الأربعاء، ٣٠ جمادى الأولى ١٤٢٩ هـ

(19)مذكرات طفل .. طخين

(المحطة التسعتاشر .. سيس – هاع (2
--------------------------------

عيد : مصيبه .. هنروح كلنا في مصيبه
ابويا : ياساتر يارب .. مصيبة ايه يا ابني؟؟
عيد : البيج بوص .. الراجل الكبير
امي : مالو .. عيان ولا حاجه ؟؟
عيد : عيان ايه بس .. البيج بوص جاي في السكه
------
مصطفى شعبان : خلاااص .. كللو ألسطه وميت فل وعشره
منى زكي : ضربت بطاقه لسوووو ؟؟؟
مصطفى شعبان : لأ طبعا
توفيق عبد الحميد : طب ضربت سوووو ؟؟
مصطفى شعبان : لأ برضه
منى زكي : امال انت عملت ايه؟؟؟
مصطفى شعبان : مافيش .. ضربنا بطاقة ابو سوووو .. وبقو تابعين لمحافظة القاهرة رسميا
يدخل عليهم اللي كان عامل بتاع البليله واتضح انه معاهم في الجهاز .. وهو يبتسم ومنشكح قوي ويقول
بتاع البليله : بس يا جدعان .. المشكله بتاعة سوووو وحوار محافظة حلوان ده اتحل
يتجه اليه مصطفى شعبان وهو مندهش .. حيث انه لم يكن متفقا مع منى زكي وتوفيق عبد الحميد في إخبار أي شخص من الجهاز .. خشية أن يصحو ضمير هذا الشخص وهي مش ناقصه صحوة الضمير العربي خالص في الليله دي .. وقال له درش
مصطفى شعبان : حوار سوووو اتحل .. ازاي ؟؟؟
بتاع البليله : محافظ حلوان قال لمحافظ القاهره مش هينفع تديني عزبة الوالده في حلوان بالعشوائيات اللي فيها .. وتديني معاها كمان ترب اليهود والمجزر الآلي في البساتين .. خدو البساتين وخلوها تبع القاهرة .. عشان هي مش ناقصه تدوني الرايش بتاعكم واتبلي بيه لوحدي
منى زكي : وبكده بقيت البساتين اول مركز في محافظة القاهرة
توفيق عبد الحميد : وبكده بقى سوووو تحت سلطة الجهاز زي ماكنا
مصطفى شعبان : وبكده يبقى ضاع علي فلوس ضرب بطاقة ابو سوووو
------
دراكولا : سمعت طراطيش كلام ان في غزو هيحصل علينا
سوووو : غزو ؟؟
دراكولا : ايوه غزو .. مصر طول عمرها فيها خير كتير قوي .. وطول عمر الدول والحضارات اللي حواليها نفسها انها تاخد خيرها ده
سوووو : طب والغزو ده كان من مين؟
دراكولا : من ناس اسمهم الهكسوس
سوووو : آآه .. سمعت عنهم
دراكولا : الفرعون أحمس سمع استشارة واحد من الوزرا بتوعه .. عملو حرس جديد اسمه الحرس الوطني .. وكل اللي في السجون خرجوهم عشان ينضمو للحرس ده .. كان الهدف من الحرس ده انه يبقى اول خط دفاع في الحرب .. وعشان هم مجرمين وكده كده محكوم عليهم يا اما بالحبس طول العمر او بالاعدام .. المساجين وافقو
سوووو : ايه الاستعباط ده .. السجن طول العمر او الاعدام .. هو مافيش جنح على ايامكم ولا حبس خمس ست شهور؟؟؟
دراكولا : كان في طبعا .. بس هم ماخدوش غير المساجين اللي كده كده رايحين في الكاظوظه
سوووو : كاظوظه .. ده انت شكلك دراكولا من امبابه .. كمل
دراكولا : بعد ماتم تظبيط اول مجموعه من المجرمين وادوهم سلاح ورحلّوهم على حدود مصر عشان ياخدو مواقعهم الدفاعيه .. حصلت حاجه اغرب من الخيال
سوووو : والله يا دراكولا ياخويا .. من ساعة ما ابتديت في الحكايه دي وانا مش مستغرب حاجه خالص
دراكولا : واحد من المساجين دول كان في الاصل ساحر .. عمل تعويذه ورماها على اول مجموعة من الجيوش بعد ماراحو مواقعهم الدفاعيه
سوووو : تعويذه .. تعويذة ايه .. وازاي عمل التعويذه بعد ماطلع من السجن ولما كان في السجن ماعملهاش ؟؟
دراكولا : يابني افهم .. هي التعويذه دي مش بتبقى محتاجه حبشتكانات .. دم وطواط يتيم على دكر نمل اثيوبي على شنب قنفد عازب .. الحاجات بتاعة السحره وكده
سوووو : يعني هو انتهز فرصة انه طلع من السجن وجاب الحبشتكانات دي وراح عامل التعويذه
دراكولا : بالظبط كده .. وبعد ماعملها راح مِقَّرّي على الجنود بتوع الحرس الوطني .. ومن ساعتها الجنود دول بقو مابيموتوش .. وبيتغذو على الدم .. يعضو أي حد ويشربو دمه ويمصّوه .. وبعدها اللي اتعض بيتقلب ويبقى زيهم
سوووو : وقامو عضوك انت
دراكولا : انا اللي رحتلهم بنفسي عشان يعضوني
سوووو : ليه يعني؟؟
دراكولا : عبيط .. كنت فاكر انهم لما هيعملو كده هقدر انتقم من الظابط بتاع القسم
سوووو : وعضيته على كده ؟؟
دراكولا : وبعد ماعضيتو بقى دراكولا وبيمص دم الناس .. مش كده وبس .. ده بقى اكبر مصاص دم في الحرس الوطني كللو .. وبقى هو الرئيس كمان
سوووو : يا حلاوتك .. يعني الرئيس ده لسه عايش على كده ولا راح في الوبا ؟؟
دراكولا : لسه عايش .. وبياخد اشكال كتير على مر العصور .. وفي كل مره يعمل انه مات ويرجع من اول وجديد بشكل تاني
سوووو : طب وعلى كده في حد معاه وبيساعده ولا هو لوحده ؟؟؟
دراكولا : كل رئيس حواليه مصاصين الدم اللي بيساعدوه ويمصو دم الناس الغلابه .. والمساعدين دول بيعملو نفس اللي بيعملو الرئيس في كل فتره لما يلاقي الناس الغلابه هتنفجر من اللي بيحصل فيهم .. يغيرو اشكالهم .. والرئيس يقول انه بيعمل تغيير مساعدين
سوووو : كويس انه مابيقولش تغيير كبالن
دراكولا : ميييين؟؟؟
سوووو : لا ماتحطش في بالك .. طب وانت دلوقتي ناوي تعمل ايه .. ومستخبي هنا ليه ؟؟
دراكولا : انا مستخبي هنا بالذات عشان ده ابعد مكان ممكن يجي في بال رئيس الحرس الوطني .. وباتكتك واخطط للحظه المناسبه عشان اموته بجد .. وبعدها ابقى اموت نفسي
سوووو : طب وتموت نفسك ليه .. ماتقتله وبعدين تبقى انت الرئيس
دراكولا : المنصب بيغير حاجات كتير في الواحد مننا .. وانا بصراحه زهقت من العيشه وعايز اموت وارتاح .. انا عايش بقالي كتير وشفت ناس كتير اتمص دمهم وانا ساكت .. لكن هايجي اليوم اللي انتقم فيه من اللي كان السبب
سوووو : الله معاك .. بس في حاجه انا مش فاهمها .. انت كنت عايش ازاي طول الفتره دي من غير ماتمص دم حد .. ولا كنت بتمص برضه ؟؟؟
دراكولا : - متلعثما - ايه ؟؟؟؟
------
بعد ما سونيا جراهام وسامبا عرفو ان البيج بوص جاي في السكه .. قامو اتفقو مع ابويا وامي انهم هيربطوهم وعملولهم شوية مكياج كأنهم ضربوهم وبهدلوهم .. عشان البيج بوص لما ييجي ويشوفهم عاملين كده يفرح ويصرفلهم اوفر تايم .. وفعلا ابويا وامي كانو متعاونين جدا .. يعني مايرضيهمش ان الناس الغلابه دول يتئذو بسببهم .. وبعد ماربطوهم وكممو بؤهم وكللو بقى فل الفل .. دخل البيج بوص المخزن المهجور
.. وبخطوات كلها ثقه وحزم .. دخل الاوضه اللي فيها ابويا وامي
وكان البيج بوص ده .. هو نفسه ..
الدكتور.. رفعت اسماعيل
------
يتبع

