الاثنين، ١ رمضان ١٤٢٩ هـ

!!! دكر البط

امي الله يرحمها .. كانت دايما اول يوم رمضان تعزم اخواتي وستاتهم وولادهم عالفطار .. وتعمل المحمّر والمشمّر من رومي على بط على حمام على لحمه على رقاق على كبسه سعودي .. قوم انا حبيت اعمل فيها شملول وقلت لازما وحتما ولابد اعمل اللي امي كانت بتعمله .. وابويا يقولي يابني كاني ماني وانا مافيش .. مرات اخويا تقولي يهديك يرضيك وانا لا يونكن ابدا
ام هند - وماتزعليش مني ياهند - رحت فاتح الفريزر وعملت عملية تنضيف للتلاجه عشان اشوف ايه الضحايا اللي هتتعمل للفطار .. لقيت خير اللهم اجعله خير .. ديك رومي صغير شويه .. وبتاع خمس ست اجواز حمام .. وفخدة ضاني .. ودكر بط .. ومش عارف اذا كان بط ولا وز بصراحه .. بس هو كده بالحلمنتيشي .. دكر بط .. ودكر دكر يعني .. واللي خلاني متأكد انه دكر بحق وحقيق .. اني لقيت كام شعرايه على صدره .. فأنا بنباهتي استنتجت انه دكر .. وبيقلد تامر حسني كمان .. وإلا لو كانت نتايه تبقى واخده هرمونات .. واحنا الحمدلله البط بتاعنا وكل الطيور وحتى الخرفان بنربيها عالسطوح .. وبنعمل كشف دوري على المنشطات أول بأول .. واللي بنلاقيه واخد هرمونات بنستبعده من النهائي
بعد سحور اول يوم رمضان .. طلعت الديك الرومي والفخده الضاني والحمام ودكر البط من الفريزر .. وحطيتهم في حوض المطبخ عشان يسيحو على مايطلع النهار .. ونمت وصحيت .. وابتدت المعركه
أن أن آآآآآآآن .. دِححححححححححح
تقمصت شخصية الشيف أسامة سوووو .. وقعدت ادور على أي طرطور ألبسو على دماغي لزوم الشغل .. لكن مالقتش طراطير .. قلت مش مشكله .. هم اصلا بيلبسوها عشان شعرهم مايقعش في الطبيخ .. وانا اساسا ماعنديش شعر
اول حاجه رحت باشرلي قد خمس ست سبع تمان تسع عشر بصلات حلوين .. وعينكم ماتشوف الا جمعية النور والأمل .. كمية دموع حسستني اني بكيت على شهداء الاقصى وشهداء العراق وكل الشهداء اللي استشهدو من بدء الخليقه ولحاد عشرطاشر سنه قدام
بعدها رحت قاسم البصل لمجموعتين .. مجموعه للرز البسمتي او الكبسه السعودي والفريك اللي هيتحشي بيه الطيور .. ومجموعة تانيه لزوم تحبيش الفخده الضاني واللحمه المفرومه بتاعة صينية الرقاق .. اه طبعا .. ماهو بما ان في بط .. ودكر كمان .. يبقى لازم يكون في رقاق باللحمه المعصجه .. ولو اني مش عارف يعني ايه لحمه معصجه .. بس الحق يقال .. هي فعلا نرفزتني وعصجتني وبقيت معصج عالآخر
----
عزيزتي ربة البيت .. بعد ما الفريك بالبصل ما يتسلق .. بنجيب كل الطيور اللي عندنا ونحشي فيهم .. نحشي فيهم ونكبس .. ونحشي ونكبس .. وهكذا لغاية ماتحسي ان الطير هيطرشق من كتر الكبس .. ثم تقفلي رجلين الطير على بعضهم وكأن الطير قاعد عالارض ومربّع رجليه منتظر مصيره المهبب .. ثم في حلة متوسطله على مساحة الطير ذات نفسه .. وتحطي ميه وبصله بحالها من غير ماتبشريها - مش طالبه تبشري حاجه تاني كفايه على كده يا أوختشي - وشوية ملح وفلفل وأي بهارات وأي حاجه تلاقيها في الدولاب اللي جنب البوتاجاز
ولا تنسي عزيزتي أن تضعي قد خمس ست ورقات لورا .. فإن لم تجدي لورا .. فالبانجو كفيل بالعمليه
----
دي كانت وصفة أبله "نظيفه" في صفحة "الطيور" كتاب (تعلمي الطبخ في تسع طاسات تيفال) .. وانا نفذت الكلام بحذافيره .. حطيت الديك الرومي على الحمام على دكر البط - الطيور كلها مع بعض زي ماقالت نظيفة - على الفخده الضاني بالمره وسط الطيور .. وده يمكن لأني حسيت ان الخروف كان طاير من الفرحه وهو بيندبح .. والحمدلله لقيت حله كبيره ماعرفش دي كانت بتاعة ايه اصلا .. ورحت مولع البوتاجاز عليهم وقايم اشوف الغسيل يا اختي .. قطيعه بقى .. انا هلاقيها من الغسيل ولا الطبيخ ولا ترويق الشقه .. انا تعبت تعبت تعبت .. طلقني يابو سريع
----
!!! وبعد سبع ساعات ونصف .. فقط
----
فتحت الحله .. لقيت الميه قصرت قوي .. ولقيت قدامي يخنة عجب .. مزيج من العضم على اللحم على الجلد .. لقيت الحاجات كلها دايبه في بعضها .. قلت يالهوي .. هم كانو بيحبو بعض للدرجة دي عشان مايصدقو اقفل عليهم الحله ويسيحو في بعض بالشكل ده .. لأ بقى .. دي سمعة سطوح .. والسطوح بتاعنا طاهر .. وهيفضل طول عمره طاهر
اتصلت بمرات اخويا اقولها على اللي حصل .. قالتلي يا نهارك زي بعضه .. سبت الاكل عالنار سبع ساعات ونص .. ليه يابني .. قلتلها الله .. احسبيها معايا بنفسك .. الحمام بياخد ساعة ونص .. والديك الرومي ساعتين .. والبط ساعتين .. والفخده ساعتين .. اجمعيهم كده يا ناصحه وشوفي اللي انا عملته ده صح ولا مش صح !!؟
طبعا مرات اخويا سكتت وتنحت .. تقريبا اكتشفت انها متعلمه حساب غلط وكانت طول الفتره اللي فاتت من حياتها بتطبخ الاكل ناقص سوا .. وقالتلي خلاص يا سوووو .. انا هتصرف

