الأحد، 28 محرم، 1430 هـ

!! مُدَوّنة أوباما

صاحي الصبح كده وغزالتي رايقة شويه .. والاقي خبر في جرنان الأهرام بتاع يوم الأحد الموافق خمخه وعششين يناير .. في صفحة يوم جديد .. اللي هي الصفحه التانيه .. خبر تحت عنوان مدونة البيت الأبيض .. وفي الموضوع ده لقيت ان أوباما رئيس أمريكيا ناوي يعمل مدونة
!!!!!
.. هنا لقيتني بقى رحت سارح بالخيال
.. وتخيلت كده لو في يوم من ظاط الأيام .. لقيت تعليق جايلي

... باراك أوباما يقول

What news man ??
خبر ايه يا مان ؟؟
U have a lot didn’t come to me
بقالك كتير ما جتش عندي
Or u r cutting me ??
ولا تكونش مقاطعني ؟؟
I just wont u 2 know .. that u r the milk of my heart
انا بس كنت عايزك تعرف .. انك حليب هارتي
peace bananaaaaaa
سلامووووووز
----
وشطحت بخيالي أكتر .. وتخيلت ان أوباما جه معانا بؤجة الخير مثلا .. وطبعا ده مش هيبقى جايب هلاهيل زي اللي احنا بنودّيها .. لأ .. ده ممكن تبقى بؤجته بنطلونات ليفايس وكيلفن كلاين أمريكاني أمريكاني .. مش أمريكاني صيني من اللي بنجيبه متهرّب من ليبيا .. ولو جايب جزم ولا ترنجات تكون نايك وأديداس وريبوك
!! ومش بعيد يكون جايب بوكسرات دولشي آند جابانا وجوتشي

وتخيلت مثلا انه عامل موضوع عن العشوائيات اللي مبهدلة حيّ هارلم في محافظة شيكاغو .. ويبقى بيشتم في رئيس الحي وفي المحافظ ومقندل عيشتهم في الكونجرس
!! ومش بعيد يطالب بوجود محل ماكدونالدز وبرجر كنج وستار بكس .. لكل مواطن

او يبقى عامل حملة عشان الماريجوانا بتتباع رخيص في الويست كوست .. بينما في الإيست كوست غاليه جدا ومش متوفرة .. والإف بي آي مانعين تداولها وشربها
!!! ولازم يشوفو حل بدل ما فيفتي سنت - المطرب النيجر المشهور- ماهو قالب عليهم الدنيا

ده مش بعيد كمان بعد ما نافورة كتب المدونين .. ما اتفتحت في معرض الكتاب بتاع السنه دي .. نلاقيه ناشر كتاب هو كمان في المعرض الجاي .. ويبقى اسم الكتاب بتاعه
أوباما .. هو للسلام حمامه
!!!!!
----
مافوقتش من حالة التخييل اللي عندي دي غير وانا باحط الجرنان عالمكتب .. لما لقيت جرنان الاهرام بتاع يوم الجمعة تلاته وعششين يناير .. اللي مكتوب في اول صفحه فيه وبالفونط العريض
البوارج الاسرائيلية تقصف غزة .. وليفني تهدد باستئناف مهاجمة الأنفاق
.. وتحتها على طول .. بس بخط أرفع شوية
أوباما يؤكد تقديره للدور المصري ويطالب حماس بوقف اطلاق الصواريخ
!!!!
؟؟؟؟؟؟؟؟؟؟؟؟؟؟؟

.. وافتكرت برضه كلمة كان قالها أوباما بنفسه لما كان في الانتخابات .. لما واحد من الصحفيين سألو
الصحفي : هل معنى ان ابوك اسمه حسين وده اسم مسلم .. انك هتتعاطف مع المسلمين ؟؟
أوباما : لو كان اسم ابويا حسين وده اسم مسلم .. فانا اسمي باراك .. وده اسم يهودي
!!!!!

