الخميس، ٤ رمضان ١٤٢٩ هـ

!!! بوب كورن ياعمو

.. اول امبارح لقيت (ياسمينا) بنت اخويا .. بتقولي
عمو عايزه الفلاش كي بتاعتك :
ياسمينا دي في جريد سكس .. وماحدش يفسرها غلط احسن اعضو .. جريد سكس يعني سنة ساته ابتدائي .. ايوان .. ساته ابتدائي عندنا في مدارس الحكومه
استغربت قوي هي عايزه الفلاش كي ليه اصلا .. واساسا فاهمه يعني ايه فلاش كي ولا مش فاهمه .. ولا يكونش اخويا قاللها تجبهالو وهي حفظتها كده وخلاص .. واستغرابي زاد لما لقيتها بتقولي انها عايزه الفلاش كي عشان في المدرسه عندها منزلين إكزام - يعني امتحان بس بالجريجي - على السايت بتاع المدرسه .. وهي عايزه تطبعه عشان الـ "ميس" هتشوفه معاهم بكره
!!!!!!!
سيبكم من ان المدرسه ليها سايت عالنت وانا عامل بلوج وباتنطط بيه على صحابي وكلهم بيعاملوني على إني مخلوق فضائي وشايفني راجل ملو هدومه .. وصاحب بلوج
وسيبكم من انها عندها "ميس" واحنا كان عندنا كائنات أسطوريه متنكرين في هيئة عساكر أمن دوله بيعلّمونا في المدارس الحكوميه
سيبكو من كل ده وركزو في انها عايزه تطبعه
!!! طب والله احنا ماعرفنا ميكانيكية الطباعة غير واحنا بنعمل السي في
ولما طبعناها بعتناها لكزا شركه ولا عبرونا .. قمنا كسلّنا نطبعها تاني

ادتلها الفلاش كي عشان تحط عليه الإكزام وبعدين انزل اطبعه في أي سنتر نواحينا عشان البرنتر بتاعتهم بوظتهالهم والحمدلله .. وده عشان هي برنتر ابيض واسود وانا حبيت اقلبها الوان .. ما استحملتش الحبر الازرق اتخضت ماتت .. ذنبي ايه ان قلبها ضعيف بقى
نزلت سينا - زي مانا باحب ادلعها - بنت اخويا من شقتهم اللي فوقينا .. وقالتلي
بليز ياعمو .. عايزه الإكزام دلوقتي عشان ألحق اعمل ريفيجن قبل الـ "ميس" ماتسألني عنه :

على فكره .. انا ماعرفتش كلمة (ريفيجن) دي غير وانا في ثانويه عامه لما استاذ شفيق بتاع الانجليزي كان بيقولهالنا .. الله يمسيه بالخير لو كان عايش .. ويفك حبسته لو كان اتقفش

نزلت ورحت لسنتر بتاع واحد صاحبي طبعت الإكزام .. وأول ما طبعه بصيت عليه عشان اعرف هو إكزام ايه بالظبط .. مافهمتش أي حاجه .. ندهت صاحبي قلتله انت فاهم حاجه ياد .. قاللي
وكتاب الله مافتحت كتاب ولا لحقت اعمل أي برشام :
الإكزام غريب قوي .. عباره عن دايرتين جواهم رموز بالجريجي .. ومكتوب السؤال بالجريجي .. والمفروض يتجاوب عليه بالجريجي برضك
!!!!! يا دين النبي .. اتاري الجريج دول بيعملو حاجات واحنا في الخزعبلات خالص

وانا راجع البيت ومستغرب ومندهش .. افتكرت موقف حصل من (ياسمينا) بنت اخويا وهي عندها اربع سنين .. امها راحت المستشفى تولد (حبيبه) وكل اللي في البيت راحو المستشفى وسابوهالي .. وكانت نايمه ساعة لما جاتني من شقتهم .. صحيت ولقيت نفسها عندنا في البيت استوعبت ان مامتها راحت تجيب النونو .. بعد ماقعدت اهزر معاها شوية .. لقيتها بتقولي
انا عايزة بوب كورن ياعمو :
استغفر الله العظيم .. ايه لزومه الاحراج ده يابنتي .. وإيه البوب كورن ده بالصلاتو عالنبي !؟ :
!! بوب كورن اللي هو بوب كرون :
يابنتي ايوه يعني ايه في الحياه .. خضار ولا لحوم .. ولا جبنه !؟؟؟ :
!!!! بوب كورن ياعمو :
يخرب بيت ابو عمو في الليله الطين دي .. يعني ايه يعني ؟؟؟؟ :
ستر ربنا .. اخويا اتصل بيطمني على النونو وبيطمني على مراته وبيسأل اذا كانت سينا صحيت ولا لسه نايمه .. قلتله
!! صحيت وقالت عايزه بوب كورن :
طب كويس .. بس ماتكترلهاش :
يا لا اله الا الله .. ده على اساس اني فاهم هو ايه البوب كورن ده اصلا !!!؟؟ :
ايه يابني .. بوب كورن .. يعني فيشار :
!!! لا ياشيخ .. هو بقى اسمه بوب كورن دلوقتي :
ندهت على البواب قلتله يجبلي كيس دره من اللي بتتعمل فيشار .. ويسأللي مراته لو بتعرف يتعمل ازاي
!!!! لقيت البواب اصلا اصلا اصلا .. مش عارف يعني ايه فيشار

جاب البواب كيس الدره .. والحمدلله لقيت الكيس مكتوب في ضهره طريقة الصنع .. يتحط معلقتين زيت في حله على النار .. واول ما يسخن الزيت .. يتحط عليهم شوية دره قد كوبايه .. ومعلقه ملح صغيره ممسوحه
نفذت الكلام بالظبط .. حطيت الحله والزيت والدره والملح .. وطلعت بره اتفرج عالتفلزيون مع سينا .. واحنا قاعدين بنتفرج .. نقوم نسمع صوت طاخ طيخ بوم طراك .. وطرقعه مبهدله الدنيا .. انا وسينا قمنا مخضوضين وجرينا عالصوت ده .. لقينا مصدر الصوت هو المطبخ .. وتحديدا .. حلة البوب كورن .. والبوب كورن عمال يطرقع ويفرقع وبينتشر والدنيا بوب كورن خالص .. جريت جبت بطانيه واتغطيت بيها كويس - عشان ما انصابش بأي شظيه من أي بوب كورنايه صديقه ضاله - ورحت متجه على منطقة حقل ألغام البوب كورن .. وطفيت النار بتاعة الحله .. ومازال الضرب مستمر ولا هدنه ولا سلام
بعد انتهاء الحرب البوب كورنيه .. وانتشار البوب كورن في أرجاء المطبخ .. اصبح استحاله ان ياسمينا تاكل بوب كورن .. لأن كل البوب كورن بقى مرمي على أرضية المطبخ وحبه في الاطباق اللي في المطبقيه .. وشوية بقو في الحوض وتحت الحوض وحاجه مرار
والسبب في كل ده .. ولاد اللذينا بتوع الدره .. نسيو يكتبو .. وتغطى الحله بإحكام

خدت سينا ونزلنا عالسوبر ماركت قلت تاخدلها كيس شيبسي ولا أي بطيخ بقى مش ناقصين وجع دماغ .. واحنا في السوبر ماركت لقيتها بتشاور على حاجه ناحية الشيبسي وبتقولي
!!! عمو .. بوب كورن اهو :
ابص الاقي في منتج نازل باسم بوب كورن .. عباره عن شوية فيشار محطوطين ومتغلفين جوا كيس زي الشيبسي .. قلتلها
!!!! طب ماتقولي من بدري بدل ما بهدلتي الدنيا .. يا ساااتر عليكي .. دايما متعبه كده ياشيخه :
!!! وجبتلها كيس وجبت لنفسي كيسين .. اه طبعا .. عمها واكبر منها .. وانا اللي دافع الحساب اصلا
----
افتكرت الموقف ده واستغربت قوي .. لما الجيل ده هايكبر وهتضطرو الظروف انه يتعامل مع المصالح الحكوميه والروتين اللي فيها .. هيعمل ايه .. لأنه بنفس القياس وكنسبة وتناسب .. الروتين اللي احنا بنعانية ده نتيجة القصور في التواصل التكنولوجي مابيننا كمواطنين .. وبين الحكومة نفسها

!!! ولا تكونش الدنيا ساعتها بقت حكومة الكترونيه
ولو حصل ده فعلا وحكومتنا المباركة بقت حكومة الكترونيه الكترونيه يعني .. وكل حاجه شغاله بزراير وتوماتيكي توماتيكي .. هل الموظفين هيبقو هم نفسهم بتوع .. فوت علينا بكره يا سيد !!!؟؟؟
!!! ولا هيقولو .. بليز .. تعالى تومورو يا مستر

سوووو

هناك ١٤٥ تعليقًا:

فاروق عادل يقول...

هييييييييية انا اول واحد.بالنسبة بة للموضوع ههههههههةهوانت عمرك ماشفت حد بيعمل بوبكورن قبل كدة فى حياتكوا يعنى ولااية.العيال الجديدة دول مشكلتهم

انا مش عارف اجمع دلوقت هبقى اجى كمان شوية بس صعبان عليا افوت فرصة اول تعليق

مهندس مصري بيحب مصر يقول...

بوب كورن و مس و إكزام
ربنا يستر على العربي
العيال دي حتتكلم عربي تاني إزاي بعد ما لسانهم إتعوج
يا خوفي
ربنا يكون في عونك

قوس قزح يقول...

يوووه يا سوو انا بقالك كده كتير مع الولاد و ساعات كمان بكون عارفة الكلمة بس لما بنطقوها بالامريكانى مش الجريجى اللى اتعلمناه فى المدرسة باخد وقت عقبال ما اوصل لها

اخر مرة بنتى بتلعب بالعرايس بتاعتها قال ايه واحدة منهم شافت لبس روش على التانية فبتقولها اووو كوووول

يظهر جالها ميسد على الموبايل :)

مدحت محمد يقول...

كل سنة وحضرتك طيب ورمضان كريم

kochia يقول...

والله كويس انك برده اتعرضت للثفافة الحديثة دي يمكن تنفعك بعدين

تحياتي

غير معرف يقول...

