السبت، ٧ رجب ١٤٣١ هـ

!! اختراع اسمه .. العقل


من المعروف في الحضارات الحاضرة والغائرة في ستين داهية .. إن أكثر ما يُميّز الإنسان هو
العقل , ولقد أنعم الله علينا نحن البشر بهذا العقل لكي نستطيع أن نُعمله في مناحي الحياة المختلفة

.. وأذكر أنني في إحدى المرّات كنت أُفاصل مع أحد الصنايعية .. في سعر مصنعيته في شغلانة ما
وقلت له من باب فتح الحوار يا أخي المبلغ ده عالي قوي .. و ربنا عرفوه بالعقل ! ؛ ففاجأني
!!! الصنايعي برد مُفحم وقال .. لأ يا هندسه .. ربنا عرفوه بربنا

وكأن هذا (العقل) اختراع شيطاني مثلا .. مع أن الله خلقنا بهذا العقل لكي نستخدمه .. أي أن الله خلقنا (عاقلين) بالفطرة , وبالتالي عندما نُعمل (العقل) .. فإننا نستخدم ما خلقه الله للتيسير علينا في فهم مناحي الحياة
!! واعذرني عزيزي القارئ في ترديد جُملة (مناحي الحياة) .. أصلها عاجباني قوي

ما يجعلني أتحدث عن (العقل) .. هو ما حدث في الفترة التي أعقبت موت ومقتل المرحوم بإذن الله خالد سعيد .. من تصريحات في بيانات وزارة الداخلية .. وحوارات مذيعي التلفزيون والفضائيات , فما حدث جعلني أتساؤل بيني وبين نفسي .. هي العالم دي ما تعرفش اختراع اسمه العقل !!؟

فمثلا .. لماذا كل ما يحدث من حوادث تثير الرأي العام .. لا يخرج عن هذه الأشياء .. الاختلال
العقلي .. ازدراء الأديان .. الدعارة والمخدرات !؟
!! والله في حاجات تانيه حلوة ياخواننا .. بس انتوا دعبسوا هتلاقوا

وبناءاً عليه .. قررت أن أتقدم برسالة إلى القائمين على كتابة بيانات وزارة الداخلية .. عارضا
عليهم أن أُساعدهم في فبركتها فبركة ما تُخرّش البلوظه , ويا حبذا لو وجدوا لي شغلانه
!! سيناريست ومؤلف لتقاريرهم الإعلامية .. انشالله حتى بير تايم

.. ولكي أثبت للقائمين على هذه المهمة مدى استعدادي .. يكفي أن أقول لهم أنه إذا حدثت حادثة ما
.. سوف اسأل رؤسائي أولا .. عايزين سخريه ولا خيال علمي ولا واقعيه !!؟ , فإذا قالوا سخريه
.. سأقدح زناد فكري بحثا عن أقوى المشاهد الساخرة .. وأفظع الإفيهات أو القفشات الكوميدية
لدرجة أنني - وبعون الله - سوف أجعل الشعب يضحك ويفرح فرحة ما بعدها فرحة بعد أي
!!! مصيبة .. وسيدعون الله في صلواتهم قائلين .. يارب .. كتّر مصايبنا

.. أما إذا أخبرني رؤسائي بأنهم نِفسهم في حاجه خيال علمي , ياسلام .. غالي والطلب رخيص
حالا سوف أُثبت للشعب المصري أن سكان كوكب المريخ موجودون على الأرض , والدليل
على ذلك .. ما حدث في مذبحة بني مزار .. وذلك لأن المريخيون قد قاموا بأخذ عينات بشرية
!! من أجسام القتلى لدراستها ومعرفة تكوين الإنسان الأرضي
وسأُذيّل البيان بأنه قد نما إلى علمنا نحن اللواء فلان الفلاني والعميد علان العلاني - وكأن ظباط
الرُتب الصغيره كانوا أجازة ساعتها مثلا !!؟ -
أن سفاح بني مزار كان هو الوسيط الذي استأجر
!!! للمريخيين الشقة التي يسكنون بها في آخر شارع فيصل .. وكانت إيجار قديم كمان

أما لو أراد رئيسي خبرا واقعيا .. ياسلااااااام .. حليب هارتي .. حالا سوف أستحضر أرواح المخرج عاطف الطيب والسيناريست محسن زايد .. وأكتب أجدعها بيان واقعي تمت كتابته في تاريخ الداخلية

.. وسأقول مثلا مثلا مثلا .. أن سفاح المعادي قد وُلد بعقدة نفسية .. وذلك لأن الدايه اللي سحبته
قامت بقرصه على أظئوظته .. وكبُر الطفل بهذه العقدة من جنس النساء .. وقرر أن يُعلّم على أي
!!! أظئوظه أُنثوية تقابله , والحمدلله انه لم يتم ولادته على يد دايه دكر