سوووو

هناك ١٠٠ من التعليقات:

كاميليا بهاء الدين يقول...

اقول ازيك؟

واروح اقرا

وارجع تانى

تحياتى

كاميليا بهاء الدين يقول...

اااه

كده دخلنا جد

دراكولا ده طلع فيلسوف كبير

وواضح إنه عنده اسرار كتير

.....

مبروك عودة البساتين للقاهرة
سالمة ، يارب ياخدوا بالهم منها بقى

مش تتأخر علينا بقى

أنا فعلا فى انتظار القادم

تحياتى واحترامى

خمسة فضفضة يقول...

السلام عليكم ورحمة الله وبركاته
ماشاء الله ماشاءالله

لا بجد العمليه بدأت تحلو وتسخن

وكويس اوي انك بدأت تطول الحلقه شويه

يلا الحقنا باللي بعده

سلام

Unknown يقول...

بص بقى عشان من الاول كدة ما نخسرش بعض احرق مصطفى شعبان ولع فى منى زكى اخنق سونيا جراهام مص دم دراكولا لكن رفعت لااااااااااااااااا ماحدش يقدر يقول اى حاجة على الراجل اللى زى الفل دة وبعدين سورى يعنى رفعت دة خطيبى وانا ما ارضاش تشوه صورته وبعدين افرض ماجى سمعت الكلام دة هتقول ايه علينا ؟؟ بص رفعت دة اكتب عنه كلام زى الفل اقولك قول اللى انت عايزه وبعدين ابقى قول انه مش رفعت وانه احد سادة جانب النجوم او قول ان سام كولبى هو اللى غلطان ايوة وجدتها.. انت تقول ان دكتور لوسيفر هو السبب وان دى اوهام ماشى؟؟؟

غير معرف يقول...

عااااااااااااااااااا

ههههههههههههههههه
انا عايزة اقولك انى اول ما شفت اسم الدكتور رفعت اسماعيل رفصت فى الارض من كتر الضحك

تحفه يا سوووو بجد
بس انا بحب رفعت اسماعيل مطلعه شرير ليه يا سووووووو


جامده الحلقه ولا الحرس الوطنى وحكايته السوده
جامد يا سوووو

وكله كوم ودخله البيج بوس كوم تانى خااااااالص

والنبى يا سووو متخليهوش شرير خليه فى الاخر يطلع طيب لحسن ده حبيبى من ايام الجيزة
:))))))))

سلامى يا كبير
:))

غير معرف يقول...

يا سووووووووووو فرنسا رجعت ومنزله بوست جديد

يوميات فنانه مفروسه جداا يقول...

ما شاء الله جميله الحلقه كالعاده منتظرين الجديد
تقبل مروري
سلام

Z_Diva يقول...

يلااااااااااااااااااااااااا

و الكلام كبر قوي قوي يا معلمي
بقى "لبه-على-قفاه" لسه عايش لا و بيتحور كمان, ليه ؟؟؟!!!! ميتامورف يعني, همم ماشي ماشي :)))))

ولا كله كوم و البيج بوص كوم تاني -بس كده بقى فعلام البيج بورص-
والله شايفاه حبيب قلبي رفرف, و هو يرتدي بذلته الكحلية التي تجعله فاتنا, و يدخن كالقطار البخاري, و يشعر بما يشعر به الخرتيت البري في الوحل, اي و الله زي ما بقولك كده

متتاخرش بقى في الحلقة القادمة, و يا ريييت تطول الحلقات شوية عشان حاسة ان حلقة اليوم كنت عاملة دايت, و الواحد ما لحقش يندمج مع التطورات و هوب لاقيتها فيرتيش :(((

ميه ميه والله يا سوووو

2ensan wnsan يقول...

بص بقى كده يا برنس انت ممكن تمسك في سونيا جراهام وايزاك وقدري كمان لوحبيت بس ابعد عن رفعت اسماعيل دا خالص دا تبع الرعب وممكن يكون هو اللي بعتلك الدراكيولا دا على فكره

ومش بعيد يبعتلك النداهه ولا اي زومبي معدي في الشارع ولا حاجه


الموضوع شكله سخن عالاخر وشكلها هتبقى هيصه

وبيتهيألي ان دراكيولا الغلبان هيطلع في الاخر مختل عقليا وياخدوه على مستشفى الاحمسيه اللي في منف بدل العباسيه وهيتروق يا معلم

بنوته مصرية يقول...

هههههههههههههههههه

حلوة الناس اللي مش بتموت دي

ودركولا ده اكيد مش بيشرب دم ده بيشرب شربات علشان دمه خفيف ههههههههههه

منتظرة اشوف البيج بوص هيعمل ايه مع باباك ومامتك اكيد الحوار هيبقي حلو اووي

ميرسي علي الصور اللي ادهالي احطها في البوست الحريمي ههههههههه

الصورة معبرة علي شخصيتي انا وخيخه ههههههههه

تحياتي

aya يقول...

اولا : ايه حكايتك مع امبابة؟

ثانيا : هما الحرس الوطنى دول قدام اوى كده؟

ثالثا:ايه الزحمة اللى حصلت فى الاخر ديه

رفعت اسماعيل؟


ده والله والموضوع هيحلو

انا بحب الراجل ده

فى انتظار بقيت المغامرات يا سوووو

تسلم دماغك

wanna b a physician يقول...

يا ماشاءالله يعنى الظابط اياه ده لسه موجود هو كمان وهو الغبى مش فاهم انه لما يعضوه هيتحول زيه
حتى دراكولا طلع اهبل لا اله الا الله
طيب والنبى ياحج اسأله كدا محدش عض احمس ولا حاجة يجى ينقذنا بقا
لا وعمل عبيط كمان لما بتقوله انت عايش ازاى يانهار
دراكولا دراكولا يعنى مش اى كلام
هبل على عبط ميه ميه قشطة

كيكى عوووووو يقول...

ههههههههههههههه اخيرا كتيبت حلقة جديدة جميلة كالمعتاد...امال فين ادهم صبرى....

غير معرف يقول...