ههههههههههههه

لا بجد بما انى كنت من ابناء الميس و البوب كورن و البونبون و الشوكولا و التيشوز

فانا بقولكوا ان انا عن نفسى من ساعه ما دخلت الكليه و انا نسيت الكلام ده خالص

و بقيت عربى احسن من اى حد

لسانهم هيتفك لما يحتكوا بالحياه

دى انا عن نفسى

بس الجيل ده الله اعلم بيه

ربنا يستر

سلامات :)

TAFATEFO يقول...

جامده جداً

تموت من الضحك

ربنا يخليهالكوا

بس هل السبب ان الكبار بيزدادوا غباء (نو أوفينس).. والصغيرين بيزدادوا ذكاء .. ولا ده سببه ان الكبار بييجوا عليهم وقت بيعجزوا عن ملاحقة التطور الكنولوجي ووسائل الإعلام اللي بيكون الطفل بيكبر عقله معاها وييجي وقت يبقى في جوانب كتير الطفل أكثر خبره ودرايه بيها من المحيطين بيه.

أصلي ملاحظ ان في أطفال كتير جداً جداً عندها أقل من 3 سنين وتعرف تستخدم الكمبيوتر والانترنت مثلاً أحخسن بكتير جداً من والده أو والدته اللي عمرها أقل من 30 سنه.

كل عام وحضرتك بخير

ميرا ( وومن ) يقول...

طبعا مش لازم اقولك ان تهمة الهطل اللي اتلزقت بيا بسبب مدونتك خلاص بقت عادي في الشغل

ودة طبعا لاني عمالة اقرا واضحك ومحدش فاهم بضحك علي ايه

بالنوسبة لبنت اخوك فمش عاوزاك تقلق خالص انا مع mangolia في كلامها هي بس تدخل الجامعة بس متبقاش الجامعه الأمريكية وهي تتسستم مصري خالص

وبالنوسبة للروتين والكلام ده هايتعودوا برضوا بس انت ادعي انه يبقي إليكتروني

تحياتي

غير معرف يقول...

ههههههههههههههه

هو فيه ايه ضحكتنى جدا

تحياتى

Unknown يقول...

أجمل حاجة فى المصريين بالذات انهم بيعرفوا يعملوا كل حاجة ولكل مقام مقال
يعنى ممكن تلاقى واحد لابس أفندى وبيعمل بريزينتيشن بالجريجى فى المييتج وبعد المييتج يطلع على أول قهوة يشرب شيشة ويسمع عبد الباسط وبعدين يروح يصلى وهو خارج من المسجد ممكن يدى موعظة دينية مستشهداً بالقران والسنة لزميله اللى بيشرب سجاير (وطبعاً يقولله اتعلم من خيبتى قصدى من تجربتى)وأخيراً يمارس دور الحكيم مع أولاده فى البيت ويصحى تانى يوم الصبح يعيد الجكاية
همّا دول المصريين ياسيد .. ميتقلقش عليهم

غير معرف يقول...

نسيت تقول ان ياسمينا وحبيبة بيعرفو يعملوا احسن كمباية كمبتشينو يتشرب من ابو مكنة مش اليدوي

Unknown يقول...

يا راجل يا عجوز بيقولك كل وقت وله ادان
لاننا طلعنا لاقينا في حلقة انتقاليه رهيبه من التليفون اللى كنا بنستناه يدخل البيت بالسبع سنين للنت اللي بدخله في لحظه تكلم الدنيا
قادرين نتعايش مع الموقف
والولاد دول برضه هيطلعوا هيغيروا العالم حواليهم
مش هيفضل زي ما احنا جيناه والا احنا كمان كان زمنا مستنينين عدة التليفون اياها
مبقاش معانا موبايل وكمان بندخل بيه على النت
صباح البوب كورن يا بوب

اسكندراني اوي يقول...

يا سوووووووووووووو
اه ياني عيوني دمعت من كتر الضحك والله
ادي اخرة علام الاجانب

Z_Diva يقول...

looooooooooooooool

wallahy da giel a5er alata yabny
ana bnt arebty fe kg 1, mesh six'th grade 7ta zay bnt a5ok kda, we b2olha 3amla eh felmadrsa, t2ouly, ah ana shatra welmiss 3mrha mat2oly plz sit properly ?!!!!!!!!!!
atryha elbonaya bt3od frda dahrha b2a, wehya keda tb2a sittin properly :D

de knt btswarna bkmret elmobile mn wehya 3ndha talat sneen yabny, da gel gahabiza, we mesh 3yzhm y3rfo elflashaya, aw kma ysmonaha hom -elflash key-

we bt3aybo 3lya ana fela5er ekmny btklm gregy kol now and then :D

سمر الشافعى يقول...

بوب كورن ؟ ودا حقن ولا لبوس يعنى لا مؤاخذه هههههههههههه

مش عيب عليك تبقى عمو كدا كبير ومتعرفش البوب كورن ايه مخادتوش فباكالوريوس ولا ايه

الجيل الجديد دا هيجيبلنا هسهس فدماغنا عن قريب ان شاء الله ربنا يصبرك بس الحق عليكو مالها مدارس الحكومه زى الفل وبتجيب للعيال تخلف عقلى مستعصى مش يطلعو عيال فرافير وتقولك بوب كورن فين جيل الفول والطعميه

3ala asm masr يقول...

سبحان الله
وعلم الانسان مالم يعلم
بس أحب أطمنك أن الحكوميه الذكيه بتاعتنا عمرها ما هتبقا حكومه ألكترونيه ده لحد دلوقتى الدفاتر بتاعتهم بتتحرق
يعنى لسه بيكتبوا فى دفاتر

صوت من مصر يقول...

سوووووووووووووووو
والله وحشنى جدا وحشنى البلوج بتاعك وكلامك الى دمه خفيف جدا برضه ؟
عموما اسف على التاخير ؟

2ensan wnsan يقول...

فلاش كي .. جريد سكس .. ومدرسه ليها سايت ( مش وزاره ) وكمان ميس
فوازير رمضان دي ولا ايه


حلو اوي الروتين الجريجي دا

فوت علينا تومورو يا مستر ههههههههههه
طب دي هتبقى لايف ولا رساله مسجله وهتبقى كده برضه في همسة عتاب والايد الحديد من عندك يا ابراهيم ولا هتبقى على ام تي في ولا ايه النظام ..

Jack Sparrow يقول...

ربما قد يهمك زيارة مدونتي لست ادري تماما فلتقرر انت

صباح الصباح يقول...

اية يا بنى دة.. يعنى تكسر البيت عشان تعمل فيشار..

الا هو البوب كورن يعنى فيشار!!!!

يا سلام يا جدعان العلم نور وعلى راى المشا

العقل زينة فى البترينة
هههههههههههههههههههه

غير معرف يقول...

ضحكتني والله ياسوووووو.. ربنا يسعدك

وبالتوفيق في مشوار يوم السبت ان شاء الله وربنا يكتب الأجر

احتراماتي


شــــــــهد

د/اجدع بنوته يقول...

والله ضحكتنى وانا مليش نفس ياسووو

بس ازاى بتقولك ياعمووووو

بامانه انا لو مكانك استغلها

واخليها تقولى يااونكل

هععععععععععععع

ربنا يخليها ويخلى حبيبه

ويخلى كل اطفال مصر

وعؤبال اولادك باذن الله

رصيف نمره خمســــــه يقول...

ههههههههههههههه

دمك خفيف كالعادة ياعم سووووو

اعلق اقول ايه بس

ربنا يخليهالكوا شكلها دمها خفيف لعمها قصدى لاونكل سوووو

والله لايقة عليك ياراجل

سلاااااااام

ابن حـجـر الـعـسـقـلانـى يقول...


الله يمسيه بالخير لو كان عايش .. ويفك حبسته لو كان اتقفش

يخرب بيت ابو عمو في الليله الطين دي .. يعني ايه يعني ؟؟؟؟

لقيت البواب اصلا اصلا اصلا .. مش عارف يعني ايه فيشار




الجمل دى أنا افتكرتها و أنا باصلى المغرب .. حرام عليك يا راجل كنت هاتخرجنى من الصلاة من الضحك

على الله تجيلى و انا باصلى العشا و التراويح .. عشان أنا ليا ذكريات أليمة فى موضوع صلاة التراويح دة

بجد دماغك عالية يا برنززززز

ابن حـجـر الـعـسـقـلانـى يقول...

طب هو هايبقى اتقفش ليه طيب .... المفروض إنه راجل تربوى .. يعنى بتاع تعليم و أخلاق و كدة ... فليه بقى فيه إحتمال القفشان فى الموضوع


بجد مش عارف امنع نفسى من الضحك

Unknown يقول...

يا لهوىىىىىىىىىىىىىىىىى موتت موتت من الضحك الله يكرمك يااااااارب وكل سنة وانت طيب والسنة الجاية تكون حققت شوية احلام بالهبل.......
انا باحقد عليكم ايييييييييييون باحقد طبعا عشان انتوا كل شوية تتقابلوا وتتبرعوا بالدم وتروحوا مستشفيات واحنا هنا فى اسكندرية ولا كاننا فى الاسكا ولا الربع الخالى دة قرف والله............على فكرة عندنا مستشفيات فى اسكندرية عادى وعندنا حسنى ممكن نفطر فيه بس ابقوا تعالوا واحنا نكرمكوا اخر كرم

Unknown يقول...

كل سنة و أنت طيب ربنا يعود عليك بالخير و اليمن و البركات
فكرة جميلة ربنا يجعلها في ميزان حسناتكوا
هو يوم ١٣ ده حيبقي صعب أوي بالنسبة ليا بس ححاول أجي أن شاد الله مع زني واخدة أذن بالعافية ليوم الزفطار بتاعي بس ححاول أقدم ألتماس ليومين بما زن ده يوم حكسب فيه ثواب و لو الموضوع بريدي وحدي و الله كنت خليت الفطارين في يوم واحد زي ما أقترحت عليا قوس قزح

Unknown يقول...

تسمحلي بالمساحة الأعلانية دي ؟
---------
لكل أحبائي المدونين أرجوا زيارتي للتعرف علي تفاصيل أفطار جماعي

محمد فاروق الشاذلى يقول...

