الخميس، ٢٠ ربيع الآخر ١٤٣٠ هـ

!!! فوبيا الكنيف

مقبض باب الحمام بيعلق .. ونتيجة لأنه بيعلق وممكن يقفل على اللي جوا الحمام .. قمت جايب نواية بلح وزانق بيها لسان الكالون عشان مايطلعش ويقفش لوحده .. وباكتفي وانا في الحمام باني اقفل الشنكل بس
الشقه اللي قاعد فيها بقى .. قدام الشقه اللي قاعد فيها ابويا .. بس الحائط الفاصل بين الشقتين شايلينه وعاملين الدور شقه واحده مش شقتين زي ماهو في باقي العمارة .. وبيني وبين الصالة اللي فيها التلفزيون واللي بيقعد فيها ابويا مشوار .. ولما بيحتاجني عشان اعمللو شاي ولا اجهزلو أكل بيديني رنه عالموبيل اقوم اروح اشوفو .. لدرجة اني حتى لو دخلت الحمام باخد معايا الموبيل .. الا المره دي .. دخلت الحمام ونسيت الموبيل في الاوضة .. والمقبض بتاع باب الحمام قفش والنواية اللي زانق بيها اللسان اتنطرت .. واللسان مسك في حلق الباب .. واتحبست جوا التالاويت
!!!!!!!
.. لألألأ .. مش انا اللي يحصل معايا الكلام ده .. انت اكيد بتهزر .. صح .. اصلو ماينفعش
طب والحل .. ده الموبيل في الاوضة .. ولو قعدت انادي من هنا لغاية اسبوع قدام .. ابويا مش هيسمع .. وحتى لو سمعني هيعمل نفسه مش سامع عشان يخلص مني .. مانا عارف ابويا بيعزني بطريقه يالهوووي
لأ بجد بقى ايه .. انا هفضل كده كتير ولا ايه .. طب انادي من الشباك بتاع المنور ولا من البلكونه بتاعة المنشر على أي حد .. آه .. انا هعمل كده .. ماهو مافيش حل تاني
ساعه ونص من النداء المتواصل .. إن حد يسمعني .. ابدا .. لا البواب ولا مراته ولا القطيع اللي مخلفه .. وعلى حظي الاسود مافيش حد في العمارة ناشر حاجه في البلكونات اللي تحتنا .. يعني احتمالية ان حد يفتح باب البلكونه بتاعة الحمام مستحيله .. أصل مافيش حد هيفكر انه يقعد يستجم ويشربلو حاجه مثلا في البلكونة بتاعة الحمام .. تقريبا انا الوحيد اللي باشرب نيسكافيه في الحمام
!!!!!
طب وبعدين ياجرعان .. القعدة طالت وانا ابتديت اجوع .. والله لو اعرف اني هتحبس ماكنتش عملت إإح وفضّيت بطني من الاكل اللي كنت واكلو .. وبالتالي ماكنتش هدخل الحمام اصلا يعني
طب ماهي البلكونه بتاعة الحمام فيها شوال بصل .. وكام ربطة توم متعلقين عالحيطه .. بس ايه ده .. هاكل بصل وتوم من غير ما ابلّع بـ بيبس .. لأ .. الحوار ده فاكس
يا أحمد رد علينا .. رد يا أحمد عالجوّال "
هااااع
يا أحمد عايزين نسأل عنك وعن باجي الأحوال
هااااااع
يا أحمد رد علينا .. بجى ماترد على الجوّال
هااااع
جوّالك بيجول بُرُرُرُم بُرُرُرُم .. رد يا أحمد عاد
ماترد يا أحمد عااااااااد
" هاااااااع
ايه ده .. دي رنة الموبيل اللي انا عاملها لجروب المدونين .. قشطه .. كده المدونين لما هيتصلو ويلاقوني اختفيت هيقلبو الدنيا .. مش بعيد يعملو مظاهرات ووقفات تضامنيه وشغل بانرات وحاجه ايييييييه
وطبعا الصباغ مش هيتوصى .. هيطلّع الصور اللي ماسكها عليا وانا باكل ويستعطف الناس ويقول اني كنت باكل كالحمل البريء .. ايوه كالحمل البريء .. بس بريئ من دم ابن يعقوب
و
عبد الرحمن فارس هو راخر لن ينأى عن الموضوع - سمعت الجمله دي منه وعجبتني .. بس مش فاهمها - ولن يتخلى عني .. وهيقعد كل شوية يكتب كلام عالفيس بؤ عني وعن اختفائي المريب
و
نواره نجم لو ماعملتليش تلات اربع تسع عشرين موضوع هزعل قوي منها .. آه
واخواننا المدونين والغير مدونين اللي عملو مواضيع واعتصامات ساعة
محمد عادل دول برضه لو ما عملوليش زيطه وزمبليطه هقفش عليهم .. وبعدين انا مش اقل وطنيه منه .. هو اتمسك عشان متصور بكلاشينكوف .. وانا متصور بشندوشت كبده .. وكل واحد واسلوبه في النضال
