!! أكاديمية سوووو للهسس

كل ما اركب أي وسيلة مواصلات .. سواءا كانت أتوبيس عادي أو مكيّف من أبو من غير تكييف .. ألاقي إعلان عن سنتر لغات وكومبيوتر
!!!!!
أمشي في الشارع الاقي مكتوب إعلان عالعمارات .. عن مركز لتأهيل طلبة ثانوي لدخول الكليات العسكرية .. تحت إشراف الكابتن روبي , وما اعرفش ايه علاقة روبي بالكليات العسكرية .. ولما يكون مستقبل الكليات العسكرية في ايد روبي .. هيبقى مستقبل الداخلية في ايد مين !!؟
!!!!!
اقعد في محطة المترو الاقي شاشات العرض بدل ما كانت بتعرض اغاني هابطه - من اللي مابتتعرضش في أي حته - بتعرض إعلانات لمعاهد وجامعات خاصة
!!!!!
اهرب من المترو وافتح اي صفحة في اي جرنان - مُؤيد أو مُعارض - ألاقي الدنيا معاهد بمصروفات .. وكلها معتمدة من وزارة التعليم .. ومن النقابات .. ومن رئيس الجمهورية
!!!!!!
لدرجة اني سألت روحي وانا مستغرب .. هو الريس عمل زي نابليون لما ساب الحرب والمماليك وقعد يمضي على اطباق .. قام هو كمان ساب البلد واللي فيها وقعد يوافق على معاهد !!؟؟

اللي استفزني بقى مش كُتر المعاهد .. ماهو العلم نورون برضك .. واحنا في العصر النووي ومن مصلحتنا الناس كللها تنوّر من كتر العلام , اللي استفزني اني كنت ماشي في الشارع ولقيت كام عيّل عندهم بتاع عشر ولا حداشر سنه .. بيفرّقو ورق إعلانات , في الأول افتكرته إعلان عن شركة (تطهير حشرات) من اللي بيرشو جاز ويقولو الحشرات كده بَحّ .. وبمجرد ما يمشو تلاقي الحشرات طلعت مبسوطه وعامله دماغ وبتقول كمان .. وكأن بتوع التطهير دول كانو بيطاهرو الحشرات مش أكتر , لكن لما مسكت الورقة لقيتها إعلان عن معهد خاص بمصروفات
!!!!!!!
!!! يالهوي .. ده ناقص افتح حنفيه الشطاف الاقي واحد طالعلي من تحت بيكلمني عن معهد خاص

وبعدين ايه كمية المعاهد التجاري دي .. كللو بيدي بكالوريوس محاسبة وإدارة أعمال .. هو خريجين تجارة بتوع الجامعات الحكومية شغالين أصلا ؟؟؟؟

!! هنا بقى قررت اعمل اكاديمية خاصة تحمل اسمي .. ماهو انا مش اقل وطنيه من روبي لا مؤاخذه
!! قررت اني ما ابخلش على أي حد .. بأي معلومة .. من كنز المعلومات اللي عندي
.. قررت اعمل أكاديمية هدفها الاساسي هو التربح .. ماهو معلش مش هعملها لخدمة الوطن
!!! انا عايز اتجوز و اجيب موبيل ثري جي يا جرعان
!! قررت اساعد في تخدير الشباب .. على اعتبار انهم - والعياذ بالله - فايقين وبيفكرو في رفعة الوطن
!! قررت أعلّمهم الهلس والنبي يا احمد
وهي دي بداية .. أكاديمية سوووو للهسس
----------
.. أكاديمية سوووو للهسس
!! أول أكاديمية في مصر .. تستخدم مبدأ الصياعه هسس .. مش رمي إفيه
.. أكاديمية سوووو للهسس
!! أول أكاديمية في الشرق الأوسط .. والأيسر والأيمن .. والأعلى والأسفل
.. أكاديمية سوووو للهسس
!! أول أكاديمية في العالم .. تمنح درجة البكالوريوس والليسانس مع بعض .. دويتو
.. أكاديمية سوووو للهسس
!! المناهج في مستوى الطالب البلالا .. ونقبل التحويلات من كي جي تو .. وانت طالع
.. أكاديمية سوووو للهسس
!!!! متخصصون في الهسس والخيال العلمي .. والتصريحات الحكومية
.. أكاديمية سوووو للهسس
!! تدريب خاص للخريجين في قناة موجا كوميدي .. و تهييس دولسيكا
.. أكاديمية سوووو للهسس
!! المصاريف في المعقول .. على قد ماتدفع .. هتهيّس .. وكل ماتدفع أكتر .. هتهيّس أكتر وأكتر
.. أكاديمية سوووو للهسس
!! إعفاء تام من التجنيد .. لأننا هنعلمهم العبط .. وهياخدو شهادة معاملة أطفال
.. أكاديمية سوووو للهسس
!!! الشهادة معتمدة من مجلس الوزراء ومن الريس شخصيا .. الريس بيره طبعا
.. أكاديمية سوووو للهسس
!!! شعارنا .. هسهس هسهس في كل مكان .. صحرا ان كان أو بستان
.. أكاديمية سوووو للهسس
!!! كللو .. لازم ياخد فيها


ملحوظه

.. بعتذر لكل الناس اللي قالولي كل سنه وانت طيب بمناسبة عيد مولدي
واقوللهم ربنا يكرمكم ويسعدكم دنيا وآخره يارب
.. بس الحكاية اني سافرت الساحل الشمالي كام يوم اغيّر جو
.. وكنت في قمة سعادتي وانا قاعد - بكرشي - عالبحر او عالبيسين .. ومعايا كانز بيريل
.. وكل اللي كان يبص علي وعلى كرشي .. كنت اظغرلو بعيني وانا باخد بؤ بيريل .. وكأني بقول
!!! عُمر الكرش ما يعيب الراجل

سوووو

!! سينماتك .. ريـلودد

في تحديث في آخر الموضوع

وانا في سنة تانيه اعدادي كان عندي مدرس علوم اسمه ندا .. آه والله اسمه ندا .. مع انه مش ندا خالص .. ده المفروض يبقى براكين .. زوابيع .. زلازيل .. أي كارثة من الكواريث وخلاص , ده كان مربّي شنب قدّي على بعضي دلوقتي .. شنب شنب يعني , وياسلام على عصايته .. هي لوحدها كده كانت بتبث الرعب في قلوب الطلبه .. بل والمجرمين على حد السواس , أما أسلوبه في الضرب .. فحدّث ولا حرج .. لدرجة اني بعد ما شفت فيلم الكرنك .. ربطت بينه وبين فرج اللي كان بيغتصب سعاد حسني في الفيلم