جه معاد الفطار ولقيت اخويا بيتصل بينا وبيقول لابويا نيجي نفطر عندهم .. قام ابويا قاللو - وهو مشرئب ومبتسم - لا ماهو سوووو بيجهزلكم الفطار .. انزلو انتو وهاتو البنات معاكم .. وطبعا انا سمعت الجمله دي وعملت نفسي مصاب بانفصام في الشخصيه وقلتله فطار ايه .. انا ماعملتش حاجه .. انت مين .. انا فين .. انا فقدت الذاكره !!!!!؟
----
.. ملاحيظ لاحظتها وقلت تلاحظوها معايا

اول ملحوظه .. الاكل اللي انا عملته الحمدلله طلع كويس وماباظش ولا حاجه .. بالعكس .. مرات اخويا لما كلت منه هي واخويا وابويا عجبهم قوي الحمدلله .. بس انا قلت اهزر شويه .. وكل سنه وانتو طيبين
تاني ملحوظه .. اقوى رساله جاتلي في شهر رمضان السنه دي .. كانت من الاخ المناضل - اللي هيودينا في داهية - عبد الرحمن فارس .. وكان نص الماشيز كالتاتي
بمناسبة شهر رمضان : اللهم اننا قد صبرنا عليه ربع قرن .. فاعفو عنا واغفر لنا وارحمنا واجعله يارب شهر (سعيد) أو شهر (جيد) انشالله حتى شهر (حسن) .. بس وحياة حبيبك النبي بلاش شهر مبارك) دي )
تالت ملحوظه .. هي القطايف نزلت (جدول) ولا انا حاسس انها شاححه في السوق؟؟؟

سوووو

هناك ١٠٢ من التعليقات:

Unknown يقول...

فقري فقري فقري يعني الصراحه
عجبتني قوي
عشان بس متعملش فيها عمو نظير بعد كده
ادي العيش لخبازه
عجبتني قوي رسالة عبد الرحمن
جاري النشر
رمضان (كريم)

TAFATEFO يقول...

كل عام وحضرتك بخير .. وأرجو متكونش زعلان

ميرا ( وومن ) يقول...

سووو

بص هو ساعه مقولتلي علي المازينجر انك بتعمل كل الأصناف دي توقعت سيناريو من التلاتة

1- يحصل اللي قولت علية ده والفاطار يبقي علي مائدة رحمن

2- تبقي قدها وقدود والدنيا تبقي متظيطة

3- الأكل يتحرق وتطلب نجدة من اي محل دليفري

ههههههههههههههههههههههههههههه

بس والله بجد انا اتخضيت لما قولتلي انك بتعمل كل الحاجات دي مع بعض

انا اصلا نص الحاجات دي معرفش بتتعمل ازاي

وطبعا اخر مغامرة ليا في المطبخ هاتبقي في بوست قريب

كل سنة وانت طيب ربنا مايقطعلك عادة

Eldebug يقول...

كل سنة وانت طيب ويارب تكون دايما بخير ... وكفاية كده بقى عطلتنى عن الاكل ... سلاااااااااااااام

Unknown يقول...

تسلم ايدك ياشيف سوووو

كل سنة وانت طيب ياجميل
رزقنا الله وإياكم صياماً وقياماً ودعاءاً ونيةً نكون بها من عتقاء الله من النار فى هذا الشهر الكريم ومن المقبولين
رمضان كريم

************************************
شعار عمرو خالد السنة دى .. سنحيا بالقران
************************************

walaa tulip rose يقول...

كل سنة وانت طيب وبخير يارب
والسنة اللي جاية نفطر عندك بقي
ويبقي القرار لنا في طعم الاكل
بصراحة انا لسة فاطرة بس يظهر ان لسة في حته فاضيه ممكن تتملي بباقي دكر البط او حته من صدر الرومي يعني
اهو كله مااااااااشي
المهم بلاش اليخني
رمضان كريم ويارب يعود عليكم بكل خير
تحياتي

غير معرف يقول...

الرساله حلوه اوى

كل سنه و انت بخير

و بجد دمك خفيف جدااااا

و الحمدلله ان الاكل طلع كويس

انا اتخضيت عليهم و الله :D:D:D

رمضان كريم

سلامات :)

مهندس مصري بيحب مصر يقول...

أحلى كلام يا سووووو
بس بتطبخ كبسة سعودي في مصر
ليه ؟
دا الكبسة هنا منتشرة انتشار رهيب و مش فاهم الناس هنا بيعشقوها ليه ؟
بالهنا و الشفاء يا عم
:)
و كل سنة و انت طيب

فاروق عادل يقول...

هههههههة بجد مية ميةيا شيف سووو.وبتخرجنى من اى مود حزن انا ببقى فية لانى متضايق حبتين بس موضوعك دة روقلى دماغى خالص.وكل سنة وانت طيب ورمضان كريم وتفضل تطبخ للعيلة دايما

maiosha يقول...

إيه يا سوو ده كله؟؟

طيب مش تقول كده ولا تعزم ولا حاجة.. كنت حتى هجيب البيبسى وأنا جاية

ايوة فعلا غيه حكاية القطايف دى .. إحنا برضة معرفناش نجيب قطايف النهاردة .. واضح غنها عملت حاجة مش ولا بد وبتصيففى مارينا السنة دى

كل سنة وإنت طيب

ورمضان مبا...قصدى رمضان كريم

Unknown يقول...

انا كنت داخلة اقول
كل سنة وانت طيب
ورمضان كريم
قوم اية لاقيت خير اللهم اجعلة خير العزومة دى قلت يابنت لازم ينوبك من البط ورك ولا سدر ولا حاجة
هقرأ وارجع

أأقصد هاكل وارجع

Unknown يقول...

ههههههههههههههه
مش عارفة اقولك اية انا واختى ميتين من الضحك 00 بس بجد بجد فى الاكل اليخنى دا طلع اكل ؟؟

سو انت مؤلف كوميدى ملكش حل
رمضان كريم

يوميات فنانه مفروسه جداا يقول...

الا قوليلي يا ختشي كيلو الكوسه بقي بكام دلوقتي الا الافندي بتاعي عايزني اعميلهالوو واقطع بصلتيين علي التقليه ولا واحده كفايه

هههههعععععععععععععع هخخخخخخخخخخخخخخخ عععنيااههههههههه
ديك رومي وبط

يا فضيحتي

بقي انت بتعرف تعمل الاصناف ديه كلها

ايه يعني
مانا بعرف اقلي بيض واحمر بطاطس واجدع واحده في مصر تصب ميه
بس تعالي هنا هوا لسه حد بياكل الكائن العجيب اللي اسمه بط ده

استغفر الله العظيم يا رب
يلا بالشفا

ملحوسه

كل مره اقوول هدخل عند سووو ومش هعلق لانه مبيعبرنيش اساسا ومتعرفش يا خويا كده بعد ماجي تجيلي هسترية الضحك واقعد اكل في صوابعيني لحد ماسيب تعليق وامشي واقول المره الجايه مش هعلق وبرضو مفيش فايده
فعلا ماليكش حل
كل سنه وانت طيب
ابقي اسأل علي اختك
سلام

Lyssandra يقول...

