السبت، ٢٣ رجب ١٤٢٩ هـ

(23)مذكرات طفل .. طخين

!! المحطة التلاته وعششين .. قلبي متوغوش
--------------------------

بمجرد ما اتحركنا في طريقنا واحنا رايحين للتوربيني .. رحت مطلع الموبيل اللي كان اداهوني خالد صالح - راجع المحطة الستاشر - ورحت متصل بيه .. الاول الموبيل بتاعه رن وماحدش رد علي .. قمت متصل مره تانيه .. ومره تالته .. لغاية مارد علي وهو مغير صوته شويه
خالد صالح : - وهو مغير صوته - الو .. مين معايا ؟؟
سوووو : طب تصدق كده عوق في القلق
خالد صالح : - ومازال مستعبطا ومغير صوته - انا ماعرفش حد اسمع عوق داخل في حد اسمه قلق
سوووو : ياعم خالد انا سوووو .. سوووو اللي بيحب مصر .. فاكرني ولا نسيتني؟؟
خالد صالح : - وهو صوته طبيعي - انا ماعرفش حد اسمه سوووو - وراح مغير صوته تاني - وبعدين انا مش خالد صالح
سوووو : اقفش .. عرفت منين اني باتكلم على خالد صالح .. مش ممكن اكون باتكلم على خالد بن الوليد اللي في اسكندريه
خالد صالح : - متنح ومش عارف يقول ايه - هممم
سوووو : انت هتهمهملي .. المهم .. انا متصل عشان اقولك ان اليافطه اللي انا شفتها كانت على مخزن تاني .. والناس اللي بتسرق الدقيق هتهرّبه بكره
خالد صالح : سوووو حليب هارتي .. انا كنت باهزر معاك .. وعموما لو هزاري ضايقك قول .. ولو عايز نذيع قول ذيع .. ولو مش عايز قول برضه .. بس احنا هنذيع عادي
سوووو : - وانا باعمل نفسي عبيط - لا يا راجل .. حيث كده بقى .. ذيع يا استاذ ابراهيم خلي الناس تنبسط وتضحك علي - وانا باتكلم بجد وبحزم - بقولك ايه ياعمنا .. انت هتشتغلني .. المهم .. انا بس حبيت اقولك اني مظبط مع واحد عشان يساعدنا في الحوار ده .. وهبقى اتصل بيك وهو معايا عشان نرستق الحوار كللو
خالد صالح : انا مش فاهم حاجه
سوووو : هتفهم بعدين .. سلام دلوقتي
بصيت على العيال اللي كانو معايا لقيتهم متنحين وبيبصولي وهم مستغربين قوي .. لكن انا ماكانش عندي وقت اشرحلهم ايه اللي في دماغي .. رحت باصص لميمون وقلتلو
سوووو : ميمون .. عايزك تروح المخزن اللي كنا فيه .. مش اللي محبوس فيه ابويا وامي .. لا المخزن اللي فيه دراكولا .. وتقول لدراكولا يجهز نفسه
ميمون : يجهز نفسه .. انتو مسافرين جمصه؟؟
بشله : - وهو ينظر لميمون - جمصه ايه بس .. سوووو ابن ناس .. يعني ممكن يطلع على بلطين
ميمون : طب والنبي اجي معاكو .. والنبي والنبي
سوووو : تيجي فين وبلطين ايه .. روح لدراكولا وقوللو اللي قلتلك عليه من سكات
ندى : انت ايه اللي في دماغك ؟؟؟
سوووو : هتفهمو بعدين .. يلا روحو انتو دلوقتي وانا وشمهورش هنروح للتوربيني
ندى : نعم .. لا ياعم .. هنروح معاك كلنا
سوووو : مش وقت كلام كتير .. وبعدين انا معايا شمهورش يعني ماتقلقوش
شمهورش : - وهو بيتفشخر وبينفخ في نفسه - ماتقلقوش يا جرعان .. مش هاسيبه لوحده
ندى : - وهي بتبصلي وعينيها خايفه - خد بالك من نفسك يا سوووو
سوووو : انا مش عشاني .. انا عشان مصر
شمهورش : مش وقت رومانساويات خالص - وبص على الباقي - يلا امشو وماتنسوش اللي قالكم عليه
وفعلا .. مشي ميمون وندى وبشله .. ومشيت انا وشمهورش .. رايحين للتوربيني
-----
امي : انا قلبي متوغوش على سوووو يا حاج
ابويا : متوغوش ازاي ولا مؤاخذه ؟؟؟
امي : يعني واكلني
!! ابويا : يالهوي .. هو الواد ده واكل كل حاجه ومش عاتق .. حتى قلبك قام واكله
امي : يا حاج مش واكله يعني عامله شندوشت .. انا قصدي اني قلقانه ومتوغوشه عليه
ابويا : ولازمتها ايه الوغوغه طيب ؟؟؟
!!! امي : اصل انبوبة البوتاجاز كانت هتخلص وهو مش بيعرف يركب انبوبه جديده
-----
واحنا رايحين للتوربيني انا وشمهورش عدينا على منطقة زرع وغيطان .. وبعد الزرع دخلنا على مكان كللو عشش مبنية بالصفيح ومتغطيه بورق الكراتين .. قدام العشش دي كنت باشوف حاجات اول مره باشوفها في حياتي .. ناس وشوشهم من كتر الهَمّ زي مايكونو ماتو خلاص .. شباب في سن الورد قاعدين بيشربو مخدرات وسجاير ملفوفه وبيبلبعو حبوب وكأنهم عايزين يعيشو في عالم من خيالهم .. عيال صغيرين متجمعين وكلهم شايلين في ايديهم اكياس بلاستيك وعمالين ينفخو فيها ويشموها تاني .. ولما سألت شمهورش هم بيعملو كده ليه
شمهورش : دي احسن طريقة لشم الكوللا .. العيال دي كلها زيينا انا وندى وبشله وميمون .. متسرحين في الشوارع وعلى كل لون .. فينا اللي بيبيع مناديل وفـُل وجرايد في الاشارات .. وفينا اللي بيشحت من الناس ويقولهم حاجه لله .. وكلنا عندنا استعداد اننا لو لقينا حاجه قدامنا وصاحبها مش واخد باله منها نقوم سارقينها .. موبيل او ميدالية .. سلسله دهب او فضه .. أي حاجه ترحمنا من اللي ممكن يحصل فينا لو حد زي التوربيني مسكنا
سوووو : يعني انتو مش بتسرقو عشان تبيعو اللي بتسرقوه وتعيشو بيه ولا تاكلو لقمه كويسه ولا تشترو هدمة نضيفه ؟
شمهورش : لقمة كويسه وهدمه نضيفه .. احنا في الشارع يا صاحبي .. ومادمت نزلت الشارع يبقى لازم تعرف تحمي نفسك
سوووو : طب ماتتجمعو كلكم وتمسكو التوربيني واللي زيه تِرنـّوهم علقة موت
شمهورش : اوعى تكون فاكر التوربيني ده لوحده .. التوربيني ده نظام كبير .. شوية ناس حراميه على مسجلين خطر .. ماعرفوش يشقو طريقهم وسط الحراميه الكبار .. قالو لروحهم نتشطر عالعيال الصغيرين دول .. ولو حد منهم ماعجبوش الكلام والنظام .. نقتلو ونتاوي جتته في أي حته .. واحنا ولاد شوارع .. مافيش حد هيسأل علينا
سوووو : وانتو ايه اللي خلاكم تسيبو بيوتكم اصلا ؟؟
شمهورش : - اترسمت على وشو ابتسامه بحُرقة دم - قال ايه اللي رماك عالمُر
سوووو : بس مافيش حاجه تخليكم تحبو تعيشو في الشارع وسط التوربيني واللي زيه .. وتسيبو بيوت اهاليكم
شمهورش : ومين قالك اننا كان عندنا بيوت .. البيت مش اربع حيطان وسرير وكنبه وراديو ولا تلفزيون .. البيت ناس .. اب وام واخوات بيحبو بعض
حسيت شمهورش بيقفل عالحوار وبيقولي
شمهورش : ادينا داخلين عالتوربيني والناس اللي معاه .. انت متأكد انك عايز تقابلو ؟؟
سوووو : - بصيت ناحية الزقاق اللي احنا داخلين عليه - متأكد اكتر من الاول
-----
امي : لأ بقى
ابويا : خبر أي يا وليه مالك ؟؟
امي : قلبي متوغوش عالواد قوي
ابويا : عشان انبوبة البوتاجاز برضه ؟؟
امي : لأ .. الحكايه المره دي شكلها كبير
ابويا : كبير ازاي ؟؟؟
امي : تكونش الكهربا قطعت والاكل اللي في التلاجه باظ .. وهو ياعين امه مش لاقي ياكل !!؟
-----
كان قدامنا عشه صفيح .. قدامها اربع شباب .. اتنين منهم قاعدين عالارض وقدامهم كوم ورق شجر اخضر ناشف .. زي الملوخيه الناشفه .. وهم عمالين يعبّوه في ورق جرايد ملفوف زي القراطيس .. والاتنين التانين واحد منهم واقف جنب باب العشه .. والتاني واقف على آخر العشه من ناحية الشارع .. زي مايكون بيأمن المنطقه لو حد جه .. شمهورش بصلي وشاورلي بايده افضل مكاني .. ودخل هو على اللي واقف جنب باب العشه وقالو