ما تغيبش علينا يا سوووو عشان خاطري
(وش بيعيط) اعمل معروف يا ابني (وش بيتشحتف) حس بينا (وش بيستعطف) آاااااااااه (لا ده وش باه بيشد ف شعره وبيجري)

Unknown يقول...

ههههههههههههههههه انت بجد عسل يا سو مش ممكن علي عقلك

هاتفضل ورا الوطني لحد مايعصروك و ينزلو منك كام سووو صغيرين

بس بجد الحلقه دي تجنن

و موضوع تغير الشكل و مص الدم عبقري فعلآ

متعملي تعويزه علشان انجح

تحياتي يا سووووو

Asmaa mahaba يقول...

انا 14 هيييييييييييه برب اقرا وارجع

Asmaa mahaba يقول...

هع هع هع هع مين دخل دراكولا فى الفراعنه ومالها حلوان ان شاء لله ....كدا الغلط مش كويس
ومعترض على لتقسيم ليه طب دا حتى التقسيم بيخلى العصابه الحقيقيه اللى هم اصل دراكولا نفسه شارب دماء لمصريين يغرفوا يسيطروا اكتر...ويغلوا كتر
توفيق عبد الحميد : طب ضربت سوووو ؟؟
هههههههههههههه خساره خساره على انها محصلتش
على فكره انا كان بقيلى شعره ولسعت الله يرحمها بسببك
بس تعرف الموضوع شكله حيولع
تحياتى ليك سومه_87

غير معرف يقول...

يا أخى الواحد مش عارف يعلق يقول ايه الناس خدت الكلام من على لسانى .. فعلا الموضوع دخل فى الجد .. انا قلبى كان حاسس من الحلقة الى فاتت ان دراكولا ده جامد .. اهنيك يا سوووو على العمق و على الخيال .. بجد دماغك حلوه .. استمر

غير معرف يقول...

خليك معايا يا سوووو و اتبع التعليمات .. دوس على الينكات الى تحت بالترتيب هتوصلك ان شاء الله

1- لوحة التحكم الرئيسة
2- التخطيط
3- عناصر الصفحة
4- اضافة عنصر صفحة
AdSense
اضافة الى المدونة الاكترونية
انشاء حساب


على فكره الحساب بالنقرة يعنى كل ما حد يدوس على اعلان الحسابة تحسب .. بس خلى بالك كويس اوى انك لو دوست انت على الاعلانات كتير او خليت شوية ناس يدوسوا عليها كتير علشان تعد فلوس جوجل هتعرف و هتخرجك بره الخدمة خالص .. يعنى احسن حاجة ان كل ما حد يدخل عندك علشان يقرأ تدوينة يضغط مره واحده على كل اعلان و يكرر نفس الشئ المره الى بعدها و هكذا .. فهمت حاجة؟؟

حاجة كمان الاعلانات الى مكتوب عليها public service دى ببلاش.

الـجـدة فـصـيـحـة يقول...
أزال المؤلف هذا التعليق.
الـجـدة فـصـيـحـة يقول...

السلام عليكم ورحمة الله وبركاته

بيعجبني تعليقاتك على الأمور اللي بتحصل في البلد من خلال مذكرات وشخصيات المذكرات وبشكل كوميدي ساخر جميل

دركولا كلامه جميل جدًا
لكن نسى يقول ان مصاص الدماء لا يظهر إلا عندما يكون هناك فرائس ضعاف يستطيع أن يعيش على مص دمائهم .


رفعت اسماعيل
اممممممممم
شخصيته محبوبة جدًا
وهو نفسه شخصية ساخرة اكيد وجوده في القصة هايكون جميل جدًا

تحياتي

nigro يقول...

أحمد
أنا جبت الحلقات من أول ما كنت واقف
أحمد
دي احلوت قوي و سخنت قوي
بجد يا احمد أنا فضلت طول الحلقة مارمشتش
خايف أطلع بره التعايش معاها
يخرب عقلك
هي دي بداية العقدة اللي بتبقى في الروايات
أصلها لو دي تبقى انت بتلعبها صح
و صح قوي
الله عليك

بس قولي يا أحمد هو أنا لو سألت مين الدكتور رفعت اسماعيل ده أبقى جاهل ولا حاجة؟

برافو يا أحمد و مستني اللي جاي بصابر الفرغ

يلا سلام يا عبقري

. يقول...

ها؟
هو الي انا فهمتو ان انتا جامد جدا
جدا
تحياتي

Eldebug يقول...

اوبااااااا ... بص يا سووو اول ماتسمع تخبيط على الباب قولى علشان افك يا معلم
انت كده دخلت فى الغويط اوى سب وقذف وتشهير والتستر على محاولة اغتيال ... اقلك على حاجة الحق خلى دراكولا يعضك عضتين كده علشان تعرف تقضى الحكم بتاعك بقى ... هوه مينفعش اعمل التعليق ده انفيزابل ولا ايه ... انا هاكلم بتوع البلوجات فى الموضوع ده
سلاااااام

زى الهوا يقول...

ابقى شوف تعليقى فى مذكرات طفل طخين 18 اللى قبل دى يعنى

عًٍمًرٌٍوٍ آلنْوٍبٌَِى يقول...

سوووووو

الحلقة تحفة يا معلم وعاجبنى اوى دور دراكولا وخلاص ياعم مشكلة البساتين اتحلت
عقبال باقى المشاكل

انا مشتاق جدا لباقى الحلقات

اوعى تتأخر علينا

هستناك بعد نشرة 9 عطلوووووول

تحياتى ليك يا ريس

ست البيت يقول...

شكلها كده حتحلو قوي لما رفعت اسماعيل يدخل في موضوع لازم يبقى فيه ديراكولا ومصاصين دماء مساعدين وسحر وخلافه
مجنووووووووووون بس موهوووووووووووووب

اهو ده عيبه يقول...

ازيك يا سووو

بقى الدكتور رفعت اسماعيل هو البيج بوص طب تيجى ازاى دى هههههه

عارف اكتر حاجه عجبتنى حوار مص الدم ده ورئيس الحرس الوطنى اللى بيتغير بتغير العصور هو واعوانه والمعنى فى بطن سووو طبعا

يالا يا بطل عايزين نعرف باقى الحكاية اللى شكلها هتبدا تاخد منحنى جديد
حلوة منحنى دى
مع السلامو عليكم

دعاء مواجهات يقول...

هههههههههههههههههههههههههههههه

بجد جميل اوى اسلوب الحكى

والتهييس العالى بردو عاجبنى

انتظرك...

مجداوية يقول...

السلام عليكم
أراك على خير أخى الكريم

عميق شكرى وامتنانى لتواصلك معى وان كان قليلا لكن هو شكر واجب وخاصة انه كان تواصلا فيه كل الاحترام والرقى

دعائى لك بكل الخير والنجاح
والسلام عليكم ورحمة الله

Asmaa mahaba يقول...

انا منزله بوست نميمه عليك فى المدونه وفى هيصه وشغب كتير هناك
تعالى شوفه بقى:))))
سومه_87

Sha2loob يقول...

سووووووووووو
انت لما قتلي ان رفعت اسماعيل هيظهر متخيلتش أبداً انه هيبقى البيج بوص
لأ وبيج بوص على مين, على سونيا؟ (وش واحد مذهول)
مش مشكلة, أهو مرة من نفسه حد ينصفه ويخليه محرك للأحداث, بدل د. أحمد خالد اللي مخليه دايماً جعلوه فانجعل
يلا يا سوووو كمل, أنا مستني (وش واحد عجز من كتر الانتظار)
سلااااااام

YHYيــوســف الـمصـرى يقول...

