الأحد، ٢٨ محرم ١٤٣٠ هـ

!! مُدَوّنة أوباما

صاحي الصبح كده وغزالتي رايقة شويه .. والاقي خبر في جرنان الأهرام بتاع يوم الأحد الموافق خمخه وعششين يناير .. في صفحة يوم جديد .. اللي هي الصفحه التانيه .. خبر تحت عنوان مدونة البيت الأبيض .. وفي الموضوع ده لقيت ان أوباما رئيس أمريكيا ناوي يعمل مدونة
!!!!!
.. هنا لقيتني بقى رحت سارح بالخيال
.. وتخيلت كده لو في يوم من ظاط الأيام .. لقيت تعليق جايلي

... باراك أوباما يقول

What news man ??
خبر ايه يا مان ؟؟
U have a lot didn’t come to me
بقالك كتير ما جتش عندي
Or u r cutting me ??
ولا تكونش مقاطعني ؟؟
I just wont u 2 know .. that u r the milk of my heart
انا بس كنت عايزك تعرف .. انك حليب هارتي
peace bananaaaaaa
سلامووووووز
----
وشطحت بخيالي أكتر .. وتخيلت ان أوباما جه معانا بؤجة الخير مثلا .. وطبعا ده مش هيبقى جايب هلاهيل زي اللي احنا بنودّيها .. لأ .. ده ممكن تبقى بؤجته بنطلونات ليفايس وكيلفن كلاين أمريكاني أمريكاني .. مش أمريكاني صيني من اللي بنجيبه متهرّب من ليبيا .. ولو جايب جزم ولا ترنجات تكون نايك وأديداس وريبوك
!! ومش بعيد يكون جايب بوكسرات دولشي آند جابانا وجوتشي

وتخيلت مثلا انه عامل موضوع عن العشوائيات اللي مبهدلة حيّ هارلم في محافظة شيكاغو .. ويبقى بيشتم في رئيس الحي وفي المحافظ ومقندل عيشتهم في الكونجرس
!! ومش بعيد يطالب بوجود محل ماكدونالدز وبرجر كنج وستار بكس .. لكل مواطن

او يبقى عامل حملة عشان الماريجوانا بتتباع رخيص في الويست كوست .. بينما في الإيست كوست غاليه جدا ومش متوفرة .. والإف بي آي مانعين تداولها وشربها
!!! ولازم يشوفو حل بدل ما فيفتي سنت - المطرب النيجر المشهور- ماهو قالب عليهم الدنيا

ده مش بعيد كمان بعد ما نافورة كتب المدونين .. ما اتفتحت في معرض الكتاب بتاع السنه دي .. نلاقيه ناشر كتاب هو كمان في المعرض الجاي .. ويبقى اسم الكتاب بتاعه
أوباما .. هو للسلام حمامه
!!!!!
----
مافوقتش من حالة التخييل اللي عندي دي غير وانا باحط الجرنان عالمكتب .. لما لقيت جرنان الاهرام بتاع يوم الجمعة تلاته وعششين يناير .. اللي مكتوب في اول صفحه فيه وبالفونط العريض
البوارج الاسرائيلية تقصف غزة .. وليفني تهدد باستئناف مهاجمة الأنفاق
.. وتحتها على طول .. بس بخط أرفع شوية
أوباما يؤكد تقديره للدور المصري ويطالب حماس بوقف اطلاق الصواريخ
!!!!
؟؟؟؟؟؟؟؟؟؟؟؟؟؟؟

.. وافتكرت برضه كلمة كان قالها أوباما بنفسه لما كان في الانتخابات .. لما واحد من الصحفيين سألو
الصحفي : هل معنى ان ابوك اسمه حسين وده اسم مسلم .. انك هتتعاطف مع المسلمين ؟؟
أوباما : لو كان اسم ابويا حسين وده اسم مسلم .. فانا اسمي باراك .. وده اسم يهودي
!!!!!