!!!!!
بس ايه ده .. لو عملو مظاهرات والحكايه كبرت بجد .. وبعدين الحكومه ولا امن الدولة جولي البيت ولقوني في الحمام .. هيبقى منظري ايه قدام الرأي العام .. اخواننا المناضلين بتوع سكسه ابريل هيقولو علي ايه .. يعني بدل ما يقولولي كفاره .. هيقولولي شفاكم الله وعفاكم !!؟؟؟
ويالهوي لو أي برنامج معارضه في قناة زي الجزيرة استضافني .. هيقولو ايه وهقولهم ايه ؟؟؟
المذيع : أخ سوووو لو سمحت اوصف لنا شعورك عندما تم احتجازك في المرحاض
.. سوووو : - متلجلجا - انا بحب مصر .. وزي أي انسان حبيت اعبّر عن حبي لمصر
المذيع : - مقاطعا - هل تمت معاملتك بطريقة غير آدميه في الكنيف ؟؟؟
سوووو : لأ الحقيقه الاخوه الشياطين اللي معايا في الحمام عاملوني أحسن معامله .. والحمدلله مافيش حد استخدم عصاية الفوّاطه بأي شكل
!!!!!!!
ايه ده صحيح .. هو انا مش في الحمام اللي هو بيت الشيطان .. امال ابن الصرمه ما جاش يضايفني ليه .. ولا هو قفش اكمني اول ما دخلت قلت اللهم اني اعوذ بك من الخبث والخبائث !!؟؟؟
ده شيطان نتن قوي .. مع اني كنت باعطف عليه ساعات وما اسميش بالله قبل ما اجي اكل .. لكن وديني من هنا ورايح هقول بسم الله .. ويانا يانت ياشيطان الكلب .. ان ماخليتك تخس وتبقى في رفع الريشه .. ما ابقاش سوووو
!!!!
ياجرعان القعدة طالت .. واللي اتصل ده شكلو كان بيديني ميسد مش بيتصل
.. طب والحل
.. افرجها من عندك يارب
.. يارب انت عارف اني بحاول اصلّح من نفسي
.. انا عارف اني مقصّر في حقك وفي حق عبادتك
.. يارب .. يارب .. مش عارف اقول ايه
بس انت عارف باللي جوايا
..............
........................
................... ......... ............ ... ..............
..............................................................................................
......
.
صوت اسماعين البواب : يا باشمهندس .. ياباشمهندس
سوووو : - مستغيثا - ايوه يا اسماعين .. ايوه .. انا في الحمااااااام والباب اتقفل واتحبست
- صوت اسماعين : - صمت
سوووو : - مستغيثا - اسماعيييين
- صوت اسماعين : - صمت بزياده
سوووو : - مستغيثا قوي جدا - يا اسماعيييييييييييييييييييييييييييييييييييييييييييييييييييييي
ييييييييييييييييييييييييييييييييييييييييييييييييييييييييييييي - باخد نَفَسي - ييييييييييييييييييييييييييي
ييييييييييييييييييييييييييييييييييييي - باخد نفسي برضك - ييييييييييييييييييييييييييييييييييييييييييييييي
ييييييييييييييييييييييييييييييييييييييييييييييييييييييييييييييي - ابقو فكروني أبطّل سجاير - يييييين
صوت اسماعين : انت فين يا باشمهندس ؟؟
سوووو : - متفائلا - في الحمام .. في الحمام يابن الجزمه .. بقولك محبووووووووس
صوت اسماعين : طب وايه اللي حبسك طيب !!!!!!!!!؟؟؟؟؟؟؟؟؟؟؟؟
سوووو : غور يا اسماعين .. غور .. مش ناقصه هطل هي اصلها
صوت اسماعين : طب الحاج كان عايزك .. اقولو ايه ؟؟؟
سوووو : - ببرود مصطنع - هممم .. قوللو ابنك محبوس في الحمام يا حاج .. لكن لما هيطلع ان شاء الله .. العمارة هتتسرق .. عشان البواب هيتقتل في ظروف غامضه
صوت اسماعين : هاا !!!!!؟؟؟؟!!!!؟؟؟؟؟؟
------
وبعد محاولات مستميته .. كادت ان تطلع روحي فيها .. وكادت أن تُزهق روح اسماعين البواب فيها بعد خروجي من التالاويت .. خرجت والحمدلله
-
.. ملحوظه .. عالريحه
-
.. انا حاسس اني جاتلي فوبيا الكنيف
.. وناوي ان شاء الله اشيل باب الحمام واحط مكانه ستارة زي ماهو معمول في القهاوي البلدي
!!! ولو حد جه يخش الحمام لازم يسقف .. وساعتها هاقول .. إحم
سوووو

