الخميس، ١٩ رجب ١٤٣١ هـ

!! نَطّة الانجليز

منذ أيام قليلة .. شعرت بالحنين لألعاب أيام الطفولة المُشردة , ولكن أكثر لُعبة شعرت بالحنين إليها كانت أقل الألعاب التي لعبتها .. وهي لُعبة "نَطّة الانجليز" .. والتي تغير اسمها بعد جلاء الانجليز إلى "خمسه ملّيم" , في توثيق صريح لقيمة ملاليم مصر إبان تلك الفترة

واعتقد - والله أعلم - أن هذه اللعبة كان يلعبها العساكر الانجليز مع الأسرى المصريين .. وذلك
!! لأنها بالفعل تعتبر طريقة تعذيب بشعه .. قد يُعمل بها في أقسام الشرطة لاحقا

ولكي تتأكد عزيزي القاريء من صدق كلامي .. اسمح لي أن أشرح لك قواعد هذه اللعبة
--
تتكون اللعبة من مجموعة أشخاص .. يعملون فيما بينهم "طُس" .. وهو المعروف شعبيًا بإسم "كولوا باميه" , والخاسر فيما بينهم يتخذ وضعية الوقوف حانيا ظهره للأمام
كما هو موضح في الصورة أدناه
وييقف باقي المجموعة طابورا .. ويكون أمامهم بحوالي عشرة خطوات .. الشخص الواقع في اللعبه .. او "المقفوز عليه" وهو يقف بجانبه , وذلك لأن عملية القفز أو النط .. تكون أشبه بما يفعله لاعبو الجمباز في القفز من على الحصان

تبدأ اللعبة عن طريق ركض كل شخص من الواقفين في الطابور بمفرده للقفز من على ظهر المقفوز عليه , وما أن يقترب القافز من المقفوز عليه .. حتى يضع القافز يديه على ظهر المقفوز عليه لكي تساعده على القفز .. ويقول وهو طائر في الجو فوق ظهر المقفوز عليه .. خمسه مليم

ثم يأتي دور باقي الواقفين في الطابور .. كل فرد منهم يفعل مثلما فعل أول شخص , ثم يعودون ليقفوا في الطابور كما كانوا من قبل
والقفزة التاليه مشابهة للقفزة السابقه .. ولكن يقول الشخص القافز في هذه المرّه .. عشره مليم

! ويبدو ان مُبتكر اللعبه زهق وقال خمسه مليم ايه وعشره مليم ايه .. عايزين أكشن
فاتخذت القفزات التاليه مسارا دراماتيكيا صريحا .. وتحولت اللعبة لعملية تعذيب بشع .. تخلو
!! من أي متعة على الشخص المقفوز عليه .. ولكنها تُمتع القافز بطريقة سادية بشعة

ففي القفزة التاليه .. بدلا من أن يضع القافز باطن يديه على ظهر المقفوز عليه لكي تساعده على القفز .. يضع يديه مكعبرة .. ويقول وهو يقفز "معلقه" , قال يعني إيده عامله شكل معلقه !؟

!! ولكن مهلا عزيزي القاريء .. فما هذا سوى تسخين لظهر المقفوز عليه ليستعد لما هو أنقح

فبعد "المعلقة" .. هناك "الشوكه" , وهي أن يضع القافز يديه - وهي تُشكل شكل الشوكه - على ضهر المقفوز عليه في أثناء القفزة .. وبالطبع يجب ان يقول القافز .. شوكه
والحقيقة يجب أن يقول القافز "كلابه" بتشديد اللام .. وذلك لأن يد القافز تكون أشبه بالخُطاف الذي يتم به تعليق الذبيحه , ويا سلام بقى لو كان اللي بيقفز مربّي ضوافره .. ساعتها ضهر
!! المقفوز عليه هيتحول لمصفاة على آخر اليوم

وما يؤكد لي نظرية "الكلابه" والتشبيه بينها وبين "خُطّاف" الذبح .. القفزة التاليه
فالقفزة التاليه اسمها قفزة "السكينة" , وبذلك يتضح أنه لابد أن يكون للسلاح الأبيض دور في
! هذه الجريمة .. عفوا .. أقصد في هذه اللعبة البريئة

وفي قفزة "السِكّينه" يضع القافز إحدى يديه في وضع قائم كأنها سِكّينه .. والأخرى في وضع أفقي عادي .. ويقول القافز وهو يقفز سِكّينه
!! وإن كنت أعتقد أنه من الأفضل أن يقول .. حلال الله أكبر