ملحوظة

.. لما كنت سرحان وباتخيل ان أوباما هيجي معانا بؤجة الخير أو حملة التبرع بالدم
.. تخيلت انه بعدها جه معانا عالبورصه .. ولقيت نفسي محتار .. وباسأل روحي
هل أوباما هيشرب شيشة تفاح بحريني زينا .. ولا هيطلب شيشة أبل أمريكاني !!؟؟

سوووو

هناك ٥٤ تعليقًا:

Mony يقول...

رئيس عايز يبقي متماشي مع العصر


طيب ما عندك الرئيس الايراني عنده واحده بالفعل
اسمها "الكتابات الشخصية لاحمدي نجاد"


بصراحة عجبتني جدا
لاني حسيت انها موضوعية
و اللي بيشتمة ماتحذفش تعليقه
و اللي بيستنجد بيه برضه ماتحذفش تعليقه


اللي انا متخيلاه بأه لو الريس بتاعنا هو اللي عمل مدونة

يا تري ممكن يكون فيها ايييييه؟؟؟

و مين اللي هيدخل يعلق من غير قلمين علي سداغه

و ياتري الواحد لو دخل يعلق
هيكتب اليوسرنيم و الباسورد
ولا هيكتب رقم البطاقة؟؟؟؟

حنين القلب يقول...

والنبى يا سوووو
بطل خيالك ياخدك فى حتت عمرك ما هتشوفها غير فى خيالك
مين ده اللى يتعاطف مع المسلمين
ابقى قابلنى على راى روبى

الراجل قالها صريحه وحتى لو مش قالها برضه هيفضل ولائه لاسرائيل


تسلم ايدك يا سووووو
والله وحشتنا يا عم
بس انا مخصماااااااااك

77Math. يقول...

ههههههههههههههههههههههه

بس ازاي ركبوها دي

باراك حسين أوباما

يعني لحد دلوقت مش قادرة أتخيل ازاي اخترعوا الاسم دا !!



الله يسعد صباحك !

صيدلانيه طالعه نازله يقول...

ياباى على الغيره طبعا شاف التدوين العربى و النجاحات الفزيعه اللى بيحققها كل يوم قالك اشمعنى انا
و اكيد سمع عن اصحابنا المدونين اللى عملوا كتب قالك اهو نكتب موضوعين و ننشرهم فى الشرق الاوسط و البيع يبقى اجبارى يعنى تروح تقطع تذكره قطر يقولك و كتاب اوباما 5 جنيه زياده زى التبرعات كده و ده ينطبق على فاتوره الكهربا و الميا و النت
و مش بعيد السلاطين اللى عندنا يقلدوه و يعملوا كتب و ساعتها تبقى مصيييييييييييييبه

ست البيت يقول...

واللي يضحك الشعب الأهطل اللي بقى فرحان بمجيء أوباما ولا فرحته بيوم القبض
طبعا.. هة مش حيجي بنفسه بس حيبعت مبعوث أوباما لبؤجة الخير في الشرق الأوسط
ويدينا معونات بؤجية ...
وعلى أواخر نهائة ولايته نلاقي الحرب قايمة في الكونجرس الامريكي ضد المعونات البؤجية لمصر وتهدد بقطعها إن لم تؤدب بدو سينا
وتمنع تهريب السلاح ليهم
ويمكن كمان تهدد بقفل البورصة عشان بيتم عليها نشاطات وتجمعات تخدم فكرة الارهاب السيني نسبة لبدو سينا
ونلاقي الحاج اوباما بيقول السيناموفوبيا
ويتعهد بجروب ع الفيس بوك لدعم ضحايا السيناموفوبيا
عاوز حاجة كمان ؟لأ بس حبيت اصحصحلك معلوماتك
مش حنكمل يوميات عيل طخين ولا ايه

البت المشمشية حلوة بس شقية يقول...

