!! .. عزيزتي هيفاء وهبي

قاعد باتفسح عالشبكه العونكبوتيه .. والاقي كل الاخبار بتؤكد ان هيفاء وهبي اتجوزت
!!!!!!!!
ازاي ؟؟؟
بتاع ايه ؟؟؟
!!! لأ طبعا .. دي اشاعه
!!! هيفاء وهبي اصلا مش ملك نفسها عشان تتجوز .. هيفاء وهبي ملك الشباب كلهم

.. وباعتباري شاب - سابقا - قررت ابعتلها جواب .. أشتفسر عن الموضوع ده
----
.. عزيزتي هيفاء وهبي
ايه بقى .. ها .. ايه ؟؟؟
ليه يعني ؟؟؟؟؟؟؟
ليه ياهيفا تكسري بقلبي وتتجوزي .. ليه !!؟؟؟
انا عارف ان قلبك كبير .. وكبير بطريقه مبالغ فيها كمان - قصدي قلبها والنعمه - ويشيل من الحبايب عشرطاشر مليون الف شاب .. لزومه ايه الجواز بقى !!!!!؟؟؟؟؟؟

ياهيفا ده ساعة ماشفتك اول مره في الكليب بتاع قالولي عنه كلام .. لما كنتي لابسه فستان لون جلد النمر .. ساعتها حبيت كل النمور .. مش النمور بس .. نمور وأسود .. وفهوده

ده انا حبيت السلعوة ياشيخه
!!!!!!!!!!!!!!!!!!!!!!!!!!!!!
بلاش دي .. فاكره اغنية اقول اهواك تتكابر .. لما كنتي لابسه فستان احمر وبتغني تحت المطره .. اهو من ساعتها وكل ما الدنيا تمطر اقوم نازل ماشي باهيم على وشي في الشوارع .. على امل اني اشوفك وانتي بتقولي .. جلبك تلج جلبي نار
!!!!!!!!!!!!!!!!!!!!!!!!!!!!!
عارفه ياهيفا .. ساعة لما عملتي اغنية رجب حوش صاحبك عني .. قطعت علاقتي بكل اللي اسمهم رجب .. لدرجة ان في واحد صاحبي اسمه تامر رجب لقاني مطنشه ومش باتصل بيه .. ولما كلمني بيفهم ايه الحوار .. قلتله شوف ابوك عمل ايه يا محترم
!!!!!!!!!!!!!!!!!!!!!!!!!!!!!
ولما غنيتي يا واد ياتقيل .. يالهوي .. انتي الوحيده اللي خليتيني اقول مش هعمل دايت وخليني تخين وتقيل زي مانا كده .. وفضلت آكل لغاية ماتقلت عالميزان بتاع البيت ومابقاش بيعرف يجيب وزني صح .. وبقيت باوزن بره
!!!!!!!!!!!!!!!!!!!!!!!!!!!!!
ولا لما حصل حوار الطياره اللي رشقت فيكي ودخلتي المستشفى ساعتها .. انتقلت للرفيق الاعلى .. ومارجعتش للحياه غير لما الكليب بتاعك نزل
!!!!!!!!!!!!!!!!!!!!!!!!!!!!!!
يا هيفا انا من ساعة اغنية بوس الواوا وانا ماشي في الشارع باشوف أي حد متعور اجري ابوس واوته .. لدرجة اني فكرت اتطوع في أي مستشفى وابقى في الاستقبال عشان ابوس واوات كتير .. وبالرغم من اني مش فاهم يعني ايه ليك الواوا .. بس أي واوا كانت بتقابلني كنت باليكها وش
!!!!!!!!!!!!!!!!!!!!!!!!!!!!!!!

وبعدين انا راضي ذمتك .. أنهي الاحسن .. تبقي مسز ابو هشيمه .. ولا مسز سوووو !!؟؟؟
... طب ده حتى اسم ابو هشيمه عامل زي ابو سريع .. ابو دومه .. انما سوووو
!!!! ده الدلع سوووو .. الوظوظه سوووو .. الرقه سوووو .. ماعرفش رقة ازاي بكرشي ده بس رقه

!!!!!! ومين اصلا ابو هشيمه ده اللي تتجوزيه .. اللى ماعنده مدوّنه ولا سمعنا عنه في بلوجر حتى
!!!!!!!!!! ولا اكمنو شغال في حديد التسليح يبقى خلاص
طب مانا اصلا متخرج من قسم حديد في الكليه .. وكنت يوماتي باقرقش سيخين حديد على غيار الريق
واساسا بافكر استغنى عن شغل الحديد في التسليح .. وهلجأ للطبيعه وهسلّح بزعازيع القصب
وهعمل امبراطورية زعازيع .. لن يستطيع احد زعزتها
!!!!!!!!!!!!!!!!!!!!!!!!!!!!
وايه الفرح ابو تسعه مليون زورار ده .. اهو الريس طلع في التلفزيون وقعد يقول ان جوزك من رجال الاعمال المستفزين اللي بيغيظو العالم الغلابه .. أي نعم مصاريف موكب الريس والحراسه الخاصه بيه في الشهر .. اكتر من التسعه مليون زورار بتوع فرحك .. بس ده الريس .. ودي مصاريف شهر بحالو .. مش يوم
!!!!!!!!!!!!!!!!!!!!!!!!
وبعدين انتي مابتفكريش لقدام ياهيفا .. آه والله .. بالك لو كنت اتجوزتك .. كنت هعمل فرحك في مركز شباب عين الصيره .. واجيب المطرب ابراهيم عبرازق - بتاع اغنية أوعى الزغروف - يشدو بروائعة الفنيه في هاذوها الليله البهيه .. وكان هيبقى فرح على ابوه .. فرح تحكي وتتحاكى عنه الاجيال الغابره .. لكن هنقول ايه .. كل تفكيرك ورا
!!!!!!!!!!!!!!!!!!!!!!!!!!!!

