الاثنين، ٢١ شعبان ١٤٣١ هـ

!! وافيساااااه

لما كنت عيّل صُغيّر .. كنت مختلف عن أي عيّل صُغيّر أو كُبيّر حتى .. لأنني ببساطه ماكانش بيعيش ليّ لِعَب , وقد يكون السبب في ذلك أنني كنت أبحث عن كوامن الحاجات ولا أكتفي بظواهرها فقط .. أي أنني كنت فلحوسٌ منذ نعومة أظافري !

وأتذكر أن أمي - الله يرحمها - جابت لي في يوم دبدوب باندا لِعبه .. وكنت كلما احتضن هذا الباندا يخرج منه صوت غريب ؛ فعرفت بنباهتي المعهودة وفلحستي المشهوده .. ان هناك عفريت محبوس داخل هذا الباندا .. وقررت أن أصرفه فورا ؛ فما كان مِنّي إلا أن أمسكت السكينة بتاعة شق البطيخ .. وشقيت الدبدوب .. ولم أكتفي بشقه فقط .. بل فرفرته فرافيتاً !

أي نعم لم أشاهد العفريت المحبوس في الباندا وجها لوجه .. ولكنني تأكدت انه بالفعل كان هناك عفريت .. بدليل أن هذا العفريت خرج من الباندا .. ودخل في ابويا وش كده ؛ وما جعلني أعرف ذلك أنني لقيت ابويا نازل فيّ تلطيش - قال ايه - عشان اغتصبت الدبدوب و هتكت فَروَته !!

ومنذ هاذوها اللحظه .. قررت ألا أشُق أي لعبة - بحثاً عن العفريت - بسكينة البطيخ .. بل إنني قررت اني ما آكلش بطيخ اساسا , واكتفيت بأن ألعب باللعبه .. مُتحاشيا العفريت اللي جوّاها

ماجعلني أتذكر هذه الحكاية وهذا الموقف التاريخي .. أنني منذ أيام قد تم غلق الأكاونت بتاعي عالفيس بؤ , وجدير بالذكر أن هذا الأكاونت هو الأكاونت التاني بعد إغلاق الأولاني .. يعني من الاخر اتقفل لي اتنين أكاونت على التوازي !

واندهشت لسبب قفل الأكاونت مع إني مالعبتش في أي عفريت والله .. بل بالعكس .. كنت دائما اتحاشى هذه العفاريت , لدرجة اني قفلت الوول بتاعي ولم أسمح لأي عفريت أن يكتب أي حاجه فيه , وذلك لأنني في أحد الايام .. وجدت "شخص ما" كاتب إعلان عن نفسه عالوول عندي .. وبيقول إنه متخصص في علاج مشاكل الأسرة والمشاكل الزوجيه والعجز الجنسي وتساقط الشعر .. ومش عارف ليه حسيت انه كان ناقص يقول .. وأُشارك في الأثاث !!؟

والغريب أنني أرسلت له ماسج أسأله عن حل لمشكلة شعري اللي راح في حرب اليمن .. فلم يُعبرّني مطلقا , مما جعلني أطلب من إحدى صديقات البرنامج .. أن تبعث له بماسج في أي حوار وتشوف رد فعله ؛ فأجاب الماسج بتاعتها في ثواني .. بل وكتب لها في هذه الماسج ايميله ورقم موبيله .. وعنوانه كمان .. مع انه عنوان بيت مش مكتب ولا محل علاقات زوجية !!

ومن هنا عرفت بنباهتي التي حباني الله بها .. أن هذا الشخص هو بالفعل عفريت .. وسبب إنه لم يجيب سؤالي .. انه عرف اني بهدلت اخوه اللي كان في الدبدوب اللي مزعته .. وسبب بهدلة اخوه انه خرج من الباندا و دخل في ابويا , وصدقني عزيزي القارئ .. الدبدوب أرحم مليون مره من أبويا وهو متعفرت !!!