السلام عليكم
..........
سوووووووو باشا أبن منطقتى

احسن حاجة انك طمنت قلبى واتأكدت انى قاهرة مش حلوان :)

يخرب بيت عقلك بجد انا موت من الضحك بذات على الحج دراكولا اطال الله عمره هههههههههه

بقلك ايه عايزين نتقابل يوم الجمعة الى جيا أن شاء الله ....
فى افتكاسة كده عايز اخد رأيك فيها ;)
تحياتى :)

رحــــيـل يقول...

سوووو

الموضوع بدا يدخل فى الغامق وكمان بدات الاحداث توضحلنا بلاوى كتير
بس بجد انت هايل ورائع

ترابط الاحداث ببعض جامد قوى وخيالك عالى قوى ياسوووو

تعرف انا دايما شخصيه دراكولا دى من زمان احس انها طيبه بس الزمن بقى جار عليه
هههههههههههههههه

تحياتى وتقديرى

tamer.sala7 يقول...

دراكولا ده في الاخر حيطلع رمز لحاجة كدة في بالي والله اعلم مش عايز اسبق الاحداث

همس الاحباب يقول...

دراكولا : يابني افهم .. هي التعويذه دي مش بتبقى محتاجه حبشتكانات .. دم وطواط يتيم على دكر نمل اثيوبي على شنب قنفد عازب .. الحاجات بتاعة السحره وكده
تصدق احنا محتاجين تعويذة من بتاعت دراكولا
دراكولا : لسه عايش .. وبياخد اشكال كتير على مر العصور .. وفي كل مره يعمل انه مات ويرجع من اول وجديد بشكل تاني
سوووو : طب وعلى كده في حد معاه وبيساعده ولا هو لوحده ؟؟؟
دراكولا : كل رئيس حواليه مصاصين الدم اللي بيساعدوه ويمصو دم الناس الغلابه .. والمساعدين دول بيعملو نفس اللي بيعملو الرئيس في كل فتره لما يلاقي الناس الغلابه هتنفجر من اللي بيحصل فيهم ..
بجد الجزء ده رائع جدا وبيشير لحاجات جامدة قوى قوى
بصراحة الحلقات بدات تحلو قوى قوى والخيوط العامة بدات تظهر قوى
البيج بوص هو نفسه الدكتور رفعت اسماعيل ؟؟؟؟؟
تسلم دماغك بجد
تحياتى وسلاموووووز

كيكى عوووووو يقول...

انت فين.....يارب خيررررررررررررر..بس بكلم وانا زعلانة بقالك فترة مش بتعدى لية..ياعم التوك توك 50جنية بس..هستنك

بنت مصريه يقول...

ايه الجمال دا يا سوووو
يابنى اشتغل سيناريست
والله بجد هتكسب دهب
صدقنى هههههههههههههه
احييك

•√أريـ السمر ـج√• يقول...

حقيقى حلوة جدا جدا ..

انا حتابع الاجزاء الاولى ..

الاسلوب رائع و متميز اوى اوى

سلم قلمك

دمت بكل الخير

إنجى يقول...

ازيك يا سووو

بقالي كتير قوي ماجيتش هنا
يمكن من الحلقة الرابعة عشر
بس قريتهم كلهم

تسلم ايدك ياسوو
بجد قصة حلوة جدا
شكلها قلب سياسة
وحنشوف حاجات جامدة

شكرا علي البسمة اللي بترسمها في عيونا
ربنا يكرمك

تحيتى

انجى

دكتور كسلان يقول...

ازيك يا سووو

حلوة اوى الحلقة دى
خصوصا الحوار بينك وبين دراكولا
هما فعلا بيصوا دمنا فى كل وقت وباى طريقة
مرة يعملوا اشتراكيين وشوية انفتاحيين
وشوية راسماليين المهم النتيجة واحدة
ودلوقتى بقى مص الدم بالوراثة


بالراحة على دكتور رفعت
الراجل صاحب مرض

سلاااااااااااااااااااااااااااااااااااام

ojg يقول...

الباشا الكبير سوووو
كلام جامد قوووووووووي بس ياخوفي بعد الكلام اللي قلته على الحرس الوطنى مش نشوف الحلقة اللي جاية أو تكتبها من وراء الشمس مثلا
ربنا يستر عليك يابني
بس ياريتك كنت كملت المذكرات قبل التصريحات الخطيرة التي بين السطور دي
عموما إنت عارف انا اتشوقت اد ايه لما جبت سيرة سي الدكتور رفعت وياريت مش تنسى تتكلم عن البدلة الكحلي بتاعته عموما أنا كنت شاكة فيه من زمان انه زعيم عصابه ومتنكر
أصل مفيش حد يعني بالطيبة اللي هو فيها في ماوراء الطبيعة دي
لزمن ولابد انه وحش ومستخفي أو عفريت ومستخبي
ياللا مستنية الجديد
يا بتاع الجديد كله
;)

Dr. Ibrahim يقول...

لقح لقح يا عم سووو

على الله هما يفهموا لانى عارف ان هما مش هيفهموا

مع انك دخلت تكوين الجيش الأمريكى من السجون فى تكوين الحزب الوطنى

على التوريث فى الحكم

بس أهو كله محصل بعضه

تحياتى

د/هيما

Soooo يقول...

كاميليا

الف الف الف مبروك ياعروسة المدونين وربنا يباركلكم في بعض

ولو حصل منه حاجه كده ولا كده قوليلنا .. ده احنا اخواتك وهنعضو لو فكر انه يضايقك
وان شاء الله مش هتقوليلنا حاجه لانه ان شاء الله مش هيحصل حاجه .. لانه واضح من كلامك انه ابن حلال وانتي كامي فوندامي .. يعني ان شاء الله هتكونو ستر وغطا على بعض وربنا يارب يكرمكم ويسعدكم ويبسطكم ويوفقكم ويرضيكم دنيا وآخره يارب


من طرف اخوكي اللمبي




سلاموووووووووووز

Soooo يقول...

خمسة فضفضة

وعليكم السلام ورحمة الله وبركاته

الحمدلله ان العمليه ابتدت تسخن ويارب تعجبك وتعجب كل المتابعين يارب

اما بالنوسبه لتطويل الحلقه .. فدي حضرتك حلقتين في بعض مع اختصار بعض الحاجات .. وعملت كده عشان اسخن الاحداث شويه وعشان الايقاع مايقعش منني

وان شاء الله .. الجاي هيعجبك

وربنا يسعدك ويكرمك ويبسطك ويرضيكي دنيا وآخره



سلاموووووووووز

Soooo يقول...

enjy

اوباااا .. شكلك كده هتغتاليني في ميدان طلعت حرب بعد اول حلقه

وعموما ياستي لا تقلقي .. دكتور رفعت راجل شيك شيك شيك .. مايقلش عن سونيا جراهام حاجه
الاتنين شخصيات خياليه

وبعدين انا عايزك تقعدي تفكري كده في مبرر لتحولو للاجرام اللي هو بقى فيه

وبرضه عايزك تفكري ليه واشمعنا وازاي .. وبعد ماتفكري .. ابقي قوليلي اعمل ايه

وربنا يكرمك ويبسطك ويوفقك دنيا وآخره يارب



سلامووووووووووز

Soooo يقول...

shayma

الحمدلله انك ضحكتي ويارب تكون دخلة الدكتور رفعت عجبتك

بس حكاية انه مايطلعش شرير .. دي هنكتشفها مع بعض في الحلقات القادمه

وربنا يكرمك ويسعدك ويبسطك ويوفقك ويرضيكي دنيا وآخره يارب



سلامووووووووووز

Soooo يقول...