صديقى أحمد
منذ ثلاث أيام وأنا متفرغ لقراءة مذكرات طفل تخين وهى للحق متميزة جداً ومعجب ببناء القصة فيها.
بخصوص يوم السبت فعذرة ياصديقى مضطر أميل عليك لأنى مش هاقدر آجى بس هاكلمك ونتقابل فى أى مكان قريب ليك وتنقل عنى مشاركتى إذا سمحت.
حوار البوب كورن ده وما شابه فانت ممكن تروح لأى بقال نص ساعة كده وهو يقولك الجديد اللى نزل فى السوق إيه بدل الإحراج ده.

تحياتى

Lyssandra يقول...

مش ممكن بجد

أنا مش عارفة أمنع نفسي من الضحك

بجد مواقف لذيذه جدا
وبتحكيها بطريقة أظرف كتير

ربنا يديم عليك القدرة علي صنع ابتسامة و قوة الاضحاك


--------

برضه مازلت مصرة علي أمر الصور

مش المفروض تضيف صورة البوب كورن ده

ولا علشان عرفته انت يعني ؟؟

وكمان صورة من الاكزام الجريجي ده يمكن حد يعرف يحل الفزورة

---------------------

بالنسبة لزيارة المستشفي

أنا حاسه اني مقطوعه عن العالم تماما

بجد
مش عارفه اشارك في حاجه زي دي
رغم اني بفكر فيها وفي تفاصيلها كتير أوي
بس مش معايا حد يشجعني ولا مكان أعرف أزوره

بس يمكن قريب أقدر أقوم بحاجة كويسه

لحد دلوقتي الحمد لله النية متوفرة
يارب أقدر أنفّذ قريب ان شاء الله

بنا يكرمكوا كلكم
ويكتبلك خير قد اللي في قلوبكم وأكتر


---------

تحياتي

Lyssandra

Z_Diva يقول...

bardo elnadla ftar we 5er we lka2at mn 3'ery

3aaaaaaaaaaaaaaaaaaaaaaaaaaa

maha zein يقول...

بقولك ايه بغض النظر عن البوب كورن والبواب وسينا
انت يا عم الحج
يعني جبت لنفسك كيسين وحركات
مفيش حاجة لموها يعني
هه
لا بوب كورن ولا بوب شقة
هه
ينفع كده
لا لا في زعل كبير هيحصل
وعشانه وبسببه هتكون انت المسؤل عن انك تعزمني يومها علي الفطار عند الحاتي عشان انا علي الجنت يا اخويا

Unknown يقول...

سووووووو
هقرأ الموضوع وارجع لك
بس انا عارفة ان المطعم بتاع الافطار
اقتراحك فعشان نكون على نور
لو الاكل طلع زى الكشرى الطاير بتاع الصباغ انت اللى هتحاسب
ومش بس كدة ذنبى هيبقى فى رقبتك لانى مش هاكل :( وهعيط وهبدل لكم الدنيا

Unknown يقول...

سوووو
انت كل شوية تضحكنى كدة
طبعا حكومتنا هى هى طول العمر والى فناء العالم وبعده كمان ممكن هى تستمر وتقول لاع ما تفوت ولا تتعب نفسك كل شئ مقضى بعون الله
اما عن البوب كورن لازم يكون عندك ثقافة شرائية اما تقعد امام الاعلانات طول اليوم وعلى الاقل تشوف لك كام بنوتة من اللى يشلوا
او انك تفتح سوبر ماركيت
اهو مشروع ينفع فى الايام البوب كورن دى ههههههههه

بس بذمتك ييعنى بقى تعرف تطبخ بط
ووز وفراخ ويمام وحمام ومش عارف تعمل فشار ؟؟؟
قصرت رقبتنا ادام الجيل القادم

Soooo يقول...

blackghost

خبر ايه ياعم الحاج
يعني انت لاعرفت تكتبلي تعليق افهم منه ايتها حاجه وقلت هاجي اعلق بروقان ولا جيت من ساعتها

اسحب منك اول تعليق يعني
ها

ياسيدي بجد مش عارف اقولك ايه .. بس صدقني انا ولا بيفرق معايا تعليق اول من تعليق تاني من تعليق مليون .. وكفاية انه شرفتني بتعليقك ودي عندي كبيره قوي




سلامووووووووووز

Soooo يقول...

مهندس مصري

والله عندك حق
انا من الاول خالص قلت لاخويا يسلمني بناته وانا اعلمهم بروقان وشغل على ميه بيضا
بص لي من فوق لتحت ومشي
تقريبا نضارته كانت مدغششه فماسمعنيش كويس




سلامووووووووووووز

Soooo يقول...

قوس قزح

احنا لازم نقف وقفه احتجاجيه من اللي هي كده
ولادنا بيروحو من بين ايدينا وبيتكلمو بالسيم مابينهم وبين بعض
مش بعيد كمان كام يوم الاقي سينا جايه البيت وهي بتقولي هاي أونكل
يالهووووي
ده الدم ساعتها هايبقى للركب



سلاموووووووووووووز

Soooo يقول...

مدحت محمد

وكل سنه وانت بصحه وسلامه يا مدحت وربنا يحققلك كل اللي بتتمناه يارب
رمضان كريم




سلامووووووووووووز

Soooo يقول...

kochia

انا مش ضد الثقافه في كونها ثقافه
انما مش تبقى الاساس
فاهمه حاجه؟؟؟




سلامووووووووز

Soooo يقول...

MaGn0liA...

الله يطمنك ياشيخه
عشان كنت خايف قوي لا الاقيهم لما يكبرو ان شاء الله .. يتكلمو معايا بالجريجي .. ساعتها هحتاس وانا بادور على الترجمه



سلاموووووووووووز

Soooo يقول...

TAFATEFO

!!! نو أوفينس
مش الاوفينس ده اللي هو المكتب بس بالجريجي برضك؟؟
لا صحيح .. التاني اسمه ديفينس

المشكله يا مصطفى مش في غباء الكبار ولا ذكاء الصغار
طب ماحنا واحنا عيال كان في فرق بينا وبين اهالينا وبيوضح ده قوي في تعاملتنا مع التكنولوجيا بالنسبه لأهالينا
لكن لو لاحظت هتلاقي الحكومه نفسها مش بتتقدم وبيتعاملو زي ما اهالينا بيتعاملو
وبالتالي لما احنا كجيل كبير هنمسك الاماكن دي هيبقى برضه في هوة ثقافيه وتعامليه واجتماعيه مابيننا وبين الجيل ده

فاهم قصدي




سلامووووووووووز

Soooo يقول...

وومن

الله يطمنك ياشيخه
بس انا ايش ضمنني انهم مايدخلوش جامعة أمريكيه
اقولك
انا هبقى اخدهم في الاجازة وافسحهم بمعرفتي
يالهووووي
ده هيشوفو اللي عمرهم ماشافوه

ملحوظه
سلامتك من الهطل ياستي .. ولو حد اتهمك بالاتهام الباطل ده .. قوليلو تعالى اقرى كلام المجنون ده وانت هتعرف انا باضحك ليه




سلاموووووووووووز

Soooo يقول...

bos bos

ياستي اضحكي براحتك
اضحكي على قد ماتقدري
الضحك ده سلاح لو عرفنا قيمته .. عمرنا ماهنسيبه




سلامووووووووووز

Soooo يقول...

ـ-ـ- أحمد عبد العدل-ـ-ـ

همممم
افهم من كلامك اني اخد بنات اخويا ماتش الاهلي والزمالك الجاي في مدرجات الدرجة التالته .. وهم هيشجعو عصام الحضري كويس؟؟؟؟




سلامووووووووووز

Soooo يقول...

هشام توفيق

تصدق ان تعليقك ده حسسني اني كبرت بجد؟؟
اقولك ليه
تخيل بقى يا اتش ان حبيبة اللي عملتلنا الكابتشينو عند اخويا في مارينا .. هي نفسها اللي كانت بتتولد في اليوم ده

كبرنا والله يا اتش




سلاموووووووووووز

Soooo يقول...

لماضة

عارفه يالماضه
انا مش ضد ان كل وقت وليه ادان
ولا ضد التكنولوجيا
بس زمان كانو بيعلمونا في المدارس ان في سنة الفين كل حاجه هتبقى بالروبوت .. قوليلي ايه اللي اتغير في مصر من ساعة ما اتولدت سنة سبعه وسبعين .. ودلوقتي
ولا اي حاجه
ده حتى الاتوبيس المكيف اللي كان زي الفل .. دلوقتي ولا هو مكيف ولا هو زي الفل .. مجرد اتوبيس عادي .. بس باتنين جنيه

فهمتي قصدي؟؟؟؟؟




سلامووووووووووز

Soooo يقول...

اسكندراني اوي

باشا
ياباشا اضحك زي ماتحب
ده بيقولك ان العين لما بتدمع من الضحك .. بتبعت اشارات للمخ تقولو فل عليك
فل عليك بقى




سلاموووووووووز

Soooo يقول...

Z_Diva

sit properly ?!!!!!!!!!!
وكتاب الله لو استاذ شفيق قالي الكلمة دي في الفصل كانت تقوم معارك

عارفه يا ام زعبولا
المشكله مش في تطعيم الكلام بتاع الجيل ده بالجريجي .. ولا في انهم يتقدمو تكنولوجيا ويعرفو الفلاش كي
المشكله في ان الدوله كنظام قائم على التعاملات مع المواطنين .. لغاية دلوقتي عايش بعقليه سنة خمسين .. الموظف ابو كرش واللي كمامه حاطط عليها بتاعة سودا وشغال في الارشيف .. يعني استحاله ان جيل بنت اخويا لما يكبرو يعرفو يتعاملو مع الحكومه
وهنرجع لنفس مشكلتنا دلوقتي

وبعدين انتي بتقري علينا ليه في حوار المشتشفى
اهو مافيش حد ولا اتصل بي ولا حد فكر يبعت جوز جنيهات عمي
الناس بقت مقرطه في القرش بطريقه وحشه قوي
دي هي دي الفلوس اللي هتفضلنا وان شاء الله هناخدها في الجنه




سلامووووووووووووز

Hany Rizk يقول...