الراجل ده كان مستقصدني .. مش مستقصدني لوحدي .. كان مستقصد كل الطلبه .. اللي مابياخدش درس عنده كان يهريه ضرب , وأتذكر على ما أتذكر انه في مره عمل امتحان شفوي مفاجئ .. و العيال اللي بياخدو عنده درس - كانو اربعه - ماحدش فيهم انضرب لأنهم كانو عارفين الإجابات .. باقي السبعين واحد اللي في الفصل - أو خمسه وستين مش فاكر - اتعبطو على الأظئوظه أو المؤخرة , والاربعه اللي بياخدو الدرس هم اللي كانو مسئولين عن تجهيزنا للعبط .. واحد يمسك إيد والتاني يمسك الإيد التانيه .. و واحد يمسك الرجلين .. والرابع بيصدّر الأظئوظه للي يقدّرها .. قصدي للمدرس
في اليوم ده رجعت البيت وقلتلهم عالحوار .. خصوصا اني ماكنتش عارف اقعد خالص والدنيا وحوحه يابن عمي , قامت امي - الله يرحمها - باعتبارها كانت مُدرّسه وليها في التربيه والتعليم .. أخدت على عاتقها انها تشرحلي العلوم .. وفعلا شرحتلي .. وياريته ما فعلا وياريتها ما شرحتلي , لأن ندا لما لقاني باجاوب استغرب قوي .. وبقى بيتعمد انه يسألني في حاجات تانيه خالص
!! ده سألني عن الجدول الدوري الحديث وانا في تانيه اعدادي ياجرعان

وبعد فترة ليست بالكتير .. لوحظ عليّ عدم القدره على القعود .. وعدم القدرة على الوقوف أيضًا - اصل بتاع المواد الاجتماعيه كان بيمدّنا على رجلينا - و قرر ابويا وامي انهم يدّوني دروس في المواد العنيفه
!!!! تقريبا خافو لا الأظئوظه تكبر أو رجلي تفلطح
وقد كان .. وبقيت باروح المدرسه تاني يوم بعد كل حصه خصوصي .. و انا عارف المدرسين هيسألو في إيه .. ومذاكر اللي هيسألوني فيه وحامي ضهري
-----
افتكرت الموقف ده لما لقيت ان في ناس كتير بتسأل هو انا ليه مابقتش اتكلم عن السينما في مدونة سينماتك .. خصوصا اننا في موسم صيف وكل يومين بينزل فيلم

وانا مديون للناس اللي سألوني دول بالتوضيح , الحكاية ومافيها اني من ساعة آخر موضوع هناك واللي كان فيلم الوعد .. جالي تعليق من شخص مجهول , وبالرغم من ان التعليق لم يكن من منطق النقد الإيجابي وكان من منطق التقليل من شأن اللي باكتبه .. لكن بجد باشكره .. لأنه نبّهني لحاجة غابت عني

نبهني اني بقيت باتقمّص شخصية الناقد .. بقيت باروح اتفرج على أي فيلم مش عشان استمتع بالفيلم .. لأ .. عشان اعمل موضوع عنه في سينماتك , وبكده ضاعت متعة الفرجه عالفيلم .. وضاعت كمان متعة الكلام عن حاجه باحبها

كأني كنت باذاكر عشان ندا - بتاع العلوم - أو سامي - بتاع المواد الاجتماعية - مايضربونيش
مش عشان عايز اذاكر وافهم .. والنجاح ده حاجة بتاعة ربنا

وبناءا عليه .. قررت اني اتكلم عن الفيلم اللي يعجبني قوي قوي قوي .. حتى لو كان فيلم قديم ومش معروض حاليا في السينما .. حتى لو كان فيلم روائي قصير اتفرجت عليه في مهرجان .. حتى لو كانت مسرحية كمان
!!! ولو اني ماعرفش ازاي مسرحية في سينماتك بس براحتي بقى

ملحوظه

في موضوع عن فيلم عين شمس في سينماتك دلوقتي .. والفيلم ده من أروع الأفلام اللي شفتها بجد .. بالرغم من انه ماخدش حقه عشان اتعرض في أول الموسم .. وبعديه على طول انفجرت ماسورة أفلام الصيف .. واتشال الفيلم واتحط مكانه عمر وسلمى الجزء التاني .. عودة الهُبل

آه .. ندا - بتاع العلوم - و سامي - بتاع المواد الاجتماعية - اتحوّلو للتحقيق بعد ما جه مفتشين من وزارة الداخليه .. قصدي وزارة التعليم , لأن المفتشين كانو بيسألونا واحنا ماكناش عارفين نجاوب , ماهو احنا مذاكرين اللي هيسأل العيال فيه ويضربهم لما مايعرفوش يجاوبو
!!! مش مذاكرين عشان - استغفر الله العظيم - نفهم

-----
فيلم عين شمس هيتعرض بكره الاربعاء ٢٩/٧/٢٠٠٩ في جمعية النقاد ٣٦ شارع شريف وسط البلد الساعة سبعه مساءًا

