الاثنين، ١٥ محرم ١٤٣٠ هـ

!! ماما سوووو

!!! إلحج يا باشمهندس .. الشارودة اللي عالسطوح هتولد وعايزك معايا
---
كانت دي الجمله اللي قالهالي اسماعين البواب بمجرد ما سبت الغسيل اللي كنت باغسلو ورحت فتحتلو
!!! باب الشقه .. ومعنى كلامه إن النعجة اللي عالسطوح بتولد .. وعايزني معاه

طلعت معاه وانا مش فاهم هعمل ايه ولا ازاي .. انا اصلا عمري ما شفت أي حد بيولد قدامي عالهواء مباشرة .. لا بني أدمين ولا حيوانات .. بالرغم من اني كنت
مربي قطط بالعبيط .. بس ماشفتش عملية ولادة قبل كده
اول ما طلعنا عالسطوح لقيت النعجة نايمة عالارض وبتمأمأ وصوتها فيه حشرجة غريبه .. ولقيت البواب راح جاري وماسكها من رجليها القداميين وبيبص في وشها .. وبانت عليه ملامح القلق
اسماعين : يالهوي يالهوي .. ساعدني ياباشمهندس عشان شكلها هتموت
سوووو : - وانا في قمة القلق والتوتر- اساعدك اعمل ايه طيب !!؟؟
اسماعين : امسك رجليها الورانين .. ووجّفها عليهم .. ودخّل ايدك اسحب الخروف
!!!!!!!!!!!!!!! سوووو : نعم
اسماعين : دخّل ايدك واسحب الخروف ياباشمهندس
سوووو : ادخل ايدي فين يا اسماعين .. وخروف ايه اللي اسحبه !!؟؟
اسماعين : ياباشمهندس بسرعة مافيش وجت .. ده هتموت مننا .. دخّل ايدك بسرعة
!!!! سوووو : أدخل ايد مين .. ايدي انا .. وادخلها فين .. انت اكيد بتشتغلني
.. وقعدت أتلفت حواليّ .. قلت يمكن تكون دي فقرة في الكاميرا الخفيه بتاعة رمضان الجاي
!!! ويمكن ابراهيم نصر متنكر في هيئة النعجة .. ولا الخروف ذات نفسه
اسماعين : ياباشمهندس بسرعه مافيش وجت .. النعجة وولدها هيموتو لو ما دخلتش ايدك وسحبته
وهنا حسيتني زي ما اكون حاوي .. اقلع البرنيطه اللي لابسها وأدخّل ايدي اسحب منها ارنب لونه ابيض .. بس على الاقل الحاوي بيدخّل ايده في البرنيطه .. انا بقى استغفر الله العظيم .. هدخّل ايدي في .. سامحني يارب
اسماعين : هاا .. طالع الجَرن ولا الدَنبه؟؟
سوووو : خبر ايه يا اسماعين .. ماتكلمني كلام مفهوم .. جرن ايه ودنبة ايه في الليلة الطين دي ؟؟؟
اسماعين : يعني اللي طالع قدامك .. راس الخروف ولا ديله ؟؟
سوووو : طالع ديله .. هو المفروض انهي اللي يطلع الاول ؟؟؟
اسماعين : يالهوي يالهوي يالهوي .. ده كده ممكن يتخنق
سوووو : بقولك يا اسماعين .. مش ناقصه توتر الله يكرم اللي خلفوك .. المفروض اللي يطلع الدماغ ولا الديل ؟؟
اسماعين : الراس هي اللي المفروض تطلع الاول
سوووو : طب والحل .. هنعمل ايه !!؟؟
اسماعين : اسحب ياباشمهندس .. اسحب بسرعه احسن يموت جوا مخنوق
