الأربعاء، ٢١ جمادى الآخرة ١٤٢٩ هـ

(21)مذكرات طفل .. طخين

المحطه الواحد وعششين .. هانت يا جرعان
------------------------------------

دكتور رفعت : ساعة الصفر بعد بكره .. وكل واحد فينا خلاص عرف ايه دوره
سونيا : عرفنا طبعا يابوص .. بس اللي انا مش فاهماه .. ازاي الليله هتلبس في سوووو ؟؟
دكتور رفعت : كنت عارف انك هتسألي السؤال ده .. اللي احنا هنعملو ده هيلبس في سوووو لما الناس تفتكر اللي حصل منه في اول يوم ليه في المدرسه - راجع المحطه التانيه والمحطه التالته - وطبعا الاعلام مش هيتوصى في النقطه دي
سونيا : طب وانت مش شايف انها مش مبرره اننا نطلب منه يروح في مكان التنفيذ على انه هيستلم اهلو .. على الاقل لما العمليه هتتنفذ ويلاقو جثته .. هيقولو ايه اللي خلاه يروح هناك لوحده؟؟
دكتور رفعت : يالك من غبية حمقاء شنعاء بلهاء فسيفساء .. هو بعد بكره يوم ايه؟؟
سونيا : بعد بكره الجمعه
دكتور رفعت : ومدرسة سوووو عامله رحلة للقناطر يوم الجمعه
سونيا : اه مانا عارفه .. ماهي الرحله دي هي سبب الموضوع كللو
دكتور رفعت : طب مادمتي عارفه كده .. يبقى اكيد عارفه ان سوووو حاجز في الرحله دي
سامبا : وبكده هيبقى وجود سوووو في المكان ده مبرر فعلا
دكتور رفعت : - وهو ينظر لسامبا مبتسما - تصدقي الواد ده بيفهم
سامبا : عيب عليك يا دكتره .. محسوبك مجرم قديم بس مالوش حظ
دكتور رفعت : لا .. ان شاء الله بعد المهمة دي ماتخلص .. هتلاقي عقود الاحتراف نازله عليك من كل حته .. بس اهم حاجه في اللي هيحصل .. ان كل واحد فيكم يبقى عارف ايه هو دوره
سامبا : من الناحيه دي ماتقلقش .. انا والواد عيد هنصحى من الصبح بدري نجهز نفسنا
سونيا : وانا هتصل بسوووو عشان نخليه يبقى موجود زي ماتفقنا
سامبا : بس عدم اللامؤاخذه يادكتره .. انت ايه مصلحتك من اللي هيحصل لسوووو .. يعني سونيا وانا عارف سوووو عمل ايه خلاها عايزه تنتقم منه .. انما انت ايه مصلحتك من الحوار ده كللو ؟؟
دكتور رفعت : يااااه .. دي حكاية طويله قوي .. وانا مش فاضي عشان احكيهالكم دلوقتي .. اصل عندي حوار عفاريتي كده .. وانتو عارفين العفاريت مواعيدها دقيقه .. ولو اتأخرت ولا حاجه ممكن يلبسوني او يلبسو أي حد من اللي عطلوني .. ولا انت مش خايف من العفاريت ؟؟
!!! سامبا : - وهو خايف موووت - تروح وتيجي بألف سلامه يا دكتره
دكتور رفعت : - وهو ينظر لسونيا - يلا بينا يا سونيا عشان توصليني .. اصل التوك توك بتاعي خدوه مني عشان ماكنتش رابط حزام الامان عالخوذه
-----
بعد ما الاغنية اللي غنوها العيال خلصت .. سمعنا صوت حد بيحاول يفتح باب المخزن اللي احنا فيه .. لقيت ندى راحت ساحباني من ايدي وجرينا كلنا ناحية الحته اللي هم دخلو منها .. وخرجنا بره المخزن .. وبمجرد ماخرجنا لقيت شمهورش بيقولي