سوووو

!! زمبئني زمبأ

جاتلي من فتره ماشيز عالفيس بؤ فيها مشكلة أحد أعضاء جروب كلنا فوزي .. وبالرغم من اني شايف المشكله عاديه الى حد ما .. لكن استوقفتني جملة قالها صاحب المشكله لما قلتله يبعت المشكله بنفسه ويشوف رد فعل الناس .. قاللي ساعتها
ماهو انا خايف لو قلت المشكله دي بتاعتي .. الناس تتريأ عليّ وتقول المتزمبأ اهو :
!!!!!!!!!!!!
جملته دي على قد ماهي عبثية المنطق .. لكن للأسف فيها شيئ من الحقيقه
خاصة لما تيجي واحده من بنات ليلى وتقول مشكلتها .. الكل بيتعاطف معاها .. سواءا كانو ولاد او بنات .. ويمكن ده هو السبب في ان المرأه شايفه نفسها لسه ما اخدتش كافة حقوقها .. مع ان لا المرأه ولا الرجل واخد كافة حقوقه اساسا
.. وبعدين فيها ايه لما واحد يكون متزمبأ .. عادي جدًا
.. كللو ماشي في الشارع متزمبأ اصلا
!! ده لو الواحد فات عليه اسبوع من غير زمبئه .. بيقول في حاجه غلط
ومش بعيد من كتر ما ادمننا الزمبئه .. نبقى ماشيي في الشارع كل واحد ماسك ايده زي المدمنين ويقول لكل واحده تقابله .. ابوس ايدك زمبئيني زمبوء صغير
!!!!
لكن إن يجي راجل ويقول انه اتزمبأ ويعترف بالزمبئه .. أبدا
!!! عشان كنا رجاله ووقفنا وقفة رجاله
إن يجي راجل ويقول جهارا نهارا انه كان ضحيه لواحده .. ابدا
!!! عشان كنا رجاله ووقفنا وقفة رجاله
إن يجي واحد كان عايش قصة حب ومبهدل نفسه دباديب ويقول يا خسارة الدبابيب .. أبدا
!!! عشان كنا رجاله ووقفنا وقفة رجاله
.. مع ان الراجل بجد .. عادي جدا انه يتزمبأ
الراجل بجد .. هو الشجاع اللي يقول للناس كلها انه انسان
الراجل بجد .. هو اللي مايحبسش دموعه وقت ماتبقى عايزه تطلع
الراجل بجد .. هو اللي ممكن في لحظة ضعفه .. يقول انه محتاج طبطبه
ده الراجل اللي اعرفه
وعلى فكره
اللي شايف - أو شايفه - ان الراجل بقدرته على كتم مشاعره .. يبقى مالوش لازمه انه يعيش .. أو تعيش
.. لأن أساس الدنيا .. اننا نتسنّد على بعض وقت ضعفنا
مش نشمت من بعض .. أو نسخر من مشاعر بعض

ملحوظه

مش عايز حد من ولود فوزي يبعتلي مشكلته ويقوللي زيع يا استاذ ابراهيم خلّي الناس تضحك
.. وأساسا ماينفعش أحارب بنات ليلى لوحدي ولامؤاخذه
راعو اني شاب وخايف على منظري قدامهم على الاقل
!!!! مش ممكن يقولو عليّ إني مش راجل

سوووو

!! أخبار سوووويه .. بارت تو

أخبار محلية

بعد الدور المبارك العظيم لمصر في قمة الدول الثمانية .. وافق الكونجرس الأمريكاني على أن تكون المعونة الأمريكية لدولة مصر بمقدار مليار وثلاثة من عشرة من المليار دولار أمريكي , وصرّح مصدر مسئول بالحكومة المباركة بأنه قد صُرف فعليا أكثر من الثلاثة من عشرة على زيارة أوباما لمّا
.. نزل مصر , وعندما سأله المحرر عن ماذا سيُفعل بالمليار المتبقي .. أردف المصدر المسئول قائلا
!!! هنخلي أوباما يزرونا مرتين تلاته .. وبكده يبقى مالهمش حاجه عندنا
----
عقب الأحداث المتعلقة بمقتل المواطنة المصرية مروة الشربيني على يد مختل ألماني .. صرّح نفس المصدر المسئول بتاع الخبر اللي فوق وقال : اهو .. جبنا حاجه من عندنا .. ألمانيا بجلالة قدرها عندها مختلين .. عشان لما نقول اننا عندنا مختل عمل كذا ولا كذا .. يبقى تعرفو اننا بقينا دولة متقدمه , وبعدين علمك علمك علمك .. الحكومة المصرية مهتمه بحقوق المصريين في الخارج
!!! طب والمواطنين في الداخل .. مش كنت تبُص جوّه قبل ما تبُص بره يا حسب الله
----
هذا ولم يصرّح أي مسئول في أي حزب معارض - لا سيما الرئيس السابق لأحد أحزاب المعارضة - بأنه بصدد أن ينظم وقفة تضامنية على روح الشهيدة .. مثل الوقفة التضامنية التي نُطمت بمقر الحزب المعارض بميدان طلعت حرب .. وكانت حدادًا على روح الإيرانية ندا سلطان .. والتي تمت على أنغام الدي جي .. وهو يعزف أوبريت الحلم العربي
وماحدّش يستغرب ولا يقول إيه العلاقة بين إيران وبين الوطن العربي !!؟؟

أخبار رياضية

بعد صعود نادي الجونة من دوري المظاليم للدوري الممتاز .. أعرب مصدر في اتحاد الكرة عن قلقه من عدم قدرة نادي الجونة على اللعب في ملعبه الخاص .. وذلك لعدم الانتهاء من الأعمال التوسعيه .. ولكن إدارة النادي أعلنت أنه لو ماكانش الاستاد خلص .. يبقى اللاعيبه ساعتها ياخدو جولة سياحية
.. في الداون تاون أو تمر حنه .. ولو حبّو يروحو مارينا أبو تيج .. يبقى بيس يا مان
!!! ونتيجة الماتش ممكن تخلص في لعبة دارتس عالبار .. وخليك فريش احنا في رحلة
----
بعد أن ترددت اشاعات انتقال اللاعب محمد ابو تريكة لاعب النادي الأهلي المصري لنادي أهلي دبي .. واهو كللو أهلي , صرّح عمرو زكي لاعب الزمالك بأنه هو الآخر سوف ينتقل لأحد أندية الزمالك
.. المنتشرة في كل دول العالم , وعندما سأله المحرر هل للزمالك فروع أخرى .. أجاب بعصبية وقال
طبعا مش محتاج اقول ان الزمالك عندنا احنا وبس .. لأ .. أبسلوتلي .. الزمالك موجود في جميع دول
!!! العالم .. في العتبة .. ميدان عادين .. الديزة

