الأربعاء، ٢٧ ربيع الأول ١٤٣٢ هـ

!! الكابل بيضرب .. والعربيه بتولّع

من فتره حصل حوار عندنا في المنطقه مع شباب اللجنه الشعبيه .. كانوا سهرانين وكل واحد منهم معاه السلاح بتاعه .. اللي معاه مضرب بيسبول - لاحظ عزيزي القارئ اني مالمعادي !- واللي معاه شومه عليها رسومات باللون الفوسفوري - معادي بقى !! - واللي معاه سيف أو سنجه - غالبا مش من المنطقه ! - وفجأة سمعوا صوت طاخ طاخ طاخ
اتحركوا ناحية مصدر الصوت بحذر معتقدين انه ضرب نار .. فجأه سمعوا صوت واحده - أم واحد صاحبنا - واقفه في البلكونه وبتصوّت بتقول .. الكابل بيضرب والعربيه بتولّع .. الكابل بيضرب والعربيه بتولّع
قاموا تتبعوا مصدر صوت الطرقعه والـ طاخ طاخ .. لقواعربيه مفتوح الكابوت بتاعها و واحد واقف قدامها .. والعربيه فعلا جنب بوكس بتاع كهربا .. جريوا عليه معتقدين انه حرامي أو ان العربيه بتولّع فعلا .. ولما قربوا منه سمعوا برضه صوت طاخ طاخ طاخ .. والصوت طالع من العربيه .. وبالتحديد من شكمان العربيه
لما الراجل شاف الناس شايله سلاحها وجايه عليه اتخض - اكيد اتخض من اللي معاه سنجه مش مضرب بيسبول ! - وقال يا جماعه مافيش حاجه دي عربيتي والموتور بتاعها مفوّت .. عشان كده في صوت طرقعه
طبعا الناس كلها قعدت تضحك على صاحبنا وعلى طيبة امه اللي افتكرت ان الكابل بيضرب .. كابل ايه اللي هايضرب في وسط ضرب النار اللي كنا بنسمعه كل يوم .. لأ وإيه .. كابل بيضرب وعربيه بتولّع كمان !!؟

.. الغريب اني لقيت في كابلات كتير بتضرب دلوقتي .. ولأننا شعب غلبان بنصوّت مع أي كابل
: يعني من ضمن الكابلات اللي بتضرب حاليا على سبيل المثال وليس الحصره