لو سمحت يا عمو انا عاوز بوب كورن علشان مزنوق فيه قوى يعنى اصله بيعالج حالة الاستبحس اللى عندى ...
كل سنة وانت طيب بمناسبة رمضان وكل فطر وانت بخير وكل اضحى وانت عارقان فى اللحمة وكل راس سنة وانت طيب وعقبال السنة اللى جاية وعيد ميلاد سعيد وفلانتين فظيع ومولد نبوى شريف عليك وعلى العيلة وكدة مالكش عندى حاجة طول السنة اللى جاية باذن الله

غير معرف يقول...

اولا كل سنه وانت طيب يا سوووو

وحلوة بليز تعالى تومورو يا مستر دى

ربنا معاهم ان شاء الله ويمكن ربنا يحليلهم ايامهم وتبقى حياتهم احسن

تقبل تحياتى

Rehab Mostafa يقول...

انا وقعت من الضحك :))
رغم اني قريت البوب كورن دي قبل كده بس المره دي بجد مشكله
أبناء الجيل التالت بقى والانترنت
احنا ماعيشناش طفولتنا صح ... أخرنا واحنا اطفال كده كنا بنقول حتة الحديده دي بتطلع الصوت منيين .... بقى يا سوووو عايز تقلب البرينتر ألوان ياراجل حرام عليك :)) عملت زي اللي شغل ماكنه بتدخل على 110 فولت شغلها على 220 علشان تنتج الضعف

Bipolar-Girl يقول...

:)

انت تلحق تاخد كورس جريجي وابقه ابعتلي الملازم اصورها

كيكى عوووووو يقول...

ههههههههههههههههههههههههه
ههههههههههههههههههههههههه
امال لو كانت قالتلك
كورن فالكس كنت عملت اية ياسووووو
؟
كدة تفضحنا قدام الاجانب
ههههههههههههههههههههههه
والجريجى جااامد اوووووووووى
بس اهم حاجة نسيت تقولها
هى عملت اية فى الاكزام
؟
هااااااااااااااااا
........................
بخصوص فعل الخير ربنا ياسوووووووو
يجزيكى ويرضى عليك الهم ما اميييييين
عووووووووووووووووووووووووووووووووو

Soooo يقول...

سمر الشافعى

والله ياسمر ياختي ماخدناش البوب كورن في البكالريوس
يعني انا لو خدت هنكر ليه
وبعدين انا ساعتها اصلا اصلا ماكنتش في بكالريوس
كنت في سنه تالته ثانوي تاني .. مش ساقط والله .. بس باحسن مجموع .. اصل انا آخر جيل النظام القديم

وصدقيني انا قلت لاخويا يسبهملي وانا اعلمهم كل خبراتي في الحياه .. لكن هو بصلي من فوق لتحت وسابني ومشي .. تقريبا نضارته فيها حاجه عشان كده ماسمعنيش

وكل سنه وانتي طيبه .. فين الفانوس بتاعي صحيح؟؟؟؟



سلاموووووووووووز

Soooo يقول...

3ala asm masr

ماهو ده اللي انا باتكلم فيه بقى
اننا زمان كنا بنحلم بعصر التكنولوجيا وبتاع .. وبعدين اتفاجأنا ان الدفاتر بتتحرق
وبالقياس .. لما الجيل بتاع البوب كورن ده يوصل للمرحلة العمريه دي .. مش هيكتبو في دفاتر .. لأ .. دول هيكتبو في نوت بوك .. لزوم التكنولوجيا




سلامووووووووووز

Soooo يقول...

wa7ed 2ensan wnsan

رساله مسجله ايه بس ياعبده
انت جاي تهرج
طب ده انا مره اتصلت بوزارة الاتصالات .. متخيل يعني ايه وزارة الاتصالات .. لقيت التليفون مشغول
يابا الاجهزة الحكوميه دي شغاله بخط تليفون واحد وتلاقي الموظف ولا الموظفه بيتصل بالمسابقات بتاعة زيرو تتسعميه





سلاموووووووووووووز

Soooo يقول...

Jack Sparrow

خبر ايه ياد انت
انت ياد ياميدو تغيب تغيب وترجعلنا بشخصيه اسطوريه

وبعدين يعني ولا قلتلي كل سنه وانت طيب ولا قلت ايه رأيك في الموضوع .. جيت رمتلي لينكايتك كده وبخ
بس لما اشوفك




سلاموووووووووووز

Soooo يقول...

صباح الصباح

تخيل بقى ان الفيشار هو بنفس ذات شخصية البوب كورن
زي الشيخ بتاع الجامع اللي بيطلع رئيس العصابه في آخر الفيلم

ملحوظه
اسمها .. العقل زينه في البنزينه .. ده بعد ارتفاع اسعار الوقود




سلامووووووووووووز

Soooo يقول...

شهد

اختي حبيبتي اللي انا مقصر في حقها بطريقه ابشع من البشاعه
حقك علي يا شهد
كل سنه وانتي طيبه وربنا يارب يسعدك ويطمنك ويفرح قلبك ويرضيكي دنيا وآخره يارب




سلاموووووووووز

Soooo يقول...

د/اجدع بنوته

ياستي اضحكي
احنا هينوبنا ايه من الهم والغم
اضحكي وقولي يارب

وبعدين انتي بتقولي فيها .. سينا كانت فعلا هتقولي يا أونكل .. بس ابوها مارضيش .. تقريبا استشعر اني هتحصلي صدمه حضاريه .. خصوصا ان امي - الله يرحمها - ساعتها كانت بتناديني بتقولي ياض .. تخيلي انتي بقى .. في ثانيه ابقى ياض والثانيه اللي بعدها أونكل
سخن وساقع يجيب تربنه في المخ




سلاموووووووووووز

Soooo يقول...

رصيف نمره خمســــــه

ياسلام يا ايمي
طب انتي ترضيهالي اني ابقى أونكل بعد ما شعري وقع وكرشي تضخم ونظري اتسحب
انتي ترضيهالي
ده انا الحمدلله راجل محترم وباصلي ياشيخه




سلاموووووووووووز

Soooo يقول...

ابن حـجـر الـعـسـقـلانـى

تصدق يابو العساعيس انك الوحيد اللي علق معاه الافيه بتاع استاذ شفيق

هقولك ليه قلت الافيه ده
عادة القفشه او المفارقه الكوميديه بتبقى احلى لما بتكون أبعد ماتكون عن عقل القاريء

زي مثلا لما تكون في الحمام وتطلع وحد يقولك شفيتم .. تروح انت رادد عليه وقايل .. بعوده الايام
ايه اللي جاب القلعه جنب البحر

الكتابه الساخره بتكون نوعين .. كتابه تدعو الى الابتسام فقط .. زي معظم حاجات بلال فضل وعمر طاهر ويوسف معاطي .. وكتابه ساخره بتخليك تضحك وصوت ضحكتك يعلى ويجلجل .. زي محمود السعدني واحمد رجب

طبعا انا مش باقارن نفسي بأي حد من دول .. انا بس حبيت اوضحلك اني باميل للنوع التاني من الكتابه الساخره .. اللي تخلي صوت ضحكة القاريء يعلي ويجلجل

وبعدين انت هتلبسني نصيبه وتقولي صلاة العشا والتراويح .. انت اصلا بتلعب بلاي استيشن وانت بتصلي .. وانت اللي قلت كده بنفسك




سلامووووووووووووز

Soooo يقول...

enjy

ياستي ربنا يكرمك ويسعدك على دعوتك الحلوة دي

وبخصوص انك في اسكندريه ومش بتعملو انشطه خيريه ولا لقاءات تدوينيه .. مين قال كده
احنا اللي من القاهرة رحنا اسكندريه في تجمعين من فتره
شوفي مين من المدونين من اسكندريه وابتدو تتفاعلو وتعملو حاجه
اقولك
روحي للماضه ولحنين القلب ..الاتنين دول اخواتي في سنكريه
قوليلهم انك من طرف سوووو وانك عايزه تتجمعو وتفكرو في حاجه تعملوها
صدقيني متعة التجمعات دي مش في التعارف وبس .. لأ .. متعتها ان الواحد بيحس ان الصحبه نفسها بتفكر في نفس اللي هو بيفكر فيه
وعندها نفس الهموم اياها

جربي ومش هتخسري
وأوعدك ياستي .. أول نشاط خيري هتعملوه .. هاقول لكل المدونين من كل المحافظات وهنيجي نقف جنبكم وينوبنا من الثواب جانب ان شاء الله





سلاموووووووووووز

Soooo يقول...

عاليا حليم

حاولي ياعاليا تيجي
صدقيني هيبقى يوم حلو ان شاء الله

وبعدين ده اسمه كلام؟؟؟
تحطي اعلان من غير ما تشوفيني بأي حاجه
لألألأ
انا لي عندك عزومة على نيسكافيه بلاك في الساقيه ان شاء الله بعد الفطار

ملحوظه
ياستي خدي المدونه كلها لو تحبي




سلامووووووووووووز

Soooo يقول...

قلب مصرى

يا استاذي ده انا لي الشرف ان شخابيط المذكرات عجبتك

وبخصوص انك مش هتقدر تيجي يوم السبت ربنا يكون في عونك .. ولو اني كان نفسي تيجي وتجيب عروستي معاك
ولو تحب نتقابل في اي وقت وأي مكان انا تحت امرك .. ده يبقى لي الشرف والله

وكل سنه وانت طيب





سلامووووووووووووووز

Soooo يقول...

lyssandra

ياستي اضحكي براحتك وماتمنعيش الضحك

وبعدين احط صورة البوب كرون ازاي يابنتي وفي ناس ممكن تدخل ساعة الصيام تشوف البوب كورن تجوع

ولا ليها لازمة برضه اني احط الامتحان الجريجي .. عايزياني اعقد الناس زي مانا اتعقدت يعني؟؟؟

وبخصوص انك مش بتتجمعي بمدونين دمياط ولا بتعملو حاجه لله مع بعض او تتعرفو ببعض .. عليكي وعلى هند او (على اسم مصر) واتفقي معاها انكم تتجمعو وتشوفو مدونين اسكندريه وتعملو حاجه مع بعض لله

وليكي ياستي ان انتو بمجرد ماتعملو اي حاجه هتلاقيني منزل موضوع مخصوص عشان اقول لكل الناس يجو معاكم .. وان شاء الله هاكون أول واحد يشارككم
بس المهم انكم تلحقو تعملو حاجه في رمضان

وكل سنه وانتي طيبه

ملحوظه
بنات اخويا قالو عايزين فانوس التوك توك الجديد



سلاموووووووووووز

Soooo يقول...

maha zein

اما انك غريبه قوي يا مها
طب دي بنت اخويا وصغيره وانا قلت ادلعها شويه .. انتي بقى ايه حجتك
هه

وبعدين لو انتي عالجنت .. انا بعت الجنت من زمان
بس لا تقلقي .. احنا هناكل ونملى بطننا والحياه هتبقى فل .. واعتقد انهم عندهم أطباق كتير ممكن تعرفي تغسليها بحق الاكل اللي كلتيه .. او اللي كلناه

منتظرك واوعي ماتيجيش




سلامووووووووووز

Soooo يقول...