يادي الليلة اللي مش باينلها ملامح .. قعدت اسحب .. وفي حاجات غريبة ولزجه على جسم الخروف الصغير اللي باسحبه .. حاجات دافيه وريحتها مراااار .. والخروف نفسه جسمه دافي .. وامه قاعدة بتمأمأ وصوتها عمّال يعلى وجسمها بيرخي واعصابها بتفلت .. وانا باسحب .. واسماعين البواب بيقول يالهوي .. وانا باقول سامحني يارب
اسماعين : هاا .. طلع منه كد ايه يا باشمهندس؟؟
سوووو : طلع نصة التحتاني .. بس نصة القداماني معصلج
اسماعين : طب كمّل يا باشمهندس .. هانت آهي
سوووو : طب مايمكن اللي مانع طلوع نصه القداماني يا اسماعين .. قرون الخروف .. احسن تكون شابكه في حاجه جوا ولا بتاع .. واموّت النعجة وانا باسحبه !!!؟
اسماعين : ياباشمهندس الجرون مش بتطلع دلوجتي
سوووو : لا ياراااجل .. امال بتطلع امتى ؟؟؟؟
اسماعين : ولّد الخروف الاول وبعدين نبجو نشوفو .. مش وجت حديت دلوجتي ياباشمهندس
سوووو : باشمهندس ايه بقى .. انت خليت فيها باشمهندس .. ده انا بقيت ولا الدادة وداد حمدي .. وياريتني دادة بني أدمين .. ده انا بقيت دادة خرفان
وسمّيت الله .. ورحت ساحب بكل مافيّ من عزم .. قمت واقع عالارض والخروف في حجري
!!! وفجأه كده لقيت في حاجه لزجة ودافيه .. راحت طالعه من النعجة في وشي عِدِل
اسماعين : ياكرم الله .. اجطع الحبل يا باشمهندس .. اجطعه وشمم الخروف بصلة جوام
سوووو : لا لا لا .. انا لغاية هنا وبِخ .. حبل ايه وبصلة ايه .. قوم انت اعمل الباقي انا مش طايق نفسي ولا طايق الخروف .. ولا طايقك انت اصلا
وقام اسماعين جاب بصلة وسكينه من أوضة الخزين اللي عالسطح .. وجه راح قاطع الحبل السُري .. واداني بصلة مقسومه نصين وقاللي اشمم الخروف الصغير عشان يفوق ويمأما .. خصوصا انه قعد في حجري وهو ساكت
قعدت اشمم الخروف البصله واحطها قدام مراخيره .. شوية بشوية الخروف ابتدا يعطس .. وراح ممأمأ مأمأآيه صغنونة قوي .. بصيت على اسماعين وانا باستفهم منه ايه الحوار يعني بعد كده
لقيت اسماعين قعد عالارض وهو مُنهك القوى .. وراح مطلع سيجارة من علبة السجاير .. ومولعها وهو باين عليه الاطمئنان .. وفهمت من حركتة دي إن الحمدلله عدينا مرحلة الخطر
اسماعين : مبروك يا باشمهندس - وهو بيضحك - اللي جابلك يخليلك
!!!!!!
لسه هقوم عشان امسك في رقبته على تريقته دي .. لقيت الخروف بيمأما وبيتمسّح في .. لوهلة لقيتني شلت الهم قوام قوام .. يالهوي .. الخروف بيتمسّح في بجد .. يكونش فاكرني ابوه .. يالهوي .. طب هصرف عليه منين .. هدخلو حضانه ازاي .. وحضانة ايه اللي ممكن تقبل خرفان .. وبعد ما يخلّص الحضانة هاجيب مصاريف مدرسته ودروسه الخصوصية ازاي ..
انا لازم ادوّر على شغلانه بعد الضهر عشان الاحق عالمصاريف