واساسا اساسا بقى .. الجواز ده باطل .. ايوا باطل .. فرح ايه ده اللي مافيهوش ولا صورة ليكي وانتي بترقصي .. ولا حتى وانتي بترمي حزمة البصل على صاحباتك !!!؟؟؟؟
!!! ايوه باطل .. لأن ماحصلش الإشهار الأعلامي للحدث

.. وبالتالي باطل .. ومش بعيد كمان كام يوم اعمل جروب عالفيس بؤ اسمّيه

!! جواز هيفا من ابو هشيمه باطل .. بااااطل

.. وهنشر صورتك معايا .. وبالتالي هعمل الاشهار الاعلامي وتبقي مراتي فعلا

قولي بقى انك مش فاكره صورتنا مع بعض .. صورة فرحنا يابت .. مش فاكراها ولا ايه !!؟؟

.. طيب .. أهي ياستي

!!!!! قولي بقى اني عاملها فوتوشوبش .. ماهو انتو أي حاجه تقولو فوتوشوبش وخيال علمي
بلاش الصورة دي .. الكليبات بتاعتك اللي عندي عالجهاز .. واللي موجودين في فولدر اسمه المودام .. دول برضه خيال علمي ؟؟؟؟؟

طب عليّ الطبيخ بالطماطم .. ويمين معصّج باللحمه المفرومه .. إن ما ارتجعتي ياهيفا عن اللي عملتيه .. هنقل كليباتك للفولدر بتاع حريمي القديمه .. وتبقي مع اخواتك .. نانسي عجرم ومنى زكي وحلا شيحه و.. وسنيّه لاكيه
مين سنيّه لاكيه اللي عندي عالكومبوتر دي !!!!!؟؟؟؟؟

وأخيرا .. نصيحتي ليكي يابنت الحلال .. اطلبي الطلاق للضرضره
بس ياخوفي .. ابو هشيمه يظرفك سيخين تلاته .. ويقولك ده المؤخر
!!!!!!

ملحوظه

.. انا استعرت صورة عم فوزي بتاع موضوع كلنا فوزي وحطيته مع هيفا

!!! لأنه زي ماعبّر عننا احنا ولود فوزي .. هيعبر عننا احسن تعبير .. بس مع هيفاء وهبي

سوووو

!!! فوبيا الكنيف

مقبض باب الحمام بيعلق .. ونتيجة لأنه بيعلق وممكن يقفل على اللي جوا الحمام .. قمت جايب نواية بلح وزانق بيها لسان الكالون عشان مايطلعش ويقفش لوحده .. وباكتفي وانا في الحمام باني اقفل الشنكل بس

الشقه اللي قاعد فيها بقى .. قدام الشقه اللي قاعد فيها ابويا .. بس الحائط الفاصل بين الشقتين شايلينه وعاملين الدور شقه واحده مش شقتين زي ماهو في باقي العمارة .. وبيني وبين الصالة اللي فيها التلفزيون واللي بيقعد فيها ابويا مشوار .. ولما بيحتاجني عشان اعمللو شاي ولا اجهزلو أكل بيديني رنه عالموبيل اقوم اروح اشوفو .. لدرجة اني حتى لو دخلت الحمام باخد معايا الموبيل .. الا المره دي .. دخلت الحمام ونسيت الموبيل في الاوضة .. والمقبض بتاع باب الحمام قفش والنواية اللي زانق بيها اللسان اتنطرت .. واللسان مسك في حلق الباب .. واتحبست جوا التالاويت

!!!!!!!

.. لألألأ .. مش انا اللي يحصل معايا الكلام ده .. انت اكيد بتهزر .. صح .. اصلو ماينفعش

طب والحل .. ده الموبيل في الاوضة .. ولو قعدت انادي من هنا لغاية اسبوع قدام .. ابويا مش هيسمع .. وحتى لو سمعني هيعمل نفسه مش سامع عشان يخلص مني .. مانا عارف ابويا بيعزني بطريقه يالهوووي

لأ بجد بقى ايه .. انا هفضل كده كتير ولا ايه .. طب انادي من الشباك بتاع المنور ولا من البلكونه بتاعة المنشر على أي حد .. آه .. انا هعمل كده .. ماهو مافيش حل تاني

ساعه ونص من النداء المتواصل .. إن حد يسمعني .. ابدا .. لا البواب ولا مراته ولا القطيع اللي مخلفه .. وعلى حظي الاسود مافيش حد في العمارة ناشر حاجه في البلكونات اللي تحتنا .. يعني احتمالية ان حد يفتح باب البلكونه بتاعة الحمام مستحيله .. أصل مافيش حد هيفكر انه يقعد يستجم ويشربلو حاجه مثلا في البلكونة بتاعة الحمام .. تقريبا انا الوحيد اللي باشرب نيسكافيه في الحمام
!!!!!

طب وبعدين ياجرعان .. القعدة طالت وانا ابتديت اجوع .. والله لو اعرف اني هتحبس ماكنتش عملت إإح وفضّيت بطني من الاكل اللي كنت واكلو .. وبالتالي ماكنتش هدخل الحمام اصلا يعني

طب ماهي البلكونه بتاعة الحمام فيها شوال بصل .. وكام ربطة توم متعلقين عالحيطه .. بس ايه ده .. هاكل بصل وتوم من غير ما ابلّع بـ بيبس .. لأ .. الحوار ده فاكس

يا أحمد رد علينا .. رد يا أحمد عالجوّال "

هااااع

يا أحمد عايزين نسأل عنك وعن باجي الأحوال

هااااااع

يا أحمد رد علينا .. بجى ماترد على الجوّال

هااااع

جوّالك بيجول بُرُرُرُم بُرُرُرُم .. رد يا أحمد عاد

ماترد يا أحمد عااااااااد

" هاااااااع

ايه ده .. دي رنة الموبيل اللي انا عاملها لجروب المدونين .. قشطه .. كده المدونين لما هيتصلو ويلاقوني اختفيت هيقلبو الدنيا .. مش بعيد يعملو مظاهرات ووقفات تضامنيه وشغل بانرات وحاجه ايييييييه

وطبعا الصباغ مش هيتوصى .. هيطلّع الصور اللي ماسكها عليا وانا باكل ويستعطف الناس ويقول اني كنت باكل كالحمل البريء .. ايوه كالحمل البريء .. بس بريئ من دم ابن يعقوب
و عبد الرحمن فارس هو راخر لن ينأى عن الموضوع - سمعت الجمله دي منه وعجبتني .. بس مش فاهمها - ولن يتخلى عني .. وهيقعد كل شوية يكتب كلام عالفيس بؤ عني وعن اختفائي المريب
و نواره نجم لو ماعملتليش تلات اربع تسع عشرين موضوع هزعل قوي منها .. آه
واخواننا المدونين والغير مدونين اللي عملو مواضيع واعتصامات ساعة محمد عادل دول برضه لو ما عملوليش زيطه وزمبليطه هقفش عليهم .. وبعدين انا مش اقل وطنيه منه .. هو اتمسك عشان متصور بكلاشينكوف .. وانا متصور بشندوشت كبده .. وكل واحد واسلوبه في النضال

!!!!!