هناك ٤٦ تعليقًا:

77Math. يقول...

لازم تعرف إن دا جزاء اللي يهين البلح أو أي جزء من أجزاء البلح :D

حمدا لله ع السلامة !

تامر علي يقول...

يا عم متصلح الأكره ...(أكره وبعده واللي وعدني هايوفي بوعده)

انت عامل زي حالاتي فضلت سنة مأجل تصليح سلك الشفاط لحد ما دخللي فار في الشقة وبعد صراع دام 3 ساعات تكبدت خسائر فادحة من الأطباق والكبايات .. هرب الفار الجبان من مكان ما جه ...رحت علشان اسد عليه المكان مشغل الشفاط من ساعتها لحد دلوقتي ..أسهل ما اصلح السلك:)

صلح الأكره :)

Guminamaso يقول...

أنا أول مررررررة أعرف إن النواية ليها شغل تاني غير إنها تسند الزير
ويمكن علشان كده عملت بأصلها وقفلت الباب عليك.......
كل حبسة وإنتا طيب

كلامك خلاني أضحك لحد ما عنيا دمعت(بفتح وشدَ الميم وكسر العين المفتوحة)برغم حالة القرف اللي أنا فيها بسبب المطر المتواصل من أسبوع
ولما زوجتي المصونة شافتني بعييط من الضحك أصرت اني أترجملها كلامك وأعرفها الحكاية
وبعدين قالتلي بكل بساطة إن الباشمهندس سووووو محتاج2 كيلو بلح أجنبي أبو نواية أوتوماتيكيييي
!!!!!!!!!!!!!!!!!!



سووووووووووووو
تحياتي لك

عندما تكون ميمى وحاجات كتير مع بعضها كده يقول...

ضحكتنى اوى فكرتنى بموقف عظيم من ايام الكليه بس فى الكليه بقى كانوا بيقفلوا بالمفتاح وافضل خبط بقى لغايه ما حد يجيب المفتاح ويجى مش اكره هههههههههههههههههههههههههههههههههههههههههههه

سوبيا يقول...