ها هاها
والله خلتنى اتخيل باراك اوباما جاى يعلق على بوست من عندى ويقولى يابت يامشمشية مش هتبطلى لماضة وتعالى حلى التاج بتاعى
وبج الخير ده انا هبقا من ضمن المنتفعين بيها واخد كل الحاجات اللى هيبجيبها


وتصدق اول مرة اعرف الكلمة اللى قالها ابن المتضايقة ده ان لو ابوه مسلم باراك يهودى اما طلع ابن لذينة اوى
وده بقه اللى فاكرينو ياما هنا وياما هناك
المهم قولى اشتريت الجرنان بكام؟

adel يقول...

ايه ده ياعم .... انتوا وصلكوا الخبر

عمك اوباما جالي و عمل كومنت ... بس شيلته

تعليقاته مش حلوة و بيستخدم الفاظ بذئية ....انتي فاهمني طبعا

و حتي التاج اللي لسه جايلي و فرحان بيه .... قعد ينق عليه .... لدرجة اني قلت ان عينه فيه .... فكتبت علي التاج من ورا

متبوصليش بعين راضية انا طلع عين امي في السعودية

هههههههههههه

و من الخيال ما وده في داهية

فاروق عادل يقول...

هههههههههة بوست روعة ياسووووووو بس على فكر ة زى ما مونى قال محمود احمدى نجاد فعلا عامل مدونة

وبالنسبة للنقطة الايرة بتاعت اسمة فهو بالتاكيد يقصد انى مش هيبقى متحيز لليهود او للمسلمين لانة مسيحى وان ابوة المسلم هو اللى اختار لة الاسم اليهودى

خمسة فضفضة يقول...

السلام عليكم ورحمة الله وبركاته

وفيها ايه يعني لما اوباما يعمل مدونه من نِفسه هو مالوش نِفس ولا ايه

دا حتي تاني يوم لتوليه الحكم قام عامل حساب للبيت الابيض علي التويتر
http://twitter.com/whitehouse_gov

شكل الراجل ده هايقضيها نت تدوين بقي وتويتر ومش بعيد يكون ليه حساب علي الفيس بوك في السكرته

يظهر كده الواد حموءه بتاع النت اللي كان موصله في شيكاغو كان قارفه في عيشته وقاطع عنه الوصله عشان ما دفعش الاشتراك فامصدق لقي نت سريع وببلاش وماحدش يستجري يستخدم النت كت ، قالك عيييييييييييييش يامعلم

كيكى عوووووو يقول...

وفيها اية ياجرع لمة يعمل مدونة يعنى فيها اية؟؟؟؟
ويسمى نفسة**مرعى بتاع نيو الكليمة*
ولا ارمط ملقش بخصوص الموضوع دة**
ويسرقك بقى ويحط صورة عم الشباب والرياضةويقول عن نفسة** فى من انا
واحد محب للحياة..رومانسى ..بحلم للبكرة للاسرائلين يكون عندهم دش وتليفوزيون ملون عشان يتفرجوا على مسلسل نور!!!
ابحث عن زوجة تشارك فى الاثاث!!!
وبحب سجاير كوكو الضعيف
عشان متتعبش نفسك ياسووووو ياخويا
*******************************
الا تعالى هنا ياسوووو انا شكة فيك..عرفت الجريجى دة كلوا منين؟؟؟
عوووووووووووووووووووووووووووووو

القلم السكندري يقول...

هو فعلا تعهد بسحب بؤج الخير بتاعته من العراق

وتوجيهها لأفغانستان والتركيز عليها


يلا ربنا يحرقهم هناك إن شاء الله

تقبل مروري

Unknown يقول...

ماتقطعش رزقك انت بس ياسيدى
اعزمه وشوف ..ايه يمكن ؟مين عارف؟

Unknown يقول...