ولكن كل هذا لا يضايقني .. بالعكس ؛ فمثلا عند حذف أول أكاونت لي .. كدت أن أصاب بلوثة عقليه .. وقعدت اقول وانا باشد في شعر دقني - الشعر اللي حيلتي - وافيسااااه .. وافيساااااه .. شقى عُمري راح .. شقى عُمري رااااح .. والملاحه والملاحه وحبيبتي ملو الطُرّاحه !!

بينما عندما تم حذف تاني أكاونت لي .. ياااه .. بيس يا ماو .. وعملت أكاونت تاني في ثواني , مما جعلني أُفكر بجديه أن اعمل كورسات في كيفية عمل أكاونت عالفيس في دقيقة ونص !

أكثر ما يضايقني بحق وحقيق .. وبجد وجديد .. هي الرسائل التي يُرسلها لي أصدقائي القدامى على الأكاونتات الراحله بعد أن يكتشفوا هذا الأكاونت الجديد , وعادة تكون رسائلهم إلي في سكة .. انت حذفتنا ليه ياعم ؟ , أو في سكة .. هو انت لما ترتبط بواحده .. تقوم تحذف كل صحابك يعني ؟

وكل هؤلاء كوم .. و من قال لي (إحذف ياعم .. ماهو اللي عِلِي عِلِي خلاص ) كوم تاني ؛ وذلك لأنني مش عارف عَلَيان إيه اللي اتنيّلت وعلِيته وانا متشحور زيي زي باقي خلق ربنا !!

ولكل هؤلاء الاصدقاء - سواءاً دولَن أو دولَم أو دوكهُم - أقول ..

ورحمة امي ما حذفت حد فيكم .. انا اللي اتحذفت كُلّي على بعضي من الفيس بؤ !!!

ملحوظه

حتى هذه اللحظه .. لم يُعلن أي جروب مسئوليته عن هذه العملية الإجرامية التي حاقت بالأكاونتات الراحله

سوووو

هناك ٣٧ تعليقًا:

أنا - الريس يقول...

يا عم ولا يهمك فداك الفيس والتويتر والبال والياهو والمسنجر
اهم حاجة أعصاب ويلا بينا نصرف العفيرت /*

خواطر شابة يقول...

يالله خيرها في غيرها ومنجيلش في اكاونت تاني ان شاء الله
رمضان كريم

adel يقول...

ههههههههههه
ابوك ملبوس ياسوووو
:)
ههههههههههههه
تصدق انا عرفت دلوقتي ابويا ماله حالة اتخلبطت ليه من يوم ماكرست العروسة اللعبة بتاعت اختي :):)
ههههههههههههه

أع ـقل مـ ج ـنـونــة يقول...

ههههههههههه

بجد والنعمة عسل

البوست هو اللي عسل طبعا :D :D

ياسيدي فداك ميت فيس بوء

واعمل اكاونت احتياطي احتسابا لحركة الحذف التالية :D

والله يرحم الباندا ويهدي الحاج الوالد ويبعد عنه العفاريت " شكله يقرب لابويا ولا ايه ؟؟ " :D D:

وفداك مليون عفريت كمان ^^,

وسلامو عليكو

ريمووووووو أعقل مجنونة ^_^

Rosie يقول...

ضجكتنى و الله و الضحكة عزيزة فى الزمن ده...
و معلش اللىراح فى دقيقة و نص بيرجع.. الفيس اتجنن و اللى عليه كمان..

мαησηα يقول...

احم احم . ... انا من دولن واكيد

رسالتى ضايقتك انا

واختى ههههههههه معلش ملش اصلها كانت

صدمة لينا بصراحة نصحى الصبح

مانلاقيش

سوووووووووو اللى كل الناس

بيحبوووه

وى فيرى سورى يا سو ووعد لما تتحذف

تالت مش هاسالك هضيفك ع طول

وفداك يا سيدى الف مليون اكونت

Ramy يقول...