شمهورش : المخزن ده بتاع ناس كبيره قوي في البلد .. بيخزنو فيه الدقيق وبعدين يبيعوه في السوق السودا
سوووو : اه مانا عارف
ندى : عارف ازاي؟؟
وابتديت احكيلهم الحكايه من اولها لغاية ما اتعرفت عليهم واحنا ماشيين .. ولو اني مش عارف احنا ماشيين رايحين فين .. بس أي مكان احسن من المكان اللي احنا فيه ده .. خصوصا انه كللو مخازن قديمه وخرابات .. وبعد ما عرفو ايه هي حكايتي من أولها لآخرها .. لقيت ندى بتقولي
ندى : ياااه .. ده انت اللي شوفته في اليومين دول ماشفتوش في حياتك كلها ياجرع
شمهورش : وانا اللي فاكرك من العيال الفرافير بتوع المعادي
بشله : - وهو ينظر امامه ويبدو عليه الاندهاش - يادين النبي .. شايفين العربيه الحمرا اللي هناك دي يا رجاله؟؟
بصيت ناحية المكان اللي شاورلنا عليه بشله .. مش ممكن .. دي نفس العربيه بتاعة سونيا .. ايوه هي نفسها .. لسه هقولهم كده لقيت سونيا ومعاها واحد اول مره اشوفه خارجين من مخزن من المخازن القديمه .. وراحو راكبين العربيه وماخدوش بالهم مننا ومشيو .. معقول يكونو خاطفين اهلي هنا .. انا لازم اتأكد بنفسي .. قلت للعيال ان دي هي نفسها سونيا اللي خطفت اهلي .. واني شاكك ان اهلي يكونو في المخزن ده .. لقيتهم استغربو قوي .. ولقيت ميمون بيقولي ماقلقش .. رحنا المخزن من ورا .. لقينا ماسورة كبيره قوي .. وفي شباكين في الدور التاني .. ميمون طلع عالماسورة وبص على اول شباك من ناحية اليمين .. تقريبا ملقاش حاجه .. بص عالشباك اللي من الناحيه الشمال .. وزي مايكون اتخض .. لدرجة انه كان هيقع لكن مسك نفسه .. وبعدين راح راجع للشباك اللي من الناحيه اليمين .. ودخل منه عالمخزن .. فضلت واقف انا ووالعيال وكنت قلقان قوي .. لقيت شمهورش بيطبطب على كتفي وبيقولي
شمهورش : ماتقلقش .. لو اهلك موجودين هنا هننقذهم احنا بنفسنا
سوووو : يارب يكونو هنا .. يارب .. امي وحشتني قوي .. ووحشني طبيخها
-----
دخل بتاع البليله على توفيق عبد الحميد و مصطفى شعبان و منى زكي وهو باين عليه الخضه وبيقولهم
بتاع البليله : إلحقو .. سوووو تقريبا عرف فين اهلو
مصطفى شعبان : - وقف بسرعه وحماس من عالكرسي - وانت عرفت ازاي؟؟؟؟
بتاع البليله : الخاتم لقط حوار مابين سوووو وبين الكام عيل اللي اتعرف عليهم .. وباين انه شاف سونيا وهي خارجه من مخزن وكان معاها واحد تاني وركبو العربيه ومشيو
مصطفى شعبان : هاتلنا العنوان بتاع المخزن بسرعه عشان انا ومنى هنروح نشوف ايه الموضوع
منى زكي : - وهي مندهشه - نعم ياخويا .. انا مش هتتعتع من هنا قبل ما الكولدير يتصلح واشرب بؤ ميه ساقعه
مصطفى شعبان : ياستي تعالي ننزل وانا هجبلك قزازة ميه معدنيه
منى زكي : ميه معدنيه ايه .. دي ميه متعبيه من حنفيات ياعم وبيشتغلونا
مصطفى شعبان : خلاص .. هجبلك ميه من الكولدير اللي قدام الزاويه اللي في آخر الشارع