طب لو نجح في ثانوي وجاب مجموع حلو .. اخليه يدخل كلية ايه .. ولا اسبلو مطلق الحريه .. انا هاسيبه يختارالكليه اللي على مزاجه .. وبعد ما يتخرج .. لازم اشوفلو واسطه عشان يشتغل .. ماهو انا مش هاسيب ابني من غير شغل

ما داهية كمان لما يكبر ويبقى طالوقه وعايز يتجوز .. الاقيه جاي بيقوللي دوّر لي على عروسه يابا .. واروح واخده كده من ايده ولا رجله .. ورايحين نخطبلو نعجة بنت خرفان محترمين .. وطبعا لازم وانا رايح اعمل زي ما عملت لما رحت إحدى زيارات جواز الصالونات .. وكنت واخد معايا تورتة آيس كريم من النوع المفتخر
بس الخرفان اللي هنروحلهم اجبلهم تورتة آيس كريم بطعم ايه ..
فانيليا ولا برسيم !!!؟

.. وياسلام بقى لو رحت حَجّيت .. الناس لما ارجع هتقولي مبروك يا حاج ابو خروف
!! والحاج ابو خروف راح .. الحاج ابو خروف جه .. هيبة برضك يعني
.. ويا سيدي بقى لو فكرت اعمل مشروع وافتح سوبرماركو مثلا .. لأ .. انا هافتح علافة
!!! وهاكتب عالمحل ..
علافة الحاج سوووو وابنه الاستاذ خروف
!!! اسماعين : إلحج ياباشمهندس .. ده ماسك في صباعك عيرضع فيه .. فاكرك امه
!! فعلا لقيت الخروف ماسك صباعي وبيرضع فيه .. ده كده مش فاكرني ابوه .. ده فاكرني امه
.. لأ كده بقى الاحلام كلها هتتغير .. ماهي غريزة الأمومة غير غريزة الأبوبة
هو في حاجة اسمها غريزة أبوبة ؟؟؟؟

واساسا اساسا انا ليه تخيلت انه خروف دكر .. مش يمكن يطلع خروفه نتايه .. دي لو طلعت نعجه هدلعها آخر دلع .. هاجبلها احسن هدوم واحسن ميك آب .. وهششورلها شعرها عشان يبقى ناعم وشكلها يبقى حلو .. وهعلّمها فنون الطبيخ وترويق البيت .. قصدي ترويق الزريبة .. آه امال .. انا بنتي لازم تبقى احسن نعجه في العالم .. هعلّمها ازاي تعمل صينية درة بالباشميل .. و ازاي تعمل طاجن برسيم بالفول الاخضر .. ياسلام بقى لو اتقدملها الخروف ابن الحلال
!!! ياما نفسي اشوفها في الفستان الابيض
اسماعين : تاخد سيجارة ياباشمهندس
سوووو : - وانا متعفرت ووشي مكرمش - اطفي السيجاره دي .. انت عايز الخروف يبقى عنده حساسيه ولا ايه !!!؟؟؟

سوووو

هناك ٤٣ تعليقًا:

رحــــيـل يقول...

ههههههههه
ضحكتنى بجد واان مايعلم بيه لا ربنا

اللى جابلك يخليلك ياسووو
بس عايزه اقولك ان فى اقتراح نسيته ان شاء الله لما البيبى يكبر تدبحه وتعزم مدونين مصر عليه
هههههههههههههههه

يارب تكون بخير

ابن حـجـر الـعـسـقـلانـى يقول...

يا مرحب يا عرب .. عمى سوووو ابو النعاج

ضحكتنى و أنا مكتئب و الله

المهم .. إيه اللى حصل لأم الخروف بعد الولادة ؟؟ و لا شكلكم كدة أخدتوها لهم و رميتوها عضم بعد ما عملتوا عليها شوربة بالبهاريز .. الإنسان دة مخلوق مالهوش أمان أبدا

حكاية الخروف اللى فوق السطح دى فكرتنى بحكاية ناس كانوا عايزين يضحوا فى العيد الكبير ببقرة .. و كانوا رابطينها فوق السطح برضه .. المشكلة إن البقرة لما جم يدبحوها زمجرت .. و هاجت و ماجت .. و فى إحدى حالات انتفاضتها نطت من فوق السطح ليسقط جسمها إلى الأرض.. ثم ترتفع روحها إلى السماء

طبعا مافيش علاقة بين الحكايتين إلا مجرد "السطح" .. بس جه على بالى أرغى شوية

حروف يقول...

اتصدق تصادف الموقف ان قطتتي بتولد وولادتتها متعسرة ومش عارفةاتصرف ازاي بس بجد بيكون احساس حلو مبروك عليك اللي جابللك يخليليلك السبوع امتي
دمت بالف خير
انا حظي كل معلق عندق بتكون مضايق ومش بتردعلي البوست خالص ربنا يكرمك بئا وترد

nigro يقول...