بس ايه ده .. لو عملو مظاهرات والحكايه كبرت بجد .. وبعدين الحكومه ولا امن الدولة جولي البيت ولقوني في الحمام .. هيبقى منظري ايه قدام الرأي العام .. اخواننا المناضلين بتوع سكسه ابريل هيقولو علي ايه .. يعني بدل ما يقولولي كفاره .. هيقولولي شفاكم الله وعفاكم !!؟؟؟

ويالهوي لو أي برنامج معارضه في قناة زي الجزيرة استضافني .. هيقولو ايه وهقولهم ايه ؟؟؟

المذيع : أخ سوووو لو سمحت اوصف لنا شعورك عندما تم احتجازك في المرحاض

.. سوووو : - متلجلجا - انا بحب مصر .. وزي أي انسان حبيت اعبّر عن حبي لمصر

المذيع : - مقاطعا - هل تمت معاملتك بطريقة غير آدميه في الكنيف ؟؟؟

سوووو : لأ الحقيقه الاخوه الشياطين اللي معايا في الحمام عاملوني أحسن معامله .. والحمدلله مافيش حد استخدم عصاية الفوّاطه بأي شكل
!!!!!!!

ايه ده صحيح .. هو انا مش في الحمام اللي هو بيت الشيطان .. امال ابن الصرمه ما جاش يضايفني ليه .. ولا هو قفش اكمني اول ما دخلت قلت اللهم اني اعوذ بك من الخبث والخبائث !!؟؟؟

ده شيطان نتن قوي .. مع اني كنت باعطف عليه ساعات وما اسميش بالله قبل ما اجي اكل .. لكن وديني من هنا ورايح هقول بسم الله .. ويانا يانت ياشيطان الكلب .. ان ماخليتك تخس وتبقى في رفع الريشه .. ما ابقاش سوووو

!!!!

ياجرعان القعدة طالت .. واللي اتصل ده شكلو كان بيديني ميسد مش بيتصل

.. طب والحل

.. افرجها من عندك يارب

.. يارب انت عارف اني بحاول اصلّح من نفسي

.. انا عارف اني مقصّر في حقك وفي حق عبادتك

.. يارب .. يارب .. مش عارف اقول ايه

بس انت عارف باللي جوايا

..............

........................

................... ......... ............ ... ..............

..............................................................................................

......

.

صوت اسماعين البواب : يا باشمهندس .. ياباشمهندس

سوووو : - مستغيثا - ايوه يا اسماعين .. ايوه .. انا في الحمااااااام والباب اتقفل واتحبست

- صوت اسماعين : - صمت

سوووو : - مستغيثا - اسماعيييين

- صوت اسماعين : - صمت بزياده

سوووو : - مستغيثا قوي جدا - يا اسماعيييييييييييييييييييييييييييييييييييييييييييييييييييييي

ييييييييييييييييييييييييييييييييييييييييييييييييييييييييييييي - باخد نَفَسي - ييييييييييييييييييييييييييي

ييييييييييييييييييييييييييييييييييييي - باخد نفسي برضك - ييييييييييييييييييييييييييييييييييييييييييييييي

ييييييييييييييييييييييييييييييييييييييييييييييييييييييييييييييي - ابقو فكروني أبطّل سجاير - يييييين

صوت اسماعين : انت فين يا باشمهندس ؟؟

سوووو : - متفائلا - في الحمام .. في الحمام يابن الجزمه .. بقولك محبووووووووس

صوت اسماعين : طب وايه اللي حبسك طيب !!!!!!!!!؟؟؟؟؟؟؟؟؟؟؟؟

سوووو : غور يا اسماعين .. غور .. مش ناقصه هطل هي اصلها

صوت اسماعين : طب الحاج كان عايزك .. اقولو ايه ؟؟؟

سوووو : - ببرود مصطنع - هممم .. قوللو ابنك محبوس في الحمام يا حاج .. لكن لما هيطلع ان شاء الله .. العمارة هتتسرق .. عشان البواب هيتقتل في ظروف غامضه

صوت اسماعين : هاا !!!!!؟؟؟؟!!!!؟؟؟؟؟؟

------

وبعد محاولات مستميته .. كادت ان تطلع روحي فيها .. وكادت أن تُزهق روح اسماعين البواب فيها بعد خروجي من التالاويت .. خرجت والحمدلله

-

.. ملحوظه .. عالريحه

-

.. انا حاسس اني جاتلي فوبيا الكنيف

.. وناوي ان شاء الله اشيل باب الحمام واحط مكانه ستارة زي ماهو معمول في القهاوي البلدي

!!! ولو حد جه يخش الحمام لازم يسقف .. وساعتها هاقول .. إحم

سوووو

!! كـُرسي .. خشب

إتخانقو عشاني كتير
سلطان و ملك و وزير
.. مع ان الأصل في صُنعي
نجار غلبان .. وفقير


ملحوظة

.. الصورة ملطوشه من الصباغ .. وانا استأذنتو اني هسرقها
وكافة الحقوق ألأدبيه والفنية والمادية التي له بخصوص هذوها الصورة .. راحت خلاص
!!! طبعا .. مش استأذنته لما سرقت الصورة .. يبقى حلال الله اكبر

سوووو

!! شقتين .. فول

طلبت معايا اجيبلي شقتين فول بالزيت الحار من عالعربيه اللي في اول الشارع عندنا .. والراجل بصراحه وضبهم توضيبه صح .. يعني حط شطه ولمون وظبط الأناني .. مش كده وبس .. لأ .. ده لف الشقتين في صفحة من جرنان الاهرام عشان وانا باكل اقرى واتسلى
وفعلا .. طلعت عالقهوة وفتحت ورقة الجرنان عشان آكل وبالمره اشوف فيها ايه .. لقيتها بتاريخ حداشر فبراير الفين وتسعه .. قلت فل قوي .. يعني مش قديم قوي يعني .. واكتشفت ان جرنان الاهرام تقريبا تحول لجريده ساخرة من كمية الأخبار اللي فيه