منى زكي : زاوية ايه دي ؟؟
مصطفى شعبان : الزاويه اللي قدام الجامع الكبير
منى زكي : هم عاملين زاويه قدام جامع .. وجامع كبير كمان .. ليه بقى ان شاء الله ؟؟
توفيق عبد الحميد : استغفر الله العظيم .. انتي هتعترضي على بيوت ربنا .. انشالله حتى يتعمل مسجد لكل واحد .. انتي مالك .. اللهم لا تحاسبنا بما فعل السفهاء مننا يارب العالمين
-----
ميمون طوّل قوي .. او يمكن بيتهيألي انه طوّل .. ابتديت اتوّتر بزياده .. خفت احسن يكون في حد من العصابه جوا شافوه ومسكوه ومش بعيد يكونو قتلوه .. لسه هقول لشمهورش على اللي بفكر فيه .. لقيت ميمون طلع من الشباك ونزل ومرسوم على وششو علامات كتير .. خوف على ارتباك على قلق .. لقيتني من غير ما احس باهزه من كتافه بعصبيه وبقولو
سوووو : انطق .. ابويا وامي جوا ولا فين .. عايشين ولا قتلوهم .. صحتهم عامله ازاي ؟؟؟؟
ميمون : بالراحه ياعم .. اخد نفسي الاول واحكيلك اللي شفته واللي سمعته
شمهورش : طب يلا بينا من هنا عشان مش ناقصه حد منهم يشوفنا
سوووو : انا مش هامشي من هنا قبل ما اتطمن على ابويا وامي
لسه جايين نتحرك لقينا عربية شيروكي جايه علينا .. اول ماشوفتها عرفت انهم مصطفى ومنى .. لكن العيال خافو يكونو حد تبع العصابه وكانو هايجرو .. بس وقفو لما لقوني بشاورلهم يقربو .. وبمجرد ماقربو لقيت مصطفى بيقولي
مصطفى شعبان : اركبو بسرعه
سوووو : ابويا وامي هنا وانا مش هتحرك غير وهم معايا
منى زكي : اركبو يا سوووو واحنا هنظبط كل حاجه في الجهاز
ندى : - وهي بتميل على بشله - جهاز ايه ؟؟
بشله : تقريبا جهاز نوكيا ميت فـُل وعشره الجديد .. ابو كمرا
شمهورش : - وهو باين عليه القلق - انا مش هاركب ولا اروح في أي حته
سوووو : - وانا باسحب شمهورش وباقي العيال يركبو - معلش اصلك متعود على ميكروباظات الحمله والعربيات البوكس .. اركب بس
----
بعد مانزل دكتور رفعت هو وسونيا وخرجو من المخزن .. دخل عيد على ابويا وامي وفك الحبال اللي متربطين بيها وجابلهم براد شاي وسابهم وخرج .. امي وهي بتصب لابويا كباية قالتله
امي : تفتكر يا حاج هيعملو فينا ايه؟
ابويا : - وهو بياخد منها الكبايه - ولا حاجه .. انتي تلاقيكي بس مخضوضه على ابنك وفاكره انه عمل مصيبه
امي : مش انت اللي عمال تقول ابنك ابنك ابنك لغاية ماحسستني انك جوزي انتساب
ابويا : يا وليه مش قصدي .. انا عارف ان ابنك ده عبيط اصلا
امي : لا بقى .. ابني احسن من كل الناس بس انت اللي قارش ملحته
ابويا : طب انا اهو وانتي اهو .. ابنك ده ولا هيعرف يتصرف ولا هيعرف يعمل حاجه
امي : - وهي بتصب لنفسها كوباية شاي - هنشوف يا حاج - وبعد ما شربت بؤ من الكوبايه - ايه البخل اللي الناس دي فيه .. دول حتى مش جايبينلنا حتتين جاتوه ولا باكو بسكويت .. عصابه متكحرته ومأشفره صحيح
----
يتبع