يوميات فنانه مفروسه جداا

الحمدلله ان الحلقه عجبتك
وانتي تشرفي مدونتي المتواضعه في اي وقت يافندم



سلاموووووووز

Soooo يقول...

Z_Diva

ايه الكلام الكبير قوي ده يا ام زعبولا
يرتدي سيجارته ويشعل بدلته ويشعر كالخروف المشوي
كلام كبير كبير يعني

وبعدين علمك علمك علمك .. حلقة المره دي كانت حلقتين في بعض وانا اختصرت حاجات منهم .. عشان ازود الايقاع شويه وكمان عشان انتي حرقتيلي المفاجأه لما طلبتي منني ادخل الدكتور رفعت في الحدوته .. قلت اظهرو بقى عشان ما حدش يفكر اني شايله على جنب في المخزن ولا حاجه

وتابعونا وستجدو مايسركم ان شاء الله




سلاموووووووووز

Soooo يقول...

wa7ed 2ensan wnsan

ومين قالك ياعمنا ان النداهه مانهدتنيش واني زومبي اصيل

ولكن لا تقلق
دكتور رفعت بتاع الحدوته غير دكتور رفعت بتاع ماوراء الطبيعه
أو يمكن هوا
؟؟؟
هذا ماستعرفوه في الحلقه القادمه
من
مذكرات طفل .. طخين



سلامووووووووووز

Soooo يقول...

بنوته مصرية

حماتي ملاك
انا بلغت دراكولا بكلامك وهو بيفكر انه ينافسني في خطوبة بنتك .. وبالتالي بما ان خيالي مريض .. قتلته في الحلقه الجايه عشان نور ماتلاقيش حد غيري
وهي كده بلطجه

وربنا يسعدك ويكرمك ويبسطك ويرضيكي دنيا وآخره

ملحوظه
انتي وخيخه مالكمش زي اصلا .. هو ريا وسكينه في حد زيهم مثلا؟؟؟؟؟



سلاموووووووووووز

Soooo يقول...

aya

امبابه؟؟
ده الادب امبابه
ده الاخلاق امبابه
انا جبت الا امبابه

والحرس الوطني اتضح انهم من ايام الفراعنه اهو
وبالحقائق التاريخيه الموثقه كمان
انا يعني هكدب عليكي وعلى باقي القراء مثلا

ولو هتتكلمي عالزحمه .. لسه فاضل كتييييييييييير

ده من كتر الزحمه كنت بافكر ادخل في الاحداث علي الكسار واسماعيل ياسين ونجيب الريحاني
بس قلت في عقل بالي .. يلا خليها في الجزء التاني ان شاء الله

وياستي هبلغ دكتور رفعت انك بتحبيه ومش بعيد ينفض لماجي بزياده ويجيلك المدونه بتاعتك يعاكسك




سلاموووووووووز

Soooo يقول...

wanna b a physician

ماهو لو دراكولا كان عارف انه هيحصل كده اكيد ماكانش عمل عملته
انما هنقول ايه .. ساعة القضى .. خير من عشره عالشجره

وبعدين مين قالك ان دراكولا عبيط .. ارجع انت خمستلاف سنه وعيش الحياه هناك وتعالى عيش الحياه
لو فضلت سليم ليك اللي انت عايزه
ده خمستلاف سنه حضاره يادكتره

وربنا يسعدك ويكرمك ويبسطك ويرضيك دنيا وآخره



سلاموووووووووز

Soooo يقول...

كيكى

والله ياكيكي ياختي الحلقات مكتوبه .. بس انا كان عندي ظروف والجهاز بتاعي بيطلع في الروح
وعشان كده تلاقيني مقل حتى في زياراتي للناس
بس ان شاء الله اول ما انزل ويندوز جديده .. هعمل جولة مكوكيه على كل المدونات واقرى كل اللي كاتبينه

وربنا يسعدك ويكرمك ويوفقك ويرضيكي دنيا وآخره يارب



سلاموووووووووووز

Soooo يقول...

maha miho

قطعتي قلبي من العياط يا مهاميهو
بس هعمل ايه
جهازي شكلو اتعض من دراكولا ومابقاش يشتغل غير ساعتين بس في اليوم .. حتى مش عارف اتابع باقي المدونات ولا اعلق فيها

دعاوتك ان ربنا يفرجها علي واجيب جهاز جديد

وربنا يسعدك ويكرمك ويوفقك دنيا وآخره يارب



سلاموووووووووز

Soooo يقول...

EmY

ميمي جزره هنا
يادي النور يادي النور

ربنا يكرمك يارب عالبؤين الحلوين اللي قلتيهم

ولو الوطني عصروني يابنتي مش هينزل منني حاجه اصلا .. هو عاد حاجه فاضله فينا

وبخصوص التعويذه .. انتي ان شاء الله ناجحه من غير اي تعويذات
انتي ادخلي اي امتحان وقولي يارب
وربنا ان شاء الله هيكرمك ويوفقك ويعمي عنك المراقبين عشان تعرفي تغشي براحتك


وربنا يسعدك ويبسطك ويرضيكي دنيا وآخره يارب


سلاموووووووووز

Soooo يقول...

سومه...مجنونه فى بلد عاقل

ياقهلا ياقهلا ياقهلا

يابنتي دراكولا والفراعنه والطني .. وجهان لربع جنيه مخروم اصلا
منين ماتبصي تلاقي خرم يعني

وبعدين انا ولا معترض على تقسيم ولا حاجه
قوام خليتيني معترض

وايه الضحكه الشريره اللي ضحكتيها دي لما توفيق سأل مصطفى اذا كان ضربني ولا لأ
عايزه تشوفيني مضروب وخلاص ولا ايه

وبعدين ايه شغل التلكيك ده .. انتي جايه اصلا مجنونه ولاسعه .. هتلبسيني مصيبه بقى ولا ايه .. هو انا ناقص مصايب


ملحوظه
انا سعيد جدا جدا اني اتعرفت عليكي .. بس انتي ولا مجنونه ولا لاسعه ولا حاجه .. ده انتي ست العاقلين والله

وربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووز

Soooo يقول...

koko

وانا بجد والله مش عارف اشكرك ازاي على مساندتك ليه في حوار الاعلانات ده وشرحك التفصيلي لكل حاجه في العمليه دي

وانا الحمدلله فهمت ايه العباره وجاري تنفيذ الحوار مع اختيار بعض الحاجات اللي سيتم اضافتها للمدونه

وربنا يسعدك ويبسطك ويكرمك ويوفقك ويرضيكي دنيا وآخره يارب



سلاموووووووووووز

Soooo يقول...