وكمان ماتستبعدش يجيب حاجات
مقطعة اكتر واقدم من اللى هنا
وما بعيد يقولك ساهم معنا فى(اور باج)

امال يقول...

هههههههههه


اكتر حاجه عجبتنى


peace bananaaaaaa

أوباما .. هو للسلام حمامه

تصدق جايه بسجع

غير معرف يقول...

طيب بص الاول انا عاوزه شاش وقطن وميكركروم عشان انا دماغي اتفتحت ياسي
سو هههههههههههه
المهم احل ي حاجه الترجمه الانجليزي اللي فوق دي شبه علي كتب كتابه علي فيفي
عارفها
لامش فيفي ياسو الترجمه دي
يلا ياسو الله يسهل لاوباما يمكن حاجه معكننه عليه وعاوز يفضفض في مدونته خصوصيته والواحد مننا ملهوش غير مدونته

مهندس مصري بيحب مصر يقول...

لا يا سوووو
حيقول لك التدخين ضار جداً بالصحة و يسبب الامراض و الموت
:)
لإنه بيحافظ على صحته

يخرب بيت العربليزي و الأنجلوآراب في ساعة واحدة

زى الهوا يقول...

عارفة انى مقصرة جداااااااااا

وانى مابزرش مدونتك من قرون فاتت

بس والله الشغل متعب جدا وواخد كل وقتى والفترة اللى فاتت كنت كل يجيى خمسين تسعين مسة يوم ادخل نت
بس خلاص بقى اخدت الاجازة وهزور كل المدونات اللى كانت وحشانى

وبالنسبة للحلم المستحيل دا فاحب اقولك اصحى بقى علشان بابا جاب موز

أبو سنوفة...الدراع اليمين يقول...

ياه يا عم
ليه كده
بتحاول تلعب بمشاعرنا ليه كده
عموما يا كابتشن سووو احنا قررنا منحرمكش من حاجة
والحرامية بذات نفسهم عملوا مدونة وجم علقوا عندك اهه
شوفت بقه ان سعات الاحلام بتتحقق
وانك انت بالات متتمناش حاجة الا ما تلاقيها
روح يا شيخ
وتعالا بسرعة

3ala asm masr يقول...

هيطلب شيشه عليها دمنا
انا مش مرتحاله الراجل ده وكمان هيزاحمنا فى اكل عيشنا ويعمل مدونه

Unknown يقول...

صباح الخييييييييييييييييييير

Mahmoud البطراوى يقول...

انت مشكله يا عمنا

بس تصدق فكره جامده طحن ان ابوباما يجى معانا لقاء مدونين


ههههههههههههههههههه

Ahmed Al-Sabbagh يقول...

من اجمد البوستات اللى قريتها

عاشقه وغلبانه يقول...

من حق كل مواطن يعمل مدونه
ده الدستوووووووووووووور

Crystal Lobna يقول...

على فكره هما بيغيروا كمان شكل موقع البيت الأبيض . أصلاً أوباما ده راجل مركز جداً مع الأنترنت من زمان يعنى راح عمل profile على موقع yahoo answersمن شهر مارس و غير أنه مظبط نفسه على you tube ده غير الFacebook و ال myspace و كمان كان عنده جيش من المطوعيين لحملته الأنتخابيه على الأنترنت.

Lady E يقول...

بجد الانجليزي بتاع اوناما ده فوق الفظيع وخصوصا لما بيقولك حليب هارتي

بصراحة لو كان الانجليش كده مكنش حد غلب

hasona يقول...

أمال وأحلام
واموال ونفط
بلاش الكلام اللي يودي في داهية ده
هههههههه
،،،،
بتذكرني بالاحلام التي يتحدث عنها العرب عندما فاز وعندما تولي أوباما
يمكن معتقدين انه هيحارب اسرئيل ويكون في جانب فلسطين
،،،
ويمكن المدونة تكون كمين لــ بن لادن مثلا
أو غيره
،،،
كلها أحلام و و و أمال
ان غدا لناظره لقريب
،،،
تذكرت مدونة رئيس الوزراء - نظيف

يبدوا انه اتجاه حكومي سياسي

تحياتي
دمت بكل خير

Unknown يقول...

