طول عمري باكتئب لما بيهل علي شهر اغطسطس .. يمكن عشان ده الشهر اللي اتولدت فيه واللي لما بيجي بافتكر اني كبرت سنه من غير ما احس بقيمة حاجه عملتها ولا بتاع
ويمكن برضه لانه من اكثر شهور الصيف سخونه وانا بطبعي تخين وبكرش وباكره اني اروح البحر عشان انزل الميه لاني ساعتها هاقلع هدومي ويبان العار
بس المره دي انا فعليا تأكدت ان شهر اغطسطس مش ماشي معايا ولا ماشي مع هوايا خاااالص
------
يوم الاربع بافتح الجهاز بتاعي عادي خالص عشان اخش عالنت اعمل شوية حاجات لقيت في رساله طالعالي من شركة لينك اللي انا مشترك فيها بتقولي ان علي مبلغ 370 جنيه ونتيجة لعدم دفعي المبلغ ده فصلو الخدمه عني
كان ده رد فعلي لاني بادفع دايما اي فلوس متأخره علي .. قلت لأ بقى
انا هتصل ببتوع خدمة العملا واقولهم عالحوار
اتصلت واتلطعت لمدة تلاته واربعين دقيقه على ماحد فضيلي ولما بقولو كزا كزا كزا .. قاللي هو الواضح عندي ان حضرتك فعلا عليك المبلغ ده والخدمه مفصوله عنك
زي مايكون بسم الله ماشاء الله انصح اخواته
طب مانا عارف ياعم ان الخدمه مفصوله بس عايز اعرف المبلغ ده جه منين؟؟؟
لأ حضرتك تروح للشركه وتستفسر عن الموضوع ده
طبق رد الفعل اللي حصل ساعة ماشوفت المبلغ
---------
توكلت على الله واتجهت للشركة وبما اني اعرف واحد صاحبي اسمه هاني امام - اخو انتيمي احمد امام - شغال هناك قلت يبقى ان شاء الله هخلص بدري بدري والحق كام مشوار شغل عندي
دخلت من باب الشركة القزاز السيكوريت - والباب ده ليه دور حيوي في القصه - ورحت رايح اخد رقم وانا بهزر مع الشاب اللي بيدي الارقام وبيقولي اي خدمه .. قلتله وانا مبتسم الحقيقه انا جاي اتخانق وعايز رقم اتخانق بيه
رد علي بابتسامه برضه وراح مديني رقم
قعدت مع جملة الناس اللي قاعدين مستني دوري في الخناق .. والغريب ان المفروض يكون في اربع موظفين لخدمة العملاء لكنني لقيت اتنين بس منهم .. ومالقتش هاني صاحبي اللي انا رايح ومعتمد على الله ثم عليه في ان الحوار بتاعي يخلص بسرعه .. ولقيت موظف من الاتنين دول واحد محتاس يا عين امه في مشكله مع واحد ومش بيتكلم مع اي عملا تانين .. وبالتالي الضغط كللو كان على شاب كده شكله صغنطوط في السن .. وعنده بتاع واحد وعشرين سنه ولا اتنين وعشرين سنه .. وشكله كده جاي الشغلانه دي بواسطه .. ولانه ماتبهدلش في حياته ولا نزل الشارع قبل مايتخرج من محهد كومبيوتر .. فتحسو انه بيغرق في شبر ميه مع كل عميل بيكلمه
المهم .. قلت اسلي نفسي واتفرج على التلفزيون في الشاشه الال سي دي المحطوطه واللي كانت عماله تعرض سباق عربيات .. وانا باموت في العربيات اصلا ومستني اتفاقية الجات تتطبق صح عشان اجبلي عربيه نوعها اوعى وشك موديل الفحت الفحت الفحت .. لكن شكل الاتفاقيه دي ولا هتتطبق ولا هتتنيل طول ماحنا في العصر المبارك اللي احنا فيه