أخبار فنية

صرّح أكثر من ممثل بأنه لن يحدث تداخل في الأحداث الدرامية في مسلسلات رمضان لهذا العام .. بعكس اللخبطه التي كان يشعر بها المشاهد في الأعوام السابقة , هذا وسيعرض في رمضان لهذا العام
.. مجموعة أعمال دراميه متميزه .. مثل
أدهم الشرقاوي , الأدهم , الأشرار , قاتل بلا أجر , أفراح إبليس , جنة إبليس , جنة ونار
العمدة هانم , هانم بنت الباشا
!!!
إذا كانت الأسماء لوحدها داخله ومتلخبطه في بعضها .. مش عايزيننا نتلخبط ازاي !!؟؟
----
أعلن الفنان الشعبي عباسط حموده بأنه سوف يقاضي عمرو دياب على وضع تاتو بإسم عبد الله على
.. كتفه في البوستر الخاص بآخر ألبوماته .. وعزز عباسط موقفه وقال لمحرر الخبر
الحكايه ومافيها ان أبويا كان بيتلخبط بيني وبين اخويا عبمجيد .. قام داققلي تاتوم عباسط .. وداققلو تاتوم عبمجيد ..عشان يعرف يفرّق بيننا لما يشوفنا يعني
.. وعندما سأله محرر الخبر هل لـ عبمجيد أي علاقة بالفن باعتباره اخوه التوأم .. قال مندهشا
!!! عبمجيد مش اخويا التوم .. ده أكبر مني باتناشر سنه بحالهم

أخبار صخصية

صرّح صاحب المدوّنه دي بخوفه أن يتم سرقته في الموضوع ده كما حصل معه هنا و هنا و هنا .. خاصة بعد أن نما الى علمه أنه هناك منتديات مقفوله لايمكن أن يعرف ماتحتوي عليه من مجرد
!! البحث عبر الجوجل .. وقرر أن يعمل كتاب يحمل اسم .. سرقوني وقفلو المنتديات
وفي حوار له مع المحرر .. اللي هو سوووو برضك يعني - الواد اتجنن وبيكلم روحه يا ولداه - قال
.. وهو يهرش في صلعته ويدخن لفافة الكولوباطرا
ساعات الاقي مواضيعي مسروقه
واشكي للناس ألاقيها محروقه ومبقوقه
.. من اللي سرقو عمرنا وأحلامنا
مع ان السرقه مننا فينا .. سارحه ومطلوقه

ملحوظة

لمعرفة أخبار سوووويه بارت وان .. كليك هنا يا برنز

سوووو

!! سوووو .. مليونيرًا

.. عليّ النعمة انت غبي .. وحمار
يابهيمة انا اصلا دلوقتي مهندس .. مش هستنى خماشر سنه
!!! وأساسا أساسا أساسا .. انا مجاوب عشان ابقى مليونير
----
كانت دي كلماتي اللي قلتها لما عملت أحد الكويزات المضروبه عالفيس بؤ .. والكويز ده بعلوان كيف ستكون بعد خماشر سنه .. وراح مطلّعلي النتيجه اني هابقى مهندس
!!!!
وبمجرد ما نزل الكويز عالبروفيل بالنتيجة بتاعته دي وبالتعليق اللي قلته .. لقيت محمد غاليه - اللي كنت فاكره صاحبي وحليب هارتي - واللي عامل مدونة اسمها هل تبحث عن السعادة .. بيعلق ويقول
.. ياعم أحمد زعلان ليه بس .. الراجل مش حاسس انك هتبقى مليونير بعد خمستاشر سنه :
يمكن بعد ميه وخمسين سنه

طبعا إستشطت غيظا وغضبا وكمدا منه .. ولو شفته ساعتها قدامي كنت هعضو .. ورحت قايل
!! كده برضك يا محمد .. كده :

.. وانا اللي قلت انت هتنصفني وتقول ان الكويز ده مضروب

وتعمللي حملة لجعلي مليونيرا في اقل من خماشر سنه .. عشان نقف قدام الكويز ده ونطلعو عبيط

!!؟؟!!

هنا بقى لقيت الرفيق احمد هيما صاحب مدونة انا محتاج براح .. فاجأني ومعلّق وقايل
على فكرة الكويز ده بقى مضروب :
وراح حاطط لينك غريب

.. وادخل عاللينك المحطوط .. الاقي جروب معمول بعلوان
من اجل جعل سوووو مليونيرا في اقل من خماشر سنه
.. ومكتوب تحت العلوان ده
دلوقتى يا جماعه سوووو دخل كويز علشان يطلع مليونير خلال خماشر سنه

الكويز قال ايه يطلعه مهندس

وهو اصلااااااااااااااا اصلاااااااااااا مهندس

كلنا ضد الكويز بقي وم الاخر
----
.. طبعا انا اتاخدت كده وقلت يالهوي دي مسئوليه .. اه طبعا
!! ماهو لما يتعمل جروب عشان ابقى مليونير .. دي حاجه كبيره يعني

وبناءا عليه .. قمت عملت لنفسي لقمة خفيفه عشان اعرف افكر كويس .. حاجه خفيفه واحنا أخر اليوم والفجر خلاص .. طبق شعرية اندومي وحتتين فراخ بانيه - حاجه خفيفه - وأكلتهم وانا باخطط ايه البورنامج بتاعي لما ابقى مليونير .. وازاي هقدر اقنع الناس انهم ينضنضمو للجروب .. وايه هي أهدافي من اني ابقى مليونير
.. أول حاجه .. لما هبقى مليونير ويبقى معايا قد خمسين ستين الف جنيه كده
.. هاهبأ على بلاد برّه .. اضرب بازبور واطفش
.. وأساسي يعني مش هعرف حد من اللي كنت اعرفهم زمان قبل ما ابقى مليونير
طبيعي .. واحد مليونير بقى .. لازم اتنطط عالناس .. وأول واحد هتنطط عليه هيكون الواد هيما اللي عمل الجروب ده عشان يشد من أزري
والناس اللي هينضنضمو للجروب طبعا في الاول هقوللهم انا منكم و ليكم يا جماعه .. اقفو جمب ابن منطقتكم .. جمب اللي زيّكم .. جمب اللي بيتشعبط في الاتوبيسات وبيتقطع منطلونه في الميكروباظات وبيتخنق زيكم من ريحة العرق في المترو
وساعتها ممكن الاقي واحد يروح طالع من وسط الحشود ويسألني ويقول
والفلوس دي يا سوووو .. ناوي تعمل بيها ايه !!؟؟؟ :
وانا اروح مطلع السبحه من جيبي .. واضرب زبيبة صلاه .. واقول وكلّي خشوع و تقوى
هعمل كباريه شرعي .. مش هيشتغل الكباريه ده بالليل .. ماهو حرام يبقى في ناس سهرانه وبتقوم :
الليل .. وانا اجيب مطربات ورقاصات .. حرام يعني
لأ .. الكباريه هيشتغل بالنهار .. والمغنيين مش هيغنو على معازف .. لأ .. هيغنو على الدُفّ والطبله .. والرقاصات مش هيغنو وهم بيرقصو لأن صوت المرأه عورة .. هيرقصو بس
كباريه شرعي ولا مش شرعي !!؟