هههههههههههههه


مش ممكن بجد

كان نفسي أشوف العزومة دي

كان حقك تصور اليخني ده علشان احنا اللي نحكم ع الحاجات اللي ساحت

ياللا بقي العزومة اللي جاية ان شاء الله وعليك خير

===============

كل سنة وانت طيب يا سووووو
ورمضان كريم عليك يارب

ممكن تبقي تيجي تاخد فانوس لو مش عندك يعني


Lyssandra

maxbeta3zaman يقول...

الحمد لله انك لقيت حاجة فى الحلة ..وكلها ضيوفك انا بقى لى تجربة رمضانية تهللك من الضحك أظن ان أخونا شريف صديقى الحميم نشرها فى البلوج بتاعه باسم "القنبلة الفوليه" ..أنا بقى صاحب وبطل هذه الواقعة .. انا لم أجد الفول فى الحلة -القدرة- بل طار الفول وتعلق فى السقف ..ثم نزل مطرا بعدها على رأسى !! رغم اتباعى تعليمات التابعى الدمياطى بكل حذافيرها ..فالحمد لله على بقاء طيورك داخل الحلة وعدم تمكنهم من الطيران للسقف ... والا انت شيلت الريش ؟؟؟

kochia يقول...

بصراحة كل حتة عاوزة تعليق لوحدها
من اول اكتشافك ان دكر البط ده دكر
طريقة جهنمية طبعا متجيش علي دماغ اي حد

لحد الطبخ المبتكر

لكن في النهاية
لا يسعني الا ان اقول
كل سنة وانتوا طيبيين

بس الجماعة فطروا ايه ؟؟؟؟

Unknown يقول...

سو سو سو

عملت فيها ابله نظيرة مبرووووووووووك
يالا هنزلك برنامج قبل الفطار على قناة اليويو تى فى ونسمية مع الشيف سو مش هتقدر على الفطار

كل سنة وانت طيب ياريس وان شاء الله ربنا يكرمك ونشوفك بالعروسة السنة اللى جاية ولا بلاش العروسة خلينا فى حاجة اهون
هههههههههههه

تحياتى

كـــيــــــــارا يقول...

كل سنه وحضرتك طيب

رمضان كريم :)

لسه في اول الصيااام

ربنا معنا

Sourah يقول...

هههههههههههههههه

شربات يا مضروب ..

كان نفسي في حته من الخروف السايح الطاير ده ، بس مش مهم بالف هنا على الاكيلة.
السؤال بأه عملت ايه جمب حديقة الطيور دي - باعتبار انك صنفت الخروف من الطيور - فته بأه و لا مشيتها رقاق ..

طيب كده هتعملوا ايه لاخر الشهر .. !!!، انت قولتلي مساحة سطوحكوا كام ؟؟!!!

ملحوظة زأنونة : القطايف و بالزات العصافيري ، شحت من السوق عشان خافت على روحها من مذبحة الطيور اللي انت عملتها يا باشا :)

و اخر الكلام سلاااام ..!!!

Unique Gurl يقول...

ههههههههههههه
حلوة اوي (فإن لم تجدي لورا .. فالبانجو كفيل بالعمليه)
بجد انت فقري اووووي
كل سنة وانت طيب
ورمضان كرييم
و لما تعمل اكل تاني ابقي اعزمنا :))

me يقول...

و انا نزلت جدول يا باشا
نجيبهالك
امال احنا دكاترة كلشنكان ولا ايه

اخص و متعزمنيش
اخييييييه و انا اللى هظبطك قطايف و اللذى منه

ماشى ملحوقه

المهم المزج دى جامده و الله

ملحوظة بقى على جنب
لا مش هنا
يمين شويه
لا شمالشويه

ايييييييييييييييييييوه

احييك على مجهودك فى انك متقطعش عادة كان مواظب عليها حد....ربنا ميقطعش لحد عادة ابدا

تشااااااااااووووووووو

Ahmed Fahmy يقول...

تؤ تؤ تؤ تؤ
يبقي في نيتك تعمل الاكل ده كله و ماتعزمنيش
ماااااااشي يا عم سوووووو
ملحوقة برضو
):
هو كدة كدة انا باصص لك فيه يعني حتي لو ماتعملش بس ربنا ستر برضو
جوعتنا و احنا صايمين
هههههههههه
اعمل حسابك العزومة عندك بكرة و ده اجباري
D:
--------
روووووووومانسي

د/اجدع بنوته يقول...

يخربيت فقرك بقوووووووووووه

انا عنيا دمعت اكتر م دموع الوفاء

والامل اللى سكبتها ع فرم البصل

تعيش وتفتكر وتعيش وتعزم

ودايما كده مبسوط يارب

وربنا يخليلك كل اللى بتحبهم يارب

اما عن ميسدج المناضل ..

يارب بقى انت اللى عالم !!!!!

كل سنه وانت سو يا سو

maha zein يقول...

يا ابن الايه يا سووو يا ابو كسكته
بقه كل ده يطلع منك
بقولك ايه يا جدع
هتحكي حاجة بعد كده بلاش يا عم الحج تخدعنا وتضحك علينا
بقولك ايه انت مش صايم بردو ولا ايه
اكيد لا مش صايم وتلاقيك اعد علي السطوح جنب المعيز والخرفان والبط وعامل نفسك بتاكلهم وانت اصلا تلاقيك اعد بتاكل جنبهم سوداني ومكسرات وحتة جلاش من اللى عملتوها لزوم التحلية
صح
انهار واعترف
اصلي انا عرفاك
بس بجد
بعد وانا بقرا اركب شكلك علي كلامك علي حركاتك واعمل الميكس بتاعي وابقه مستمتعة اوي بخفة الدم والكلام اللى هيطرشأ من حلاوته
كل سنة وانت بخير
وربنا يرحم والدتك امين
عموما الحمد الله ان الاكل طلع صاخ سليم يعني والفاخدة ماسحتش
لاني حصل قبل كده انى انا واخويا واحنا صغيرين حبة جينا نطبخ حمامة
وحطناها في حلة مع رز وخضار وكلام من ده
وسبناها
وقلنا بقه تبقه وسط العز عشان تزيد
قوم ايه
لقيت يا جدع ان مبقاش في حمامة خالص في الحلة
وادور
واشك ان اخويا نتشها وكلها لوحدة
مفيش
اللى اكدلي ان الحمامة مازالت في الحلة ومختفية
انى لقيت عضمة صغيرة مكنتش لسة ساحت
وخير الله ما اجعله خير
الرز بقه حاجة حلوة كده
مهلبية رز
ويلا ربنا يرحم الحمامة ويرحمنا معاها
بلا غلب
بقولك ايه
متجيش وحياه ابوك عندي تاني
وتروح مخنق عليا
انا مش نقصة
انا صيمة ومزمزءة
قال الست اطلقت ليه ومعرفش ايه
يا عم الحج دي قصة حقيقية من ايام الصالحين والصحابة
انا مالى انا بقه
وبعدين الحدع افتقر وطلقها عشان يشوف حاله
لو عرف يعني يصرف فرخة مشوية يبقه يخلع بيها لوحدة
ربنا يسهلك يا حاج بقه
اخر مرة بقه اشوفكعندي
تمام
ههههههههههههه
لا بهزر
انا بكون سعيدة لما بتيجي تطل وتخنق بغتاتة وسفاقة
يلا رمضان كريم

Mafrousa يقول...