انا لو مكانك
احمد ربنا
وابوس ايدي
شعر ودقن
علشان محدش حس بالموضوع
غير عم سماعين
والا كان زمانك
بتتحاكم
علشان النووي اللي مخبيه فالحمام
وساعتها
الشقة نفسها هايفجروها
مش الاوكرة بس



كفارة يا سوووووووووو

هو لو قلتلك اني مت من الضحك
هايكون قلة زوق مني صح

بس بجد ضحكت كتييييييييييير

MǿиY El-Shreef يقول...

هههههههههههههههههههههههههههه
هيهيهيهيهيهيهيهيههيهيهيهي
هوهوهوهوهوهوهوهوهوهوهوه
هاهاهاهاهاهاهاهاهاهاهاه

لووووووووووووووووووووول

معلش اصلي بجد هموت من الضحك

بالذات ع اسماعين

فكرني بشعبان ههههههه

اه ياشعبان

بس فيها ايه لو تصلحوا الباب يعني

ماتجيبوا نجار يا سو يا اخي

وبعدين نوايه

حرام عليك ده بلح مش اي حاجه بردوا

انا من هذا المنبر اعلن رفضي الشديد واندد بالواقعه

ومن منطلق اني حزب وطني وبحب البلح البلح البلح اطالب بايقاع اقصى عقوبه بالمعارض سووو وات :D

ها ها ها هاااع وابقى حب مصر ياصغنن

ههههههه

احم :D

MeDoOoOoOo يقول...

el modo3 7elw awy ya sooooooo gamd moot 3'er keda ana shayf en isma3il dh el mafrood t2tlo btohmt el 3'aba2 el egtma3y tdrbo 30 tal2a fe medan 3am yala kefaya 3alek keda

OldCatLady يقول...

:))

حمد الله على السلامة

حاول الفترة الجاية متدخلوش تانى....شكله كده مستقصدك

فكرتنى بنفسى....عندنا حنفية الميه السخنة ممكن تقع مع نفسها و يطلع سهلوب ما من المياه السخنة يتكفل بحرق ايدك.....و نفسى يتصلح

بس كلنا مكسلين

:))

tamer.sala7 يقول...

فظيع يا سووووو

علي فكرة انا كمان كنت زانق اللسان بتاع الحمام بمسمار مش بنوايا بلح وبعد البوست ده بجد قومت صلحت الاكرة

شوفيتم يا سوووو

ebn roshd 777 يقول...

بجد ضحكتني
وزنقه تفوت ولا حد يموت
نوايه بلح لا مهندس بصحيح

Soooo يقول...

سبعه وسبعين ماث

هو البلح يقرب لحد في الحكومه ولا ايه؟؟؟
وانا اقول اغنية البلح البلح البلح اشتهرت ليه
حتى البلح بقى فيه كوسه


الله يسلمك ياستي




سلامووووووووووز

Soooo يقول...

تامر علي

يعني هو انا كنت اعرف ان النوايه مش هتسند الكالون .. دي بتسند زير .. اشمعنا الكالون اللي مش هتسنده

عموما انا بقول نجيب الفار بتاعك .. ويدخل الحمام بتاعي .. ويجوبلنا فيران مستحميه

وهنصلح الأكره بعون الله




سلامووووووووووز

Soooo يقول...

ABO JOSEF

ماهي الوايه فشلت في انها تسند اللسان بتاع الباب .. مع انها بتستحمل زير قد كدهو يا اخي
نوايه عجيبه يعني

والحمدلله انك ضحكت ويارب حياتك كلها تبقى سعادة

بس انا عايز البلح ابو توماتيكي ده بدري قبل دخلة رمضان الله يسترك

ملحوظه
هو انت عرفت تترجم عصاية فوّاطة الحمام ازاي؟؟؟
ده اللي اخترعها مالقالهاش ترجمة لغاية دلوقتي ؟؟؟



سلامووووووووووز

Soooo يقول...

عندما تكون ميمى وحاجات كتير مع بعضها كده

اهو الطمع بقى
ياشيخه ده انتو تحمدو ربنا ان كان عندكم حمامات في الكليه
احنا كان عندنا كليه في الحمامات اصلا




سلاموووووووووووز

Soooo يقول...