بعدها ممكن الاقي واحد تاني طالع من وسط الجماهير وأعضاء الجروب ويقول
طب دلوقتي ياسوووو احنا هنلملك الملايين دي ازاي !!؟؟؟ :
هشيل السبحه والزبيبه واحطهم في جيبي احتياطي لوقت حوجه .. واتقمّص شخصية الخبير الاقتصادي .. والبس النضارة وانزلّها على مراخيري واقول بصوت أخنف
هنعمل مشروع بورصة المدونين .. مش قهوة البورصه بتاعة وسط البلد .. لأ .. بورصة للمشاركه :
في شراء أسهم المدونين .. يعني مثلا هنطرح المدوّن من دول في البورصة .. ولنفرض مثلا هنطرحني انا في البورصه .. ونعمل اكتتاب عام عليّ .. ونشوف عدد الناس اللي عايزه تشتريني أسهم .. ونحسب قيمة السهم .. ونوزع صكوك ملكية للأسهم دي عالمستثمرين .. نفس الحكاية على باقي المدونين
عملية تداول السهم بقى هتكون ظريفه قوي .. فرضنا مثلا انا عملت موضوع .. ساعتها قيمتي في البورصه هتعلي عشان عدد قراء الموضوع هيكون كتير نسبيا في أول الموضوع مانزل .. تقوم قيمة السهم بتاعي تزيد .. تقوم الناس بايعه سهمي في البورصة وهو غالي .. ويشترو سهم بتاع واحد تاني مثلا لسه ماعملش مواضيع جديده .. وبمجرد مايعمل موضوع جديد يروح سهمه يعلى وتزيد قيمته .. وهكذا دواليب
.. وأستطرد وانا متقمص شخصية محللين البورصة
طبعا في أسهم قيمتها عاليه ومش بترتبط بحوار المواضيع الجديده بتاعتهم .. زي نوّارة نجم مثلا :
ممكن تعمل تلات اربع مواضيع في اليوم .. الناس ساعتها مش هتبقى عارفه تبيع ولا تشتري ولا تعمل ايه في ليلتها
ولأنها هتكون بورصة جديدة ومش متجرّبه قبل كده .. هيبقى في نسبة خطأ قايمه على الاشاعات .. زي ان مثلا تطلع اشاعه ان أشرف توفيق أو غادة برايد هينزلو مواضيع جديده .. تقوم الناس هوب بايعه اللي معاها ومستنيه المواضيع اللي هتنزل .. وشيء وارد جدا ان ماينزلش اي مواضيع

بس ساعتها الخساره مش هتكون كبيره .. لأن اللي باع السهم ممكن يشتري سهم الصباغ - لأنه كده كده بيعملو نوت عالفيس بؤ وبيتشاف - أو سهم خيخة .. هو أي نعم سهم خيخي شويه .. بس مع مرور الزمن بيثبّت نفسه في السوق هو وسهم فاتيما
!! وبكده يبقى زيتنا في دقيقنا .. وهنيالك يا كاتب موضوع في بلوج سبوت
هيطلعلي واحد فانكي من اعضاء الجروب وهو ماسك بوب بانجو وبيقول وعينه مشبّره من كتر ضرب المخضروات
ياعم انا ماليش في الليلة بتاعة التدويم دي .. عايزين حاجه هلس ياعمنا :
هقلع نضارة المحلل الاقتصادي وامسك الجوزه واهوّي على حجر الحشيش واخدلي نفس واقوللو وانا مطلّع الدخان الازرق في عيني
هنعبي الهسس في قزايز .. آه امال .. هنجيب شوية عالم من بتوع الهسس .. ونخليهم يهسهسو في :
أي شقه مفروشه .. وناخد هسهستهم دي ونحطها في علب كانز أو قزايز .. الكانز لشغل التصدير .. والقزايز للهسس المحلّي , وعلمك علمك علمك .. مافيش حد هينافسنا في سوق الهسس .. ولا حتى الصين .. ليه بقى .. إكمني الهسس المصري مطلوب .. وإكمني الصين مالهاش في الهسس .. وحتى لو هسهسو .. هسسهم هتكون عينيه ضيّقه .. الناس مش هتشوفو .. ومش هياكل مع هسهسنا , واساسا الهسس الصيني أخره اسبوع ويضرب .. وتحتاس بيه ماتبقاش عارف تصللحو فين

ماهو مش هيبقى ليهم مراكز صيانه معتمدة يابرنز .. ماتجيب بوسه !!!؟
----
ظبطت المخطط في دماغي وحددت ايه اللي هيحصل في الجروب وكللو فل .. ولسه داخل عالفيس بؤ عشان اطبّق النظرية بتاعتي دي .. الاقي بيلا راحت كاتبه كومنت عالجروب وبتقول فيه
انا ضد الكويز من الاول وكنت باستغرب كمية الناس اللى بتعملها :

ياريت بقى تغير اسم الجروب وتخليه ضد الكويز المضروب .. علشان الناس تعرف الجروب عن ايه من عنوانه
.. و زيّ ما الرفيق احمد هيما فاجأني بالجروب اللي كان عاملو مخصوص عشاني

فاجأني أكتر ولقيته راح مغيّر اسم الجروب وخلاه
!! ضد الكويزات المضروبة
!!!!!!!!
.. صدمة .. نعم صدمة
.. صدمة إنهارت معها كل آمالي وطموحاتي بالثراء الفاحش السريع
.. صدمة جعلتني لا استطيع أن أضرب نص البطيخه بعد الأندومي والفراخ البانيه
!!!! ووجدت كل أحلامي تنهار معي .. مع انها أحلام مشروعه .. وحلال