.. أول خبر بعنوان
!!! تنظيم القاعدة يعلن جهاد الغابات في استراليا

الخبر بيقول بالمختصر كده .. ان في غابات بتتحرق في استراليا .. وده عامللهم قلق .. قامو قالو ان اللي بيعمل كده هم تنظيم القاعدة .. وان شبكة فوكس الاخبارية بتقول ان في بيان منشور من ابو مصعب السوري بيحث فيه المسلمين على اضرام النار في غابات استراليا وأوروبا وامريكيا
وقال جاريت برشمان وهو خبير متخصص في تنظيم القاعدة .. إن لحرائق الغابات تسلسل يتسق مع نمط الحوارات في منتديات القاعدة
!!!!
!!!!! يعني هي القاعدة لو فعلا وصلت استراليا .. هتسيب استراليا كلها وتروح تولّع غابات
ولا هم فاكرينهم عشان تنظيم قاعدة .. يبقى كانو قاعدين قاعدة حلوة .. ومولّعين ولعة وبيشربو شيشة وجوزة .. وهوب الولعة مسكت في السجر يا وهيبة
وبعدين هل ابو مصعب السوري .. يقرب لابو مازن السوري .. بتاع الشاورما !!!!؟؟
----
تاني خبر بقى .. واللي تحت الخبر الأولاني اللي لسه قاريه
!! وظيفة للسائق الأمين .. لكن مؤقتة

والحكاية باختصار ان في واحد شغال سواق .. سافر موسم الحج اللي فات عشان يشتغل برضه سواق في نقل الحجاج وكده .. ولقى في الاتوبيس اللي هو شغال عليه هناك شنطة فيها مايعادل مليون وستمية ألف جنية .. قام مسلمها للقيادات السعودية وقالوله الف شكر يا مان ونخدمك يوم طهورك
رجع مصر والموضوع اتعرف .. قامت وزيرة القوى العاملة قابلته واتكلمت معاه .. والراجل يا عيني قاللها انا عايز اشتغل عشان مش شغال وعايز امي تحج بيت ربنا .. قالتله حاضر وهكلملك المسئولين
الاهرام بقى نشرت الخبر ده من كام يوم - ده على حسب ما قالو في الخبر - وبتقول يعني حد يعمل حاجه يابني آدمين .. قام جه المهندس علي ماهر غنيم رئيس مجلس ادارة شركة الدلتا للأسمدة والصناعات الكيماوية بطلخا .. وقال الشاي ده عندي يارجالة .. وراح معين السواق في الشركة عنده .. بمرتب ماحدش يحلم بيه .. مرتب انما ايه .. ميتين وتمانين جنيه .. شاملة البدلات والعلاوات .. لأ وايه .. ده مش تعيين تعيين .. ده عقد مؤقت لمدة ست شهور فقط
!!!!
في اعتقادي بقى .. ان الباشمهندس علي ماهر غنيم رئيس الشركة دي .. حسبها بشكل منطقي .. قال انا مهما عملت ومهما سويت مش هيطلع اسمي في الاهرام .. اقوم انا اعمل اني راجل بتاع واجب .. واقول اني عندي استعداد اعيّن السواق ده عندي لمدة ست شهور بمرتب ميتين وتمانين جنيه في الشهر .. يعني الفترة اللي هيشتغل عندي هياخد مني الف وستمية وتمانين جنيه
يابلاش والله .. اعلان في جرنان الاهرام وبالمبلغ ده !!!؟؟
!!! وكتاب الله ابقى عيل لو شفت نص جنيه مرمي في الشارع .. واديته للمسئولين
----
تالت خبر .. وده تحت الخبرين اللي فاتو دول .. عنوانه ايه بقى
!! ألفين وخمسمائة يورو لكل ألماني .. لشراء سيارة جديدة

والخبر بيقول ان الحكومة الجرمانيه .. عشان تنشط سوق العربيات اللي واقع عندهم وفي العالم كللو - ماعدا مصر طبعا – قامو قالو هيدو الفين وخمسمية يورو لكل واحد عشان يجيب عربية جديدة .. قصاد انه لو معاه عربيه قديمة - فات على تصنيعها تسع سنين أو أكتر – يوديها لمقلب نفايات السيارات
وبالحركة دي يبقو بيشجعو الاستثمار وبيشجعو الشعب عشان يشتري عربيات .. وكمان بيحافظو على البيئة عشان العربيات الجديدة قال ايه .. مزودة بفلاتر لترشيح غاز ثاني اكسيد الكربون – ايشي خيال يا ناس – مع اننا هنا اصلا لو مافيش غاز ثاني اكسيد الكربون .. بنروح للميكانيكي نقوللو حط شوية ثاني اكسيد الكربون .. واتوصى بالكربون الله يكرمك
!!!!
واللي باتخيله انه هيطلع خمسين مستشمر من بتوع وكالة البلح والتوفيقية عشان يجيبو العربيات اللي هتروح مقلب نفايات السيارات .. ويفككوها قطع غيار ويرجعو يبيوعهالنا
!!! والاسم .. دي مستورده من جرمانيا يا هندزا
-----
!!!!!!!!!!!!!!!!!
.. ايه ده .. شقتين الفول خلصو وانا لسه جعان .. الجرنان ده مغشوش .. عشان لو جرنان صح
!!! كان الحبر اللي فيه واللي لحوس الشقتين .. يخليني اشبع

.. ملحوظه

.. نفس العدد ده من جرنان الاهرام هو اللي كان فيه الخبر بتاع سفاح المعادي
.. لما وزير الداخليه قال انهم كانو مجندين خمسين مزه للقبض عالسفاح
!!! مش بقولكم الاهرام هيقلب جريدة ساخرة

سوووو

!! بحبك يا حمار

قاعد ولا بي ولا علي .. والاقي باراكودا - بنت لبنانيه بتتابعني من المدونة – باعتالي ايميل فيه خبر عجيب .. ولما قلتلها انا عايز اعرف المصدر عشان بجد يعني لو الخبر ده صح .. دي تبقى قمة الكوميديا .. راحت باعتالي اللينك ده