سوووو

هناك ٣٦ تعليقًا:

كاميليا بهاء الدين يقول...

صباح شريف افندم

هاقرا وارجع تانى

تحياتى

كاميليا بهاء الدين يقول...

دكتور رفعت : يالك من غبية حمقاء شنعاء بلهاء فسيفساء .. هو بعد بكره يوم ايه؟؟
......

ههههههههههه

هههههههه

هههه

وحشتنى اوى المذكرات

وسونيا وسامبا والحاج والحاجة والبيح بووص وكل ابطالها

زى يكون من كتير مش شوفتهم

اقولك

انا هاروح اقرأ تانى

الحلقة حلوة اوى اوى


دمت اجمل بسمات المدونات
يارب

تحياتى واحترامى

يوميات فنانه مفروسه جداا يقول...

لا جمممممممممميله والله الحلقه

دمت مبدع يا سوووو

الا هوا مين رفعت اسماعيل ده

غايظني الراجل ده

بس حلوه والله وحاسه ان الحلقه الجايه هتبقي قنبله

سلام

Empress appy يقول...

انا مليش دعوه
انا هعمل اعتصام واضراب
انا هعمل بوست تضامنا مع دراكولا
انا مالى انا عاوزة دراكولا تانى عااااااااااااااااا

عارف يا سو انا قريتها كلها وماشى حلوة والدقيق والمخزن وكل حاجه كل حاجه
بس انا عاوزة دراكولا
هو انت متغاظ منه ليه هااااا علشان احلى منك وعنده انياب وكان ساكن فى طيبه الجديدة
عااااااااااا
المرة الجايه لو مجبتش دراكولا هعمل لك قتيل هنا واحتل المدونة بتاعتك انا وخرفانى وازود دراكوالا براحتى
انا ماشيه وزلعانه منك

خمسة فضفضة يقول...

السلام عليكم ورحمة الله وبركاته

حلوه اوي يا سو
ومش لاقيه بقي كلام اقوله عشان الحر عامل فيا عمايله فاكفايه عليك كده

ههههههههه


سلام

كيكى عوووووو يقول...

عوووووووووووووووووووووو انا جيت اتخديت
..............................
ههههههههههههههههههههههههه اد اييييييييييية العصابة المعفنة دى مفيش طبق كشرى مع الدقة ولا جاتوة...دى عيبة كبيرة فى حقهم...
لااااااااااااااااااااااا مينفعش كدة..قولهم سمعتكم بقيت فى الارض..عيييييييييييييييييييب
عصابات اخرررررررررر زمن

كيكى عوووووو يقول...

تعالىىىىىىىىىىىىىىىىىىىىىىىىىىىىى
بقى ياسسسسسسسسوووووووووووووووووووووووووو
ياعم هدفعلك حساب التوك توك
بس تعالى بتقول هتيجى ومش بتيجى
يا دركولا سووووووووووووووووو اهو وقع فى الفخ
عووووووووووووووووووووووووووووو
تعالى

nigro يقول...

و عهد الله انت راجل دماغ
موضوع الزاوية اللي أدام الجامع الكبير ده خرم دماغي
مفيش حد قبل كده اتكلم في الجزيئة دي اللي مسببة ليا أنا شخصياً استبحس بس جامد شوية
جنب بيتنا في اراضي زراعية و فيه ناس بانية وسط الأراضي دي و تلاقي أغلبهم بانيين زوايا في الدور الأرضي .. علشان ياخدوا ترخيص البنا اصلاً
و اللي يغيظ كمان انك تلاقي الزوايا اللي جنب بعض دي كل واحدة فيهم بيتعمل فيها خطبة جمعة
لدرجة إني في مرة كنت قاعد في زاوية منهم و مركز مع خطبة الجمعة في الزاوية اللي جنبنا

الحلقات التشويق اللي فيها زاد و الرتم بقى سريع و الأحداث بتتكثّف و شكلها كده قربت على النهاية
اللي أنا مش عاوزها تيجي
مش علشان مش عاوزها تخلص و بس
لأ علشان مش عاوزك انت تخلص
و أفتكر إنك فاهم
فكّر تاني و النبي يا أحمد
و ماتكسرش بقلب الغلابة اللي بيحبوك
و النبي فكّر تاني

يلا سلام

كراكيب يقول...

لا مش موافقة
لا وربنا ابدا
لأه لأه ما تحاولش
الواحد وعششين ازاي يعني
وافضل انا بقىىىىى ادووور و ادووور على عششين حلقة فاتت
ومها تقولي لأ فظيعه اقريها
لا رهيبة تابعيها
وانتي بقى ان شاء الله ما افتكرتيش تقوليلي غير في الحلقة الواحد وعششين؟؟
-الزعيق ده ليها هي مش ليك-
ياربييي

استعنى ع الشقا بالله
بسم الله الحلقة الأولى

غير معرف يقول...

لم اتابع تلك المذكرات منذ البدء

فنون تطبيقية بها مواهب عديدة

اسعدنى تعليقك جدا على الفيلم
جداااااا

دمت بخير

ftafeet يقول...

الله بجد اول مره ازور مدونتك مكنتش اعرف انها حلوه كده بجد حسيت ان فاتنى كتير اوى

انا هاجيب الحلقات دى من اولها كده واحده واحده واعد استقراهم وانا بشرب المريندا وباكل سندوتش الجبنه ده (اتفضل معانا)

بس بجد تسلم ايدك يلا بقى اروح اكمل قرايه

باااااى


NONAAAA

NIDAAL .R يقول...