ملحوظة

.. بالنسبة للناس اللي كانت بتسأل البورص فين .. البورص كان مستخبي في كيسة الكومبيوتر

.. عشان المروحه بتاعة البروسيسر ماكانتش شغالة والجو كان دافي وملائم ليه

.. ولما جيت أركب مروحة تانيه لقيته .. قمت ضاربه ضربة واحده جابت أجلو

.. وصورته وهو جثة هامده
!! لكن ماحبتش احطها عالمدونة خاصة انها تنتمي لصور الرعب

.. وبكده .. مافيش حد كسب الجايزه
.. واللي كانت عباره عن جثة البورص متحنطه ومحطوطه في ميداليه
!!! يلا .. مالكمش في الطيب نصيب

سوووو

!! وكان بورصا

نتيجة لظاهرة الحرّ الظريف .. بقيت باشغل التكييف بتاع الأوضة طول مانا في البيت .. وفي الفترة اللي باخرج فيها برّه البيت بافتح الشباك على مصراعيه عشان ريحة السجاير تخرج , وفي يوم من ظاط الايام راجع البيت ولسه بافتح النور في الأوضة .. واسمع تؤتؤتؤ .. أو صوت بورص يعني
.. وماعرفش ليه البورص بيعمل الصوت ده ومابيعملش صوت محترم زي باقي الحاجات
!!! يعني هاو هاو زي الكلاب .. ناو ناو زي القطط .. أو حتى باك باك زي البطيخ الشيليام
!! ام هند .. سمعت صوت البورص ده .. وقلت ماداهية يكون البورص دخل الأوضة
!! الله .. هو انا ليه موعود بالحركات الغريبه من الظواهر الطبيعية دي
!!!!! يعني مرّه دبّور غبي - راجع الموضوع داهوّن - ودلوقتي بورص
هو مافيش غير أوضتي انا في العمارة دي كلها ولا إيه ياجرعان !!!؟؟
!!!! ياشماته يوسف المصري فيّ

.. فلاش باك سريع
في أحد الجلسات المحترمه بين مجموعة الاصدقاء المناضلين على المقهى .. ظهر بورص مشاغب على قدم صديقنا المناضل يوسف المصري .. وما أن رأيتُ البورص حتى قلت - مداعبا - هوبَّز .. فتحرك البورص صاعدا على قدم يوسف بمقدار ثلاثة سنتيمترات .. فتعجبتُ للغاية .. وقلتُ هوبَّز مرّة أخرى .. فصعد البورص - ياسبحان الله - ثلاثة سنتيمترات أُخَر , فعرفت بنباهتي ان كلمة (هوبَّز) هي كلمة السر للبورص .. و أنه لو قالها أحد لأي بورص .. هيتحرك تلاته سنتيمتر على قدم يوسف .. حتى لو يوسف ماكانش موجود في اللقطه اساسا
طبعا على الهوبَّز العاشره كان البورص خلاص وصل عند بؤ يوسف وهيخش يريّح ساعتين تلاته , الغريب ان يوسف لما شافو اتنفض وقام مفزوع .. لدرجة ان البورص الغلبان وقع على الارض .. وتقريبا استخبى في أحد الشقوق والفلقات الحائطية - وليست البشريّة على ما أعتقد وأرجو - وساعتها يوسف زعل مني جدا وحلف انه هيّورّيني الأنضمون - اللي ماعرفش هو إيه - ولكن بغض النظر عن ماتوعدني به يوسف .. فقد عرفت ولله الحمد .. أن كلمة (هوبَّز) هي المفتاح السري لتحريك أي بورص
----
.. عودة للواقع المرير
بنظرة فاحصه ماحصة على أرجاء الغرفة .. ماعرفتش اعتر عالبورص .. وده شيء طبيعي .. لأن أوضتي عباره عن لوحه سورياليه تعبر عني كمهندس ديكور ينتمي للمدرسة الحلزونية الثانوية بنات
.. قلت بس انا هقول هوبَّز , اقول هوبَّز من هنا .. ولا الهوا .. هوبَّز .. فيش حاجه .. هوبَّز ياعم
سوووو : - مُحدّثاً نفسي - يمكن بورص مابيفهمش عربي .. ما داهية يكون بورص صيني ؟؟؟
.. وهنا لقيت في صوت داخلي .. بيتفاعل مع صوتي الداخلي .. برضك
سوووو النضيف : والله لو قعدت تقول هوبَّز من هنا لبكره .. انت مشكلتك في الأوضة بتاعتك
سوووو البوهيمي : ياسلام .. مالها بقى الأوضة بتاعتي ياعم النضيف !!؟؟
سوووو النضيف : عايز تعتر عالبورص .. نضّف الأوضة و رتبّها
!!!!! سوووو البوهيمي : - مستعجبا - لا ياشيخ .. أنضّف الأوضة .. وأرتبها
سوووو النضيف : أيوان
سوووو البوهيمي : أنضف الأوضه وأرتبها .. ازاي .. أذاكر وأنجح .. طب فرضنا نضّفت الأوضة ورتبتها والبورص ماطلعش .. هبدهلها تاني ازاي ؟؟؟
سوووو النضيف : - منفجرًا - وهو انت لازم تبقى حياتك خراب .. ماتحترم نفسك يا أخي شويه .. انت فاكر نفسك صُغيّر ياجرع .. ده انت خلاص فاضللك كام يوم وتبقى اتنين وتلاتين سنه .. مش كده يا اخي بقى .. عيب يعني .. عيب بجد .. عيب قوي .. ده انا بابقى مكسوف من نفسي قصاد الضماير النضيفه بتاعة صحابك
سوووو البوهيمي : - مندهشًا - ايه يانضيف مالك .. باداعبك ياعم .. ما اداعبكش يعني !!؟
!!! سوووو النضيف : - وهو على آخره - بقولك ايه .. ماتطلّعش زرابيني وتخليني أوّريك الأنضمون
سوووو البوهيمي : - مندهشا - أنضمون .. انت تعرف يوسف المصري !!؟؟؟
سوووو النضيف : - وعينيه بتطُق شرار - إنجز ياااااااااا

