي
ماااااااااشي
----
الف هنا وشفا ياستي .. وكأني كلتهم بالظبط

وكل سنه وانتي طيبه وربنا يارب يسعدك ويكرمك ويوفقك ويرضيكي دنيا وآخره





سلامووووووووووووز

shaimaa samir يقول...

ايييييييه الموضوع الكبير ده كله


حصل خير

الموضوع ابسسسسسسسسسسسسسسسسط
من انى كنت بعلق فى الاول
وبعدين مبقتشى اعلق
او انى صادف قدرا انى علقت على حاجة ضايقتنى
وقدرا انى معلقاش على حاجة تانية كانت عادية
اييييييه المشكل
!!!!!!!!!!!!!!!!!

عموما تفهمت وجهة نظرك
ومستنية المسرحيات

شوف بس التوقيت بتاع السفر
انا شفتكم يوم 19
ورجعت انا يوم 24
ورمضان كان 1/9
الوقت ضيق جداااااااااااااا
ورمضان اضيق

انا ابسط من الحاجت دى كلها يا سو
عموما برضو خير

عيد سعيد
اى حاجة لتوفيق الحكيم بقراها
جزيت الخير