ياااااااااااااه
حليب هارتي

حمدلله ع السلامة يا أبو حميد
فينك من زمان يا سوووو
اللي جابلك يخليلك يا سيد الناس
يتربى في حجرك
ألا صحيح
الرضاعة دي طبيعية ولا لبن بودرة ؟
:)

يا خسارة
اللي كنت هاعمله اتحرق
لكن ولا يهمني .. هاعمله برده

واحشني بشكل وحش يا أحمد والله



يلا سلام

البت المشمشية حلوة بس شقية يقول...

هههههههههههههههههههه
اللى جابلك يخليلك يا ابو العيال
فرحتك
لولولولولولىىىىىىىىىىىىىى
والسبوع امتا ان شاء الله
ابقى احجزلى منابى
الف الف مبروك
عقبال متخاويها

مهندس مصري بيحب مصر يقول...

ههههههههههههه
خلي بالك لبن الأطفال دلوقتي بيكلف كتير قوي

مش عارف حتلاقي للحمل الوديع ده لبن في الصيدلية و لا حتجيب له لبن نيدو
:))

صبرني يارب يقول...

ميرسي كتييييييييير يا سووووووووووو

ضحكتنا اوي اوي اوي بجد ومن قلبي

وانا لسه راجعه من عند دكتور الاسنان ومتبنجه وطيييين الشغلانه على الاخر

وفعلا فعلا ما شتمك الا الى بلغك

عاشقه وغلبانه يقول...

اللي جابلك يخليلك ياعمو
السبوع امتي بقي.........؟؟؟

فاتيما يقول...

مش هقولك غير كلمتين بس يا سوووو
ربنا يفرح قلبك

موناليزا يقول...

ههههههههههههه
اللى جابلك يخليلك ويتربى فى عزك

Unknown يقول...

ههههههههههههههه الف مبروك يا سووو واضح انه حس انك حنين عليه فقال مامااا

ربنا يخليهولك و تخاويه ان شاء الله

شهووووده يقول...

لوولولولولوولولي مبروووووووك ياسووووووو.. ما تنساش تعزمنا عـ السبوع...يخرب عقلك ضحكتني وانا مش رايقه ..ضحكت ضووووووووحك ..

Crystal Lobna يقول...

ههههههههههههه، بجد عسل يا سووو.

ست البيت يقول...

ماشي يا عم سوووو
يعني ابطل أسأل؟
نكد ونكد علينا ودلوقتي اقولك ايه يعني ؟
ماشي اللي جابلك يخليلك
اخبار حمزة ايه؟

Doba يقول...

زى كل مرة بقولك
لما بتكتب من قلبك وبطريقتك بتبقى متميز آخر حاجة

بالفعل قدرت تطلع ضحكة حلوة قوى من جوه جوه قلوبنا بطريقتك المتميزة

تسلم التفانين يا افندم
ثم كل دى حوارات قررتها لمجرد انه وقع ف حجرك - اومال لما تشيل بين ايديك ابنك بجد هتعمل ايه

ربنا يرزقك بالزوجة والذرية الصالحة يا افندم

هبة

Unknown يقول...

هههههههههههههههههههههه
هههههههههههههههههههههههههههههه
ههههههههههههههههههههههههههههههههه
يا خبر يا باشموهندس ايه الوجعة الكوبية اللى انت وجعتها دى يا ريس؟؟؟ اللى جابلك يخليلك ويتربى فى عزك وعجبال ما تشوفه وللا تشوفها كابيرة تملا العين والعرسان يبجوا كدة كدة... موت من الضحك بجد والنعمة يا عم والله يا لهوييييييييييي بجد ضحكتنى اوى جدا خالص مع ان عندى امتحانات ...ربنا يسعدك ويكرمك ويطعمك ما يحرمك ويرزقك برزق عيالك النعاج والخرفان قادر ياااااااااااا كريم

ojg يقول...