وطبعا .. انسقت وراء رغبة ضميري النضيف .. ليس خوفا من بطشه أو خشية من طلوع زرابينه .. والتي لا أعلم كينونتها لا هي ولا الأنضمون الى هذه اللحظه .. ومن أطلق عليهما هذا الاسم , ولكنني آثرت السلامة في النقاش .. كما أنني بقالي شهرين بادعبس على الصندل بتاعي اللي باحب البسو في الصيف ومش لاقيه .. إضافة على ان في تلات بوكسرات اختفو في ظروف غامضه .. وعدد اتنين تي شيرت راحو في الوبا .. و سِت كابات - لزوم مداراة القرعة وحفظها من أشعة الشمس - ضاعو بعد حرب اليمن .. والعديد من ولاعات السجاير والأشياء التي يصعب العثور عليها في وسط كومة الملابس الملقاة في كل ركن من أركان الغرفه

شغلت التكييف وشغلت الكومبوتر على اغنية انا مظلوم انا مظلوم انا مظلوم بتاعة الريس حُفني .. واشتغلي بذمة وضمير يا بت يا لواحظ , وجدير بالذكر .. أنني اكتشفت بلاوي .. بلاااااوي .. ده انا لقيت كارنية كلية تجارة بنها لما كنت فيها لمدة تمنتاشر دقيقة قبل ما اعيد ثانوي وادخل فنون تطبيقية .. والكارنيه ده يعود لسنة ألف تُسعمية سبعه وتسعين ميلادي , ولقيت اربع شرابات بصوابع كنت جبتهم زمان وضاعو في أدغال الغرفة .. لكن سبحان الله .. المال الحلال مايروحش .. أي نعم الشرابات اتاكلو من العِتّه والبراغيت .. واتحللو وبقو عبارة عن نسيج مهلهل .. بس برضك ماراحوش يعني

ومما أثار بداخلي حالة من الشجن والرومانسية المضمحلّه .. أنني وجدت شريطين لعبة أتاري .. واحد بتاع الطيارات اللي بتقعد تجري ورا الحمام عشان تصطاده .. ولما تخبط في زلمُكة الحمامه أو مؤخرتها .. تقعد الحمامه تصوّت وريشها بيقع , والتاني بتاع كورة التلج اللي بتدألج من على جبل تلج .. وكل ما تخبط في أحد المتزلجين بتكبر في الحجم وبيتحسب بونط .. لعب أثريّه أثريّه يعني

وأخيرا وبعد تلات ساعات من الترتيب المتواصل .. لم يتم العثور على البورص .. ولا على الصندل ولا على الولاعات .. لكن مش مشكلة .. ان شاء الله في الحملة التنضيفية اللي على ألفين واتناشر هنلاقيهم
.. لكن البورص .. لازم الاقيه .. لأني لو نمت من غير ما اعتر عليه
!!!! ممكن يعدّي عليّ وانا نايم .. اصحى الصبح الاقيني بُرعي

ومن هنا كان لازم استعين بصديق .. عنها ورحت متصل بالمفتش كورومبو .. وقلتلو أنا شاكك في تلات أماكن .. أول مكان هو الدولاب .. تاني مكان هو الكيسه او التاور بتاعة الكومبوتر .. وتالت مكان هو الكومودينو الشمال اللي مليان عينات رخام من أيام ماكنت باشتغل في شق التعبان زمان
.. وكانت دي الإجابات

الدولاب : طب انا راضي ذمتك يا كورومبو .. انا دولاب محترم .. جاي مع السرير والاتنين كومودينو بتوع الاوضة .. ليه بقى سوووو مابيعبرنيش ولا يحط الهدوم جوايا .. ها .. ليه , ياشيخ ده لما قرر انه يدهن الاوضة من سبع سنين .. دهن الاوضة كلها وكَسّل يدهن الجزء اللي ورايا في الحيطه .. واساسا اساسا بقى .. انا كنت فاضي قبل مايحط الهدوم جوايا بعد ما رتّب الأوضة .. بورص ايه اللي هيستخبى جوايا !!؟؟؟؟

الكيسه بتاعة الكومبوتر : هاتشي .. لا مؤاخذه يا كرومبو ياخويا .. بس انت شايف الدنيا كلها تراب والواحد عمّال يعطس كل شويه من كتر العَفَره .. ده حتى المروحة بتاعة البروسيسر بتشتغل بالعافيه من التراب اللي عليها .. وياما اتحايلت على سوووو انه يجيب بلاور ويُنفُخني شويه يُطرد التراب والأرواح الشريرة اللي جوايا .. لكن هو في البلاله اساسا , ياراجل ده انا بقيت مستوطن امراض والهارد مليان فايرس .. الاقيش معاك رامات تقوّيني شويه يا كورومبو !!!؟؟؟

الكومودينو الشمال : بص بقى .. انا قرفان من أُم العينات الرخام اللي عندي دي .. ياعمنا انا كومودينو .. والله العظيم كومودينو .. معمول عشان يتحط برطمان جيل من بتاع تثبيت الشعر والنسوان .. ولو اني عارف ان سوووو اقرع اساسا ومالوش في شغل التثبيت ..أو يتحط جوايا قزازة برفان .. يتريّح بيها الغادي والعادي .. انما انا مش كده يا كرومبو .. والله ماكده .. ده انا حاسس اني مرمي في الجبل ياجرع !!!؟
----
وطبعا كورومبو عرف البورص فين .. ياترى انتو كمان عرفتو !!؟؟؟
.. اللي يعرف الاجابه يتصل بينا على تليفون زيرو صُفرميه وصفرطاشر صفر وصفرين
!! وابقو قابلوني .. لو لقيتو البورص

.. ملحوظه
!! بعد ما الأوضة اترتبت وبقيت نضيفه .. حاسس بغربه وعندي أرق .. ومش جايلي نوم
آآآه .. هقول البورص كان فين الموضوع الجاي .. بس اتصلو برضك ونفّعونا