ههههههههههههههههههههه
و ده من إيه يا شيف سو
هههههههههههههههههه
يالهوي ده انت طلعت احسن منى بكتييييييييييييييييييييييير
على كده انا لو حبيت اعمل عزمة ممكن تيجي تساعدنى ؟؟؟؟
اختك لما تيجي تغسل الفرخه لازمن تبقى لابسة جونتى الاطباء تقولوش حعمل عمليه؟
و لا بقا يالهوتي لو لاقيت شعر
يععععععععععععععع
بقرف موت و افضل نقعاهه فى الخل لغاية لما تخلل
ههههههههههههههههه
لا لا ده انت لازمن يتعملك برنامج فى التلفزيون

اه بالمناسبة الاكل لسة فيه منه و لا تشفط مع شفاط فريش؟؟؟؟
اصل لو فيه آجى انا و جوزي
هههههههههههههه
كل رمضان و انت طيب

اسكندراني اوي يقول...

كل سنه وانت طيب يا سوووو وتسلم الايادي
ومتشكرين على الملاحيظ يا سييييدي

قوس قزح يقول...

يخرب عقلك يا سوو
طيب يعنى جيبت صفحة الطيور و حشيتها و قاعدتها مؤدبة و لحد ما لاقيت حتفها فى الحلة و قلنا ماشى
لكن الخروف ذنبه ايه يتفرفر معهم ؟؟
ده كان مفروض يدخل الفرن يا معلم بفخر و شموخ و يطلع يترمى فى حضن الرز

يلا كل سنة وانت طيب و السنة الجاية ابقى خالى العزومة سحور بس

Z_Diva يقول...

ya5ayebek yammo bat3ah.... 5ayba mn yomik werbona :D

el72y ya5tchy 5odilik course m3 yeg3alo 3amer wala abo bat3a hatla2ik wana banabihik aho :D

kol sana wenta tayb ya basha we kol tab5a ma3 soooo atyab :D

حمامة يقول...

ههههههههههههههه

فظيع بجد
كويس انك حاولت والأكل طلع كويس

بالهنا والشفا يا شيف
وكل سنة وانت طيب وبخير
رمضان كريم :)

sara يقول...

بجد بوست هايل
كل سنه و انت طيب
شكرا لمرورك عندي ارجو تكرارها

غير معرف يقول...

بسم الله الرحمن الرحيم
كل سنة وإنت طيب يا راجل يا طيب

مش قادرة أقولك كمية الضحك اللي ضحكتها من البوست ده
أحمد
أنا على فكرة بعمل كده بس مش في الحسااااب
في البرطمانات اللي بفضيها في الحلل من غير ما أدقق إيه ده
و على قولك
كله بيتاكل و يطلع زي الفل
تسلم الأيادي

و يجعله عامر

ابن حـجـر الـعـسـقـلانـى يقول...

يابنى انت مش معقول يا سوووو

ماحصلتش ... دماغك دى ماعرفش بتتناول بيها المواضيع بالشكل دة إزاى

بتركب حاجات فى بعضها بشكل رائع

الموضوع مبهج جدا و موتنى من الضحك

ربنا يكرمك انت و كل عيلتك

3ala asm masr يقول...

هههههههههه
حلو اوى الرساله اللى جاتلك
كل سنه وانت طيب ورمضان كريم وملكش دعوه بمامتى

زُمُرده يقول...

لالالالالالالالالالالالا

مش صداقه دي
لالالالالا

نداله كده
يعني اختك مصابه في الحرب العالميه الخامسه
وفقدت جميع طبقات الجلد الحيه والميه والنص نص وعايشه ع العظم
وانت تعمل فطار جااااااااامد ولا تقولي تعالي
خدي نظره
ولا شمه حتى
لالالالالالالالالالالالالا
مكنش العشم

طيب خدلي نص الحله وتعال زرني
مش عيادة المريض عليها ثواب ولا ايه؟؟؟

------------
هههههههههه والله ضحكتني
بس ما دمت شاطر كده انا عزماني عندك

مندوبه من منظمه الصحه جايه ادوق واستتطعم واشوف بعيني واشم بنفسي

سؤال
هو الحشو كان ايه؟؟؟

لما ضميرك يوجعك وتقرر تيجي وتدوقني...ياريت فريك تحشي بيه

وش مطلع لسانه

آآه القطايف والكنافه جدول
شوفلك صيدلي ابن حلال منصاب وجوعته اخر الليل يديك حتة كنافه وشويتين قطايف

ايدي وجعتني
سلام يا غالي

Empress appy يقول...

فارس مش هيحبسك لوحدك متخافش انا معاك يا خويا انا بقول نعملها منشورات ونوزعها على اخونا فى لازوغلى مع تحياتى فارس ونبقى خلصنا منه ههههههههههههه
كل سنه وانت طيب
وبابا واخواتك بخير
اما عن الاكل فانت عارف اخرى معاه ايه ولا افهم البطيخ فيه ابقى ادينى كورسات بقى

Sha2loob يقول...

أولاً
تعيش وتفتكر يا سوووو وربنا يرحمها ويرحمنا ويرحم المسلمين جميعاً
ثانياً
رغم اني مت من الضحك بس بصراحة مكنتش مصدق انك بوظت الأكل لأن معلوماتي بتقول انك طبخه شاطره قصدي طباخ شاطر
سنت كوكو هسعل زوزو عالسشرين عوعو سنيه جون سالص خله لو سنت أوأو سنت كورة سبتعرفش ميمي تسبخ طاطا
فاكر ولا أسيحلك أكتر من كده
بس شفت,مكنتش عارف ان عبد الرحمن بيحبني كده

Doba يقول...