شمهورش : عايزين نقابل التوربيني
لقيت اللي كانو قاعدين عالارض سابو اللي بيعملوه وبيبصو ناحيتي .. واللي كان بيأمن العشه جاي ناحيتي .. لما شمهورش لقى اللي على باب العشه ساكت وباصص علي .. راح قايلو بصوت اعلى شويه من اول مره
شمهورش : عايزين نقابل التوربيني .. في مصلحه
كلهم سمعو كلمة " مصلحة " وراحو باصين على شمهورش .. واللي كان بيأمن الطريق وكان جاي ناحيتي راح باصص على اللي واقف جنب الباب .. لقاه بيشاورلو بنظره معناها يروح يقف مكانه زي ما كان .. وبص على اللي قاعدين على الارض وقالهم بعينيه يكملو شغلهم .. وسابنا وراح داخل جوا العشه .. قربت على شمهورش ووقفت جنبه ناحية باب العشه .. بصيت حوالينا عايز افهم ايه اللي بيحصل وايه الزرع الناشف اللي بيحطوه في ورق جرايد ده .. لسه هسأل شمهورش لقيت اللي دخل جوا راح طالع وفاتح باب العشه وبيشاورلنا ندخل .. جايين ندخل احنا الاتنين لقيته بيحط ايدي بيمنعني ادخل .. بصيت لشمهورش لقيته بيقوللو
شمهورش : المصلحه معاه .. مش معايا انا
قام اللي واقف عالباب قاللو
الحارس : يبقى هو اللي يدخل .. لوحده
بصيت لشمهورش .. لقيته بيبصلي بعينيه بيشجعني وبيقولي
شمهورش : ماتخافش .. انا هستناك هنا لو حصل حاجه
وفعلا .. رحت داخل عالتوربيني .. لوحدي
-----
مصطفى شعبان : الحكايه بتاعة تمرد دكتور رفعت اسماعيل على اللي اخترع شخصيته .. وانه عايز يبقى مجرم مشهور .. مش داخله نافوخي
توفيق عبد الحميد : - وهو بيلعب سوليتير عالكومبيوتر - ولا انا كمان داخل نافوخي ان اللعبه تكون قفلت على كده
مصطفى شعبان : لو كان رفعت اسماعيل عايز يعمل عمليه ارهابيه فعلا .. ايه اللي يخليه يخطف اهل سوووو ويلبس الموضوع فيه ؟؟
منى زكي : قصدك ايه ؟
مصطفى شعبان : اكيد سوووو عمل حاجه لرفعت اسماعيل
منى زكي : طب ماهو ممكن تكون الحاجه دي هي نفس الحاجه اللي سوووو عملها في سونيا وخلاها عايزه تنتقم منه .. ويمكن يكون رفعت اسماعيل بيحب سونيا وعايز يعمل بونط جدعنه قدامها
توفيق عبد الحميد : - وهو لسه بيلعب سوليتير - ويمكن السوليتير بتاعة الويندوز فيستا الجديده .. مش عايزين حد يكسبها
مصطفى شعبان : لا انا مش معاكي في تصورك ده .. دكتور رفعت اسماعيل شخصيه ليها مركزها .. وماينفعش انه يفكر بالطريقه دي .. وكمان اصلا اصلا هو بيحب ومرتبط .. ومع ذلك تلاقي شوية بنات قال ايه معجبين بيه وبيدوبو في بدلته الكحلي وصلعته البهيه
منى زكي : طب انت ايه تفسيرك ؟
توفيق عبد الحميد : مافيش غير تفسير واحد .. انهم قاصدين كده في الويندوز فيستا عشان الناس تسيبها من اللعب وتركز في شغلها
مصطفى شعبان : اكيد سوووو عمل حاجه كانت هي السبب في ان الدكتور رفعت اسماعيل عايز ينتقم منه .. ده غير اللي سوووو عمله في سونيا وبرضه عايزه تنتقم منه
توفيق عبد الحميد : - وهو بيشد في شعره - ياخواننا استعجلو الناس بتوع الصيانه
مصطفى شعبان : ليه ؟؟
منى زكي : هم مش صلحو الكولدير والتكييف خلاص؟؟؟
توفيق عبد الحميد : ايوه .. بس عايزهم ينزلو ويندوز اكس بي عشان اعرف العب سوليتير
-----
ندى : تفتكرو سوووو عايز يقابل التوربيني ليه؟؟
بشله : انا بيستهيألي انه عايز ينضم لتنظيم التوربيني ويعمل ثورة على الجهاز الامني
ميمون : ياسلام ياخويا .. طب وبعتنا نقول لدراكولا يجهز نفسه ليه بقى ان شاء الله؟؟
بشله : يعني عشان الجهاز ده المفروض انه حاجه كبيره ولازم يبقى مأمن ضهره
ندى : تعرفو ان سوووو صعبان علي قوي .. لسه عوده اخضر ما قوييش
بمجرد مادخلو عالمخزن .. حبو يصحو دراكولا .. راح ميمون ناطط على الصندوق اللي جواه دراكولا وقعد يخبط ويطبل بلدي .. بشله قعد يرقص .. ندى بتغني وبتزغرت .. قام دراكولا وهو مفزوع ومش فاهم
دراكولا : هو في حد هيتجوز والنهارده الحنه بتاعته؟؟
ميمون : لأ جواز ايه وحنة ايه .. احنا بنصحيك بس بالراحه
دراكولا : يالهوي .. هي دي الراحه اللي تعرفوها .. اه .. مانتو عيال شوارع صحيح
ندى : لأ حاسب حاسب حاسب .. احنا لو فعلا بنعاملك زي معاملة عيال الشوارع .. كان زماننا غازينك بمطوه قرن غزال
بشله : او كنت خدتلي بؤ مية نار اتمضمضت بيه وبخيته على وشك
دراكولا : وانا هيحصل في كل ده وهقعد اشجع مثلا .. مانا سهل جدا اني اصوّت وألم عليكم الناس
ميمون : خلاص يا جدعان .. استهدو بالله كده
دراكولا : حاضر .. لكن وديني وما اعبد لو حد اتعرضلي بأي حاجه .. هكشف راسي وادعي عليه
ميمون : لا ياعم خلاص .. مافيش حد هيعمل حاجه .. المهم قوم انت بس وفوق وافهم الحوار
دراكولا : طب استنو علي لغاية ما افوق واصطبح
بشله : وتصطبح ازاي ان شاء الله ؟؟؟
ندى : تكونش عايز تشربلك كباية دم فتله سكر بره مثلا ؟؟
بشله : ولا تكونش عايز تعمل دماغ ونلفلك سجارة بفصين توم ؟؟
دراكولا : دم فتله وسجاره توم ملفوفه .. اتريقو اتريقو .. ايه ده .. هو الواد سوووو وشمهورش راحو فين ؟؟
ميمون : ماهو احنا جايين عشان نقولك ان سوووو بيقولك جهز نفسك
دراكولا : اجهز نفسي لايه بالظبط ؟
بشله : شكلكم رايحين تصيفو في جمصه ولا بلطين ياعم
دراكولا : جمصه وبلطين .. انا ما اروحش اقل من حمّام فرعون
بشله : ايه حمّام فرعون ده .. ده زي حمّام التلات كده؟؟
ميمون : تقريبا حمّامات فرعون ده هي نفسها المراحيض العامه اللي فـ رمسيس
-----
دخلت عشة التوربيني وانا جسمي بيتنفض .. اول مافكرت اني اقابله واتكلم معاه ماكنتش حاطط في دماغي الجو اللي احنا فيه .. عشش صفيح وناس بتضرب مخدرات ومسجلين خطر وحراميه .. الموضوع اكبر من اللي كنت فاكره .. بس دلوقتي ماينفعش اتراجع خلاص .. انا في عش الدبابير دلوقتي .. وده مش أي دبور .. ده التوربيني
التوربيني : ايه المصلحه اللي وراك !!؟
لما سمعت صوته بصيت عليه .. لقيته واقف ومديني ضهره .. بيبص عالحاره من خرم مسمار في صفيح العشه بتاعته .. بيشرب سيجاره ملفوفه ريحتها وحشه قوي .. صوته زي مايكون شايل جواه غِـّل سنين كتير .. الشر اللي جواه إتمكن منه .. لقيتني مش عارف ارد عليه ولا على الشر اللي حسيت بيه .. لف ناحيتي بالراحه .. بصلي من فوق لتحت .. وقاللي بصوت اهدا من الاول وهو بيتمشى في العشه وبيلف حواليّ
التوربيني : ايه المصلحه اللي ممكن تيجي من وراك انت !!؟
عشان الواحد يقدر يعوم في الميه لازم يحرك ايديه بالراحه .. لو حرك ايديه ورجله جامد ممكن يغرق .. وانا مش جاي هنا عشان اغرق .. وقررت اني لازم اكون أشـّر منه .. وأهدى منه
سوووو : مصلحه ممكن تاكل من وراها لقمة حلوه قوي
التوربيني : - بعد مالف حوالي ووقف قدامي - قول
سوووو : بس الاول لازم تِدّيني وتِدّي اللي معايا الامان
التوربيني : - اداني ضهره ومشي ناحية كرسي موجود في العشه - مش لما اسمع
سوووو : هتسمع .. بس لما تآمنلنا الاول
التوربيني : - قعد عالكرسي وحط رجل على رجل - اديتك
سوووو : كده نقدر نتكلم مع بعض
-----
يتبع