نهر الحب

ياعيب الشوم
يابنتي ده انا راجل بتاع أكل اصلا
طب في اعتقادك ايه اللي خلاني ماكلتش في اليوم بتاع البؤجه معاكم في محل الكشري
اني عارف انه مش حلو .. أو مش حلو من وجهة نظر كرشي
بس ماحبيتش اقولكم عشان ماتقولوش اني باتحكم فيكم ولا حاجه خصوصا وانكم كنتو رحتو وقعدتو واترستقتو خلاص

وياستي لو حاتي ابو خالد ماعجبكيش .. ليكي اللي انتي عايزاه

ملحوظه
لما عملت البوب كورن لياسمينا بنت اخويا كنت ساعتها فعليا مافهمش اي حاجه في شغل المطبخ .. لكن بعد وفاة والدتي الله يرحمها من سنه وكام شهر تقريبا .. ابتديت اتعامل في المطبخ .. وعلى رأي المثل .. كتر البكا يعلم النواح

كل سنه وانتي طيبه ومنتظر انك تنورينا انتي واختك وكل اهل بورسعيد



سلامووووووووووز

Soooo يقول...

brokenheart

خبر ايه ياهاني
انت مش اتجوزت ياعم
قول لعروستك تعمللك صينية بوب كورن بالباشميل

وبعدين هو انت نويت تهاجر خلاص .. باعتلي كل التحيات والمباركات بتوع السنه كلها وخالع ولا ايه؟؟؟

عموما ياسيدي .. كل سنه وانت طيب وربنا يارب يسعدك ويهيئلك الخير من عنده ويرضيك دنيا وآخره
وياريت تيجي يوم السبت في حوار مستشفى ابو الريش




سلاموووووووووووز

Soooo يقول...

غير معرف

وكل سنه وحضرتك طيب

ويارب فعلا تكون أيامهم احلى من أيامنا .. يارب



سلامووووووووووز

Soooo يقول...

Rehab Mostafa

ياستي اضحكي براحتك
وبعدين جيل تالت ايه .. ده جيل الفيمتو ثانيه بينما احنا جيل فيمتو اللي بيتشرب

وبعدين خدي هنا
بتتريقي علي وبتشبهيني بواحد جاهل حب يضاعف الانتاج قام حط مكنه بتشتغل بميه وعشره فولت في فيشه ميتين وعشرين فولت
طب ده جاهل
لو كان حط سلك واحد بس من السلكين بتوع كل مكنه من مكنتين بيشتغلو بميه وعشره فولت .. في فرده من الفيشه .. والفرده التانيه من سلك المكنتين كان لزقهم في بعض .. كان ساعتها هيعمل انتاجيه مكن بربعميه واربعين فولت .. بس هنقول ايه بقى

ربنا يديم علينا نعمة العقل الراجح وحسن التصرف




سلاموووووووووووز

Soooo يقول...

Bipolar-Girl

اهلا بيكي ياستي في اول زياره ليكي لمدونتي المتواضعه وباتمنى انك تعتبريها زي مدونتك تمام وتشرفيني بتعليقاتك دايما

وحاضر ياستي .. هاخد كورس جريجي محادثه وكورس جيجي فوكابلري وابقى اجي اديلك كورس عربي .. بالجريجي




سلاموووووووووز

Soooo يقول...

كيكى

طب والله العظيم ليكي وحشه

وبعدين انا اعرف الكورن فيليكس كويس
طب ده انا يوميا باشربلي شوبين كورن فيلكس سكر بره
مش جاهل يعني

-----
يجزيكى ويرضى عليك الهم ما اميييييين
-----
الصح انك تقولي
يجازيك ويرضا عليك اللهم آمين

وبعدين ماتيجي يابنتي .. طب ده انا متفائل خير وانه هيكون يوم حلو قوي ان شاء الله
حاولي كده ومش هتخسري حاجه




سلاموووووووووووووز

Soooo يقول...

مقاطعـــــــــــــون

بالرغم من اني مؤمن بحرية تعبير اي انسان عن اللي بيفكر فيه والمؤمن بيه

لكني مش مؤمن ان اي حد يدخل عندي يحط اعلان من غير مايقول رأيه في اللي باكتبه ومن غير مايستأذني

تعليقك هايتحذف





سلامووووووووووووز

مقاطعـــــــــــــون يقول...

سوو
انا بعتذر بشده انا قرات الموضوع ومتابعه اصلا مواضيعك من الاول لكن لانى بحاول انشر الحمله سريعا وبعدى على مدونات كتير فلم اخبرك رائى فى الموضوع حبيت اخليه فى تعليق منفصل عن هذه الدعوه
ارجو قبول اعتذارى ولم اقصد التقليل بشان ما كتبت
وارجو انضمامك معى لتلك الحمله ان لم يكن من اجل العرب فلاجل صحتنا جميعا الكولا اخطر من التدخين على الصحه وسيتم نشر ان شاء الله شبه تقرير عما اقول
اكررها لك من جديد راجيه انضمامك لنا ومتاسفه اذا كنت ازعجتك
وجزاك الله كل خير

مقاطعـــــــــــــون يقول...

انت يا اخ سوو متنساش الكنتاكى يا عم الحج انا جايه ان شاء الله
وحاطط رقم لفلفونك كدا للاجئين طبعا ما انت فتحت ع الرابع
يا سوو يا اخويا اللى يفرط فى رقم تليفونه عمره ما تنام عيونه....
وايه المصطلحات العجيبه دى بعدين البوب كورن دا شىء مضر بالصحه انا سمعت انه بيجيب استبحس فى الباكالاه
امال تعمل ايه لو اخوك الصغير جه وراك جواب غرامى مكتوب فيه كلام يحمر الوش ...ملحوظه صغير دى مش جامعه لالا متفهمنيش غلط صغير دا فى تالته ابتدائى
وجاى شايل الهم ويقولى i love yasmeen
قولتله ما علينا قالى المشكله لو قالتلى تعالى نتجوز عرفى ارد عليها اقولها ايه !!؟؟
هههههههه والنبى ارد عليه انا اقوله ايه..؟؟
عارف زمان كنت باخد مصروفى ربع جنيه بس مش كل يوم ياااااااااااه كنت بجيب كيسين كاراتيه وكيس فشار وبشلن لبان واعين شلن لتانى يوم احطه على الربع الجديد واجيب ازازه حاجه ساقعه
اخواتى بياخدوا مصروفهم كل واحد عشره جنيه تطور وغلاء ويجيبوا مسميات عجيبه وانا طبعا مش متعوده ان حد ياخد مصروفه عشره جنيه فبشد فى شعرى انا وبابا وامهم
اما يرجعوا يقولوا ماكلناش كويس
طبعا كويس ان ولاد اخواتك بيفهموا انجليزى التعليم فى سته اكتوبر لا تفهم فيه عربى ولا انجليزى غسيل نافوخ
كفايه كدا دوشتك ايييييييييييه دنيا
كل سنه وانت سوو

Ahmed Fahmy يقول...

انا هعمل اعلان عندي و يا رب تبقوا اكتر المرة دي و تقدروا تسعدوا الاطفال و يبقي تجمع جميل بعد العمل الخّير دة

انت مستغرب من بوب كوووورن
ده الجيل اللي طالع قاطع علي كل حاجة ده ربنا يستر منه
احنا اللي غلابة
هههههههههههه

روووووووومانسي

مقاطعـــــــــــــون يقول...

على فكره احفظ السر كدا السر خرج من اتنين عموما انا عارفه انه فى ايد امينه

مقاطعـــــــــــــون يقول...

هههه اقصد فى ايد سوو لا مؤاخذه

غير معرف يقول...

أحمد
أولا ربنا يجازيكم كل خير يا رب
أنا هحااااااول أساعد بأي حاجة لكن في ملحوظة بسيطة
أنا كنت بروح دار أيتام وباخد معايا حلويات و كده

فالمشرفات طلبوا مني ما أجيبش الحاجات دي عشان الأطفال ما تتعودش عليها فيطلبوها و يبقى يا عيني صعب عليهم تلبية الطلب ده
: (((((

مش عارفة بس...الله يعينهم و يقويكم يا رب العالمين
تحياتي

فاروق عادل يقول...

اية ياعم احمد انت زعلت ولا اية اللى حصل بعد كدة حكاية الدويقة ومكنش ليا نفس اضحك اطلاقا علشان كدة مرجعتش

وعلى فكرة انا من الجيلل الجديد وياعم كلمة بوب كورن دى كلمة بسيطة امال لو دخلت فى الغويط


متزعلش هة

ojg يقول...

مش هقدر أخد منك بوب كورن ماتعزمش ماليش في الحراق :))
والله يا أحمد أنا من زمان قوي نفسي ولادي يبقوا كويسين قوي في الجريجي والفرنسهاوي كمان بس أهم من أي لغة انهم يكونوا كويسين أوي في العربي
أنا عارفة ولادي هيذاكروا لحد ما يجيلهم حول :)
بس في حاجات كتير قوي أهم من اللغات زي مانت قلت
لا هتعلمهلم مدارس ولا مستر شفيق ;)
ربنا يصلح حالهم يارب ويرزقني بيهم الأول :))
-------------
بالنسبة ليوم السبت
أنا مبسوطة قوي قوي انكو هتعملوا حاجه زي كده
بس خايفة أجي ومايكونش ليا مكان :(
خاصة اني عمري ما شاركتكوا في حاجه زي كده (وش محتار قوي)

أنا آسفة لو هيكون ليا ملحوظة صغيرة
bannoura بالنسبة لتعليقها
فعلا الأطفال دول بيتعودوا وبيبقى كسر قلبهم صعب قوي
لما بيستنوا اننا نروح تاني ومابنروحش
أكيد مش معنى كده اننا مانروحش ولا نديهم حاجه يا bannoura
الأحسن اننا ننوي لله اننا مش هنقطع العادة دي وربنا هيقدرنا نرسم بسمة على وشوشهم الصغيرة دي وماتتشالش أبدا
ولا إيه؟؟
ربنا يصلح حالنا وحالك يا أحمد
ويجعله في ميزان حسناتك
وكل سنة وإنت طيب

Doba يقول...