انا قريت البوست امبارح ووقعت على روحى من كتر الضحك وكل اللى فى المكتب اتلموا عليا وكله بسبب دكر البط

وكل لما اتخيل منظرك وانت بتعمل الأكل
ضحكتنى بجد من قلبى على كل المراحل بتاعت لكى يا سيدتى

وتحفة البانجو بدل اللورا

تسلم الأيادى ولفتة حلوة منك جدا انك تصر على تكرار عادة الوالدة ودايما مجمعهم عالخيرات يارب

ربنا يبارك فيك وكل سنة وانت طيب
والسنة الجاية تكون معاك واحدة مووووزة قمره تشاركك إعداد الطعام للأخوة

فى حفظ الله دوما
هبة

همس الاحباب يقول...

هههههه ههههههههههه
بالهنا والشفا يا عمنا
بس والنبى مرة تفوت ولا حد يمووووت
يعنى بلا ش خزعبلات وكده
بس بجد تسلم ايديك
مش ناوى تعزمنا على يخن عجب قريب ولا حاجة
كل سنة وانت طيب
ورمضان كريم يا باشا
وربنا يخليكوا لبعض

Soooo يقول...

لماضة

كل سنه وانتي لمضه وطيبه ياست الضاكتوره
وبعدين عيش ايه وخباز ايه
يابنتي ده انتي مادقتيش صينية الرقاق اللي باعملها
بتبقى حاجه ولا الخيال

رمضان كريم




سلاموووووووووووز

Soooo يقول...

TAFATEFO

وكل سنه وانت طيب يابو حميد
وصدقني انا مش زعلان منك قد مانا مستغرب من تعليقك مش اكتر

رمضان كريم




سلامووووووووووووز

Soooo يقول...

وومن

لأ مائدة رحمن ايه
عيب عليكي
ده انا ايدي تتلف في حرير
طب ده انا في الرحلات بيسموني ماما سوووو من كتر مانا نبيه قوي وذوقي حلو قوي في الاكل
ده انا علي نفس
يالهووووووي
يلا .. مسيرك تشمي نفسي .. قصدي تدوقي اكلي

ولو مالكيش في شغل المطبخ .. شوفي اابي واتنين تانيين معاكم واعمللك دورة تدريبيه ومعسكر مغلق مش هتطلعو منه غير وانتو اساتذة مطبخ

رمضان كريم وكل سنه وانتي طيبه ياستي





سلاموووووووووووووز

Soooo يقول...

Eldebug

وانت طيب يابرنس
بس ايه البخل ده
مافيش بسم الله معانا
اتفضلو
اي حاجه في رغيف
جاي وماشي عشان تاكل قوامك قوامك كده

يلا هاسيبك انا عشان الحق اخطفلي جوز حمام اصبر نفسي بيهم على ما المغرب يأذن





سلامووووووووووز

Soooo يقول...

ـ-ـ- أحمد عبد العدل-ـ-ـ

الله يسلمك وكل سنه وانت طيب
وربنا يتقبل منكم ومنا صالح الاعمال يارب

وياريت يبقى شعارنا طول العمر هو الشعار الجميل ده




سلامووووووووووز

Soooo يقول...

walaa gobashy

بس كده .. ياستي الدكر بحاله تحت أمرك
والرومي كمان
معلش الحمام خلص بدري بدري .. تقريبا دبّت فيه الروح وطار بمجرد ما اتحط عالسفره

وكل سنه وانتي طيبه ورمضان كريم





سلاموووووووووووووز

Soooo يقول...

MaGn0liA...

ياستي الله يحلي ايامك
والحمدلله ان الموضوع عجبك
ولو دقتي الاكل هو كمان هيعجبك

وكل سنه وانتي طيبه ورمضان كريم




سلاموووووووووووز

Soooo يقول...

مهندس مصري

هندزا
كل سنه وانت طيب ياعمنا

وياسيدي اقولك ليه بناكل رز كبسه
عشان اتضح ان الرز البسمتي عالي البروتين واقل في الكربوهيدرات .. وبالتالي افيد للجسم من الرز الابيض بتاعنا
وبعدين احنا كل فين وفين لما بنعمل طبق رز كبسه كده .. مش عايشين عليه يعني زي السعوديين

وكل سنه وانت طيب ياهندزا ورمضان كريم





سلاموووووووووووز

Soooo يقول...

blackghost

ياسيدي الله يكرمك يارب على الكلام الحلو ده
والحمدلله ان ربنا قدّرني وخلاني احاول ولو بشكل بسيط انك تفرفش كده وتروق

وكل سنه وانت طيب يارب ورمضان كريم





سلاموووووووووووز

Soooo يقول...

maiosha

اخ
طب تصدقي اني طول الفتره دي وانا عمال اقول في ايه ناقص في ايه ناقص
اتاريه البيبسي
يلا ياستي ملحوقه
جهزي نفسك وهاتي اربع قزايز اتنين رتل وانا هعمللك صينية فراخ بالبطاطس في الفرن على طبق رز بالشعريه عدااااااله
بس لو هتشربي بيبسي ابقي اعملي حسابك .. عشان الاربع قزايز دول بتوعي انا لوحدي

وكل سنه وانتي طيبه ورمضان كريم





سلامووووووووووووز

Soooo يقول...

نهر الحب

ياستي وانتي وكل الامه الاسلاميه بخير يارب

وعلى فكره .. الاكل ما باظش ولا حاجه .. بالعكس ده طلع زي الفل الحمدلله
ماتفتكريش اني مابعرفش اطبخ لاسمح الله

والله لو اقدر ادوقك صنعة ايدي كنت عملتها عشان تعرفو ان الرجال قادمون

وكل سنه وانتي طيبه ورمضان كريم




سلاموووووووووووز

Soooo يقول...

يوميات فنانه مفروسه جداا

لا ياشيخه
بتعرفي تقلي بيض
وايه ده كمان
بتعرفي تصبي ميه
ده انتي هايله هايله هايله

بقولك ايه .. اابي وميرا عايزيني أديهم كورسات طبيخ .. انضمي ليهم وجهزو نفسكم واستعنا عالشقا بالله



كل سنه وانتي طيبه وياستي ماتزعليش مني .. رمضان كريم




سلامووووووووووز

Soooo يقول...

lyssandra

كل سنه وانتي طيبه ياستي ورمضان كريم
بس على فكره .. الاكل ماطلعش يخنه ولا حاجه .. الاكل طلع زي الفل الحمدلله

ولو مش مصدقاني .. هاتيلي عدد واحد ديك رومي وعدد واحد دكر بط وعدد سته اجواز حمام .. وشوفي انا هعمل فيهم ايه

وحاضر ياستي خدت لبشة فوانيس من عندك .. وبافكر انزل ابيعهم في الموسكي لو بنات اخويا ماقالوش مبلغ حلو

وكل سنه وانتي طيبه




سلامووووووووووووز

رصيف نمره خمســــــه يقول...

ههههههههههههههههه

كل سنة وانت طيب وبالف خير ياسووووووووو

رمضان كريم
بقولك ايه متكترش فى الاكل وتعمل زىى

سلااااااااااااااام

غير معرف يقول...