سوووو

هناك ٧٦ تعليقًا:

غير معرف يقول...

حمد الله علي السلامة يا سوووو
فينك يا راجل من زمان

nigro يقول...

الحوار اللي دار بين سوووو و شمهورش
بالنسبة ليا
أجمل حوار حصل في الحدوتة من أول ماقريتها
و أكتر حوار أثر فيا قوي
لدرجة إن الكوميديا اللي بعده ماقدرتش تضحكني غير قليل جدا
مش علشان قصور فيها طبعاً .. علشان أنا اتغميت صح
انت كاتب الحوار ده بحرقة أوي و بقلب أوي
علشان كده وصل أوي أوي
الله يخرب بيتك و بيت أبوك ياللي في بالي

بقالنا حلقتين تلاتة عايشين في جو أفلام التشويق صح
مبدع يا جدعان
عبقري يا ناس

ماتبقاش تغيب كتير كده تاني الله يسترك



يلا سلام

Sha2loob يقول...

أولاً:
جامده جداً
ثانياً:
انت بقالك كام حلقه مأكلتش الواد وهو كده زمانة بقى هفتان وهيخس ومش هيبقى طفل طخين خااااالص والحلقات هتبوظ منك
يا عم ابقى مسي عليه بشندوشتين أي حاجه ولا افتكره وانت بتاكل من عند زيزو نتانة

أنا مستني الحلقه الجاية على أحر من الجمر

غير معرف يقول...

أخيرا و بعد طول أنتظار قريت المحطة و جامدة جدا و لو سمحت يا أخ سووووووو
المحطة الي جاية تكون أكتر من دي علشان
نستمتع بيها أكتر

المنسى يقول...

سو ياسو ياسو ياسو

الحوار شكله جامد أوى
هسطب ويندوز وأرجعلك
سلاموووووووووز

Empress appy يقول...

اطفال شوارع

اممممممممممممم انت فتحت الجروح اللى مش راضيه تتلم ولا ايه

بس شوفت دراكولا رقيق وطيب ازاى وبيتفزع
مش زى ناس تانيه متقومش غير لما العمارة تقع عليهم

غير معرف يقول...

كلامك بجد أثر فيا
بس هو فيه ايه؟الكوميديا قلت أوي كده ليه يا أحمد
اوعدني المرة الجايه انها تبقى طووووويلة قوي وزي ماتعودت منك تضحكني قوي قوي قوي :)
نسيت أقولك
تسلم إيديك :)

حمامة يقول...

ايه ياعم سو الغيبة دى

تعرف لما بحب اضحك بجد باجى هنا
بجد ماشاء الله عليك
الراجل توفيق عبد الجميد ده رهيييييب
تحس انه جاى مع العفش
ملوش ف اى حاجة
عجبنى انا كمان حوار سو وشمهورش لانه واقعى جداً

تسلم ايدك يا فنان :)

المنسى يقول...

ياسوووووووووياجااااااااااامد
وجالك قلب تروح للتوربينى لوحد ك
وتدخله لوحد وتقوله كده
لالا
ده غنت قلبك مات على كده بقى

المهم
هنذيع إمتى
والله صدقنى الحاجات دى لو إتصورت هتبقى حاجة حلوة فى الأخر

مستنى بقية الحلقات
سلاموووووووووووووووز

Asmaa mahaba يقول...

هههههههههههههههالمشكله ان وانا بقرا بتخيل كل شخصيه بكلامها الاقيه فعلا ماشى عليها
انت بتجيب الكلام دا منين على فكره انت مش تنفع مؤلف بس انت تمشى مخرج كمان
ثم ماله ويندوز فيستا ما شغال اسم الله عليه ميه ميه اهو هو مكلكع شويه بس كويس حتى قريب قوى من ابل ماكنتوش:))

تحياتى ليك سومه_87

الـجـدة فـصـيـحـة يقول...
أزال المؤلف هذا التعليق.
الـجـدة فـصـيـحـة يقول...

السلام عليكم ورحمة الله وبركاته

كلامك عن أطفال الشوارع مؤثر بدرجة كببيييييييييير جدًا

وربنا يقدرنا ونقدر نعمل حاجة من أجلهم تساعدهم في حياة كريمة حتى لو كان كل اللى في أيدنا أننا نكلم عنهم ونوضح انهم بشر في حاجة إلى المساعدة والأهتمام

وفي انتظار معرفة

ترى ماذا يريد سووووو من دراكولا ؟؟
وهل سيتوصل مصطفى لسر وراء حقد د. رفعت وسونيا على سووووو؟؟
ترى ما ذا فعل لهم سوووو ليكتسب كل هذا الحقد عليه ؟؟؟
وماذا يريد سوووو من التوربيني ؟؟
وهل يصدق في وعد الأمان الذي اعطاه إياه ؟؟
وهل سيطمئن قلب ام سوووو على ولدها ؟؟

كل هذا واكثر في انتظار معرفتة المرة القادمة إن شاء الله

دمت في رعاية الله

Unknown يقول...