سوبيا

والله ياسوبيا ياختي هو لغاية دلوقتي اللي قرو الموضوع ده حوالي مية واحد

يعني هيعرفو بموضوع النووي قريب بعون الله

وكويس انك قلتي كفاره عشان احس اني كنت باناضل بجد

وربنا يارب يسعدك ويكرمك دنيا وآخره




سلامووووووووووز

Soooo يقول...

MǿиY El-Shreef

بقى كده
هتبلغي عني الجهات المختصه وهتطالبيهم بتوقيع اقصى عقوبه علي
ماشي ماشي

وبعد كل اللي قلتيه كمان بتقولي احم .. لألألأ
ده شيء فاق حده قوي
انا هاخش الحمام تاني .. وعهمل تنظيم سري حمامي وهفجر البلد
وسلاحنا هيكون المساحات .. ومشروبنا الوطني هيكون الكلور
تاخدي معانا سندوتش صابون؟؟؟؟




سلامووووووووووز

Soooo يقول...

MeDoOoOoOo

والله ياميدو يابن اختي .. اسماعين بالرغم من غباؤه الاجتماعي الا انه انقذني
لكن برضه غبي .. هنقول ايه يعني


وانت ازيك .. بقالي يومين كده ماشتفتكش .. دي فترة طويله قوي ياجرع




سلاموووووووووز

adel يقول...

هههههههههههههههههه

والله جامد ياسووووو

اول واحد يتحبس في الحمام و يخرج سليم

و لو علي الفابيو ممكت تتعالج منها و انا هبعتلك رقم السباك اللي بيعالج الحالات دي

ههههههههههه

*البت المشمشية *حلوة بس شقية * يقول...

هاااااااااااااع
بتشرب النساكفيه فى الحمام
الله اكيد بيبقا ريحتو جنان

بس عم اسمعاين شكلو مشكلة
ابقا اعم لمعاه حوار فى اى موضوع وانشرو

وبعدين بدال ماتجيب علبة سجاير صلح الاكورة

وبلاش فضايح
وعلق الموبيل فى رقبتك عشان الزنقة

موجة يقول...

ههههههههههههههههه
احسن
فرحانة فيك
P:

مهندس مصري بيحب مصر يقول...

هههههههههههه
اصبر عليا بس اما اشوفك يوم الخميس

بقى هي دي سيرة نوارة اللي جايبها
:)

V.Hayat يقول...

حمد لله على السلامة انك خرجت سليم خلى بالك المرة الجاية اما الستارة دى فكرة ممتازة احم احم

Unknown يقول...

تووووووووووووووووووووووحفة

Ahmed Al-Sabbagh يقول...

مشكلتى فى الحياة إنى مش عارف أرد
كل ما أجى أعلق أفتكر أهلك من الضحك لغاية ما اتزنق واجرى على الكنيف
ولما أرجع اتزنق تانى
فأنا فكرت إن أشترك مع نضال
ونعمل كباين وكل كبينة فيها مبولة
وتبقى منتشرة فى كل شارع وكل حارة
وتبقى رمز للنضال الشعبى
وكل واحد اما يعوز يناضل يروح على كبينة ويحط كوين ويناضل

بجد إنت أبدعت
هو إبداع له ريحة صحيح
لكنه تحفة ساخرة
:)))))))))))))))))))))

أحمد

امال يقول...