الجدة فصيحة

وعليكم السلام ورحمة الله وبركاته

وانا بيسعدني وبيعجبني تشريفك ياجدتي الفصيحه لمدونتي المتواضعه وتعليقك على اللي بقوله

وبخصوص ان دراكولا او مصاصين الدماء بيمصو دم ضعاف النفوس .. اعتقد انهم بيهتم اولا انهم يمصو ضعاف اللي بيعارضوهم لان اللي نفوسهم ضعيفه كده كده مش هيعملو حاجه وغلابه بطبعهم

وفعلا شخصية رفعت اسماعيل محبوبه وساخره بطبعها .. وهو ده اللي مخوفني من رد فعل الناس لما يقرو باقي المذكرات
لكن ربنا يسترها علينا


وربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووز

Soooo يقول...

nigro

الله يكرمك يانيجرو باشا ويخليك عالكلام الحلو اللي قلته
والحمدلله انها عجبتك وانك استمتعت بقرايتها

وياسيدي دكتور رفعت اسماعيل ده شخصيه خياليه كتبها الدكتور احمد خالد توفيق وبطل في روايات ما وراء الطبيعه
ولو دست على الاسم بتاعه اللي باللون الاحمر .. هتلاقيها لينك بتاخدك على تعريف الشخصيه نفسها

وربنا يستر بقى من ظهور شخصيه بالتقل الدرامي بتاعه .. في احداث المذكرات


وربنا يسعدك ويكرمك ويبسطك ويرضيك دنيا وآخره يارب

ملحوظه
انا عقلي خربان خلقه ياعمنا .. مش مستاهله انك تدعي عليه بالخراب اكتر من كده



سلاموووووووووووز

غير معرف يقول...

السلام عليكم ورحمة الله وبركاته

الاستاذ الفاضل احمد سوووو
الحقيقه انا اول مره اعلق عندك وماعرفش حبيت اعلق اقول ايه

بس انا بجد باسبقى مستمتعه جدا وانا باقرى كتاباتك وشايفه انك بتقول حاجات حلوة جدا وباضحك وانا بقراها من كل قلبي

لدرجة ان جوزي في الاول شك انا باضحك ليه ولما وريته كلامك ومدونتك بقى مدمن على قرايتها وقال لاخته وهي قالت لخطيبها وكل العيله بقت بتقراها وبتستنى لما حضرتك بتكتب حاجه جديده عشان نبلغ بعض ونقراها

بس انا لاحظت حاجه ومش عارفه اقولها ازاي بس هقولها وانا عارفه انك مش هتزعل منني لانك فنان والفنان مش بيزعل لما بيتقال ليه نقد من معجبينه


انا ملاحظه ان المدونه بقت واخده طابع مذكرات بس او كلام عن السينما وبس
فين المواضيع التانيه اللي في قوة اول مواضيع ليك واللي بجد كل ما اقراها حتى لو قريتها خمسين مره باضحك فيها برضه
ياريت تنوع في مواضيعك عشان الناس كلها تقرالك لان في ناس انا بقولهم على مدونتك ولما بيقرو ويلاقو انك بتكتب مذكرات وفي الحلقه العشرين بيستكترو انهم يقرو عشرين حلقه بحالهم

انا شايفه انك لو كتبت مواضيع مستقله بنفسها مع المذكرات وكلام السينما هتخلي القراء يتابعوك اكتر والناس بعد كده هتقرى المذكرات من نفسهم لما يلاقو اسلوبك ساخر ومضحك وفي الصميم

طولت عليك عارفه لكن انا حبيت انتهز فرصة انك فاتح التعليق لغير المعرفين وقلت اقولك وجهة نظري وربنا يستر

وتقبل تحياتي
ام أيمن وساره

Soooo يقول...

sad_doraa

اهلا بيكي يافندم في اول زياره ليكي وياريت تعتبري مدونتي زي مدونتك تمام وتشرفيني بتعليقك

والحكايه ومافيها اني باكتب مذكرات طفل طخين
ولو عايزه تفهمي يبقى تقريها من الاول .. بس ده ان شاء الله بعد ماتخلصي امتحاناتك خالص

وربنا يوفقك ويسعدك ويرضيكي دنيا وآخره يارب



سلاموووووووووز

Soooo يقول...

Eldebug

بتؤكدلي بتعليقك ده ان الحكمه اللي بتقول الجري نص جدعنه وفي بعض الاحيان الجدعنه كلها .. حكمه مصريه اصيله
وان قائل هذه العباره مصري اصييييييييل

وبعدين ياعم انت خايف من ايه
عايزين يعملو حاجه يروحو يمسكو دراكولا ويقرروه بنفسهم

نورتني ياريس
وربنا يسعدك ويكرمك ويبسطك ويوفقك ويرضيك دنيا وآخره يارب



سلامووووووووووز

Soooo يقول...

زى الهوا

ياميس موحه اللي قصدته انك كنتي ممكن تقولي ان الحوار اللي مابين الاب والام بيفكرك بمسلسل ساخر او لناس طيبه لدرجة السذاجه
انما مش لفظ اهبل

وانا يافندم مش زعلان
ولا شايل خاطري
احنا اخوات والاخوات مابيزعلوش من بعض


وربنا يسعدك ويكرمك ويبسطك ويوفقك ويرضيكي دنيا وآخره


سلاموووووووووز

Soooo يقول...

عمرو النوبى

اهلا بيك ياباشا
وربنا يكرمك يارب
بس ايه هو اللي هتستنى الحلقه بعد الساعه تسعه
هو انا مولود على كي بوورد ياعمنا

يا واش يا واش

وربنا يسعدك ويبسطك ويوفقك ويرضيك دنيا وآخره يارب



سلامووووووووز

Caramella يقول...

ههههههههه
حلوة اوى .. شكلى هاجى هنا كتييييير :)

حمادة زيدان يقول...

يخرب بيت شيطانك

موتني من الضحك ... والأخر دراكولا والرئيس بتاعه من يوم ما اتخلقت مصر وهو متبت فيها ومش عاوزيين يسبوها

ربنا يكرمهم بشوية توم ولا شوية نور من عند ربنا تبهدلهم

هههههههههههههههههههههههههههههههههه

تسلم يا زعيم

كلام على بلاطة يقول...

ايه يا عم الشباب والرياضة
فيه غيرك عجوز فى العشرين
قول الحمد لله
تحياتى

سمية يقول...

انا وقعت منى حلقة فى النص فى غضون مآسى الحياه اللى مش على مآسى خالص

بس واضح ان دراكولا ده طلع الورق كلة مكشوف قدامه من زمان قوى

كويس انه لسة عايش بعد كل اللى هوا شافه ده

ولو انه شكله هوا كمان كان منهم بس على خفيف .. تلاموز صغير يعنى

------

انا هاروح اقرا الحلقة اللى فاتتنى عقبال ما تكون نزلت الحلقة الجديدة

سلاموووووووووز

يوميات فنانه مفروسه جداا يقول...

السيناريست الكبير سووووو

بعد التحيه

انا كتبت بوست جديد في قصص وحوارات واتمني حضرتك تشرفني وتوجهني وتنصحني هل اكمل ولا لا

معلش هتعبك معايا بس انت اكيد فاهم اوي وبعدين في الاول والاخر احنا ولاد محافظه واحده واكيد انت مشترك في جمعية الصداقه المصريه الصعيديه زيي ولا ايه يا فندم حلوه فندم ديه اوي علي فكره

وبرضو بطلت تقولي ربنا يسعدك ويبسطك

سلام

Soooo يقول...

اهو ده عيبه

دوللي باشا
تخيلي اني لما اخترت الدكتور رفعت عشان يبقى رئيس العصابه اخترته عشان هو ده التحدي بجد

وياستي تابعي المذكرات واحكمي بنفسك بعدها
مش يمكن تطلع اي هسس وخلاص

وربنا يسعدك ويكرمك ويبسطك ويرضيكي دنيا وآخره يارب



سلامووووووووز

Soooo يقول...