أولا ألف مبروك وماتشيلش الهم قوي كده
العيال بتتربى
:)
ثانيا
كالعادة البوست دمه خفيف قوي قوي
خاصة تخيلاتك للمستقبل المنتظر للإبن أو الإبنة
ثالثا بقى
وده تعليق ع التعليقات
معظم الناس
ضحكوا رغم الظروف
سؤالي بقى
هو كل الناس ظروفها بقت وحشة ليه
ملحوظة
تراجعت عن كتابة نفس الشيء حين وجدته قد تكرر بهذا الشكل
:s

امال يقول...

جميييييييل يا سوووو

عجبنى اوى --انا شوفت بالصدفه معزة بتولد لواحدها وكان صاحبها مش موجود ومخطرش فى بالى ابدا اساعدها ولا حيخطر بس قعدت اتفرج بس هو ليه اول ما ابنها بيتولد بيبقى ساكت انا كنت فاكراه ميت(على اساس ان البنى ادم لما بتولد بيبكى على طول) بس بعدين بقى فاق لوحده من غير بصل---لو اتكرر الموقف معايا تانى ححدفه ببصله فى دماغه ويفوق على طول

انا حره يقول...

حمد الله عالسلامه

مش قلتلك فتره وتعدى

انا بطنى وجعتنىىىىىىىى من التلزيق والدفا والحاجات دى

ربنا يسامحك

بس بردو ضحكت من جوا قلبى واللى فرحنى اكتر انك رجعت بسرعه

nor يقول...

اللي جابلك يخليلك
و سميته ايه ؟؟
موتني من الضحك الله يكرمك و الله محتاجين حد يفكها شويه علينا
مبروك بس اعمل سبوع كويس

Unknown يقول...

ههههههههههههه
يتربى في جرنك يا هندسه
قصدي في عزك
المفروض تنصص بقى في الخروف ده
يعني ليك كل يوم ازازة لبن خروفي زيه بالظبط

أحمد (زوج مخنوق ). يقول...

طب سؤال يا هندسة
هو سماعين ما خلاكش انت تمسك رجليها و عاش هو في الزروطة دي؟؟

اللي جابلك يخليلك يا ريس

الفراغ يقول...

بجد ضحكتنى رغم انى كلى زهق دى اول زياره ليا عندك واستبشرت بالضحك فيها شكرا على رفع الروح المعنويه للناس العواجيز اللى زى بعض يا ريت تشرفنى بزيارتك

Ahmed Mubarak يقول...

اسماعين : ياباشمهندس الجرون مش بتطلع دلوجتي
سوووو : لا ياراااجل .. امال بتطلع امتى ؟؟؟؟
اسماعين : ولّد الخروف الاول وبعدين نبجو نشوفو .. مش وجت حديت دلوجتي ياباشمهندس

دا انا ضحكت لما قلت يا بس
يخرب عقلك دا انت مشكله
:)

Bravo_fox يقول...

انا برأيي انه انت بدك تتجوّز وهيدي احلام اليقظة عندك. بس منيح كتير اذا اجاك بنت او صبي كله مبرمج عندك وكله ماشي.

اهو ده عيبه يقول...

مبروك ماجالك ويتربى فى عزك
يالا على مكتب الصحه سجله
وياريت متنساش مواعيد التطعيم وابقى لفه كويس احسن الجو تلج الايام دى


بس الصراحه بواب عجيب الغريبة انه عمال يقولك شد يا بشمهندس طب ما يشد هو ولا قلبه رهيف قوى

بعد كده نغنيلك بقى السح ادح امبو شيل الخروف م الارض ادى الخروف لسووو

يتربى فى عزك

غير معرف يقول...

هههههههههه
الى جابلك يخليلك ويتربى فى عزك

دي لو طلعت نعجه هدلعها آخر دلع .. هاجبلها احسن هدوم واحسن ميك آب ..

طب اما نشوف
هههههههههههه

سلاخوخ ياسووووووووووو

حاجات جوايا يقول...

ههههههههههههههههه

كل مولود وانت طيب
ربنا يكرمك ده انا مضحكتش من شوية كده ههههههه

3ala asm masr يقول...