بيعجبنى جدا لما بتكتب فى موضوعات متفرعة كده

عجبنى قوى بتاع دكر البط ووقعت على روحى من الضحك من البوب كورن

كل لما افتكر السبع ساعات ونص بتوع دكر البط بقع على روحى من الضحك

ودلوقتى البوب كورن وحركاته
وإلا المعركة البوب كورنية والشظايا

ربنا يكرمك بحق الضحكة الحلوة الللى بترسمها للكل
===============
بجد
بجد

ربنا يباركلكم على عملكم الصالح
ويتقبل منكم وسلامى للجميع

هبة

Unknown يقول...

جد فطست على نفسى من الضحك وبجد اللع عليك يا أحلى سووو فى وحلو كمان موضوع المستشفى ده ويا رب يكون فى ميزان حسناتكم ومن هنا ليوم السبت يا رب اعرف اخد اجازة لانى محتاج بجد اغير جو واعمل حاجة كويسة واتعرف على الناس كلها
تحياتى ودمت مبدعا
ومتنساش تجيبلى شوية بوب كورن من اللى بيطرقع

خالد كامل يقول...

انا ازاى مدخلتش عندك قبل كدة
انت مشكلة و ربنا

انا برضه أخويا الصغير لسانه اتلوح كدة يا عينى

مش عارف أعالجه ازاى .. خصوصاً انه فى مدرسة حكومى

ربنا يستر

أسيرة الأقدار يقول...

يااااه .. انا بقالى كتير اوى معدتش هنا
بس حظى حلو جيت على البوب كورن
المرة الجاية ابئا اعمل حسابى فى كيس معاكم بئا P:
..
هو اللى بئا واضح جدا دلوقتى ان الاطفال مبقوش زى الاطفال اللى احنا اتعودنا عليهم
ده حتى الكرتون اللى بيتفرجوا عليه بئا بيتكلم عن التكنولوجيا والفضاء وناقص يكلموهم عن الذرة
مش زى ايامنا كبيرنا كنا نتفرج على توم اند جيري ويوم ما نكبر نتفرج على مازينجر
..
اما بئا بالنسبة لموضوع اللغة ده فانا كنت زمان بضايق لما الاقى طفل عندنا فى العيلة مثلا ضعيف فى العربى وكل كلامه انجليش (او جريجي زى مانت بتقول) بس بعد كده رجعت فكرت هو هايعمل ايه لما يبئا قوى فى العربى .. ولا حاجة علشان يشتغل فى اى مكان كويس لازم يكون برفكت انجليش وياسلام لو معاه لغة تانية كمان يبئا تمام اوى لكن محدش هايسأله عن العربى ده خالص
..
كفاية رغى كده بئا
سلاموشن

Unknown يقول...

انا استفدت من البوست ده حاجه رهيبه و أهم شيء ان ياسمين ممكن يبقي دلعها سينا :)

ههههههههههه

معلش بقي كوسه

ياسمين

غير معرف يقول...

OjG
: ((((

الفكرة إننا مش نقدر نروح يوميا
و الطفل طفل في أي مكان...بيتعود

لدرجة إن والله كان في طفل اتأزم من الموقف ده حقيقي
إن الحلويات ارتبطت بوجودنا في الدار

فبطل يا عيني ياكل منها عشان ما يتعودش على طعمها

و كان بيرفض بإصرار رهيب إنه ياكل الشوكولا..عشان يا حرام لما يشتاقلها..ما يبكيش زي إخواته

تحياتي القلبية

زُمُرده يقول...

يارب تكون بخير
وهاجي اعلق في وقت تاني

Diyaa' يقول...

إنت مسخرة يا ابن الحلال
والحمد لله هوفر عليك المشوار
أكيد يعني مش هتيجي لحد اكتوبر عشان جوز جنيهات :))

وربنا يخليلكم سينا..وفعلاً الجيل الجديد بيتعلم بسرعة وحاجات كتير ما كناش نحلم بيها بس بالمناسبة أنا كلمة ريفيجان دي أعرفها من 5 ابتدائي شفت إن كان في برضه تطور علي أيامي :))

وأعتقد إن حكومتنا هتعمل بالحل الأخير
هيسيبوا المضمون ويغيروا الشكل
come visit us tomorrow sir :D

أشوفك يوم السبت علي خير يا ابو السوهات كلها

وكل سنة وإنت زي الفل

زُمُرده يقول...

جيت اطل على حبيب الكل
اللي ناسي زمرده الفل
واقوله ياعم ابقى طل

ههههههههههه
والله بتيجي معاك ومعايا كده
اجمل صدفه

اولا ربنا يكرمك وتقدر تسعد الاطفال دول
لأنه بجد احساس رااااااااائع جدا
ده غيرالثواب
لأن اللي بيدخل البهجه والفرح ف قلب مسلم ربنا بيدخلها قلبه

ياريت كان في الامكان احسن من انتظار كرم الزمان بفرصه مشاركه في اي مكان

------------
بوب كورن يا راااااااجل بقى مش عارفه

المره الجايه هقول للشركه يكتبولك طريقة اكله
هههههههههه

متقلقش ع الجيل ده
كل جيل ليه مساؤي وفوايد ومميزات وعيوب
واكيد هيقدر يتعامل ولو مقدرش مش هيبقى احسن من اللي سبقوه
ولا اييييييييه؟؟
كل جيل بيتعامل مع الاجيال السابقه

قدد يتفقوا وقد يختلفوا وفي الخر هيتعايشوا

سلام يا غالي

Nairy يقول...

عم سو

محسوبتك التعليق ال95 متخيييييل؟!!

كل الكلام اتقال هادخل انا اقول ايه زيادة؟وايه فايدة اني اعيد كلام هو عارفه عن نفسه كويس؟

كركعت من الضحك على البوست دة وحتى على ردودك على التعليقات هنا
واسلوبك ساخر لطيف ولذيذ فوق ما تتصور وفعلا الضحك بيبقى بصوت عالي والله

شخصيا لما باجي اقول نكتة لحد او ارمي كلمة ممكن تضحك ..بقول ف سري يارب الكلمة دي ب نية ادخال السرور على قلب مسلم ف أديني بيها اجر وثواب..عشمي ف ربنا انه كريم وهايديني الثواب سواء الشخص دة ضحك او لاء

فكر تعمل كدة هاتحس بفرحة وانك فخور بنفسك اكتر من دلوقتي مليون مرة..دة غير الحسنات ان شاء الله

اول زيارة ليا والمدونة بقت *_عدم اللامؤاخذة ع الجريجي_ *ف الFavorites ...وعندي عادة بفخر بيها اني لما بتعجبني مدونة بجيبها من اولها ومش اسيب فيها حرف حتى التعليقات...اعدك بدة ان شاء الله...متابعة الجديد وقراءة القديم والتعليق على كله

يارب بس مش تزهق مني لان محسوبتك رغاية اوي وليا ف اللماضة كتير...والاسم الحركي بتاعي نايري بنادول عشان من كتر الرغي اللي بيقرا كلامي بيحتاج بنادول عشان يستحمل

يالهوي كل دة تعليييييق؟؟؟؟

اضربلك بنادولتين وربنا يصبرك

D:

Ahmed Al-Sabbagh يقول...

اشوفك بكرة يا صديقى ان شاء الله
وربنا يقدرك دايما على فعل الخيرات

ابن منتشقتك

Soooo يقول...

مقاطعـــــــــــــون

اهلا اهلا اهلا
طب ده اسمه كلام برضك يا اخت مقاطعون
مش كنتي تقولي

بصي ياستي .. اولا مافيش داعي للاعتذار .. الحكايه ومافيها اني ساعات باحس ان بعض المدونين بيجيو يرمو اعلان ويمشو .. وكأن اللي بيتكلم ده واللي هم جايين يحطو اعلان لمدونتهم عنده .. بيقول في اي هسس
بينما والله العظيم لو قال رأيه حتى لو كان معترض معايا واستأذني في انه يعمل اعلان عن حمله او دعوة مش هعترض واقول ده بيخالفني الرأي يبقى خلاص مش هوافق على كلامه ولا على اعلانه للي هو بيطالب بيه

وياستي انا معاكي في حملتك في مقاطعة كوكا كولا
لأني باشرب بيبس .. ولا البيبس برضه هو كمان هنقاطعه؟؟؟؟

ومنتظرك ياستي يوم السبت اللي هو بكره .. وربنا يوفق الجميع

وبلاش شغل جنان
وش واحد بيغمز بعينيه الاتنين .. وماتسألينيش ازاي



سلامووووووووووز

Soooo يقول...

A7MeD F@hMy

ياريت تنورنا وتيجي بنفسك معانا يوم السبت اللي هو كمان كام ساعه ده

وبجد متشكر قوي على كلامك ورأيك في

ربنا يديم الخير والمعروف يارب





سلاموووووووووووز

Soooo يقول...