قريت الخبر مره في التانيه .. وللأسف .. لقيت الخبر صح .. ومنشور في كذا مكان تاني

وهنا بقى لقيتني باوَنوِن .. يعني ايه اليابان عايزه حمير مصريه .. وهي حميرنا دي حاجه بالساهل كده أي دوله تطلبها نروح مدينها .. لأ بقى .. الحمار المصري مش للبيع يا ساده !!؟؟؟
اين انتم يا مصريين .. حميركم بتتباع عادي كده ولا الهوا .. دي مهزلة !!؟؟
!!!! يالَ وصمة العار .. يالَ خيبة الرجاء
هي ايه (يالَ) دي اصلا !!؟؟؟

اكتر حاجه بقى خلتني مش عارف اضحك ولا ابكي .. انهم مش لاقيين حمير كفاية .. ماهو احنا والحمدلله كلنا الحمير كلها خلاص .. وشوية الحمير اللي فاضلين واللي طالباهم اليابان .. دول هم إناث الحمير واللي بيستخدموهم الجزارين كـ وِلده .. يعني عشان يخلفو حمير تانيين ويدبوحهم وكده

الاكتر سخريه بقى .. وانا باقلب اشوف مين تاني بيستفيد من الحمار .. لقيت ان الصينين بياخدو دهن جلد الحمار ويعملوله معالجات طبيه ويصنعو منه حبوب زي الفياجرا .. ايوان .. الفياجرا الصيني مستمده من الحمير المصريه
!! يعني لو حد مننا جاب فياجرا صيني .. يبقى عارف انه هيبقى زي الحمار
ولأن الحمار المصري احسن حمار في العالم وده بكلام اليابانيين .. يبقى الفياجرا الصيني احسن من الفياجرا الامريكاني .. ودي نقطه في صالحنا احنا المصريين ولازم ونتفشخر بيها .. وبحميرنا

.. وبكده هنلاقي شوية مستجدات في الخريطه الحياتيه هتحصل .. زي ان الاعلانات هتبقى في سكة

شخص واحد : حمارك حصاوي ولا مستورد ؟؟؟
شخص اتنين : - وهو يبتسم بفخر واعتزاز - لا طبعا .. حماري مصري حصاوي
شخص واحد : ياريتني كنت سمعت كلامك .. وشجعت حمير بلدي – ينهار في البكاء
أغنية : يضحك علي مره .. قال ايه قال من بره .. اتدبس انا واجيب الحمار
ولا ليه ورقة صيانه .. ولا ورقة الضمانه .. ياريتني كنت جبت جولد حمار
صوت : اشتري حمارك من جولد حمار .. وهتبقى في السليم
---
اصوات في مظاهرة : الحماره اللي حيلتي باظت .. باظت .. باظت
شخص يجلس عالمقهى : مش كان احسنلو يجيب الحمار الجامبو
صوت حمار ضخم يمشي في الشارع : جامبو الجبار .. احسن حمار
---
تعلن مجموعة شركات الشهيق والنهيق عن توافر مجموعة حمير بلدي .. بسعر الجمله
الكميه محدوده .. سارعو بالحجز .. والأولوية لسابقي التنهيق
---
.. في رمضان بقى هنلاقي اعلانات الزكاة جايه في سكة
ساعد اسره فقدت عائلها .. وهاتلهم حماره عُشر .. تساعدهم على معايشهم
!! صورة الحماره وهي بتاكل برسيم
--------------------
واخواننا بتوع الفيس بوك .. هيسكتو .. لأ طبعا
.. هنلاقي جروب طالع اسمه
لا لبيع الحمار المصري لأعداء الوطن
.. وجروب تاني
!! حمار حصاوي .. وافتخر
.. وهيطلع جروب بالانجليزي
Save Our Donkeys
--------------------
.. وعناوين الجرايد الحكوميه هتبقى
الحكومة تدعم الحمير بسبعة مليار حزمة برسيم
!! استيراد العربجية لتربية الحمير المصرية .. تربيه زرايبي قويمه

.. وجرايد المعارضه هتقول
!! ظابط يعتدي على حمار ويتحبرش به جنسيا
ملف كامل : نواب الحمير .. هل هم امتداد لنواب القروض !!؟؟
--------------------
وشويه شويه .. هنلاقي زاهي حواس طالع يعلن عن كشف أثري ومقبرة حمار عنخ آمون .. والبرديات اللي لقوها بتؤكد انه الفراعين كانو بيتفائلو بالحمير .. بدليل حكاية الفلاح الفصيح لما الحمار بتاعه اتسرق .. ومش بعيد يكون اللي سرق حماره واحد صيني .. ماهو الصينين في مصر من ايام الفراعنه وبيبعو هاجات هلوة
!!! وتلاقيه سرق الحمار عشان متجوز بقالو تلات سنين .. ومش عارف يخلّف
--------------------
طبعا على قناة النيل الادبيه هيعملو ندوات على مسرحية الحمير لـ توفيق الحكيم .. وخمسين الف واحد هيعيدو دراستها وتفحيصها وتمحيصها واعادة نشرها
.. وهتتعمل مسلسل في رمضان وهتعمل بطولته واحده من الاتنين
ناديه الجندي .. او نبيله عبيد
.. وهيكون اسمه
أرجوك .. أعطني هذا الحمار
!!!!!
--------------------
.. وأساسي موضوع التعبير بتاع السنه دي في كل المراحل هيكون

تكلم عن الحمار المصري ودوره المؤثر على دول العالم في المستقبل .. موضحا دور الحكومة المصرية
!!!!
.. ولكنه بعد أن أكل آخر حزمة برسيم واشتد به الجوع .. تذكر طفولته عندما كان جحشا صغيرا
!!!! تكلم عن موضوع ينتهي بهذه الجمله


.. ملحوظة

.. بناءا على ماسبق .. هسرّب كل الخرفان اللي عالسطح ومالهاش لازمة
!!! ماهو الواحد لازم يواكب التكنولوجيا والتطور الطبيعي .. ويحب الحمير