اخيرا جه الدور علي بعد اربع ساعات قعدة وفرجه عالعربيات والمواتير لدرجة اني بقيت ميكانيكي درجة اولى
رحت للاخ اللي قلتلكم عليه في الاول واللي الضغط كللو عليه ياعين امه .. قاللي خير .. قلتله والله في عندي مشكله كزا كزا وده رقم تليفوني
قعدت يخبط شويه عالكيبورد ويكتب في حاجات وسايبني واقف قدامه بتاع نص ساعه مثلا وهو قاعد على كرسي بار ومريح رجليه وانا لاني تخين فرجلي بتشد علي من الوقفه .. مريض بقى
المهم .. قام بعدها وراح للبرنتر اللي جنبه وسحب منها ورقه كان بيطبعها .. ورجعلي ولقيته بيبص في الورقه وبيقولي لا حضرتك المبلغ اللي حضرتك هتدفعه مش تلتميه وسبعين جنيه .. قلت في عقل بالي الحمدلله ظهر الحق وزهق الباطل .. قاللي حضرتك المبلغ بالظبط بالظبط .. ربعميه خمسه واربعين جنيه وتلاتين قرش
رد الفعل ده ملازمني طول اليوم بطريقه غريبه ,, قلتله ازاي بقى الكلام ده .. راح حاطط الورقه قدامي وقالي ركز معايا .. وعايز الكل يركز في الحته اللي جايه
حضرتك في شهر اغطسطس سنة الفين وخمسه مادفعتوش .. اضافة الى اننا كنا عملنا اوفر عشان الناس المشتركه في خدمة النت من سنة الفين واتنين ورخصنالهم ايجار الراوتر وعملنا كده غلط مع حضرتك .. ولما عرفنا انك مشترك في الخدمه من سنة الفين وخمسه شيلنا الاوفر ده من حسابك .. وبالتالي حضرتك لازم تدفع الفرق في الايجار اللي احنا غلطنا وحسبناه لحضرتك .. وفي حضرتك شهر اغطسطس سنة الفين وسبعه وحضرتك مادفعتوش برضه .. وبالتالي يبقى الاجمالي اللي حضرتك لازم تدفعه ربعمية خمسه واربعين جنيه .. وتلاتين قرش
!!! عروستي
!!! لأ بجد عروستي
يعني ايه شهر اغطسطس الفين وخمسه مادفعتوش وانا ساعتها كنت باتعامل مع شركة فيرست اللي انتو مكلفينها انها تحصل الفلوس واللي عمرها في يوم ما اتأخرت علي
؟؟؟؟؟
ويعني ايه شهر في سنة الفين وخمسه ما اتدفعش وانتو نسيتو خالص لمدة سنتين وجاين تتكلمو عنه دلوقتي
؟؟؟؟؟؟
ويعني ايه غلطتو وخصمتو من ايجار الراوتر بتاعي وبتطالبوني اني انا اللي اصلح غلطتكم
؟؟؟؟؟؟؟
وازاي ماحدش اتكلم من بتوع التحصيل لما جيت ودفعت آخر مره وقاللي اني مادفعتش شهر اغطسطس
؟؟؟؟؟؟
لقيته تنح ومش عارف يتكلم يا ضنايا .. رحت سايبه وانا متنرفز وعلى آخري ومتجه على باب الخروج .. مش عشان امشي قد مانا متجه للباب اللي جنب باب خدمة العملاء .. واللي فيه الاداره بتاعة الشركه
وبمجرد ما فتحت باب الشركة القزاز السيكوريت .. ومشيت خطوه في التانيه في التالته سمعت صوت تشششششش
ابص ورايا.. الاقي ضلفه من الباب تحولت لحبيبات تلج
الري أكشن ده انا شكلي هصاحبه وهعملو في كل حياتي بجد