Bannoura

المشكله مش في اننا نجيب ولا مانجيبش
المشكله في اننا نتحرك بنفسنا ونسيب العالم الافتراضي اللي الكل عمال يتكلم ويشجب ويدين ويستنكر .. وساعة الجد .. تلاقي الكل بيعتذر
دي بلدنا
دول ولادنا واخواتنا الصغيرين
لو ماوقفناش جمبهم وحاولنا نرسم ابتسامه على وشوشهم .. يبقى احنا اللي مانستحقش الرحمه
ده احنا في شهر الرحمه ياجرعان




سلاموووووووووز

Soooo يقول...

blackghost

طب ماتزقش كده ياعم
الله
وبعدين يعني هو انت ينفع تحجز شقة فول ولا طعميه ولا برارس وماتجيش تاخدها؟؟

وياسيدي كلنا والله متنكدين ومخنوقين .. بس لو بطلنا نضحك ممكن نموت من الهم

وربنا يسترها علينا وعلى ولايانا




سلاموووووووووووز

Soooo يقول...

ojg

ياستي ربنا يرزقك الزوج الصالح والذريه الصالحه
وتعلميهم زي ماتحبي وان شاء الله هيبقو كويسين

وبالنسبه ليوم السبت .. لو انتي حطيتي النيه انك تعملي خير .. يبقى انتي كده صح
انما لو جايه وحاطه في نيتك انك تتعرفي بالمدونين .. يبقى غلط
اخلصي نيتك لوجه الله سبحانه وتعالى في انك تحاولي ترسمي ابتسامه على وجه طفل مريض .. دي بكنوز الدنيا ومافيها

وربنا يوفقك ويوفق الجميع




سلاموووووووووووز

Soooo يقول...

Doba

وأي كلام يقال بعد اللي قلتيه ياختي يام يوسف افندي؟؟

ماقدرش اقولك غير ربنا يسعدك ويبسطك ويوفقك ويكرمك ويرضيكي دنيا وآخره يارب

ملحوظه
نفسي تيجي وتجيبي استاذ يحي ويوسف افندي .. معقول يبقى عندي ابن اخت ومش عارف اشوفه والعب بيه .. قصدي العب معاه



سلاموووووووووووز

Soooo يقول...

ayman badr

ربنا يكرمك يابو اليمن على الكلام الحلو اللي قلته

وياريت تيجي معانا ونساهم كلنا في حاجه .. مش يمكن الحاجه البسيطه دي .. هي اللي تكون سبب في دخولنا الجنه برحمة ربنا




سلاموووووووووز

Soooo يقول...

مهيج الجماهير

ياسيدي الف شكر على كلامك وعلى ذوقك
ومدونتي تحت امرك قلب فيها زي ماتحب
وباتمنى انك تعتبرها زي مدونتك تمام وتنورني بتعليقاتك وبزياراتك

وباتمنى انك تكون معانا يوم السبت
وربنا يوفق الجميع




سلاموووووووووووز

Soooo يقول...

أسيرة الأقدار

طب والله العظيم ليكي وحشه

انتي رحتي فين وايه اخبارك
واختفيتي كده ليه
يارب يكون المانع خير يارب

وانا مش ضد ان الطفل يبقى كويس في اللغات .. بالعكس .. انا مع ده
لكن قصاد ده يكون في اهتمام باللغة العربيه
ده بنات اخويا ماتعلموش يقرو عربي غير لما جبنالهم مدرس عربي مخصوص
انتي متخيله؟؟؟؟

وكمان اصل المشكله مش في مفهوم اللغه وبس
اصل المشكله ان الانظمه الحكوميه والروتين بتاعنا .. منيل بستين نيله .. لو الجيل اللي بيتكلم انجليزي ده دخل مصلحه عشان يخلص معامله ولا حاجه
نهارو تكني كلر

والف شكر على انك لسه فاكراني وياريت تفضلي منوره المدونه كل ماتقدري
وربنا يوفقك ويوفق الجميع




سلامووووووووووز

Soooo يقول...

عاقلة علي ارض الجنون

طب تصدقي يا ياسمين
بنت اخويا انا الوحيد اللي بيقولها سينا من أيام ماكانت طفله
وهي بتحب الاسم ده قوي منني انا بالذات .. لدرجة ان باباها لما بيناديها ياسون سون .. تقوللو قولي ياسينا زي ماعمو بيقولي
يقوم ابوها يقولها يابت انا ابوكي اقولك اللي انا عايزه .. ويجي يتخانق معايا عشان مدلع بناته

سعيد جدا بزيارتك وباتمنى انك تعتبري مدونتي زي مدونتك وتنوريني بتعليقاتك وبزياراتك دايما




سلامووووووووووووز

Soooo يقول...

زُمُرده

اهلا اهلا بالمتمرده

كان نفسي بجد تيجي وتنورينا بزيارتك للاطفال معانا بكره ان شاء الله
لكن ان شاء الله في زيارات تانيه وتالته وان شاء الله تكوني معانا

وياستي اكيد عارف البوب كورن بيتاكل ازاي
مش محتاجه فهلوه يعني
اكيد بيتاكل بالشوكه والسكينه زي شوربة لسان الظرظور .. فاهم انا كل حاجه

ولو على مشكلة الاجيال احنا ممكن نتأقلم عليها
انما المشكله في الروتين القديم اللي هيقابل الجيل ده
لأنه نفس الروتين .. وتقريبا نفس الموظفين
ربنا يسترها بقى

وكل سنه وانتي ومدونتك طيبين




سلاموووووووووووز

Soooo يقول...

غير معرف

تاني؟؟؟
يعني انا بقول ياريت ماحدش يرميلي اعلان من غير مايقول رأيه في اللي انا باكتبه
وقبل كده انت برضه جيت ورميتلي تعليق وحذفتهولك
وبرضه تيجي تاني؟؟

والمشكله انك بتتكلم بلسان المصريين .. وكأن كل المصريين زيك كده مش بيهتمو غير بوجهة نظرهم وبس من غير مايسمعو اي حد
حاجه تخنق بجد
تعليقك هيتحذف


ومن غير سلاموز

Soooo يقول...

Diyaa'

لا ياشيييييييخ
انت كنت عايز تجيبني من المعادي لاكتوبر عشان جوز جنيهات؟؟؟
لا ياعم .. هدفعلك انا خمخه جنيه بحالهم

ومنتظرك بكره السبت ان شاء الله يابرنس وربنا يوفقك ويوفق الكل يارب



سلامووووووووووز

Soooo يقول...

Nairy

اولا .. سعيد جدا بزيارتك لمدونتي المتواضعه وباتمنى انك تعتبريها زي مدونتك وتشرفيني دايما بتعليقاتك وبزياراتك

ثانيا .. انا فعلا بحاول اخلص النيه في اللي بقوله - واللي باحمد ربنا انه بيضحك بعض الناس - انها تكون لوجه الله

ولو خدتي بالك هتلاقيني حتى باقول في آخر اي تعليق لي كلمة (سلامووووز) ودي بقولها من باب رسم ابتسامه في آخر كلامي
اي نعم الكلمة دي كانت سبب في اختلاف في وجهات النظر بيني وبين اخت عزيزه على قلبي قوي .. لكني شرحتلها انه بالقياس لو كان تبسم المسلم في وجه اخيه صدقه .. فبالاجتهاد .. لو المسلم رسم ابتسامه على وجه اخوه المسلم .. يبقى ان شاء الله صدقه بأمر الله

ثالثا .. مين قال انك رغايه ولا صداع ولابنادول .. طب ياريت يا شيخه الصداع المزمن اللي بيجيلي يكون زي كلامك كده

والف شكر على زيارتك ويارب كلامي ومواضيعي تعجبك يارب




سلاموووووووووز

Soooo يقول...

Ahmed Al-Sabbagh

منتظرك يابن منتقتي بكره .. عايزين نعمل شغل ونخلي العيال تقوم تتنطط وتخف على ايدينا ان شاء الله




سلامووووووووووز

nona يقول...

هههههههههههههههههههههههههه
كلامك يموت من الضحك
هو انت لسة شفت حاجة بكرة سينا لما توصل لاعدادية هتشوف منها حجات كتير
مالة تعليم الحكومة ماهو زاى الفل اهوة و بيخرج شباب و بنات زاى الورد لازم مدارس انجليزى و فرنساوى
الواد ابن اختى بيقولى يا طنط عشان الميس قالتلة اخت ماما اسمها طنط امال فين كلمة خالتو و الاستاذ دخل دلوقتى مدرسة فرنساوى يا عالم هيقولى اية تانى
بس تحس انى العيال و هما بيتكلموا اكنهم ولاد ناس بصحيح بينطقوا الكلام اكنهم اتولدوا كدة مش زينا
الله يكون فى عونك يا اونكل سووو
و رمضان كريم

dreem يقول...

حلو اوى اسلوبك يا عمو
فرى جود ريلى
تقبل تحياتى

غير معرف يقول...

انت مستغرب من البوب كورن

طيب هقولك علي حاجة

الواد توتو ابن خالتي سنتين ونصف وحط تحت سنتين ونصف دي 10 خطوط يشوف الكومبيوتر من هنا الاقيه جري وقعد عليه ويقولي نت نص (يعني هعد علي النت نصف ساعة وابقي اقوم )

ده احنا غلابة قوي ده و الاتاري عندنا كان املة ههههههههههه

الجيل الصاعد .....يلا بقي راحت علينا

هييييييييييييييه دنيا

DR.roro

كـــيــــــــارا يقول...

ههههههههههههههههههههههههههه

هههههههههههههههههههههههه
هههههههههههههههههههههههه

بجد موتني من الضحك موتني فعلا

كل ده عشان بوب كورن

هههههههههههههههه

كل سنه وانت طيب

ahmed_k يقول...

ههههههههههه
والله أول ما قلت بوب كورن عارف
كنت فاكرها أيه
كنت فاكرها كورن فليكس
أتاريها طلعت فشار هههههههههههه
بجد العلم نوووووورن

زُمُرده يقول...

جيت اصبح
انت عامل ايه يا راجل يا طيب؟؟

يارب بخير
ابقى طمني

قلب شاعره يقول...

ههههههههههههههههههههههه
ههههههههههههههههههههههههههه
والله منا عارفه اتكلم من الضحك ههه موتنى من الضحك بجد جداا انا بضحك بصوت عالى على فكره دلوقت ....
بجد اسعدنى حديثك جداا والحكايا الى بتموت من الضحك
مشكور على ادخال السعاده لقلبى والبهجه ؟؟

غير معرف يقول...

هههههههههههههههههههههههههههههههههههههه
أنا بجد فطست من الضحك....الظاهر إن سينا دى مش ناوية تجبها البر ابدا

على العموم أنتا تروح تخدلك كورس إنجلش بدل الجريجى ده عشان منظرك ميبقاش وحش قدام البنيةهى دلوقتى صغيرة بكرة تكبر و تفهم و ممكن تستعر منك...دى نصيحة أخويا أحسن البت تتصدم فى عمها

غير معرف يقول...