سوووو

!! ظابط أمريكاوي

من قيمة شهرين تلاته اربعه .. جالنا واحد خواجه ومراته عايزين يأجرو شقة مفروشه عندنا .. والصراحه الراجل كان خواجه مُز مُز يعني .. حاجه كده طول بعرض وابيضاني وشعر اصفر وعين تِكني كلر ونضيف ومستحمّي حُمى رباني .. بس مراته ماكانتش على نفس درجة المزازه بتاعته .. وتقريبا من اثيوبيا او الصومال او حاجه افريقيه .. مش خواجاية المولد والاصل زي جوزها يعني
الراجل ده انجليزي .. وتحديدا من ايرلندا .. وجاي من بلده عشان منضم حديثا لقوات حفظ السلام هنا في مصر .. بعد ماكان في دارفور في السودان .. وكنت انا حلقة الوصل في التعامل مابينه وبين ابويا واشتغلتلهم مترجم .. بس المشكله ان الانجليزي بتاع الخواجه مش انجليزي امريكاني ولا حتى انجليزي انجليزي .. لأ .. ده انجليزي ايرلندي .. وتحس انه شوية حروف متعجنه في بعض
أي نعم في ناس معتقده اني مابفهمش في الجريجي .. بس هيهات .. ده انا الجريجي ذات نفسه .. مشكلتي اني باتكلم الجريجي القديم .. بتاع شكسبير وهاملت والناس الحلوة دي .. وهنا بتحصل الفجوة الحضارية مابين جريجي شكسبير .. وجريجي بنات اخويا

ام هند .. الراجل الخواجه ده كان في الأول شغال هنا في القاهرة في شوية حاجات إدارية .. وكنت باتواصل معاه ذهنيا وفكريا .. لأنه قرف من اللي بيحصل هنا في مصر .. وكنت باوضحلو ان مصر مش أي حاجه .. دي مصر كل حاجه .. دي مصر ام الدنيا اصلا
وقعدت فتره باتردد على الخواجه ده في بيته كل مايحب نتكلم شويه .. واقعد العب مع القطة اللي جايبينها من بلاد بره بباسبور .. وحاطين فيه صورة القطه وشعرها الابيض المنكوش .. ولابسه طوق شيك كده عليه رقم .. حتى القطط بتاعتهم مزز خواجاتي

وفي احدى قعداتي معاه .. قاللي انه مسافر سينا عشان ينضم للجبهة .. وماعرفش جبهة ايه .. بس هو قال كده وانا مش هكدّب واحد خواجه يعني .. وقال انه خايف من التعاملات مع الشعب المصري اللي هناك في سينا .. وانا قلتله ده المصريين مافيش زيهم .. ده المصريين حاجه كده زي البلسم .. ده المصريين احباب الله ياجرع
وقلتله برضه احتياطي كام كلمة بالبلدي كده عشان يقولهم لو احتاجلهم وقت الشده .. لكن هو كان خايف ان المصريين يكونو شايلين من الانجليز من ايام الحرب العالمية وايام الباب العالي والسلطان العثمانلي ومصطفى كامل واحمد عرابي وعاشور الناجي .. ولو اني ماعرفش أي علاقة عاشور الناجي بالحكم العثمانلي .. ومين عاشور الناجي ده اصلا .. وبعدين هو في حاجه اسمها سلطان عثمانلي أساسا !!!؟؟؟
قمت انا قلتله عالحل المفيد .. قلتله لو حد مصري من عامة الشعب كان هيخبط معاك في الكلام .. قوللو انا ظابط امريكاني .. في الاول الخواجه استغرب .. لكن وضحتلو ان دولة امريكيا ليها صيت هنا عن دولة انجليزيا .. وهو اقتنع بالحوار .. ووصاني اني اخد بالي لو مراته احتاجت حاجه واديتلها رقم موبيلي لو حصل أي طارئ .. واتجه الخواجه عالجبهة
والحقيقة مراته كنت بتتصل بي في اضيق الحدود وانا كنت بتعامل معاها على اعلى مستوى من الاحترام .. لدرجة اني كنت كل ما اجي اكلمها ابقى باصص على الارض .. مش عشان انا جنتل ولا بتاع .. بس عشان شكلها مش حلو اساسا .. وكنت على طول كل ما تجبرني الظروف اني انزل لها في شقتها سواءا ساعة تركيب فلتر الميه او تركيب وصلة الانترنت .. اقعد العب مع القطة بتاعتهم ام باسبور دي
وطالت غيبة اخونا الخواجه .. اسبوع .. عشر تيام .. اسبوعين .. ولا الهسس .. ومراته تتصل بارقام الناس اللي اداهملها وبرقم الجبهة شخصيا .. ولا عارفين حاجه من ساعة ماخد اجازته من اكتر من اسبوع .. خصوصا انه المفروض يقضي اسبوع في الجبهة .. واسبوع اجازة في القاهرة .. ولاجل الحق .. انا قلت تلاقي الخواجه شاف واحده خواجايه من بتوع أي دوله نضيفه عالجبهة .. وقال بلا مراتي بلا نيله .. بس ماقدرتش اقولها عالهاجس ده عشان مايحصلش حاجه .. ولا ماترضاش تخليني العب مع القطة ام باسبور
فين وفين .. جه الخواجه .. وانا نزلت عشان اخد منه الايجار وكمان اتطمن عليه .. ولقيته في حالة كده مش مظبوطه .. يعني كلامه معايا قليل .. وطول الفترة كنت باتكلم مع مراته وبالاعب القطه بتاعتهم - ام باسبور دي - وهو شارد البال وسرحان .. وبعد ما خدت الايجار واديتلهم ايصال بالمبلغ وجاي امشي .. لقيته بيقولي انه عايزني في كلمة على استنفصال كده .. قلتله ماشي .. طلع معايا على باب الشقه وهو على نفس حالة الشرود اللي عنده وقاللي
الخواجة : ليه ؟؟ - هو قالها بالجريجي يعني
سوووو : ليه ايه ياعمنا !!؟؟ - بنفس الجريجي برضك
الخواجه : ليه عملت كده؟؟؟؟
طبعا مع حالة التسهيم والشرود اللي هو فيها .. دماغي راحت وجات والشيطان لعب بيها كورة شراب .. وقعدت اقول في عقل بالي ايه اللي قلته غلط وضايقه .. ولا يكونش اسماعين البواب شتمه وقاللو اني انا اللي شاتمه .. بس اسماعين اساسا مابيعرفش يتكلم عربي عشان يكلمو بالجريجي .. المصيبه بقى يكون افتكرني انتهزت فرصة انه مسافر وكنت بالعب بديلي مع مراته ولا حاجه والعياذ بالله .. بس ازاي .. ده انا مُز عنها .. ومُز بمراحل كمان .. وبعدين الراجل ده من ايرلندا .. والايرلنديين زي الصعايده دماغهم مقفله ومابيفهموش وبيضربو بالنار وبعدين يسألو ايه الحوار بقى ؟؟؟ .. وفوق كل ده هو ظابط اصلا .. يعني على الاقل معاه طبنجة خواجاتي مش فرد حلوان اللي بيبقى مع ظباط مصر .. يانهار اسود .. طب مين اللي اشتغلو وقاللو الكلام ده .. وايه مصلحته .. وانا لو حبيت انكر هقول ايه .. وهستعين بشهادة مين .. أي نعم القطة ام باسبور كانت بتبقى معانا في قعداتي مع مراته .. بس القطه لو اتكلمت هتتكلم لغة قططي خواجاتي .. وانا آخري افهم قطط شوارع مصر
سوووو : - وانا في قمة حيرتي - تقصد ايه يا خواجه ؟؟؟؟؟؟
الخواجه : - وعينيه مغرورقه بالدموع - ليه قلتلي اقول اني ظابط امريكاني .. ليه !!؟؟؟