دعاء مواجهات

الحمدلله انك ضحكتي ويارب تكون الضحكه طالعه من القلب

وياستي ربنا يخليكي وتتابعي باقي المذكرات ويارب تعجبك

وربنا يسعدك ويكرمك ويبسطك ويرضيكي دنيا وآخره



سلامووووووووز

Soooo يقول...

مجداوية

والله ما عارف اقولك ايه
على فكره انا كنت باروح عندك في المدونه على طول
بس كنت بالاقي المواضيع ماينفعش اعلق فيها لاني ممكن اهزر وساعتها هزاري هيبقى سخيف

واحنا ياستي منتظرين عودتك تلات مرات في الشهر زي ماقلتي

وربنا يسعدك ويكرمك ويبسطك ويرضيكي دنيا وآخره يارب


سلامووووووووز

Soooo يقول...

سومه...مجنونه فى بلد عاقل

انا رحت مضيت حضور وامشيت عشان كان عندي مشوار اتسحلت فيه وبعد ما رجعت لقيت الويندوز ضربت والسي بايظ وقعدت ادور على حد يسلفني السي دي روم بتاعه وشغلانه مايعلم بيها الا ربنا
لكن ان شاء الله اخلص التعليقات اللي هنا وارد على كل الناس اللي علقو واجي اشوف بتنمي علي في ايه ياست سومه

وربنا يسعدك ويكرمك ويبسطك ويرضيكي دنيا وآخره يارب



سلاموووووووووز

Soooo يقول...

Sha2loob

ياشقلوب ياخويا هو ده التجديد
مش داغيما القط بيجري ورا الفار
طب لما الفار هو اللي يجري ورا القط
ايه اللي هيحصل ياترى؟؟
وهل القط هيفضل خايف ولا هينتقم لما يفوق
وهل الفار هيفضل قوي على طول
وازاي
وليه

كل هذه الاسئله .. ستعرفو اجابتها في الحلقات القادمه من .. مذكرات طفل .. طخين


سلاموووووووووز

Soooo يقول...

YHYيــوســف الـمصـرى

ابن منتقتي وابن محافظتي القاهره العامره الساهره

ياسيدي دراكولا بيقولك الف شكر على دعوتك ليه بطولة العمر وعايز ياخدك بالحضن والله

وانا ياسيدي فاضي يوم جمعه وسبت وحد واتنين وكل الاسبوع .. الرك عليك انت ياللي مزنوق في شغلك الجديد
وعموما شوف ايه الحياه ونتقابل ونقضيها خمر ونساء للصباح الباكر يامعلمي


ملحوظه
لما انت كلمتني عالماسنجر كنت لسه بانزل ويندوز وبانزل باقي البرامج والجهاز كل شويه يعمل ريستارت
حبيت بس اوضحلك الجزئيه دي عشان ماتقولش ابن منتقتي بينفض ولا حاجه



سلاموووووووووز

Soooo يقول...

ra7eel

رحيل انتي خلاص اخدتي لقب قارئتي المنتظمه .. ولو في مره نزلت موضوع ولقيتك متأخره في التعليق باقلق عليكي والله

ربنا يسعدك ويبسطك ويكرمك ويوفقك ويرضيكي دنيا وآخره يارب


سلاموووووووووز

Soooo يقول...

tamer.sala7

ياتيمور المذكرات كلها رمز اصلا
بس الشاطر اللي يقرا مابين السطور

وربنا يسعدك ويكرمك ويوفقك دنيا وآخره


سلاموووووووز

Soooo يقول...

همس الاحباب

خالد باشا ابن عمي
احنا مش محتاجين تعويذه .. احنا محتاجين معجزه عشان نفوق ونتحرك ونتكلم ونقول

وربنا يستر والخيوط ماتتلعبكش منني والشيرز يبوظ

وربنا يسعدك ويكرمك ويبسطك ويرضيك دنيا وآخره يارب



سلاموووووووووز

Soooo يقول...

كيكى

والله ياكيكي يابنتي الويندوز ضربت ولسه بتضرب برضه
شكل الهارد بتاعي قافش ومش عايز يقبل اي نسخة ويندوز ولا نيله
واخوكي مفلس ومامعهوش حق هارد جديد
مش حق التوك توك

لكن ان شاء الله هخلص التعليقات واجي اسلم وارخم عليكي

وربنا يسعدك ويبسطك ويوفقك ويرضيكي دنيا وآخره يارب



سلاموووووووووز

Soooo يقول...

بنت مصريه

ربنا يكرمك ياستي
بس المشكله ان السيناريستات اللي بيشتغلو دلوقتي بيبقو محكومين بشغل السوق
وانا ماليش كبير يابنتي وممكن في ثانيه واحده اهد المعبد عاللي فيه

لكن ان شاء الله هفكر في كلامك وربنا يعمل اللي فيه الخير


سلاموووووووز

Soooo يقول...

•√أريـ السمر ـج√•

ياقهلا ياقهلا ياقهلا
وانا اقول المدونه منورة ليه
اتاريكي هنا

ياستي ربنا يكرمك يارب وكلامك ده تاج على راسي والله
ويافندم اعتبري مدونتي المتواضعه دي زي مدونتك ونوريني بكلامك وبتعليقاتك دايما يارب

وربنا يسعدك ويبسطك ويكرمك ويرضيكي دنيا وآخره يارب



سلامووووووووز

Soooo يقول...

إنجى

عودا احمد ان شاء الله

ويارب تكوني استمتعتي بالحلقات اللي فاتتك ويارب تتابعي باقي المذكرات وباتمنى من ربنا انها تعجبك وترسم ابتسامه على وشك وعلى وشوش كل اللي بيقرولي كلامي

وربنا يسعدك ويكرمك ويبسطك ويرضيكي دنيا وآخره يارب



سلامووووووووز

Soooo يقول...

دكتور كسلان

لا بقولك ايه يادكتره
انا لا جبت سيره اشتراكيين ولا رأس مالييين ولا انفتاحيين
انا كل اللي قلته .. ان في ناس .. لدمنا ماصيين

والمعنى ياترى ياهل ترى .. في بطن مين؟؟؟


وربنا يسعدك ويكرمك ويبسطك ويرضيك دنيا وآخره يارب


سلامووووووووز

Soooo يقول...

ojg

ياقهلا ياقهلا باللي بتغيب تغيب وتيجي تعلق مره واحده وتغيب تاني

ياستي الحمدلله ان الحلقه عجبتك وانا عارف دكتور رفعت بيمثللك ايه وعشان كده تعمدت اني اظهرو على حقيقته
عشان كل الناس تعرف اللي بيحصل من ورا ضهرهم

وربنا يسعدك ويبسطك ويوفقك ويرضيكي دنيا وآخره يارب



سلاموووووووووز

Soooo يقول...

Dr-hema

نا ولا لقحت ولا عملت حاجه ياعم
ده دراكولا هو اللي قال
انا مالي بقى

وعلى فكره
كل الانظمه اللي فيها فساد .. واحد

وربنا يكرمك ويسعدك ويرضيك دنيا وآخره يارب



سلاموووووووووز

Soooo يقول...