ملحوظة

.. لما كنت سرحان وباتخيل ان أوباما هيجي معانا بؤجة الخير أو حملة التبرع بالدم
.. تخيلت انه بعدها جه معانا عالبورصه .. ولقيت نفسي محتار .. وباسأل روحي
هل أوباما هيشرب شيشة تفاح بحريني زينا .. ولا هيطلب شيشة أبل أمريكاني !!؟؟

سوووو

الجمعة، 26 محرم، 1430 هـ

!!! أسامة بن لادن

.. يا ددعان .. يا عالم يابتوع السيما
.. في موضوع في سينماتك عن فيلم من وجهة نظري المضمحله .. فيلم حلو قوي
وحاطط كام لينك للفيلم عشان اللي عايز يتفرج عليه

.. ولو أي لينك من اللينكات دي ما اشتغلتش
.. أو بعد ما نزل الفيلم وطلع مش هو اللي انا اتكلمت عليه
.. يبقى عليكم وعلى لماضه
!!! لأنها المفروض كانت تطمن اللينكات دي صح ولا لأ

أي خدمه يا لماضه
نياهاهاهعععععع

سوووو

الاثنين، 22 محرم، 1430 هـ

!! تاج .. بالجريجي

من فتره كده وانا مقاطع حوارات التاجات دي .. مش تنطيط على حد وعهد الله .. بس لأني بعد ما جاوبت التاجين دول .. لقيتني مش هقول حاجه تاني عن نفسي

لغاية مالقيت ست ام زعبولا .. باعتالي تاج جالها من كريستال لبنى .. تاج بـالجريجي .. خصوصا انهم هم الاتنين دول ثقافتهم ومدوناتهم بيكتبوها جريجي .. سبحان الله يعني
!!! لدرجة اني كل ما ادخل مدوناتهم الاقيهم بيفكروني ببنات اخويا بتوع البوب كورن و البروفر البربر

!!! اللي شدني أجاوب التاج ده .. انه في هيئة اسئلة .. ويتجاوب عليها بأغاني

ومن هنا .. قررت اني اجاوب التاج .. بس بدل ما الاغاني كانت المفروض تشتغل عشوائي زي ماهو مطلوب .. هنمشيها الاغنية اللي تجاوب على السؤال
خاصةً ان الحكومه ناويه تحارب العشوائيات في الخطة التُساعيه اللي بعد الخطتين العُشاريتين اللي جايين .. ولا انتي ضد الحكومه يا ام زعبولا ؟؟؟؟

!! وفعلا .. جبت الديكشنري .. وقلت يا مُليّن
------
1.IF SOMEONE SAYS “IS THIS OKAY” YOU SAY?
لو حد قاللك (كده أوكيه) .. هتقوللو ايه ؟؟
أشكرك .. آي سانك يو * استاذ / محمد العجوز
-----
2.WHAT WOULD BEST DESCRIBE YOUR PERSONALITY?
ايه أحسن وصف .. لشخصيتك ؟؟
انا لا مسطول ولا باتطوح * حماده هلال

-----
3.WHAT DO YOU LIKE IN A GUY/GIRL?
ايه اللي بيعجبك في البنت ؟؟
أنا مش بتاعة الكلام ده * شيرين
-----
4. HOW DO YOU FEEL TODAY?
عامل ايه النهارده ؟؟؟
ايديا في جيوبي وقلبي طِرب * منير
-----
5.WHAT IS YOUR LIFE’S PURPOSE?
عايش ليه .. لا مؤاخذه يعني !!!؟؟
يمكن أفرح .. يمكن أضحك .. يمكن أطلع مـ اللي انا فيه * وجيه عزيز
-----
6.WHAT DO YOUR FRIENDS THINK OF YOU?
صحابك .. شايفينك ازاي؟؟
سوووو يا سوووو * منير
-----
7. WHAT DO YOU THINK OF YOUR PARENTS?
ايه رأيك في أهلك ؟؟
أحسن ناس .. سوهاج .. بلد المواويل .. سوهاج .. دي عروسة النيل * داليدا