السلام عليكم soooooooooo باشا

ورمضان كريم عليك وبالهنا والشفا ياباشا

بس صراحة من الحاجات الجميلة جدا فى البوست ده ( بس وحياة حبيبك النبي بلاش شهر مبارك دى )

وفعلا مسج جامدة موووووت

دمت لنا بخير يا باشا ويلاسلام

NilE_QueeN يقول...

شهرك جميل ان شاء الله

بس انا لاحظت ذكرك لكوبري طلخا

فا يا ترى انت مواطن منصورى ولا بلدياتي طلخاوى

غير معرف يقول...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:
1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

Soooo يقول...

maxbeta3zaman

سعيد جدا بتشريفك لمدونتي المتواضعه وباتمنى انك تعتبرها زي مدونتك وتنورني دايما يارب

وكل سنه وانت طيب ورمضان كريم




سلاموووووووووووز

Soooo يقول...

kochia

كل سنه وانتي طيبه ورمضان كريم
ولو خدتي بالك انا بقول في الملاحيظ ان الاكل ما باظش ولا حاجه والحمدلله بس هو الموضوع في سكة الهزار وكده

والف شكر على تعليقك وربنا يسعدك يارب




سلامووووووووووز

Soooo يقول...

هيثم الدهشان

خبر ايه ياعم
ابلة نظيرة ايه
اسمها ابلة نظيفه .. عشان بتعمل اكل نضيف نضيف يعني

وبعدين عروسة ايه ياعم انت
ااااااه
قصدك عروسة المولد يعني؟؟؟

اوعدك انك في رمضان الجاي ان شاء الله هتلاقي معايا عروسة المولد .. بس هو المولد جاي في رمضان السنه الجايه؟؟؟


كل سنه وانت طيب ورمضان كريم




سلاموووووووووووووز

Soooo يقول...

كيارا

كل سنه وانتي طيبه ورمضان كريم

وياريت نكون فعلا في حالة صيام بجد
طب والله نفسيا هنبقى مرتاحين .. انما شكلنا صايمين اسما بس
ربنا يسترها بقى



سلامووووووووووز

Soooo يقول...

Sourah

عجبتني قوي ملاحظتك
فيها حضور ساخر حلو قوي عالموضوع ككل

وياستي تعالي وندبحلك خروف من اول وجديد لو تحبي

وانا عملت رقاق باللحمه المفرومه وسرفيس رز بسمتي بالزبيب جنب الاكل

وبعدين دي حاجه عشان اول تلات اربع خمس تيام .. مش اكل اول يوم بس يعني

وكل سنه وانتي طيبه ورمضان كريم




سلاموووووووووووووز

Soooo يقول...

Unique Gurl

على فكره .. البانجو لو دخل في كل الاكل .. يالهووووي .. هناكل ونعمل دماغ في نفس ظاط التوقيت المحنلي
بس هنقول ايه للناس اللي مش بتدينا فرصه نخرج طاقتنا ونبدع براحتنا

وكل سنه وانتي طيبه ورمضان كريم




سلاموووووووووووووز

Soooo يقول...

د/مروة المعداوى .....قباحة سابقا

هو ده العشم برضه يا ضاكتوره
ومنتظرين القطايف وليكي ياستي عزومه مفتخره كمان

ولما تكوني بتحبي حد قوي قوي قوي .. ومتعوده على حاجه بيعملها وهو فرحان بيها .. استحالة انك تنسيها .. وبتحاولي على قد ماتقدري تعملي نفس اللي كان بيعمله

وكل سنه وانتي طيبه .. ورمضان كريم




سلاموووووووووووز

Soooo يقول...

A7MeD F@hMy

يابو حميد انت من غير ماتحتاج عزومه
انت تيجيلي البيت وتقولي عايز افطر
من قلة موائد الرحمن يعني

وكل سنه وانت طيب يابرمز ورمضان كريم




سلاموووووووووووز

Soooo يقول...

د/اجدع بنوته

كل سنه وانتي طيبه يا داكتوره

وربنا يسعدك يارب ويرضيكي دنيا وآخره

رمضان كريم



سلامووووووووووز

حنين القلب يقول...

سووووو مين اللى قالك تطبخ يا عم انت اخرك تسلق بيض مش ديك رومى وحمام ودكر بط

وايه كميه البصل دى كلها يا سيدى كنت قولتلى وانا جيت ظبط ليك العزومه دى والله واكلوا صوابعهم وراها
ومين تظيفه دى كمان انت بتسمع كلام ناس عايزة الدبح
المهم ان الاكل طلع كويس والحمد لله
وكل سنه وانت طيب
ملحوظه
سوووو ربنا يسعدك ويفرحك ويكرمك ويصلح حالك ويتقبل منك صيامك وقيامك
اللهم امين

Soooo يقول...

maha zein

يعني انا راضي ذمتك
هقعد عالسطوح جنب الخرفان والبط واكل فول سوداني
لأ طبعا
كل ما اجوع اخدلي فخده من خروف ولا دبوس من بطه واشوحه عالنار .. من غير ما ادبحهم طبعا

وبعدين انتي بتهدديني ما اجيش واعلق عندك
لأ بقى
انا مواطن مصري بادفع الضرايب وباتفوتر ومن حقي اعلق في اي مدونه

الدستور بيكفل لي الحق ده


كل سنه وانتي طيبه ورمضان كريم
ملحوظه
انا هعمل سنتر لتعليم الطبيخ .. لو تحبي تيجي وتتعلمي حاجه تفيدك في يوم زنقتك اهلا وسهلا .. بدل مانتو بتعملو رز بالحمام وبتفتكسو مع نفسكم



سلاموووووووووووز

Soooo يقول...

واحدة مفروسة

بصي يا مفروسه
انا ناوي اعمل سنتر للطبيخ .. واابي وميرا ومها زين وفنانه مفروسه .. وآخرون .. جايين يتعلمو
تعالي وانا هشرحلكم كتاب نظيفه صفحة الطبخات السريعه المريعه الفزيعه

وياستي تشرفيني انتي وجوزك وكل اللي يجي معاكي

موائد الرحمن عندنا حاجه فل قوي يعني


كل سنه وانتي طيبه ورمضان كريم




سلاموووووووووووز

Soooo يقول...

اسكندراني اوي

كل سنه وانت طيب ورمضان كريم وربنا يسلمك من كل شر يارب

والملاحيظ دي انا لاحظتها وقلت تلاحظوها معايا .. والحمدلله انها اتلاحظت كملاحيظ




سلامووووووووووز

Soooo يقول...

قوس قزح

انا فعلا حطيت الفخده في الفرن بس بعد ماخدتلها قد ساعه في الميه .. عشان تديني مرقة احطها عالكبسه

هو انا بالعب ولا ايه
لا ده انا واعي قوي

وكل سنه وانتي طيبه ورمضان كريم




سلاموووووووووز

Soooo يقول...