وبالطبع بعد الذبح .. هناك التقطيع .. وهذا هو دور قفزة "الساطور" , تلك القفزة التي لا أعلم مين ابن الكلب اللي عملها !!؟؟
فالمفروض أن يضع القافز في هذه القفزة .. كلتا يديه في وضع قائم مثل قفزة "السِكّينه" .. ولكن الاختلاف هذه المرّه يكون في مدى الضرب بقوة على ظهر المقفوز عليه - يا عين امه !! - ؛ فالقفزة بالفعل تبدو وكأن المقصود هو كسر ضهره بالساطور

؛ ولعل هذه القفزة هي السبب في إصابة معظم أبناء جيلي - بما فيهم العبدلله - بالغضروف
!! لأنني نتيجة لوجود كرشي لم أكن رشيقا استطيع القفز .. وكنت دائما المقفوز عليه

آخر قفزة في اللعبه .. هي قفزة "الحَكّه" .. وفيها يقوم الشخص القافز بحَكِّ مؤخرته وهو هابط من القفز .. بكتف ونصف ظهر المقفوز عليه

وعادة لم تستمر اللعبه لأكثر من "حكة" أو "حكتين" .. وذلك لأن ظهر الشخص المقفوز عليه يُصاب بالانهيار .. فينكفى على بوزه كما البطه البلدي ؛ مما يؤدي إلى وقوع الشخص القافز على مؤخرته مرتطما بالارض .. بدلا من ظهر المقفوز عليه ؛ فيقوم الشخص القافز ساخطا ولاعنا الشخص المقفوز عليه .. واللي هو ليه بيخنق علينا ومش عايزنا نكمل لعب !!؟

الحقيقه .. لعبة "الخمسه مليم" تعتبر مثال واضح وصريح لتعذيب الأطفال فيما بينهم .. والحمدلله أن أطفال هذا الجيل لم يعاصروها واتجهوا إلى البلاي ستيشن والفيديو جيمز .. وهي العاب قد يقول البعض أنها تدعوا إلى العنف
!! لكن يبدو ان من يقول هذا الكلام .. لم يلعب "الخمسه مليم" في يوم من الأيام

ملحوظه

وانا بافتكر اللعبه .. لقيتني باسأل روحي هو ليه بعد قفزة الخمسه مليم وقفزة العشره مليم .. مافيش ملاليم تانيه !؟؟
وليه دخلنا في شغل الدبح و الأكل و الحكحكه !!؟؟
واساسا اساسا اساسا .. انا حنّيت للعبه الزباله دي لييييييه !!!؟؟؟
سوووو

هناك ٢٦ تعليقًا:

Ramy يقول...

سوووو

أيه يا عم دة دى لعبة دى انا شفتها بس تصدق عمرى ما لعبتها
(:

الحمد لله

انت حنيت لانك حنيت لزمان فمفرقش معاك اللعبة بس فرق معاك الذكرى
والحنين للوقت ده

تحياتى مستر سوووو

(;

مهندس مصري بيحب مصر يقول...

دا افتراء يا عم

adel يقول...

التشبية بتاع اللعبة و الشرطة
طيب يعني الشرطة هتلعب مع الجيل الجيد
ميديل اوف اونر و تضربهم بالسلاح علي طول :):)

Mahmoud Ahmed يقول...

يااااااااااه
الألعاب دي مبقتش موجوده خلاص
انا مفتركش اني شوفت حد اليومين دول بيلعب اللعبه دي خالص
^_^
دلوقتي الكمبيوتر و البلاي ستيشن مش مخلي خالص

Mahmoud Ahmed يقول...

بس و الله عاجبني شرحك للعبه قوي و تطورها
هههههههههههههههه
^_^
شكلك كنت لاعيب قديم
ههههههههههههههههه
^_^

Mahmoud Ahmed يقول...

بس عاجبني و الله طريقه شرحك للعبه قوي
^__________^

أنا - الريس يقول...

هههههههههه
ايام
وزمل
انا مكنتش بحب العابها لان كنت مش بعرف انط كنت بخاف
ولذا كنت " الناخخ " علي طول
حتي مكنتش اعرف اجري .
يلا ايام .

мαησηα يقول...

والله اول مرة اسمع عنها اللعبة

دى منك يا سوووو

مع انى عجوزة بردو يعنى مش لسه نونو

بس يمكن لانى مكنتش ف مصر :(

بس والله العظيم لعبة حلوة تحسها

كلها نشاط وحيوية اينعم هى مؤلمة

بس مش احسن من الالعاب بتاعة دلوقتى

اللى كلها كسل وتلاقى الطفل عنده 10

سنين وقد امه وابوه حجمااااااااا من

كتر اللغ والركنة قدام البلاى ستيشن

hana يقول...