سوووووو

مية مية بوست ميخرش المية

(:(:(:

شوف يا عم انت لست وحيدا فى هذا العالم يا سوووو

لقد كنت مثلك فلحوسا و لكن لم أكن أتعلم من أى فلحسة كنت بعملها

كنت أتفلحس و أتفلحس لغاية ما عرفت ليه مبطلتش فلحسة
من البوست بتاعك

أن كل العفاريت طلعت من اللعب و بقت معايا

و كنت طفل عفريييييييت

و ميهمكش على الفيس يمكن انا لسه محصليش الموصيبة دى

و لكن يا رب ما تحصل (:(:

طب بلغت لغاية ما تعرف انهى جماعة المسئولة

رحلتنا في الحياة يقول...

تقريبا دى حملة من الفيسبوك بتصفى الحسابات واحد وراء واحد :)

م. حجاز يقول...

يعم طب احمد ربنا انك بخير وفداك الف اكونت واكوانت بس نصيحتى استخبى بأه اليومين دول اصلهم لو عرفوا انك لسه عايش مش هايسبوك

بس يامستر ممكن تليفونك عشان احجز كورس عندك تحسبا لاى عمليات تصفيه ممكن تحصلى

واجمل حاجه فى الموضوع انى بقيت من الفريندز الجداد
ههههههههههههه

faisal يقول...

طب ما فكرتش ليه تعمل جروب من بتوع تضامنوا لاستعادة أكاومت سووو المحذوف، فري سوووو، اذا وصل هذا الجروب ل561323.422 سخص سيتم استعادة الأكاومت بتاع سووو، حاجة كده يعني ؟
:)

sony2000 يقول...

ههههههههههه
ههههههههههههههههه
هههههههههههه
بجد ضحكتني وانا موش قدره اضحك:)
معلشي علي كدا خلييك بقي موش سو
لحد مايأذن ربنا

basma bahaa يقول...

حصلت معايا السنة اللى فاتت بس كانت سرقة ..مكنتش لسه بلدية الفيس بوك شادة حيلها كدا
كنت هتجننننننننننننن عشان انا اللى اديت الباس ورد بنفسى للحرامى على انه واحده صبحتى:@
مش عارفه لو خدوه منى تانى هعمل ايه:))) ربنا يستر
تحس انك اتشردت من بيتك واترميت فى الشارع:)))

غير معرف يقول...

انا قولت من زمان
ان الفيس ده هادم اللذات ومفرق الجماعات ومشتت للفريندات
انا لو منك اروح ابلغ فى المركز القومى لحقوق الانسان
ولو عايز اى مساعدة من حميرى فى حاجة معنديش ايتها مانع احنا اعضاء جمعية حقوق الحمير نشطة جدا وفعالة الى ابعد الحدود منكن نساعدك
واااااااااحميرااااااااه
بيطرية ومش بايدى
بس البلوج كالعادة معلق

ساسو يقول...

هههههههه
دمك خفيف أوي يا سوووو
يالا دا درس واتعلمته
متكسرشي أي حاجه بعد كده
لأن العفاريت منتشره
وكفايه انها جات لحد كده

تقبل مروري

ميشوو يقول...

لألألأ دا الفيس بوك حاقد عليك اوعى تسكت ياسووو

وبالتوفيييق ‏:‏)‏

قوس قزح يقول...

اللى عارفك كويس يا سوو هيكون متاكد انك مش حذفته و ان العيب فى الوش بوء

كل سنة و انت طيب مع انها متاخرة
بس قلت اوفر و ادخل عيد ميلادك فى تهنئة رمضان و يبقى تعليق واحد ههههههههههههه

قوس قزح يقول...
أزال المؤلف هذا التعليق.
sinarest يقول...

السلام عليكو
الأول حبيت أكتر اللي عبروك وعلقوا علي المقاله الجميلة اللي ضحكتني
فحبيت أفرحك بواحد جديد يعبرك
أنت ضحكتني وأنا عبرتك نبقي خالصين
والسلام عليكم

محمد فاروق الشاذلى يقول...

طب ربنا يستر بقى على الأوكنت بتاع بلوجر وما يتحذفش راخر، علشان مش هاينفع مانقراش المدونة الجميلة دى تانى

ميرام يقول...

(:
اود الاعلان ومن موقعي هذا عن كوني المتسبب الرئيسي لاغلاق حسابك على وش الكتاب (: (: (:
ههههههههه
جت سليمة والتجديد مفيد
تحيتي
وكل سنة وانت طيب

عبود يقول...