كل سنه وانت طيب يا راجل يا عجوز
والله قلت لبابا مش موافق انا هزن عليه تاني
بجد نفسي اجي معاكم

زى الهوا يقول...

ههههههههههههه التوربينى؟؟؟؟؟؟؟؟؟؟؟

بوست جميل , واللى بعده اجمل , انا لن يسعنى غير إنى ادعو لوالدتك كما طلبت , , وجزاك الله خير وفى ميزان حسناتك إن شاء الله


بس ليه قافل التعليقات هناك؟

2ensan wnsan يقول...

صباح الخير يا كبير واضح انك كنت حاطط البوست في الدرافت يا باشا

ايه يا عم دراكيولا مش عارف يقف قصاد اطفال الشوارع بنفسه لا حول ولا قوة الا بالله ...

بس الجزء بتاع رحلته للتوربيني جامد جدا والله العظيم عبقري يا عم سووووو

ما تتأخرش بقى في الاجزاء الجايه

عبدالله غنيم

رندا يقول...

سووو
Happy Birthday

كل سنة وانت بالف خير
وكل سنة وانت الى الله اقرب وانقى وجميل اوى
على فكرة انا اخواتى الاتنين فى شهر اغسطس واحد يوم 2 واحد يوم 18
ووالدى رحمة الله يوم 1

الشهر دة عندى حافل اوى بالاعياد
يعنى هكون مفلسة ههههههههههه
هجيب هدية لمين ولا لمين بقى
وانت طالع فى العالى وعايزة هدية غالية ياعم
طيب ممكن اجيب كيس جوافة واجى ههههههه
طيب 2 ك مانجو ياعم

كل التمنيات بكل السعادة والحب

رندا

SKOBL- Little Lazy Me يقول...

الله الله .. على طريقة محمد سعد في البيت بيتك لما جابوه في مولد الأحمدي في طنطا .. ايه الحلاوة دي .. دي العملية سخنت وولعت .. بس بصراحة يا سو .. البتاعة فعلا لذيذة و حلوة .. و عاجباني س الحتة دي جامدة ..

ندى : - وهي بتبصلي وعينيها خايفه - خد بالك من نفسك يا سوووو
سوووو : انا مش عشاني .. انا عشان مصر

و توفيق عبد الحميد ده مسخرة .. بجد مسخرة .. فوق الفظيع على رأي فيلم أحمد حلمي .. هههه .. بص يا سوووو أنا بصراحة مستني منك حلقات جديدة و قريبا .. و لا انت من ضمن الناس اللي أنا كتبتلهم اخر بوست في تهييسة ، اوعك يا سوووو لأحســن بجد أنا حاتصيبني حالة من الاحباط باط باط البشع شع شع ..
و باكرر تسلم ايدك

و لك كل التحيات

Ehab يقول...

سوووووووووووووو

يا سارق قلوب العذارى

ازيك يا باشا هنشوفك اخيرا انشاء الله
ميعادنا يوم الجمعه ادعيلي بس متروحش عليا نومه واكلمكم من السرير في الأخر

ربنا يوفقك يا جميل

بس هو دراكولا هيجهز نفسه لأيه بالظبط ده شكله اصلا مش فاهم المطلوب منه

انا ابتديت اتوه زي افلام اللخبطه او الحركه يعني الأمريكاني
واد انت وضحلنا بقى لحسن اجي انا اللي امص دمك قبل ما تتبرع

سلااااااااااااااااااااام
اخوك ايهاب

د/اجدع بنوته يقول...

هههههههههههههههههههههه

ياااااااااه افتقدت حكاياتك ومدونتك جدا ياسووو

اولا هابى بيرث داى مقدما لانى للاسف يوم الجمعه عندى درس سواقه ف مدرسة المرور

لانى والحمدلله بسوق م غير رخصه

وزى ماانت عارف ان قانون المرور الجديد

بقى فيه حبس ولان السجن مش م طموحى

فلابد ان نستخرج الرخصه

فبجد هابى بيرث داى ويارب يبقى يوم جميل عليكم كالعاده

البقاء لله طبعا ف دكتور عبد الوهاب المسيرى

ونقدك لفيلم كباريه انا معاك فيه كله

وزى مابقولك .. اى ميس يومياتك اللظيظه مووووووووت

يارب دايما تبقى بخير

Empress appy يقول...

كلمه على جنب لـ آآبي

يلا يابتاعة القلل والخرافين من هنا

وبعدين هو في فايرس بياخد ضربة شمس يا ناصحه .. الخرفان هي اللي بتاخد ضربة شمس .. واحيانا القلل لو كانت قلل قناوي عشان الشمس هناك حاميه





سلاموووووووووووز



بص بقى يا سووو انا جايه ليك فى معقر مدونتك
اصلا اصلا اصلان يعنى يا حبيبى الفيرس بيجيله ضربه شمس علشان هو فى الهوا انما
الخرفان بتاعتى انا بتقعد فى شمسيه على البحر وبتحط صن بلوك الورد والباقى على الفيروسات بتاعتك
وانا كمان شوفت واحد راجع امبارح وبيدور على كيبورد يبات فيها
ايووووون من الفيروسات اللكيطه دى
شوف بقى ابعد عن خرفانى احسن لك وخليك فى فيروساتك

من غير سلاكوز دى

ميرا ( وومن ) يقول...

سوووو

كل مرة اقرا الحلقات احس انها حاجة حلوة بجد بتتكلم عن كل حاجة بايظة في البلد دي

كلامك عن اولاد الشوارع وجع قلبي بجد لآنه حقيقي جدا

Soooo يقول...

هشام توفيق

انا موجود اهو ياعم .. ولا انت فاكرني هاجرت مع اللي هاجرو من منطقتنا

للاسف ادينا عايشين اهو ومستنين انهم يبعتولنا

وانت ايه اخبار التلج صحيح؟؟؟




سلاموووووووووووز

Soooo يقول...

ňįĝŗő

ماهي دي زهرة الزهرة
هو ده الغرض الاساسي من الحدوته
اننا نكاشف نفسنا من غير تقليديه في الحوار وفي الحكي

ربنا يستر بقى على آخر الحدوته والمذنكرات

ملحوظه
منتظر اننا نقعد مع بعض بفارغ الصبر والله




سلامووووووووووز

Soooo يقول...

Sha2loob

يابن الايه ياحسن
تصدق ياد انت فيك سيناريست والله
لاني قاصد انه ماياكلش فعلا .. عشان اوصل بده لحاجتين
اول حاجه .. اني اخلي الناس تتعايش مع المذكرات من غير مايحطو في دماغهم انه واحد طخين بياكل وبس
تاني حاجه .. اللي هتعرفه الحلقتين الجايين

عايزين نخش فيلم تاني ياعمنا .. بس حاجه في سكة الرجل الطاوطاو المره دي




سلامووووووووووز

Soooo يقول...

كيمو

صديق الطفوله المشرده
اسف ياسيدي عالتأخير .. واوعدك وأوعد كل الناس اني مش هتأخر تاني ان شاء الله

بس اكتر واطول من كده ايه .. ده انا عامل حلقتين مع بعض يابلبل

وانت عامل ايه ياريس؟؟؟



سلامووووووووووز

Soooo يقول...