هههههههههههههه
لعبة دي ول دمار هههههههههه
انا معرفهاش وبعدين صعبة بجد..
دة على كدة محتاجين سوبر مان بئا :)

بس الشرح إيه هايل

t3ban يقول...

انا كنت بلعب كيكة علي العالي و كيكة علي الواطي
أصلي من جيل أخر الثمانين
بداية الأتاري و الكمبيوتر الصخر ربنا يبشبش الطوبة الي تحت دماغه

فكرة من الزمن ده يقول...

بجد دي لعبة زبالة فعلا
كنت باشوف ولاد بيلعبوها في الشارع وانا ماشية لكن عمري واجربت او اتمنيت العبها
لكن ده برغم اني مكنتش دخلت في سيكولوجية وتكتيك اللعبة الدموي ده
بجد تبوظ الاعصاب
بس انا ليا سؤال منطقي جدا
هو ايه اللي بيجبر المقفوز عليه انه يلعب اللعبة دي هل بيبقى اقلهم شعبية فبيتنازل لهم عن ضهره في سبيل انهم يقبلو يلعبوه معاهم وينضم ليهم ولا ايه الهدف يعني
اففففففففففف ده افلام الرعب مش بتعمل في اعصابي كده

Asmaa mahaba يقول...

هههههههههههههه
متفتكرشى وحش ابدا يا سوو يا اخويا فاكر كيك ع العالى وكيك ع الواطى هههههههههه دى كمان كنا بنلعبها:))

أم بتول يقول...

الحمد لله أنها لعبه صبيانى ، لأنى عمرى ما شوفت بنت بتلعبها ، عموما سؤال مهمه جدا أيه الى يخلى المقفوز علية يتنازل و يقبل ، مش معقول كلهم عندهم كرش علشان كدة بيتنازلوا و يقبلوا .....
بس عارف مهما كانت الذكريات مؤلمة لينا بس بتكون حلوة لأنها بترجعنا لأيام كانت حلوة حتى ولو كانت مرة لأن الحاضر أمر منها بكتير .

ناس الأيام يقول...

ياه اللعبة دى أنا كنت بلعبها بس علشان ماكنتش بعرف ألعبها فبكون المقفوز عليه

Mohannad

كراكيب يقول...

سووووووو
وحشتنوووووووو بجدووووووو

كيلو بامية كمان مبقاش اسمها كيلو بامية
انا سمعت الاطفال عندنا في الشارع حرفوها وبقوا يقولوا

كيلو باميوووووس.. القطة العااااميووس
:D مش فاهمة ليه.. بس هما كانوا بيقولوا كدة

وبعدين احنا كنا بنلعب خمسة مليم دي في المدرسة... بس مكانش فيه الشوك والمعالق ودرج المطبخ اللي انت كنت فاتحه ف موضوعك ده

اقولك بقى على آآآآآخر مرة لعبت فيها اللعبة دي... يومها الصبح بنطلون المدرسة اتقطع واضطريت ألبس جيبه بتاعت مهاميهو اختي
وهنلعب.... وانا هنط... البت الرشيقة الجامدة اللي بتنط زي الحصان من فوق الحواجز
وفجأة.... دييييييب طااااااخ دييييييييش
الجيبة قلبتني على دماغي في الارض
هههههههههههههههههههههههه
يالهووووووي... ايه اللي انت فكرتني بيه ده


miro el niro kwaniroooooo

MKSARAT - SAYED SAAD يقول...

مش تبطل لعب في الشارع بقي :)
كون بخير

Tarkieb يقول...

س طول عمرها اسمها نطة الانجليز ولحد دلوقتى كدة ...معرفش ايه خمسة ميلم دي اول مرة اسمع عنها...اكيد اختلاف مناطق

لم احيا بعد يقول...

حلو كتير طريقة كتابتك يا فنااااااان
:D:D:D

محمد فاروق الشاذلى يقول...

الحمد لله إن عمرى ما لعبت اللعبة دى يا جوز بنتى، أنا كنت بحب قوى لعبة المنديل ... فاكرها؟؟؟

teetoo يقول...

احناديما ناخد اوحش حاجه من الغرب والاستعمار ونطبق علي بعض

Unknown يقول...

هههههههههههه دى حاجه تحنلها ,.... ارحم الشعب

Umzugsunternehmen Wien يقول...

???

Bauschuttentsorgung Wien يقول...

ههههههههههه
اسلوبكفى الوصف ظريف جدااااااا

Müllentsorgung يقول...

شكراً لكم ع الموضوعات المتنوعة ... موفقين :)

Transport Wien يقول...

الله يوفقكم..ع المجهود...:)

Umzug nach Luxemburg يقول...

الله يعينكم على المجهوووووووووووووود :)