ولكن قبل كل هذا .. لي رجاء شخصي عند وزير الداخلية .. أرجو أن يصل إليه .. وأن يصل لكل ظباط الداخلية .. أما المخبرين وأُمناء الشرطة .. فأساسا مايعرفوش يعني ايه نت !!؟

رجائي يا وزير الداخلية .. أن لا تقلل من عقاب المجرمين في الآخرة .. وذلك لأنكم يا معشر
.. الداخلية بتعذيبكم لأي مجرم - اذا فرضنا أنه مجرم بالفعل ! - فسوف تزيدون من حسناته
وتضاعفون من سيئاتكم
!! وبكده هنلاقي المجرم - بحق وحقيق - قاعد معانا في الجنة .. وهو بيقول بيس يا مان

ملحوظة

.. كنت أجلس على القهوة ووجدت صديقي يسألني وهو يشرب الشيشة عن رأيي فيما يحدث
! فقلت له أن ما يحدث يعتبر ظُلم بيّن للشعب .. ظلم ظلم مش هزار .. انا بجد مندهش
.. فأخذ صديقي نفسا من الشيشه وقال - بأسى - وهو يُخرج الدخان
!!!! فاهم اللي انت تقصده .. أصل انا زملكاوي
-
سوووو

هناك ٢٤ تعليقًا:

موجة يقول...

بعد عودتي هنا
والاقي نفسي اول تعليق
مش ممكن
انا مبسووووووط أوي
فعلا موضوعك هايل
تسرني زيارتك
موجة

adel يقول...

اظنوظته !!!
مدام الاظنوظة يبقي انت بتتكلم صح

Ramy يقول...

بس بقى يا باشا احنا عواجيز زى بعض

اقدر اقولك ان انت تمام التمام

اصلى انا عجوز وفاهم دماغك يا صحبى معلش اول بوست وبقولك صحبى

و معلش هتكتشف أنى رغاى أكتر منك بس شوية شوية كدة

انا كنت داخل بقى سخن بعد ما انت دخلت فى موضوع خالد

بس البوست خلانى منبعج من الضحك انا اسف الموضوع ميضحكش خالص و الكومن اللى كنت هكتبه
مكنش ده خالص بس الكومنت قبل قرايت البوست غير الكومنت بعد قرايت البوست

صحبى تانى معلش اول بوست و خليتك صحبى يعنى رغاى و رخم

(:

انا هضيف مدونتك عندى فى الريدر وهقرأ البوستات القديمة على مهلى كدة بأستمعان اشوف كده فيها ايه من مناحى الحياة (:

بالتوفيق و ممكن لما اركز كدة زادخل المود هأكتب الكومنت اللى كنت عاوز أكتبه

سلام (:

Unknown يقول...

جميل جدا
يا ريت كل الناس اللى مدية عقلها إجازة تديله فرصته ، و تسيبه يشتغل شوية ، مفيش ضرر خالص

رحــــيـل يقول...

ايون والله انت فعلا هتظبطهم فى تقاريرهم اخر تظبيط على الاقل هتفتكس لينا اسباب وحودايت جديدة تتصدق بدل الهبل اللى هما فيه ربنا يشفي بجد
:))
تسلم ايديك ودماغك يا سوووو

shimaa elkholy يقول...

ايوووووووووووه

اهو انا وربنا باقول كده ياسو

على راي المثل

بيقولك كذب مساوي ولا صدق مفركش


اوقات اقعد ابص كده واقول الله هما ليه فاكرينا حمير

والله احنا مش حمير اوي كده

بس احنا برضه على درجه من الحموريه بدليل انهم راكبينا ومدلدلين رجليهم ومش عايزين يكلفوا خاطرهم
ويعينوا سيناريست موهوب زيك كده يا ماو عشان يحبكوها علينا

حسبى الله ونعم الوكيل

Me7'o يقول...

الشيشة دى كانت بريئة؟؟؟
.
.
.
إنت ما سمعتش المقولة المأثورة

"العقل زينة فى الفاترينة"

يعنى نتفرج عليه ونعرف إنه موجود بس مش بنستعمله لإنه مستورد ومش على مقاسنا

تحياتى

رنونة حكومة ميخو يقول...

حسبي الله ونعم الوكيل فيهم .. ونشوف فيهم زى اللى عملوه فى خالد واكتر ...

بيان وزارة الداخلية اللى طلعته يبين هما اد ايه مستخفين بعقولنا وبيستغفلونا لدرجة انهم يقولوا انه مات قال ايه بعد تناوله للفافة بانجو لا وكمان صورته المشوهة دي بعد التشريح اول مرة اعرف انهم بيشرحوا الشفايف الحقيقة اول مرة فعلا !!! ولا وكمان بيكسروا السنان فى التشريح...