طمنني
روحتو ؟؟؟؟؟
ربنا يجعله في ميزان حسناتكم كلكم يا رب

Lyssandra يقول...

في عيد ميلاد

تيجي تاخد جاتوه ؟؟

:)

البوفيه مفتوح لآخر الشهر

ع الهااااااامش



Lyss

Soooo يقول...

nona

والله يا نونا ياختي .. مدارس الحكومه خرجت جيل زي حالاتي .. مش عارف ايه البوب كورن .. واتخرجنا واحنا عارفين البوب بس
وكان بشكل تاني واستخدام تاني وحاجه بلاله

عموما ربنا يستر .. اهي منة الله الاخت الصغرى لسينا دخلت جريد وان دلوقتي .. والله ما عارف هتعامل معاهم ازاي العيال دول




سلامووووووووووز

Soooo يقول...

dreem

أشكرك جدا جدا على تعليقك وياريت تعتبري مدونتي المتواضعه دي زي مدونتك تمام وتشرفيني بزياراتك وبتعليقاتك




سلامووووووووووز

Soooo يقول...

DR.roro

اه والله العظيم الأتاري ده كان اختراع
ولما نزل منه النوع اللي مخزن بتاع خمسين لعبه يالهووووي
قلنا خلاص بقى
مافيش تقدم اكتر من كده

مانعرفش ان الزمن مخبيلنا بلاي ستيشن و اكس بوكس وام بي فايف .. وبوب كورن




سلاموووووووووووز

Soooo يقول...

كيارا

ياستي اضحكي زي مانتي عايزه
عمر الضحك مايموت حد
اللي يموت بجد .. هو الغم والهم




سلاموووووووووووز

Soooo يقول...

ahmed_k

ههههههههههههههههههههههه
اهو التعليق ده أجمد تعليق جالي عالموضوع ده
هههههههههههههههههههههه

ربنا يستر بجد .. ده احنا جيل منيل بنيله ياجرع




سلامووووووووووووووز

Soooo يقول...

زُمُرده

الله يصبحك ويمسيكي بالخير ياستي
انا الحمدلله لسه باتنفس




سلامووووووووووووز

Soooo يقول...

قلب شاعره

يافندم ده انا اللي بجد سعيد جدا ان موضوعي عجبك والحمدلله انك ضحكتي
وربنا يديم عليكي السعاده يارب




سلامووووووووووز

Soooo يقول...

انا ودماغي

لا مش لاعب
بقى بعد صولاتي وجولاتي في اللغات الشوارعيه والحوارتجيه .. اروح اقلب لساني واتعلم جريجي - اسمه جريجي مش انزليجي - وبعدين تتعر مني بتاع ايه .. طب خليها كده تيجي معايا على قهوة بلدي وتقولهم عايزه مشروب .. ولا تقولهم عايزه حلبه حصا وكعب عالي حريمي مكحله يا بندقققققق

ولا هتعرف تقول كلمه من اللغات الحيه دي

هي دي اللغات وإلا فلا




سلاموووووووووز

Soooo يقول...

Bannoura

الحمدلله رحنا وكان يوم حلو قوي
وربنا يتقبل يارب




سلاموووووووووووز

بنت الأسلام يقول...

ربنا يخليلك سينا بتعرفك حاجات مكنتش عارفها بس فى حد ميعرفش البوب كورون
بس معلش بتحصل فى أحسن العائلات
تقبل مرورى وكل عام وحضرتك بخير

Soooo يقول...

lyssandra

كل سنه وانتي طيبه وعقبال مليون سنه يارب
وان شاء الله في زي الايام دي تكوني محققه كل احلامك يارب




سلاموووووووووووووووز

غير معرف يقول...

طيب ايه يا سووو
مفيش تقرير عن اليوم اللي قلت عليه؟
ولا حتى بوست جديد؟
مالك؟
طمنا

Hany Rizk يقول...

ياريت يا عم سو كان ينفع انا اصلا محتاج حد يتبرع لى علشان اعرف اكمل مشوار الجهاز وزى ما الناس زيي كدة مزنوقة فى المصارى فالحمد لله انا مش ينفع اتبرع بالدم لو عاوزين عضم ممكن دة اللى اقدر اتبرع بيه بس ما تخافش وما تقلقش انابرضه باعمل اللى عليا تجاه اخوانى واخواتى وكل الناس اللى بتعانى من افراد شعبنا المطحون وربنا يخلى لينا جمعية رسالة وربنا يستر بالمناسبة هوة فيه قطايف فى السوق وللا ناويين يستوردوها من الصين هيا كمان ؟؟؟؟

يوسفيات..محمد يوسف يقول...

والمصحف أنتا جامد

أنا مبطلتش ضحك واللي ضحكني أكتر إني كنت متخيلك بتحكي الحكاية دي لايف بأسلوبك

بجد بجد يخربتك

جاااااااااااااامد

Unknown يقول...

ما هو ده الجيل الي طالع يا سو الكومبيتر بآه مادة أساسية من كي جي و طالع

غير معرف يقول...

وحشتوني بجد

نلتقي بعد رمضان

لو في العمر بقية

كل سنة وانتو طيبين

مها ميهوووو

الا هو اتن مخاصمني ولا حاجة؟؟
ازاي ما تحضرش عيد ميلادي اللي في المدونة؟؟

عموما انا منقطعة حبة لبعد رمضان

يدينا ويديك طولة العمر
معلش انا فاتني كتير انت كاتبه خصوصا مذكرات سوووو التخين بس العودة بعد العيد

كل سنة وانت طيب

مها ميهوووو

كيكى عوووووو يقول...

ياجرعان يا جرعان
الحقوا يا جرعان
انا شفت سوووووووووووووووووو
ومكلمتش معاة كلمة
اعاااااااااااااااااااااا
اعاااااااااااااااااااااااااا
يارتنى ماعشت لليوم دة
قلبى قلبى يا محسن
هااااات الدواء بسرعة
كورن فليكس مع معلقتان سكر زيادة
لا يا محسن بلاااااااااش
عشر نقط
اةةةةةةةةة
اةةةةةةةةةةةةةةة
مووووووووووووووت خلااااااااااااص
عووووووووووووووووووووووووووووو

زُمُرده يقول...

كمواطنه سووووهيه
من قبيله سوووو
جايه اطالب بحقي

ااااااااااه حقي
عندك ايتُها موانع؟؟
تووويب

عايزه شات بوكس
بدل ما اكسر المدونه دي في عيدها الاول
عايزه اتكلم
ههههههههههههههه

بس خلاص
انا رديت ع كومنتك

لولولولولي

انت ازيك؟؟؟
وازيهم ؟؟؟ تعبينك ليه؟؟؟

Soooo يقول...

همسة

كل سنه وانتي طيبه يافندم

والحقيقه احنا كنا خدنا كلمة بوب كورن في سنه اولى ثانوي .. بس ماركزش عليها قوي عشان احنا كنا في مدارس حكومه وكانو مركزين على شوية كلام في سكة
آي هاف تو آآيز
آي وونت تو جو تو ذا باث رووم
آيام ألي آند ماي فريند إز هوسام

واحنا طبعا بغبغانات وبنقول وخلاص .. ولا انا علي ولا اعرف حد اسمه حسام من اصلو

والف شكر على مرورك الكريم وربنا يكرمك يارب





سلاموووووووووز

Soooo يقول...

غير معرف

انا الحمدلله كويس اهو
وانت ايه الاخبار؟؟
طب كويس كويس
عايز حاجه؟؟؟




سلامووووووووووووز

Soooo يقول...

brokenheart

دم ايه اللي هتتبرع بيه ياعم
انت عايز اللي يتبرعلك بالدم واللحم وكل حاجه

وياسيدي مسيرها تفرج عليك وعلى كل الناس

وربنا يهيئلك اللي فيه الخير يارب ويطمننا عليك





سلامووووووووووز

Soooo يقول...

محمد محمود يوسف

حليب هارتي والله

ازيك يابو حجاج وازي اخبارك
مش هنشوفك قريب ولا ايه ياعمنا

وياسيدي الف شكر على كلامك الجميل ده وربنا يكرمك ويوفقك ويرضيك دنيا وآخره يارب





سلامووووووووووز

Soooo يقول...

عاليا حليم

المشكله مش في الجيل كجيل تكنولوجيا
المشكله في العالم الخارجي اللي هيتعامل معاها الجيل ده لما يكبر

ربنا يسترها علينا وعليهم يارب




سلامووووووووووز

Soooo يقول...

أحسن تـستاهـل

ياخبر يا مهاميهو
طب والله العظيم ليكي وحشه

ولا طبعا مش مخاصمك ولا حاجه .. انا ماقدرش ياستي

وكل سنه وانتي طيبه وعقبال مليار سنه ياستي

ملحوظه
انا كنت قلقان احسن اختك تكون عملت فيكي حاجه ولا بتاع .. خصوصا ان آخر مره جيت عندك وعندها لقيتكم زي ماتكونو متخانقين وانا ولعتها بزياده من باب تهدئة النفوس





سلامووووووووووز

Soooo يقول...

كيكى

والله انتي عسل

وياستي انا كنت منتظر انك تيجي تفطري معانا عشان بعدها هنعمل دوري مصارعه حره وكنت هاراهن عليكي بكل ما املك

لكن يلا .. خيرها في غيرها ان شاء الله

وصدقيني انا سعيد جدا جدا بتواجدك معانا وربنا يوفقك وتعملي كل خير يارب




سلامووووووووووز

Soooo يقول...

زُمُرده

شات بوكس ايه بس يابنتي
ده انا باتشتم في التعليقات .. اقوم اعمل شات بوكس عشان اتشتم بضمير وعلى كل لون ياباطصطه

لا ياستي
خليني كده متداري احسن


وانتي ازيك وايه الحياه؟؟؟؟




سلامووووووووووووووز

Unknown يقول...

شرباااااااااااات
معلش انى متاخرة
لكن عذرنى انى لم
اكن اعلم (عنوانك)
واحمد ربنا انها ماقالتش
عايزة اج اند تشيز :):)