اللى جابلك يخليلك يا سوووووووو

همس الاحباب يقول...

هههههههه
ههههههههه
مسخرة يا ابو خروف
اللى جابلك يخليلك
يتربى فى عزك يا باشا
هههههههه
اخرتها كده يا سوووو
شارودة وخروف ده اخرة صبرك
هههههههه
بجد مش قادر امسك نفسى من الضحك
ربنا يسعدك يارب
بس ما قولتش الاسبوع امتى والمغات على مين
هههههههههه

77Math. يقول...

أحلى حاجة بقى إنك مش مضطر تعمل له حاجة ف البرد دا ..

متهيألي انت ممكن تحقد عليه عشان متدفّي جاهز

!

كتاباتك جميلة .. :)

المعتصم يقول...

بسم الله الرحمن الرحيم
السلام عليكم
شكرا على كمية الضحك الفظيعه دى يابشمهندس والف مبروك
بس ابقى خلى بالك بقى بعد كده احسن اسماعين يجيب جاموسه ع السطح ويدبسك فيها
تحياتى
دمت بكل خير وود

Lady E يقول...

بجد مش عارفة اقول ايه

انا لسه منزلة بوست عايزة اعيط فيه من شوية لكن لما قرأت البوست ده بجد كنت فرحانه ومبروك على الخروف او الخروفة بس متتعلقش بيهم اوي علشان لما يدبحو متزعلش ويجيلك استئكاب

بنت الغربة يقول...

مبرووووووووووووووك ماجالك
ويتربى فى عزك ان شاء الله
وتخاويه يارب
وعلى ايد اسماعين برضه
بس اوعى تعمل السبوع من غير ماتعزمنا
تحياتى

إيثار يقول...

بس اهم حاجة
مدخلهوش مدارس في مصر
و الا حتجيله عقد نفسية و عصبية و جسدية
و هيقعد طول اليل يماما
انا مجربة بردو

و متنساش تعزمني على السبوع !!

الـسـيـدة نـون يقول...

هو على الرغم من ان البوست كوميدى يا سوووو
الا ان جسمى قشعر اوى خصوصا وقت ولادة الخروف

وبجد خلتنى ارجع بالذاكرة لورا وافتكر يوم ولادة شريف وخلتنى احس بوجع الولادة تانى



المهم كنت عايزة اسأل عن الغسيل اللى كنت بتغسله مصيره ايه دلوقتى؟


سلام
اختك خيخة

Asmaa mahaba يقول...

معلش يا سوو انا عارف يا ابو خروف انى مقصره فى حقك انت والمدونين
ههههههههه عملت عمليه ولاده ويادى الخيبه مش عارف الراس ولا الرجل اللى بينزل الاول الراس طبعا يا بشمهندز فى البنى ادمين والحيوانات
بس انت كدا ميه ميه وضحت ان بتوع طب اللى بيقعدوا ست سنين انت جيبت منهجهم فى ولاده ههههههه
ابقى اعزمنا فى السبوع

Asmaa mahaba يقول...

على فكره نسيت اقولك انا كنت نازله زى الخاروف دا برجلى هههههههه

Asmaa mahaba يقول...

على فكره انت كدا غلبت ايبى خرفان ابقى اتحلسلها بقى

ست الحسن يقول...

شوف ياسوو

هو مش بوست قديم بس لمس قلبي بجد
ومش عارفة ليه حسيت المرة دي انك دخلت في التهريج بعد ولادة الخروف علشان متستسلمش للحنين

حسيت بجد ان الموضوع مأثر فيك فعلاً
هو استقبال كائن جديد للدنيا دي حالة خاصة جداً
أنا شفت المشهد كله لأنك كتبته حلو جداً وبإحساس عالييييي

أميرة الجنة يقول...

حمد اله ع السلامة يا سوسو والف مبرررررررررررروك ع الخروف الجديد
دمتى مبدعة

basma bahaa يقول...

ههههههههههههههههههههههههههههه يخرب بيت فقرك!! موتنى م الضحك لحد اخر سطر
يلا الله يرحمه بقى:(

غير معرف يقول...

بجد جميييييييييلة جداااا

:)