أن أن آآآآآآآآآآآآآآآآآآآآآآآآآن .. فسسسسسسس

وحكالي على اللي حصل .. انه وهو نازل مصر بعد ماخلص الاسبوع بتاعه عالجبهة .. شاف اتنين لابسين جلاليب وشكلهم بدو .. وقالوله شوية كلام مافهمهوش .. قام قاللهم وهو منفوخ - زي مانا وصيته - انا ظابط امريكاني
وعينكم ماتشوف الا النور .. الاتنين البدو بقدرة قادر بقو اتنين وعشرين .. سته واربعين .. سُبعمية وسفحطاشر .. زغابة ناس هجمو عليه .. وهوب راحو مغطيين دماغه بالحطه الفلسطيني وخطفوه .. وطلعو بيه عالصحرا .. وطلبت معاهم ياخدوه رهينة ويطلبو فديه .. وقعد الخواجه يزعق فيهم ويقولهم يا جماعة انا ولا امريكاني ولا بتاع .. لكن هم خلاص .. خواجه وقال امريكاني يبقى امريكاني .. هم الخواجات الامريكان هيكدبو يعني !!؟؟؟
فين وفين جه للعالم البدو واحد قريبهم متعلم في القاهرة .. وبيفهم انجليزي من اللي هو الايرلندي ده .. وبعد ما سمعه وشاف تحقيق الشخصية بتاعه .. اقنع الناس اللي خاطفينه انه مش امريكاني وانه ايرلندي .. قامو هم طبعا لأنهم مايعرفوش ان ايرلندا دي جزء من انجليزيا .. واعتقد انهم حتى لو كانو عارفين ماكانتش هتفرق معاهم في حاجه .. قامو اطلقو سراحه
الجميل بقى ان الخواجه لما بيسأل المترجم اللي حل الموضوع وحب يستفسر منه هم كانو عايزين ياخدو فدية كام .. قاللو مبلغ كبير قوي .. طماعين البدو دول .. طلبو مبلغ يالهوووووي
قالو عايزين مية الف جنيه
!!!!!!!!!!!!
نعم .. مين .. ايه !!؟؟؟
مية الف جنيه !!!!!!؟؟؟؟؟؟؟؟
انتو خاطفين سواق توك توك !!؟؟؟؟
!!! ايه شغل العصابات السكّه ده .. ماتطلبو مبلغ ليه لازمه
!! يعني انا لو مكانهم مثلا مثلا .. مش هطلب اقل من مية الف دولار .. ودولار استرليني كمان
اه .. مانا لازم انتهز الحاجات
----
طبعا الراجل الخواجه من بعدها بقى بيشوفني في مدخل العماره يعمل نفسه خواجه خواجه
ولا كأني موجود .. وحتى الايجار شكلو هيبعتو مع اسماعين البواب

!!! بس انا كان نفسي اعرف حاجه معينة قبل مايقطع معايا
القطة بتاعتهم .. مكتوب في الباسبور بتاعها جمب خانة المهنة إيه !!!؟؟؟؟؟؟؟

.. ملحوظة بتحديث

.. اللي جه في دماغي لما قلت للخواجه يقول لأي حد يقابلو انا ظابط امريكاوي
.. ان اسم امريكا اقوى من ايرلندا هنا .. والناس هتتعامل معاه بحذر وخوف
اذا كان كبير البلد كلها خاف من أمريكا وافرج عن ايمن نور لما أوباما قال انا مش مستعد يحصل أي تعاون مابيني وبين أي ديكتاتور
يبقى بالقياس .. الشعب المحكوم من الديكتاتور هو كمان هيخاف
.. بس تقريبا مافيش حد خايف من أمريكا
!! أو مش بنخاف غير من اللي حاكمنا .. بس بكرباج

سوووو

!! حكاية التلات بنات

.. في تحديث في آخر الموضوع
----------

.. كان ياما كان - من زمان ما سمعناش الكلمه دي والله - كان في تلات بنات
!! الأولانيه اسمها شحروره .. شايفين الأسماء
!! والتانيه بعروره .. شامّين الأسماء
!! وآخر العنقود بقى .. صرصوره
- هي الأسماء خلصت ولا ايه يا جرعان !!؟؟؟ -
.. مش مشكله .. في داهيه الأسماء .. نبقى نخليهم يغيرو اساميهم خالص
.. نخش على الكلام الكبير ... أوصافهم بقى
- ايوه كده .. خللي القعده تطرى شويه -
التلاته ما يتخيروش عن رجل معزه محروقه .. امها كانت بتتوحم في كلب .. مضروب بعربيه بيجو سبعة راكب .. بعد ما رشقت في اتوبيس نقل عام من ابو ربع جنيه
- !! يا نهار ازرققققق .. دي أشكال ضاله ضاله يعني -

التلات بنات كان عندهم مشكله .. كان نفسهم يصاحبو اي حد .. أي حد .. والله ما هينقو .. انشالله حتى يكون شهيد في الحرب المشهوره بين امبابه ودار السلام .. مش فارق معاهم
- !! بس اشووووفه .. اشووووفه -

في المدرسه .. كان كل صاحباتهم البنات .. لما بيشوفوهم هاللين عليهم .. يقومو يجرو زي مايكون في طاعون داخل .. لدرجة انهم لما كانو بيطلعو من المدرسه .. العيال اللي واقفين عشان يعاكسو البنات بمجرد يشوفوهم .. بيجرو على اقرب بوكس ويسلمو نفسهم
!! البنات كرهو التعليم خالص .. تقولش كانو فالحين فيه أصلا