المنسي

انت كنت بتسطب ويندوز اكس بي عشان تعرف تلعب سوليتير ولا ايه ياعمنا؟؟؟

وبعدين علمك علمك علمك .. سوووو قلبه مات خلاص .. ولا بيخاف لا من توربيني ولا ديزل

وعلى رأي الشاعر .. ياللي انت قلبك مات .. عامل ايه دلوقتي؟؟



سلاموووووووووز

Soooo يقول...

appy

ماهو لازم برضه نجيب سيرة اطفال الشوارع .. والا مابقاش باتكلم عن حاجه ليها لازمه واحسنلي اقول اي هسس

وبعدين انتي مالك معجبه قوي بدراكولا كده .. عموما انا معايا نمرته وكنت بافكر اديهالك
لكن بعد الافترا اللي افتريتيه علي واني مربي فايروسات في الكيبورد وباخدهم معايا الساحل الشمالي ياخدو ضربة شمس .. مش هدييكي نمرته
مش كده وبس .. ده انا هخليه يعض خرفانك وقللك ويقلبهملك دراكولا عشان ماتحطيهمش في الشمس وتدهنيهم سن بلوك ولا سن ديليت

وبعدين اساسا اساسا خرفان ايه اللي تتحط عالبحر تحت الشمسيه .. القلل هي اللي بتتحط عالبحر .. اما الخرفان بتتعلق في البلكونات يا ناصحه



سلامووووووووووز

Soooo يقول...

أنا

الحمدلله ان كلامي اثر فيك او فيكي

وبخصوص جرعة الكوميديا وانها قلت .. ده مقصود الى حد ما .. عشان ماتبقاش الحياه ضحك عالفاضي من غير اي اسقاطات عالواقع

وان شاء الله المره الجايه هتكون اكثر في جرعة الكوميديا .. وهانت فاضل حلقتين ونقفل الليله



سلاموووووووووز

Soooo يقول...

حمامة

طب والله بافتقد الطله الحلوة بتاعتك دي

والف شكر على البؤين الحلوين دول والحمدلله ان ربنا قدرني وكتبت حاجه عجبتك



سلاموووووووووووز

Soooo يقول...

سومه...مجنونه فى بلد عاقل

اقولك على سر .. لو كل واحد وهو بيكتب الحاجه عاش الشخصيه اللي بيكتبها وكتب اللي بتقوله بالظبط .. يبقى هو كده بيحاول انه يكتب صح
لكن المشكله ان دي عواقبها رهيبه .. جنون وانفصام في الصخصيه وليله مراااار

ملحوظه
انا باحقد على اللي بيشتغلو بويندوز فيستا .. اصل انا جهازي شغال بالمانافيللا



سلامووووووووووز

Soooo يقول...

الـجـدة فـصـيـحـة

وعليكم السلام ورحمة الله وبركاته

الحمدلله ان كلامي عجبك .. ولو اني حاسس اني عاجز اني اعمل حاجه تانيه غير مجرد كلام .. بس العرجه بتغزل برجل حمار
وانا ماحيلتيش غير اني اتكلم

وبجد بجد بجد .. بافرح قوي لما بالاقي تعليقك منور مدونتي المتواضعه وبافرح اكتر لما الاقيكي كاتبه الحته بتاعة التشويق للحلقة الجايه




سلامووووووووووز

Soooo يقول...

لماضة

لا مش هقبل اي اعذار
يعني احنا متجمعين عشان نحتفل بعيد ميلادك ونتبرعلك بدم .. قصدي نتبرع بدمك .. قصدي نتبرع بالدم وخلاص .. وتقوليلي مش عارف ايه

لا لا لا لا
اقولك .. هاتي باباكي معاكي .. والله العظيم باتكلم بجد

وكل سنه وانتي طيبه وعقبال مليون سنه وان شاء الله في زي الايام دي السنه الجايه تكوني محققه اللي نفسك فيه ياست الداكتوره




سلاموووووووووووز

Soooo يقول...

زى الهوا

اخيرا رجعتي تنوريني بتعليقاتك يا ميس موحه
طب والله انا كنت هاخد على خاطري لو ماجيتيش

وياستي الف شكر على دعوتك لوالدتي الله يرحمها وربنا يرحم موتانا وموتى المسلمين ويجمعنا بيهم في جنة الفردوس الاعلى بصحبة سيدنا ونبينا محمد عليه افضل صلاة واتم تسليم

وياستي انا قافل التعليقات هناك لاني مش عايز الناس تعلق وبس .. وعايزهم يجيو ونتعرف ببعض
واتمنى انك تشرفينا وتيجي معانا واهو تغيري جو مادمتي متضايقه شويه وعايزه تتفسحي



سلامووووووووووووز

Soooo يقول...

wa7ed 2ensan wnsan

انا فعلا كنت حاطه في الدرافت من زمان وكنت مجهز نفسي ادخل على اي نت كافيه وانشره من هناك .. لكن الطروف ماسمحتش وبمجرد ما قعدت عالكومبوطر رحت مببلش على طول

والف شكر على كلامك الجميل وربنا يكرمك ويوفقك دنيا وآخره يارب




سلامووووووووووز

Soooo يقول...

رندا

وانتي طيبه يا احلى رندا في الفراندات كلها

وياستي شهر اغطسطس ده شهر يالهوووي .. شهر العظماء يعني .. ناس اتولدت في الصيف وخنقو على اهاليهم ولا عرفو يروحو مصيف ولا يقضو صيف حلو خالص
شهر حلو حلو يعني

وياستي انا والله مش محتاج غير اني اتشرف بمعرفتك وبمعرفة كل الناس اللي باعزهم وباحترمهم .. ولا مانجه ولا جوافه ولا اي حاجه .. موبيل ثري جي وعربيه هوندا سيفيك كفايه علي قوي




سلامووووووووووز

Soooo يقول...

SKOBL- Little Lazy Me

طب والله ليك وحشه
ولا ياعم انا مش من النوعيه اللي اتكلمت عنهم
الحكايه اني زنقت نفسي بنفسي في كزا حاجه .. وحاليا باعاني من الحوارات دي

لكن ان شاء الله اوعدك اني هنزل الحلقه الجايه في معادها وربنا يسهل وتعجبك وتعجب كل اللي بيقرولي




سلامووووووووووز

Soooo يقول...

الشنكوتي الكبير

حبيب قلبي ابو الشناكيت

انا ياعم ولا سرقت قلوب عذارى ولا بدارى

وانا اللي مبسوط جدا جدا جدا اني ان شاء الله هشوفك يوم الجمعه والله العظيم

وياسيدي تابع المذنكرات وانت هتفهم ايه اللي دراكولا هيعملو

ملحوظه
وكتاب الله لو راحت عليك نومه يوم الجمعه وماجتش ازعل قوي



سلامووووووووووز

Soooo يقول...

د/اجدع بنوته

داكتوره ياسمين .. نورتي المدونه والله بتعليقك وبضحكتك ويارب تكون طالعه من القلب

والف شكر على كلامك وكان نفسي تكوني معانا وتنورينا والله .. لكن بما ان فيها درس سواقه وخايفه من السجن وشنطة الاسعافات الاولانيه .. فمعاكي ربنا .. ومع كل اللي هيعدي من قدامك وانتي سايقه التوك توك
وربنا يستر عالجميع


ملحوظه
ماتبقيش تغيبي كده ياداكتوره لاحسن انا قلقت وقلت لروحي هو انا زعلتها في حاجه وانا مش واخد بالي ولا ايه؟؟؟




سلامووووووووووز

Soooo يقول...

وومن

يا ميرا لازم نتكلم عن حال بلدنا لاننا اكتر ناس ادرى بيها وباللي بيحصل فيها

بس هنا بقى الاختلاف .. كل واحد وبيكتب بطريقته

والحمدلله ان طريقتي في الشخبطه بتعجبك وبتعجب ناس كتير من اللي بينوروني في مدونتي المتواضعه




سلامووووووووووووووز

غير معرف يقول...