Z_Diva

يجعلو عامر ايه ده بس اللي هيعلموني الطبيخ يا اخوتشي
دول حتى بتوع البورامج بيعملو اكل ماسخ ومالوش طعم ولا ريحه
وأكلهم كللو بالزيت ويموع النفس كمان

انا ياختي باعمل اكل بتاع زمان
اكل ستي وستك
حاجه كده ليها طعم ولون وريحه .. وتاكلي من هنا تبقي عايزه تنامي من هنا
اه امال ايه يا اوختشي

وكل سنه وانتي طيبه يا ام زعبولا ورمضان كريم




سلاموووووووووووووز

Soooo يقول...

حمامة

والله يا حمامه يا اختي انا ما اقصد حاجه بالخمس ست اجواز حمام اللي عملتهم

ولا بارمي اي اسقاطات سياسيه ولا بالمح اني أكل لحوم البني ادمين يعني

وكل سنه وانتي طيبه ورمضان كريم



سلامووووووووووز

Soooo يقول...

salma

وكل سنه وانتي طيبه ورمضان كريم

وياستي ماتشكرينيش على حاجه .. لان لو هتشكريني يبقى انا كمان المفروض اشكرك



سلامووووووووووووز

Soooo يقول...

Bannoura

بسم الله الرحمن الرحيم

وكل سنه وانتي طيبه يابنورا هانم
وان شاء الله في زي الايام دي تعزمينا في بيتك .. والله يكرمك ماتعمليش انتي الاكل
احنا هنجيب اكلنا وأكلكم معانا

مش ناقصه تحطي في الاكل حاجه من برطمان .. يتضح بعد كده انه جبس من اللي كان تحت الحوض



سلاموووووووووز

Soooo يقول...

ابن حـجـر الـعـسـقـلانـى

يا ابو العساعيس انت مش واخد بالك
واحد عجوز وبيخرف
اكيد حواراته كلها هتكون خطاريف

اه يا خطروفي ياني

كل سنه وانت طيب ورمضان كريم




سلاموووووووووز

Soooo يقول...

3ala asm masr

كل سنه وانتي طيبه ياهنوده وانا ياستي اعتذرت من قبل ما اقول اي حاجه

وبعدين مامتك دي هي الخير والبركه .. ربنا يخليهالك يارب وتفرح بيكي وبولادك وولاد ولادك كمان




سلامووووووووووز

Soooo يقول...

زُمُرده

يا زمرده انتي بس تشاوري وشوفي اللي هيحصل

وياستي لو عايزه تتعزمي .. قريب ان شاء الله هنعمل فطار في سنكريه وليكي عزومه معتبره .. اختاري انتي مائدة الرحمن اللي تعجبك وانا جيبي سداد يعني .. ماتقلقيش خالص

وياستي باعتبرك صندلانيه قد الدنيا .. عايزي اتنين كيلو قطايف ميه وخمسين وكيلو قطايف امبول .. ولو في سرنجات مكسرات هاتي خمس سرنجات

وكل سنه وانتي طيبه ورمضان كريم .. وألف سلامه عليكي





سلامووووووووووز

Soooo يقول...

appy

فارس ده مش هيروق غير واحنا مترحلين على لاظوغلي .. وأراهنك انه ساعتها هيكون في سويسرا بيعمل حفلة جديده للالبون بتاعه بعد ماعمل النيو لوك اللي عملو

وياستي انا خلاص فاضللي حاجات خفيفه وسنتر الطبيخ هيعلن افتتاحه هتكوني من اوائل الدفعات اللي هتلتحق بيه

وكل سنه وانتي طيبه ورمضان كريم




سلاموووووووووووز

Soooo يقول...

Sha2loob

كل سنه وانت طيب يابو الشقاليب ورمضان كريم
بس بقولك ايه
الله يكرمك قلل شقلبتك في الكلام شويه عشان انا لسه جديده في اللغه

وياسيدي حوار العزومه ده كان زمان قبل زيادة سعر الوقود .. دلوقتي المنيمم تشارج بتاعنا خمخين جنيه .. واقرب حجز بعد رضمان باربع شهور

شاور عقلك وبلغني .. سارعو بالحجز .. الاماكن محدوده



سلامووووووووووز

Soooo يقول...

Doba

كل سنه واختي ام يوسف افندي طيبه يارب

وياستي الف شكر على كلامك وعلى دعوتك الحلوه دي

وبخصوص الموزه .. انا بافضل انها تكون موزه ضاني .. وياسلام لو عليها طاجن رز معمر .. هتبقى قويه قويه قويه

سلامي ليوسف افندي




سلاموووووووووووز

Soooo يقول...

همس الاحباب

ياسلام
حمايا العزيز عايز يدوق طبيخي
ده انا لي الشرف يابرمز
ولو ان المفروض العزومه تبقى على اهل العروسه لكن ومالو ياسيدي .. مابين الخيرين حساب

وكل سنه وانت طيب ورمضان كريم




سلامووووووووووز

Soooo يقول...

رصيف نمره خمســــــه

كل سنه وانتي طيبه يا ايمي وحمدلله على سلامتك
وكويس انك ظهرتي في رمضان حتى عشان تعزمينا عالفطار .. وماتخافيش .. احنا هنختار المائدة اللي تعجبنا وانتي عليكي الباقي




سلاموووووووووووز

Soooo يقول...

جمعاوي

كل سنه وانت طيب ياريس
ولا بلاش ريس دي
عشان ممكن يربطوها مع بلاش مبارك ويلبسونا قضية قلب نظام التاكس

كل سنه وانت طيب ورمضان كريم





سلامووووووووووووز

Soooo يقول...

NilE_QueeN

كل سنه وانتي طيبه ورمضان كريم

والحقيقه انا مش من طلخا .. بس جبت اسمها في كذا موضوع كنوع من القفشه مش قاصد بيها تقليل من طلخا ولا تقليل من اهلها
احنا لينا الا اهل المنصورة الكرام
ده حتى هم الخير والبركه ياشيخه




سلامووووووووووووز

Soooo يقول...

غير معرف

بالرغم من اني مقتنع بكل كلمة قلتها .. لكن للأسف مش هقدر اخلي تعليقك لأني سبق وقلت قبل كده ان مدونتي مش لوحة الناس تحط عليها اعلاناتها

وكل سنه وانت طيب ورمضان كريم





سلامووووووووووووز

Soooo يقول...