هههههههههه ههههههههههههه ههههههههههه
ثلاثة ههههههههههههههههههههههههههههه
عارف يا سوووووووز الحلقة كلها جامدة اوى اوى اوى .. بس انا الى بيكيفنى فى الحوار ده كله .. الحاج و الحاجة و حواراتهم مع بعض ... وبكره نشوف الواد سوووووووز ده هيعرف يتصرف ولا ايه ؟
اقول ايه غير ههههههههههههههههه بخخ

غير معرف يقول...

أوبااااااااااااااااا

الكشن ابتدتا،، والساسبينس اشتغل،، وهبتدي اقرا وانا مديقة عيني ومترقبة
أن أن أن أن تـشششششششششششش

ياللا يا سوووو ادينا كمان داينا انا الفضول بجد موتني وبهدلني

انما الكوميديا بجد ان أم سووو شايفة ان جوزها ده جوز بالانتساب ههههههههههههه بجد تحفة دي
تحفة ايه؟؟ مش سوووو اللي كاتب يبقى جديدة عليك

جاااااااااامد يا سوووو

الفراغ يقول...

السلام عليكم
اول مره اكلمك بس القصه جميله وبعدين هاتابع قصصك القديمه الجديده بالنسبالى
انا بشجعك من اول مره قرات لك
يلا هابقى قارئ مستديمه عندكشد حيلك
ابقى زورنى ولا مش فاضى
الى اللقاء

اهو ده عيبه يقول...

اوعى تقول يا سووو ان الحلقات هتخلص
ازعل قوى واتقمص وانت متعرفنيش لما ازعل
ده احنا لسه بنقول ياهادى
انما انا عايزة اعرف الواد شاف ايه فى المخزن خلاه يخاف كده

عموما فى انتظار الحلقات الجاية وربنا يسعدك ويفرحك دايما

غير معرف يقول...

توفيق عبد الحميد : استغفر الله العظيم .. انتي هتعترضي على بيوت ربنا .. انشالله حتى يتعمل مسجد لكل واحد .. انتي مالك .. اللهم لا تحاسبنا بما فعل السفهاء مننا يارب العالمين


هههههههههههههه
تصدق اه
بس احسن ميفتحوا حاجه مش ولابد
جامده الحلقه يا سوووووو
بس رجعت تكروتنا
مش كنت سيبتنا نشوف ايه الى فى المخزن
مستنيه


سلاخوووووووووووووووخ
:))))))))))))

ست البيت يقول...

سلام عليكم،،،،،
اعتذار واجب يا سو
أنا أول مرة أعرف أني غبية وحمقاء ...
آسفة جدا...
مذكراتك كان نفسي أتكلم معاك عنها كتير ...عموما ملحوقة ...لما تعملوا اجتماع تاني في القاهرة قولولي ...
آسفة للمرة التانية

الـجـدة فـصـيـحـة يقول...

السلام عليكم ورحمة الله وبركاته

ياترى ماذا رأى ميمون بداخل المنزل ؟؟؟

وأين ذهب المدعو دراكولا ؟؟؟
ترى هل هناك أمل أن تشرب منى ماء ساقع خلال هذه المذكرات أم سينتهي بها الأمر عطشى كما هي ؟؟؟

كل هذا واكثر
في انتظار معرفته
في الفصل القادم من
المذكرات


دمت في رعاية الله

Soooo يقول...

كاميليا

كاميللو انتي تنوري المدونه والنت والمنطقه كلها
وياستي اللي يوحشك في المذكرات خديه على بعضو كده
ومش هنختلف في السعر

وربنا مايحرمني من تعليقاتك وطلتك الحلوة
ربنا يسعدك ويكرمك ويبسطك ويوفقك ويرضيكي دنيا وآخره يارب



سلامووووووووووز

Soooo يقول...

يوميات فنانه مفروسه جداا

ياقهلا ياقهلا ياستي
وبعدين مش عارفه مين رفعت سماعين
يالهووووي
ياخراااااشي

اقولك .. روحي على الحلقه التسعتاشر .. هتلاقي اسم دكتور رفعت اسماعيل مكتوب من تحت خالص باللون الاحمر
دوسي عليه هتلاقي نفسك في صفحة التعريف الخاصه بالشخصيه الاسطوريه دي

وربنا يستر واللي باقي من المذنكرات يحوز على اعجابك واعجاب كل اللي بيقرولي

وربنا يسعدك ويكرمك ويبسطك ويوفقك ويرضيكي دنيا وآخره يارب



سلامووووووووووز

Soooo يقول...

appy

من النهارده مافيش دراكولا
انا دراكولا
انا دراكولاااااااااااا

لا ياستي .. انا ماقدرش على زعلك
وما اقدرش اخبي دراكولا اكتر من كده
خصوصا انه عليه حمل ودور كبير تجاه الوطن

وانتي ازيك وايه الاخبار؟؟؟
ماداهيه تكوني كويسه ومبسوطه

وش واحد بيطلعلك لسانه وبيرقص حواجبينه


سلاموووووووووز

Soooo يقول...