ازيك يا احمد

انا برده كنت بطل على المدونة كل يوم علشان اشوف البوست الجديد وحسيتك طولت بس مخطرش فى بالى يكون ده سبب الغيبه :)

وطبعا بوست رائع كالعادة وبكل سعادة :)

انا حصلى موقف مشابه اوى
تقريبا فى ايام الطفولة ضربت اخويا وطلع يجرى ورايا روحت داخله التواليت وقفلت راح مصمم انى اطلع علشان يضربنى فالاخر راح فاكك الاكرة علشان مطلعش وقد كان معرفش يرجعها تانى لا هو ولا اى حد فى البيت وفضلت محبوسة تلات ساعات وهما بيحاولوا يخرجونى وبدات اتخنق واعيط وكانت لحظات صعبة اوى فلاخر نطيت من شباك المنور على شباك المطبخ (عندكل دور بابا قافل المنور باسياخ حديد بالطول والعرض علشان مفيش حرامى يقدر يطلع وحطولى كرسى ونطيت بقى وطلعت وانا بتنفس الصعداء :)
peace banana :D

Soul.o0o.Whisper يقول...

سوووو : - مستغيثا قوي جدا - يا اسماعييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييي - باخد نَفَسي - يييييييييييييييييييييييييييييييييييييييييييييييييييييييييييييييي - باخد نفسي برضك - يييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييي - ابقو فكروني أبطّل سجاير - يييييين

هااااااااااااااااااااا
مش ناوى تبطل ؟؟؟؟؟؟

ههههههههههههههههههههههههههههههه
تحفة بجد

فاروق عادل يقول...

ههههههههههههههههههههههههههههههههههههههههههههههههههههههههههههههههههة تحفة تحفة بجد موتنى على نفسى من الضحك وانا قاعد فى السايبر وى البوست بتاع المعزة برضة يعنى بتوع السايبر بدل مايفتكرونى كئيب هيفتكرونى عبيط
المهم
لازم اوفك فى اول جمعة من شهر مايو واوعى تظبط الموبايل غلط ساعة مارس برضة بلاش الحركات دى

Ehab يقول...

هههههههههههههه

ولسه يا صاحبي
كل لما احس خنقه او بضيق
اجيك واسمع قصتك زي البريء
اضحك وانسى غمتي
كده وانشكح
وافشخ في ضبي واقول خلاص
الدنيا فانيه يا ناس وكفايه حزن


======================

بجد دايما تخرجني من مود الزهق يا شديد انت
الله يسعد ايامك يا سووو
سلم على الحاج بقى
وطمني عليك يا ندل
ده الرنه ببلاش مش هقولك رساله بربع جنيه

سلااااااااااااااااااام
اخوك ايهاب

غير معرف يقول...

ههههههههههههه

لا لاااااااااااااااا
يا عينى عليك يا سوووووو
متخيلاك وانت محبوس وهتموت من الجوع

ههههههههههههههههه
تسلم اييييييدك
:))

حروف يقول...

mmmmmmmmmmm an lesa msh 2ret bas 3andy 5aber mohem i engashed
he is like u mohandes dekor i close my blog &i cant enter th email this days

Zika يقول...

تصدق انا اتحبست مرتين في الحمام وكنت افتح شباك المنور وانادي علي اي حد وتبقي فضيحه بريحه
واحشني والله يا برنس الليالي

فاروق عادل يقول...

اوفك=اشوفك

القمر الساهر يقول...

ههههههههههههههههههههههههه

معلش معلش بتحصل

مش لو بطلت سجاير كان زمان عندم صحة تنادي


فكرتنى لما دخل عليا فار

وانا صرخ وبحاول افتح الباب مش راضي يفتح

والفار يصوت وبيحاول يفتح البلاعة ومش عارف يفتحها

وجت لحظةصمت بصنا فيها بعض وكملنا صويت
هههههههههههههههههههههه


بلاش كسل وصلح الاكرة

حمد الله على السلامة

مجداوية يقول...

السلام عليكم

:)
:)
:)

لو كان باب النجار مخلع كنت عرفت تطلع

:)
:)

نواية بلح !!!!!!!
تكنولوجيا بصحيح

ونطرت ليه ؟ الرفاس اشتغل فجأة

:)
بس بجد تخيل الأحداث الخارجية من هذا المزنق تخليك تغير الأكرة فور انتهاء الحصار
غيرتها ؟؟؟

Mostafa Safwat يقول...