كابل شفيق : وهو يختلف شكلا وموضوعا عن بلوفر شفيق .. لأن بلوفر شفيق .. شفيق الوحيد اللي بيلبسه .. لكن كابل شفيق .. مصر كلها لابساه ! , والكابل ده بيضرب في وش الناس اللي بتقول ان لو حكومة شفيق استقالت .. يبقى ساعتها البلد هتقع في فوضى عارمه , وكأن البلد قبل وجود شفيق كانت فل في الجنينه مثلا !؟
أو كأن مثلا الحكومة التكنوقراط - حكومة كفائات ليس لها أي انتماءات حزبيه - اللي ممكن تمسك تسيير البلاد في اثناء هذه الفتره .. مجموعة ناس جايين من ورا الجاموسه ومش فاهمين ايه اللي هايعملوه !!؟
مع ان الموضوع ببساطه شديده أشبه بإن مدير مدرسه مش شايف شغله صح وبيسرق الكانتين .. اترفد من إدارة المدرسه وتم تعيين مفتش مكانه .. اه ممكن المدرسه يبقى فيها فوضى كام يوم لغاية ما الكل يفهم دوره ووظيفته .. لكن بعدها الحياه هاتستقر وهاتبقى لوز اللوز
وحتى لو حصلت فوضى .. ماهو الحوار ساعتها هايبقى أشبه بأي حد سافر برّه مصر وهاياخد فتره على ما يستقر ويلاقي سكن مناسب ويفهم نظام المواصلات ويعرف يتأقلم مع عُملة البلد اللي هو سافر لها .. وبعد كده هايبقى عايش مستقر طوال فترة عقده , فيها ايه لما نستحمل شوية الفوضى لغاية ما الحياه تستقر .. وساعتها مش هايبقى لنهاية العقد .. لأ .. ده هايبقى لنهاية العُمر ان شاء الله .. ها .. فيها ايه !!؟
وللناس اللي بتقول ما تستنوا على حكومة شفيق وتدوهم فرصه .. مش هاقول ان الجواب بيبان من عنوانه .. بدليل ان وزارة الخارجيه ولا عملت اي بتاع للمصريين اللي راحوا تونس هربانين من جحيم ليبيا , ولا هاقول إن كل الدول لما حصلت بداية الثورة عندنا في مصر .. طلبوا من رعاياهم التوجه لسفاراتهم عشان يتم التنسيق وتسفيرهم لبلادهم .. بينما المصريين اللي في ليبيا لما راحوا للسفير عمل نفسه خواجه ومش فاهم هو سفير في انهي دوله , مش هاقول حاجه من كل ده .. بس هاقول لاحظوا ان كل يوم تأخير في تغيير حكومة شفيق .. بيؤدي لتدمير مستندات ممكن تخلّي عناصر الفساد تهرب بفلوس البلد .. بينما لو اتحاكموا في السريع السريع .. يبقى في امل اننا نرجع حقوقنا المنهوبه .. ونعيش عيشه ماكناش نحلم بيها في ظل حكومة شفيق وبواقي النظام السابق
ولا انتو عايزين نفضل طول عمرنا (ماسكين في ديل الحكومه زي ماتكون أمنا) .. على رأي خالد صالح في فيلم عمارة يعقوبيان !!!؟

كابل الأمن والأمان : والكابل ده بيضرب في وش ناس كتير بتقول ان البلد مافيهاش امان دلوقتي .. وحالات البلطجه كتير ويالهوي يالهوي , طب معلش يا اخواننا .. هو مش في ايام وجود الداخليه بقيادة العادلي كان في جرائم يقشعر لها البدن , زي مثلا سفاح المعادي اللي كان مخلينا متكتفين في بيوتنا - رجاله و ستات - وكل واحد مننا كان خايف على أظئوظته لا يتعلّم عليها !؟؟
مش كان في حوار بني مزار اللي لبّسوه لواحد أغلب من الغُلب .. في حين إن تقرير الطبيب الشرعي بيؤكد ان الحوار معمول بحرفيه عاليه .. وكأن طبيب جراح هو اللي عمل كده !!؟
مش كان في حالات اغتصاب زي اللي حصلت لما تمنتاشر واحد طلعوا بيت - بيت مش بعيد عن مركز الشرطه على فكره - وخطفوا واحده من وسط جوزها وجيرانها واغتصبوها !!!؟؟
وللناس اللي ساكنه في اماكن مافيهاش تواجد امني بقوة زي اكتوبر والعبور .. مش من فتره بنت ليلى غفران اتقتلت وراحوا ملبّسينها لواحد اساسا اساسا مش فاهم ايه الحوار .. بينما في اشاعات كتير بتقول ان اللي قتلها هو ابن احمد نظيف رئيس مجلس الوزرا في وقتها !!!؟؟
وغيره وغيره وغيره .. انا نفسي اتثبتت مرّه ولما رحت النقطه اعمل محضر .. لقيت العسكري نايم على باب النقطه .. ومافيش غير امين شرطه واحد بس في النقطه كلها .. وكان بيتفرج على فيلم سكس على كومبيوتر أخدوه من سايبر .. وطبعا أخدوه لأن صاحب السايبر مارضيش يشوفهم بأي حاجه في رغيف
وبعدين هل الناس بتاعة كابل الامن والمتانه دي .. معتقده ان الداخليه هتدافع عننا لو حصل حاجه ؟؟
خالص .. بدليل انسحابهم لما جاتلهم أوامر بالانسحاب - خمسين خط تحت كلمة أوامر - والشباب وقفوا ساعتها وعملوا حوار اللجان الشعبيه , وماحدش يقول لي ماهو في ناس من الشرطه ماتوا .. لأن ردي ساعتها هايكون طب ماهي دي من مخاطر مهنتهم .. واحد وظيفته تُحتّم عليه انه يتعامل مع تاجر مخدرات .. هايلعب معاه استميشن مثلا !!!؟
وعلى فكره .. في اخبار بتقول ان قوات الشرطه اللي على حدود طابا انسحبت دلوقتي .. في حد كلّمهم ولا جه ناحيتهم بقى !!!؟؟؟