-----
8.WHAT DO YOU THINK ABOUT VERY OFTEN?
ايه اللي شاغل تفكيرك وواكل نافوخك ؟؟
إن ما قدرتش تضحك .. ما تدمعش .. ولا تبكيش * وجيه عزيز
والكليب بتاع أحمد زكي .. من فيلم هيستيريا
-----
9.WHAT DO YOU THINK OF YOUR BEST FRIEND?
ايه رأيك في أعز صاحب ليك ؟؟
يو .. آر .. سوووو .. ديير * بنوته عسوله .. بتغني بالجريجي برضك
-----
10.WHAT DO YOU THINK OF THE PERSON YOU LIKE?
ايه رأيك في الشخص اللي بتحبه ؟؟
حبيبي شغل كايرو .. مافيش في القلب غيرو * شكوكو
-----
11.WHAT IS YOUR LIFE STORY?
ايه قصة حياتك ؟؟
حكايتي مع الزمان * وردة
-----
12.WHAT DO YOU THINK WHEN YOU SEE THE PERSON YOU LIKE?
بتحس بإيه .. لما تشوف اللي بتحبه ؟؟
بيأكلوك مربى ويلبّسوك حرير .. ويبخروك بشطه ودَه كلّو مش كتير * استاذ / عباسط حموده
-----
13.WHAT DO YOUR PARENTS THINK OF YOU?
إيه رأي أهلك فيك ؟؟
غلطة * هاني شاكر
-----
14. WHAT WILL YOU DANCE TO AT YOUR WEDDING?
هترقص على ايه يوم فرحك ؟؟
كركشنجي دبح كبشه * احمد عدوية
-----
15. WHAT WILL THEY PLAY AT YOUR FUNERAL?
هيشغلو ايه في جنازتك ؟؟
اللي عاوزني يجيني يجيني .. انا مابروحش لحد * استاذ / مجدي طلعت
-----
16.WHAT IS YOUR HOBBY/INTEREST?
ايه هوايتك واهتمامك ؟؟
الهبؤبؤ .. الهبؤ * مش عارف مين وكتاب الله
-----
17. WHAT IS YOUR BIGGEST SECRET?
ايه اكبر سر في حياتك ؟؟
انا قلبي برج حمام .. هج الحمام منه * منير
-----
18.WHAT DO YOU THINK OF YOUR FRIENDS?
ايه رأيك في صحابك ؟؟
عاشو والله عاشو * ميامي الكويتية
-----
19. WHAT SHOULD YOU POST THIS AS?
المفروض الموضوع ده يبقى ايه ؟؟
ضحك ولعب وجد وحب * عبد الحليم حافظ
-----
20. WHAT DO YOU THINK OF YOURSELF?
إيه رأيك في نفسك ؟؟
القاتل .. خلي بالك منه * هنيدي وبُشرى
-----
لغاية هنا وخلص التاج .. والجميل فيه واللي ميزه - من وجهة نظري - عن تاجات كتير .. هي فكرة التاج نفسه .. مش مجموعة أسئلة وكأن الواحد قاعد في لجنة امتحان .. ولازم ينجح ويطلع الأول

والتاج اهو قدامكم .. اللي عايزه ياخده ويجاوب براحته .. ومُترجم اهو يا خيخه عشان ماتقوليش مش عارف ايه .. أي نعم اللي مترجمة زي مايكون صبي قهوة .. بس شغال يعني وبيقول يابنفسج

آه .. قبل ما اخلع .. لو بصيتو تحت كل سؤال .. هتلاقو الاغنية نفسها معمولة لينك
.. وسبحان الله لو دستو عليه .. ياخدكو عالغنوة طوالي
.. إيشي خيال يا نااااااس
!!! اليابانيين دول ولاد ايه .. تقولش صينيين ياجرع

سوووو

الاثنين، 15 محرم، 1430 هـ

!! ماما سوووو

!!! إلحج يا باشمهندس .. الشارودة اللي عالسطوح هتولد وعايزك معايا
---
كانت دي الجمله اللي قالهالي اسماعين البواب بمجرد ما سبت الغسيل اللي كنت باغسلو ورحت فتحتلو
!!! باب الشقه .. ومعنى كلامه إن النعجة اللي عالسطوح بتولد .. وعايزني معاه