موقف جامد جدا
و خصوصا عند وصول الرفيق اسماعين
ده لازم تدخله الحمام عندك و تشيل الوايا و تسيبه و كل ماينادي عليك و انت واقف ورا باب الحمام تقله "نعم" بسسسسسسسسسسس
و تسيبه عشان يحس باحساسك
نصيحة لو مش عاوز تصلح باب الحمام فك الالون و شيل اللسان خالص عشان ميعلقش تاني

kochia يقول...

الحقيقة لازم اقول حمد الله علي السلامة

قلب ارهقته الاحلام يقول...

هههههههههههههههههههههههههه

تصدق انت مشكلة موتتني من الضحك

خصوصا وأنت متشتحتف علي النوايا :-p

طيب اعمل إحتياطاتك صاحب الشيطان

صاحب الحمام يبقي يفتحلك مرة ال جايه

شفيتم بأة ومتعملش كده تاني ههههه

تحياتي ,,,,

شهووووده يقول...

سوووووووووووو فكرتني بنفس المقلب بس ايه كان يوم عجب في الكلية وما كانش في بشر غير بعيييييييد ويوم خميس يعني كنت حتحبس خميس وجمعه ولو حد عبرني على السبت يبقى فل وعال العال ده لو فضل فيا نفس اصلا.. ومافيش موبايلات اساسا.. يابووووووووووووي كان يوم صعب قوي قوي بس الحمدلله بقدرة قادر فتحولي الباب .. ضحكتني بجد



احترماتي

شهد

مستكه يقول...

السلام عليكم ورحمة الله وبركاته

اسمحلي دي اول مره اشارك في مدونتك

حبيت اسجل اعجابي باسلوبك في الطرح

سواء البوست ده او اللي قبله ماشاء الله عندك قدره علي النقد باسلوب ساخر جميل

اسعدني مروري بمدونتك

-_- يقول...

تعيش و تتحبس

المـــفـــــــقــــــــوعـــــة مــرارتـهــا يقول...

ماقدرتش اقري وماقلش اللي جوايا ياعم انت
نوايا ياباشمهندس سووووووووووو
قافل الباب بنواية
انت كدة بتسوء سمعتك خللي بالك
انت مش مهندس ديكور ياجرع
اخيه عليك علي راي المثل باب الباشمهندس مافيهوش اوكرة
بس تعرف انت تستاهل تغطية اعلامية اكبر من كدة بقي سووو ابن ابو سووو يتحبس كدة سكتم بوكتم لا ياجرع مالكش حق كان لازم الدبليوسي تيجي تصور

همس الاحباب يقول...

تعيش وتاخد غيرها
هههههههههه
حمدلله على السلامة من ارض المعركة

همسه يقول...

هههههههههه
لذيذ قوى
تحياتى

MǿиY El-Shreef يقول...

وحشتنا ياسوووو

اسبوعين كتير

ست البيت يقول...

جامدة يا عم سووو بجد
برغم اني كنت ناوية اقاطع دنيا التلوين اللي احنا فيها بس برضه
شوية ضحك ف يمدونة الاخ سوووو لن يضروا بالرجيم التدويني اللي انا عاملاه
جامدة قوي وجامدة كمان فرح هايفة وابو هشيمة
يا بني دا اللي حيطلع لها من البرامج والتلفزيونات والجرايد والمجلات اللي حتعمل معاها حوارات حتبقى اكثر بكتير من المهر اللي كانت ممكن تاخده من ابو هشيمة
بجد بوست حلو والفوبيا أحلى
يعني نقول ع عم سماعين يا رحمن يا رحيم
خلونا نشوفكم بقى في اسكندرية
يا لا سلاموووووووووز
ودمتم بود

mimi يقول...

اااااااااه منك يا سووووو
انت رائع .. وخفتش من العفاريت وانت عمال تنادي كده يطلعلك واحد من التلاويت يقوللك " إيه ياعم خرمت ودانا" ؟؟؟
ويطلعلك ودنه في إيده وفيها خورم كبيييير....

؟؟؟؟
اسماعين ده لازم ينطرد