كابل ميدان التحرير : وهو أطرف كابل في الكابلات المتكبلته كلها .. وأكثرهم خِفّة في الدم ! , والكابل ده بيضرب في وش الناس اللي اساسا ما راحتش ناحية التحرير خالص .. ولو راحوا يبقى راحوا بعد ما مبارك مشي وزيّطوا شويه وهييييه الثورة نجحت الثورة نجحت !! , مع انهم في الاول كانوا بيقولوا لبتوع التحرير روّحوا بيوتكم هاتخربوا البلد وامريكا هاتدخل واسرائيل هاتنفخنا .. والاسعار ارتفعت والمواصلات أُجرتها زادت .. وكأن مثلا سعر كيلو الطماطم - قبل خمسه وعشرين يناير - ما ارتفعش و وصل لخمستاشر جنيه ؟؟
أو كأن الناس نسيت لما اسعار الوقود ارتفعت والمواصلات زادت .. مع ان لما اسعار الوقود انخفضت على مستوى العالم كله .. فضلت عندنا احنا على ماهي عليه !!!!؟
وبعدين في نقطه مهمة عايز اعرفها .. هل الناس اللي بتعترض على وجود معتصمين في ميدان التحرير .. متخيله ان اللي في التحرير بيطالبوا بمطالب خاصه ليهم !؟؟
يعني هل كل واحد من اللي في التحرير مثلا مثلا .. عايز وظيفه وشقه وعربيه .. وعروسه !!؟
!!! لأ .. دي مطالب عامه لكل المصريين .. ومش مطالب .. دي حقوقنا أساسا
.. حاجه أخيره عايز اقولها لكل الناس الخايفين
.. سواءا خايفين من اللي بيحصل دلوقتي .. أو خايفين من المستقبل اللي في علم الغيب

.. ساعات الاقيني بالعن احساس الخوف
واقول هيّ الناس خلاص مابقيتش تشوف
.. ماهو من حق المُغتصبه تقول الـ آه
ولا ساعتها .. هايبقى ماسكها كسوف !!؟

سوووو

هناك ٢٠ تعليقًا:

مهندس مصري بيحب مصر يقول...

والله معاك حق

غير معرف يقول...

الله عليك ياسو بجد كلام منطقي جدا (حدوته مصريه)

كــركــبــة دمـــاغ ㋡ يقول...

في الجووون

معاك في كل كلمة قولتها


تسلم ايدك

غير معرف يقول...

كنت في انتظار اقرالك حاجه طول الفتره اللي فاتت
و طبعا رائع كالعاده

افكار مبعثرة يقول...

رااااااااااائعة فعلا :)

غير معرف يقول...

مبدع دائما ياسوو وكنت منتظره كتاباتك ف المدونة من زمان وانتظري كان لسبب والرباعية كمان معبره جدا
(سوساية)

nor يقول...

رائع و كنت مستنياك تتكب بس لما كتبت كتبت كل الحقيقه تسلم ايديك بس ايه ده هو سوووو ابو دم خفيف راح فين لأعايزين خفه الدم الغير موصوفه منك
تحياتي و ربنا يعزك يا رب

Z_Diva يقول...