حسبي الله ونعم الوكيل في دي بلد

мαησηα يقول...

انا كمان زمالكاوية :)

عودا احمدا يا احمد

ماتغيبش ع الشعب كده

لان بحس انك بتكتب اللى

احنا عايزن نقوله

بتفضفض بالنيابة عننا يعنى :)

تسلم اياديك كالعادة متميز

هشام علاء يقول...

قارينى يا وديع

مشكلة وزارة الداخلية و الحكومة اساسا انهم مش قاريين الشعب كويس..يعنى لو دى حكومة فيها شىء من الذكاء او وزارة داخلية لدبها شىء من الحنكة (حلوة الحنكة دى) كانوا عدوا المصايب و المصايب اللى اكبر منها و الشعب مبسوط و بيدعى لهم

هما الخسراتنين انهم ما اتصلوش بيك لغاية دلوقتى
:)

أستاااااااااذ

و احشنى يا سو و الله بجد
..لما تنزل اسكندرية ابقى لاغينى

البنفسج الحزين يقول...

حمدلله ع السلامه يا سوووو
والله وحشتنا بوستاتك
مش عارفه ايه اخرة بيانات الداخليه الغبيه دي ....
اللي لو صدقناها نصدق ان الاهرامات في المنوفيه ونهر النيل تحت السرير ...
زي ما قال المناضل
عوكل بوروق عبد التواب الجن ....

مهندس مصري بيحب مصر يقول...

فعلاً والله اختراع العقل ما وصلهمش
أغبياء غباء يقرف

همس الاحباب يقول...

العقل زينة
وانت زينة العقلاء يا سووو
سبحان الله فعلاانا محتار جدا بالرغم من ذكاء الشرطة فى اختراع انواع واشكال العقاب والتعذيب الا انهم قمة الغباء فى بياناتهم عن اى حادث صغير او كبير
بس اعتقد لو تعاونوا معاك الوضع هيختلف تماما
تحياتى

mostafa rayan يقول...

سو بهذه المناسبة ياريت تشوفلى معاك بردو شغلانة عند حبيايبنا بتوع الداخلية ان شاالله مساعد اول سينارسيت
بس يا سو اظن ان خيالنا مهما كان شاطح مش هيوصل ابدا لدرجة واقعيتهم
هما كل اللي محتاجينه يظبطو البيانات علشان تبقى قانونية انت عارف اننا في بلد بتحترم القانون قوي
إلا صحيح ايه الفرق بين قانون الحكومة وبين الجيتار والعود والاورج
تحياتى ليك يا جميل

Asmaa mahaba يقول...

قولى نشتريه منين العقل دا الله يسترك يا سوو

Hanan Said يقول...

لو سمحت انا عايزه واحد كوكتيل
يعني من ده على ده اهو ندوق حاجه جديده بردو
عايزه كده سيناريو شاخر واقعي خيال علمي تراجدي والي نفسك فيه بردو
(حسبي الله ونعم الوكيل بجد)

بجد اسلوب كلامك بيعجبني كتير

تخياتي لك

محمد فاروق الشاذلى يقول...

يارب محدش من رجال وزارة الداخلية يقرا البوست ده يا عم أحمد، علشان ماتبقاش مصيبة التعذيب ومصيبة تظبيط البيانات كمان، يعنى هاتتقفل فى وش الناس بتوع حقوق الإنسان.
أبو س إيدك يا سووو أوعى تقبل أى وظيفة تتعرض عليك فى وزارة الداخلية

عبود يقول...

راائع راائع
كتاباتك جميلة جدا
عبود

فلاشه اربعه جيجا يقول...

انا كمان فاهم قصدك...انا كمان زملكاوى....ماتخافش "هتوفرج"ان شاء الله

بس حلوة اوى حكايه..لأا يا هندسه ربنا عرفوه بربنا...جاب التايهه ابن الذينا دا

laila elshowaishan يقول...

يالهوىىىىىىىىىى عليك ياسوووو
ده أنت خراااااافة يامعلم
يحرسك لدباديبك وبانداتك وعفاريتك وفيستوكك ياقلبي
ماتنساش بقي المرة الجاية تاخدنى عالقهوة معاك ونشرب شيشة براحتنا ياماو

Umzugsunternehmen Wien يقول...

جددوا موضوعتكم .. رجاءاً :)

Bauschuttentsorgung Wien يقول...

هو موجود بالفعل .. لكنه عليه ترااااااااااب

Müllentsorgung يقول...

شكراً لكم ع الموضوعات المتنوعة ... موفقين :)

Umzug nach Luxemburg يقول...

الله يعينكم على المجهوووووووووووووود :)