حنين القلب

بتتريقي
طب والله لو كنتي كلتي الاكل كنتي عرفتي قيمتي في البلد
يابنتي ده انا كارثه
انا مش ممكن
انا يالهوووووووي
ايه التواضع اللي انا فيه ده ؟؟؟؟


وكل سنه وانتي طيبه وربنا يارب يارب يسعدك يا أحلى اخت حنينه في الدنيا كلها




سلامووووووووووووز

Rehab Mostafa يقول...

طيب مش كنت تعزمني يا سوووو
بدل مانت جوعتني كده من حديقة الطيور اللي انت عملتها دي
بس تسلم ايدك بصراحه وبالهنا والشفا :)
وكل سنه وانت طيب

Hossam يقول...

هااااااااااى
بجد بجد بجد جامد اخر حاجة
مسخرة بجد
حلوة بتاعة بيقلد تامر حسنى دى
ههههههههههههههههههههههه
بجد جامد وعلى فكرة بعرف اعمل اكل احلى منك بكتييييييير
ولو عايز تجرب مش عندى مانع هههههههه
سلام حبيبى واتمنى نكون اصدقاء

Soooo يقول...

Rehab Mostafa

كل سنه وانتي طيبه ياستي
وبعدين هو انتي محتاجه عزومه
انتي تيجي وتقوليلي دوقني اللي عندك ياسوووو
هتلاقيني على طول رحت دابحلك دكر جبنه اسطمبولي انما ايييييه

وكل سنه وانتي طيبه ورمضان كريم




سلاموووووووووز

Soooo يقول...

Hossam

اهلا بيك في اول زياره ليك لمدونتي المتواضعه وباتمنى انك تعتبر مدونتي زي مدونتك تمام وتشرفني بتعليقك دايما

وياسيدي لو انت بتعرف تعمل اكل احسن مني .. احنا نعمل عزومه كبيره ونعزم كل المدونين .. واللي يقولوه هم يبقى هو اللي يمشي
حدد يوم وابدأ انت الاول

وكل سنه وانت طيب .. ورمضان كريم





سلامووووووووووووز

غير معرف يقول...

سووووووووووو ده انت طلعت طباخ مافيش منك اهو.. تسلم الأيادي و كل سنة وانت طيب..


شــــــهد

أسيرة الأقدار يقول...

احلى حاجة بئا لما جمعت عدد ساعات كل حاجة لوحدها وسيبتهم على النار سبع ساعات ونص
تصدق انا عمرى ماخدت بالى من الموضوع ده هابئااقول لماما تاخد بالها بعد كده
بقالنا 20 سنة بناكل الاكل ناقص سوا
ههههههههههههه
تسلم ايدك يا سوووووو
ورمضان كريم عليك .. مفيش مبارك اهو ولا حاجة

dreem يقول...

والله برافو عليك
ولا اقولك : تسلم ايديكى يا اوختشى
ههههههههههه

سلاموز

nona يقول...

ههههههههههههههههههههه
بجد انت طلعت مشكلة
سبع ساعات على النار
تصدق انا بقالى كام سنة بعمل اكل بس عمرى ما حسبتها كدة
ليك مستقبل جامد جدا
المرة الجاية لازم نيجى ناكل من العزومة دة حتى نرفع راسك قدام الحاج و اخوك
كل رمضان و انت طيب يا راجل يا طيب

Complicated Simplicity.. يقول...

مش ممكن يا سووووو انت هلكتنى من الضحك بجد خصوصا على تعليمات كتاب "ابله نظيفة" انت شربات بجد
ويسعدنى اقوللك انى من يوم ما جيت امريكا المحروقة ..قصدى المحروسة وانا معكوكة فى عكة الاكل دى و اول يوم حبيت اعمل فيه اكل حرقت الحلة بتاعة الست اللى قاعدة عندهاو بعد ما الناس نامت خدت الحلة فوق فى اوضتى و جبت سكينة واديتها تقشير فى الحلة عشان تنضف!!! فكويس قوى انك انجزت هذا الانجاز العظيم مع كميات الطيور الخزعبلية اللى عملتها
مع تحيات : مزلولة فى امريكا

Soooo يقول...

شهوووووووووووده اختي العسوله

والله العظيم ليكي وحشه انتي مش متخيلاها

معلش انا عارف اني مقصر في حقك بطريقه وحشه قوي قوي قوي

بس ظروفي غريبه والله في رمضان والحياه كلها مش متظبطه

ادعيلي ياشهد
وكل سنه وانتي طيبه




سلامووووووووووز

Soooo يقول...

أسيرة الأقدار

أحلى حاجه هي عودتك لمتابعتي وبجد مش عارف اشكرك ازاي على كلامك الحلو اللي قلتيه في حقي

وربنا يارب يسعدك ويكرمك ويبسطك ويوفقك ويرضيكي دنيا وآخره





سلامووووووووووووز

Soooo يقول...

dreem

الله يسلمك يا أوختشي
انتي ماشوفتينيش في الحلو
باعمل صينية كنافه بالقطايف بلقمة القاضي .. تستاهل بؤك والله

وكل سنه وانتي طيبه





سلامووووووووووووز

Soooo يقول...

nona

يا نونا ياختي انا واد حويط وفاهم الاكل قوي

الاكل ده مش حاجه سهله يعني
لا
ده دراسه وعلم كبير قوي

يلا .. اديينا بنقول خبراتنا عشان الناس تستفيد بيها

وكل سنه وانتي طيبه وبجد سعيد جدا انك جيتي معانا يوم ابو الريش وربنا يارب يجعلها في ميزان حسناتك يارب





سلامووووووووووووز

Soooo يقول...

Reena

ياااااااااااه

ليكي وحشه متوحشه بوحشنه والله يابنتي

انتي عامله ايه في الغربه يابنتي
ربنا يارب يرجعك لأهلك سالمه وغانمه ومحققه كل اللي بتحلمي بيه


ملحوظه
لو الحله اتحرقت ولونها بقى اسود تاني .. حطي فيها شوية خل او صابون سايل وحطي عليها قد كوباية ميه وحطيها عالنار لغاية ما الميه تغلي .. وبعدها ابقي استني لغاية ماتدفى شويه وامسحيها بالسلك هتلاقي السواد ده راح من غير مجهود كبير






سلاموووووووووووز

غير معرف يقول...

هههههههه
تدوينة كوميدية جدا
كل عام وانت بخير
سانتظر بقية التدوينتا علي موقع افحت

Bravo_fox يقول...

خفة دمك غريبة عجيبة كأنك عم تكتب سيناريو مهضوم. شفت هالسايت بالصدفة كنت عم فتش على وصفة صينية رقاق على الطريقة المصرية. هلق عم اقرأ باقي البلوغز تبعولك. على فكرة من وين بيجيبوا ورق البانجو للطبخ؟ ورق الحشيش بيسوا؟

almasry يقول...

طبيعى يعنى يجيلك كل التعليقات دى




تحفه



كل سنه وانت طيب يا سووووووووو



المصرى