3ash meen shafk ya man :)).... wenaby ya5oya matfakrny blkblat de 3shan ana dma3'y wermet.. mn kam yom elset elly btndf gaya t2oly mesh 3rfa embare7 knt btgeb 5odar mn 7ta esma "elanbya" aw 7aga shabh keda bma iny ma3rfsh elsee5 melmaree5 fe bladkom de.. elmohim y3ny inha bt7ky in imbare7 kan fe darb nar we bta3 felso2 da, welklam da bt7kilholha baya3t el5odar asasan, fana ba2olha meen elly kan bydrab nar, amt elwelya t2oly "bto3 elmozahrat" ana etshalet keda we sebtha we mshet we b3den ma2dertsh amsk nafsy we 2omt rag3alha elmatba5.. oltelha bto3 mozahrat eh insha2alah !!!!!!!!!!!!!... da 3'er swa2 eltaxi bta3 kabl elaml welnatana.. brdo momta3ed mn bto3 elmozahrat.. fana brdon etna2at we 2oltelo "ya3ny inta 3ayz tfahmny in 3omr ma ameen shorta fe mara wa2fak we 2rfak fe 3eshtak -kan nfsy a2olo inta hat3eesh yaba.. bas 2olt a5ly el7ewar 7adary a7san brdon-... ana sa7ee7 la ro7t t7reer wala nzlt mozahrat.. bas ana elly 7sal da sa7any bsara7a.. we bgad nfsy ashouf masr blad 7lwa we elnas 3ysha kways we mo7tarameen -y3ny el7kouma welnzam welnas eltanyn by7trmohm mesh homa me7trmen nafshom, maho law o7termo, beltab3ya haya7taremo-... mesh 3rfa leh brdo elyomen dol 3ndy ta5yola habla keda ala wahya 'elomam el3ozma btrou7 we tegy we t2oum we to2o3 we yom tb2a eldawla elfr3onya, we yom tb2a eldawla elislamya we yom tb2a bretanya el3ozma, we yom a3'bar lesa ma5les tkon america we tabe3ha 2offa -aw bm3na asa7 2offa wa tabe3tha america- leh maykonsh delwa2ty wa2t eldoal el3arabya, aw zay maby2olo fe belad elfrenja 'isn't it our time to shine'... teftekr monkin ???!!!!!!!!

غير معرف يقول...

راااااائع يا سوو انا طوول الفتره اللى فاتت دى كنت مستنيه بفارغ الصبر تكتب حاجه اى حاجه سواء عن اللى بيحصل او عن اى حاجه تانيه وكل مره كنت ادخل كنت ببقا زعلانه اوى انى مش بلاقيلك جديد بلاش الغيبه الطويله دى تانى يا بطل ;)
ROKA

صوت من مصر يقول...

سووو
سووو
يعنى
ههههههه

قلم رصاص يقول...

بوست رائع ياسو
:)

Asmaa mahaba يقول...

عارف يا سوو والله انا كل كابلاتى فرقعت خلاص نافوخى ماشى منغير كابل معنديش ثقه فى اى حد حيترشح ولا عن اى حد حييجى وناويه باذن الله اروح انتخب واعمل غلط على كل الاسماء اللى حتترشح

اسجنى .... شكرا يقول...

جميل جدا بس انت رغاى حبتيين
اتمنى تزور مدونتى المجنونه و اللى تعتبر لا شئ بالنسبه لمدونتك اللى بتفتسطنى م الضحك

sony2000 يقول...

بسم الله ماشاء الله
والله وبقيت ترغي اكتر مني:)
منور يبتاع اللجان الشعععععبيه
تكلللم ياابن الشعععععععب
تكلم

Unknown يقول...

كم انت كبير يابن الذينه

عبد الرحمن سالم يقول...

صح جداً...

من التدوينات اللي بيترد عليها بـ"في الجوووون" :]

تحياتي ليك، مدونة جميلة فعلاً :)

بُص على مدونتي بصة لو حابب :)
www.3een-wants-to-see.blogspot.com

Übersiedlung يقول...

الله كبييييييييييييييييير

Umzugsunternehmen Wien يقول...

جددوا موضوعتكم .. رجاءاً :)

Umzug nach Luxemburg يقول...

الله يعينكم على المجهوووووووووووووود :)

Lagerung يقول...

Allah is with you ... :)