طلعت معاه وانا مش فاهم هعمل ايه ولا ازاي .. انا اصلا عمري ما شفت أي حد بيولد قدامي عالهواء مباشرة .. لا بني أدمين ولا حيوانات .. بالرغم من اني كنت
مربي قطط بالعبيط .. بس ماشفتش عملية ولادة قبل كده
اول ما طلعنا عالسطوح لقيت النعجة نايمة عالارض وبتمأمأ وصوتها فيه حشرجة غريبه .. ولقيت البواب راح جاري وماسكها من رجليها القداميين وبيبص في وشها .. وبانت عليه ملامح القلق
اسماعين : يالهوي يالهوي .. ساعدني ياباشمهندس عشان شكلها هتموت
سوووو : - وانا في قمة القلق والتوتر- اساعدك اعمل ايه طيب !!؟؟
اسماعين : امسك رجليها الورانين .. ووجّفها عليهم .. ودخّل ايدك اسحب الخروف
!!!!!!!!!!!!!!! سوووو : نعم
اسماعين : دخّل ايدك واسحب الخروف ياباشمهندس
سوووو : ادخل ايدي فين يا اسماعين .. وخروف ايه اللي اسحبه !!؟؟
اسماعين : ياباشمهندس بسرعة مافيش وجت .. ده هتموت مننا .. دخّل ايدك بسرعة
!!!! سوووو : أدخل ايد مين .. ايدي انا .. وادخلها فين .. انت اكيد بتشتغلني
.. وقعدت أتلفت حواليّ .. قلت يمكن تكون دي فقرة في الكاميرا الخفيه بتاعة رمضان الجاي
!!! ويمكن ابراهيم نصر متنكر في هيئة النعجة .. ولا الخروف ذات نفسه
اسماعين : ياباشمهندس بسرعه مافيش وجت .. النعجة وولدها هيموتو لو ما دخلتش ايدك وسحبته
وهنا حسيتني زي ما اكون حاوي .. اقلع البرنيطه اللي لابسها وأدخّل ايدي اسحب منها ارنب لونه ابيض .. بس على الاقل الحاوي بيدخّل ايده في البرنيطه .. انا بقى استغفر الله العظيم .. هدخّل ايدي في .. سامحني يارب
اسماعين : هاا .. طالع الجَرن ولا الدَنبه؟؟
سوووو : خبر ايه يا اسماعين .. ماتكلمني كلام مفهوم .. جرن ايه ودنبة ايه في الليلة الطين دي ؟؟؟
اسماعين : يعني اللي طالع قدامك .. راس الخروف ولا ديله ؟؟
سوووو : طالع ديله .. هو المفروض انهي اللي يطلع الاول ؟؟؟
اسماعين : يالهوي يالهوي يالهوي .. ده كده ممكن يتخنق
سوووو : بقولك يا اسماعين .. مش ناقصه توتر الله يكرم اللي خلفوك .. المفروض اللي يطلع الدماغ ولا الديل ؟؟
اسماعين : الراس هي اللي المفروض تطلع الاول
سوووو : طب والحل .. هنعمل ايه !!؟؟
اسماعين : اسحب ياباشمهندس .. اسحب بسرعه احسن يموت جوا مخنوق
يادي الليلة اللي مش باينلها ملامح .. قعدت اسحب .. وفي حاجات غريبة ولزجه على جسم الخروف الصغير اللي باسحبه .. حاجات دافيه وريحتها مراااار .. والخروف نفسه جسمه دافي .. وامه قاعدة بتمأمأ وصوتها عمّال يعلى وجسمها بيرخي واعصابها بتفلت .. وانا باسحب .. واسماعين البواب بيقول يالهوي .. وانا باقول سامحني يارب
اسماعين : هاا .. طلع منه كد ايه يا باشمهندس؟؟
سوووو : طلع نصة التحتاني .. بس نصة القداماني معصلج
اسماعين : طب كمّل يا باشمهندس .. هانت آهي
سوووو : طب مايمكن اللي مانع طلوع نصه القداماني يا اسماعين .. قرون الخروف .. احسن تكون شابكه في حاجه جوا ولا بتاع .. واموّت النعجة وانا باسحبه !!!؟
اسماعين : ياباشمهندس الجرون مش بتطلع دلوجتي
سوووو : لا ياراااجل .. امال بتطلع امتى ؟؟؟؟
اسماعين : ولّد الخروف الاول وبعدين نبجو نشوفو .. مش وجت حديت دلوجتي ياباشمهندس
سوووو : باشمهندس ايه بقى .. انت خليت فيها باشمهندس .. ده انا بقيت ولا الدادة وداد حمدي .. وياريتني دادة بني أدمين .. ده انا بقيت دادة خرفان
وسمّيت الله .. ورحت ساحب بكل مافيّ من عزم .. قمت واقع عالارض والخروف في حجري
!!! وفجأه كده لقيت في حاجه لزجة ودافيه .. راحت طالعه من النعجة في وشي عِدِل
اسماعين : ياكرم الله .. اجطع الحبل يا باشمهندس .. اجطعه وشمم الخروف بصلة جوام
سوووو : لا لا لا .. انا لغاية هنا وبِخ .. حبل ايه وبصلة ايه .. قوم انت اعمل الباقي انا مش طايق نفسي ولا طايق الخروف .. ولا طايقك انت اصلا
وقام اسماعين جاب بصلة وسكينه من أوضة الخزين اللي عالسطح .. وجه راح قاطع الحبل السُري .. واداني بصلة مقسومه نصين وقاللي اشمم الخروف الصغير عشان يفوق ويمأما .. خصوصا انه قعد في حجري وهو ساكت
قعدت اشمم الخروف البصله واحطها قدام مراخيره .. شوية بشوية الخروف ابتدا يعطس .. وراح ممأمأ مأمأآيه صغنونة قوي .. بصيت على اسماعين وانا باستفهم منه ايه الحوار يعني بعد كده
لقيت اسماعين قعد عالارض وهو مُنهك القوى .. وراح مطلع سيجارة من علبة السجاير .. ومولعها وهو باين عليه الاطمئنان .. وفهمت من حركتة دي إن الحمدلله عدينا مرحلة الخطر
اسماعين : مبروك يا باشمهندس - وهو بيضحك - اللي جابلك يخليلك
!!!!!!
لسه هقوم عشان امسك في رقبته على تريقته دي .. لقيت الخروف بيمأما وبيتمسّح في .. لوهلة لقيتني شلت الهم قوام قوام .. يالهوي .. الخروف بيتمسّح في بجد .. يكونش فاكرني ابوه .. يالهوي .. طب هصرف عليه منين .. هدخلو حضانه ازاي .. وحضانة ايه اللي ممكن تقبل خرفان .. وبعد ما يخلّص الحضانة هاجيب مصاريف مدرسته ودروسه الخصوصية ازاي ..
انا لازم ادوّر على شغلانه بعد الضهر عشان الاحق عالمصاريف