لقيت الموظف اللي اداني الرقم بتاعي في اول الحدوته خالص طالع يجري ورايا وبيقولي لو سمحت يا استاذ اتفضل معايا لحظه .. قلتله وانا على اخري .. وهو انا هجري منك .. انا طالع على المدير ولا المسئول بتاعكم افهم ايه السرقه دي .. قالي خلاص يافندم حضرتك اتفضل معايا جوه وانا هبلغ المسئولين
بيني وبينكم .. انا فرحت قوي انه هيبلغ المسئولين .. لأني من زمان قوي نفسي اتعرف عالاستاذ لينك ذات نفسه واضرب معاه صحوبيه واهو يمكن يقوللي عايزك توضبلي شقتي في مرتفعات جولف اسيوط .. او حتى في دار السلام هايتس .. انشالله حتى لو كانت شقه في السيده زينب جاردنز .. باعتبار اني مهندس ديكور وسمعتي انضف من الاطباق البلاستيك بتاعة الكشري اللي بيجيب فيرس سي بتاع الشوارع
دخلت الاوضه ورحت متصل بهاني صاحبي بس لقيته مابيردش .. رحت متصل باخوه الكبير احمد .. لقيته نايم .. قلتله ابعتلي اخوك في الشركة بتاعة لينك عشان انا كسرتلهم الباب السيكوريت ابو الفين جنيه .. و شكلها كده هبات في الحجز بتهمة ازدراء اديان .. قاللي طب خد اخويا كلمه اهو .. وانا باتكلم مع اخوه لقيت شخص كده هيبه دخل علي الاوضه .. صاحبي بيقوللي انت فين دلوقتي .. قلتله انا في المكتب اللي عالشمال اول ماتدخل من باب الشركة .. قالي اه .. وفي حد معاك ولا انت لوحدك .. قلتله لأ في معايا استاذ .. ورحت باصص للراجل اللي دخل وقلتله معلش بس اسم حضرتك ايه .. قاللي كريم .. كريم سوكا - عايزكم تفتكرو الاسم ده كويس - رحت قايل لصاحبي انا في المكتب ومعايا استاذ كريم .. لقيت صاحبي بيقولي وهو خايف .. استاذ كريم !! كريم سوكا !!! قلتله اه
سكت هنيهة كده وقالي بصوت فيه نبره (لا حول ولا قوة الا بالله .. وانا لله وانا اليه لراجعون) طب يا سوووو .. انا جايلك حالا
مش قلتلكم رد الفعل ده بقى صديقي الصدوق
استاذ كريم زي ما سبق وقلت .. ليه هيبه كده وبيفكرني باحمد زكي في فيلم زوجة رجل مهم .. لقيته راح قاعد ومبتسم .. وكاد ان يخلع ساعته
ولكن الله سلم .. وقاللي وهو مبتسم .. ايه المشكله
قلتله حصل كزا كزا ولقيت الموظف بتاع الفرانت ديسك بيقوللي ان في شهر اغطسطس الفين وخمسه لسه مادفعتوش وبيقوللي ان حصل غلط في خصم ايجار راوتر والمفروض مايتخصمليش ومن الاخر كده انا حاسس اني باتحمل غلطات الاخرين مع اني لما باغلط في شغلي باتحمل نتيجة غلطتي وبادفع كامل المصاريف من جيبي الخاص وما اقولش للعميل اللي انا باعمللو الشغل اني غلطت عشان ابسط حاجه احافظ على شكلي قدامه اني قد كلمتي .. لكن اللي حصل معايا بيؤكدلي بما لا يدع مجال للشك ان في اخطاء كتير بتحصل هنا ومابيتمش محاسبة المخطئين وبيتم تحميل كل ده عالعميل
الراجل قاللي طب ثانيه واحده وقام
انا قلت بس .. هيجبلي بوليس الاداب ويلفوني في ملاية من عندهم ويلفقولي قضية فعل فاضح .. اضافة الى قضية ازدراء الاديان
رحت مكلم صاحبي وشريكي في الشغل .. حسن ناجي وقلتله تعالى عشان شكلي كده هروح في ابو نكله .. فوجدته هب لانقاذي - حلوه قوي كلمة هب دي .. محسساني اني مصاحب اسد مثلا