ههههههه فداك الفيسبوك يا عم
هم اللي خسروك اصلا
تحب اديلك بتاعي ؟
ههههه
رمضان كريم يا باشا

P A S H A يقول...

كل سنة وحضرتك طيب وبألف خير وصحة وسلامة إن شاء الله
:)
رمضان كريم

قوس قزح يقول...

كما تعودنا منك على فعل الخير
ندعوك للمشاركة فى يوم خير جديد
التفاصيل هنا
http://kouskoza7.blogspot.com/2010/08/blog-post_12.html
و هنا
http://hams07.blogspot.com/2010/08/blog-post.html

رمضان كريم

صوت فيروز يقول...

سبحان الله يا اخي ..كانك بتحكي عني ...انا في ناس قفشت عليا في الشغل ...و البت رحاب الطويلة الهبلة هزت كتفها و قالت لي ...شكرا اوي علي انك مسحتيني و عملتي كمان بلوك ...هو انا ضيقتك في حاجة عشان تشيليني من عندك ؟؟
كلام غريب و الله يا أخي و كاني قتلت ابوها
معلش و اهو خبرة برده انك تعمل اكونت في دقيقة و نص ;)

صوت فيروز يقول...

سبحان الله يا اخي ..كانك بتحكي عني ...انا في ناس قفشت عليا في الشغل ...و البت رحاب الطويلة الهبلة هزت كتفها و قالت لي ...شكرا اوي علي انك مسحتيني و عملتي كمان بلوك ...هو انا ضيقتك في حاجة عشان تشيليني من عندك ؟؟
كلام غريب و الله يا أخي و كاني قتلت ابوها
معلش و اهو خبرة برده انك تعمل اكونت في دقيقة و نص ;)

غير معرف يقول...

انا مش هاعلق على البوست لانه اكتر من رائع زى سبيقاته من بوستاتك الجميله جدا
انا هاعلق على انك بقيت تخبى علينا البوستات بتاعتك وكل فين وفييييين اما تكتب حاجه
ياترى ايه السبب اللى بيعطلك عن نشر موضوعاتك وكلامك الجميل ولا بتخبي مننا الحاجات دى
انا متاكده انك استحاله تفضل الفتره دى كلها متكتبش حاجه يبقا اكيد بتكتب ومبتنشرش صح اعترف الجريمه لاتفيد :D
ROKA

Mohamed el badry يقول...

بجد انت كتباتك ملحاش حل , وقد ايه انا مش بقدر امنع نفسى من الضحك لان كلامك بيوصل القلب بسرعة , ربنا يحميك..بس ابو حميد انا كنت عايز اوصلك على الفيس ومش عارف

ساسو يقول...

فينك من زمان
متغيب ليه
يارب تكون بخير

Ahmed Fahmy يقول...

ههههههههههههههه
وراك وراك يا عمنا لو كل يوم اكاونت حتي
دوس ولا يهمك
و كل سنة و انت طيب يا رب يكون عيد سعيد عليك

بنت الغربة يقول...

عادى كلنا حصلنا كده
الشطارة انك تعمل اكتر من اكونت..
علشان لو واحد اتقفل التانى يسندك..
كل سنه وانت طيب
تحياتى

تخاريف خاصه! يقول...

سايب فراغ فى الفيس بوك والله
:))))

غير معرف يقول...

ثقافة الهزيمة.. أسكندرية ...ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى www.ouregypt.us

نسر الشرق يقول...

ياريت تعرض تجربتك وانت صغير على ابراهيم حسن

eman ezzeldin يقول...

كل حاجة بتكتبها جميلة وبتضحكنا جدابس لازم تشوف أنت ليه مش بيعيش لك أكاونتات ع الفيس ؟ منتظرين الآكونت الجديد وماتنساش تبخره.....emanezz

Hadeel Amer يقول...

3o2bal el account el talt

Bauschuttentsorgung Wien يقول...

هههههههههههههههه

Müllentsorgung يقول...

شكراً لكم ع الموضوعات المتنوعة ... موفقين :)