.. وفعلا .. قعدو ملائكة شارلي في بيتهم
- !! ملائكة شارلي .. قول شياطين السبتيه .. عفاريت بولاق .. انما مش ملائكه خالص -

أمهم - والله صعبانه علي - كانت كل ماتشوفهم .. تقعد تندب حظها الهباب اللي رزقها بتلات حاجات شبه البنات .. ماهو دول مخلوقات خرافيه .. مش بنات خالص يا جرعان

ولما قررت امهم انها تجوزهم .. كان كل ما ييجي واحد .. ويبقى عايز يشوف العروسه .. ام البنات تقعد تقوللو
احنا بناتنا مايتكشفوش على راجل :
- !!! فعلا .. دول يتكشفو على عزرائيل -

!! وطبعا كل جوازه فاشله .. بتنتهي قبل ما تبدأ اصلا .. وده التطور الطبيعي للحاجه البايته

وفي يوم من ذات الأيام .. كانو البنات قاعدين بيقرو في الجرايد والمجلات .. وفجأه شحروره نطت في السما وهي فرحانه ومزقططه وبتقول
شحروره : أوه ماي جاد !!؟؟ - الله يرحم ابوها .. كان بيبيع بمب شُكك في العيد
بعروره : مالك يا شوشو .. في ايه ؟؟؟
صرصوره : لقيتي عرييييس ؟؟ - زمن المعجزات انتهى يا بنتي

.. قامت شحروره هانم قرتلهم الجرنان
يتشرف مستشفى الدكتور بهلول الاعرج .. بالاعلان عن حضور الدكتور فيسكو دي بيجامه خبير التجميل في جامعة استبحس .. وعلى من يرغب في الاستشاره ان يحضر للعنوان التالي

وعادييييييييييييكم على اللي حصل .. تنطيط وزغرته وشغل قرود .. وراحو العنوان بتاع المستشفى .. وحجزو .. واتحدد لهم يوم للاستشاره .. ورجعو بيتهم حرقو كل صورهم القديمه .. ماهو خلاص بقى مافيش داعي يفتكرو الماضي الغابر

وفي اليوم المحدد .. راحو المستشفى وكل واحده منهم معاها صوره كبيره .. دخلو على الدكتور اللي أول ما شافهم اتسرع
وطلعت صورة روبي - I WANT TO BE LIKE THIS : شحروره
وطلعت صورة نانسي عجرم - I WANT TO BE LIKE THIS : بعروره
خالتي هيفاء وهبي - I WANT TO BE LIKE THIS : صرصوره
!! وقعد يعيط - TO BE OR NOT TO BE .. THIS IS THE MOSIBA : الدكتور

.. دخلو غرفه العمليات .. وبعد عشر دقايق الدكتور طلع بره وهو شعره منكوش .. وبيقول
E7NA 3MALNA ELLY 3ALINA .. W ELBAKY 3ALA ALLAH !!
- !! الكلمه دي بياخدوها في سنه تالته طب هناك برضه -

.. وجه اليوم اللي المفروض يشيلو فيه الشاش من على وشهم
- موسيقى تصويريه -

جه الدكتور بطقم المساعدين والتليفزيون وكل البشر عشان يشوفو المعجزه .. وكل واحده من البنات البقر بتقول انا الاول .. لا انا الاول .. انا اللي قلتلكم يبقى انا الاول
!! من الآخر ... قلبوها حضانه
لكن عملو كلو باميه .. وجه الدور على بعروره

أول ما الدكتور شال الشاش .. شحروره راحت راقعه ضحكه جابت آخر شارع فيصل
!! بعروره كان نفسها تبقى هيفاء وهبي .. بس طلعت وهبي .. من غير مايجيب بنته معاه
- الأول -

.. جه الدور على صرصوره .. وأول ما الشاش اتشال .. بانت الحقيقه المرّه
!! عارفين قعر الحله اللي بيسخنو بيها الميه على سبرتايه .. لونه ابيض منها
- التاني -

و آخيرا جه الدور على شحروره .. اللي كان نفسها تخللي الدكتور يسيب الشاش على وشها مدى الحياه .. بس الدكتور قال يمكن تكون العمليه نجحت معاها .. و شال الشاش .. وجاتله حالة عته مغولي مع شلل رباعي مضاعف
!! شحروره بقت شبه كائن السندرليك الأسطوري .. والذي لم يشاهده بشر
- التالت -

.. وتوته توته .. خلصت الحدوته
.. آه صحيح .. نسيت اقول ان امهم عملت اعلان في الجرايد .. بتقول فيه
مطلوب عريس وسندفع له كافه المصاريف
+
بدل انتقال
+
بدل طبيعة مهنه ومخاطر
=
بدل ما بناتي يعنسوووووووووووووووووو

---
ملحوظة

الموضوع ده كتبته من اكتر من اربع سنين ونشرته في منتدى مصر اليوم .. وبعد كده اتسرق كزا مره .. وحقي الادبي ضاع لأن منتدى مصر اليوم وقع وكل الداتا اللي عليه راحت في الوبا

آه .. البت خيخه عامله حملة خيخية للتبرع بالدم .. يوم الجمعه الموافق سته مارس الفين وتسعة .. هنتجمع الساعه تسعه ونص الصبح قدام المصل واللقاح في العجوزة .. وان شاء الله رايح
.. ياريت كل الناس تيجي لأنه بجد هيكون يوم ظريف جدا جدا .. ان شاء الله يعني
.. ولو في حد مش هيقدر يتبرع بالدم مش مشكله
!!! ييجي ويشجعنا .. واحنا بيتمص دمنا

التحديث
--------
فوجئت بإن الموضوع ده تمت سرقته - ولله الحمد - من أحد اعضاء منتدى جامعة جنوب الوادي
ونسبه الى نفسه دون الاشاره من قريب او من بعيد لكاتب الموضوع .. وعادي خالص اهو
!! وسرق موضوع حكاية التلات بنات .. اللي اصلا اتسرق قبل كده
.. وسرقني هنا كمان .. يعني ده حد متابعني قوي
!! واستغرابي زاد لما لقيته من قنا
يعني المفروض صعيدي وبيفهم في الاصول .. المفروض يعني
عيب يابلدينا .. عيب .. انا صعيدي برضه ومايصحش تعمل كده
!! يعني الواحد يجيب ضرفها ويعتزل ويرتدي الحجاب .. مش فاهم بجد

سوووو