ههههههههههه
يا فقري فقري فقري فقرررررري من هنا للسنه الجايه
ههههههههه لا الموضوع ده مينفعش قرايه مره واحده
انا هستجمع قوايا واقراه تاني
جامد الصراحه يا احمد تسلم ايدك
تخيل كده يا خويا لو اوباما كمان جه يقاطع كمان وحد زعله وبقى يعلق انونيمس بس سيبك انت
ده التدوين هيتنقل
الريس بحاله بيدون
عقبال الي بالي بالك

غير معرف يقول...

شفت بأه الجريد بتعمل ايه في البني آدمين.. آه يا احمد يا اخويا :)

طب لما انت شايف نافورة كتب المدونين طافحة في المعرض.. فأدامك حل من اتنين..
يا تروح تركب كوع في سري المعرض
يا اما تنزل انت كمان يا سوووو

طب وربنا وربنا بجد فيه ناس نفسي ينزلوا كتب خصوصا انت يا سوووو يا سوووو

طب اقولك ...........

ولا مش هقول ده انا هعاتب
فين الحلقة الاخيرة يا سوووو من سوووو التخين؟؟؟ انت بتهزر؟؟؟
بأه ادهم صبري يظهر تقوم انت تختفي

شد حيلك يا جميل وادينا اكتر اديناااا

مها ميهوووو

غير معرف يقول...

هههههههههههههههههه
بقى بزمتك ده اسمه كلام
يعنى ايه يعنى
كله كوم واسمى باراك وده يهودى دى كوم تانى خااااااااالص

وبعدين ده انجليزى ده يا مرسى

(green eyes) يقول...

يا سلااااااااااام
ايه خيالك الواسع دا
بجد انت دمك زي العسل

مخبر قمل دولة يقول...

كلام هايل
ونبقى نبعتله تاجات بقا وبتاع
وبعدين تلاقي اوباما جاي يوم يشتكي من هيلاري او كاتب موضوع بيتريق على افترا مراته اللي موكلة الكلب الصبح البرجر من غير مايونيز
عليا النعمه انت راجل زي العسل

بنت الغربة يقول...

واضح ياسوووووووووووو انك كنت متقل العيار قوى
من كتر التخيلات اللى شفتها دى
نصيحه بطل تتفرج على الاخبار وبطل تشترى جرايد...
واوعى ..اوعى...تبطل شيشه..وياريت تكون شيشه تفاح محبشه..
وانت هتنسى الدنيا واللى فيها
تحياتى

nigro يقول...

انت مشششششششششششششششششششششششكلة

الفراغ يقول...
أزال المؤلف هذا التعليق.
الفراغ يقول...

ياعم صحصح واشربلك مج بنجوورنو وبلاش نسكافيه علشان الماقطعه
ياعم بص فى وشه تلاقى نفس برائة اللى خد بالجزمه بالظبط مايفرقش عنه غير التانى ابيض وعنيه خضراودا اسمر ودمه خفيف __مع الاعتزار لصاحب الاغنيه

همس يقول...

مين خيالك دا

كفانا الشر

وبعدين عادى يعنى

يعمل مدونة ...

احمد نجاتى ...حتى جيمى مبارك عاملين


خليك ديمقراطى


فكك

بس عجبنى رده بخصوص اسمه والله

طلع بيفهم

رد ميه ميه

وماسك الديانات كلها

علشان محدش يقول عليه مضطهد حد

يلا بالشفا

وصحيح الف هنا للنسكافيه

مدحت محمد يقول...

هيشرب شيشة

ولا هيشرب من دمنا

أبو العريف يقول...