لا يا جماعة مفيش حاجة ده انا بضحك على حاجة قريتها ع النت

لا مؤاخذة يا سوووو الجماعة بره بس هيتجننوا من صوتي العالي وانا بضحك وبعيد عنك مش بضحك بس ده انا لما اكون واخداني الجلالة بأه ما اقولكش حشاش بيضحك ههههههههههههههه

بجد المرة دي جرعة الكوميديا رجعت تزيد تاني بعد الاكشن والساسبينس اللي كان في الحلقتين اللي فاتوا

بجد الست الحاجة والدة سوووو موتتني بجد على قلقها ووغوشتها على ضيناها

ولا دراكولا ابن الذينا والعيال اسكت اسكت

بص ،،، بصيت؟؟ انا عندي فكرة
الحدوتة دي يا إما تتعمل فيلم كارتون للاطفال،، يا اما تتعمل حلقات مسلسة كده وتدورلك على حد بيرسم حلو وتنزل مصورة بجد انا مستخسراها موت
وكل ما اقابل حد من صحابي كان بقرا لادهم صبري او د/ اسماعيل رفعت افتكرك واحكيلهم على الحدوتة دي

فكر بس،، فكر يا عم ما تشوحش بإيدك كده،، خد بس اما اقولك مش تكلمني زي ما بكلمك
شوف سابني ومشي ازاي؟؟
شفتوا سوووو وعمايله؟؟

مها ميهوووو

المنسى يقول...

معلش ياسووووو هعلق هنا تانى بعيد عن الموضوع هو التجمع بتاع التبرع فى الأول قبل الزراعين فين وإزاى وإمتى بالظبط سلاموووووووووز

د. إيمان مكاوي يقول...

أنا هعلق قبل قراءة التدوينه يا سوووو..
البقاء لله في والدتك ..أنا معرفش حصل إمتى لكني كنت دايما بدعيلها من ساعة ما وصتني بكده ..وعايزه أسألك هي حجت أو عملت عمره قبل كده ولا لأ ..ياريت ترد علي بسرعهعلشان أنا هعمل عمره قريبا لو شاء الله عز وجل وممكن أعملها لها
تحياتي

زى الهوا يقول...

انا عندى انيميا ( فقر دم يعنى ) , يبقى ازاى هتبرع ؟؟

كفاية التلت تحاليل اللى بعملهم كل شهر :(


كنت هستمتع اكيد لو كنت جيت واتعرفت عليكم , بس ما باليد حيلة , انا نفسى من زمان اتبرع اوى , وبابقى بابص على عربيات التبرع وعينى هتطلع نفسى ادخل اتبرع , بس هنعمل ايه؟

امل يقول...

السلام عليكم
القصة كل مدى بتزيد اثارة والحوار رغم ده دمه خفيف قوي وخصوصا حوار مامت سووو وباباه ولعب توفيق عبد الحميد للسولتير وطبعا انا يهمني ان الدكتور رفعت يطلع براءة لاني من ضمن المعجبين بيه وبيدوبوا في بدلته الكحلي هههههه
وأخيرا كل سنة وانت طيب وربنا يرحم والدتك ويغفر لها ويجمعك بيها في الفردوس الاعلى من الجنة

shaimaa samir يقول...

السلام عليكم ورحمة الله وبركاته

يشرفنى دعوتكم لحضور حفل توقيع ديوانى الاول
اطياف الصمت

وذلك فى الثانى من شهر اغسطس
يوم السبت القادم باذن الله
الساعة 7
بمكتبة طلعت حرب


يشرفنى حضوركم جدااااا




كل سنة وانت طيب
وجميل انك تكون متذكر فى مناسبةزى دى الدعاء لوالدتك
ربنا يعزك

يا اخ سو
لازم تيجى الحفلة
بجد
والتفاصيل برضو فى مدونتى اكتر

Soooo يقول...

أحسن تـستاهـل

مهاميهووووو
عارفه يا مها
اهم حاجه عندي اني اللي يقرا كلامي يضحك ويضحك من قلبه
والحمدلله ان ربنا قدرني وعرفت اضحكك وحاولت اني اضحك غيرك

وبخصوص انها تتعمل كوميكس او فيلم كارتون .. الموضوع ده مش بايدي وماينفعش انه يحصل
لاننا في عصر غريب جدا
عارفه .. لو كنا في عصر غير العصر المبارك اللي احنا فيه .. كنت قلتلك ممكن

وصدقيني .. والله العظيم والله العظيم والله العظيم تلاته
مجرد انك تشغلي بالك وتفكري في انك تحكي للناس عن المذنكرات او تقولي للي تعرفيهم عن الحاجات المتواضعه اللي باكتبها .. ومجرد ضحكك وتعليقك وتعليق الناس اللي بتقرالي .. اجمل عندي من مليون كتاب ومن مليون فيلم ومن مليون اي حاجه

ربنا يارب يكرمك ويسعدك ويبسطك ويوفقك ويرضيكي دنيا وآخره يارب



سلامووووووووووز

Soooo يقول...

المنسى

والله يا منسي تفاصيل الحوار هتلاقيها عند خيخه وفاتيما .. ولو خدت بالك ودوست على اسماؤهم في البوست واللي انا كاتبها باللون الاحمر .. هتخش على مدوناتهم وهتفهم الحوار كللو

شوف كده ولو ماعرفتش قولي




سلاموووووووووز

Soooo يقول...

إيما ( أم البنين)

هي والدتي متوفيه بقالها سنه واربع شهور الحقيقه .. بس انا حاسس انها زي ماتكون متوفيه امبارح بس الله يرحمها

والحمدلله هي حجت واعتمرت وربنا يتقبل منها ومننا سائر الاعمال يارب

ولو هتعملي عمره قريب .. يبقى الله يكرمك .. الله يخليكي يارب .. الله يسعدك دنيا وآخره .. اقفي قدام الكعبه وادعيلها ان ربنا يرحمها .. وان ربنا يجمعني بيها في جنة الفردوس الاعلى بصحبة سيدنا ونبينا محمد عليه افضل الصلاة والسلام
ماتتصوريش الدعوة دي عندي قد ايه
ربنا يكرمك ويرضيكي دنيا وآخره يارب



سلاموووووووووز

Soooo يقول...

زى الهوا

يا ميس موحه مش مهم انك تتبرعي فعليا .. مجرد انك تبقي معانا في حاجه زي دي صدقيني ليها وقع كبير قوي
كفاية اننا هنتعرف ببعض بشكل اقوى واعمق
صدقيني هيبقى يوم حلو ان شاء الله
حاولي تيجي الله يكرمك
حاولي



سلامووووووووووز

Soooo يقول...

امل

وعليكم السلام ورحمة الله وبركاته

الحمدلله ان الحدوته مازالت بتشدك ومازهقتيش منها .. ولو اني مازلت متضايق من حوار بدلة دكتور رفعت اسماعيل الكحلي اللي بتخلي البنات يدوبو في دباديبه
مع اني عندي بدلتين منهم واحده كحلي لكن ولا حد معبرني
وكمان بقيت اصلع وبرضه ولا حياة لمن تنادي
وباحرق علبتين سجاير ولا الهوا

يعني بصراحه كده ولاجل الامانه العلميه والادبيه .. انا باحقد عالجدع ده

----
والف شكر على دعاكي لوالدتي بظهر الغيب .. وربنا يارب يتقبل منك
وياريت تحاولي تيجي يوم الجمعه وتنورينا كلنا في اليوم ده واهو تتعرفي بالمدونين ويتعرفو عليكي
حاولي




سلاموووووووووز

Soooo يقول...

shaimaa samir

وعليكم السلام ورحمة الله وبركاته

اقسم بالله العلي العظيم من غير ماتقولي كنت ناوي اجي وان شاء الله هاجي

وربنا يارب يوفقك في التجربه دي وان شاء الله الديوان هينجح وهيفرقع وتتوالى الدواوين ومن نجاح الى نجاح ان شاء الله

وياريت انتي بقى تيجي يوم الجمعه وتحضري معانا اليوم ده ولو حتى مش هتقدري تتبرعي بالدم .. وتعزمي بنفسك الناس كلهم انهم يجو .. وبكده تبقي خدتي ثواب انك مشيتي في مشوار لوجه الله .. وكمان اتعرفتي عالناس وعزمتيهم على حفلة توقيع الديوان بتاعك
حاولي كده ومش هتخسري حاجه

وباشكرك على كلامك الجميل ده وان شاء الله هكون موجود



سلامووووووووووز

shaimaa samir يقول...