جالي حسن صاحبي في سرعة البرق وكان ساعتها استاذ كريم بيتكلم معايا والراجل بمنتهى الشياكه والجنتله قاللي يافندم احنا هنشيل المبلغ بتاع شهر اغطسطس الفين وخمسه .. وهنشيل المبلغ بتاع ايجار الراوتر اللي غلطنا فيه .. ومش هيفضل غير شهر اغطسطس الفين وسبعه .. وده لو حضرتك كنت دافعه شوفلنا الايصال .. ولو ماكنتش دافعه فممكن تدفعه دلوقتي ولو حضرتك لقيت الايصال يبقى يتحول المبلغ ده لشهر نوفمبر اللي احنا فيه دلوقتي
صراحه صراحه صراحه .. اذبهليت .. الراجل حل المشكله بعقل وهدوء وكياسه يحسد عليها الحقيقه
وقصاد شياكته في التعامل دي رحت قايللو وانا معاك في كل كلامك تمام .. وهبعت لحضرتك حد ياخد مقاسات الباب السيكوريت اللي اتكسر واركبه في اقرب وقت
لقيته بيقوللي .. باب ايه .. الباب وقع لوحده يافندم وحضرتك ماعملتش حاجه
مش بقوللكم رد الفع ده بقى انتيمي خلاص
-----------
انتهى الموضوع على كده .. وعلى اني اشوف الايصال بتاع شهر اغطسطس الفين وسبعه ولو مالقيتهوش يبقى ادفعه
وده مش مشكله .. مع اني بصيت في السايت بتاع الشركه ولقيت اني بالرغم من اني دافع كل الفواتير في كل الشهور من اول ما اتعاقدت معاهم لغاية دلوقتي .. في علي 60 جنيه .. وانا مش فاهم الستين جنيه دول بتوع ايه
بس شكلها لازملها روحه تانيه لهناك
بس ان شاء الله .. المره دي من غير تكسير حاجه
--------------
شكر خاص
شكر خاص لـ أحمد امام واخوه هاني امام اللي شغال في شركة لينك واللي قاللي انه جايلي لما سمع اني باتكلم مع الاستاذ كريم سوكا
!! شكر خاص لحسن صاحبي وشريكي وعشرة عمري .. واللي هب لنجدتي كما تهب الاسود لأكل الفريسه
شكر خاص جدا جدا جدا جدا لاستاذ كريم سوكا واللي باتمنى انه يقرا الموضوع ده .. ويسلملي على الاستاذ لينك ابن الحاج دي اس ال سلام حار جدا .. ويبوسهولي من هنا ومن هنا .. ويقوللو لو محتاج اي شغل تشطيبات وديكور.. في مهندس اسمه سوووو دماغه مطرقعه
وشكر خاص للسيد رئيس المجلس المحلي واللي ناوي انه يسفلت الشارع بتاعنا بقاله عشر سنين
وشكر خاص للسيد عم سيد البقال اللي بيديني السجاير البوكس بسعر اتنين جنيه ونص مش بتلاته جنيه الا ربع
--------------
سؤال يدور في ذهني .. ليه كل المصايب بتحصل في شهر اغطسطس .. بداية من مولدي .. لغاية الشهر اللي ماتحسبش وبيتم مطالبتي بدفعه .. سواءا في سنة الفين وخمسه .. او الفين وسبعه ؟؟؟
!!! ربنا يستر علي في شهر اغطسطس .. الفين وتمانيه
..: ملحوظه
شهر اغطسطس سنة الفين وسته .. تعرضت لعملية تثبيت في منطقة شق التعبان .. وتم ضربي بسنجة في ايدي عشان عملت فيها عبده بوند ومارضتش ادي اللي بيسبتوني اي حاجه .. وسيلي سرد التفاصيل في موضوع لااااااااحق
سوووو