طب لو نجح في ثانوي وجاب مجموع حلو .. اخليه يدخل كلية ايه .. ولا اسبلو مطلق الحريه .. انا هاسيبه يختارالكليه اللي على مزاجه .. وبعد ما يتخرج .. لازم اشوفلو واسطه عشان يشتغل .. ماهو انا مش هاسيب ابني من غير شغل

ما داهية كمان لما يكبر ويبقى طالوقه وعايز يتجوز .. الاقيه جاي بيقوللي دوّر لي على عروسه يابا .. واروح واخده كده من ايده ولا رجله .. ورايحين نخطبلو نعجة بنت خرفان محترمين .. وطبعا لازم وانا رايح اعمل زي ما عملت لما رحت إحدى زيارات جواز الصالونات .. وكنت واخد معايا تورتة آيس كريم من النوع المفتخر
بس الخرفان اللي هنروحلهم اجبلهم تورتة آيس كريم بطعم ايه ..
فانيليا ولا برسيم !!!؟

.. وياسلام بقى لو رحت حَجّيت .. الناس لما ارجع هتقولي مبروك يا حاج ابو خروف
!! والحاج ابو خروف راح .. الحاج ابو خروف جه .. هيبة برضك يعني
.. ويا سيدي بقى لو فكرت اعمل مشروع وافتح سوبرماركو مثلا .. لأ .. انا هافتح علافة
!!! وهاكتب عالمحل ..
علافة الحاج سوووو وابنه الاستاذ خروف
!!! اسماعين : إلحج ياباشمهندس .. ده ماسك في صباعك عيرضع فيه .. فاكرك امه
!! فعلا لقيت الخروف ماسك صباعي وبيرضع فيه .. ده كده مش فاكرني ابوه .. ده فاكرني امه
.. لأ كده بقى الاحلام كلها هتتغير .. ماهي غريزة الأمومة غير غريزة الأبوبة
هو في حاجة اسمها غريزة أبوبة ؟؟؟؟

واساسا اساسا انا ليه تخيلت انه خروف دكر .. مش يمكن يطلع خروفه نتايه .. دي لو طلعت نعجه هدلعها آخر دلع .. هاجبلها احسن هدوم واحسن ميك آب .. وهششورلها شعرها عشان يبقى ناعم وشكلها يبقى حلو .. وهعلّمها فنون الطبيخ وترويق البيت .. قصدي ترويق الزريبة .. آه امال .. انا بنتي لازم تبقى احسن نعجه في العالم .. هعلّمها ازاي تعمل صينية درة بالباشميل .. و ازاي تعمل طاجن برسيم بالفول الاخضر .. ياسلام بقى لو اتقدملها الخروف ابن الحلال
!!! ياما نفسي اشوفها في الفستان الابيض
اسماعين : تاخد سيجارة ياباشمهندس
سوووو : - وانا متعفرت ووشي مكرمش - اطفي السيجاره دي .. انت عايز الخروف يبقى عنده حساسيه ولا ايه !!!؟؟؟

سوووو

الخميس، 11 محرم، 1430 هـ

آخرتها ايه !!؟؟

!! آخرتها كام متر قماش .. وحتة قطنه .. وفُل على كده
سوووو