والله يا اخ سو.....

روح شوف عند فاتيما كنت بقولها ايه

وبعد ما علقت
خبطت فى دماغى انى فعلا اجى
وقمت عمللها كومنت تانى بعرف رقم خيخة

انا بس ربنا ييسر الحال
لان يوم الجمعة ده مشغولة شوية كتير قبل الحفلة
حاجات بحضرها
وهروح اظبط ميوزيك وانزلها دى فى دى
قصة كدة
دعواتك جداااا

اشكرك والله انك كنت ناوى تيجى

وكل عام وانت الى الله اقرب
وعلى طاعته ادوم
ولسنة نبيه اتبع

Z_Diva يقول...

ايه ده يا محسن هتعد تزاولنا و تبعتنا لحد ميتا :(

بس حلقة كوية كيك :)))))))))))))

لا بجد و الله ماشاء الله بجد, كيب اب ذا جود وورك دوود, و مش تتاخر علينا تاني في الحلقات


اه كنت هنسى... هابي بيرث داي مان :))))

كراكيب يقول...

يا ماماااااااا
انا عايزة اعرف ايه اللي حصل بقى وانا مالي وانا ماااالييييييييي

لغة الحوار بتاعتك فظيييييعه
هلكتني من الضحك
انت عسل يا سووو عاااااساااال

مستنية بقى علشان انا متوغوشة ومش هعرف انام الا اما اعرف ايه اللي حصل مع التوربيني

miro el niro kwaniro

Asmaa mahaba يقول...

الاول كل سنه وانت طيب يا سوو وكدا انت بقيت مدونتك كاذبه لانك بقيت 31 فازاى عجوز و30 هو نصب بقى ولا يعنى نصب
هههههههه
وثانا انا مجيتش فى التبرع ان قلت اللى عنده دم وانا مفيشدم اجى ليه ثم انا مؤمنه بالمثل القائل ان كان نظيف برا البيت سومه تترزع فى البيت والا مش حتعرف ترجع البيت ماهو انا اصلى مكتوب عليا الهنا والسكن فى طريقه
وبيتعرف اليوم من اوله تلاقى اكتوبر نضيفه ومفيش مواصلات
غير دا كله ااااه لو شفت ليموزين اللى ما يتسمى فى مصر الجديده وز بيه كنت عرفت مين ماصص دمنا
تحياتى ليك سومه_87

Asmaa mahaba يقول...

اخ بتحقد عليهم ليه شوف انا حتعلم انسخ نسخه منه ازاى وابعتهالك مع اى حد من البوسطجيه

shaimaa samir يقول...

طلب ثنائى منك ومن فاتيما
ممكن تعزمو المدونين بالنيابة عنى فعلا

هكون مبسوطة بوجدهم بجد

معلشى انا كنت بفكر جديا اجى
لكن والله فعلا الوقت غريب بشكل
غريييييييييييييب

دعواتكم

GiGi world يقول...

ربنا يكرمك ياسووووووو
على موضوع التبرع بالدم ده بس ياريت بلاش حكايه المشروبات اللى خاليه من الكحول والكلام الفاضي ده
اشربوا عصير فريش
ثانيا كل سنه وسيادتك طيب وبخير
ثالثا ربنا يرحم والدتك رحمه واسعه ويسكنها الفردوس الاعلى
تحيااااااااااااتي

زُمُرده يقول...

ماشي يا روش يا سوووو
بقى طمعان في دعوات لوالدتك الله يرحمها ويغفرلها من كل الناس وكمان طمعان في ثواب التبرع بالدم
امممممممممممم
داخل على طمع اوووووووووي

طيب كملها خد وياك زير عسل اسود كده علشان اللي يتبرع تديله ع طول
وكمان متنساش تقولهم الرجاله ييجوا بعد 3 شهور والستات بعد 4 شهور
علشان قبل كده المفروض ميتبرعوش

ووصيه كمان
شيلي حته صُغنونه من التورته وياريت بالشكولاته ولا تورته ايس كريم على جنب
.......
......
....
ليك طبعا الحته دي والباقي ليا
هههههههههههههههه

وش مطلع لسانه

كل سنه وانت ولماضه وكل الناس بخير
وسمعني اغنيه ...عيد ميلاد ابو الفصاد
هههههههههههههههه

اول ما تخلص عيزاك علشان عندي خناقه ليك انما ايه ولا يا ولا مفيش بعد كده

وناخد اتصال تاني
ههههههه

غير معرف يقول...

يعنى اخيرا نزلت المحطه بعد تشويق وانتظار طويل

بجد احساسك المرة دى عالى قوى في الحلقه يا سوووو استمتعت بالحلقه واحساسك با اولاد الشوارع واللي بيحصلهم وشرحك للواقع بتاعهم كأننا شايفينه دائما مبدع بشهادتى وشهاده قرائك من اصحابك ومن اى حد بيقرالك بجد فرحانه بيك ومنتظرة الحلقتين وياريت ماتتأخرش علينا زى المرة الفاتت ومستنيه اعرف حاجه عن سونيا لانك ما جبتش سيرتها

وربنا يبسطك ويكرمك ويوفقك

غير معرف يقول...

الله ينور عليك ايه الجمال ده اولا موضوع ان المدونين يبقوا اصحاب دى حاجه هايله متطلعش الا من انسان ودود وانا اشجع عليها بشده اما موضوع التجمعات اللذيذه دى والتبرع والنادى الزراعى او الصناعى ارجوك ارجوك اى تجمع زى كده عرفنى وده لانى بحب التعارف والانشطه الاجتماعيه جدا وبخلاف كده انا مدونه لسه جديده جدا جدا اما بقه تحليلاتك السينمائيه فمتزنه لحد كبير وموضوعيه وده رايى من واقع حبى للسينما ودراستى ليها فتره من الزمن ..يسعدنى مرورك انتا والاصدقاء اصدقائك انتا دلوقت ويا رب يبقوا بكره اصدقائى انا كمانعلى مدونتى الجديده ولو فيهاشئ ناقص او على غير عادة المدونين تعرفنى ..اختك الرفيعه محاسن.

حنين القلب يقول...

كل سنه وانت طيب يا سوووووعقبال مليون سنه
انا مش عرفت اجى امبارح فى التبرع يبقى كده انا من اللى مش عندهم دم اللى انت قايل عنهم ؟؟
بس والله غصب عنى ان شاء الله المرة الجايه اكون معاكم
وربنا يرحم والدتك ووالدى ويرحم الجميع
سلام يا سووووووو
(انا مش كلت تورته فين منابى ؟؟؟

Unknown يقول...

يا زلف خسارة فاتني التجمع الر أعلنت عنه فوق دة يا رتني دخلت أول آمبارح

معلش انا تملي حظي كدة في التجمعات
كل سنة ، زنت طيب عجزت أنت أوي كدة
:)

بالنسبة لخالد صالح قله هارتي دة بيصنع لبان مش لبن

Unknown يقول...

علي فكرة انا عجبني اوي بوست كباريه رغم انك شرحت الفيلم خالص و الفيلم بصراحة عجبني جدا لكن طريقتك بجد و بدون اي مبالغة هايلة اوي

و هي في الأخر آذواق ا نسب زي ما ذكرت فر بداية البست

غير معرف يقول...