خمسة فضفضة

انتي هتقوليلي على الحر
طب ده انا باشغل التكييف وباقعد من غير هروم وبرضه عرقان

الاقيش عندك اي دوا للحوار ده؟؟؟

وربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووز

Soooo يقول...

كيكى

كيكي كيكي انت صديكي

طب والله بافرح بطلتك وبتعليقك

وبعدين ياستي انا والله طالع عيني
لكن قريت كل مواضيعك ومتابعك بس الصراحه الصراحه .. جريت من غير ما اعلق
بس حاضر ياستي هاجي اقرا واقولك على شوية حاجات صغنغنه

وربنا يسعدك ويوفقك ويكرمك ويبسطك ويرضيكي دنيا وآخره يارب



سلامووووووووووز

Soooo يقول...

ňįĝŗő

حليب هارتي
قصدك ايه يعني بعامللك استبحس؟؟
لاااا
خللي الزوايا تكتر والناس تتفرق اكتر وكل نص شيخ يطلع ويعمل خطبة جمعه خاصه بيه والناس ماتبقاش عارفه ايه فين
خللي الناس تبني زوايا تحت بيوتها وبالمره العوايد ماتطالبهمش بفلوس
خللي الشعب يعيش

وياسيدي خلاص فكرت وقررت ومش ماشي
بس ربنا يستر وماتقعدوشتقولو امشي ياعم وبطل تدوين وماتخوتناش

وربنا يسعدك ويبسطك ويكرمك ويوفقك ويرضيك دنيا وآخره يارب



سلاموووووووووووز

Soooo يقول...

كراكيب

يالهوي
من اولها كده مش موافقه
طب انا اعمل ايه طيب
اقولك
امسكي مهاميهو وعذبيها
خليها ماتنامش اربع ساعات ورا بعض

ولا اقولك .. خليها تقعد تقرالك الحلقات اللي فاتت وانتي في اخر اليوم ابقي شوفيها بجوز جنيهات ولا رغيف لانشون

وياستي المذكرات والمدونه وصاحب المدونه تحت امرك
وياريت تعتبري مدونتي زي مدونتك تمام وتنوريني بزياراتك وبتعليقاتك يارب

وربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووووز

Soooo يقول...

شيماء سمير

اهلا ببنت كليتنا واللي رافعه راسنا

ياستي ابقى اقري المذكرات على اقل من مهلك

والحمدلله ان كلامي عن الفيلم اللي عملتيه عجبك .. بس ده لانه بصراحه عجبني وحسيت بمدى المجهود والتعب اللي تعبتيه فيه

وربنا يسعدك ويوفقك ويبسطك ويكرمك ويرضيكي دنيا وآخره يارب



سلاموووووووووز

Soooo يقول...

ftafeet

ياستي اقريهم براحتك وعلى اقل من مهلك
بس اعملي حسابي في الميرندا والشندوشتات

واعتبري مدونتي زي مدونتك تمام وياريت تشرفيني بتعليقاتك وبزياراتك دايما

وربنا يسعدك ويكرمك ويبسطك ويوفقك ويرضيكي دنيا وآخره



سلاموووووووووووز

Soooo يقول...

NIDAAL PAL

عارف يابو النضاضيل
ضحكتك دي والله ليها عندي ليها معاني كتير
مش ضحكتك انت لوحدك
لا
ضحك الناس اللي بتقرالي وممكن تضحك من كلامي
باقول لنفسي ساعتها الحمدلله اني عرفت اعمل حاجه

ربنا يسعدك ويكرمك ويبسطك ويوفقك ويرضيك دنيا وآخره



سلامووووووووووز

Soooo يقول...