ام أيمن وساره

وعليكم السلام ورحمة الله وبركاته

والحقيقه انا قريت تعليقك ده بعد ما علقتي بمافيش جزء من الثانيه
لكن فضلت اني عشان ارد على كلامك الحلو ده .. لازم اعمللك موضوع خاص

وان شاء الله هخلص الرد على تعليقات الناس وهكتب الموضوع وانزله ان شاء الله

وربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووز

Soooo يقول...

Caramella

اهلا وسهلا بيكي يافندم وياريت تعتبري مدونتي المتواضعه زي مدونتك تمام وتشرفيني بزيارتك وبتعليقاتك

وربنا يسعدك ويبسطك ويكرمك ويوفقك ويرضيكي دنيا وآخره يارب



سلاموووووووووز

Soooo يقول...

حمادة زيدان

حبيب قلبي

ربنا يكرمك يارب على الدعوة بتاعة يخرب بيت شيطاني دي

والحمدلله ان الحدوته عاجباك وانك متابعها .. ويارب تفضل متابعها ومنورني دايما

ملحوظه
بمناسبة التوم ونور الشمس .. اللبان الكلورتش اتعمل مخصوص هو ونضارات الشمس عشانهم .. ولا انت مش ملاحظ انك كل ماتشوف حد من البودي جاردات تلاقي لابس نضاره شمس وبياكل لبان .. واحنا بنبقى فاكرينه بيكلم حد في السماعه اللي على ودنه



سلاموووووووووووز

Soooo يقول...

كلام على بلاطة

اهلا بيك ياسيدي في اول زياره ليك وياريت تعتبر مدونتي المتواضعه دي زي مدونتك تمام وتشرفني بزياراتك وبتعليقاتك

بس ايه دخل تعليقك بالحلقه او الموضوع اللي انا كاتبه؟؟؟
لو انت مش فاهم انا قصدي ايه باني عجوز .. روح على موضوع تاجين في البوست ينفع واقراه
اقراه كويس
وزي مانت اكيد عايز الناس تقرالك مواضيعك وتعلق عليها في صميم الكلام
يبقى انت كمان اقرى لغيرك .. وعلق على اللي بيكتبوه في صميم الكلام

ونورتني ياحناظر



سلاموووووووووز

Soooo يقول...

سمية

اهلا بحماتي ام فتكات

ياستي قولي يارب وصدقيني هتلاقي كل هموم الدنيا هتنزاح من قدامك
بس المهم انك تقوليها صادقه وطالعه من القلب

وياستي اقري الحلقه اللي فاتتك واقري كل اي حاجه

وربنا يسعدك ويكرمك ويبسطك ويوفقك ويرضيكي دنيا وآخره يارب

سلامي لفتكات حبيبة قلبي



سلامووووووووز

Soooo يقول...

يوميات فنانه مفروسه جداا

انا يافندم ولا سيناريست كبير ولا حاجه
انا مجرد واحد بيشخبط وبيقول اي كلام

وحاضر يافندم هروح اقرا موضوعك ولو حسيت ان رأيي هيبقى ليه لازمه او لو حسيت اني هقدر افيدك في اي حاجه صدقيني مش هبخل عليكي

بس ياريت الله يكرمك .. لما حد يمدلك ايدو عشان يساعدك .. ماتصديهوش او تسيبيه يكلم نفسه وتمشي


فاهمه حاجه؟؟؟




سلاموووووووووز

كلاكيت تانى وتانى يقول...

ازيك يا سوووو بص بقة انا واخدة موقف منك ومش هعلق عشان شبطلى بنتى فالسينما وكمان مخطبتهاش وفضلت عليها نور ووجعت قلبها ياخرام بس احمد الصباغ فية الخير هياخد منى البت وعليها فلوس هههههههه
هقرا كويس وارجعلك بس اوعى تروح سينما

كلاكيت تانى وتانى يقول...

دراكولا ياراجل دراكولا

يوميات فنانه مفروسه جداا يقول...

اه فاهمه وحقئك علينا يا عم سووو ومتزعلش وبعدين مهوا يعني اللي مد ايده ده كان يعني لو تبت شويه مكونتش يعني هسيبه وامشي دا مصدق امشي اساسا

فاهم حاجه انت برضو

وبرضو مقولتليش ربنا يسعدك ويبسطك

سلام بس من غير موووز

ادم المصرى يقول...

انا جى تانى هتابع بس اوك

Soooo يقول...

سقط سهوا تعليقي او ردي على تعليق ست البيت

وانا مايرضينيش يا ست البيت تزعلي منني وأول تاج اجاوبه كان من ناحيتك
-------
ست البيت

ياقهلا ياقهلا
انتي اختفيتي رحتي فين يادكتوره
يعني ده اسمه كلام .. ترميلي التاج بتاعك وتعختفي
طب شقري شوفي انا قلت ايه
ولا هو انتي تسألي السؤال وبعدين زوغااااان

وياستي اتجنن بمزاجي احسن ما اتجنن بالعافيه

وربنا يكرمك ويسعدك ويبسطك ويرضيكي دنيا وآخره


سلامووووووووز

Soooo يقول...

كلاكيت تانى وتانى

ياخبر يا ميس مرمين
طب ليكي علي ياستي اول ما ظروفي تتظبط والفلوس تجري في ايدي زي زمان .. اعزمك انتي وبنتك وكل اللي عايز يجي عالسينما

اما بقى اني اخطب بنتك .. القلب ومايريد ياستي
وانا قلبي داب في نظرة عين نور وهي بتاكل ايس كريم
او داب في الايس كريم صراحه يعني

والصباغ ده يبوس ايده وش وضهر اصلا انه هيخطب بنت انسانه محترمه زيك
وانتي وبنتك وكل الشارع بتاعكم يتاقل بالفلوس كمان
ويعمللك فرح بنتك في فندق سفن ستارز
اه طبعا
ويجيب عمرو دياب يغني دويتون مع اليسيا
والجاتون يتوزع بالكيلو كمان
هو احنا عندنا كام مس مرمين يعني

وبالنوسبه لدراكولا .. طب بذمتك .. مش قال اللي ناس كتير قوي مش قادره تقولو
حصل ولا ماحصلش؟؟؟؟

وربنا مايحرمني من زيارتك ولا طلتك ولا تعليقك في مدونتي المتواضعه
وربنا يسعدك ويكرمك ويبسطك ويرضيكي دنيا وآخره يارب




سلامووووووووووز

Soooo يقول...

يوميات فنانه مفروسه جداا

خبر ايه يا ياسمين؟؟
انتي خلصتي امتحاناتك وقاعده راشقه عالمدونه؟؟
طب فين حق القعده طيب
ده انتي من صباحية ربنا قاعده ولا شربتي شاي ولا قهوة ولا نفعتينا بحاجه وانتي عارفه ظروفي مقندله وحالتي ضاد جيم مرتفع

وربنا يسعدك ياستي ويكرمك ويبسطك ويوفقك ويرضيكي دنيا وآخره

ملحوظه
لينا كلام تاني مع بعض ان شاء الله لما الحياه تستقر شويه معايا والظروف المتلخبطه اللي انا فيها تهدى شويه



سلامووووووووز

Soooo يقول...

ادم المصرى

ياسيدي نورتني
وتقدر تعتبر المدونه وصاحب المدونه تحت أمرك
وتنورني وتشرفني في اي وقت


وربنا يسعدك ويكرمك ويرضيك دنيا وآخره



سلاموووووووووز