باشا انا متخيل لو الريس الجديد اللي هيحكمنا كده ان شاء الله ف 2090
عمل مدونه هيبقي شكلها ازااااي
ولا لو الحكومه المصريه عملت مدونه
يا مدوناتك يا حكومه

MeDoOoOoOo يقول...

bos enta kont mashe 7elw l3'ayt modo3 el borsa dh e7na hn3yl wala eh obama hay3od ma3ana lma fat7 el mdona olna 7oryt el internet we lma etklm fe el syasa olna 7ory el ra2y lakn borsa wlahy abttn bas 7elwa el 7eta el engleze deh ela howa enta bta5od el courze fen......:D

wa7shtne mdontk ya soooo wenta sha5syn wa7shnay.....(lma ashofk a2olk mesh odam el awlad )

MEDooo

Gannah يقول...

السلام عليكم
ازيك يا أحمد؟؟
سعدت جداا بزيارتك ..انا مش باجى هنا كتير لسبب غريب شوية
اصلى بحس ان شوية روحى مش مرحة زيك وزى زوارك..بالعربى يعنى دمى تقيل
بس بجد سعدت جداا بزيارتك وانت اللى جبته لنفسك بقى فاستحمل
خلتنى قعدت انا كمان اتصور لو اوباما عمل مدونة ورحت علقت عنده ممكن انا اقول ايه...؟؟؟
هقوله شيل حسين من اسمك وكفاية عليك باراك
اصل احنا نبقى سذج قوى لو تخيلنا انه عنده حنين لاصوله الاسلامية ..لو كان عند الامريكان اى شك فى ولائه للصهاينه كان زمانه فى الباى باى
هو الفرق بينه وبين بوش انى بحس انه اذكى شوية لكن السياسات واحدة
تحياتى

رحــــيـل يقول...

سووو اخباراتك

انا مش جايه اقر البوست قريته من اول منزل انا مش بفوت حاجه ليك بس باين بقيت بكسل اعلق عموما مش عارفه بس جو التدوين مبقاش زى الاول فى مجموعه رائعه حساها بتختفى كانت بدأ معنا فى نفس التوقيت

المهم يعنى جايه اقولك انى فرحت قوى لما لاقيت تعليقك عندى لانك بجد من الناس اللى بعتز بيها جدا فى عالم التدوين

تحياتى

wanna b a physician يقول...

ازيك يا سوووو
كويس برضوة انه عايز يبقى عنده مدونة
مش ياخد راحته فى الكلام ويبعبر عن رأيه
ولا ملوش نفس
افرض عايز ينتقد اجراءت حكوميه مثلا مثلا يعنى يعمل ايه
افرض مراته مطهقاه ولا حماته مثلا مش يعمل مدونة يفضفض فيها عن نفسه زى المفقوعه مرارتها كدا

ياراجل سيبه يعيش
بيييييييس يا مان

تحياتى

عالم ماريونت يقول...

عزيزي العجوز
ربما وصل بينا التفاؤل
او تقدر تقول السذاجة اننا نفكر ان اوباما هيكون معانا لمجرد ان اصوله مسلمة
اوباما لوكان جواه مجردشبهة تعاطف مع المسلمين مكنش وصل اصلا لمنصب في الكونجرس ولا في الحزب بتاعه
اطرف حاجة لما كنا بنتفرج على الانتخابات واحدة صاحبتي قالت بفرح ساذج:
اكيد هيكون مع المسلمين ده اسم ابوه حسين
قلتلها دة لو كان اسمة محمد احمد محمود مصطفى حسين اوباما بس وصل للمنصب ده يبقى اكيد تبع اسرائيل
وبعدين يعني هما اللي ماصين دم الشعب هنا مش مسلمين؟
مادول اولى برضة؟
تحياتي ليك ولمدونتك المتميزة
رنا

زى الهوا يقول...

فين جديدك ؟؟؟

تؤ تؤ

عايزة جديد ( وش متعصب )

أبو سنوفة...الدراع اليمين يقول...