أحسن تـستاهـل

مهاميهو يابنتي
انتي مش بنتي

ياستي ولا تضيقي عينيكي ولا حاجه
ريلاكس خالص وتابعي الحدوته وربنا يستر وتعجبك يارب

وربنا يسعدك ويكرمك ويبسطك ويوفقك ويرضيكي دنيا وآخره يارب

ملحوظه
الحمدلله ان المذكرات عجبتك وبقيتي بتجيبي زباين للمدونه زي ماجبتي كراكيب .. واوعدك .. ليكي نسبه .. فيفتي فيفتي ياستي

سلامووووووووووز

Soooo يقول...

الفراغ

وعليكم السلام ورحمة الله وبركاته

اهلا بيكي يافندم في اول زياره ليكي ويارب تفضلي متابعاني وتنوري المدونه وتعتبريها زي مدونتك تمام وتشرفيني بتعليقاتك

والحمدلله ان الكلام اللي بقوله عجبك وربنا يكرمك ويسعدك ويبسطك ويوفقك ويرضيكي دنيا وآخره يارب



سلامووووووووووز

Soooo يقول...

اهو ده عيبه

خبر ايه يا دوللي
انتي عايزه المذكرات تبقى مستمره مدى الحياه ولا ايه

وبعدين ياستي ماتقلقيش
لو المذنكرات نجحت .. ممكن اعمللها اجزاء تانيه
وتابعونا تجدو مايسركم بعون الله

وربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووووز

Soooo يقول...

shayma

يا شيمو يابنتي المشكله مش في ان البلد كلها تبقى جوامع وزوايا
هو حد يكره اننا نذكر الله ونصلي في بيوت ربنا
المشكله ان كل يوم جمعه تلاقي جامعين ولا زاويتين في وش بعض وكل زاويه منهم فيها بتاع عشرين تلاتين اربعين نفر

طب ماتخلوها بالتبادل ياجدعان وتلمو الناس يصلو كلهم مع بعض في زاويه واحده

وبعدين اكروتكم ايه بس
انتو شكلكم اتعودتو على الحلقات الدوبل

وعموما ياستي هانت .. كلها كام حلقه وتخلص وربنا يستر وتعجبكم يارب

وربنا يسعدك ويبسطك ويوفقك ويكرمك ويرضيكي دنيا وآخره يارب



سلاموووووووووووز

Soooo يقول...

ست البيت

؟؟؟؟؟؟؟؟؟؟
خبر ايه يابنتي؟؟؟
انا والله العظيم مافاهم حاجه من كلامك

بتعتذري على ايه؟؟؟
لو كان قصدك انك تعتذري عشان ماتكلمناش مع بعض فياستي الجايات اكتر من الرايحات ومش مستاهله اعتذار

اما لو بتعتذري عشان عزومة بلبع
فلااااا
مش مسامحك بتاتان

روقي ياستي
انا والله العظيم سعيد اني اتعرفت على انسانه محترمه زيك

وربنا يارب يسعدك ويكرمك ويبسطك ويوفقك ويرضيكي دنيا وآخره
روقي بقى



سلامووووووووووز

Soooo يقول...

الجدة فصيحة

وعليكم السلام ورحمة الله وبركاته ياجدتي

حلو قوي الاعلان ده
حسسني اني قاعد باقرا حاجه لنبيل فارقو
لدرجة اني انا نفسي سخنت وعايز اعرف ايه اللي هيحصل

ربنا يسعدك ويبسطك ويكرمك ويرضيكي دنيا وآخره يارب

ملحوظه
كان نفسي اتعرف على حضرتك لما رحت اسكندريه في لقاء المدونين
لكن ان شاء الله خيرها في غيرها



سلامووووووووووز

الـسـيـدة نـون يقول...

ابنك ابنك ابنك
لحد ما حسستنى انك جوزى انتساب
ههههههههههههههههههههههههههه

انت يا واد يا سوووو
بتجيب الافكار دى منين


الحكاية احلوت اوى وواضح ان النهاية خلاص قربت
يا مسهل

Soooo يقول...

بت خيخة وأى كلام

باجيب الافكار دي من دماغي

بس تقريبا دماغي دي مسوسه لدرجة انها مش هتخليني اعرف اعيش ولا اكتب حاجه في البلد دي


وهي هانت فعلا
كلها شهر وكل واحد يروح لحالو

وربنا يسعدك ويبسطك ويكرمك ويوفقك ويرضيكي دنيا وآخره يارب



سلاموووووووووووز