سوووو

!! باراك أوباما .. المصري

ركبت ميكروباظ صقر قريش من قدام محطة مترو المعادي عشان أروّح بيتنا .. وقبل الميكروباظ ما يتحرك راح شاب زنجر من اخواننا بتوع افريقيا راكب معانا وقعد جمبي .. واتحرك الميكروباظ ووصل ناحية مؤمن اللي في شارع اللاسلكي .. وهنا لقيت الواد الافريقي بيقوللي بلهجة متكسرة
هاسانين دسوكي .. فايدا كامل !!!؟؟؟؟ :
فهمت انه يقصد (حسنين دسوقي - فايده كامل) .. و دي منطقة تتوسط المعادي القديمة و دار السلام .. يعني باختصار مش ناحية المعادي الجديدة ولا شارع اللاسلكي ولا صقر قريش .. ولما قعدت اخبط معاه في الجريجي - راجع خبراتي في فك طلاسم اللغة الجريجي هنا و هنا - فهمت انه ركب ميكروباظ غلط .. والمفروض كان يركب ميكروباظ من الناحية التانيه للمترو مش من الناحية اللي انا ركبت منها .. وبالتالي بقيت مُجبر اني انزل معاه عند نقطة صقر قريش عشان ياخد ميكروباظ من الميكروباظات اللي طالعة فايده كامل .. وبعد مانزلنا قلت اتكلم معاه كنوع من أنواع كسر الملل لغاية ماتيجي عربيه تاخدو .. سألتو انت منين .. قاللي من كينيا .. رحت قايللو وانا مبتسم .. يعني انت بلديات أوباما .. قام ابتسم ابتسامة الواثق من نفسه يمشي ملكا .. وأسنانه نوّرت المنطقة اللي مافيهاش ولا فانوس شغال .. وأكّد على كلامي
!! هوب جه ميكروباظ فايده فايده فايده .. وقلتله يركبو ويغور من قدامي الساعه دي

وانا ماشي في الشارع بقى ومروّح بيتنا .. سرحت كده وتخيلت لو ابو باراك أوباما بدل ما كان ينزل على هونولولو - هاواي .. كان نزل على حسنين دسوقي - فايدة كامل .. أو عاصمة أفريقيا في المعادي .. ساعتها جه في دماغي كزا سيناريون لـ باراك اوباما جونيور

أول سيناريون .. لو أبوه كان اتجوز واحده من اخواتنا الافارقه اللي مالين المنطقة .. ساعتها الواد أوباما جونيور كان ممكن ينضم لقافلة نصابين أفريقيا والدولار الاسود .. اللي بيروحو للتجار ويقولولهم ان في شحنة دولارات والورق بتاعها مدهون اسود ومش باين ملامحه .. هتنزل مصر متهرّبه .. والمية ألف دولار هيتباعو بخمسين ألف جنيه مصري .. وعشان يصدقوهم التجار الطماعين .. يقومو العالم الزناجرة يجيبو دولارين تلاته مدهونين حبر أسود .. ويغطّسوهم في مادة مُذيبة تمسح اللون الأسود والدولار يبان .. يقوم ساعتها التاجر الطمّاع يقول آمين
وكنوع من الجدعنة الأفريقي .. يروح النصابين الأفارقة جايبين مع شنطة الدولارات السوده .. جركن فيه سائل مذيب للون الأسود - والله فيهم الخير - وياخدو الفلوس المصري وفي الخليعه .. ولما يحب الزبون يعمل نفس اللي عملوه اخواننا النصابين .. يتفاجأ بإن الورق اسود ولا هو دولارات ولا بطيخ

طبعا بعض التجار بيخافو يبلغو احسن يلبسو قضية إتجار في عملة .. والبعض التاني بيبلغ لكن ولا الهوا

.. أخرها بس انهم يحطو صورة أوباما ومكتوب تحتها

!!! ساعدنا في القبض على هذا الحَلَنجي
----
تاني سيناريون .. لو الواد أوباما جونيور وهو شباب لعب كورة في أي دورة رمضانية على صندوق بيبس وخرطوشة سجاير ماللبورو احمر .. وكان من وسط الجمهور سمسار لاعيّبه او مدرب فريق درجة تالته .. واكتشفو وشاف فيه امكانيات لاعب يصلح للدرجة الأولى زي الاهلي مثلا .. والامكانيات اللي باتكلم عنها انه - باعتباره أفريقي الأصل -هيستحمل شلاليت لاعبي الترسانه .. أو مش هيفهم شتيمة جمهور ولاعبي الزمالك .. أو على الاقل هيحوش الطوب اللي بيتحدف على اخواته لما يلعبو في استاد الاسماعيليه
ومش بعيد يشهر اسلامه ويبقى اسمه أحمد أوباما زي أحمد فيليكس بتاع الأهلي سابقا .. ويصاب بقطع في الرباط الصليبي مثلا ومايلاقيش نادي يشتريه غير الزمالك اللي يِتوِكِس بيه .. ويدور بعد كده على أندية الدرجة التانيه والتالته عايز يبيعه .. وبعدين يختفي في ظروف غامضه

!!! ويتضح انه في مركز شباب في الأقاليم بيدوّر على أي موهبة .. عشان يسترزق

----
تالت سيناريون .. لو ابو أوباما اتجوز واحده من اللي بيبيعو جرجير على فرشة في الشارع .. واتجوزها طمعا في الجرجير مش محبة يابو صلاح .. والوليّه اتجوزته من منطق ضِل راجل ولا ضل كشك سجاير .. وده مش أي راجل ولا أي ضِل .. ده الليل وآخره ياعم الحاج
طبعا الواد أوباما جونيور باديء ذي بدء مش هيبقى اسمه أوباما .. هيبقى سيد .. وابوه هيبقى بركه .. وهنلاقي سيد بركه ده بيقف قدام الجوامع يبيع مسك وعنبر وسيديهات دينية متسجلة في بير السلم .. وشوية بشوية يتحول سيد بركه البائع السريّح لشيخ معروف - من كتر الخطب اللي سمعها وهو واقف على فرشته برّه الجوامع - ويعمل سيديهات دينية في نفس بير السلم اللي متسجل فيه السيديهات بتاعة المشايخ السابق بيعهم .. قصدي ذكرهم .. والناس تتهافت عليه من كل صوب لما تسمع انه هيخطب في زاوية من الزوايا

.. ويدخل الشيخ سيد بركه ويقف على المنبر ويقول .. أسلامو آليكوم
!!!!!!! والناس بدون أي وعي ولا إدراك .. هتقطّع إيديها من كتر التسقيف

ملحوظه

.. في كل السيناريوهات دي .. ما جاش في دماغي ان اوباما ممكن - مثلا مثلا مثلا - يكون في يوم

رئيس جمهورية مصر العربية

-

سوووو