نسيت اقولك ان الاستاذ توفيق مش عارفه ازاى مش عارف يلعب سولتير

دى كل الاصدرات تجنن
................
شوف يا سوووو انا مش عارفه انت اتبرعت بالدم ونسيتنا ولا ايه ولا اليوم كان شاق جدا خيخه قالت انه كان يوم لذيذ يارتنى كنت معاكم

المهم كل سنه وانت طيب ومعلش متأخرة جدا

.................


وده دعاء للوالدتك يا سوووو ربنا يتقبله منا ان شاء الله وربنا يرحمها يا اذن الله تعالى


اللهم اني اسالك يا ارحم الراحمين ان يكون عبدك ممن بشر عند الموت بروح وريحان ورب راض غير غضبان

- اللهم اغفر لعبدك وارحمه عدد من قالها ويقولها القائلون من اول الدهر الى آخره عدد من احصاه كتاب الله واحاط به علمه واضعاف ذلك اضعاف مضاعفه وكل ضعف يتضاعف من ذلك مضاعفة ابد الابد ومنتهى العدد بلا أمد لا يحيط به الا علمه

اللهم تقبل منا الدعاء يا ارحم الراحمين ياذا الجلال والاكرام


وتقبل احترامى ليك وربنا يرحمنا جميعا

Soooo يقول...

shaimaa samir

ياستي ولا يهمك وان شاء الله نبقى نتجمع مره تانيه وتكوني معانا بعون الله

واسف جدا اني ماقدرتش اجي حفلة توقيع الديوان لكن والله العظيم ماحاشني عن الحضور غير الشديد القوي
لكن ان شاء الله في اقرب فرصه لحفلة توقيع تانيه هتلاقيني طابب عليكي ومشتري عشرتاشر نسخه ومخليكي تمضي عليهم

وربنا يسعدك ويكرمك ويوفقك ويرضيكي دنيا وآخره يارب




سلامووووووووووووز

Soooo يقول...

Z_Diva

طب والله العظيم ليكي وحشه يا ام زعبولا

وياستي ولا بعتك ولا حاجه .. انتي لسه شفتي بعت
التقيل جاي ان شاء الله قريبا

وانتي طيبه ياستي وان شاء الله نبقى نحتفل بعيد ميلادك وانتي منورانا كلنا ان شاء الله



سلاموووووووووز

Soooo يقول...

كراكيب

ياميرو ولا تتوغوشي ولا تقلقي خالص .. ونامي وانتي في بطنك بطيخه صيفي وان شاء الله خير

والف شكر على كلامك الجميل ده ياستي وربنا يسعدك ويبسطك ويكرمك ويرضيكي دنيا وآخره ان شاء الله



سلامووووووووووز

Soooo يقول...

سومه...مجنونه فى بلد عاقل

وانتي طيبه يا أجن سومه والذ سومه في عالم التدوين كللو
واتحججي بقى ياستي بنظيف اللي منظف البلد كلها
اهو انتو كده يامصريين .. بتحقدو على اي موكب لاي شخصيه قياديه مع ان الشخصيات دي بتضحي برحها وبروحنا عشان خاطر البلد

وبعدين انا قلت اللي ماعندهمش دم مايجوش .. ولا حتى قلت ان مدونتي كدابه .. انتي بتتلككي مش كده ؟؟

وعموما ياستي ان شاء الله الجايات كتير وان شاء الله نتجمع على خير باذن الله وتكوني معانا

وعلى فكره .. المشكله مش في النسخه الفيستا .. المشكله في الجهاز بتاعي .. ده قاب قوسين أو أدنى من انه يتجنن رسمي والاقي البورده بتقولي ياخي اعتقني بقى حرام عليك



سلاموووووووووز

Soooo يقول...

GiGi

ربنا يكرمك يارب على دعاكي الجميل ده ياستي .. وكل سنه وانتي طيبه ان شاء الله

وبعدين انا بقولها بهزار يابنتي .. بقى بذمتك في مشروب كحولي خالي من الكحول .. ده يبقى زي الشاي الخالي من الشاي .. يعني ميه وخلاص

وفعلا شربنا مشروبات فريش .. خالي من الفريش




سلامووووووووووز

Soooo يقول...

زُمُرده

دي هي دي اكتر حاجه لازم نكون طماعين فيها يابنتي .. ان ماكناش نطمع في ان الناس تدعي بالرحمه لينا ولكل اللي بنحبهم .. هنطمع في ايه .. في حته من التورته مثلا

وبعدين علمك علمك علمك .. فضل من التورته كتير قوي .. لدرجة اننا لما قمنا ومشينا من النادي ورحنا عالبورصه فرقنا على كل اللي نعرفهم واللي مانعرفهمش واتفضل كمان للقهوجيه بتوع البورصه

وحاضر ياستي .. اخلص الردود واجي اشوف الخناقه اللي ناوياهالي .. بس لعلمك احنا ولا بنتهدد ولا بنخاف .. وقلبنا ميت وحاطين مكانه علبة بولوبيف مضروب

ملحوظه
بجد والله كان نفسي تبقي موجوده معانا ومنورانا



سلاموووووووووووز

Soooo يقول...

sooosaia

الف شكر على الدعاء الجميل ده وربنا يتقبل منك يارب
وبجد مش عارف اعلق على كلامك بأي حاجه

ربنا يسعدك ويكرمك ويبسطك ويوفقك ويرضيكي دنيا وآخره يارب




سلاموووووووووز

Soooo يقول...

عايزه اتطلق و

اهلا بيكي يافندم في اول زياره ليكي لمدونتي المتواضعه واتمنى انك تعتبريها زي مدونتك تمام وتشرفيني بزياراتك وبتعليقك زي ماتحبي

وياستي حاضر وأوعدك اننا في اي تجمع تاني هنبلغك وان شاء الله هنكتسب صداقتك وده شيء يشرفنا طبعا

وربنا يسعدك ويكرمك ويوفقك ويرضيكي دنيا وآخره يارب



سلامووووووووووز

Soooo يقول...

حنين القلب

وانتي طيبه ياحنين وربنا يسعدك يارب

وياستي لا طبعا انتي مش من اللي ماعندهمش دم دول خالص .. ولو اني ماقلتهاش بس انتي اكيد مش منهم
وان شاء الله نبقى نتجمع على خير في اقرب فرصه وتكوني منورانا بوجودك

والف شكر على دعاءك وربنا يرحم موتانا وموتاكم وموتى المسلمين يارب

وياستي منابك متشال واحنا تحت أمرك والله

وربنا يسعدك ويكرمك ويبسطك ويوفقك ويرضيكي دنيا وآخره ان شاء الله



سلاموووووووووز

Soooo يقول...

عاليا حليم

تصدقي ياعاليا انا اللي بجد غلطان اني حتى ما قولتلكيش اننا هنتجمع
معلش حقك علي
وان شاء الله في اقرب فرصة تجمع هابقى ابلغك وان شاء الله تنورينا وتشرفينا ياستي

وبالنوسبه لفيلم كباريه فأنا سعيد جدا ان الكلام اللي قلته عجبك حتى ولو كنتي مختلفه معايا في وجهة النظر .. وده ان دل على شي فبيدل على انك شخصيه محترمه وفنانه وبتتقبل الرأي والرأي الاخر

وبجد اسف جدا اني مابلغتكيش بالتجمع ده ووشي منك في الارض والله العظيم



سلامووووووووووز

زُمُرده يقول...

ياريت كان بامكاني

ما كان في الامكان احسن مما كان

واهو كله نصيب
والجايات اكتر

يلا بقى الحق شرفنا
بسرررررررعه


انت لسه عندك؟؟؟؟؟؟