سووووووووووووووووووووو
انت اتسرقت علي فكرة
وعشان متبقاش اخر من يعلم
حبيت اعمل نفسي فاعل خير واجي انبهك
http://emsekharamy.blogspot.com/
وقد اعذر من ازرر

Unknown يقول...

لية مزاج اجى اسلم عليك وارمى الصباح لا سورى احنا بعد الساعة اتناشر يبقى مية مسا عالناس الكويسة......هتقوللى ايه مالها دى؟؟؟ جاية تسلم بلا داعى ليه؟؟؟ اقوللك انا حرة بقى لية مزاج اسلم فسلمت...سلام

Soul.o0o.Whisper يقول...

السلام عليكم و رحمة الله

أولا بأعتذر على التأخير

ثانيا بأحيي فيك دماغك دى
أهو على الاقل لما ييجى بؤج الخير
يبئا لينا عين نتكلم ..

ياربى على اللى حصل يوم ما نجح
كان نفسى أعيط والله
مش عشانه
لا على اللى عملناه


المهم ...
على فكرة الراجل دا مالوش فى التقارير و الورق و الحاجات دى

حتى اللى كانوا شغالين معاه قبل ما يمسك الرئاسة كانوا بقولوا انه كان بيبعت لهم كل حاجة على الميل
و هما بردوا لو عاوزين حاجة يبئا على الميل

و أشادوا بأن تقاريره دائما تتميز باللغة القوية و الخلو من الاخطاء الاملائية
ههههههههههههههه


و كان هناك تساؤل يا ترى هيعمل ايه لما يمسك الحكم
و المفروض إنه يتعامل مع الاوراق
و كمان ميله يكون ملكية عامة و تحت المراقبة؟؟؟

بس مش عارفة والله هو اتصرف فى الحكاية دى إزاى
أصل أنا زعلت منه و قلتله خلاص مش هأعطيك رأيى
و سيبته و مشيت
:)


بانتظارك دائما



و دمت بود

سلوى يقول...

بالمرة بقى
يعمل لقاء تدويني
وطالما اسمه باراك حسين أوباما
يبقى هيجمع مدونين مسلمين على أمريكان على يهود

وطيعا سيمتاز اللقاء بالسلامات الحاااااااااااره :)))



يعني في حد يصحى ع الصبح يقرأ جرايد يا سووووووو

ملحوظه:
عجبني أوى سلاموووز وانت كاتبها بالإنجليزي :)

دمت بكل الخير

سلوى يقول...

نسيت

سعدت بتعليقك جدا
في ناس كده ظهرت تقريبا معاهم في نفس التوقيت وبعتز بتواجدهم جدااااا

قوس قزح يقول...

بس كده
ولا يهمك يا سووو
لك عليا المرة الجاية لما نعمل البؤجة اقوله تعالى شارك معنا
بس انت هات لى بس اللينك بتاعته و انا اظبطه ههههههههه

خيال غريب بس لذيذ

أبو سنوفة...الدراع اليمين يقول...

يا عم سوووووو
بقولك انت مسروق في المدونة بتاعة الحرامي وعصابته والله
اتفضل يا عم ادخل وخلصنا
بس ادخل باليمين
واوعه لا تضرب ولا تشتم انا بقولك اهه
احنا انتقامنا عنيف وشديد

إيمان قنديل يقول...

والله أنت أجدع من ميت أوباما

اللي كل الناس متعشمه فيه خير


وعلى رأي المثل لو كان فيه خير ماكان رماه الطير

محمد الدخاخنى يقول...

الخبر كذبه أوباما على قناة ال بى بى سى

تحياتى

اسماء عوني يقول...

صباح التخيلات
هو انا بارضه ماجتش هنا قبل كده ازااي

انت بتقعد عالبورصه يعني زميل بورصجي زيي
تحياتي